යේසුස්ගේ නියෝජිතයන්ගේ ක්‍රියා

27 පස්සේ එයාලා තීරණය කළා අපිව නැවකින් ඉතාලියට යවන්න.+ ඉතින් පාවුල්ව සහ තවත් හිරකරුවන් පිරිසක්ව ජූලියස් කියන හමුදා නිලධාරියාට භාර දුන්නා. එයා ඔගස්ටස් බළඇණියට අයිති කෙනෙක්. 2 අපි අද්‍රාමුත්තිය කියන වරායේ ඉඳන් ආපු නැවකට නැඟලා පිටත් වුණා. ඒ නැව ආසියා පළාතේ වෙරළබඩ තීරය දිගේ තිබුණ වරායවල් කීපයකට යන්න නියමිත වෙලයි තිබුණේ. අපිත් එක්ක තෙසලෝනිකයේ ජීවත් වුණ අරිස්තාකස්+ කියන කෙනාත් ආවා. එයා මැසිඩෝනියානු ජාතිකයෙක්. 3 ඊළඟ දවසේ අපි සීදොන්වලට ගොඩ බැස්සා. එහෙදී ජූලියස් පාවුල්ට හුඟක් කාරුණිකව සලකලා එයාට එයාගේ යාළුවෝ ළඟට ගිහින් එයාලත් එක්ක කාලේ ගත කරන්න නිදහස දුන්නා.

4 අපි එහෙන් පිටත් වෙලා යද්දී හුළඟ අපේ ගමනට බාධා කළා. ඒ හුළං මඟහරින්න අපි යාත්‍රා කළේ සයිප්‍රස් දූපතට කිට්ටුවෙන්. 5 ඊටපස්සේ අපි ගැඹුරු මුහුදට ගිහින් සිලීසියාව සහ පම්ෆිලිය පහු කරලා ලිසියාවේ තිබුණ මුරා කියන වරායට ආවා. 6 එහේ ඇලෙක්සැන්ඩ්‍රියාවෙන් ආපු නැවක් තියෙනවා කියලත් ඒක ඉතාලියට යනවා කියලත් හමුදා නිලධාරියාට දැනගන්න ලැබුණා. ඉතින් එයා අපිට කිව්වා ඒ නැවට ගොඩ වෙන්න කියලා. 7 අපි දවස් ගාණක්ම යාත්‍රා කළේ හරිම හෙමින්. ඊටපස්සේ හුඟක් අමාරුවෙන් අපි කනීදසයට ළං වුණා. සැඩ සුළං අපේ ගමනට බාධා කරපු නිසා අපි ඒක මඟහරින්න ක්‍රීට් දූපතේ සල්මොනය කියන තුඩුවට කිට්ටුවෙන් යාත්‍රා කළා. 8 අපි දිගටම ඒ වෙරළබඩ තීරය දිගේ අමාරුවෙන් යාත්‍රා කරලා ‘සුබ වරාය’ කියන වරායට ආවා. ඒක තිබුණේ ලසේය කියන නගරයට කිට්ටුවෙන්.

9 අපි එහේ සෑහෙන කාලයක් නතර වෙලා හිටියා. ආයෙත් ගමන පටන්ගන්න එක අනතුරුදායකයි කියලා හොඳටම පේන්න තිබුණා. ඒ කාලේ වෙද්දී සමඟි වෙන දවස+ වෙනුවෙන් නිරාහාරව ඉන්න කාලයත් ඉවර වෙලයි තිබුණේ. ඉතින් පාවුල් මෙහෙම කිව්වා. 10 “යාළුවෙනි, අපි මේ ගමන ගියොත් නැවේ බඩුවලට විතරක් නෙමෙයි අපේ ජීවිතවලටත් ලොකු අනතුරක් වෙයි.” 11 ඒත් හමුදා නිලධාරියා පාවුල් කියන දේ අහන්නේ නැතුව නැවේ නියමුවා සහ නැවේ අයිතිකරු කියපු දේට ඇහුම්කන් දුන්නා. 12 අපි හිටපු වරාය සීත කාලේදී නැවතිලා ඉන්න සුදුසු තැනක් නෙමෙයි. ඒ නිසා වැඩිදෙනෙක් කිව්වේ අමාරුවෙන් හරි ෆීනික්ස් කියන වරායට ගිහින් සීත කාලේ එහේ නැවතිලා ඉමු කියලයි. ෆීනික්ස් කියන්නේ ක්‍රීට් දූපතේම තියෙන වරායක්. ඒ වරායට ඊසාන පැත්තෙන් වගේම ගිනිකොන පැත්තෙනුත් ඇතුල් වෙන්න පුළුවන්.

13 දකුණු දිශාවෙන් මද සුළඟක් හමද්දී එයාලා හිතුවා එයාලා බලාපොරොත්තු වුණ විදිහට කරන්න පුළුවන් වෙයි කියලා. ඉතින් එයාලා නැවේ නැංගුරම් උඩට අරන් ක්‍රීට් දූපතේ වෙරළට කිට්ටුවෙන් යාත්‍රා කළා. 14 ඒත් වැඩි වෙලාවක් යන්න කලින් යූරකිලෝ* කියලා හඳුන්වපු දරුණු කුණාටුවක් හමන්න පටන්ගත්තා. 15 නැව කුණාටුවට අහු වෙලා වෙන පැත්තකට ගහගෙන ගිහින්, 16 කෞද කියලා හඳුන්වපු පොඩි දූපතකට ළං වුණා. ඒ කුණාටුව මඟහරින්න ඕනෙ නිසා අපි ටික දුරක් යාත්‍රා කළේ ඒ දූපතට කිට්ටුවෙන්. ඒත් ඒ වෙලාවේ නැවේ අවරය ඇතුළේ තිබුණ පොඩි බෝට්ටුව* අපි බේරගත්තේ හරිම අමාරුවෙන්. 17 ඒ බෝට්ටුව නැවට ගත්තාට පස්සේ එයාලා නැවේ බඳ කඹවලින් හොඳට ඔතලා ඒක ශක්තිමත්ව බැන්දා. නැව සර්ටිස්* කියන වැලි කණ්ඩිවල ගැටෙයි කියන බයට එයාලා රුවලේ ලණු කීපයක් ලිහලා රුවල ටිකක් පහත් කළා. ඊටපස්සේ නැව හුළං හමන පැත්තට ගියා. 18 කුණාටුව නිසා නැව දරුණු විදිහට ඒ මේ අත ගහගෙන ගියා. ඒ නිසා එයාලා පහුවෙනිදා නැවේ බර අඩු කරන්න ඒකේ තිබුණ බඩු මුහුදට වීසි කළා. 19 තුන්වෙනිදා එයාලා නැවේ තිබුණ කඹත් මුහුදට වීසි කළා.

20 කුණාටුව දිගටම දරුණු විදිහට අපිට පහර දුන්නා. දවස් ගාණක් යන කල් අපිට ඉරවත් තරුවත් දකින්න ලැබුණේ නැහැ. අපි හිතුවේ අපිට කවදාවත් කුණාටුවෙන් බේරෙන්න බැරි වෙයි කියලා. 21 එයාලා දවස් ගාණක්ම කන්නේ නැතුව හිටියා. ඉතින් පාවුල් හිටගෙන හැමෝටම ඇහෙන්න මෙහෙම කිව්වා. “සහෝදරයෙනි, ක්‍රීට් දූපතේ ඉඳන් යාත්‍රා කරන්න එපා කියලා මං කිව්වා. ඔයාලා ඒක ඇහුවා නම් අපිට මෙච්චර අලාභහානියක් වෙන්නේ නැහැ.+ 22 ඒත් හිතට ධෛර්යය ගන්න. මොකද අපි කාගෙවත් ජීවිත නැති වෙන්නේ නැහැ. නැති වෙන්නේ නැව විතරයි. 23 අද අඳුර වැටුණාට පස්සේ මම සේවය* කරන මගේ දෙවියන්ගේ දූතයෙක්+ මං ළඟ හිටගෙන මෙහෙම කිව්වා. 24 ‘පාවුල්, කිසි දේකට බය වෙන්න එපා. ඔයා අනිවාර්යයෙන්ම සීසර් ඉස්සරහට යනවා.+ ඔයාට දෙවියන්ගේ කරුණාව ලැබිලා තියෙන නිසා ඔහු ඔයාවයි, නැවේ ඉන්න අනිත් හැමෝවමයි බේරගන්නවා.’ 25 ඒ නිසා කිසි කෙනෙක් අධෛර්යය වෙන්න එපා. මොකද දේවදූතයා කියපු දේ ඒ විදිහටම වෙයි. මට දෙවියන් ගැන විශ්වාසයි. 26 අපි මෙහෙම ගිහින් කොහේ හරි දූපතකට ගහගෙන යයි.”+

27 මුහුදේ ගත කරපු 14වෙනි රාත්‍රියේ අපි හිටියේ ආද්‍රිය මුහුදේ ඒ මේ අත වීසි වෙවී. රෑ 12ට විතර නැවියන්ට තේරුණා අපි ගොඩබිමකට ළං වෙලා කියලා. 28 එයාලා මුහුදේ ගැඹුර මැනලා බලද්දී එතන බඹ 20ක්* ගැඹුරුයි කියලා දැනගත්තා. තව ටික දුරක් ගිහින් ආයෙත් ගැඹුර බලද්දී එතන තිබුණේ බඹ 15ක* ගැඹුරක්. 29 නැව ගල්පරවල හැප්පෙයි කියලා බය වුණ නිසා එයාලා නැවේ අවරෙන් නැංගුරම් හතරක් මුහුදට දාලා උදේ වෙන කල් නොඉවසිල්ලෙන් බලන් හිටියා. 30 මේ අතරේ නැවියෝ නැවෙන් පැනලා යන්න විදිහක් හෙව්වා. ඉතින් එයාලා නැවේ ඇණියෙන් නැංගුරම් දාන්න යනවා කියලා බොරුවට පෙන්නලා නැවේ තිබුණ පොඩි බෝට්ටුව මුහුදට පහත් කරන්න පටන්ගත්තා. 31 පාවුල් ඒක දැකලා හමුදා නිලධාරියාටයි, හේවායන්ටයි මෙහෙම කිව්වා. “මේ මිනිස්සු නැවේම හිටියොත් විතරයි අපිට බේරෙන්න ලැබෙන්නේ.”+ 32 එතකොට හේවායෝ බෝට්ටුවේ ලණු කපලා ඒක මුහුදේ පා වෙලා යන්න ඇරියා.

33 එළිය වැටීගෙන එද්දී පාවුල් හැමෝටම කිව්වා මොනවා හරි කන්න කියලා. එයා කිව්වේ මෙහෙමයි. “ඔයාලා දවස් 14ක් තිස්සේ කිසිම දෙයක් කන්නේ නැතුව මොකක් වෙයිද කියලා හිතහිත බලන් හිටියා. 34 ඉතින් දැන් මොනවා හරි කන්න. මං එහෙම කියන්නේ ඔයාලාගෙම හොඳට. බය වෙන්න එපා, ඔයාලාගේ එක කෙස්ගහකටවත් කිසි දෙයක් වෙන්නේ නැහැ.” 35 ඊටපස්සේ එයා රොටියක් අරන් හැමෝම ඉස්සරහා දෙවියන්ට ස්තුති කරලා ඒක කඩලා කන්න පටන්ගත්තා. 36 එතකොට අනිත් අයගෙත් හිතට හයියක් ඇවිත් එයාලත් කන්න පටන්ගත්තා. 37 නැවේ අපි ඔක්කොම 276දෙනෙක් හිටියා. 38 හැමෝම ඇති තරම් කෑවාට පස්සේ එයාලා නැවේ ගබඩා කරලා තිබුණ තිරිඟු මුහුදට වීසි කළා. එහෙම කළේ නැවේ බර අඩු කරන්න.+

39 උදේ වෙද්දී එයාලා ගොඩබිමක් දැක්කත් ඒ තැන මොකක්ද කියලා එයාලට අඳුරගන්න බැරි වුණා.+ ඒත් එයාලා වෙරළ තීරයක් තියෙන බොක්කක් දැක්ක නිසා එයාලා හැදුවේ කොහොමහරි නැව වෙරළට අරන් යන්න. 40 ඉතින් එයාලා නැංගුරම්වල කඹ කපලා ඒවා මුහුදට වැටෙන්න ඇරියා. ඒත් එක්කම එයාලා සුක්කානම්වල කඹත් ලිහලා දැම්මා. එයාලා ඊටපස්සේ ඉස්සරහා තිබුණ රුවල හුළං හමන පැත්තට උස්සලා නැව වෙරළ දිහාවට අරන් ගියා. 41 ඒත් නැව වතුර යට තිබුණ ලොකු වැලි කණ්ඩියක හැප්පුණා. එයාලා නැව පරෙස්සමින් වෙරළට අරන් යන්න හැදුවාම නැවේ ඇණිය වැලි කණ්ඩියේ හිර වුණා. ඒත් එක්කම නැවේ අවරය රළ පහරට අහු වෙලා කෑලි කෑලිවලට කැඩිලා ගියා.+ 42 ඒ වෙලාවේ හිරකරුවන් මුහුදට පැනලා බේරිලා යයි කියලා හිතලා හේවායෝ හිරකරුවන්ව මරලා දාන්න ලෑස්ති වුණා. 43 ඒත් හමුදා නිලධාරියාට ඕනෙ වුණේ පාවුල්ව ආරක්ෂාකාරීව වෙරළට අරන් යන්න. ඒ නිසා එයා හේවායන්ට එහෙම කරන්න ඉඩ දුන්නේ නැහැ. ඒ වෙනුවට පීනන්න පුළුවන් අයට මුලින්ම මුහුදට පැනලා ගොඩබිමට පීනගෙන යන්න කියලා එයා අණ කළා. 44 ඊටපස්සේ එයා අනිත් අයට කිව්වා ලෑලි හරි නැවේ සුන්බුන් හරි අල්ලගෙන ගොඩට යන්න කියලා. ඒ විදිහට හැමෝම කිසි අනතුරක් නැතුව ගොඩබිමට ආවා.+