පළවෙනි කොරින්ති
14 දිගටම ආදරෙන් වැඩ කරන්න. ඒත් දෙවියන්ගේ බලය මාර්ගයෙන් ලැබෙන තෑගි* ලබාගන්න ඔයාට කරන්න පුළුවන් හැම දේම කරන්න. විශේෂයෙන්ම අනාවැකි කියන්න තියෙන හැකියාව+ ලබාගන්න උත්සාහ කරන්න. 2 වෙනත් භාෂාවකින් කතා කරන කෙනා කියන දේ අනිත් අයට තේරෙන්නේ නැහැ.+ ඒක තේරෙන්නේ දෙවියන්ට විතරයි. දෙවියන්ගේ බලයේ උදව්වෙන් එයා පරිශුද්ධ රහස්+ ගැන කතා කළත් ඒවා කිසිම කෙනෙක්ට තේරෙන්නේ නැහැ. 3 ඒත් අනාවැකි කියන කෙනා එයා කියන දේවලින් අනිත් අයව ශක්තිමත් කරනවා, දිරිගන්වනවා, සනසනවා. 4 වෙනත් භාෂාවකින් කතා කරන කෙනා ශක්තිමත් කරගන්නේ තමාවමයි. ඒත් අනාවැකි කියන කෙනා සභාවේ හැමෝවම දිරිගන්වනවා. 5 වෙනත් භාෂාවලින් කතා කරන හැකියාව ඔයාලා හැමෝටම ලැබෙනවා නම් මං කැමතියි.+ ඒත් ඔයාලා අනාවැකි කියනවා නම්+ මං ඒ ගැන ඊට වඩා සතුටු වෙනවා. අනාවැකි කියන කෙනා වෙනත් භාෂාවලින් කතා කරන කෙනාට වඩා උතුම්. මොකද වෙනත් භාෂාවකින් කතා කරන කෙනා කියන දේ පරිවර්තනය කළොත් විතරයි සභාව දිරිගැන්වෙන්නේ. 6 සහෝදරයෙනි, මං ඇවිත් ඔයාලා දන්නේ නැති භාෂාවලින් කතා කළා කියලා ඒකෙන් ඔයාලට ප්‍රයෝජනයක් තියෙයිද? මං කියන දේවල්වලින් ඔයාලට ප්‍රයෝජනයක් ලැබෙන්නේ මං දෙවියන් එළිදරව් කරපු දෙයක්,+ ඔහුගෙන් දැනගන්න ලැබුණ විශේෂ දෙයක්,+ අනාවැකියක් නැත්නම් වෙනත් ඉගැන්වීමක් ගැන කතා කළොත් නෙමෙයිද?
7 හිතන්න බටනළාවක් නැත්නම් වීණාවක් වාදනය කරද්දී ස්වර අතර වෙනසක් නැතුව එකම විදිහට ඒවා වාදනය කරනවා කියලා. එහෙම කළොත් මොකද වෙන්නේ? වාදනය කරන්නේ මොකක්ද කියලා කාටවත් තේරෙයිද? 8 හොරණෑවෙන් ඇහෙන හඬ පැහැදිලි නැත්නම් කවුරුත් යුද්ධයට යන්න ලෑස්ති වෙයිද? 9 ඔයාත් කතා කරන්නේ ලේසියෙන් තේරුම්ගන්න බැරි විදිහට නම් වෙන්නේ ඒ දේම නෙමෙයිද? ඔයා කියන්නේ මොනවාද කියලා අනිත් අයට තේරුම්ගන්න බැහැ. ඒක හරියට ඔයා හුළඟට කතා කරනවා වගෙයි. 10 ලෝකේ පුරාම ගොඩක් භාෂා කතා කරනවා. ඒ හැම භාෂාවකින්ම අදහස් බෙදාගන්න පුළුවන්. 11 හැබැයි තව කෙනෙක් කියන්නේ මොකක්ද කියලා මට තේරෙන්නේ නැත්නම් ඒ කෙනා මාව සලකන්නේ විදේශිකයෙක් විදිහට. මටත් එයා විදේශිකයෙක් වගේ. 12 ඔයාලටත් ඒක අදාළයි. දෙවියන්ගේ බලය මාර්ගයෙන් ලැබෙන තෑගි ලබාගන්න ඔයාලා ඉන්නේ හරිම කැමැත්තෙන්. ඉතින් සභාව ශක්තිමත් කරන්න+ උදව් වෙන තෑගි ලබාගන්න උත්සාහ කරන්න.
13 ඉතින් වෙනත් භාෂාවකින් කතා කරන කෙනා තමන් කියන දේ පරිවර්තනය කරන්න+ උදව් ඉල්ලලා යාච්ඤා කරන්න ඕනේ. 14 මම වෙන භාෂාවකින් යාච්ඤා කරනවා නම් ඇත්තටම කතා කරන්නේ මම නෙමෙයි. දෙවියන්ගේ බලය මාර්ගයෙන් මට ලැබුණ හැකියාව නිසයි මට ඒක කරන්න පුළුවන් වෙන්නේ. ඉතින් මං කියන දේ මටවත් තේරෙන්නේ නැහැ. 15 එහෙමනම් මං මොනවාද කරන්න ඕනේ? දෙවියන්ගේ බලය මාර්ගයෙන් ලැබුණ හැකියාව පාවිච්චි කරලා මං යාච්ඤා කරනවා. හැබැයි ඒත් එක්කම මං කියන දේ තේරුම්ගන්න මට උදව් කරන්න කියලත් මං යාච්ඤා කරනවා. දෙවියන්ගේ බලය මාර්ගයෙන් ලැබුණ හැකියාව පාවිච්චි කරලා මං ප්‍රශංසා ගී ගායනා කරනවා. හැබැයි ඒත් එක්කම මට තේරෙන වචන පාවිච්චි කරලත් මං ප්‍රශංසා ගී ගායනා කරනවා. 16 එහෙම කළේ නැත්නම් දෙවියන්ගේ බලය මාර්ගයෙන් ඔයාට ලැබුණ හැකියාව පාවිච්චි කරලා ඔයා දෙවියන්ට ස්තුති ප්‍රශංසා කරද්දී ඔයාත් එක්ක ඉන්න කෙනාට ඒ යාච්ඤාවට “ආමෙන්”* කියලා කියන්න පුළුවන්ද? මොකද ඔයා කියන දේ එයාට තේරෙන්නේ නැහැ. 17 ඔයා ස්තුති කරලා කරන යාච්ඤාවේ කිසිම අඩුවක් නැති වෙන්න පුළුවන්. ඒත් අනිත් කෙනාට ඒකෙන් කිසිම ප්‍රයෝජනයක් නැහැ. 18 ඔයාලා හැමෝටම වඩා ගොඩක් භාෂාවලින් කතා කරන්න මට හැකියාව දුන්න එක ගැන මම දෙවියන්ට ස්තුති කරනවා. 19 ඒත් සභාවේ අයට උගන්නද්දී මං දන්නේ නැති භාෂාවකින් වචන දහදාහක් කියනවාට වඩා+ මට තේරෙන භාෂාවකින් වචන පහක් කියන්න තියෙනවා නම් මට ඒ ඇති.
20 සහෝදරයෙනි, පොඩි ළමයි වගේ හිතන්න එපා.+ දුෂ්ට දේවලදී විතරක් අහිංසක දරුවෝ වගේ වෙන්න.+ හොඳට වැඩුණු අය වගේ හිතන්න පුරුදු වෙන්න.+ 21 නීතියේ මෙහෙම ලියලා තියෙනවා. “‘මම මේ සෙනඟට විදේශිකයන්ගේ භාෂාවලිනුත් නාඳුනන අයගේ වචනවලිනුත් කතා කරනවා. එහෙම කළත් මේ සෙනඟ මට ඇහුම්කන් දෙන්න කැමති වෙන්නේ නැහැ’ කියලා යෙහෝවා* කියනවා.”+ 22 ඒකෙන් පැහැදිලි වෙනවා වෙනත් භාෂාවලින් කතා කරන හැකියාව දුන්නේ ස්වාමීන් ගැන විශ්වාසයක් නැති අයට+ ලකුණක් විදිහට මිසක් විශ්වාසයක් තියෙන අය වෙනුවෙන් නෙමෙයි කියලා. ඒත් අනාවැකි කියන හැකියාව දුන්නේ විශ්වාසයක් තියෙන අය වෙනුවෙන් මිසක් විශ්වාසයක් නැති අය වෙනුවෙන් නෙමෙයි. 23 මුළු සභාවම එකට රැස් වෙලා ඉන්න වෙලාවලදී හැමෝම වෙන වෙන භාෂාවලින් කතා කරන්න පටන්ගත්තොත් එතනට එන සාමාන්‍ය මිනිස්සු හරි විශ්වාසයක් නැති අය හරි මොනවා හිතයිද? එයාලා හිතයි ඔයාලට පිස්සු කියලා. 24 ඒත් ඔයාලා හැමෝම අනාවැකි කියකිය ඉද්දී විශ්වාසයක් නැති කෙනෙක් හරි සාමාන්‍ය කෙනෙක් හරි එතනට ආවොත් එයාට ඇහෙන දේවල් එයාව නිවැරදි කරයි. තමාව හොඳින් සෝදිසි කරලා බලන්න ඒ දේවල් එයාව පොලඹවයි. 25 එයාගේ හිතේ හැංගිලා තියෙන දේවල් එයාටම තේරුම්ගන්න පුළුවන් වෙන නිසා එයා බිම වැටිලා, දෙවියන්ට නමස්කාර කරලා මෙහෙම කියයි. “ඇත්තටම දෙවියන් ඔයාලා අතරේ ඉන්නවා.”+
26 එහෙමනම් සහෝදරයෙනි, ඔයාලා මොනවාද කරන්න ඕනේ? ඔයාලා එකට රැස් වෙද්දී එක් කෙනෙක් ගීතිකාවක් කියයි. තව කෙනෙක් උගන්නයි. තවත් කෙනෙක් දෙවියන් තමන්ට එළිදරව් කරපු දෙයක් ගැන කියයි. තව කෙනෙක් වෙන භාෂාවකින් කතා කරයි. තවත් කෙනෙක් ඒ දේ පරිවර්තනය කරයි.+ ඒ හැම දෙයක්ම කරන්න ඕනෙ අනිත් අයව දිරිගන්වන්න. 27 සමහරු වෙනත් භාෂාවකින් කතා කරනවා නම් ඒක දෙන්නෙක් නැත්නම් වැඩිම වුණොත් තුන්දෙනෙක් කළාට කමක් නැහැ. හැමෝම එක පාර කතා කරන්නත් එපා. එක් කෙනෙක් කතා කළාට පස්සේ තමයි අනිත් කෙනා කතා කරන්න ඕනේ. ඒ වගේම තවත් කෙනෙක් ඒ දේවල් පරිවර්තනය කරන්නත් ඕනේ.+ 28 කෙනෙක් කියන දේ පරිවර්තනය කරන්න සභාවේ කවුරුත් නැත්නම් එයා කතා නොකර ඉන්න ඕනේ. එයාට පුළුවන් එයාටම හරි දෙවියන්ට හරි හිතින් කතා කරන්න. 29 අනාගතවක්තෘවරුන්+ ඉන්නවා නම් දෙන්නෙක්ට නැත්නම් තුන්දෙනෙක්ට කතා කරන්න පුළුවන්. අනිත් අය එයාලා කියන දේවල් තේරුම්ගන්න උත්සාහ කරන්න ඕනේ. 30 රැස්වීමේ ඉද්දී වෙනත් කෙනෙක්ට දෙවියන්ගෙන් එළිදරව්වක් ලැබුණොත් මුලින් කතා කරකර හිටපු කෙනා නිහඬ වෙන්න ඕනේ. 31 ඔයාලට පුළුවන් අනාවැකි කියන්න. හැබැයි එක් කෙනෙක් කියලා ඉවර වුණාට පස්සේ අනිත් කෙනා කියන්න. එහෙම කළොත් හැමෝටම ඉගෙනගන්නත් දිරිගැන්වීමක් ලබන්නත් පුළුවන්.+ 32 අනාගතවක්තෘවරු දෙවියන්ගේ බලය මාර්ගයෙන් තමන්ට ලැබිලා තියෙන හැකියාව පාවිච්චි කරන්න ඕනෙ පිළිවෙළක් ඇතුව. 33 මොකද දෙවියන් සමාදානයේ දෙවි කෙනෙක්. ඔහු අපිළිවෙළට දේවල් කරන කෙනෙක් නෙමෙයි.+
ශුද්ධ තැනැත්තන් ඉන්න හැම සභාවකම වෙනවා වගේ 34 කාන්තාවන් සභාවේදී නිශ්ශබ්දව ඉන්න ඕනේ. මොකද එයාලට කතා කරන්න අවසර නැහැ.+ නීතියෙත් කියලා තියෙන විදිහට එයාලා යටත් වෙලා ඉන්න ඕනේ.+ 35 එයාලට මොනවා හරි දෙයක් ගැන දැනගන්න ඕනෙ නම් ගෙදරදී එයාලාගේ සැමියාගෙන් ඒ ගැන අහන්න පුළුවන්. සභාවේ හැමෝම ඉස්සරහා කාන්තාවක් කතා කරන එක අගෞරවනීය දෙයක්.
36 දෙවියන්ගේ පණිවිඩය පැතිරුණේ ඔයාලාගෙන්ද? ඒ පණිවිඩය ලැබුණේ ඔයාලට විතරද?
37 කවුරු හරි හිතනවා නම් එයා අනාගතවක්තෘවරයෙක් එහෙම නැත්නම් දෙවියන්ගේ බලය මාර්ගයෙන් ලැබෙන තෑග්ගක් එයාට තියෙනවා කියලා එයා තේරුම්ගන්න ඕනෙ මං ඔයාලට ලියන්නේ ස්වාමීන් අණ කරන දෙයක් ගැන කියලා. 38 කෙනෙක් ඒක පිළිගන්නේ නැත්නම් එයාවත් පිළිගන්නේ නැහැ.* 39 ඉතින් මගේ සහෝදරයෙනි, දිගටම අනාවැකි කියන්න+ උත්සාහ කරන්න. ඒත් වෙනත් භාෂාවලින් කතා කරන එක තහනම් කරන්න එපා.+ 40 හැම දෙයක්ම හරි විදිහටත් පිළිවෙළටත් කරන්න.+