Olonze Ahantu Hinja h’Okujirira Ifunzo

Ka wanalonza oyunguke bwenene kugerera ifunzo lyawe wenene? Okukolesa amahano gakulikire kwanakurhabala osegeze obwenge bwenene kw’ebi oli wayiga amango g’ifunzo lyawe:

• Ocishoge ahantu hinja h’okuyigira. Akaba byanahashikana, ocishoge ahantu hacîre hanali bulangashane bunji ly’obona bwinja ebi oli wasoma. Wanatamala ahantu hali ameza, erhi kucishoga enafasi nyinja aha mbuga.

• Olonze ahantu waba wene. Yezu akag’icishoga okusalira “sezi muceracera” ahantu ‘harhali bantu.’ (Mk. 1:35) Erhi akaba kuli kuzibu okupata ahantu waba wene, wanamanyisa omulala gwawe erhi abantu muba mulamire mweshi lugenda eprograme yawe y’ifunzo, n’okubahûna barhakag’ijira olubi omu nsa zawe z’ifunzo.

• Ogendekere wasegeza obwenge kw’ebi oli wayiga. Oyake ebyakarhuma orhasegeza obwenge kw’ebi oli wayiga. Erhi akaba oli wakolesa etelefone erhi tablete ly’oyiga, oyihire omu hali yakarhuma erhajira olubi erhi omu mode avion, ly’erharhumaga waja watwa omu ifunzo lyawe. Erhi wakarhanya oku hali kantu kalebe oshinganine ojire n’obo ociri wayiga, okayandike ly’orhayishig’iyibagira okukajira enyuma z’ifunzo. Erhi wakabona orhaciri wasegeza obwenge kw’ebi oli wayiga, obe nka wahumûka hitya ly’olambagira erhi kucikanûla.