නෙහෙමියා
5 ඔය අතරේ යුදෙව් පුරුෂයෝ සහ එයාලාගේ භාර්යාවන් සමහර යුදෙව්වන්ට විරුද්ධව ප්‍රසිද්ධියේම පැමිණිලි කළා. මොකද එයාලා හිටියේ ලොකු පීඩනයකින්.+ 2 සමහරු මෙහෙම කිව්වා. “අපිට දුවලා පුතාලා හුඟදෙනෙක් ඉන්නවා. අපිට කන්න ධාන්‍ය ඕනේ. නැත්නම් අපිට මැරෙන්නයි වෙන්නේ.” 3 තවත් අය කිව්වා “කෑම හිඟ නිසා ධාන්‍ය ටිකක් ගන්න අපේ කෙත්වතු, ගෙවල් ඇපයට දෙන්න වෙලා” කියලා. 4 තව කට්ටියක් මෙහෙමත් කිව්වා. “රජුට බද්ද ගෙවන්න අපිට සල්ලි නැහැ. ඒකට සල්ලි හොයාගන්න අපේ කෙත්වතු, මිදිවතු ඇපයට තියන්න වෙලා.+ 5 අපි හැමෝම සහෝදරයෝ. අපේ දරුවනුයි, එයාලාගේ දරුවනුයි අතර කිසි වෙනසක් නැහැ. ඒත් අපේ දුවලා පුතාලව වැඩකාරකමට දෙන්න වෙලා. දැනටමත් අපේ දුවලා කීපදෙනෙක්ව වැඩකාරකමට අරන්.+ ඒත් ඒ වෙනුවෙන් අපිට කිසිම දෙයක් කරන්න බැහැ. මොකද අපේ කෙත්වතු, මිදිවතු දැන් අයිති වෙන අයට.”
6 එයාලා කියපු දේ ඇහුවාම මට හුඟක් කේන්ති ගියා. 7 වෙලා තියෙන දේ ගැන හොඳට හොයලා බැලුවාට පස්සේ මං ප්‍රධානීන්ටයි, නිලධාරීන්ටයි බැණලා මෙහෙම කිව්වා. “මොනවාද ඔයගොල්ලන් මේ කරන්නේ? ඇයි ඔයාලාගෙම සහෝදරයන්ගෙන් මේ විදිහට පොලී* අය කරන්නේ?”+
ඊටපස්සේ මේ ප්‍රශ්නය ගැන කතා කරන්න මං හැමෝවම රැස් කරලා 8 මෙහෙම කිව්වා. “වහලුන් විදිහට වෙනත් ජාතීන්ට විකුණපු අපේ යුදෙව් සහෝදරයන්ව අපි පුළුවන් හැම දේම කරලා නිදහස් කරගත්තා. ඒත් දැන් ඔයාලා මොනවාද මේ කරන්නේ? ඔයාලා ඔයාලාගෙම සහෝදරයන්ව විකුණනවා.+ දැන් ඔයගොල්ලන්ටත් සල්ලි දීලා එයාලව නිදහස් කරන්න කියලද අපිට කියන්නේ?” කිසි කෙනෙක් වචනයක්වත් කිව්වේ නැහැ. 9 ඊටපස්සේ මං මෙහෙමත් කිව්වා. “ඔයගොල්ලන් ඔය කරන්නේ හොඳ දෙයක් නම් නෙමෙයි. අපේ දෙවියන් කියන විදිහට වැඩ කරන්න.*+ එතකොට අපේ සතුරන්ට බැහැ අපිට නින්දා කරන්න. 10 මායි, මගේ සහෝදරයනුයි, මගේ සේවකයනුයි සල්ලි සහ ධාන්‍ය ණයට දෙනවා. ඒත් අපි අපේ සහෝදරයන්ගෙන් පොලියක් ගන්නේ නැහැ. ඉතින් පොලියට ණය දෙන එක දැන්මම නවත්තමු.+ 11 මං ඔයාලාගෙන් ඉල්ලන්නේ අදම එයාලාගෙන් ගත්ත කෙත්වතු,+ මිදිවතු, ඔලීවවතු, ගෙවල් ආපහු එයාලටම දෙන්න කියලයි. එයාලට දුන්න සල්ලි, ධාන්‍ය, අලුත් වයින්, තෙල් වගේ දේවලට ඔයාලා සීයට එකක පොලියක් අය කළා.* ඒකත් එයාලට ආපහු දෙන්න.”
12 එතකොට ඒ අය මෙහෙම කිව්වා. “අපි ඔයා කියන විදිහටම කරන්නම්. එයාලට අයිති දේවල් අපි ආපහු එයාලට දෙන්න කැමතියි. අපි එයාලාගෙන් කිසිම දෙයක් ඉල්ලන්නේ නැහැ.” ඉතින් එයාලා කියපු විදිහටම කරනවා කියලා පූජකයන් ඉස්සරහා මං ඒ අයගෙන් පොරොන්දුවක් ගත්තා. 13 ඒ වගේම මං මගේ ඇඳුම* ගසලා මෙහෙම කිව්වා. “මගේ ඇඳුම ගසලා දැම්මා වගේ සැබෑ දෙවියන් මේ පොරොන්දුව කඩන හැම කෙනෙක්වම එයාලාගේ ගෙවල්වලිනුයි, ඉඩම්වලිනුයි පන්නලා දායි. එයාලට හිස් අතින් යන්නයි වෙන්නේ.” එතකොට රැස් වෙලා හිටපු හැමෝම “ආමෙන්”* කියලා කිව්වා. ඊටපස්සේ එයාලා යෙහෝවාට ප්‍රශංසා කළා. හැමෝම එයාලා පොරොන්දු වුණ විදිහටම වැඩ කළා.
14 අර්තක්ෂස්තා රජු+ මාව යූදා දේශයේ ආණ්ඩුකාරයා+ විදිහට පත් කරපු දවසේ ඉඳන් ඒ කියන්නේ රජතුමාගේ පාලන කාලයේ 20වෙනි අවුරුද්දේ+ ඉඳන් 32වෙනි අවුරුද්ද+ වෙන කල් ගත වුණ අවුරුදු 12 පුරාම මමවත් මගේ සහෝදරයන්වත් ආණ්ඩුකාරයාට ලබා දෙන කෑම දීමනාව ගත්තේ නැහැ.+ 15 මට කලින් හිටපු ආණ්ඩුකාරයන් ජනතාවට ලොකු බරක් පැටෙව්වා. එයාලා කෑම, වයින් මිල දී ගන්න ජනතාවගෙන් හැම දවසකම රිදී ෂෙකෙල්* 40ක් අය කළා. එයාලාගේ සේවකයනුත් ජනතාවට හුඟක් පීඩා කළා. ඒත් දෙවියන් ගැන මට ලොකු ගෞරවයක්* තියෙන නිසා+ මං එහෙම කළේ නැහැ.+
16 ඒ වගේම මමයි, මගේ සේවකයන් හැමෝමයි පවුර ඉදි කරන වැඩවලටත් හවුල් වුණා. වෙන කෙනෙක්ට අයිති එක කෙතක්වත් අපි අයිති කරගත්තේ නැහැ.+ 17 යුදෙව්වරු සහ නිලධාරීන් 150දෙනෙක්ටත් අවට ජාතීන්ගෙන් අපේ උදව්වට ආපු අයටත් කන්න දුන්නේ මමයි. 18 ඒ වෙනුවෙන් මං මගේ වියදමින් හැම දවසකම ගවයෙක්ව, හොඳ බැටළුවන් හයදෙනෙක්ව සහ කුරුල්ලන්ව ලෑස්ති කළා. දවස් දහයකට වතාවක් එයාලට බොන්න එක එක වර්ගයේ වයිනුත් දුන්නා. ඒත් ආණ්ඩුකාරයාට දෙන කෑම දීමනාවවත් මං ඉල්ලුවේ නැහැ. මොකද ඒ වෙද්දීත් ජනතාව ලොකු වියදමක් දරමිනුයි හිටියේ. 19 “මගේ දෙවියනි, මේ සෙනඟ වෙනුවෙන් මං කරපු දේවල් අමතක කරන්නේ නැතුව මට ආශීර්වාද කරන්න.”*+