යෙරෙමියා
8 යෙහෝවා දෙවියන් මෙහෙම කියනවා. “ඒ කාලේදී යූදාවල රජවරුන්ගෙත් අධිපතීන්ගෙත් පූජකයන්ගෙත් අනාගතවක්තෘවරුන්ගෙත් යෙරුසලමේ ඉන්න අයගෙත් ඇටකටු ඔවුන්ගේ සොහොන් ගෙවල්වලින් එළියට ඇදලා දානවා. 2 ඒ ඇටකටු ඔවුන් ආස කරපු, වැඳ වැටිලා නමස්කාර කරපු, උපදෙස් පතාගෙන පස්සෙන් ගිය ඉර, හඳ සහ අනිත් ආකාශ වස්තූන් ඉස්සරහා අතුරලා තියෙනවා.+ ඒවා එකතු කරන්නෙවත් තැන්පත් කරන්නෙවත් නැහැ. ඒවා කුණු වෙලා පසට පොහොර වෙනවා.”+
3 “මේ දුෂ්ට ජාතියෙන් ඉතුරු වෙන අයව මම සීසීකඩ විසුරුවාහරිනවා. ජීවත් වෙනවාට වඩා මැරුණා නම් හොඳයි කියලා ඒ අය හිතයි” කියලා ස්වර්ගයේ සේනාවල අධිපති වන යෙහෝවා කියනවා.
4 “ඔයා ඒ අයට මේ දේ කියන්න. ‘යෙහෝවා මෙහෙම කියනවා.
“මිනිස්සු වැටුණොත් ආයේ නැඟිටින්නේ නැද්ද?
කෙනෙක් තමන් යන මාර්ගයෙන් ආපහු හැරිලා ආවොත් අනිත් කෙනාත් හැරිලා එන්නේ නැද්ද?
5 ඒත් මේ සෙනඟ, යෙරුසලමේ ඉන්න මේ සෙනඟ දිගින් දිගටම මට අවිශ්වාසවන්තව වැඩ කරන්නේ ඇයි?
වංචනික වැඩ අතහරින්න ඔවුන් කැමති නැහැ.
ආපහු හැරිලා එන්න කොහොමටවත් කැමති නැහැ.+
6 මම ඔවුන්ට හොඳින් ඇහුම්කන් දුන්නා. ඔවුන් කියන දේ අහගෙන හිටියා. ඒත් ඔවුන් අවංකව කතා කළේ නැහැ.
එක් කෙනෙක්වත් තමන් කරපු දුෂ්ට වැඩ ගැන පසුතැවිලි වුණේ නැහැ. ‘මොනවාද මං මේ කළේ’ කියලා ඇහුවේ නැහැ.+
යුද්ධයකට වේගයෙන් යන අශ්වයන් වගේ ඔවුන් හැමෝම වැඩිදෙනා දුවගෙන යන මාර්ගයට දුවගෙන යනවා.
7 වෙන ප්‍රදේශයකට යන්න ඕනෙ මොන කාලේද කියලා මානකොකා හරියටම දන්නවා.
කොබෙයියා, තුරිතයා සහ වල් අවිච්චියා* උන් ආපහු එන්න ඕනෙ කාලය* ගැන දන්නවා.
ඒත් යෙහෝවා දෙවියන් විනිශ්චය කරන දවස ගැන මගේ සෙනඟ තේරුම්ගන්නේ නැහැ.”’+
8 ‘“අපි ඥානවන්ත සෙනඟක්. යෙහෝවාගේ නීතිය* තියෙන්නේ අපි ළඟ” කියලා ඔබ කියන්නේ කොහොමද?
පිටපත්කරුවන්* ඔවුන්ගේ පන්හිඳ*+ පාවිච්චි කරන්නේ බොරු දේවල් ලියන්න විතරයි.
9 ප්‍රඥාවන්තයන්ව ලැජ්ජාවට පත් කරනවා.+
බයෙන් වෙවුලන ඔවුන් උගුලකට අහු වෙයි.
බලන්න! ඔවුන් යෙහෝවාගේ වචනය ප්‍රතික්ෂේප කළා.
ඉතින් ඔවුන් ප්‍රඥාවන්තයි කියලා කියන්න පුළුවන්ද?
10 මම ඔවුන්ගේ භාර්යාවන්ව වෙනත් පුරුෂයන්ට දෙනවා.
ඔවුන්ගේ ඉඩකඩම් වෙනත් අයට අයිති කරලා දෙනවා.+
මොකද ඔවුන් අතරේ ඉන්න ලොකු කුඩා හැමෝම බොරුවෙන් වංචාවෙන් දේවල් උපයනවා.+
අනාගතවක්තෘවරයාගේ ඉඳන් පූජකයා වෙන කල් හැමෝම වංචා කරනවා.+
11 මගේ දියණිය වන මගේ සෙනඟගේ තුවාලවලට* මතුපිටින් බෙහෙත් දාන්න හදන ඔවුන් මෙහෙම කියනවා.
“දැන් සාමය උදා වෙලා! සාමය උදා වෙලා!”
ඒත් ඇත්තටම කිසිම සාමයක් නැහැ.+
12 ඔවුන් කරපු පිළිකුල් දේවල් ගැන ඔවුන්ට ලැජ්ජාවක් දැනෙනවාද?
ඔවුන්ට ඒ ගැන කිසිම ලැජ්ජාවක් දැනෙන්නේ නැහැ.
ලැජ්ජාව කියන්නේ මොකක්ද කියලවත් ඔවුන් දන්නේ නැහැ.+
ඒ නිසා වැටිලා ඉන්න අය අතරේ ඔවුනුත් ඉඳියි.
මම ඔවුන්ට දඬුවම් කරද්දී කකුල පැටලිලා ඔවුන් වැටෙයි’+ කියලා යෙහෝවා කියනවා.
13 ‘මම ඔවුන්ව රැස් කරද්දීම ඔවුන්ව විනාශ කරනවා.
මිදිවැලේ එක ගෙඩියක්වත් අත්තික්කා ගහේ එක ගෙඩියක්වත් ඉතුරු වෙන්නේ නැහැ. කොළත් වේළිලා යයි.
මම ඔවුන්ට දුන්න දේ ඔවුන්ට නැති වෙලා යනවා’ කියලා යෙහෝවා කියනවා.”
14 “අපි මෙතනට වෙලා ඉඳගෙන ඉන්නේ ඇයි?
අපි එකට එකතු වෙලා පවුරුවලින් වට වුණ නගරවලට යමු.+ ගිහින් එහෙදී මැරෙමු.
අපේ දෙවි යෙහෝවා අපිව විනාශ කරලා දායි.
ඔහු අපිට විෂ වතුර බොන්න දෙනවා.+
මොකද අපි යෙහෝවාට විරුද්ධව වැරදි කළා.
15 සාමය උදා වෙයි කියලා බලාගෙන හිටියත් ඒකෙන් වැඩක් වුණේ නැහැ.
සහනයක් ලැබෙන කාලයක් එයි කියලා බලාගෙන හිටියත් ආවේ භයානක කාලයක්.+
16 සතුරන්ට අයිති අශ්වයන්ගේ හඬ දාන්වලින් ඇහෙනවා.
උන්ගේ ඝෝෂාව නිසා මුළු දේශයම දෙදරුම් කනවා.
ඔවුන් ඇවිත් මුළු දේශයත්
දේශයේ තියෙන හැම දෙයක්මත් විනාශ කරයි.
නගරයත් එහේ ඉන්න අයවත් විනාශ කරයි.”
17 “ඔබ අතරට මම සර්පයන්ව එවනවා.
උන් විෂකුරු සර්පයන්. උන්ව නටවන්න බැහැ.
උන් අනිවාර්යයෙන්ම ඔබට දෂ්ට කරයි” කියලා යෙහෝවා කියනවා.
18 දැනෙන මේ දුකෙන් මට මිදෙන්න බැහැ.
මගේ හදවත ශෝකයෙන් බර වෙලා.
19 දුර ඈත දේශයක ඉඳන් උදව් ඉල්ලලා අඬන හඬක් ඇහෙනවා.
ඒ ඇහෙන්නේ මගේ දියණිය වන මගේ සෙනඟගේ හඬයි.
“යෙහෝවා සියොන්වල නැද්ද?
ඇගේ රජ දැන් එහේ නැද්ද?”
“රූප හදාගෙන ඔවුන් මාව කේන්ති ගැස්සුවේ ඇයි?
කිසි වැඩකට නැති වෙනත් දෙවිවරුන්ට නමස්කාර කරලා මාව කේන්ති ගැස්සුවේ ඇයි?”
20 “අස්වැන්න නෙළන කාලය ගෙවිලා ගියා. ගිම්හාන කාලෙත් අවසන් වුණා.
ඒත් අපිට තවමත් ගැලවීම ලැබිලා නැහැ.”
භීතිය මාව වෙළාගත්තා.
22 ගිලියද් දේශයේ බෝල්සම් තෛලය* නැද්ද?+
සුවයක් ලබා දෙන කිසිම කෙනෙක්* එහේ නැද්ද?+
එහෙමනම් ඇයි මගේ දියණිය වන මගේ සෙනඟට තවමත් සුවයක් ලැබුණේ නැත්තේ?+