පළවෙනි තෙසලෝනික

1 පාවුල්, සිල්වානස්*+ සහ තිමෝතිගෙන්,+ අපේ තාත්තා වන දෙවියන් සහ ස්වාමීන් වන යේසුස් ක්‍රිස්තුස් එක්ක එකට බැඳිලා ඉන්න තෙසලෝනිකවරුන්ගේ සභාව වෙතට.

දෙවියන්ගේ මහත් කරුණාවත්* සමාදානයත් ඔයාලට ලැබෙන්න කියලා අපි පතනවා.

2 ඔයාලා ගැන යාච්ඤා කරන හැම වෙලාවකම අපි දෙවියන්ට ඔයාලා ගැන කියලා ස්තුති කරනවා.+ 3 මොකද ඔයාලට තියෙන විශ්වාසය සහ ආදරය නිසා ඔයාලා මහන්සි වෙලා කරන සේවය අපේ තාත්තා වන දෙවියන් ඉස්සරහා අපිට නිතරම මතක් වෙනවා.+ අපේ ස්වාමීන් වන යේසුස් ක්‍රිස්තුස් ගැන ඔයාලට තියෙන බලාපොරොත්තුව නිසා ඔයාලා දුක් පීඩා විඳදරාගන්න විදිහත් අපිට අමතක වෙන්නේ නැහැ. 4 දෙවියන් ඔයාලට ගොඩක් ආදරෙයි කියලත් ඔහු ඔයාලව තෝරගෙන තියෙනවා කියලත් අපි දන්නවා. 5 අපි ඔයාලට ශුභාරංචිය නිකම්ම කිව්වා විතරක් නෙමෙයි, ඒක ස්ථිර විශ්වාසයකින්, ඔයාලාගේ හිතට තදින්ම දැනෙන විදිහටයි කිව්වේ. ඒ වෙලාවේ දෙවියන්ගේ බලයත් අපේ හිත්වල ප්‍රබල විදිහට ක්‍රියාත්මක වුණා. ඔයාලා දන්නවා ඔයාලාගේ යහපත වෙනුවෙන් අපි මොන තරම් දේවල් කළාද කියලා. 6 අපිවයි,+ ස්වාමීන්වයි+ ඔයාලා ආදර්ශයට ගත්තා කියලා හොඳටම තේරෙනවා. මොකද ගොඩක් පීඩාවලට මුහුණ දෙන්න වුණත් ඔයාලා හරිම සතුටින් දෙවියන්ගේ පණිවිඩය පිළිගත්තා.+ දෙවියන්ගේ බලය ඔයාලා තුළ ක්‍රියාත්මක වුණ නිසයි ඔයාලා ඒ පණිවිඩය සතුටින් පිළිගත්තේ. 7 මැසිඩෝනියාවේ සහ ඇකේයාවේ ඉන්න යේසුස්ගේ අනුගාමිකයන් හැමෝටම ඔයාලා තිබ්බේ හොඳ ආදර්ශයක්.

8 ඇත්තටම ඔයාලා නිසා මැසිඩෝනියාව සහ ඇකේයාව පුරාම යෙහෝවා* දෙවියන්ගේ පණිවිඩය පැතිරිලා ගිහින්. ඒ විතරක් නෙමෙයි දෙවියන් ගැන ඔයාලට තියෙන විශ්වාසය ගැනත් හැමෝටම ආරංචි වෙලා තියෙනවා.+ ඉතින් අපිට තවත් කියන්න දෙයක් ඉතුරු වෙලා නැහැ. 9 මොකද අපිට මුලින්ම ඔයාලව හම්බ වුණ විදිහ ගැන ඒ හැමෝම මතක් කරනවා. ඔයාලා රූපවලට නමස්කාර කරන එක+ අත්හැරලා ජීවමාන සැබෑ දෙවියන් වෙනුවෙන් මහන්සි වෙලා සේවය කරන්න පටන්ගත්තා. ඒ ගැනත් එයාලා අපි එක්ක නිතරම කතා කරනවා. 10 මරණයෙන් නැඟිට්ටවපු දෙවියන්ගේ පුතා යේසුස් ස්වර්ගයේ ඉඳන් එන කල් ඔයාලා බලාගෙන ඉන්නවා.+ ඒ යේසුස් තමයි දෙවියන් තමන්ගේ උදහස පිට කරද්දී අපිව ගලවගන්නේ.+