ද්විතීය කතාව
10 “ඒ වෙලාවේ යෙහෝවා දෙවියන් මට මෙහෙම කිව්වා. ‘ඔයාට කලින් දුන්න ගල් පුවරු දෙක වගේම තවත් පුවරු දෙකක් කපාගෙන+ කන්ද නැඟලා මං ළඟට එන්න. ඔයා ලී පෙට්ටියකුත් හදන්න ඕනේ. 2 ඔයා කඩලා දැම්ම ගල් පුවරුවල ලියලා තිබුණ වචනම මම ඒ පුවරු දෙකෙත් ලියන්නම්. ඊටපස්සේ ඒ පුවරු දෙක ඔයා හදන පෙට්ටියේ තියන්න.’ 3 ඉතින් මම ඇකේෂියා* ලීවලින් පෙට්ටියක් හැදුවා. ඊටපස්සේ කලින් දුන්න ගල් පුවරු දෙක වගේ පුවරු දෙකකුත් කපාගෙන ඒ දෙකත් අරගෙන මම කන්දට නැග්ගා.+ 4 යෙහෝවා කලින් ලියපු දේවල්ම+ ඒ කියන්නේ ආඥා දහය*+ ඒ පුවරු දෙකෙත් ලියලා මට දුන්නා. ඒ පුවරු දෙකෙත් ලියලා තිබුණේ යෙහෝවා ගින්න අතරින් කතා කරලා+ කන්ද ළඟ රැස් වෙලා හිටපු ඊශ්‍රායෙල් සෙනඟට+ කියපු දේවල්මයි. 5 මම කන්දෙන් බැහැලා+ ඇවිත් යෙහෝවා මට අණ කරපු විදිහටම ඒ පුවරු දෙක මං හදපු පෙට්ටිය ඇතුළෙන් තිබ්බා. ඒවා තාමත් ඒකේ තියෙනවා.
6 “ඊටපස්සේ බෙයේරොත් බෙනෙයායකන්වල කඳවුරු බැඳගෙන හිටපු ඊශ්‍රායෙල් සෙනඟ මොසේරාවලට ගියා. එහෙදී තමයි ආරොන් මැරුණේ. එයාව එහේ තැන්පත් කළාට පස්සේ+ එයා වෙනුවට එයාගේ පුතා වුණ එලියාසර් උත්තම පූජකයා හැටියට සේවය කරන්න පටන්ගත්තා.+ 7 එතනින් පිටත් වෙලා සෙනඟ ගුද්ගොදාවලටත් ඊටපස්සේ යොත්බාතාවලටත්+ ගියා. යොත්බාතා කියන්නේ ඇළදොළවලින් පිරුණ ප්‍රදේශයක්.
8 “ඒ කාලේදී තමයි යෙහෝවා ලෙවී ගෝත්‍රය+ විශේෂ සේවයක් කරන්න වෙන් කළේ. ඒකට යෙහෝවාගේ ගිවිසුම් පෙට්ටිය අරගෙන යන එකත්+ යෙහෝවා ඉස්සරහා සේවය කරන එකත් ඔහුගේ නමින් සෙනඟට ආශීර්වාද කරන එකත්+ ඇතුළත් වුණා. එයාලා අද වෙන කල්ම ඒ දේවල් කරනවා. 9 අනිත් ඊශ්‍රායෙල් ගෝත්‍රවලට ප්‍රදේශයක් උරුම වුණත් ලෙවීවරුන්ට උරුමයක් විදිහට ප්‍රදේශයක් දෙන්නේ නැත්තේ ඒ නිසයි. මොකද ඔයාලාගේ දෙවි වන යෙහෝවා එයාලට කියපු විදිහටම එයාලාගේ උරුමය වෙන්නේ යෙහෝවායි.+ 10 මම කලින් වතාවේදී වගේ ආපහු දවස් 40ක් රෑ දවල් දෙකේ+ කන්දට වෙලා දෙවියන්ට කන්නලව් කළා. මේ වතාවේදීත් යෙහෝවා මට සවන් දුන්නා.+ ඒ නිසයි යෙහෝවා ඔයාලව විනාශ නොකර ඉන්න තීරණය කළේ. 11 ඊටපස්සේ යෙහෝවා මට මෙහෙම කිව්වා. ‘මේ සෙනඟ එක්ක මෙතනින් පිටත් වෙලා යන්න ලෑස්ති වෙන්න. එයාලාගේ මුතුන්මිත්තන්ට මං පොරොන්දු වුණ දේශයට ඇතුල් වෙලා ඒක අයිති කරගන්න එයාලට පුළුවන්.’+
12 “ඊශ්‍රායෙල්වරුනි, ඔයාලාගේ දෙවි වන යෙහෝවා දැන් ඔයාලාගෙන් බලාපොරොත්තු වෙන්නේ මෙච්චරයි.+ ඔයාලාගේ දෙවි වන යෙහෝවාට ගරුබිය දක්වන්න.+ ඔහු දෙන හැම මඟ පෙන්වීමක්ම ජීවිතේට අදාළ කරගන්න.+ ඔහුට ආදරේ කරන්න. ඔයාලාගේ දෙවි වන යෙහෝවාට මුළු හදවතින්ම සේවය කරන්න.+ ඒ වෙනුවෙන් ඔයාලට පුළුවන් හැම දේම කරන්න.* 13 ඒ වගේම ඔයාලාගෙම යහපත වෙනුවෙන් අද මම ඔයාලට කියලා දෙන යෙහෝවාගේ අණපනත් පිළිපදින්න.+ 14 ඉමක් කොනක් පේන්නේ නැති අහසත් ඒකේ තියෙන හැම දෙයක්මත් මේ මහ පොළොවත් ඒකේ තියෙන හැම දෙයක්මත් අයිති ඔයාලාගේ දෙවි වන යෙහෝවාටයි.+ 15 ඒත් යෙහෝවා ඔයාලාගේ මුතුන්මිත්තන්ට ළං වෙලා එයාලට ආදරේ කළා. එයාලාගෙන් පැවතෙන ඔයාලව+ තමයි ඔහු සියලු ජාතීන් අතරින් තමන්ගේ සෙනඟ විදිහට තෝරගත්තේ. අද ඔයාලා තමයි ඔහුට අයිති සෙනඟ. 16 දැන් ඔයාලාගේ හදවත් පිරිසිදු කරගන්න.*+ මුරණ්ඩු විදිහට වැඩ කරන එක නතර කරන්න.+ 17 ඔයාලාගේ දෙවි වන යෙහෝවා අනිත් හැම දෙවි කෙනෙක්ටම වඩා උසස්.*+ ස්වාමිවරුන්ගෙත් ස්වාමීන් ඔහුයි. දෙවියන් ශ්‍රේෂ්ඨයි. හරිම බලවත්. ඔහු ගරුබිය ලබන්න වටින කෙනෙක්. හැමෝටම එක වගේ සලකන+ ඔහු කාගෙන්වත් අල්ලසක් ගන්නේ නැහැ. 18 තාත්තා නැති දරුවාට* සහ වැන්දඹුවට ඔහු සාධාරණය ඉටු කරනවා.+ ඔහු ඔයාලා අතරේ ඉන්න විදේශිකයාටත් ආදරේ පෙන්නනවා.+ එයාලට කෑම බීම සහ ඇඳුම් පැලඳුම් ලබා දෙනවා. 19 ඔයාල අතරේ ඉන්න විදේශිකයන්ට ඔයාලත් ආදරේ කරන්න ඕනේ. මොකද ඔයාලත් ඊජිප්තුවේ විදේශිකයන් හැටියට ජීවත් වුණා.+
20 “ඔයාලාගේ දෙවි වන යෙහෝවාට ඔයාලා ගරුබිය දක්වන්න ඕනේ. ඔයාලා නමස්කාර කරන්න ඕනෙ ඔහුටයි.+ ඔහු එක්ක කිට්ටු බැඳීමක් තියාගන්න. ඔයාලා යම් දෙයක් ගැන දිවුරද්දී ඔහුගේ නමින් ඒක කරන්න. 21 ඔයාලා ප්‍රශංසා කරන්න ඕනෙ ඔහුටයි.+ ඔයාලාගේ දෙවියන් ඔහුයි. ඔයාලා වෙනුවෙන් ඔයාලාගේ ඇස් පනාපිටම පුදුමසහගත, ශ්‍රේෂ්ඨ දේවල් කළේ ඔහුයි.+ 22 ඔයාලාගේ මුතුන්මිත්තන් ඊජිප්තුවට යද්දී හිටියේ 70දෙනෙක් විතරයි.+ ඒත් දැන් බලන්න! ඔයාලාගේ දෙවි වන යෙහෝවා ඔයාලාගේ ගාණ අහසේ තරු වගේ වැඩි කරලා තියෙනවා.+