නික්මයාම

39 එයාලා නිල් පාට නූල්, දම් පාට ලොම් සහ තද රතු පාට රෙදි+ සිහින්ව වියලා ශුද්ධස්ථානයේ සේවය කරන අයට ඇඳුම් හැදුවා. යෙහෝවා දෙවියන් මෝසෙස්ට අණ කරපු විදිහටම එයාලා ආරොන්ටත් ශුද්ධ ඇඳුම් හැදුවා.+

2 එයා ඒෆොද් ඇඳුම+ හදන්න රත්තරන් නූල්, නිල් පාට නූල්, දම් පාට ලොම්, තද රතු පාට නූල් සහ සිහින්ව අඹරපු ලිනන් නූල් පාවිච්චි කළා. 3 එයාලා රත්තරන් තුනී තහඩු විදිහට තළලා ඒ තහඩුවලින් කෙඳි කපාගත්තා. ඊටපස්සේ ඒ රන් කෙඳි, දම් පාට ලොම්, නිල් පාට නූල්, තද රතු පාට නූල් සහ ලිනන් නූල් එකතු කරලා වැඩ දාලා ඒෆොද් ඇඳුම මැහුවා. 4 එයාලා ඒෆොද් ඇඳුමට උරහිස්පටි දෙකක් හදලා ඒ පටිවලින් ඇඳුමේ ඉදිරිපසත් පිටුපසත් සම්බන්ධ කළා. 5 ඒෆොද් ඇඳුම තද කරලා බඳින්න එයාලා ඒකට ඉණපටියක් හැදුවා.+ ඒෆොද් ඇඳුම වගේ ඒ ඉණපටියත් රත්තරන් නූල්වලින්, නිල් පාට නූල්වලින්, දම් පාට ලොම්වලින්, තද රතු පාට නූල්වලින් සහ සිහින්ව අඹරපු ලිනන් නූල්වලින් වැඩ දාලා හැදුවා. යෙහෝවා මෝසෙස්ට අණ කරපු විදිහටම එයාලා ඒක හැදුවා.

6 එයාලා ඔනික්ස් ගල් දෙකක් රන් තහඩු දෙකක ඔබ්බවලා ඊශ්‍රායෙල් ගෝත්‍රවල නම් ඒවාවල කෙටුවා. මුද්‍රා තියන අච්චුවක අකුරු කොටනවා වගේ ගල් දෙකේ ඒ නම් කෙටුවා.+ 7 ඊටපස්සේ එයා ඒෆොද් ඇඳුමේ උරහිස්පටි දෙකේ ඒ ගල් දෙක සවි කළා. යෙහෝවා මෝසෙස්ට අණ කරපු විදිහටම ඊශ්‍රායෙල්ගේ පුතුන්ව මතක් වෙන්න සිහිවටනයක් විදිහට ඒ ගල් දෙක සවි කළා.+ 8 ඊටපස්සේ එයා ළයවැස්මත්+ ඒෆොද් ඇඳුම වගේ වැඩ දාලා හැදුවා. ඒකට එයා රත්තරන් නූල්, නිල් පාට නූල්, දම් පාට ලොම්, තද රතු පාට නූල් සහ සිහින්ව අඹරපු ලිනන් නූල් පාවිච්චි කළා.+ 9 ළයවැස්ම දෙකට නමද්දී ඒක හරි හතරැස්ව තිබුණා. නැමුවාට පස්සේ ඒකේ දිග වියතක් සහ පළල වියතක්.* 10 එයාලා ඒකට මැණික් ගල් පේළි හතරක් ඇල්ලුවා. පළවෙනි පේළියේ රතු කැට, පඩියන් සහ මරකත ගල් එක ගාණේ තිබුණා. 11 දෙවෙනි පේළියේ පච්ච ගලක්, නිල් මැණිකක් සහ ජැස්පර් ගලක් තිබුණා. 12 තුන්වෙනි පේළියේ ලෙෂම්,* අගස්ති සහ අමතේස්ත ගල් එක ගාණේ තිබුණා. 13 හතරවෙනි පේළියේ ක්‍රිසොලයිට් ගලක්, ඔනික්ස් ගලක් සහ ජේඩ් ගලක් තිබුණා. ඒ ගල් රන් තහඩුවල ඔබ්බවලා ළයවැස්මට අල්ලලා තිබුණා. 14 එක ගලක එක නම ගාණේ ඊශ්‍රායෙල්ගේ පුතාලාගේ නම් 12 ඒ ගල් 12හේ කෙටුවා. ඊශ්‍රායෙල් ගෝත්‍ර 12 නියෝජනය කරන ඒ නම් මුද්‍රා තියන අච්චුවක කොටපු අකුරු වගේ කොටලා තිබුණා.

15 ඊටපස්සේ එයාලා පිරිසිදු රත්තරන් කෙඳි අඹරලා ලණු හදාගෙන ළයවැස්මේ සවි කළා.+ 16 ගල් දෙක ඔබ්බවන්න එයාලා රන් තහඩු දෙකක් හැදුවා. ඒ වගේම රන් මුදු දෙකක් හදලා ඒවා ළයවැස්මේ ඉහළ කොන් දෙකේ ඇල්ලුවා. 17 ඊටපස්සේ එයාලා ඒ මුදු දෙකට රත්තරන් ලණු දෙකක් සම්බන්ධ කළා. 18 ලණු දෙකේ අනිත් පැත්ත උරහිස්වල තියෙන රන් තහඩු දෙකට සම්බන්ධ කළා. ඒෆොද් ඇඳුමේ ඉස්සරහා පැත්තේ ළයවැස්ම එල්ලෙන විදිහට එයාලා ඒ ලණු සම්බන්ධ කළා. 19 එයාලා රත්තරන්වලින් තවත් මුදු දෙකක් හදලා ළයවැස්මේ පහළ කොන් දෙකේ ඇල්ලුවා. ඒවා ඇල්ලුවේ ළයවැස්මේ ඇතුල් පැත්තෙන්.+ 20 ඊටපස්සේ එයාලා තවත් රත්තරන් මුදු දෙකක් හැදුවා. ඒවා ඒෆොද් ඇඳුමේ ඉස්සරහා පැත්තේ, උරහිස්පටි දෙකට පහළින් සහ ඒෆොද් ඇඳුමයි, ඉණපටියයි සම්බන්ධ වෙන තැනට ටිකක් උඩින් ඇල්ලුවා. 21 අන්තිමට එයාලා ඒ මුදු දෙක ඇතුළෙන් නිල් පාට ලණුවක් යවලා ඒක ළයවැස්මේ පහළ කෙළවරේ තියෙන මුදු දෙකට සම්බන්ධ කරලා තදින් ගැටගැහුවා. එයාලා එහෙම කළේ ළයවැස්ම ඒෆොද් ඇඳුමේ ඉණපටියට ඉහළින් හෙල්ලෙන්නේ නැතුව තියාගන්නයි. යෙහෝවා මෝසෙස්ට අණ කරපු විදිහටම එයාලා කළා.

22 එයා නිල් පාට නූල් වියලා ඒෆොද් ඇඳුමට යටින් අඳින්න අත් නැති ඇඳුමක් හැදුවා.+ 23 ඊටපස්සේ ඇඳුමේ කර කපලා පටියක් ඒක වටේට ඇල්ලුවා. ඇඳුම දාද්දී ඉරෙන්නේ නැති වෙන්න එයා ඒකේ කර යුද ඇඳුමක කර වගේ මැහුවා. 24 ඊටපස්සේ එයාලා නිල් පාට නූල්වලින්, දම් පාට ලොම්වලින් සහ තද රතු පාට නූල්වලින් දෙළුම් ගෙඩි හදලා ඒවා ඇඳුමේ වාටිය දිගේ ඇල්ලුවා. 25 පිරිසිදු රත්තරන්වලින් සීනුත් හදලා අත් නැති ඇඳුමේ වාටිය දිගේ ඇල්ලුවා. ඒවා ඇල්ලුවේ දෙළුම් ගෙඩි දෙකක් අතරේ සීනුවක් තියෙන විදිහටයි. 26 අත් නැති ඇඳුමේ වාටිය දිගේ එයාලා සීනුවක් සහ දෙළුම් ගෙඩියක් මාරුවෙන් මාරුවට ඇල්ලුවා. දෙවියන්ට සේවය කරද්දී අඳින ඒ ඇඳුම යෙහෝවා මෝසෙස්ට අණ කරපු විදිහටම එයාලා හැදුවා.

27 එයාලා හොඳම වර්ගයේ ලිනන් නූල් වියලා ආරොන්ටත් එයාගේ පුතුන්ටත් ඇඳුම් හැදුවා.+ 28 හොඳම වර්ගයේ ලිනන් රෙදිවලින් විශේෂ හිස්වැස්මක්,+ අලංකාර හිස්වැසුම්+ සහ සිහින්ව අඹරපු ලිනන් නූල්වලින් යට කලිසම්+ හැදුවා. 29 එයාලා සිහින්ව අඹරපු ලිනන් නූල්, නිල් පාට නූල්, දම් පාට ලොම් සහ තද රතු පාට නූල් වියලා ඉණපටියක් හැදුවා. යෙහෝවා මෝසෙස්ට අණ කරපු විදිහටම එයාලා කළා.

30 අන්තිමට එයාලා පිරිසිදු රත්තරන්වලින් දිලිසෙන තහඩුවක් හදලා “ශුද්ධකමේ උල්පත යෙහෝවායි”+ කියන වචන පෙළ ඒකේ කෙටුවා. එයාලා ඒ වචන පෙළ කෙටුවේ මුද්‍රා තියන අච්චුවක කොටපු අකුරු වගේ. ඒ රන් තහඩුව දෙවියන්ට කැප වුණා කියලා පෙන්නන ශුද්ධ සංකේතයක්. 31 එයාලා නිල් පාට ලණුවකින් ඒ තහඩුව විශේෂ හිස්වැස්මේ බැන්දා. යෙහෝවා මෝසෙස්ට අණ කරපු විදිහටම එයාලා කළා.

32 හමු වීමේ කූඩාරම විදිහටත් හඳුන්වන ශුද්ධ කූඩාරමේ හැම වැඩක්ම එයාලා සම්පූර්ණයෙන්ම ඉවර කළා. යෙහෝවා මෝසෙස්ට අණ කරපු හැම දේම ඊශ්‍රායෙල්වරු ඒ විදිහටම කළා.+

33 ඊටපස්සේ එයාලා හමු වීමේ කූඩාරම,+ ඒකේ ආවරණ+ සහ ඒකට අයිති හැම දෙයක්ම මෝසෙස් ළඟට ගෙනාවා. ඒකේ කොකු,+ රාමු,+ පොලු,+ කණු, අඩි,+ 34 රතු සායම් දාපු බැටළු හම්වලින් හදපු ආවරණය,+ සීල් මත්ස්‍යයන්ගේ හම්වලින් හදපු ආවරණය, ගිවිසුම් පෙට්ටිය වෙන් කරන තිර රෙද්ද,+ 35 ගිවිසුම් පෙට්ටිය,* ඒකේ පියන+ සහ පොලු එයාලා ගෙනාවා.+ 36 ඒ වගේම මේසය සහ ඒක උඩ තියන භාණ්ඩ,+ දෙවියන්ට පූජා කරන රොටි, 37 පිරිසිදු රත්තරන්වලින් හදපු පහන් රුක සහ ඒකේ හැම භාණ්ඩයක්ම,+ ඒකේ පහන්+ සහ ඒ පහන් දල්වන්න තෙල්,+ 38 රන් පූජාසනය,+ ශුද්ධ තෛලය,+ සුගන්ධවත් ද්‍රව්‍යය,+ හමු වීමේ කූඩාරමට ඇතුල් වෙන තැනට දාන තිර රෙද්ද+ එයාලා ගෙනාවා. 39 ඒ වගේම තඹ පූජාසනය+ සහ තඹවලින් හදපු ඒකේ දැල, ඒකේ හැම භාණ්ඩයක්ම,+ ඒකේ පොලු,+ වතුර භාජනය සහ ඒකේ ආධාරකය,+ 40 මළුවේ එල්ලන තිර රෙදි, මළුවේ කණු, කණු රඳවන අඩි,+ මළුවේ දොරටුව විදිහට එල්ලන තිර රෙද්ද,+ මළුවේ ලණු, කූඤ්ඤ+ එයාලා ගෙනාවා. හමු වීමේ කූඩාරම විදිහටත් හඳුන්වන ශුද්ධ කූඩාරමේ හැම වැඩකටම ඕනෙ කරන භාණ්ඩත් එයාලා ගෙනාවා. 41 ශුද්ධස්ථානයේ සේවය කරන අය වෙනුවෙන් සිහින්ව වියපු ඇඳුම්, පූජක ආරොන්ගේ ශුද්ධ ඇඳුම්+ සහ පූජකයන් විදිහට සේවය කරන එයාගේ පුතාලාගේ ඇඳුම් එයාලා ගෙනාවා.

42 යෙහෝවා දෙවියන් මෝසෙස්ට අණ කරපු විදිහටම ඊශ්‍රායෙල්වරු ඒ හැම දේම හැදුවා.+ 43 එයාලා හදපු හැම දෙයක්ම පරීක්ෂා කරලා බැලුවාම මෝසෙස් දැක්කා ඒ හැම දේම යෙහෝවා අණ කරපු විදිහටම හදලා තියෙනවා කියලා. ඒ නිසා මෝසෙස් එයාලට ආශීර්වාද කළා.