යෙරෙමියා
40 ආරක්ෂක නිලධාරීන්ගේ ප්‍රධානියා වුණ නෙබුෂරදාන්+ යෙරෙමියාව රාමාවලදී+ නිදහස් කළාට පස්සෙත් යෙරෙමියාට යෙහෝවා දෙවියන්ගෙන් පණිවිඩයක් ලැබුණා. නෙබුෂරදාන් යෙරෙමියාගේ අත් දම්වැල්වලින් බැඳලා එයාව රාමාවලට අරන් ගිහින් තිබුණා. එයා හිටියේ යෙරුසලමේ සහ යූදාවල ඉඳන් බැබිලෝනියට වහලුන් විදිහට අරන් යන්න හිටපු සෙනඟ අතරෙයි. 2 යෙරෙමියාව නිදහස් කරන්න කලින් ආරක්ෂක නිලධාරීන්ගේ ප්‍රධානියා එයාට මෙහෙම කිව්වා. “මේ දේශයට වෙන්න යන විනාශය ගැන ඔබේ දෙවි වන යෙහෝවා කලින්ම කිව්වා. 3 කියපු විදිහටම යෙහෝවා දෙවියන් ඒ විනාශය ගෙනාවා. එහෙම කළේ මේ සෙනඟ යෙහෝවා දෙවියන්ට විරුද්ධව වැරදි කරපු නිසයි. ඔහු කියපු දේවලට අකීකරු වුණ නිසයි. මේ හැම දෙයක්ම ඔයාලට වුණේ ඒ නිසයි.+ 4 ඔයාගේ අත් බැඳලා තියෙන දම්වැල් ගලවලා දාලා මම අද ඔයාව නිදහස් කරනවා. ඔයා කැමති නම් මාත් එක්ක බැබිලෝනියට යන්න එන්න. මං ඔයාව බලාගන්නම්. ඒත් බැබිලෝනියට යන්න ඔයා කැමති නැත්තං මෙහේ ඉන්න. මේ දේශයේ කැමති තැනකට ගිහින් ජීවත් වෙන්න ඔයාට නිදහස තියෙනවා.”+
5 යෙරෙමියා ආපහු යන්න කලින් නෙබුෂරදාන් එයාට මෙහෙම කිව්වා. “යූදාවල නගර බලාගන්න බැබිලෝනියේ රජ ෂාපාන්ගේ+ පුතා වුණ අහිකාම්ගේ+ පුත් ගෙදලියාව+ පත් කරලා තියෙනවා. එයා ළඟට ගිහින් එයාත් එක්ක ජීවත් වෙන්න. එහේ ඉන්න සෙනඟ එක්ක ඉන්න ඔයාටත් පුළුවන්. එහෙම නැත්තං ඔයා කැමති ඕනෙම තැනකට යන්න.”
ඊටපස්සේ ආරක්ෂක නිලධාරීන්ගේ ප්‍රධානියා යෙරෙමියාට කෑමයි, තෑග්ගකුයි දීලා එයාව නිදහස් කළා. 6 ඉතින් යෙරෙමියා මිෂ්පාවල හිටපු අහිකාම්ගේ පුතා වුණ ගෙදලියා ළඟට ගියා.+ දේශයේ ඉතුරු වෙලා හිටපු සෙනඟ අතරේ ජීවත් වුණ ගෙදලියා එක්ක යෙරෙමියාත් හිටියා.
7 තමන්ගේ සෙබළු එක්ක දේශය පුරාම හිටපු හමුදාවේ ප්‍රධානීන්ට ආරංචි වුණා බැබිලෝනියේ රජ යූදා දේශය බලාගන්න අහිකාම්ගේ පුත් ගෙදලියාව පත් කළා කියලා. බැබිලෝනියට අරගෙන යන්නේ නැතුව දේශයේ ඉතුරු කරලා ගිය දුප්පත් අය අතරේ හිටපු පුරුෂයන්ව, ස්ත්‍රීන්ව, දරුවන්ව බලාගන්නත් එයාව පත් කරලා තියෙනවා කියලා එයාලට ආරංචි වුණා.+ 8 ඉතින් එයාලා මිෂ්පාවල හිටපු ගෙදලියා ළඟට ආවා.+ නෙතනියාගේ පුතා වුණ ඉෂ්මායෙල්,+ කාරියාගේ පුතාලා වුණ යෝහානාන්+ සහ යොනාතාන්, තන්හුමෙත්ගේ පුතා වුණ සෙරායා, නෙටොෆාවල කෙනෙක් වුණ ඒෆයිගේ පුතාලා, මයකාවල කෙනෙක්ගේ පුතෙක් වුණ යෙෂනියා+ සහ එයාලාගේ සෙබළු ගෙදලියා ළඟට ආවා. 9 එතකොට ෂාපාන්ගේ පුතා වුණ අහිකාම්ගේ පුත් ගෙදලියා එයාලයි, එයාලාගේ සෙබළුයි ඉස්සරහා දිවුරලා මෙහෙම කිව්වා. “කල්දිවරුන්ට සේවය කරන්න බය වෙන්න එපා. මේ දේශයේ ඉඳන් බැබිලෝනියේ රජට සේවය කරන්න. එහෙම කළොත් ඔයාලට කිසි කරදරයක් වෙන්නේ නැහැ.+ 10 මම මිෂ්පාවලම ඉන්නවා. එතකොට මට පුළුවන් මෙහෙට එන කල්දිවරුන් එක්ක ඔයාලා හැමෝම වෙනුවෙන් කතා කරන්න. ඒත් ඔයාලා, ඔයාලා අයිති කරගත්ත නගරවලට ගිහිල්ලා ජීවත් වෙන්න. වයින්, ගිම්හාන කාලේ හැදෙන පලතුරු, තෙල් ඔයාලාගේ බඳුන්වලට රැස් කරගන්න.”+
11 බැබිලෝනියේ රජ යූදා සෙනඟගෙන් කොටසක් ඉතුරු කරලා ගියා කියලත් එයාලව බලාගන්න ෂාපාන්ගේ පුතා වුණ අහිකාම්ගේ පුත් ගෙදලියාව පත් කළා කියලත් මෝවබ්වලයි, අම්මොන්වලයි, ඒදොම්වලයි, අනිත් හැම දේශයකමයි හිටපු යුදෙව්වන්ට ආරංචි වුණා. 12 ඉතින් එක එක දේශවලට විසිරිලා ගිහින් හිටපු යුදෙව්වන් ආපහු යූදා දේශයට එන්න පටන්ගත්තා. ඒ හැමෝම මිෂ්පාවල හිටපු ගෙදලියා ළඟට ආවා. එයාලා වයින් සහ ගිම්හාන කාලේ හැදෙන පලතුරු විශාල ප්‍රමාණයක් එකතු කරගත්තා.
13 කාරියාගේ පුතා වුණ යෝහානාන් සහ දේශය පුරා විසිරිලා හිටපු හමුදාවේ ප්‍රධානීන් මිෂ්පාවල හිටපු ගෙදලියා ළඟට ආවා. 14 එයාලා ගෙදලියාට මෙහෙම කිව්වා. “අම්මොන්වරුන්ගේ+ රජ වන බාලිස් ඔබව මරලා දාන්න නෙතනියාගේ පුත් ඉෂ්මායෙල්ව එව්වා කියලා ඔබ දන්නේ නැද්ද?”+ ඒත් අහිකාම්ගේ පුතා වුණ ගෙදලියා එයාලා කියපු දේ විශ්වාස කළේ නැහැ.
15 කාරියාගේ පුතා වුණ යෝහානාන් මිෂ්පාවලදී ගෙදලියාට රහසින් මෙහෙම කිව්වා. “නෙතනියාගේ පුතා වුණ ඉෂ්මායෙල්ව මරලා දාන්න මට ඉඩ දෙන්න. මං ඒ ගැන කාටවත් දැනගන්න තියන්නේ නැහැ. අපි එයාව මැරුවේ නැත්නම් එයා ඔබව මරයි. එහෙම වුණොත් ඔබ ළඟට ඇවිත් ඉන්න යූදාවල සෙනඟ ආපහු විසිරිලා යයි. ඉතුරු වෙලා ඉන්න යුදෙව්වන්ව නැත්තටම නැති වෙලා යන්න ඉඩ දෙන්නේ කොහොමද?” 16 ඒත් අහිකාම්ගේ පුතා වුණ ගෙදලියා+ කාරියාගේ පුත් යෝහානාන්ට මෙහෙම කිව්වා. “ඔයා ඉෂ්මායෙල් ගැන කියන දේවල් බොරු. ඒ නිසා එයාව මරන්න එපා.”