Amadoso g’Abantu Basoma Ebicapo Birhu
Mangaci omukolo gw’okuhubiri omwanzi mwinja gwahwa?
Yezu adesire ntya: “Ogu mwanzi mwinja g’Obwami gwayish’iyalizibwa omw’igulu lyoshi, lyo buba buhamirizi oku bantu b’amashanja goshi. Enyuma z’aho, obuzinda bwanayishe.” (Mt. 24:14, NWT) Oluderho lw’Ecigiriki teʹlos lwahindwirwe “buzinda” omu mulongo gwa 6 n’ogwa 13, luhugwîre obuzinda bw’igulu lya Shetani oku Harmagedoni. (Maf. 16:14, 16) Oko kuhugwîre oku, rhwagendekera rhwahubiri omwanzi mwinja kuhika hasigale hisanzi hisungunu embere z’obo buzinda. Oko kukubwîre oku rhwal’ihugûsirwe embere.
Embere rhwal’ihugûsirwe oku rhwayish’ileka okuhubiri omwanzi mwinja hano amalibuko madarhi garhondera omu kusherezibwa kwa Babiloni Mukulu. (Maf. 17:3, 5, 15, 16) Rhwakag’irhanya oku hano amalibuko madarhi garhondera, Yehova arhacish’ihe abantu obulyo bw’okuyumva omwanzi mwinja n’okushanja akalamo kabo. (Iz. 61:2) Kandi, rhwakag’irhanya oku abayish’ifulumuka amalibuko madarhi bashinganine babe bantu bakolire Yehova n’obwishwekerezi embere amalibuko madarhi garhondere. Rhwakag’ibashushanya n’Abayahudi bafulumukaga okusherezibwa kwa Yeruzalemu omu mwaka gwa 607 Embere za Kano Kasanzi Kirhu (E.K.K.K.). Abo bantu bahebirweko ecimanyiso embere z’obo bushereze bulya bakag’iharamya Yehova banal’ishombire amabi. (Eze. 5:11; 9:4) Cikone, oko kushushanya kurhapatini n’enderho za Yezu ziri omu Mateyo 24:14, NWT, ziyerekine oku abantu bayish’iba n’obulyo bw’okuyumva omwanzi mwinja n’okushanja akalamo kabo hisanzi hisungunu embere z’obuzinda oku Harmagedoni.
Okuhugûkwa bwinja olwandiko lwa Mateyo 24:14 kandi kukubwîre oku rhwal’ihugûsirwe omwanzi gw’olubula luzirho nka mabuye guli omu Amafulûlo 16:21. Okushub’iyiga bwenene ogo mwanzi kwayerekine oku ago mandiko gombi gaganirire mwanzi muguma. Omu njira ehi? Ebirhurhabire okuhugûkwa ntyo eri njira Ebibliya eganiriremwo oku abantu bakayankirire omwanzi gw’Obwami. Entumwa Paolo yayandisire oku kuli “abacira,” omwanzi mwinja guli, “kasununu ka buzine.” Cikone oku bashombanyi ba Mungu, guli mwanzi mubi, “kasununu ka lufu.” (2 Kr. 2:15, 16) Banashombe omwanzi gw’Obwami bulya gunakayerekana n’obwalagale oku igulu lyabo liyorha: liba libi, lirhegesirwe na Shetani, linali hofi lisherezibwe.—Yn. 7:7; 1 Yn. 2:17; 5:19.
Kandi obone oku ogo muhusi gw’olubula lw’olwiganyo ‘gwaluga okulushire.’ Oko kuhugwîre oku omu mango g’amalibuko madarhi, omwanzi rhuhubiri gwayish’iba gwa bwalagale bwenene gwanayish’ihikira bantu banji bwenene kulusha agandi mango. Enyanya z’oko, bantu banji bayish’imanya izino lya Yehova. (Eze. 39:7) Mw’ago mango, enyuma z’okusherezibwa kwa Babiloni Mukulu, ka bantu baguma na baguma bayish’ishagalukira omwanzi mwinja nk’oku bakashagalukira akasununu kinja? Byanahashikana bibe ntyo. Nkaba banayish’ikengera erhi kuyiga oku Abahamirizi ba Yehova bajijire myaka minji bali bahubiri lugenda okuhwa kw’idîni ly’obunywesi.
Oko kushushine n’ebyabaga omu Misri ya mîra, enyuma z’Amahanya Ikumi. Enyuma za Yehova ‘okufendûla [okutwa olubanja kuli, NWT] banyamuzinda b’obwihambe b’omu Misri boshi,’ “engabo erhali nyi y’abantu ba ngasi lubero” barhali Baisraheli bacilunga haguma n’abantu bage. (Lub. 12:12, 37, 38) Abo bantu barhali Baisraheli nkaba bajire oluhande lwa Yehova erhi babona ngasi kantu Musa aderhaga kakabire lugenda Amahanya Ikumi kahikirira.
Ngasi muntu wayish’ija oluhande lwa Yehova enyuma z’okusherezibwa kwa Babiloni Mukulu, ayish’iba n’obulyo bw’okulunga okuboko balumuna ba Kristu bayish’iba baciri okw’igulu. (Mt. 25:34-36, 40) Kobinali obo bulyo bw’okutwirwa olubanja nka cibuzi bwayish’ihwa hisanzi hisungunu embere z’ivita lya Harmagedoni hano abashîge amavurha bacisigire hanw’igulu bahâbwa oluhembo lwabo lw’okuja empingu.
Ago mahugûlo g’obwalagale gasegize obuzigire bwa Yehova bunji n’olukogo lwage lunji. Kobinali “arhalonza hajire owahera, ci alonza boshi baciyunjuze.”—2 Pt. 3:9.