නික්මයාම
16 ඊශ්‍රායෙල් සෙනඟ ඒලිම්වලින් පිටත් වෙලා ඒලිම් සහ සීනයි අතරේ තියෙන සින්+ පාළුකරයට ආවා. එයාලා එතනට ආවේ ඊජිප්තුවෙන් පිටත් වෙලා ගත වුණ දෙවෙනි මාසයේ 15වෙනි දවසේදියි.
2 පාළුකරයේදී ඊශ්‍රායෙල්වරු මෝසෙස්ට සහ ආරොන්ට විරුද්ධව කතා කරන්න පටන්ගත්තා.+ 3 එයාලා ඒ දෙන්නාට මෙහෙම කිව්වා. “ඔයාලා අපි හැමෝවම මේ පාළුකරයට ගෙනාවේ හාමතේ තියලා මරලා දාන්නද?+ යෙහෝවා අපිව ඊජිප්තුවේදීම මරලා දැම්මා නම් මීට වඩා හොඳයි. එහෙදී අපි හිතේ හැටියට මස් කෑවා.+ තව කොච්චර නම් කෑම ජාති අපිට තිබුණාද!”
4 එතකොට යෙහෝවා දෙවියන් මෝසෙස්ට මෙහෙම කිව්වා. “මේ සෙනඟ මගේ නීතියට කීකරු වෙනවාද නැද්ද කියලා මං දැන් බලන්නයි යන්නේ.+ මං අහසෙන් කෑම වැටෙන්න සලස්වනවා.+ තම තමන්ට ඕනෙ කරන කෑම ප්‍රමාණය හැම දවසකම එකතු කරගන්න+ කියලා සෙනඟට කියන්න. 5 ඒත් හයවෙනි දවසේදී+ එයාලා අනිත් දවස්වලදී එකතු කරන කෑම ප්‍රමාණයට වඩා දෙගුණයක් එකතු කරගන්න ඕනේ.+ ඊටපස්සේ ඒවා කෑමට පිළියෙල කරගන්න.”
6 ඉතින් මෝසෙස් සහ ආරොන් සෙනඟට මෙහෙම කිව්වා. “ඔයාලව ඊජිප්තුවෙන් අරන් ආවේ යෙහෝවායි කියලා ඔයාලා අනිවාර්යයෙන්ම අද හවස දැනගනියි.+ 7 ඇයි ඔයාලා අපිට විරුද්ධව කතා කරන්නේ? අපි කවුද? අපි නිකම්ම නිකම් මිනිස්සු විතරයි. ඇත්තටම ඔයාලා කතා කරන්නේ යෙහෝවාට විරුද්ධවයි. යෙහෝවා ඔයාලා කියපු හැම දේම අහගෙනයි හිටියේ. ඒ නිසා හෙට උදේ වෙද්දී ඔයාලට දෙවියන්ගේ තේජස දකින්න ලැබෙයි.” 8 මෝසෙස් මෙහෙමත් කිව්වා. “යෙහෝවා අද හවසට ඔයාලට කන්න මස් දෙයි. හෙට උදේටත් ඇති තරම් කන්න කෑම දෙයි. එතකොට ඔයාලට තේරෙයි ඔයාලා යෙහෝවා දෙවියන්ට විරුද්ධව කියන දේවල් ඔහුට ඇහෙනවා කියලා. ඔයාලා අපිට දොස් කිව්වාට ඔයාලා කතා කරන්නේ යෙහෝවාට විරුද්ධවයි කියලා අමතක කරන්න එපා.+ අනික අපිට දොස් කියන්න අපි කවුද?”
9 මෝසෙස් ආරොන්ට මෙහෙම කිව්වා. “ඊශ්‍රායෙල් සෙනඟට මෙහෙම කියන්න. ‘ඔයාලා කන්කෙඳිරි ගගා කියපු හැම දේම දෙවියන්ට ඇහුණා.+ ඉතින් දැන් යෙහෝවා ඉස්සරහට එන්න.’” 10 ආරොන් ඊශ්‍රායෙල් සෙනඟට කතා කළාට පස්සේ එයාලා හැරිලා පාළුකරය දිහා බැලුවා. එතකොට යෙහෝවා දෙවියන්ගේ තේජස වලාකුළකින් දිස් වෙනවා එයාලා දැක්කා.+
11 යෙහෝවා මෝසෙස්ට මෙහෙමත් කිව්වා. 12 “ඊශ්‍රායෙල්වරු කරන විවේචන මට ඇහුණා.+ එයාලට මෙහෙම කියන්න. ‘අද හවසට* ඔයාලට කන්න මස් ලැබෙයි. හෙට උදේටත් ඔයාලට කන්න ඇති තරම් කෑම ලැබෙයි.+ එතකොට ඔයාලා අනිවාර්යයෙන්ම දැනගනියි මං ඔයාලාගේ දෙවි යෙහෝවා කියලා.’”+
13 හවස් වුණාම මුළු කඳවුරම වැහිලා යන තරමට වටුවෝ ආවා.+ පහුවෙනිදා උදේ කඳවුර වටේටම පිනි තිබුණා. 14 පින්න නැති වෙලා ගියාට පස්සේ හිමවලට සමාන පොඩි ඇට වර්ගයක් පාළුකරයේ පොළොව පුරාම තියෙනවා එයාලා දැක්කා.+ 15 ඊශ්‍රායෙල් සෙනඟ ඒවා දැක්කාම “මේ මොනවාද” කියලා එකිනෙකාගෙන් ඇහුවා. පොළොව පුරා වැටිලා තිබුණේ මොනවාද කියලා එයාලා දැනන් හිටියේ නැහැ. එතකොට මෝසෙස් එයාලට මෙහෙම කිව්වා. “මේ තියෙන්නේ යෙහෝවා ඔයාලට දුන්න කෑම.+ 16 කෑම එකතු කරගන්න ඕනෙ විදිහ ගැන යෙහෝවා දෙවියන් ඔයාලට මෙහෙම කියනවා. ‘එක් එක් කෙනා තමන්ට කන්න පුළුවන් ප්‍රමාණය විතරක් එකතු කරගන්න. ඔයාලාගේ කූඩාරම්වල කීදෙනෙක් ඉන්නවාද කියලා ගණන් කරලා ඒ එක් එක් කෙනාට කෑම ඕමෙරයක්*+ ගාණේ එකතු කරගන්න.’” 17 ඊශ්‍රායෙල් සෙනඟ ඔහු කියපු විදිහටම කළා. සමහර අය වැඩියෙනුත් තවත් අය පොඩ්ඩකුත් එකතු කරගත්තා. 18 ඒත් ඒවා ඕමෙරයක මිම්මෙන් මැනලා බැලුවාම වැඩියෙන් එකතු කරගත්ත අයට කෑම වැඩි වුණේවත් අඩුවෙන් එකතු කරගත්ත අයට කෑම අඩු වුණේවත් නැහැ.+ හැමෝම එයාලට කන්න පුළුවන් ප්‍රමාණය එකතු කරගෙන තිබුණා.
19 ඊටපස්සේ මෝසෙස් එයාලට කිව්වා “කිසිම දෙයක් හෙට උදේ වෙන කල් තියාගන්න එපා” කියලා.+ 20 ඒත් එයාලා මෝසෙස් කියපු දේ ඇහුවේ නැහැ. සමහරු පහුවෙනිදා උදේ වෙන කල් කෑම තියාගත්තා. ඒත් ඒ කෑමවලට පණුවෝ ගහලා ඒවා ගඳ ගහන්න පටන්ගත්තා. ඒක දැක්කාම මෝසෙස්ට එයාලා එක්ක හුඟක් කේන්ති ගියා. 21 එයාලා හැමදාම උදේට තම තමන්ට ඕනෙ කරන කෑම ටික එකතු කරගත්තා. අව්ව සැර ගොඩක් වැඩි වුණාම බිම වැටිලා තිබුණ කෑම දිය වෙලා ගියා.
22 හයවෙනි දවසේදී එයාලා වෙනදා එකතු කරගන්නවා වගේ දෙගුණයක් එකතු කරගත්තා.+ එයාලා එක් කෙනෙක්ට ඕමෙර දෙක ගාණේ එකතු කරගත්තා. ඊටපස්සේ සෙනඟ අතරේ හිටපු අධිපතීන් මෝසෙස්ට ඒ ගැන කිව්වා. 23 එතකොට මෝසෙස් එයාලට මෙහෙම කිව්වා. “හෙට මුළු දවසම විවේක ගන්න කියලා යෙහෝවා දෙවියන් කියනවා. මොකද හෙට සබත් දවසක්. ඒක යෙහෝවා වෙනුවෙන්ම කැප කරපු ශුද්ධ දවසක්.+ ඒ නිසා ඔයාලට කෑමක් පුච්චගන්න හරි තම්බගන්න හරි ඕනෙ නම් ඒක අදම කරන්න.+ ඉතුරු වෙන කෑම වීසි කරන්නේ නැතුව හෙටට තියාගන්න.” 24 මෝසෙස් කියපු විදිහටම එයාලා පහුවෙනිදා උදේටත් කෑම ඉතුරු කරගත්තා. ඒ කෑම ගඳ ගැහුවෙවත් ඒවාට පණුවෝ ගැහුවෙවත් නැහැ. 25 ඊටපස්සේ මෝසෙස් මෙහෙම කිව්වා. “අද යෙහෝවා වෙනුවෙන්ම කැප කරපු ශුද්ධ සබත් දවසක්. ඒ නිසා ඊයේ ඉතුරු කරගත්ත කෑම අද ඔයාලට කන්න පුළුවන්. අද දෙවියන් කෑම වැටෙන්න සලස්වන්නේ නැහැ. 26 ඔයාලා දවස් හයක් කෑම එකතු කරගන්න. ඒත් හත්වෙනි දවස සබත්+ දවසක් නිසා එදාට කෑම වැටෙන්නේ නැහැ.” 27 හැබැයි සමහර අය හත්වෙනි දවසේදීත් කෑම එකතු කරගන්න ගියා. ඒත් එයාලට එකතු කරගන්න කිසි දෙයක් තිබුණේ නැහැ.
28 යෙහෝවා මෝසෙස්ට මෙහෙම කිව්වා. “ඔයාලා තව කොච්චර කාලයක් මගේ නීති, මඟ පෙන්වීම් ගණන් ගන්නේ නැතුව ඉන්නද හිතන් ඉන්නේ?+ 29 සබත පවත්වන්න අණ කළේ යෙහෝවා වන මමයි කියලා අමතක කරන්න එපා.+ හයවෙනි දවසේදී දවස් දෙකකට ඇති වෙන්න මං ඔයාලට කෑම දෙන්නේ ඒ නිසයි. හත්වෙනි දවසේදී හැම කෙනෙක්ම තම තමන්ගේ ගෙවල්වලටම වෙලා ඉන්න ඕනේ. කිසිම කෙනෙක්ට කොහෙවත් යන්න අවසර නැහැ.” 30 ඉතින් සෙනඟ හත්වෙනි දවසේදී සබත පැවැත්තුවා.*+
31 ඊශ්‍රායෙල්වරු පොළොවට වැටුණු ඒ කෑමවලට “මන්නා”* කියලා කිව්වා. ඒවා සුදු පාටයි. ඒවාවල හැඩය කොත්තමල්ලි ඇටවලට සමානයි. ඒවාවලට තිබුණේ පැණි දාලා හදපු රස කැවිලිවල රහ.+ 32 මෝසෙස් සෙනඟට මෙහෙම කිව්වා. “යෙහෝවා දෙවියන් කිව්වේ මෙහෙමයි. ‘මං දෙන මේ කෑමවලින් ඕමෙරයක් එකතු කරලා තියාගන්න. එතකොට මං ඔයාලව ඊජිප්තුවෙන් ගෙනාවාට පස්සේ ඔයාලට පාළුකරයේදී කන්න දුන්නේ මොනවාද කියලා ඔයාලාගේ ඉදිරි පරම්පරාවල හැමෝටම දැකගන්න පුළුවන් වෙයි.’”+ 33 ඊටපස්සේ මෝසෙස් ආරොන්ට කිව්වා “මන්නා ඕමෙරයක් භාජනයකට දාලා ඔයාලාගේ ඉදිරි පරම්පරාවල අයට දැකගන්න පුළුවන් වෙන්න ඒක යෙහෝවා ඉස්සරහා තියන්න” කියලා.+ 34 ආරොන්, යෙහෝවා දෙවියන් මෝසෙස්ට අණ කරපු විදිහට මන්නා භාජනය විශේෂ පෙට්ටිය*+ ඉස්සරහා ආරක්ෂිතව තිබ්බා. 35 ඊශ්‍රායෙල් සෙනඟ මිනිසුන් පදිංචි වෙලා හිටපු කානාන්වල දේශ සීමාවට+ එන කල්ම+ ඒ කියන්නේ, අවුරුදු 40ක් පුරාම මන්නා කෑවා.+ 36 ඕමෙරයක් කියන්නේ ඒපාවකින්* දහයෙන් එකක්.