පළවෙනි සාමුවෙල්

15 සාමුවෙල් සාවුල්ට මෙහෙම කිව්වා. “යෙහෝවා ඔහුගේ සෙනඟ වන ඊශ්‍රායෙල්වරුන්ගේ රජ විදිහට ඔයාව අභිෂේක කරන්න කිව්වේ මටයි.+ යෙහෝවා දෙවියන් කියන දේ දැන් අහගන්න.+ 2 ස්වර්ගයේ සේනාවල අධිපති වන යෙහෝවා මෙහෙම කියනවා. ‘ඊශ්‍රායෙල්වරු ඊජිප්තුවෙන් එද්දී අමලෙක්වරු එයාලා එක්ක සටනට ආපු නිසා මම දැන් එයාලට දඬුවම් කරනවා.+ 3 ඔයා දැන් ගිහින් අමලෙක්වරුන්ට පහර දෙන්න.+ එයාලට අයිති හැම දේමත් එයාලවත් සම්පූර්ණයෙන්ම විනාශ කරන්න.*+ එයාලාගෙන් කිසි කෙනෙක්ව ඉතුරු කරන්න එපා.* පුරුෂයන්වයි, ස්ත්‍රීන්වයි, දරුවන්වයි, ළදරුවන්වයි මරලා දාන්න.+ එයාලාගේ ගවයන්වත් බැටළුවන්වත් ඔටුවන්වත් බූරුවන්වත් විනාශ කරලා දාන්න.’”+ 4 ඉතින් සාවුල්, තෙලායිම් කියන තැනට හමුදාව රැස් කරලා එයාලව ගණන් කළා. පාබළ හමුදාවේ සෙබළු දෙලක්ෂයක් හිටියා. යූදා ගෝත්‍රයට අයිති පුරුෂයෝ දහදාහක් හිටියා.+

5 ඊටපස්සේ සාවුල් සෙබළු එක්ක අමලෙක්වරුන්ගේ නගරයට ගිහින් එයාලට පහර දෙන්න බලාගෙන ඒ කිට්ටුව තිබුණ නිම්නයේ හැංගිලා හිටියා. 6 සාවුල් එහේ හිටිය කේනිවරුන්ට+ මෙහෙම දැන්නුවා. “අපි අමලෙක්වරුන්ව විනාශ කරන්නයි යන්නේ. ඊට කලින් ඔයාලා මෙහෙන් යන්න. ඊශ්‍රායෙල් සෙනඟ ඊජිප්තුවෙන් පිට වෙලා එද්දී ඔයාලා එයාලට හුඟක් කරුණාවෙන් සැලකුවා.*+ ඒ නිසා දැන්මම මෙහෙන් යන්න. නැත්නම් මට ඔයාලවත් විනාශ කරන්න වෙයි.”+ ඉතින් කේනිවරු අමලෙක්වරුන් හිටපු තැනින් පිට වෙලා ගියා. 7 ඊටපස්සේ සාවුල්, හවිලා+ ඉඳන් ඊජිප්තුවට කිට්ටුවෙන් තියෙන ෂුර්+ වෙන කල් ගිහින් අමලෙක්වරුන්ට+ පහර දුන්නා. 8 සාවුල් අමලෙක්වරුන්ගේ රජ වුණ ආගග්ව+ පණපිටින් අල්ලගත්තා. ඒත් අනිත් හැමෝවම එයා කඩුවෙන් මරලා දැම්මා.+ 9 සාවුල් රජයි, ඊශ්‍රායෙල් සෙනඟයි ආගග්ගේ ජීවිතය බේරන්න තීරණය කළා. ඒ වගේම එළු සහ ගව රැළේ හිටිය හොඳම සත්තුන්වයි, තර සත්තුන්වයි, බැටළුවන්වයි එයාලා මැරුවේ නැහැ.+ ප්‍රයෝජනයට ගන්න පුළුවන් දේවල් විනාශ කරන්නත් එයාලා කැමති වුණේ නැහැ. ඒත් කිසි වටිනාකමක් නැති හැම දෙයක්ම එයාලා සම්පූර්ණයෙන්ම විනාශ කළා.

10 ඊටපස්සේ යෙහෝවා දෙවියන් සාමුවෙල්ට කතා කරලා මෙහෙම කිව්වා. 11 “සාවුල්ව රජ විදිහට පත් කරපු එක ගැන මම හුඟක් දුක් වෙනවා. මොකද එයා මම කියපු විදිහට වැඩ කළේ නැහැ. එයා මාව අත්හැරලා.”+ ඒක ඇහුවාම සාමුවෙල්ට ලොකු දුකක් දැනුණා. එයා මුළු රෑම යෙහෝවා දෙවියන්ට ඒ ගැන කියකිය යාච්ඤා කළා.+ 12 සාමුවෙල් පහුවෙනිදා උදෙන්ම නැඟිටලා සාවුල්ව හම්බ වෙන්න යන්න ලෑස්ති වුණා. ඒ වෙලාවේ සාමුවෙල්ට මෙහෙම ආරංචි වුණා. “සාවුල් රජ කර්මෙල්වලට+ ගිහින් එයාගේ නමින් ස්මාරකයක් ඉදි කරලා.+ දැන් එයා ඉන්නේ ගිල්ගාල්වල.” 13 ඊටපස්සේ සාමුවෙල්, සාවුල් හිටපු තැනට ගියා. එතකොට සාවුල් එයාට මෙහෙම කිව්වා. “මං ඔයාට යෙහෝවාගේ ආශීර්වාදය පතනවා! යෙහෝවා මට කරන්න කියපු දේ මම කළා.” 14 ඒත් සාමුවෙල් “එහෙනම් මට මේ එළුවෝයි, බැටළුවෝයි, ගවයෝයි කෑගහන සද්දයක් ඇහෙන්නේ කොහොමද”+ කියලා සාවුල්ගෙන් ඇහුවා. 15 එතකොට සාවුල් රජ මෙහෙම කිව්වා. “ඒ කෑගහනවා ඇහෙන්නේ අමලෙක්වරුන්ගේ සත්ව රැළේ හිටිය හොඳම සත්තු ටික. හොඳම එළුවෝයි, බැටළුවෝයි, ගවයෝයි මරන්න සෙනඟ කැමති වුණේ නැහැ. ඔයාගේ දෙවි යෙහෝවාට පූජා කරන්නයි එයාලා උන්ව තියාගත්තේ. අනිත් හැම දෙයක්ම අපි සම්පූර්ණයෙන්ම විනාශ කළා.” 16 එතකොට සාමුවෙල්, සාවුල්ට මෙහෙම කිව්වා. “ඔය කතාව දැන් නවත්තගන්න! ඊයේ රෑ යෙහෝවා මට කියපු දේවල් දැන් මම ඔයාට කියන්නම්.”+ එතකොට සාවුල් “කියන්න” කියලා කිව්වා.

17 සාමුවෙල් මෙහෙම කිව්වා. “ඔයාව ඊශ්‍රායෙල් ගෝත්‍රවල නායකයා විදිහට පත් කළේ ඔයා කිසි වැඩකට නැති කෙනෙක් කියලා ඔයාම හිතපු වෙලාවක නෙවෙයිද?+ ඔයා ඒ වගේ තත්වයක ඉන්නකොට තමයි යෙහෝවා දෙවියන් ඔයාව ඊශ්‍රායෙල් දේශයේ රජ හැටියට අභිෂේක කළේ.+ 18 පස්සේ යෙහෝවා ඔයාට කිව්වා ‘පව්කාර අමලෙක්වරුන්ව සම්පූර්ණයෙන්ම විනාශ කරන්න.+ ඒ හැමෝම විනාශ වෙලා යන කල්ම එයාලට විරුද්ධව සටන් කරන්න’+ කියලා. 19 ඒත් ඇයි ඔයා යෙහෝවාට අකීකරු වුණේ? ඔයා හරිම කෑදර විදිහට සතුරන්ට අයිති දේවල් පැහැරගත්තා.+ යෙහෝවා ඒකට අකමැතියි කියලා දැනදැනත් ඔයා ඒක කළා!”

20 එතකොට සාවුල්, සාමුවෙල්ට මෙහෙම කිව්වා. “මම යෙහෝවාට කීකරු වුණානේ! යෙහෝවා මට කියපු විදිහට මම අමලෙක්වරුන්ව සම්පූර්ණයෙන්ම විනාශ කළා.+ මම එයාලාගේ රජ වුණ ආගග්වත් හිරකාරයෙක් විදිහට අරන් ආවා. 21 විනාශ කරන්න නියම කරපු හොඳම බැටළුවන්වයි, ගවයන්වයි තියාගත්තේ සෙනඟ. එයාලා ගිල්ගාල්වලදී ඔයාගේ දෙවි යෙහෝවාට පූජා කරන්නයි උන්ව තියාගත්තේ.”+

22 එතකොට සාමුවෙල් මෙහෙම කිව්වා. “යෙහෝවා කැමති අපි ඔහුට යාග පූජායි, දවන පූජායි ඔප්පු කරනවාටද+ නැත්නම් ඔහුට කීකරු වෙනවාටද? පූජා ඔප්පු කරනවාට වඩා වටින්නේ කීකරුකමයි.+ බැටළුවන්ගේ තෙල් ඔප්පු කරනවාට වඩා වටින්නේ යෙහෝවාගේ මඟ පෙන්වීම් පිළිපදින එකයි.+ 23 කැරලිගහනවා+ කියන්නේ පේන කියන එක තරම්ම බරපතළ වරදක්.+ අහංකාරකම* කියන්නේ මන්තර ගුරුකම් සහ රූප* නමස්කාර කරන එක තරම්ම දුෂ්ට දෙයක්. ඔයා යෙහෝවා කියපු දේ ප්‍රතික්ෂේප කරපු නිසා+ ඔහුත් ඔයාව ප්‍රතික්ෂේප කරලා රජකමෙන් අයින් කරනවා.”+

24 එතකොට සාවුල් සාමුවෙල්ට මෙහෙම කිව්වා. “මම කළේ ලොකු වරදක්. යෙහෝවා මට කරන්න කියපු දේට මම පිටින් ගියා. මං ඔයා කියපු දේ කළෙත් නැහැ. මොකද මම සෙනඟට බය වුණා. එයාලා කැමති දේ කරන්න ඉඩ දුන්නේ ඒ නිසයි. 25 අනේ, දැන් මට සමාව දීලා මාත් එක්ක එන්න. ඔයා ආවොත් මට යෙහෝවා දෙවියන් ඉස්සරහා වැඳ වැටිලා ඔහුගේ අනුමැතිය දිනාගන්න පුළුවන්.”+ 26 ඒත් සාමුවෙල් සාවුල්ට මෙහෙම කිව්වා. “නැහැ, මං ඔයාත් එක්ක එන්නේ නැහැ. ඔයා යෙහෝවා කියපු දේ ප්‍රතික්ෂේප කළා. ඒ නිසා යෙහෝවාත් ඔයාව ප්‍රතික්ෂේප කරනවා. ඔහු තවදුරටත් ඊශ්‍රායෙල්වරුන්ගේ රජ විදිහට ඔයාව පිළිගන්නේ නැහැ.”+ 27 සාමුවෙල් එතනින් යන්න හදද්දී සාවුල් එයාගේ ඇඳුමේ* වාටියෙන් ඇදලා එයාව නවත්තන්න හැදුවා. එතකොට සාමුවෙල්ගේ ඇඳුම ඉරුණා. 28 සාමුවෙල්, සාවුල්ට මේ දේ කිව්වා. “යෙහෝවා දෙවියන් අද ඊශ්‍රායෙල් රාජ්‍යය ඔයාගෙන් උදුරගන්නවා.* ඔහු ඔයාට වඩා යහපත් කෙනෙක්ට රාජ්‍යය භාර දෙනවා.+ 29 ඊශ්‍රායෙල්වරුන්ගේ ශ්‍රේෂ්ඨ දෙවියන්+ කවදාවත් බොරු කියන්නේ නැහැ.+ ඔහු කවදාවත් ගත්ත තීරණයක් වෙනස් කරන්නේ* නැහැ. තීරණ වෙනස් කරන්න ඔහු මනුෂ්‍යයෙක් නෙමෙයි.”+

30 එතකොට සාවුල් මෙහෙම කිව්වා. “මම කළේ ලොකු වරදක්. අනේ, දැන් වැඩිමහල්ලන් ඉස්සරහත් මගේ සෙනඟ ඉස්සරහත් මට ගෞරව කරන්න. මාත් එක්ක යන්න එන්න. ඔයා ආවොත් මට ඔයාගේ දෙවි යෙහෝවා ඉස්සරහා වැඳ වැටිලා ඔහුගේ අනුමැතිය ලබාගන්න පුළුවන්.”+ 31 ඉතින් සාමුවෙල් සාවුල් එක්ක ගියා. සාවුල් යෙහෝවා ඉස්සරහා වැඳ වැටිලා නමස්කාර කළා. 32 ඊටපස්සේ සාමුවෙල් කිව්වා “අමලෙක්වරුන්ගේ රජ වන ආගග්ව මං ළඟට ගේන්න” කියලා. ආගග්, සාමුවෙල් ළඟට යන්න අදිමදි කළා.* මොකද ඒ වෙන කල් එයා හිතාගෙන හිටියේ ‘මාව මරන එකක් නැහැ’ කියලා. 33 ඒත් සාමුවෙල් “ඔයා කඩුවෙන් දරුවන්ව මරලා එයාලාගේ අම්මලට ලොකු දුකක් දුන්නා. ඒ විදිහට අද ඔයාගේ අම්මාටත් දුක් වෙන්න වෙනවා” කියලා ආගග්ට කිව්වා. එහෙම කියලා එයා ආගග්ව කෑලි කෑලිවලට කපලා දැම්මා. ඒ විදිහට සාමුවෙල් ගිල්ගාල්වලදී යෙහෝවා ඉස්සරහා ආගග්ව මරලා දැම්මා.+

34 ඊටපස්සේ සාමුවෙල් රාමාවලට ගියා. සාවුල් රජ ගිබෙයාවල තිබුණ එයාගේ ගෙදරට ගියා. 35 සාමුවෙල් මැරෙන කල්ම සාවුල්ව දැක්කේ නැහැ. මොකද එයා සාවුල් නිසා හුඟක් දුක් වුණා.+ යෙහෝවා දෙවියනුත් සාවුල්ව ඊශ්‍රායෙල්වරුන්ගේ රජ විදිහට පත් කරපු එක ගැන දුක් වුණා.+