ගණන් කතාව

11 පසුව සෙනඟ තම දුක් කරදර ගැන යෙහෝවා දෙවි ඉදිරියේ කොඳුරන්න පටන්ගත්තෝය.+ එය අසා යෙහෝවා දෙවි මහත් සේ උදහස් විය. එබැවින් ඔවුන්ව විනාශ කරන පිණිස යෙහෝවා දෙවි ගින්නක් එව්වේය. ඒ ගින්නට හසු වී සමහරදෙනෙක් මිය ගියෝය.+ 2 ඒ අවස්ථාවේදී තමන්ව බේරාගන්න කියා සෙනඟ මෝසෙස්ට මොරගැසුවෝය. මෝසෙස්ද ඔවුන් වෙනුවෙන් යෙහෝවා දෙවිට කන්නලව් කළේය.+ එවිට ගින්න නිවී ගියේය. 3 පසුව එම ස්ථානය තබෙරා*+ ලෙස හඳුන්වන ලදි. මන්ද එම ස්ථානයේදී ඔවුන්ව විනාශ කරන පිණිස යෙහෝවා දෙවි ගින්නක් එව්වේය.

4 ඊශ්‍රායෙල් සෙනඟ සමඟ සිටි වෙනත් ජාතීන්ට අයත් අය+ මහත් කෑදරකමෙන් ආහාර ගැන සිතමින් ඒ ගැන කොඳුරන්න පටන්ගත්තෝය.+ ඊශ්‍රායෙල් සෙනඟද මහ හයියෙන් හඬමින් මෙසේ කීවෝය. “අපිට කන්න මස් කෝ?+ 5 ඊජිප්තුවේ ඉන්න කාලේ අපිට කොච්චර දේවල් කන්න තිබුණාද? අපි හිතේ හැටියට මාළු කෑවා!+ පිපිඤ්ඤා, කොමඩු, ලීක්ස්, ලූනු, සුදුලූනු කොයි තරම් කෑවාද? 6 ඒත් දැන් අපිට කන්න තියෙන්නේ මන්නා විතරයි. ඒවා කාලා කාලා දැන් අපිට එපා වෙලා.”+

7 මන්නාවල+ හැඩය කොත්තමල්ලි ඇට+ මෙන්ද එහි පෙනුම ඩෙලියම්* ලාටු+ මෙන්ද විය. 8 සෙනඟ සාමාන්‍යයෙන් බිම වැටී තිබුණු මන්නා එකතු කරගත්+ පසු ඇඹරුම් ගලකින් එය අඹරාගත්තෝය. එසේත් නැත්නම් වංගෙඩියක දමා කොටාගත්තෝය. ඉන්පසු ඔවුහු එය භාජනවල දමා තම්බාගත්තෝය.+ එයින් රවුම් කැවිලිද සාදාගත්තෝය. එහි රස, තෙල් මිශ්‍ර කර සාදාගත් කැවිලි මෙන් විය.+ 9 රාත්‍රියේදී කඳවුර අවට පිනි බිඳු වැටුණු විට මන්නාද බිම මතුපිට වැටිණ.+

10 සෑම මනුෂ්‍යයෙකුම තම පවුලේ අය සමඟ කූඩාරම්වලින් එළියට ඇවිත් හඬමින් සිටින බව මෝසෙස් දුටුවේය. යෙහෝවා දෙවිගේ උදහස තව තවත් වැඩි විය.+ මෝසෙස්ද සෙනඟගේ හැසිරීම ගැන කලකිරී+ 11 යෙහෝවා දෙවිට මෙසේ කීවේය. “ඔබේ සේවකයා වන මට මේ තරම් අමාරු වගකීමක් දුන්නේ ඇයි? මම ඔබට විරුද්ධව මොන වරදක් කළාටද මේ විශාල සෙනඟ බලාගැනීමේ වගකීම මට භාර දුන්නේ?+ 12 ඔබ මට කියන්නේ මේ සෙනඟව දරුවෙකුව උසුලාගෙන යන්නාක් මෙන්+ උකුළේ තබාගෙන+ ඔවුන්ගේ මුතුන්මිත්තන්ට ඔබ දෙන්න පොරොන්දු වුණු දේශයට+ ඔවුන්ව ගෙන යන්න කියාද? ඔවුන්ව මෙලොවට බිහි කළේ මමද? 13 සෙනඟ මස් ඉල්ලමින් අඬනවා. මම ඔවුන්ට කොහෙන් මස් සොයා දෙන්නද? 14 මේ සෙනඟව මට තනියෙන් බලාගන්න බැහැ.+ 15 ඔබ මගෙන් ඒ දේ බලාපොරොත්තු වෙනවා නම් මාව මරා දමන එක ඊට වඩා හොඳයි.+ අනේ, මම ඔබේ කරුණාව ලැබූ කෙනෙක් නම් මේ දුකෙන් මාව ගලවාගන්න.”

16 යෙහෝවා දෙවි එය අසා මෝසෙස්ට මෙසේ කීවේය. “ඊශ්‍රායෙල් සෙනඟ අතරේ සිටින වැඩිමහල්ලන්ගෙන් හැත්තෑදෙනෙකුව තෝරගන්න.+ ඔවුන්, ඔබ දැන හඳුනන වැඩිමහල්ලන් හා අධිපතීන් විය යුතුයි.+ ඔබ ඒ පුරුෂයන් සමඟ සම්මුඛ වීමේ කූඩාරම ළඟට ගොස් එතැනට වී බලා සිටින්න. 17 මම එතැනට ඇවිත්+ ඔබ සමඟ කතා කරන්නෙමි.+ මම මේ දක්වා ඔබට දුන් මගේ බලයෙන් කොටසක් ගෙන ඔවුන්ට දෙන්නෙමි.+ ඉන්පසු මේ සෙනඟ බලාගැනීමේ වගකීම ඉසිලීමට ඔවුහු ඔබට උදව් කරනු ඇත.+ 18 ඔබ සෙනඟට මෙසේ කියන්න. ‘“ඊජිප්තුවේ ඉන්න කාලේ අපිට හොඳට කන්න තිබුණා. දැන් අපිට කන්න මස් නැහැ”+ කියමින් ඔබ යෙහෝවා දෙවි ඉදිරියේ හැඬූ නිසා+ යෙහෝවා දෙවි අනිවාර්යයෙන්ම ඔබට කන්න මස් දෙනු ඇත. හෙට වන විට පවිත්‍ර වී සිටින්න.+ දෙවි අනිවාර්යයෙන්ම ඔබට කන්න මස් දෙනු ඇත.+ 19 දවසක්, දෙකක්, දවස් පහක්, දහයක්, විස්සක් නොව, 20 මාසයක් පුරාම ඔබට කෑමට මස් තිබෙනු ඇත. මස් අප්‍රිය වී වමාරන තෙක්ම ඔබට එය කන්න සිදු වෙයි.+ මන්ද ඔබ, “ඊජිප්තු දේශයෙන් අපව පිටතට ගෙනාවේ ඇයි” කියමින් ඔබ අතරේ සිටින ඔබේ දෙවි වන යෙහෝවාට විරුද්ධව කොඳුරමින් ඔහුව ප්‍රතික්ෂේප කළහුය.’”+

21 එවිට මෝසෙස්, දෙවිට මෙසේ කීවේය. “මා සමඟ සිටින සෙනඟ අතරේ පුරුෂයන් පමණක් හයලක්ෂයක්+ සිටියි. එතරම් සෙනඟක් සිටිද්දී, ‘මාසයක් පුරාම ඔවුන්ට කෑමට මස් දෙන්නෙමි’ කියා ඔබ පොරොන්දු වන්නේ කොහොමද? 22 රංචු පිටින්ම සතුන්ව මරා ඔවුන්ට කන්න දුන්නත් මුහුදේ සිටින සියලු මසුන් අල්ලා දුන්නත් ඒවා ඔවුන්ට ප්‍රමාණවත් වෙයි කියා ඔබ හිතනවාද?”+

23 එවිට යෙහෝවා දෙවි මෝසෙස්ට මෙසේ කීවේය. “යෙහෝවා දෙවි වන මට පොරොන්දු ඉටු කරන්න බලය නැහැ කියා ඔබ සිතනවාද?+ මම පැවසූ දේ ඉටු වෙනවාද නැද්ද කියා ඔබ දැන් දකිනු ඇත.”+

24 පසුව මෝසෙස් එතැනින් පිටත්ව ගොස් සෙනඟට යෙහෝවා දෙවි පැවසූ දේවල් දැන්වූවේය. සෙනඟ අතරේ සිටි වැඩිමහල්ලන්ගෙන් ඔහු පුරුෂයන් හැත්තෑදෙනෙකුව තෝරාගෙන සම්මුඛ වීමේ කූඩාරම ළඟට ඔවුන්ව කැඳෙව්වේය.+ 25 ඉන්පසු යෙහෝවා දෙවි වලාකුළක්+ තුළින් මෝසෙස් වෙතට පැමිණ ඔහු සමඟ කතා කළේය.+ දෙවි මෝසෙස්ට දී තිබුණු තම බලයෙන් කොටසක්+ වැඩිමහල්ලන් හැත්තෑදෙනාට දුන්නේය. ඔවුන්ට එම බලය ලැබුණු විගස ඔවුහු අනාගතවක්තෘවරුන් මෙන් ක්‍රියා කිරීමට පටන්ගත්තෝය. නමුත් පසුව ඔවුහු එලෙස ක්‍රියා කළේ නැත.+

26 මෝසෙස් තෝරාගත් හැත්තෑදෙනාගෙන් දෙදෙනෙක් සම්මුඛ වීමේ කූඩාරම ළඟට නොගොස් කඳවුරේම සිටියෝය. එක් කෙනෙකුගේ නම එල්දාද්ය. අනික් තැනැත්තාගේ නම මේදාද්ය. ඔවුන් දෙදෙනාටද දෙවිගේ බලය ලැබිණ. එවිට කඳවුරේ සිටියදීම ඔවුහු අනාගතවක්තෘවරුන් මෙන් ක්‍රියා කිරීමට පටන්ගත්තෝය. 27 තරුණයෙක් එය දැක මෝසෙස් වෙතට දුව ගොස්, “එල්දාද් හා මේදාද් කඳවුරේ සිට අනාගතවක්තෘවරුන් මෙන් හැසිරෙනවා” කියා ඔහුට කීවේය. 28 එවිට තරුණ වයසේ පටන් මෝසෙස්ට සේවය කරමින් සිටි+ නූන්ගේ පුත්‍රයා වන යොෂුවා, “මෝසෙස්, මගේ ස්වාමීනි, ඔවුන්ට එසේ හැසිරෙන්න ඉඩ දෙන්න එපා” යයි කීවේය.+ 29 නමුත් මෝසෙස් ඔහුට මෙසේ කීවේය. “මට ඒකෙන් අවාසියක් වෙයි කියා ඔබට භයද? භය වෙන්න එපා. ඇත්තටම යෙහෝවා දෙවිට සේවය කරන සෑම කෙනෙක්ම අනාගතවක්තෘවරුන් නම් කොයි තරම් හොඳද! එහෙම වුණොත් යෙහෝවා දෙවි ඔහුගේ බලය ඔවුන් සෑම කෙනෙකුටම ලබා දෙයි.”+ 30 පසුව මෝසෙස්ද ඊශ්‍රායෙල් සෙනඟ අතරේ සිටි වැඩිමහල්ලෝද කඳවුරට ගියෝය.

31 යෙහෝවා දෙවි තද සුළඟක්+ හමන්න සැලැස්වූවේය. ඒ සුළඟ සමඟ මුහුද දෙසින් කඳවුර දෙසට වටුවෝ ගසාගෙන ආවෝය.+ පොළොවේ සිට රියන්* දෙකකට පමණ ඉහළින් පියාසර කරමින් ආ උන් මුළු කඳවුරම වසාගත්තෝය. කඳවුරේ සිට දවසක් ඇතුළත ගමන් කළ හැකි දුර ප්‍රමාණයක් දක්වා උන් පෙනෙන්න සිටියෝය. උන් කඳවුර වටේම එලෙස පෙනෙන්න සිටියෝය. 32 සෙනඟ ඒ මුළු දවස පුරාද මුළු රාත්‍රිය පුරාද වටුවන් එකතු කරගත්තෝය. ඔවුහු පසුවදා දවස පුරාද උන්ව එකතු කරගත්තෝය. අඩුවෙන්ම එකතු කරගත් තැනැත්තා වටුවන් හෝමර*+ දහයක් එකතු කරගෙන තිබිණ. සෙනඟ කඳවුර වටා උන්ව ඇතිරුවෝය. 33 ඒ අවස්ථාවේදී යෙහෝවා දෙවි සෙනඟ සමඟ මහත් සේ උදහස් විය. ඔවුන් මස් කා අවසන් වීමටත් පෙර ඔවුන්ගේ කටේ මස් තිබියදීම+ යෙහෝවා දෙවි ඔවුන්ට පහර දුන්නේය.+ එදින සෙනඟගෙන් විශාල පිරිසක් විනාශ වූහ.+

34 කෑදරකමින් හැසිරුණු අයගේ මළ සිරුරු එම ස්ථානයේ තැන්පත් කරන ලදි.+ එමනිසා එම ස්ථානයට කිබ්‍රොත්-හත්තාවා*+ යන නම තබන ලදි. 35 පසුව සෙනඟ කිබ්‍රොත්-හත්තාවා සිට හෂේරොත් දක්වා ගමන් කර එහි කඳවුරු බැඳගත්තෝය.+