උත්පත්ති

18 එක් දිනක් අව් රශ්මිය තදින්ම දැනුණ වේලාවකදී,+ මම්රේහි+ විශාල ගස් අසල කූඩාරම් ගසාගෙන සිටි ආබ්‍රහම් ඉදිරියේ යෙහෝවා දෙවි දර්ශනය විය.+ ඒ අවස්ථාවේදී ආබ්‍රහම් තම කූඩාරමට ඇතුල් වන ස්ථානය ළඟ හිඳගෙන සිටියේය. 2 ඔහු තමා සිටි ස්ථානයට නුදුරින් පුරුෂයන් තුන්දෙනෙකු සිටගෙන සිටිනවා දුටුවේය.+ ආබ්‍රහම් ඔවුන්ව දුටු විගස ඔවුන් ළඟට දුව ගොස් හිස නමා ඔවුන්ට ආචාර කළේය.+ 3 ඉන්පසු ඔහු මෙසේ කීවේය. “යෙහෝවා දෙවියනි, ඔබේ සේවකයා වන මා ගැන ඔබ සතුටු වෙනවා නම් ටික වේලාවකට මෙතැන නතර වී සිටින්න.*+ 4 ඔබේ පාද සෝදන්න මම වතුර ටිකක් ගෙනත් දෙන්නම්.+ ඉන්පසු ගස යටට වී ටිකක් විවේක ගන්න.+ 5 මම ඔබට කන්න රොටි ගෙනත් දෙන්නම්. කාලා ඔබේ විඩාව නිවාගන්න.+ ඊටපස්සේ ඔබේ ගමන ඔබට යන්න පුළුවන්. ඔබේ සේවකයා වන මා ඉන්න තැනට ඔබ ආවේ ඒකටයි.” එවිට ඔවුහු, “ඔබ කී ලෙසම කරන්න” යයි කීවෝය.

6 ආබ්‍රහම් කූඩාරම වෙතට දුව ගොස් සාරාට මෙසේ කීවේය. “ඉක්මන් කර සිහින් පිටි සෙයා මිනුම්* තුනක් අරගෙන, එය අනා රොටි ටිකක් සාදන්න.”+ 7 ඉන්පසු ආබ්‍රහම් රැළ වෙතට දුව ගොස් හොඳ නහඹර වස්සෙකු ගෙන ඔහුගේ සේවකයාට දුන්නේය. එය සූදානම් කරන පිණිස ඔහු ඉක්මනින් ගියේය.+ 8 ඉන්පසු ඔහු වෙඬරුද* කිරිද තමා පිළියෙල කරගත් මස්ද ගෙන ඔවුන් ඉදිරියේ තැබුවේය.+ ඔවුන් ගස යටට වී කන අතරතුරේදී ආබ්‍රහම් ඔවුන් ළඟින්ම සිටගෙන සිටියේය.+

9 එවිට ඔවුහු, “ඔබේ භාර්යාව වන සාරා කොහේද”+ කියා ඔහුගෙන් ඇසූහ. ආබ්‍රහම්, “ඇය කූඩාරමේ ඉන්නවා”+ කියා ඔවුන්ට කීවේය. 10 ඔවුන්ගෙන් එක් කෙනෙක් ඔහුට මෙසේ කීවේය. “ලබන අවුරුද්දේ මේ කාලය වන විට මම නොවරදවාම ඔබ වෙතට පැමිණෙන්නෙමි. ඒ වන විට ඔබේ භාර්යාව වන සාරාට පුත්‍රයෙක් සිටීවි.”+ එම මිනිසාට පිටුපසින් තිබූ කූඩාරමේ සිටි සාරා, ඔහුගේ කතාවට සවන් දෙමින් සිටියාය. 11 ඒ වන විට ආබ්‍රහම් සහ සාරා සිටියේ වයස්ගතවය.+ සාරාගේ ඔසප් වීමද නතර වී තිබිණ.+ 12 එබැවින් සාරා සිතින් සිනාසී,+ “දැන් හොඳටම වයසට ගිහින් ඉන්න මටයි මගේ ස්වාමියාටයි ඒ වගේ සතුටක් අද්දකින්න පුළුවන්ද” කියා කීවාය.+ 13 එවිට යෙහෝවා දෙවි ආබ්‍රහම්ට මෙසේ කීවේය. “‘වයසට ගිහින් ඉන්න මම+ කොහොමද දරුවෙක් බිහි කරන්නේ’ යයි පවසමින් සාරා හිනා වුණේ ඇයි? 14 යෙහෝවා වන මට කළ නොහැකි දෙයක් තිබේද?+ ලබන අවුරුද්දේ හරියටම මේ කාලයේදී මම නැවත ඔබ වෙතට පැමිණෙන්නෙමි. ඒ වන විට සාරාට පුත්‍රයෙක් සිටීවි.” 15 සාරා භය වී, “මම හිනා වුණේ නැහැ” යයි කීවාය. එවිට, “ඔබ හිනා වුණා” යයි දෙවි කීවේය.+

16 පසුව ඒ පුරුෂයෝ තුන්දෙනා එතැනින් නැඟිට සොදොම්+ නුවර දෙස බැලුවෝය. ඔවුන්ව ඇරලවන පිණිස ආබ්‍රහම් ඔවුන් සමඟ ටික දුරක් ගියේය.+ 17 එවිට යෙහෝවා දෙවි මෙසේ කීවේය. “මා කිරීමට අදහස් කරන දේ ආබ්‍රහම්ට නොකියා සිටිනවාද?+ 18 සැබවින්ම ආබ්‍රහම්ගෙන් බලවත් ජාතියක් බිහි වන්නේය. ඔහු මාර්ගයෙන් පොළොවේ සියලු ජාතීහු ආශීර්වාද ලබාගන්නෝය.+ 19 මම ආබ්‍රහම්ව හොඳින් දැන හඳුනා ගෙන සිටිමි. යෙහෝවා වන මා පෙන්වන මාර්ගයේ ගමන් කිරීමටත් ධර්මිෂ්ඨකම සහ යුක්තිය+ ඉටු කිරීමටත් ඔහුගේ පුත්‍රයන්ට හා ඔහුගෙන් පැවතෙන සියලුදෙනාට උගන්වන පිණිස මම ඔහුව තෝරාගත්තෙමි. යෙහෝවා දෙවි වන මම ආබ්‍රහම්ට පොරොන්දු වූ දේ අනිවාර්යයෙන්ම ඉටු කරන පිණිස එසේ කළෙමි.”+

20 යෙහෝවා දෙවි තවදුරටත් මෙසේ කීවේය. “සොදොම් සහ ගොමෝරාවට විරුද්ධව නැඟෙන චෝදනා අතිමහත්ය.+ ඔවුන්ගේ පාප ඉතා බරපතළය.+ 21 එබැවින් ඔවුන්ගේ ක්‍රියා සෝදිසි කර බැලීමට මම තීරණය කළෙමි.* එවිට මා වෙතට පැමිණ තිබෙන චෝදනා ඇත්තද බොරුද කියා මට දැනගැනීමට පුළුවන.”+

22 ඉන්පසු ඒ පුරුෂයෝ එතැනින් පිටත්ව සොදොම් බලා ගියෝය. එහෙත් යෙහෝවා දෙවි+ දිගටම ආබ්‍රහම් ඉදිරියේ සිටියේය.+ 23 එවිට ආබ්‍රහම් දෙවිගෙන් මෙසේ ඇසීය. “ඔබ ඇත්තටම දුෂ්ටයන් සමඟ ධර්මිෂ්ඨයන්වත් නැති කර දමනවාද?+ 24 ඒ නුවර තුළ ධර්මිෂ්ඨ මිනිසුන් පනස්දෙනෙක් ඉන්නවා නම් ඔබ ඔවුන්වත් නැති කරනවාද? ඔබ ඔවුන් වෙනුවෙන්වත් ඒ නුවරට සමාව දෙන්නේ නැද්ද?+ 25 ඔබ ඒ දෙපිරිසම එකට විනාශ කර දුෂ්ටයාටත් ධර්මිෂ්ඨයාටත්+ එකම දඬුවම දෙයි කියා මට හිතාගන්නවත් බැහැ!+ මුළු පොළොවෙම විනිශ්චයකරු වන ඔබ සාධාරණය ඉෂ්ට කරන්නේ නැද්ද?”+ 26 එවිට යෙහෝවා දෙවි මෙසේ කීවේය. “සොදොම් නුවරේ ධර්මිෂ්ඨ මිනිසුන් පනස්දෙනෙකු මට සම්බ වුණොත් ඔවුන් වෙනුවෙන් මම මුළු නුවරටම සමාව දෙන්නෙමි.”+ 27 නමුත් ආබ්‍රහම් මෙසේ කීවේය. “අනේ යෙහෝවා දෙවියනි, මට සමාවෙන්න! මම නිකම්ම නිකම් දූවිලි සහ අළු වැනි මිනිසෙක්+ වුණත් ඔබ සමඟ කතා කරන්න තරම් නිර්භීත වුණා. 28 ධර්මිෂ්ඨයන් හතළිස්පස්දෙනෙක් ඉන්නවා නම් පස්දෙනෙක් අඩු නිසා ඔබ මුළු නුවරම විනාශ කරනවාද?” දෙවිද, “එහි හතළිස්පස්දෙනෙකු මට සම්බ වුණොත් මම එය විනාශ නොකරන්නෙමි”+ යයි කීවේය.

29 එහෙත් ආබ්‍රහම් නැවත මෙසේ ඇසුවේය. “ඒ නුවරේ හතළිස්දෙනෙක් සම්බ වුණොත් ඔබ එය විනාශ කරනවාද?” දෙවිද, “ඒ හතළිස්දෙනා වෙනුවෙන් මම එසේ නොකරන්නෙමි” යයි කීවේය. 30 එහෙත් ආබ්‍රහම් තවදුරටත් මෙසේ කීවේය. “අනේ යෙහෝවා දෙවියනි, මා සමඟ කෝප නොවන්න.+ මට තව ටිකක් කතා කරන්න ඉඩ දෙන්න.+ එහි තිස්දෙනෙක් සම්බ වුණොත් ඔබ මොනවාද කරන්නේ?” දෙවිද, “තිස්දෙනෙකු සම්බ වුණොත් එය විනාශ නොකරන්නෙමි” යයි කීවේය. 31 එහෙත් ආබ්‍රහම් නැවත කතා කරමින් මෙසේ කීවේය. “අනේ යෙහෝවා දෙවියනි, මම ඔබ සමඟ මෙලෙස දිගින් දිගටම කතා කරන්න නිර්භීත වූ නිසා මට සමාවෙන්න!+ එහි විසිදෙනෙක් සම්බ වුණොත් ඔබ මොනවාද කරන්නේ?” දෙවිද, “ඒ විසිදෙනා වෙනුවෙන් මම එය විනාශ නොකරන්නෙමි”+ යයි කීවේය. 32 අන්තිමේදී ඔහු මෙසේ කීවේය. “අනේ යෙහෝවා දෙවියනි, මා සමඟ කෝප නොවන්න.+ මට මේ වතාවේ පමණක් කතා කරන්න අවසර දෙන්න.+ එහි දහදෙනෙක් සම්බ වුණොත් ඔබ මොනවාද කරන්නේ?” දෙවිද, “ඒ දහදෙනා වෙනුවෙන් මම එය විනාශ නොකරන්නෙමි”+ යයි කීවේය. 33 යෙහෝවා දෙවි+ ආබ්‍රහම් සමඟ කතා කළ පසු එතැනින් ඉවත්ව ගියේය. ආබ්‍රහම්ද තම කූඩාරම වෙතට හැරී ගියේය.