යෙරෙමියා

13 යෙහෝවා දෙවි මට මෙසේ පැවසුවේය. “ගොස් ලිනන් රෙදිවලින් සාදාගත් පටියක් ගෙන ඔබේ ඉණ වටා බැඳගන්න. ඊට වතුර වැදීමට ඉඩ නොදෙන්න.” 2 එබැවින් මම යෙහෝවා දෙවි පැවසූ ලෙස පටියක් ගෙන මගේ ඉණ වටා බැඳගත්තෙමි. 3 යෙහෝවා දෙවි නැවත වරක් මට කතා කර මෙසේ කීවේය. 4 “ඔබ ඉණ වටා බැඳගෙන සිටින පටිය රැගෙන යුප්‍රටීස් ගඟ+ ළඟට ගොස් ඒ අසල ඇති පර්වත විවරයක එය සඟවා තබන්න.” 5 එබැවින් මම යෙහෝවා දෙවි අණ කළ ලෙස යුප්‍රටීස් ගඟ ළඟට ගොස් ඒ පටිය සඟවා තැබුවෙමි.

6 නමුත් කලක් ගත වූ පසු යෙහෝවා දෙවි මට මෙසේ පැවසුවේය. “යුප්‍රටීස් ගඟ ළඟට ගොස් සඟවා තබන්න කියා මා ඔබට අණ කළ පටිය නැවත ගන්න.” 7 එබැවින් මම යුප්‍රටීස් ගඟ ළඟට ගොස් පටිය සඟවා තැබූ තැන හාරා එය පිටතට ගත්තෙමි. නමුත් සිදු වී තිබූ දේ බලන්න! ඒ පටියෙන් කිසි ප්‍රයෝජනයක් ගත නොහැකි වන ලෙස එය දිරා ගොස් තිබිණ.

8 එවිට යෙහෝවා දෙවි මට මෙසේ පැවසුවේය. 9 “යෙහෝවා දෙවි වන මම මේ දේ පවසමි. ‘යූදාහි උඩඟුකමත්+ යෙරුසලමේ උද්ධච්චකමත් මා නැති කර දමන්නේ එලෙසය. 10 මාගේ හඬට කීකරු වීමට අකමැති මේ දුෂ්ට සෙනඟ,+ මුරණ්ඩු ලෙස තමන්ට රිසි සේ ක්‍රියා කරති.+ ඔවුහු වෙනත් දෙවිවරුන්ගේ පිහිට පතමින් ඒවා ඉදිරියේ වැඳ වැටෙමින් ඒවාට නමස්කාර කරති.+ එසේ කරන මේ දුෂ්ට සෙනඟට සිදු වන්නෙත් මේ පටියට සිදු වූ දේමය. එනම්, කිසිම ප්‍රයෝජනයක් නැති තත්වයකට පත් වීමය.’ 11 ‘මිනිසෙකුගේ ඉණ වටා බැඳි පටිය ඔහුගේ සිරුරට ඇලී තිබෙන්නාක් මෙන් මම මුළු ඊශ්‍රායෙල් හා යූදා සෙනඟව මා ළඟට ගෙනැවිත් මට සමීපව තබාගත්තෙමි.+ මා එසේ කළේ ඔවුන් මාගේ සෙනඟ වී+ මට ගෞරවයක්ද+ ප්‍රශංසාවක්ද තේජසක්ද ගෙන දෙන පිණිසය. නමුත් ඔවුහු මට කීකරු වූයේ නැත.’+ මෙසේ පවසන මා යෙහෝවා දෙවිය.

12 “ඔබ මේ දේ සෙනඟට කියන්න. ‘ඊශ්‍රායෙල්හි දෙවි යෙහෝවා මෙසේ පවසනවා. “විශාල මැටි බඳුන් තිබෙන්නේ වයින් පුරවා තබන්නයි.”’+ එවිට සෙනඟ ඔබට මෙසේ පවසනු ඇත. ‘සෑම මැටි බඳුනකම වයින් පුරවා තබන බව අපි දන්නවා.’ 13 එවිට ඔබ ඔවුන්ට මෙසේ කියන්න. ‘යෙහෝවා දෙවි පවසන්නේ මෙයයි. “මේ දේශයේ සිටින සියලු වැසියන්ටද පූජකයන්ටද අනාගතවක්තෘවරුන්ටද දාවිත්ගේ පෙළපතින් පැමිණෙන සියලු රජවරුන්ටද+ යෙරුසලමේ වැසියන්ටද මත් වන තුරුම මම වයින් පොවන්නෙමි.+ 14 ඔවුන්ගේ පියවරුන් හා පුත්‍රයන් අතර ගැටුමක් ඇති වීමට සලස්වන්නෙමි.+ එසේ නොකර සිටීමට තරම් අනුකම්පාවක් මට ඔවුන් ගැන ඇති වන්නේ නැත. මට ඔවුන් ගැන කිසි දුකක් දැනෙන්නේද නැත. මම ඔවුන්ට දයාව නොපෙන්වන්නෙමි.”+ මේ දේවල් පවසන මා යෙහෝවා දෙවිය.’

15 “ජනයෙනි, උඩඟු නොවී ඇහුම්කන් දෙන්න.+ මන්ද මේ දේවල් පැවසුවේ යෙහෝවා දෙවිය.+ 16 දෙවි අන්ධකාරය ගෙනෙන්න පෙරත්+ අඩ අඳුරේ කඳු මත දුවන ඔබ, පැටලී වැටීමට පෙරත්+ ඔබේ දෙවි වන යෙහෝවාට ගෞරවය දෙන්න.+ ඔබ එසේ නොකළොත් ඔහු භයංකර ඝනාන්ධකාරයක් ඔබ පිටට පමුණුවයි.+ ඔබ ආලෝකය ලැබෙන තෙක් බලා සිටියත්+ එය ඔබට නොලැබෙනු ඇත.+ 17 උඩඟුකම නිසා ඔබ දෙවිට ඇහුම්කන් නොදුන්නොත්+ මම තනිව කඳුළු සලන්නෙමි. යෙහෝවා දෙවිගේ රැළ මෙන් වූ මේ සෙනඟ+ වහල්කමට ගෙන යන නිසා මම කඳුළු සලමින් හඬා වැලපෙන්නෙමි.+

18 “රජුටත් මව් බිසවටත් මෙසේ පවසන්න.+ ‘හිසේ පැළඳ සිටින ඔබේ අලංකාර ඔටුනු ගලවා දමන නිසා+ සිහසුනෙන් බැස පහළ අසුනකට එන්න.’+ 19 දකුණු දිශාවේ පිහිටි නුවරවල දොරටු වසා තිබේ. ඒවා විවෘත කිරීමට කිසිවෙක් එහි නැත. යූදා දේශයේ වැසියන් සියලුදෙනාවම වහලුන් ලෙස රැගෙන ගොස් ඇත.+

20 “උතුරෙන් පැමිණෙන අය දෙස හොඳින් බලන්න.+ ඔබට භාර දුන් අනර්ඝ රැළක් මෙන් සිටි සෙනඟ දැන් කොහේද?+ 21 ඔබ කලින් හොඳම මිතුරන් ලෙස පිළිගත් අය+ ඔබට විරුද්ධව නැඟී සිටින විට ඔබ කුමක් කියයිද?+ දරුවෙකු බිහි කරන ස්ත්‍රියකට දැනෙන වේදනාවකට සමාන වේදනාවක් ඒ අවස්ථාවේදී ඔබටත් දැනෙනු ඇත.+ 22 ‘මට මේ දේවල් සිදු වුණේ ඇයි’+ කියා ඔබ සිතනු ඇත.+ එවිට ඔබේ වස්ත්‍ර ගලවා දමා තිබෙන්නෙත්+ ඔබේ යටිපතුල් තුවාල වී තිබෙන්නෙත් ඔබ කළ මහත් දුෂ්ටකම් නිසා බව තේරුම්ගන්න.

23 “කූෂ් ජාතිකයෙකුට+ තමාගේ සමේ වර්ණයවත් දිවියෙකුට උගේ ඇඟේ තිබෙන පුල්ලිවත් වෙනස් කරගත හැකිද?+ එසේනම් නපුරු දේ කිරීමට පමණක් පුරුදුව සිටින ඔබට යහපත් දේ කිරීමට හැකි වෙයිද?+ 24 පාළුකරයෙන් හමා එන සුළඟට ගසාගෙන යන පිදුරු මෙන්+ මම ඔවුන්ව සීසීකඩ විසුරුවාහරින්නෙමි.+ 25 ඔබට මම මැන දෙන කොටස එයයි”+ කියා යෙහෝවා දෙවි පවසන්නේය. “ඔබට එසේ වන්නේ ඔබ මා අමතක කර+ බොරු දේවල් මත විශ්වාසය තැබූ නිසාය.+ 26 මම ඔබේ වස්ත්‍ර ගලවා දමා සියල්ලන් ඉදිරියේ ඔබව ලැජ්ජාවට පත් කරන්නෙමි.+ 27 එවිට ඔබ අනාචාරයේ* යෙදුණු හැටිත්+ කාම ආශාවෙන් උමතු වී මෘගයන් මෙන් හැසුරුණු හැටිත්+ ගණිකාවක මෙන් නින්දිතව ක්‍රියා කළ හැටිත් සියල්ලෝම දැනගනු ඇත. කඳු මුදුන්වලත් කෙත්වලත් ඔබ කළ පිළිකුල්සහගත දේවල් මම දුටුවෙමි.+ යෙරුසලමේ වැසියෙනි, ඔබට අද්දැකීමට සිදු වන විපත කොතරම්ද! තව කොපමණ කාලයක්+ ඔබ මෙලෙස අපවිත්‍රව සිටිනු ඇද්ද?”+