එසකියෙල්

40 යෙරුසලම විනාශ වෙලා අවුරුදු 14ක් ගියාට පස්සේ+ ඒ කියන්නේ අපි වහලුන් විදිහට හිටපු 25වෙනි අවුරුද්දේ+ මුල් මාසයේ දහවෙනිදා යෙහෝවා දෙවියන්ගේ බලය මට ලැබුණා. ඔහු මාව නගරයකට අරන් ගියා.+ 2 දෙවියන්ගෙන් ලැබුණ දර්ශනයක් මාර්ගයෙන් ඔහු මාව ඊශ්‍රායෙල් දේශයට ගෙනල්ලා උස කන්දක් උඩින් තිබ්බා.+ ඒ කන්දේ දකුණු පැත්තට වෙන්න තිබුණ දේ මට පෙනුණේ නගරයක් වගෙයි.

3 ඔහු මාව එතනට ගෙනාවාම තඹ වගේ දිලිසෙන පෙනුමක් තියෙන මිනිසෙක්ව මම දැක්කා.+ ඔහුගේ අතේ හණ කෙඳිවලින් හදපු ලණුවකුයි, මනින්න පාවිච්චි කරන රිටකුයි* තිබුණා.+ ඔහු දොරටුවට ඇතුල් වෙන තැන හිටගෙන හිටියා. 4 ඒ මිනිසා මට මෙහෙම කිව්වා. “මනුෂ්‍ය පුත්‍රය, හොඳින් ඇහුම්කන් දෙන්න. මම ඔයාට පෙන්නන හැම දෙයක් දිහාම හොඳට බලලා ඒවා හිතට ගන්න. ඔයාව මෙහාට ගෙනාවේ ඒ නිසයි. ඔයා දකින හැම දෙයක් ගැනම ඊශ්‍රායෙල් සෙනඟට කියන්න.”+

5 මම දැක්කා දේවමාලිගාව* වටේට පවුරක් තියෙනවා. ඒ මිනිසාගේ අතේ තිබුණ රිටේ දිග රියන් හයයි. (ඒ හැම රියනකටම අල්ලක පළල එකතු කරලයි තිබුණේ.)* ඔහු මනින්න පාවිච්චි කරන රිට අරගෙන පවුර මනින්න පටන්ගත්තා. පවුරේ පළල ඒ රිටේ දිගට සමානයි. ඒකේ උසත් ඒ රිටේ දිගට සමානයි.

6 ඊටපස්සේ ඔහු නැඟෙනහිරට මුහුණ ලා තිබුණ දොරටුව ළඟට ආවා.+ එතන තිබුණ පඩි පෙළ දිගේ උඩට නැඟලා දොරටුවට ඇතුල් වෙද්දීම තියෙන කොටස ඔහු මැන්නා. ඒකේ පළල, මනින්න පාවිච්චි කරන රිටේ දිගට සමානයි. ඒකේ අනිත් කෙළවරේ තිබුණ ඒ වගේම කොටසේ පළලත් රිටේ දිගට සමානයි. 7 හැම මුර කාමරයකම දිග සහ පළල රිටේ දිගට සමානයි. ඒ හැම මුර කාමරයක් අතරේම රියන් පහක පරතරයක් තිබුණා.+ දොරටුව ඇතුළේ දේවමාලිගාවට මුහුණ ලා තියෙන ශාලාවත් එක්කම තියෙන කොටසේ පළලත් රිටේ දිගට සමානයි.

8 දොරටුව ඇතුළේ දේවමාලිගාවට මුහුණ ලා තියෙන ශාලාවත් ඔහු මැන්නා. ඒකත් මනින්න පාවිච්චි කරපු රිටේ දිගට සමානයි. 9 ඔහු දොරටුව ඇතුළේ තියෙන ශාලාව මැන්නාම ඒක රියන් අටයි. ඊටපස්සේ ඒකේ දෙපැත්තේ තියෙන කුලුනුත් ඔහු මැන්නා. ඒවා රියන් දෙකයි. දොරටුව ඇතුළේ තිබුණ ඒ ශාලාව තිබුණේ දේවමාලිගාව පැත්තට මුහුණ ලායි.

10 නැඟෙනහිර පැත්තේ තිබුණ දොරටුවේ එක පැත්තක මුර කාමර තුනක් තිබුණා. අනිත් පැත්තෙත් මුර කාමර තුනක් තිබුණා. එක පැත්තක තිබුණ මුර කාමර තුනේම ප්‍රමාණයන් එක සමානයි. ඒවාට දෙපැත්තෙන් තිබුණ කුලුනුවල ප්‍රමාණයත් එක සමානයි.

11 ඊටපස්සේ ඔහු දොරටුවට ඇතුල් වෙන තැන මැන්නා. ඒක රියන් 10යි. දොරටුවට ඇතුල් වෙන තැන පිටින් මැන්නාම ඒකේ දිග රියන් 13යි.

12 හැම මුර කාමරයක් ඉස්සරහම රියනක් ඉස්සරහට අල්ලලා කොට තාප්පයක් බැඳලා තිබුණා. එක මුර කාමරයක ප්‍රමාණය රියන් හයයි. දොරටුවේ දෙපැත්තේම තිබුණ මුර කාමර හැම එකකම ප්‍රමාණය රියන් හයයි.

13 ඊටපස්සේ ඔහු දොරටුවේ පළල මැන්නා. ඔහු ඒක මැන්නේ එක මුර කාමරයක වහලේ කෙළවරේ* ඉඳලා අනිත් පැත්තේ තියෙන මුර කාමරයේ වහලේ කෙළවර වෙන කල්. ඒකේ පළල රියන් 25යි. හැම මුර කාමරයකටම ඇතුල් වෙන තැන තිබුණේ අනිත් මුර කාමරයට ඉස්සරහින්.+ 14 ඊටපස්සේ ඔහු කුලුනු මැන්නා. ඒවාවල උස රියන් 60යි. ඒ වගේම මළුවේ තිබුණ අනිත් දොරටුවල කුලුනුත් ඔහු මැන්නා. 15 පිටතින් දොරටුවට ඇතුල් වෙන තැන ඉඳලා දේවමාලිගාවට මුහුණ ලා තියෙන ශාලාවේ ඉස්සරහා වෙන කල් දිග රියන් 50යි.

16 මුර කාමරවල කවුළු තිබුණා. ඒ කවුළු හදලා තිබුණේ ඇතුළේ ඉඳන් එළිය පැත්තට පටු වේගන යන විදිහටයි.+ ඒ මුර කාමර දෙපැත්තේ තිබුණ කුලුනුවලත් ඒ වගේ කවුළු තිබුණා. දේවමාලිගාවට මුහුණ ලා තියෙන ශාලාවේ දෙපැත්තෙත් ඒ වගේ කවුළු තිබුණා. දෙපැත්තේ තිබුණ කුලුනුවල තාල වර්ගයේ ගස් කැටයම් කරලා තිබුණා.+

17 ඊටපස්සේ ඔහු මාව පිටත මළුවට අරන් ගියා. මළුව වටේට ගල් අතුරපු වේදිකාවකුත් කෑම කාමරත්+ තියෙනවා මම දැක්කා. ඒ වේදිකාවේ කෑම කාමර 30ක් තිබුණා. 18 දොරටු දෙපැත්තේ තිබුණ වේදිකාවේ පළල දොරටුවල දිගට සමානයි. මේ වේදිකාව තිබුණේ ඇතුල් මළුවට වඩා පහතින්.

19 ඔහු පහතින් පිහිටලා තිබුණ දොරටුව ඉදිරියේ ඉඳලා ඇතුල් මළුවේ මායිම වෙන කල් දුර මැන්නා. නැඟෙනහිර දොරටුවේ ඉඳන් මැන්නාම ඒ දිග රියන් 100යි. උතුරු දොරටුවේ ඉඳන් මැන්නාම දිගත් ඒකට සමානයි.

20 උතුරු පැත්තට මුහුණ ලා දොරටුවකුත් පිටත මළුවේ තිබුණා. ඔහු ඒකේ දිගයි, පළලයි මැන්නා. 21 ඒ දොරටුව දෙපැත්තෙත් මුර කාමර තුන ගාණේ තිබුණා. ඒකේ කුලුනුවලයි, දේවමාලිගාවට මුහුණ ලා තිබුණ ශාලාවෙයි මිමි මුලින් දැකපු දොරටුවේ ඒවාට සමානයි. මේ දොරටුවෙත් දිග රියන් 50යි. පළල රියන් 25යි. 22 ඒකේ තිබුණ කවුළුවල, ඒක ඇතුළේ තිබුණ ශාලාවේ සහ තාල ගස්වල+ මිමි නැඟෙනහිර දොරටුවේ ඒවාවලට සමානයි. ඒ දොරටුව ළඟට යන්න කෙනෙක් පඩි හතක් නඟින්න ඕනේ. පඩිවලට ඉස්සරහින් ශාලාව තිබුණා.

23 උතුරු පැත්තේ තිබුණ දොරටුවට මුහුණ ලා තවත් දොරටුවක් ඇතුල් මළුවේ තිබුණා. නැඟෙනහිර පැත්තේ තිබුණ දොරටුවට මුහුණ ලාත් තව දොරටුවක් තිබුණා. ඔහු ඒ දොරටු අතර දුර මැන්නා. ඒ දුර රියන් 100යි.

24 ඊටපස්සේ ඔහු මාව දකුණු දිශාවට ගෙනාවා. ඒ පැත්තෙත් දොරටුවක් තියෙනවා මම දැක්කා.+ ඔහු ඒ දොරටුවේ කුලුනුයි, දේවමාලිගාවට මුහුණ ලා තිබුණ ශාලාවයි මැන්නා. ඒවාවල ප්‍රමාණත් කලින් දොරටුවල ඒවාවලට සමානයි. 25 ඒ දොරටුව දෙපැත්තේ වගේම ඒක ඇතුළේ තිබුණ ශාලාව දෙපැත්තෙත් කවුළු තිබුණා. ඒ කවුළු කලින් දැකපු ඒවාට සමානයි. ඒ දොරටුවේ දිග රියන් 50යි. පළල රියන් 25යි. 26 ඒ දොරටුව ළඟට යන්න පඩි හතක් නඟින්න ඕනේ.+ පඩිවලට ඉස්සරහින් ශාලාව තිබුණා. ඒක දෙපැත්තේ තිබුණ කුලුනුවල තාල ගස්වල රූප තිබුණා. ඒ එක කුලුනක තාල ගහක රූපයක් ගාණේ තිබුණා.

27 ඇතුල් මළුවේ දකුණු දිශාවට මුහුණ ලා දොරටුවක් තිබුණා. ඒ දොරටුවේ ඉඳන් ඒකට පහතින් තිබුණ දොරටුව වෙන කල් ඔහු දුර මැන්නා. ඒ දුර රියන් 100යි. 28 ඊටපස්සේ ඔහු මාව දකුණු දොරටුවෙන් ඇතුල් මළුවට අරන් ආවා. ඔහු දකුණු දොරටුව මැන්නාම ඒකේ ප්‍රමාණය අනිත් දොරටුවලට සමානයි. 29 ඒකේ තිබුණ මුර කාමරවලයි, දෙපැත්තේ තිබුණ කුලුනුවලයි, ඒක ඇතුළේ තිබුණ ශාලාවෙයි ප්‍රමාණ අනිත් දොරටුවල ඒවාවලට සමානයි. ඒ දොරටුව දෙපැත්තේ වගේම ඒක ඇතුළේ තිබුණ ශාලාව දෙපැත්තෙත් කවුළු තිබුණා. මේ දොරටුවේ දිග රියන් 50යි. පළල රියන් 25යි.+ 30 වටේට තියෙන දොරටු ඇතුළේ තිබුණ ශාලාවල දිග රියන් 25යි. පළල රියන් 5යි. 31 ඒක ඇතුළේ තිබුණ ශාලාව පිටත මළුවට මුහුණ ලායි තිබුණේ. ඒක දෙපැත්තේ තිබුණ කුලුනුවල තාල වර්ගයේ ගස්වල රූප තිබුණා.+ එතනට එන්න පඩි අටක් නඟින්න ඕනේ.+

32 ඔහු නැඟෙනහිර දොරටුවෙන් මාව ඇතුල් මළුවට ගෙනල්ලා ඒ දොරටුවත් මැන්නා. ඒකේ ප්‍රමාණයත් කලින් දොරටුවලට සමානයි. 33 ඒකේ තිබුණ මුර කාමරවලයි, දෙපැත්තේ තිබුණ කුලුනුවලයි, ඒක ඇතුළේ තිබුණ ශාලාවෙයි ප්‍රමාණ අනිත් දොරටුවල ඒවාවලට සමානයි. ඒ දොරටුව දෙපැත්තේ වගේම ඒක ඇතුළේ තිබුණ ශාලාව දෙපැත්තෙත් කවුළු තිබුණා. මේ දොරටුවේ දිග රියන් 50යි. පළල රියන් 25යි. 34 ඒක ඇතුළේ තිබුණ ශාලාව පිටත මළුවට මුහුණ ලායි තිබුණේ. ඒක දෙපැත්තේ තිබුණ කුලුනු දෙකේම තාල වර්ගයේ ගස්වල රූප තිබුණා. එතනට එන්න පඩි අටක් නඟින්න ඕනේ.

35 ඊළඟට ඔහු මාව උතුරු දොරටුවට ගෙනල්ලා+ ඒක මැන්නා. ඒකේ ප්‍රමාණයත් කලින් දොරටුවලට සමානයි. 36 ඒකේ තිබුණ මුර කාමරවලයි, දෙපැත්තේ තිබුණ කුලුනුවලයි, ඒක ඇතුළේ තිබුණ ශාලාවෙයි ප්‍රමාණ අනිත් දොරටුවල ඒවාවලට සමානයි. ඒක දෙපැත්තේ කවුළු තිබුණා. මේ දොරටුවේ දිග රියන් 50යි. පළල රියන් 25යි. 37 ඒක දෙපැත්තේ තිබුණ කුලුනු පිටත මළුවට මුහුණ ලා තිබුණා. දෙපැත්තේ තිබුණ ඒ කුලුනු දෙකේම තාල වර්ගයේ ගස්වල රූප තිබුණා. එතනට එන්න පඩි අටක් නඟින්න ඕනේ.

38 දොරටුවල දෙපැත්තේ තිබුණ කුලුනු ළඟ කෑම කාමරයක් තිබුණා. ඒකට ඇතුල් වෙන්න තැනකුත් තිබුණා. දවන පූජාවලට ගෙනාපු සතුන්ව හේදුවේ එතනයි.+

39 දොරටුව ඇතුළේ තිබුණ ශාලාව දෙපැත්තේ මේස දෙක ගාණේ තිබුණා. දවන පූජාවලට,+ පාප පූජාවලට+ සහ වන්දි පූජාවලට+ ගෙනාපු සතුන්ව මැරුවේ ඒවා උඩ. 40 උතුරු දොරටුවට නඟින තැන එළියේ දෙපැත්තේ මේස දෙක ගාණේ තිබුණා. ඒ මේස තිබුණේ දොරටුව ඇතුළේ තිබුණ ශාලාවට කිට්ටුවෙන්. 41 දොරටුවක එක පැත්තක මේස හතරකුත් අනිත් පැත්තේ මේස හතරකුත් තිබුණා. දෙපැත්තේම මේස අටක් තිබුණා. ඒවා උඩ තමයි පූජාවලට ගෙනාපු සතුන්ව මැරුවේ. 42 දවන පූජාවලට වෙන් කරපු මේස හතර හදලා තිබුණේ කපපු ගල්වලින්. ඒ මේසෙක දිග රියන් එකහමාරයි. පළල රියන් එකහමාරයි. උස රියනයි. දවන පූජාවලටයි, අනිත් පූජාවලටයි ගේන සතුන්ව මරද්දී පාවිච්චි කරපු දේවල් තියලා තිබුණේ ඒ මේස උඩ. 43 දොරටුවේ තිබුණ ශාලාවේ ඇතුල් පැත්තේ බිත්තියට අල්ලලා රාක්ක තිබුණා. ඒ රාක්කෙක පළල අල්ලක් තරම්. ඒවා ශාලාව වටේටම තිබුණා. වන්දි පූජාවේ සතුන්ගේ මස් තිබ්බේ මේස උඩයි.

44 ඇතුල් දොරටුවට කිට්ටුවෙන් ගායකයන් වෙනුවෙන් වෙන් කරපු කෑම කාමර තිබුණා.+ ඒවා තිබුණේ උතුරු දොරටුව ළඟ ඇතුල් මළුවේ. ඒවා මුහුණ ලා තිබුණේ දකුණු දිශාවට. තවත් කෑම කාමරයක් නැඟෙනහිර දොරටුව ළඟ තිබුණා. ඒක මුහුණ ලා තිබුණේ උතුරු දිශාවට.

45 ඔහු මට මෙහෙම කිව්වා. “දකුණු දිශාවට මුහුණ ලා තියෙන කෑම කාමරේ තියෙන්නේ දේවමාලිගාවේ සේවාවන් ඉටු කරන පූජකයන් වෙනුවෙන්.+ 46 උතුරු දිශාවට මුහුණ ලා තියෙන කෑම කාමරය වෙන් කරලා තියෙන්නේ පූජාසනයේ වැඩ භාරව ඉන්න පූජකයන් වෙනුවෙන්.+ ඒ පූජකයන් සාදොක්ගේ පුතාලා.+ එයාලා තමයි යෙහෝවා ඉස්සරහට ඇවිත් ඔහුට සේවය කරන්න පත් කරලා ඉන්න ලෙවීවරු.”+

47 ඊටපස්සේ ඔහු ඇතුල් මළුව මැන්නා. ඒකේ දිග රියන් 100යි. පළලත් රියන් 100යි. ඒක සමචතුරස්‍රයක්. පූජාසනය දේවමාලිගාවට ඉස්සරහින් තිබුණා.

48 ඊටපස්සේ ඔහු මාව දේවමාලිගාවේ ඇතුල් වෙන තැන තිබුණ ශාලාවට අරන් ගියා.+ ඒ ශාලාවට ඇතුල් වෙන තැන දෙපැත්තේ තිබුණ කුලුනු ඔහු මැන්නා. ඒ කුලුනක දිග රියන් පහයි. පළල රියන් තුනයි. එක කුලුනක් වම් පැත්තෙත් අනිත් කුලුන දකුණු පැත්තෙත් තිබුණා.

49 ඒ ශාලාවේ දිග රියන් 20යි, පළල රියන් 11යි.* කෙනෙක් එතනට යන්න පඩි නඟින්න ඕනේ. ශාලාවට ඇතුල් වෙන තැන දෙපැත්තේ තිබුණ කුලුනු ළඟ තව කුලුනු දෙකක් තිබුණා.+