යෙරෙමියා
15 යෙහෝවා දෙවියන් මට මෙහෙම කිව්වා. “මේ සෙනඟ වෙනුවෙන් මෝසෙස් සහ සාමුවෙල් මං ඉස්සරහට ආවත්+ මම ඔවුන්ට අනුකම්පා කරන්නේ නැහැ. මේ සෙනඟව මගේ ඉස්සරහින් පන්නලා දාන්න. ඔවුන්ට යන්න හරින්න. 2 ‘අපිට මොකද වෙන්නේ’ කියලා ඔවුන් ඔබෙන් ඇහුවොත් ඔවුන්ට මෙහෙම කියන්න. ‘යෙහෝවා කියන්නේ මේකයි.
“ඔබෙන් සමහරු මාරාන්තික වසංගතවලට ගොදුරු වෙනවා.
සමහරු කඩුවට නියම වෙනවා.+
තව සමහරු සාගතයට ගොදුරු වෙනවා.
තවත් සමහරු වහල්කමට නියම වෙනවා.”’+
3 “‘මම ඔවුන්ට පහර දෙන්න විපත්ති හතරක්* නියම කරනවා’+ කියලා යෙහෝවා කියනවා. ‘ඔවුන්ව මරලා දාන්න කඩුවත් ඔවුන්ව ඇදගෙන යන්න බල්ලන්වත් මම ඔවුන් අතරට යවනවා. ඒ වගේම ඔවුන්ව කාලා දාන්න කුරුල්ලන්වත් ඉතුරු වෙන දේ නැත්තටම නැති කරලා දාන්න පොළොවේ ඉන්න සතුන්වත් මම යවනවා.+ 4 මම එහෙම කරන්නේ හෙසකියාගේ පුත්, යූදාවල රජ වුණ මනස්සේ යෙරුසලමේදී කරපු දේවල් නිසයි.+ ඔවුන්ට වෙන දේ දැකලා පොළොවේ තියෙන හැම රාජ්‍යයක්ම බයෙන් වෙවුලයි.+
5 අනේ යෙරුසලම, ඔබට අනුකම්පාව පෙන්නන්නේ කවුද?
ඔබ ගැන දුක් වෙන්නේ කවුද?
කවුරු හරි ඔබේ සැප දුක් අහන්න ඔබ ළඟ නතර වෙයිද?’
6 ‘ඔබ මාව අතහැරියා’ කියලා යෙහෝවා කියනවා.+
ඒ නිසා මම මගේ අත ඔබට විරුද්ධව දික් කරලා ඔබව විනාශ කරනවා.+
ඔබට අනුකම්පා කරලා මට දැන් ඇති වෙලා.
7 දේශයේ දොරටු ළඟ මම ඔවුන්ව ධාන්‍ය වගේ පොළනවා. එතකොට ඔවුන් දහයියා වගේ හුළඟට ගහගෙන යයි.
මම ඔවුන්ගේ දරුවන්ව ඔවුන්ගෙන් උදුරගන්නවා.+
මම මගේ සෙනඟව විනාශ කරනවා.
මොකද ඔවුන් ගිය වැරදි මාර්ගවලින් ආපහු හැරිලා එන්න ඔවුන් කැමති වුණේ නැහැ.+
8 මම ඔවුන් අතරේ ඉන්න වැන්දඹුවන්ගේ ගාණ මුහුදේ වැලිවලටත් වඩා වැඩි වෙන්න සලස්වනවා.
මව්වරුන්ටයි, තරුණයන්ටයි පහර දෙන්න මම කෙනෙක්ව එවනවා. ඔහු මහ දවාලේ ඔවුන්ව විනාශ කරලා දායි.
හදිස්සියේම ඔවුන් තුළ බයක් මම ඇති කරනවා. ඔවුන්ව නොසන්සුන් කරනවා.
9 දරුවන් හත්දෙනෙක් බිහි කරපු ස්ත්‍රිය දැන් මලානික වෙලා.
ඇය හුස්ම ගන්න බැරුව දඟලනවා.
මහ දවාලේ වුණත් ඇය ඉන්නේ අඳුරේ.*
ඇයව ලැජ්ජාවටත් නින්දාවටත් පත් කරලා.’
‘ඔවුන් අතරින් ඉතුරු වෙන ටිකදෙනාවත්
මම සතුරාගේ කඩුවට භාර දෙනවා’ කියලා යෙහෝවා කියනවා.”+
10 අම්මේ, ඔයා මාව බිහි කරපු නිසා මං කොච්චර දුක් විඳිනවාද!+
දේශයේ ඉන්න මිනිස්සු මාත් එක්ක වාද කරනවා, රණ්ඩු කරනවා.
මම කාටවත් ණයට දුන්නෙවත් කාගෙන්වත් ණය ගත්තෙවත් නැහැ.
ඒත් හැමෝම මට ශාප කරනවා.
11 යෙහෝවා මෙහෙම කිව්වා. “මම ඔයාට උදව් කරනවා. ඔයාගේ සහයට ඉන්නවා.
දුක් කරදර එද්දී මම ඔයා වෙනුවෙන් මැදිහත් වෙනවා.
සතුරාගේ අතින් පහර කද්දී මම ඔයාව බේරගන්නවා.
12 උතුරෙන් ගෙනාපු යකඩ, කෑලි කෑලිවලට කඩන්න පුළුවන් කාටද?
තඹ, කෑලිවලට කඩන්න පුළුවන් කාටද?
13 සතුරන්ට ඔබේ සම්පත් සහ වස්තුව අරගෙන යන්න මම ඉඩ දෙනවා.+
දේශය පුරාම ඔබ කරපු වැරදි නිසා කිසිම ගෙවීමක් නොකරම ඒවා අරගෙන යන්න මම ඉඩහරිනවා.
මොකද මගේ කේන්තිය නිසා ගින්නක් ඇවිළිලා තියෙනවා.
ඒ ගින්න ඇවිළිලා තියෙන්නේ ඔබට විරුද්ධවයි.”+
15 අනේ යෙහෝවා, මං විඳින දුක ඔබ දන්නවා.
මාව සිහි කරන්න. මං දිහා බලන්න.
මට පීඩා කරන අයට දඬුවම් කරන්න.+
ඔවුන් ගැන ඔබ ඉවසන නිසා මාව විනාශ වෙලා යයි. අනේ එහෙම වෙන්න දෙන්න එපා.
මම මේ නින්දා විඳින්නේ ඔබ නිසා කියලා අමතක කරන්න එපා.+
16 ඔබේ වදන් මට ලැබුණාම මම ඒක කෑවා.+
ඔබේ වදන්වලින් මට සතුටක් දැනුණා. ඒවා මගේ හිතට ලොකු ප්‍රීතියක් ගෙනාවා.
මොකද මම ඔබේ නම දරනවා. ස්වර්ගයේ සේනාවල දෙවි යෙහෝවා, මම ඔබේ නම දරනවා.
17 විනෝදය පස්සේම යන අය එක්ක ඉඳගෙන මම සතුටු වෙන්නේ නැහැ.+
18 මගේ වේදනාව නැති වෙන්නේ නැත්තේ ඇයි? මගේ තුවාලය සුව වෙන්නෙම නැත්තේ ඇයි?
ඒක සුව වෙන්නේම නැහැ.
ඔබ මට විශ්වාසය තියන්න බැරි,
වේළිලා ගිය* දිය උල්පතක් වගේ වෙනවාද?
19 ඒ නිසා යෙහෝවා මෙහෙම කිව්වා.
“ඔයා හිතන විදිහ හදාගත්තොත් මගේ කරුණාව ආයෙත් ලබන්න ඔයාට පුළුවන්.
ඔයා මං ඉස්සරහා ඉඳියි.
කිසි වටිනාකමක් නැති දේවලින් ඔයා වටින දේ වෙන් කළොත්
ඔයා මං වෙනුවෙන් කතා කරන කෙනා වෙනවා.*
සෙනඟට ඔයා ළඟට එන්න සිද්ධ වෙනවා.
ඒත් ඔයාට එයාලාගේ පැත්තට යන්න ඕනෙ වෙන්නේ නැහැ.”
20 “මම ඔයාව මේ සෙනඟ ඉදිරියේ ශක්තිමත් තඹ පවුරක් වගේ කරනවා.+
එයාලා අනිවාර්යයෙන්ම ඔයාට විරුද්ධව සටන් කරයි.
ඒත් ඔයාව පරාජය කරන්න එයාලට පුළුවන් වෙන්නේ නැහැ.+
මොකද ඔයාව බේරගන්නත් ඔයාව ගලවගන්නත් මම ඔයා එක්කම ඉන්නවා” කියලා යෙහෝවා කියනවා.
21 “මම ඔයාව දුෂ්ටයන්ගේ අතින් බේරගන්නවා.
කුරිරු අයගේ අතින් මුදවගන්නවා.”