එසකියෙල්
6 යෙහෝවා දෙවියන් මට ආයෙත් කතා කරලා මෙහෙම කිව්වා. 2 “මනුෂ්‍ය පුත්‍රය, ඊශ්‍රායෙල් දේශයේ කඳු දිහාවට හැරිලා ඒවාට විරුද්ධව අනාවැකි කියන්න. 3 ඔයා මෙහෙම කියන්න ඕනේ. ‘ඊශ්‍රායෙල් දේශයේ කඳු සියල්ලෙනි, ශ්‍රේෂ්ඨතම පාලකයාණන් වන යෙහෝවා කියන දේට සවන් දෙන්න. කඳුවලටත් හෙල්වලටත් දිය පහරවල්වලටත් නිම්නවලටත් ශ්‍රේෂ්ඨතම පාලකයාණන් වන යෙහෝවා මෙහෙම කියනවා. “මම ඔබට විරුද්ධව කඩුවක් එවනවා. මම ඔබේ පූජනීය ස්ථාන* විනාශ කරනවා. 4 ඔබේ පූජාසන කුඩු කරලා දානවා. සුවඳ දුම් ඔප්පු කරන පූජාසන කඩලා දානවා.+ මැරුම් කන අයව මම ඔබේ පිළිකුල්සහගත රූප* ඉස්සරහට වීසි කරලා දානවා.+ 5 ඊශ්‍රායෙල්වරුනි, මම ඔබේ මළ කඳන් ඔබේ පිළිකුල්සහගත රූප ඉස්සරහට වීසි කරනවා. පූජාසන වටේට ඔබේ ඇටකටු විසුරුවලා දානවා.+ 6 ඔබ ජීවත් වෙන හැම ප්‍රදේශයකම තියෙන නගර විනාශ වෙලා යනවා.+ පූජනීය ස්ථාන කඩලා බිඳලා දාලා නටබුන් ගොඩක් කරනවා.+ ඔබේ පූජාසන කඩලා කුඩු කරලා දානවා. ඔබේ පිළිකුල්සහගත රූප නැති වෙලාම යනවා. සුවඳ දුම් ඔප්පු කරන පූජාසන කඩලා දානවා. ඔබේ අත්වලින් හදපු හැම දෙයක්ම අතුගාලා දානවා. 7 ඔබ අතරේ ඉන්න හුඟදෙනෙක් මැරුම් කාලා වැටෙයි.+ එතකොට මම යෙහෝවා කියලා පිළිගන්න ඔබට සිද්ධ වෙනවා.*+
8 “‘“ඒත් මම ඔබෙන් කුඩා පිරිසක් ඉතුරු කරනවා. ඔබ විවිධ දේශයන් පුරා විසිරිලා ජාතීන් අතරේ ඉද්දී ඔබෙන් සමහර අය කඩුවෙන් බේරෙනවා.+ 9 බේරෙන ඒ අය ජාතීන් අතරේ වහලුන් විදිහට ඉද්දී මාව මතක් කරයි.+ එදාට ඔවුන් තේරුම්ගනියි ඔවුන් අවිශ්වාසවන්ත වෙද්දී,* මට පිටු පාලා යද්දී, පිළිකුල්සහගත රූප පස්සේ ආසාවෙන් දුවද්දී*+ මගේ හිතට කොයි තරම් දුකක් දැනුණාද කියලා.+ ඔවුන් කරපු හැම දුෂ්ට දෙයක් ගැනම, හැම ජරා දෙයක් ගැනම ඔවුන් ලැජ්ජා වෙයි. ඔවුන් ඒවා පිළිකුල් කරයි.+ 10 මම යෙහෝවා කියලා පිළිගන්න ඔවුන්ට සිද්ධ වෙනවා. ඔවුන් පිටට විපත්ති ගේනවා කියලා මම කියද්දී ඒ වචන නිකම්ම හිස් වචන නෙමෙයි කියලත් ඔවුන්ට පිළිගන්න සිද්ධ වෙනවා.”’+
11 “ශ්‍රේෂ්ඨතම පාලකයාණන් වන යෙහෝවා මෙහෙම කියනවා. ‘ඊශ්‍රායෙල් සෙනඟ කරලා තියෙන හැම දුෂ්ට දෙයක් ගැනත් පිළිකුල් දෙයක් ගැනත් අත් දෙක එකට ගගහා, කකුල් පොළොවේ ගගහා දුක් වෙන්න. මොකද ඔවුන් කඩුවෙනුත් සාගතයෙනුත් වසංගතයෙනුත් මැරුම් කයි.+ 12 දුර ඈත ඉන්න කෙනා වසංගතයෙන් මැරෙයි. ළඟපාත ඉන්න කෙනා කඩු පහරින් මැරුම් කයි. ඒවායින් බේරිලා ඉතුරු වෙන අය සාගතය නිසා මැරිලා යයි. මම ඔවුන්ට විරුද්ධව මගේ කේන්තිය සම්පූර්ණයෙන්ම පිට කරනවා.+ 13 මැරුම් කාපු අය තමන් හදපු පිළිකුල්සහගත රූප අතරෙත් ඒ රූපවලට මිහිරි සුවඳක් නැඟෙන පූජා+ ඔප්පු කරපු පූජාසන වටෙත් හෙල් සහ කඳු මුදුන් මතත් සරුවට වැඩුණු හැම ගහක් යටත් විශාල ගස්වල අතු යටත් වැටිලා ඉඳියි.+ එතකොට මම යෙහෝවා කියලා පිළිගන්න ඔබට සිද්ධ වෙනවා.+ 14 මම ඔවුන්ට විරුද්ධව මගේ අත දික් කරලා දේශය පාළු තැනක් කරනවා. ඔවුන් හිටපු තැන් දිබ්ලා ළඟ තියෙන පාළුකරයටත් වඩා පාළු තත්වයකට පත් කරනවා. එතකොට මම යෙහෝවා කියලා පිළිගන්න ඔවුන්ට සිද්ධ වෙනවා.’”