ද්විතීය කතාව

28 “අද මම ඔයාලට කියලා දෙන ඔයාලාගේ දෙවි වන යෙහෝවාගේ හැම ආඥාවක්ම ඒ විදිහටම පිළිපැදලා ඔහුගේ හඬට සවන් දෙනවා කියලා පෙන්නන්න. ඔයාලා එහෙම කරනවා නම් ඔයාලාගේ දෙවි වන යෙහෝවා පොළොවේ ඉන්න අනිත් හැම ජාතියකටම වඩා ඔයාලව උසස් කරයි.+ 2 ඔයාලා දිගටම ඔයාලාගේ දෙවි වන යෙහෝවාගේ හඬට සවන් දුන්නොත් ඔයාලට ගොඩක් ආශීර්වාද අද්දකින්න පුළුවන් වෙයි. ඇත්තටම ඒ ආශීර්වාද ඔයාලව හොයාගෙන එයි.+

3 “ඔයාලා නගරේදී කරන වැඩවලටත් කෙතේදී කරන වැඩවලටත් ආශීර්වාද ලැබෙයි.+

4 “ඔයාලාගේ දරුවන්ටත් ආශීර්වාද ලැබෙයි.+ ඔයාලාගේ කෙත්වල පලදාවටත් ඔයාලාගේ රැළේ ඉන්න බැටළුවන් සහ ගවයන් බිහි කරන පැටවුන්ටත් ආශීර්වාද ලැබෙයි.+

5 “ඔයාලට ආශීර්වාද ලැබෙන නිසා ඔයාලාගේ කූඩ+ සහ පිටි අනන භාජන+ පිරිලා තියෙයි.

6 “ඔයාලා මොන දේ කළත් ඔයාලට ආශීර්වාද ලැබෙයි.

7 “ඔයාලට විරුද්ධව සටන් කරන්න එන සතුරන්ව යෙහෝවා ඔයාලා ඉස්සරහම පරාජය කරයි.+ සතුරන් ඔයාලට පහර දෙන්න එක දිශාවකින් ආවත් දිශා හතකින් පලා දුවන්න එයාලට සිද්ධ වෙයි.+ 8 ඔයාලාගේ ආහාර ගබඩාවටත් ඔයාලා කරන හැම දේකටමත් යෙහෝවා ආශීර්වාද කරයි.+ ඔයාලාගේ දෙවි වන යෙහෝවා ඔයාලට ලබා දෙන දේශයේදී ඔයාලට අනිවාර්යයෙන්ම ඔහුගේ ආශීර්වාද ලැබෙයි. 9 ඔයාලා ඔයාලාගේ දෙවි වන යෙහෝවාගේ ආඥා පිළිපදිනවා නම් ඔහුගේ මඟ පෙන්වීම්වලට අනුව ජීවත් වෙනවා නම් යෙහෝවා ඔයාලට පොරොන්දු වුණ විදිහටම+ ඔහුට අයිති ශුද්ධ සෙනඟක් හැටියට ඔයාලව පිළිගනියි.+ 10 ඔයාලා යෙහෝවාගේ නම දරන සෙනඟ කියලා පොළොවේ ඉන්න හැම ජාතියකටම දකින්න ලැබෙයි.+ ඒ නිසා එයාලා ඔයාලට බයෙන් ඉඳියි.+

11 “යෙහෝවාගේ ආශීර්වාදය ඔයාලට ලැබෙන නිසා ඔයාලාගේ මුතුන්මිත්තන්ට යෙහෝවා දෙන්න පොරොන්දු වුණ දේශයේදී+ ඔයාලට ගොඩක් දරු සම්පත් ලැබෙයි. ඔයාලාගේ සත්ව රැළවල් බෝ වෙලා සතුන්ගේ ගාණ ගොඩක් වැඩි වෙයි. ඔයාලාගේ කෙත්වල පලදාවත් ගොඩක් වැඩි වෙයි.+ 12 කෙනෙක් පිරිලා ඉතිරිලා තියෙන එයාගේ ගබඩාව අරිනවා වගේ යෙහෝවා අහසේ කවුළු ඇරලා නියම කාලෙට ඔයාලාගේ දේශයට වැසි ලබා දෙයි.+ ඔයාලා කරන හැම දේකටම ආශීර්වාද කරයි. ඔයාලට කවදාවත් වෙනත් ජාතීන්ගෙන් ණය ගන්න සිද්ධ වෙන්නේ නැහැ. ඒ වෙනුවට ඔයාලා ගොඩක් ජාතීන්ට ණයට දෙයි.+ 13 අද මම ඔයාලට කියලා දෙන යෙහෝවා දෙවියන්ගේ හැම ආඥාවකටම ඔයාලා කීකරු වෙලා දිගටම ඒවා පිළිපදිනවා නම් යෙහෝවා අනිත් හැමෝටම වඩා ඔයාලව ඉස්සරහින්ම තියයි. ඔයාලා කාටවත් දෙවෙනි වෙන්නේ නැහැ. අනිත් හැමෝටම වඩා ඔයාලා උසස් වෙයි.+ ඔයාලා කවදාවත් පහතට වැටෙන්නේ නැහැ. 14 අද මම ඔයාලට කියලා දෙන හැම දෙයක්ම ඒ විදිහටම පිළිපදින්න.+ ඒවාවලින් පිට පැනලා ගිහින් වෙනත් දෙවිවරුන්ට නමස්කාර කරන්න එපා.+

15 “ඒත් ඔයාලා ඔයාලාගේ දෙවි වන යෙහෝවාගේ හඬට සවන් දෙන්නේ නැතුව අද මම ඔයාලට කියලා දෙන ඔහුගේ ආඥා සහ පනත් පිළිපැද්දේ නැත්නම් මේ හැම ශාපයක්ම ඔයාලා අද්දකියි. ඇත්තටම ඒ ශාප ඔයාලා පස්සේ එළවගෙන එයි.+

16 “ඔයාලා නගරේදී වැඩක් කළත් කෙතේදී වැඩක් කළත් ශාප අද්දකින්න වෙයි.+

17 “ඔයාලා අද්දකින ශාප නිසා ඔයාලාගේ කූඩ+ සහ පිටි අනන භාජන+ හිස් වෙලා තියෙයි.

18 “ඔයාලාගේ දරුවන්ට ශාප අද්දකින්න වෙයි.+ ඔයාලාගේ කෙත්වල පලදාවටත් ඔයාලට අයිති බැටළු පැටවුන්ට සහ වහු පැටවුන්ටත් ශාප අද්දකින්න වෙයි.+

19 “ඔයාලා මොන දේ කළත් ඔයාලට ශාප අද්දකින්න වෙයි.

20 “ඔයාලා දෙවියන්ව අත්හැරලා ගිහින් දුෂ්ට දේවල් කළොත් යෙහෝවා ඔයාලා කරන්න හදන හැම දේකටම ශාප කරයි. ඔහු ඔයාලාගේ හිත්වල ලොකු බයක් ඇති කරයි. ඔයාලට දඬුවම් කරයි. එතකොට ඔයාලා ඉක්මනින්ම විනාශ වෙලා දේශයෙන් නැත්තටම නැති වෙලා යයි.+ 21 ඔයාලට උරුම වෙන දේශයෙන් ඔයාලා නැත්තටම නැති වෙලා යන කල් යෙහෝවා දරුණු ලෙඩ රෝගවලින් ඔයාලට පහර දෙයි.+ 22 ක්ෂය රෝගය, තද උණ,+ ඇඟපත ඉදිමීම වගේ ලෙඩවලිනුත් කඩුවෙනුත්+ යෙහෝවා ඔයාලට පහර දෙයි. ගින්දර වගේ රස්නයක්, වියළි සුළං සහ දිලීර+ රෝග ඇති කරයි. ඔයාලා විනාශ වෙලා යන කල්ම ඒ හැම දෙයක්ම ඔයාලට අද්දකින්න වෙයි. 23 අහස තඹ වගෙත් පොළොව යකඩ වගෙත් වෙයි.+ 24 වැස්ස වෙනුවට යෙහෝවා ඔයාලාගේ දේශය වැලිවලිනුත් දූවිල්ලෙනුත් නැහැවිලා යන්න සලස්වයි. ඔයාලා නැත්තටම නැති වෙලා යන කල් එහෙම වෙයි. 25 යෙහෝවා ඔයාලව ඔයාලාගේ සතුරන් අතින් පරාජයට පත් කරයි.+ සතුරන්ට පහර දෙන්න ඔයාලා එක දිශාවකින් ගියත් දිශා හතකින් පලා දුවන්න ඔයාලට සිද්ධ වෙයි. ඔයාලා අද්දකින විනාශය කොච්චර භයානකද කියනවා නම් ඒක දකින පොළොවේ තියෙන හැම රාජ්‍යයක්ම බයෙන් වෙවුලයි.+ 26 ඔයාලාගේ මළ කඳන් කුරුල්ලෝයි, වනසත්තුයි කෑමට ගනියි. උන්ව බය කරලා එළවලා දාන්න කවුරුත් ඉතුරු වෙන්නේ නැහැ.+

27 “ඊජිප්තුවරුන්ට හැදුණ සැරව ගෙඩිවලින් වගේම අර්ශස්වලින්, දද සහ වෙනත් හමේ රෝගවලින් යෙහෝවා ඔයාලට පහර දෙයි. ඒවා කවදාවත් සුව වෙන්නේ නැහැ. 28 යෙහෝවා ඔයාලාගේ සිහිය විකල් කරයි. ඔයාලාගේ පෙනීම නැති කරලා+ ඔයාලව ඒ මේ අත යන්න සලස්වයි. 29 අන්ධ මනුස්සයෙක් අත පත ගගා යනවා වගේ ඔයාලත් මහ දවාලේ අත පත ගගා යයි.+ ඔයාලා කරන කිසිම දෙයක් සාර්ථක වෙන්නේ නැහැ. ඔයාලා නිතරම හොරුන්ටයි, වංචාකාරයන්ටයි ගොදුරු වෙයි. ඔයාලාගේ උදව්වට කවුරුත් එන්නේ නැහැ.+ 30 ඔයාලා තරුණියක් එක්ක විවාහ ගිවිසගත්තත් තව පුරුෂයෙක් ඇවිත් එයාව දූෂණය කරයි. ඔයාලා ගෙවල් ගොඩනැඟුවත් ඒවාවල ජීවත් වෙන්න ලැබෙන්නේ නැහැ.+ ඔයාලා මිදිවතු වගා කළත් ඒවාවල පලදාවෙන් ප්‍රයෝජන ගන්න ලැබෙන්නේ නැහැ.+ 31 ඔයාලා ඉස්සරහම ඔයාලාගේ හරකාව මැරුවත් උගේ මස් කන්න ඔයාලට ලැබෙන්නේ නැහැ. ඇස් පනාපිටම ඔයාලාගේ බූරුවාව පැහැරගත්තත් ඌව ආපහු ලබාගන්න ඔයාලට පුළුවන් වෙන්නේ නැහැ. සතුරන් ඇවිත් ඔයාලාගේ බැටළුවන්ව අරන් ගියත් උන්ව බේරගන්න කවුරුත් නැහැ. 32 ඔයාලා බලාගෙන ඉද්දීම වෙනත් ජාතීන් ඇවිල්ලා ඔයාලාගේ දුවලා පුතාලව අරන් යයි.+ එයාලව ආයේ දකින්න කොච්චර ආසාවෙන් හිටියත් ඔයාලට මුකුත් කරගන්න බැරි වෙයි. 33 ඔයාලා දන්නේ නැති සෙනඟක් ඇවිල්ලා ඔයාලාගේ අස්වැන්නයි, මුළු පලදාවයි කාලා දායි.+ ඔයාලා නිතරම වංචාකාරයන්ට අහු වෙලා බැට කයි. 34 ඔයාලා දකින දේවල් නිසා ඔයාලාගේ සිහිය විකල් වෙයි.

35 “යෙහෝවා ඔයාලාගේ දණහිස්වලටයි, කකුල්වලටයි දරුණු සැරව ගෙඩිවලින් පහර දෙයි. ඒවා ඔළුවේ ඉඳලා කකුල් වෙන කල්ම පැතිරිලා යයි. කවදාවත් ඒවා හොඳ වෙන්නේ නැහැ. 36 යෙහෝවා ඔයාලවයි, ඔයාලා පත් කරගත්ත රජවයි ඔයාලාගේ මුතුන්මිත්තන්වත් දැනගෙන හිටියේ නැති ජාතියකට අල්ලලා දෙයි.+ එහෙදී ඔයාලට ලීවලින් සහ ගල්වලින් හදපු දෙවිවරුන්ට වන්දනාමාන කරන්න වෙයි.+ 37 යෙහෝවා ඔයාලව විසුරුවාහරින දේශවල ඉන්න මිනිස්සු ඔයාලට වුණ දේ අහලා හොඳටම බය වෙයි. ඒ මිනිස්සු ඔයාලව විහිළුවකට අරගෙන* ඔයාලට හිනා වෙයි.+

38 “ඔයාලා කෙත්වල ගොඩක් බීජ වැපුරුවත් පළඟැටියන් ඇවිල්ලා අස්වැන්න කාලා දාන නිසා ඔයාලට ලැබෙන්නේ හරිම පොඩි අස්වැන්නක්.+ 39 ඔයාලා මිදිවතු වගා කළත් පණුවෝ ඇවිත් ඒවා කාලා දාන නිසා පලදාව එකතු කරගන්න ලැබෙන්නේ නැහැ.+ ඒකෙන් වයින් හදලා බොන්න ලැබෙන්නෙත් නැහැ. 40 ඔයාලා ජීවත් වෙන ප්‍රදේශය පුරාම ඔලීව ගස් තිබුණත් ඒ ගෙඩි වැටිලා යයි. ඒ නිසා ඔයාලාගේ ඇඟේ ගාන්න තෙල් ටිකක් හදාගන්නවත් ඔයාලට බැරි වෙයි. 41 ඔයාලා දරුවන් බිහි කළත් එයාලව වහලුන් විදිහට අරගෙන යන නිසා ඔයාලට එයාලව දකින්නවත් බැරි වෙයි.+ 42 කෘමීන් රංචු පිටින් ඇවිල්ලා ඔයාලාගේ ගස් වැලුයි, පලදාවයි වනසලා දායි. 43 ඔයාලා අතරේ ජීවත් වෙන විදේශිකයන් තව තවත් බලවත් වෙයි. ඔයාලට තිබුණු බලය නැති වෙලා ඔයාලා තව තවත් පල්ලෙහට වැටෙයි. 44 විදේශිකයන්ට ණයට දෙනවා වෙනුවට එයාලාගෙන් ණයට ගන්න ඔයාලට සිද්ධ වෙයි.+ එයාලට ඉහළම තැන ලැබෙද්දී ඔයාලා පල්ලෙහටම වැටෙයි.+

45 “ඔයාලා ඔයාලාගේ දෙවි වන යෙහෝවාගේ හඬට සවන් නොදී ඔහු දුන්න ආඥා සහ පනත් පිළිපැද්දේ නැති නිසා+ මේ හැම ශාපයක්ම+ අනිවාර්යයෙන්ම ඔයාලා අද්දකියි. ඔයාලා නැත්තටම නැති වෙලා යන කල් ඒ ශාප ඔයාලා පස්සේ එළවගෙන එයි.+ 46 ඔයාලා පිටටත් ඔයාලාගෙන් පැවතෙන අය පිටටත් එන ඒ ශාප හැමදාටම තියෙන සිහිගැන්වීමක් සහ අනතුරු ඇඟවීමක් වෙයි.+ 47 ඒ ශාප ඔයාලට ලැබෙන්නේ කිසිම අඩුවක් නැතුව හැම දෙයක්ම තියෙද්දී ඔයාලා ඔයාලාගේ දෙවි වන යෙහෝවාට හිතේ සතුටින් සහ ප්‍රීතියෙන් සේවය කළේ නැති නිසයි.+ 48 යෙහෝවා ඔයාලට විරුද්ධව ඔයාලාගේ සතුරන්ව එවයි. ඔයාලා බඩගින්නෙන්,+ පිපාසයෙන්, අඳින්න හරි හමං ඇඳුම් පවා නැතුව ගොඩක් අගහිඟකම් මැද එයාලට දාසකම් කරයි.+ ඔයාලා නැත්තටම නැති වෙලා යන කල් එයාලා යකඩ වියගහක් ඔයාලාගේ බෙල්ලේ බඳියි.

49 “යෙහෝවා දුර ඈත පොළොව කෙළවරේ ඉන්න ජාතියක් ඔයාලට විරුද්ධව එවයි.+ ඔයාලට නොතේරෙන භාෂාවක් කතා කරන ඒ ජාතිය+ හරියට රාජාලියෙක් වේගයෙන් ඇවිත්+ ගොදුර ඩැහැගන්නවා වගේ ඔයාලව ඩැහැගනියි. 50 එයාලා හරිම දරුණු, භයානක ජාතියක්. එයාලා බාල මහලු කාටවත් කිසිම අනුකම්පාවක් පෙන්නන්නේ නැහැ.+ 51 ඔයාලා නැත්තටම නැති වෙලා යන විදිහට ඔයාලට අයිති සතුන්වයි, ඔයාලාගේ පලදාවයි එයාලා කාලා දානවා. ඔයාලා විනාශ වෙලා යන කල්ම එයාලා කිසිම දෙයක් ඉතුරු කරන්නේ නැහැ. ධාන්‍යවත් අලුත් වයින්වත් තෙල්වත් බැටළු පැටවුන්වවත් වහු පැටවුන්වවත් ඔයාලට ඉතුරු කරන්නේ නැහැ.+ 52 ඔයාලා විශ්වාසය තියන, උස පවුරු කඩාගෙන වැටෙන කල් එයාලා ඔයාලාගේ දේශයේ තියෙන හැම නගරයක්ම වටලලා ඔයාලව කොටු කරලා තියයි. ඔයාලාගේ දෙවි වන යෙහෝවා ඔයාලට ලබා දෙන දේශයේ තියෙන හැම නගරයක්ම වටලලා ඔයාලව ඒවා ඇතුළේ හිර කරලා තියයි.+ 53 සතුරන් ඔයාලව වටලගෙන ඉන්න නිසාත් ඔයාලා පිටට ගේන දරුණු පීඩා නිසාත් ඔයාලාගේ දරුවන්ව මරලා කන්න ඔයාලට සිද්ධ වෙයි.+ ඔයාලාගේ දෙවි වන යෙහෝවා ඔයාලට දුන්න ඔයාලාගෙම දරුවන්ව ඔයාලා මරලා කයි.

54 “සැපපහසු ජීවිතයක් ගත කරපු, ගුණ යහපත් පුරුෂයන් පවා ඒ කාලේදී තමන්ගේ සහෝදරයාටවත් තමන්ගේ ආදරණීය බිරිඳටවත් ඉතුරු වෙලා ඉන්න තමන්ගේ දරුවන්ටවත් කිසිම අනුකම්පාවක් පෙන්නන්නේ නැහැ. 55 එයාලා තමන්ගේ දරුවන්ව මරාගෙන කද්දී පවුලේ අය එක්ක ඒක බෙදාගන්නෙවත් නැහැ. මොකද සතුරන් නගර වටලගෙන ඉන්න නිසාත් එයාලා ඇති කරන දුෂ්කරතා නිසාත් කෑමට ගන්න වෙන කිසිම දෙයක් ඉතුරු වෙන්නේ නැහැ.+ 56 කකුල්වල දූවිලි පොදක්වත් ගෑවුණේ නැති, හරිම සැපපහසු ජීවිතයක් ගත කරපු ගුණ යහපත් කාන්තාවන් පවා+ ඒ කාලේදී තමන්ගේ ආදරණීය පුරුෂයාටවත් දූදරුවන්ටවත් කිසිම අනුකම්පාවක් පෙන්නන්නේ නැහැ. 57 එයාලා පවුලේ අයටත් හොරෙන් තමන්ගේ අලුත උපන් දරුවන්ව කාලා දායි. ඒ විතරක් නෙමෙයි ප්‍රසූතියේදී පිට වෙන හැම දෙයක්මත් එයාලා කයි. මොකද සතුරන් නගර වටලගෙන ඉන්න නිසාත් එයාලා ඇති කරන දුෂ්කරතා නිසාත් කෑමට ගන්න වෙන කිසිම දෙයක් ඉතුරු වෙන්නේ නැහැ.

58 “ඔයාලා මේ ලියවිල්ලේ ලියලා තියෙන නීතියට ඇතුළත් හැම දෙයක්ම පිළිපැද්දේ නැත්නම්+ ගරුබිය ලබන්න වටින, ශ්‍රේෂ්ඨතම දෙවි+ වන යෙහෝවාගේ+ නමට ඔයාලා මුළු හදවතින්ම ගෞරව කළේ නැත්නම් 59 යෙහෝවා ඔයාලටයි, ඔයාලාගේ දරුවන්ටයි විපත්වලින් පහර දෙයි. හරිම දරුණු වසංගතවලිනුයි,+ ගොඩක් වේදනා විඳින්න වෙන රෝගවලිනුයි පහර දෙයි. ඒවා කවදාවත් සුව වෙන්නේ නැහැ. 60 ඊජිප්තුවරුන්ට හැදුණ, ඔයාලා හරිම බයෙන් හිටපු හැම රෝගයක්ම දෙවියන් ඔයාලා පිටට ගෙනෙයි. ඒවා කවදාවත් සුව වෙන්නේ නැහැ. 61 ඒවාට අමතරව මේ නීතියේ ලියලා නැති අනිත් හැම වසංගතයකින්ම සහ රෝගයකින්ම යෙහෝවා ඔයාලට පහර දෙයි. ඔයාලා නැත්තටම නැති වෙලා යන කල් ඔහු එහෙම කරයි. 62 ඔයාලා දැන් අහසේ තරු වගේ විශාල සෙනඟක් වුණත්+ ඔයාලාගේ දෙවි වන යෙහෝවාගේ හඬට සවන් දුන්නේ නැත්නම් ඔයාලාගෙන් ඉතුරු වෙන්නේ කීපදෙනෙක් විතරයි.+

63 “යෙහෝවා ඔයාලට සාර්ථක වෙන්නත් විශාල ජාතියක් වෙන්නත් කැමැත්තෙන්ම උදව් කළා වගේ ඔයාලව සම්පූර්ණයෙන්ම විනාශ කරලා දාන එකත් යෙහෝවා කැමැත්තෙන්ම කරයි. ඔයාලා උරුම කරගන්න යන දේශයෙන් ඔහු ඔයාලව උදුරලා දායි.

64 “යෙහෝවා පොළොවේ එක් කෙළවරක ඉඳන් අනිත් කෙළවර දක්වා ජීවත් වෙන ජාතීන් අතරට ඔයාලව විසුරුවාහරියි.+ එහෙදී ඔයාලට සිද්ධ වෙනවා ඔයාලවත් ඔයාලාගේ මුතුන්මිත්තන්වත් කවදාවත් දැනගෙන හිටියේ නැති, ලීවලින් සහ ගල්වලින් හදපු දෙවිවරුන්ට සේවය කරන්න.+ 65 ඒ ජාතීන් අතරේ ඉද්දී ඔයාලට සමාදානයෙන්, සැනසීමෙන් ඉන්න ලැබෙන්නේ නැහැ.+ නිවිහැනහිල්ලේ ජීවත් වෙන්න තැනක් ලැබෙන්නෙත් නැහැ. යෙහෝවා ඔයාලාගේ හිත්වලට ලොකු බරක් දැනෙන්න සලස්වයි.+ ඔයාලාගේ හිත්වල බයක් ඇති කරලා ඔයාලාගේ ඇස් මලානික වෙලා යන්න සලස්වයි.+ 66 ඔයාලාගේ ජීවිත ලොකු අනතුරක තියෙයි. රෑ දවල් දෙකේම ඔයාලට බයෙන් ජීවත් වෙන්න වෙයි. ඔයාලාගේ ජීවිත ගැන කිසිම විශ්වාසයක් තියාගන්න බැරි වෙයි. 67 ඔයාලාගේ හිතට දැනෙන බය නිසාත් ඔයාලා ඇස් දෙකෙන් දකින දේවල් නිසාත් උදේ වුණාම ඔයාලා කියයි ‘ඉක්මනින්ම හවස් වුණා නම් කොච්චර හොඳද’ කියලා. හවස් වුණාම ඔයාලා කියයි ‘ඉක්මනින් හෙට දවස ආවා නම් කොච්චර හොඳද’ කියලා. 68 ‘ඔයාලට ආයේ කවදාවත් ඊජිප්තු දේශයට යන්න වෙන්නේ නැහැ’ කියලා මම කිව්වත් යෙහෝවා ඔයාලව නැව්වල නග්ගලා ඊජිප්තුවට අරන් යනවා. එහෙදී ඔයාලට සිද්ධ වෙනවා දාස දාසීන් හැටියට ඔයාලවම විකුණගන්න. ඒත් කවුරුත් සල්ලිවලට ඔයාලව ගන්නේ නැහැ.”