පළවෙනි සාමුවෙල්
31 පිලිස්තිවරු ඊශ්‍රායෙල්වරුන්ට විරුද්ධව සටන් කළා.+ ඊශ්‍රායෙල්වරු සටනින් පැරදිලා පිලිස්තිවරුන්ගෙන් පලා ගියා. ඊශ්‍රායෙල්වරු හුඟදෙනෙක් ගිල්බෝවා+ කන්දේදී මැරුම් කෑවා. 2 පිලිස්තිවරු සාවුල් රජයි, එයාගේ පුතාලයි පස්සේ පන්නගෙන ගිහින් එයාලා කිට්ටුවටම ආවා. එයාලා සාවුල්ගේ පුතාලා+ වන යොනාතාන්වයි,+ අබිනාදාබ්වයි, මල්කීෂුවාවයි මරලා දැම්මා. 3 සාවුල්ට විරුද්ධව එල්ල කරපු ප්‍රහාර එන්න එන්නම දරුණු අතට හැරුණා. දුනුවායන්ගේ ඊ පහරවල් නිසා සාවුල්ට බරපතළ විදිහට තුවාල වුණා.+ 4 ඒ වෙලාවේ සාවුල් එයාගේ ආයුධ අරන් යන කෙනාට කතා කරලා මෙහෙම කිව්වා. “මේ අචර්මච්ඡේදිතයන්*+ මාව මරන්න කලින් ඔයාගේ කඩුවෙන් මාව මරලා දාන්න. නැත්නම් එයාලා ඇවිත් මට හොඳටම වධ දෙයි.” ඒත් ආයුධ අරන් ගිය කෙනා එහෙම කරන්න බය වුණා. ඉතින් සාවුල් කඩුව අරගෙන එයාටම ඇනගත්තා.+ 5 සාවුල් මැරුණා+ කියලා දැක්කාම එයාගේ ආයුධ අරන් ගිය කෙනාත් එයාගේ කඩුව අරන් එයාටම ඇනගෙන මැරුණා. 6 සාවුල් රජයි, එයාගේ පුතාලා තුන්දෙනායි, එයාගේ ආයුධ අරන් ගිය කෙනායි, සාවුල් එක්ක හිටපු හැම පුරුෂයෙක්මයි එදා මැරුණා.+ 7 ඊශ්‍රායෙල් හමුදාව පලා යනවා කියලත් සාවුල් සහ එයාගේ පුතාලා මැරුණා කියලත් ආරංචි වුණාම නිම්නයේ* සහ යොර්දාන් ගඟ ළඟ පදිංචි වෙලා හිටිය ඊශ්‍රායෙල්වරු එයාලාගේ ගම්බිම් අත්හැරලා පලා ගියා.+ පස්සේ පිලිස්තිවරු ඒ නගරවලට ඇවිත් පදිංචි වුණා.
8 මැරුණ අය ළඟ තිබුණ දේවල් පැහැරගන්න පිලිස්තිවරු පහුවදා ගිල්බෝවා+ කන්දට ආවා. එතකොට එයාලා දැක්කා සාවුල්ගෙයි, එයාගේ පුතාලා තුන්දෙනාගෙයි මළ සිරුරු එතන තියෙනවා. 9 පිලිස්තිවරු සාවුල්ගේ බෙල්ල කපලා එයාගේ ආයුධ කට්ටලය ගලවලා දැම්මා. ඊටපස්සේ එයාලා පිලිස්තිවරුන්ගේ දේශය පුරාම පණිවිඩකරුවන්ව යවලා+ දේවාලවලටත්+ සෙනඟ අතරටත් ගිහින් ඒ ගැන දැනුම් දෙන්න කියලා කිව්වා. 10 ඊටපස්සේ එයාලා සාවුල්ගේ ආයුධ අෂ්ටොරෙත්ගේ දේවාලයේ තිබ්බා. සාවුල්ගේ මළ සිරුර එයාලා බෙත්ෂාන්+ නගරයේ පවුරේ එල්ලුවා. 11 පිලිස්තිවරු සාවුල් රජට කරපු දේ ගැන යාබෙෂ්ගිලියද්වල+ අයට ආරංචි වුණා. 12 එතකොට ඒ නගරේ හිටපු නිර්භීත පුරුෂයන් හැමෝම රෑ පුරාම ගමන් කරලා බෙත්ෂාන්වලට ආවා. එයාලා පවුරේ එල්ලලා තිබුණ සාවුල්ගේ සහ එයාගේ පුතාලාගේ මළ සිරුරු බිමට අරන් ඒවා යාබෙෂ්වලට ගෙනියලා එහෙදී පිච්චුවා. 13 ඊටපස්සේ එයාලා ඒ අයගේ ඇටකටු+ යාබෙෂ්වල+ තිබුණ කිහිරි ගහ* යට වළලලා දවස් හතක් කිසිම දෙයක් කන්නේ නැතුව හිටියා.