ගීතාවලිය

2 ජාතීන් කේන්තියෙන් ඇවිස්සිලා ඉන්නේ ඇයි?

සෙනඟ කිසි වැඩකට නැති දේවල් සැලසුම්* කරන්නේ ඇයි?+

 2 යෙහෝවාටත් ඔහුගේ අභිෂේක ලත් තැනැත්තාටත්*+ විරුද්ධව

පොළොවේ රජවරු යුද්ධ කරන්න සැරසිලා ඉන්නවා.

උසස් නිලධාරීනුත් එකට රැස් වෙලා ඉන්නවා.*+

 3 “ඔවුන් දාලා තියෙන මේ විලංගු අපි කඩලා දාමු.

අපිව බැඳලා තියෙන මේ ලණු ගලවලා වීසි කරමු” කියලා ඒ නායකයෝ කියනවා.

 4 ස්වර්ගයේ සිංහාසනයේ ඉන්න තැනැත්තා ඒක අහලා සිනාසෙයි.

යෙහෝවා දෙවියන් ඔවුන්ට සමච්චල් කරයි.

 5 ඒ කාලයේදී ඔහු ඔවුන්ට කේන්තියෙන් කතා කරයි.

ඔහුගේ දැවෙන උදහස දැකලා ඔවුන් බයෙන් වෙවුලයි.

 6 දෙවියන් ඔවුන්ට මෙහෙම කියයි.

“මම තෝරගත්ත තැනැත්තාව මම රජකමට පත් කළා.+

ඔහු පාලනය කරන්නේ මගේ ශුද්ධ කන්ද වන සියොන්+ ඉඳලයි.”

 7 යෙහෝවාගේ තීරණය මම දැන් දැනුම් දෙන්නම්.

ඔහු මට මෙහෙම කිව්වා. “ඔබ මගේ පුතා.+

අද ඉඳන් ඔබේ තාත්තා මමයි.+

 8 මගෙන් ඉල්ලන්න. මම ජාතීන්ව ඔබට උරුමයක් විදිහට දෙන්නම්.

පොළොවේ ඈත කෙළවර දක්වා තියෙන හැම දෙයක්මත් ඔබට දෙන්නම්.+

 9 ඔබ ඔවුන්ව යකඩ යෂ්ටියකින් විනාශ කරනවා.+

මැටි බඳුනක් කුඩු කරනවා වගේ ඔබ ඔවුන්ව විනාශ කරනවා.”+

10 ඒ නිසා රජවරුනි, අවබෝධයෙන් වැඩ කරන්න.

පොළොවේ විනිශ්චයකරුවෙනි, වැරදි පිළි අරන් හරි මඟට එන්න.*

11 ගරුබියක් ඇතුව යෙහෝවාට සේවය කරන්න.

ගැඹුරු ගෞරවයක් පෙන්වලා ඔහු ඉස්සරහා සතුටු වෙන්න.

12 දෙවියන්ගේ පුතාට ගෞරව කරන්න.*+

එහෙම නොකළොත් ඔහුගේ කේන්තිය ඇවිස්සිලා,

ඔහු ඔබව විනාශ කරලා දායි.+

මොකද ඔහුගේ කෝපය ඉක්මනින් ඇවිළෙනවා.

ඒත් රැකවරණය හොයාගෙන ඔහු ළඟට යන හැමෝම ඉන්නේ සතුටින්.