දෙවෙනි රාජාවලිය

17 යූදාවල රජ වුණ ආහස් පාලනය කරපු 12වෙනි අවුරුද්දේදී ඒලාගේ පුතා වුණ හෝෂෙයා+ ඊශ්‍රායෙල්වල රජකමට පත් වුණා. එයා සමාරියේ ඉඳන් අවුරුදු නමයක් පාලනය කළා. 2 එයාත් යෙහෝවා දෙවියන් වැරදියි කියලා සලකන දේවල් දිගටම කළා. හැබැයි ඊශ්‍රායෙල්වල කලින් හිටපු රජවරුන් තරම්ම වැරදි දේවල් එයා කළේ නැහැ. 3 ඇසිරියාවේ රජ වන ෂල්මනෙසෙර් හෝෂෙයාට විරුද්ධව සටන් කරන්න ආවා.+ හෝෂෙයා එයාට යටත් වෙලා එයාට කප්පම් ගෙවන්න පටන්ගත්තා.+ 4 ඒත් කාලෙකට පස්සේ ඇසිරියාවේ රජට ආරංචි වුණා හෝෂෙයා එයාට විරුද්ධව කැරලිගහන්න සැලසුම් කරනවා කියලා. මොකද හෝෂෙයා එයාගේ දූත පිරිසක්ව ඊජිප්තුවේ රජ වුණ සෝ ළඟට යවලා තිබ්බා.+ ඒ වගේම හෝෂෙයා කලින් අවුරුදුවල ගෙවපු කප්පම ඇසිරියාවේ රජට යැව්වෙත් නැහැ. ඉතින් ඇසිරියාවේ රජ හෝෂෙයාට විලංගු දාලා එයාව හිරේට දැම්මා.

5 ඇසිරියාවේ රජ මුළු දේශයම යටත් කරගන්න ආවා. එයා සමාරියටත් ඇවිල්ලා අවුරුදු තුනක් ඒක වටලගෙන හිටියා. 6 හෝෂෙයා පාලනය කරපු නමවෙනි අවුරුද්දේදී ඇසිරියාවේ රජ සමාරිය අල්ලගත්තා.+ ඊටපස්සේ ඊශ්‍රායෙල්වල හිටපු මිනිස්සුන්ව එයා වහලුන් විදිහට ඇසිරියාවට අරගෙන ගියා.+ එයා එයාලව හලාවල සහ ගෝසාන්+ ගඟ ළඟ තිබුණ හාබොර්වල වගේම මේදියවරුන්ගේ නගරවල පදිංචි කෙරෙව්වා.+

7 එහෙම වුණේ ඊජිප්තුවේ රජ වුණ පාරාවෝගේ අතින් ඊශ්‍රායෙල්වරුන්ව නිදහස් කරගෙන ඊජිප්තුවෙන් එයාලව පිටතට ගෙනාපු එයාලාගේ දෙවි යෙහෝවාට+ විරුද්ධව එයාලා වැරදි කරපු නිසයි. එයාලා වෙනත් දෙවිවරුන්ට නමස්කාර කරන්න පටන්ගත්තා.*+ 8 යෙහෝවා එයාලා ඉස්සරහින් පන්නලා දාපු ජාතීන්ගේ චාරිත්‍ර එයාලා අනුගමනය කළා. ඊශ්‍රායෙල්වල රජවරු පටන්ගත්ත චාරිත්‍රත් එයාලා අනුගමනය කළා.

9 ඊශ්‍රායෙල්වරු එයාලාගේ දෙවි වන යෙහෝවා වැරදියි කියලා සලකන දේවල් දිගටම කළා. හැම නගරයකම එයාලා නමස්කාර කරන්න උස් තැන් හැදුවා.+ පවුරුවලින් වට වුණ ලොකු නගරවල විතරක් නෙමෙයි පොඩි මුරකොටුවලත් එයාලා ඒ උස් තැන් හැදුවා.* 10 එයාලා හැම කන්දකම, සරුවට වැඩුණ හැම ගහක් යටම+ නමස්කාර කරන්න කුලුනුයි, කණුයි*+ හදාගත්තා. 11 යෙහෝවා එයාලා ඉස්සරහින් පන්නලා දාපු ජාතීන් කරපු විදිහටම+ එයාලා ඒ උස් තැන්වල පූජා ඔප්පු කළා.* එයාලා දිගටම දුෂ්ට දේවල් කරලා යෙහෝවාව කේන්ති ගැස්සුවා.

12 පිළිකුල් රූපවලට*+ නමස්කාර කරන්න එපා+ කියලා යෙහෝවා කියලා තිබුණත් එයාලා දිගටම ඒවාට නමස්කාර කළා. 13 යෙහෝවා ඔහුගේ හැම අනාගතවක්තෘවරයෙක්ම සහ දර්ශන දැක්ක හැම කෙනෙක්ම මාර්ගයෙන්+ ඊශ්‍රායෙල්වල සෙනඟටයි, යූදාවල සෙනඟටයි දිගටම අනතුරු ඇඟෙව්වා. ඔහු එයාලට මෙහෙම කිව්වා. “ඔයාලා කරන මේ දුෂ්ට වැඩ අත්හරින්න.+ ඔයාලාගේ මුතුන්මිත්තන්ට මම දීපු නීතියේ සඳහන් වෙන, මගේ සේවකයන් වන අනාගතවක්තෘවරුන් මාර්ගයෙන් ඔයාලට දැනුම් දුන්න හැම ආඥාවක්ම, පනතක්ම පිළිපදින්න.” 14 ඒත් එයාලා ඔහුට ඇහුම්කන් දුන්නේ නැහැ. තමන්ගේ දෙවි වන යෙහෝවා ගැන විශ්වාසය තිබ්බේ නැති එයාලාගේ මුතුන්මිත්තන් වගේම එයාලත් හරිම මුරණ්ඩු විදිහට වැඩ කළා.+ 15 දෙවියන් දීපු නියෝග පිළිපදින එක එයාලා අත්හැරියා. එයාලාගේ මුතුන්මිත්තන් එක්ක ඔහු ඇති කරගත්ත ගිවිසුම එයාලා කඩ කළා.+ එයාලට අනතුරු අඟවන්න ඔහු දීපු සිහිගැන්වීම් එයාලා ගාණකටවත් ගත්තේ නැහැ.+ කිසි වැඩකට නැති රූපවලට එයාලා දිගටම නමස්කාර කළා.+ අවට ඉන්න ජාතීන් කරන දේවල් කරන්න එපා කියලා යෙහෝවා අණ කරලා තිබුණත් එයාලා කළේ ඒ දේමයි.+ ඒ නිසා එයාලා කිසි වැඩකට නැති සෙනඟක් වුණා.+

16 එයාලාගේ දෙවි වන යෙහෝවා දුන්න හැම ආඥාවක්ම එයාලා කඩ කළා. එයාලා ලෝහවලින් වහු රූප දෙකක් හදාගත්තා.+ නමස්කාර කරන්න කණුවකුත්* හදාගත්තා.+ ආකාශ වස්තූන් හැම එකකටම එයාලා නමස්කාර කළා.+ බාල් ඉස්සරහත් වැඳ වැටුණා.+ 17 ඒ විතරක් නෙමෙයි එයාලාගේ දූපුතුන්ව ගින්නෙන් දවලා පූජා විදිහට ඔප්පු කළා.+ එයාලා පේන කියන්න,+ නිමිති බලන්න පටන්ගත්තා. එයාලා හිතාමතාම යෙහෝවා වැරදියි කියලා සලකන දේවල් දිගටම කරලා ඔහුව කේන්ති ගැස්සුවා.

18 යෙහෝවාට ඊශ්‍රායෙල්වරුන් එක්ක ගොඩක් කේන්ති ගිය නිසා ඔහු එයාලව අයින් කරලා දැම්මා.+ යූදා ගෝත්‍රය ඇරෙන්න වෙන කිසිම කෙනෙක්ට දේශයේ ඉන්න ඔහු ඉඩහැරියේ නැහැ.

19 යූදාවල හිටපු සෙනඟත් එයාලාගේ දෙවි වන යෙහෝවාගේ ආඥාවලට කීකරු වුණේ නැහැ.+ ඊශ්‍රායෙල්වරුන් අනුගමනය කරපු චාරිත්‍ර එයාලත් අනුගමනය කළා.+ 20 ඉතින් යෙහෝවා ඊශ්‍රායෙල්ගෙන් පැවත ආපු හැමෝවම ප්‍රතික්ෂේප කළා. ඔහු එයාලට දිගින් දිගටම හික්මවීම් දුන්නා. එයාලව කොල්ලකරුවන්ගේ අතට භාර දුන්නා. අන්තිමේදී ඔහු එයාලව දේශයෙන් පන්නලා දැම්මා. 21 දාවිත්ගේ පෙළපත යටතේ හිටපු ඊශ්‍රායෙල්වරුන්ව දෙවියන් ඒකෙන් වෙන් කළා. ඊටපස්සේ ඊශ්‍රායෙල්වරු නෙබාත්ගේ පුතා වුණ යෙරොබොවම්ව එයාලාගේ රජ විදිහට පත් කරගත්තා.+ ඒත් යෙරොබොවම් නිසා ඊශ්‍රායෙල්වරු යෙහෝවාගේ මාර්ගයෙන් අයින් වෙලා ගියා. එයා බරපතළ වරදක් කරන්න ඊශ්‍රායෙල්වරුන්ව පෙලඹුවා. 22 යෙරොබොවම් කරපු ඔක්කොම වැරදි ඊශ්‍රායෙල් සෙනඟත් දිගටම කළා.+ එයාලා ඒවා අත්හැරියේ නැහැ. 23 අන්තිමේදී යෙහෝවා ඔහුගේ සේවකයන් වුණ අනාගතවක්තෘවරුන් මාර්ගයෙන් කියපු විදිහටම ඊශ්‍රායෙල්වරුන්ව අයින් කරලාම දැම්මා.+ ඉතින් ඊශ්‍රායෙල්වරුන්ව වහලුන් විදිහට ඇසිරියාවට අරන් ගියා.+ අද වෙන කල්ම එයාලා ඉන්නේ එහේ.

24 ඇසිරියාවේ රජ බැබිලෝනිය, කූතා, අව්වා, හමාත් සහ සෙෆාවායිම්+ කියන තැන්වල ජීවත් වුණ මිනිස්සුන්ව ගෙනල්ලා සමාරියේ නගරවල පදිංචි කෙරෙව්වා. එයාලා කලින් ඊශ්‍රායෙල්වරු ජීවත් වුණ සමාරිය අයිති කරගෙන ඒ නගරවල ජීවත් වුණා. 25 ඒ මිනිස්සු එහේ ජීවත් වෙන්න පටන්ගත්ත කාලේදී එයාලට යෙහෝවා ගැන කිසිම ගෞරවයක්, බයක් තිබුණේ නැහැ.* ඉතින් යෙහෝවා එයාලා අතරට සිංහයන්ව යැව්වා.+ ඒ සිංහයෝ එයාලාගෙන් සමහරදෙනෙක්ව මරලා දැම්මා. 26 ඉතින් ඇසිරියාවේ රජට මෙහෙම දැන්නුවා. “රජතුමනි, ඔබ වහලුන් කරගත්ත ජාතීන් කීපයක්ම සමාරියේ නගරවල ඔබ පදිංචි කෙරෙව්වා. ඒත් ඒ ජාතීන් ඒ දේශයේ හිටපු මිනිස්සු අදහපු ආගම* ගැනවත් එයාලාගේ දෙවියන් ගැනවත් දන්නේ නැහැ. ඒ නිසා ඒ දෙවියන් සෙනඟ අතරට සිංහයන්ව එවනවා. ඒ සිංහයන් සමහරුන්ව මරලා දාලා තියෙනවා. එහෙම වෙලා තියෙන්නේ එහේ ඉන්න කවුරුත් ඒ දේශයේ හිටපු අයගේ ආගම ගැනවත් එයාලාගේ දෙවියන් ගැනවත් දන්නේ නැති නිසයි.”

27 ඒක ඇහුවාම ඇසිරියාවේ රජ මෙහෙම නියෝග කළා. “ඒ දේශයෙන් වහලුන් විදිහට අරන් ගිය පූජකයන්ගෙන් කෙනෙක්ව ආපහු එහෙට යවන්න. ඒ දේශයේ අය අදහපු ආගම ගැනයි, එයාලාගේ දෙවියන් ගැනයි එහේ ඉන්න මිනිස්සුන්ට උගන්නන්න කියලා එයාට කියන්න.” 28 ඉතින් සමාරියෙන් අරගෙන ගිය පූජකයන්ගෙන් එක් කෙනෙක් ආපහු බෙතෙල්වලට ආවා.+ යෙහෝවා ගැන ගරුබියකින් ඉන්නේ* කොහොමද+ කියලා එයා එහේ හිටපු මිනිස්සුන්ට කියලා දුන්නා.

29 ඒත් එහේ විවිධ ජාතීන් පදිංචි වෙලා හිටියා. ඒ එක එක ජාතියට අයිති අය එයාලා නමස්කාර කරපු දෙවියන්ගේ* රූප හදාගත්තා. එයාලා ඒ රූප සමරිතානුවන් නමස්කාර කරන්න හදපු උස් තැන්වල තිබුණ දේවාලවල තිබ්බා. ඒ ජාතීන් හැමෝම එයාලා ජීවත් වුණ නගරවල එහෙම කළා. 30 බැබිලෝනියෙන් ආපු අය සුක්කොත්බෙනොත් දෙවියාගේ රූපයක් හැදුවා. කුත් ඉඳන් ආපු අය නේර්ගල් දෙවියාගේ රූපයකුත් හමාත්+ ඉඳන් ආපු අය අෂීමා දෙවියාගේ රූපයකුත් හැදුවා. 31 අව්වා ඉඳන් ආපු අය නිබ්හස් සහ තර්තාක් දෙවිවරුන්ගේ රූප හැදුවා. සෙෆාවායිම්වලින්+ ආපු අය එයාලාගේ පුතාලව ගින්නෙන් දවලා එයාලාගේ දෙවිවරු වුණ අද්‍රම්මෙලෙක්ටයි, අනම්මෙලෙක්ටයි ඔප්පු කළා. 32 යෙහෝවා දෙවියන් ගැන එයාලට යම් බයක් තිබුණා.* ඒත් එයාලා දේවාලවල සේවය කරන්න සාමාන්‍ය මිනිස්සු අතරින් පූජකයන්ව පත් කළා. නමස්කාර කරන්න හදලා තිබුණ උස් තැන්වල ඒ පූජකයන් සෙනඟ වෙනුවෙන් සේවය කළා.+ 33 එයාලා යෙහෝවා දෙවියන්ට ගරු කළත් එයාලාගේ දේශයේ තිබුණ ආගමික වත්පිළිවෙත්වලට* අනුව එයාලාගේ දෙවිවරුන්ට නමස්කාර කළා.+

34 අද වෙන කල්ම එයාලා අදහන්නේ ඉස්සර ඉඳන් එයාලා අදහපු ආගම්.* එයාලාගෙන් කවුරුත් යෙහෝවා දෙවියන්ට හරි විදිහට නමස්කාර කරන්නේ නැහැ.* ඊශ්‍රායෙල් කියලා නම වෙනස් කරපු යාකොබ්ගේ+ පුතාලට යෙහෝවා දුන්න අණපනත්වලට සහ තීන්දුවලට එකඟව එයාලා ජීවත් වෙන්නේ නැහැ. එයාලා ඔහු දුන්න නීතිය පිළිපදින්නෙත් නැහැ. 35 යෙහෝවා ඊශ්‍රායෙල්වරුන් එක්ක ගිවිසුමක් ඇති කරගත්ත වෙලාවේ+ ඔහු එයාලට මෙහෙම අණ කළා. “වෙනත් දෙවිවරුන්ට නමස්කාර කරන්න එපා.* එයාලා ඉස්සරහා වැඳ වැටෙන්නවත් එයාලට සේවය කරන්නවත් එයාලට පූජා ඔප්පු කරන්නවත් එපා.+ 36 යෙහෝවා වන මම තමයි මගේ මහත් බලය හරි පුදුම විදිහට පාවිච්චි කරලා ඔයාලව ඊජිප්තු දේශයෙන් නිදහස් කරගෙන ආවේ.+ ඒ නිසා ඔයාලා ගරුබිය පෙන්නන්න ඕනෙ මටයි.+ ඔයාලා නමස්කාර කරන්න ඕනෙත් පූජා ඔප්පු කරන්න ඕනෙත් මට විතරයි. 37 මම ඔයාලට ලියලා දුන්න+ නියෝග, තීන්දු, නීතිය සහ ආඥා ඔයාලා ඒ විදිහටම පිළිපදින්න ඕනේ. හැමදාටම එහෙම කරන්න වගබලා ගන්න ඕනේ. වෙනත් දෙවිවරුන්ට නමස්කාර කරන්න එපා.* 38 මම ඔයාලා එක්ක ඇති කරගත්ත ගිවිසුම අමතක කරන්න එපා.+ වෙනත් දෙවිවරුන්ට නමස්කාර කරන්න එපා.* 39 ඔයාලා ගරුබිය දක්වන්න ඕනෙ ඔයාලාගේ දෙවි යෙහෝවා වන මටයි. මොකද ඔයාලාගේ හැම හතුරෙක්ගෙම අතින් ඔයාලව බේරගන්නේ මමයි.”

40 ඒත් ඒ ජාතීන් ඔහුට කීකරු වුණේ නැහැ. කලින් ඉඳන් අදහපු ආගම් එයාලා දිගටම ඇදහුවා.*+ 41 ඒ ජාතීන්ට යෙහෝවා දෙවියන් ගැන යම් බයක් තිබුණත්+ එයාලාගේ දෙවිවරුන්ගේ රූපවලටත් එයාලා නමස්කාර කළා. එයාලාගේ දරුවනුයි, දරුවන්ගේ දරුවනුයි එයාලාගේ මුතුන්මිත්තන් කරපු දේවල්ම කළා. අද වෙන කල්ම එයාලා ඒ දේවල් කරනවා.