පළවෙනි සාමුවෙල්
9 බෙන්ජමින් ගෝත්‍රයට+ අයිති කිෂ්+ කියලා කෙනෙක් හිටියා. එයා හුඟක් පොහොසත් කෙනෙක්. එයාගේ තාත්තාගේ නම අබියෙල්. අබියෙල්ගේ තාත්තා ෂෙරොර්. ෂෙරොර්ගේ තාත්තා බෙකොරත්. බෙකොරත්ගේ තාත්තා බෙන්ජමින්වරයෙක් වුණ අෆියා. 2 කිෂ්ට සාවුල්+ කියලා පුතෙක් හිටියා. එයා හරිම කඩවසම් තරුණයෙක්. ඊශ්‍රායෙල්වරු අතරේ එයා තරම් කඩවසම් කෙනෙක් හිටියේ නැහැ. එයා කොච්චර උසද කියනවා නම් එයාගේ උරහිසට වඩා උස කවුරුත්ම හිටියේ නැහැ.
3 දවසක් සාවුල්ගේ තාත්තා වුණ කිෂ්ට අයිති බූරුවන්* කීපදෙනෙක් නැති වුණා. ඒ නිසා කිෂ් සාවුල්ට කතා කරලා මෙහෙම කිව්වා. “පුතේ, සේවකයෙක් එක්ක ගිහින් අපේ බූරුවෝ ටික හොයාගෙන එන්න.” 4 සාවුල් බූරුවන්ව හොයාගෙන එෆ්‍රායිම් කඳුකරය පහු කරලා ෂාලිෂා කියන පළාත වෙන කල්ම ගියත් උන්ව හම්බ වුණේ නැහැ. එයාලා ෂායලිම් දේශය හරහාත් ඇවිදගෙන ගියා. ඒත් උන්ව හම්බ වුණේ නැහැ. එයාලා බෙන්ජමින්වරුන්ගේ දේශය පුරාම ඇවිද්දත් උන්ව හොයාගන්න බැරුව ගියා.
5 ඊටපස්සේ එයාලා ෂුප් කියන පළාතට ආවා. එතකොට සාවුල් එයාගේ සේවකයාට මෙහෙම කිව්වා. “අපි දැන් ගෙදර යමු. නැත්නම් තාත්තා බූරුවෝ හොයන එක පැත්තකින් තියලා අපිව හොයන්න පටන්ගනියි.”+ 6 ඒත් සේවකයා එයාට මෙහෙම කිව්වා. “දෙවියන්ගේ පණිවිඩ කියන කෙනෙක් මේ නගරේ ඉන්නවා. හැමෝම එයාට ගෞරව කරනවා. එයා දෙයක් කිව්වොත් ඒක ඒ විදිහටම වෙනවා.+ අපි දැන් එයාව හොයාගෙන යමු. සමහරවිට අපේ සත්තු ඉන්නේ කොහෙද කියලා එයාට කියන්න පුළුවන් වෙයි.” 7 එතකොට සාවුල් එයාගේ සේවකයාට මෙහෙම කිව්වා. “සැබෑ දෙවියන්ගේ පණිවිඩකරුට තෑග්ගක් විදිහට දෙන්න අපි මොනවාද අරගෙන යන්නේ? එයාට දෙන්න අපි ළඟ මුකුත්ම නැහැ. අපේ මලුවල තිබ්බ කෑම ටිකත් ඉවරයි.” 8 සේවකයා සාවුල්ට මෙහෙම කිව්වා. “මං ළඟ රිදී ෂෙකෙල්* කාලක් තියෙනවා. මම ඒක සැබෑ දෙවියන්ගේ පණිවිඩකරුට දෙන්නම්. එතකොට අපේ සත්තු හොයාගන්න අපි යන්න ඕනෙ මොන පැත්තටද කියලා එයා අපිට කියයි.” 9 (ඒ කාලේ ඊශ්‍රායෙල් දේශයේ හිටපු කාට හරි දෙවියන්ගෙන් මොනවා හරි දැනගන්න ඕනෙ වුණාම එයා සාමාන්‍යයෙන් කිව්වේ “අපි දිවැසිවරයා ළඟට යමු”+ කියලා. ඒ දවස්වල අනාගතවක්තෘවරුන්ට කිව්වේ දිවැසිවරු කියලයි.) 10 එතකොට සාවුල් එයාගේ සේවකයාට මෙහෙම කිව්වා. “ඒක හොඳ අදහසක්. අපි ගිහින් එයාව හම්බ වෙමු.” ඉතින් එයාලා සැබෑ දෙවියන්ගේ පණිවිඩකරු හිටපු නගරයට ගියා.
11 එයාලා නගරයට යන කන්ද නැඟගෙන යද්දී නගරයේ ඉඳන් එන තරුණියන් කීපදෙනෙක්ව එයාලට හම්බ වුණා. වතුර පුරවගෙන යන්න ආපු ඒ තරුණියන්ගෙන් එයාලා ඇහුවා “දිවැසිවරයා+ ඉන්නේ මෙහෙද” කියලා. 12 එයාලා මෙහෙම කිව්වා. “ඔව්, අර ඉස්සරහින් යන්නේ එයා තමයි. අද සෙනඟ ශුද්ධස්ථානයේ*+ පූජාවක් ඔප්පු කරනවා.+ එයා අද මෙහෙට ඇවිත් ඉන්නේ ඒ නිසයි. ඉක්මනට ගියොත් ඔයාලට එයාව හම්බ වෙන්න පුළුවන් වෙයි. 13 නගරෙට ඇතුල් වුණ ගමන්ම ඔයාලට එයාව හම්බ වෙයි. පූජාවට ආශීර්වාද කරන්නේ එයායි. එයා ඒකට ආශීර්වාද කරන කල් කවුරුත් පූජාවෙන් කන්නේ නැහැ. ඒ නිසා පූජාවට ආරාධනා කරපු අය එයා එන කල් බලන් ඉන්නවා ඇති. එයා එතනට යන්න කලින් ඉක්මනට ගිහින් එයාව හම්බ වෙන්න.” 14 ඉතින් එයාලා කන්ද නැඟගෙන නගරයට ගියා. නගරයට ඇතුල් වෙලා ටික දුරක් යද්දී එයාලා දැක්කා සාමුවෙල් එයාලව හම්බ වෙන්න එනවා. සාමුවෙල් ආවේ පූජාව ඔප්පු කරන තැනට ඒ දෙන්නාවත් එක්කගෙන යන්නයි.
15 සාවුල් එහෙට එන්න දවසකට කලින් යෙහෝවා දෙවියන් සාමුවෙල්ට මෙහෙම කියලා තිබුණා. 16 “හෙට මේ වෙලාව වෙනකොට මම බෙන්ජමින් දේශයේ කෙනෙක්ව ඔයා ළඟට එවනවා.+ මගේ සෙනඟ වන ඊශ්‍රායෙල්වරුන්ගේ නායකයා විදිහට එයාව අභිෂේක කරන්න.+ මගේ සෙනඟව පිලිස්තිවරුන්ගෙන් බේරගන්නේ එයායි. මගේ සෙනඟ විඳින දුක මට පේනවා. එයාලා අඬඅඬ උදව් ඉල්ලනවා මට ඇහෙනවා.”+ 17 සාමුවෙල් සාවුල්ව දැක්කාම යෙහෝවා සාමුවෙල්ට මෙහෙම කිව්වා. “‘මගේ සෙනඟව පාලනය කරනවා’* කියලා මං කිව්වේ මේ කෙනා ගැනයි.”+
18 සාවුල්ට නගරයේ දොරටුව ළඟදී සාමුවෙල්ව හම්බ වුණා. එයා සාමුවෙල්ගෙන් “දිවැසිවරයාගේ ගේ තියෙන්නේ කොහෙද කියලා කියන්න පුළුවන්ද” කියලා ඇහුවා. 19 එතකොට සාමුවෙල් සාවුල්ට මෙහෙම කිව්වා. “මම තමයි දිවැසිවරයා. අපි දැන් පූජාව ඔප්පු කරන තැනට යමු. ඔයා මට ඉස්සරහින් යන්න. අද ඔයාලා මාත් එක්ක ඉඳලා කෑම කන්න.+ ඔයාලට දැනගන්න ඕන* හැම දෙයක්ම මං කියන්නම්. හෙට උදේට ඔයාලට යන්න පුළුවන්. 20 දවස් තුනකට කලින් නැති වුණ බූරුවන්+ ගැන කරදර වෙන්න එපා. උන්ව හම්බ වුණා. ඊශ්‍රායෙල් දේශයේ තියෙන හැම වටිනා දෙයක්ම අයිති ඔයාටයි, ඔයාගේ තාත්තාගේ පවුලේ අයටයි.”+ 21 ඒක ඇහුවාම සාවුල් මෙහෙම කිව්වා. “ඇයි ඔයා ඒ වගේ දෙයක් කිව්වේ? මම බෙන්ජමින් ගෝත්‍රයේ කෙනෙක්නේ. ඒක ඊශ්‍රායෙල් දේශයේ තියෙන පොඩිම ගෝත්‍රය.+ අනික බෙන්ජමින් ගෝත්‍රයේ අනිත් පවුල් එක්ක බලද්දී මගේ පවුල වැදගත් පවුලක් කියලා කියන්න බැහැනේ.”
22 ඊටපස්සේ සාමුවෙල් කෑම කන තැනට සාවුල්වයි, එයාගේ සේවකයාවයි එක්කන් ගියා. එදා පුරුෂයන් 30දෙනෙක්ට විතර කෑමට ආරාධනා කරලයි තිබුණේ. සාමුවෙල් සාවුල්ටත් එයාගේ සේවකයාටත් ඉඳගන්න මේසයේ ප්‍රධාන තැනක් දුන්නා. 23 කෑම උයන කෙනාට සාමුවෙල් මෙහෙම කිව්වා. “මං ඔයාට අරන් තියාගන්න කියලා කියපු මස් කොටස දැන් ගේන්න.” 24 එතකොට කෑම උයන කෙනා, වෙන් කරලා තිබ්බ මස් ගාත අරන් ඇවිත් සාවුල් ඉස්සරහා තිබ්බා. සාමුවෙල් සාවුල්ට මෙහෙම කිව්වා. “මේක ඔයාට වෙන් කරපු කොටස. මේ අවස්ථාව වෙනුවෙන්මයි එයාලා මේ කොටස වෙන් කරලා තිබ්බේ. මොකද මං එයාලට කිව්වා ‘අද කෑමට කට්ටියක් එනවා’ කියලා. දැන් කන්න.” එදා සාවුල්, සාමුවෙල් එක්ක එකට ඉඳගෙන කෑම කෑවා. 25 ඊටපස්සේ එයාලා පූජා ඔප්පු කරපු තැනින් පිටත් වෙලා+ නගරයට ගියා. සාමුවෙල් එයාගේ ගෙදර සඳලුතලයට* සාවුල්ව එක්කගෙන ගිහින් එයා එක්ක කතා කරකර හිටියා. 26 එයාලා පහුවෙනිදා උදෙන්ම අවදි වුණා. එළිය වැටීගෙන එද්දී සාමුවෙල් සඳලුතලේ හිටිය සාවුල්ට කතා කරලා මෙහෙම කිව්වා. “දැන් ඔයා ගෙදර යන්න ලෑස්ති වෙන්න.” ඉතින් සාවුල් ලෑස්ති වෙලා සාමුවෙල් එක්ක පිටත් වුණා. 27 එයාලා කන්දෙන් බැහැගෙන නගරයේ සීමාව ළඟට එද්දී සාමුවෙල් සාවුල්ට මෙහෙම කිව්වා. “අපිට ඉස්සර වෙලා යන්න කියලා ඔයාගේ සේවකයාට කියන්න.+ ඒත් ඔයා ටිකක් ඉන්න. ඔයාට කියන්න මට දෙවියන්ගෙන් පණිවිඩයක් තියෙනවා.” ඉතින් සේවකයා එයාලට ඉස්සර වෙලා ගියා.