දානියෙල්
2 නෙබුකද්නෙෂර් රජ පාලනය කරපු දෙවෙනි අවුරුද්දේ එයා හීන කීපයක්ම දැක්කා. ඒ හීන නිසා එයාගේ හිත කොච්චර කලබල වුණාද+ කියනවා නම් එයාට ආයේ නින්ද ගියෙත් නැහැ. 2 ඒ නිසා මන්තර ගුරුකම් කරන පූජකයන්ට, පේන කියන අයට, කට්ටඩියන්ට සහ කල්දිවරුන්ට* ඇවිත් ඒ හීන තේරුම් කරලා දෙන්න කියලා රජ නියෝග කළා. ඒ හැමෝම රජ ඉස්සරහට ආවා.+ 3 එතකොට රජ එයාලට මෙහෙම කිව්වා. “මම හීනයක් දැක්කා. ඒ හීනයේ තේරුම දැනගන්න කල් මගේ හිතට සැනසිල්ලක් නැහැ.” 4 කල්දිවරු ඇරමයික භාෂාවෙන්*+ රජට මෙහෙම කිව්වා. “රජතුමනි, ඔබ සදහටම ජීවත් වේවා! ඔබ දැක්ක හීනය අපිට කියන්න. එතකොට ඔබේ සේවකයන් වන අපි හීනයේ තේරුම පැහැදිලි කරලා දෙන්නම්.”
5 ඒත් රජ එයාලට මෙහෙම කිව්වා. “මේක තමයි මගේ අවසාන තීරණය. මම දැක්ක හීනයත් ඒකේ තේරුමත් මට කිව්වේ නැත්තං මං උඹලව කෑලි කෑලිවලට කපලා දානවා. උඹලාගේ ගෙවල් මම පොදු වැසිකිළි* කරනවා. 6 ඒත් හීනයයි, ඒකේ තේරුමයි මට කිව්වොත් මං උඹලට ගොඩක් තෑගිබෝග දීලා ගෞරවයට පත් කරනවා.+ ඉතින් දැන් මං දැක්ක හීනය විස්තර කරලා ඒකේ තේරුම මට කියන්න.”
7 එයාලා ආයෙත් රජට මෙහෙම කිව්වා. “රජතුමනි, ඔබ දැක්ක හීනය ඔබේ සේවකයන් වන අපිට කියන්න. එතකොට අපි ඒ හීනයේ තේරුම පැහැදිලි කරලා දෙන්නම්.”
8 එතකොට රජ මෙහෙම උත්තර දුන්නා. “උඹලා දන්නවා මං මගේ තීරණය වෙනස් කරන්නේ නැහැ කියලා. ඒ නිසා මොනවා හරි ගොතලා කියන්න කාලේ හොයාගන්නයි උඹලා ඔය හදන්නේ. 9 මං දැක්ක හීනය උඹලා මට කියන්නේ නැත්නම් උඹලා හැමෝටම හම්බ වෙන්නේ එකම දඬුවම. උඹලා කතා වෙලා ඉන්නේ බොරුවක් කියලා මාව රවට්ටන්න නේද? මං මගේ තීරණය වෙනස් කරයි කියලා හිතුවාද? දැන් හීනය මට විස්තර කරන්න. එතකොට ඒකේ තේරුම පැහැදිලි කරන්න උඹලට පුළුවන් කියලා මම පිළිගන්නවා.”
10 කල්දිවරු රජට මෙහෙම කිව්වා. “රජතුමනි, ඔබ ඉල්ලන මේ දේ කරන්න පුළුවන් කෙනෙක් මේ පොළොවේ කොහෙවත් නැහැ. කිසිම රජ කෙනෙක්වත් ආණ්ඩුකාරයෙක්වත් මන්තර ගුරුකම් කරන පූජකයන්ගෙන්, පේන කියන අයගෙන් සහ කල්දිවරුන්ගෙන් කවදාවත් මේ වගේ ඉල්ලීමක් නම් කරලා නැහැ. 11 රජතුමා ඉල්ලන්නේ හරිම අමාරු දෙයක්. ඔබ ඉල්ලන දේ මනුෂ්‍යයෙක්ට නම් කරන්න බැහැ. ඒක කරන්න පුළුවන් දෙවි කෙනෙක්ට විතරයි. එහෙම කෙනෙක් අපි අතරේ නැහැ.”
12 ඒක ඇහුවාම රජට හොඳටම කේන්ති ගියා. බැබිලෝනියේ ඉන්න උගත් හැම කෙනෙක්වම මරලා දාන්න කියලා රජ අණ කළා.+ 13 රජගේ නියෝගයට අනුව උගත් හැමෝවම මරලා දාන්න රජගේ සේවකයන් පිටත් වෙලා ගියා. එයාලා දානියෙල්ව සහ එයාගේ යාළුවන්වත් මරන්න හෙව්වා.
14 රජගේ ප්‍රධාන ආරක්ෂක නිලධාරියා වන අරියොක් බැබිලෝනියේ හිටපු උගත් අයව මරන්න පිටත් වෙලා යද්දී දානියෙල් එයාව හම්බ වෙලා හරිම ඥානවන්තව එයාට කතා කළා. 15 “රජතුමා මේ වගේ දරුණු නියෝගයක් දුන්නේ ඇයි” කියලා දානියෙල් රජගේ නිලධාරියා වන අරියොක්ගෙන් ඇහුවා. එතකොට එයා සිද්ධ වුණ හැම දෙයක්ම දානියෙල්ට පැහැදිලි කළා.+ 16 ඊටපස්සේ දානියෙල් රජ ළඟට ගිහිල්ලා හීනයේ තේරුම පැහැදිලි කරලා දෙන්න එයාට යම් කාලයක් දෙන්න කියලා රජගෙන් ඉල්ලුවා.
17 දානියෙල් ඊටපස්සේ ගෙදර ගියා. එයා එයාගේ යාළුවන් වුණ හනනියා, මිෂායෙල් සහ අෂරියාට වුණ දේවල් ගැන කිව්වා. 18 ඊටපස්සේ දානියෙල් එයාගේ යාළුවෝ තුන්දෙනාට කිව්වා එයාලට දයාව පෙන්නලා හීනයයි, ඒකේ තේරුමයි පැහැදිලි කරලා දෙන්න කියලා ස්වර්ගය පාලනය කරන දෙවියන්ගෙන් ඉල්ලන්න කියලා. මොකද බැබිලෝනියේ ඉන්න උගත් අය එක්ක එයාලවත් මරයි කියලා එයාලා දැනන් හිටියා.
19 දෙවියන් දර්ශනයක් මාර්ගයෙන් රාත්‍රියේදී දානියෙල්ට ඒ හීනය හෙළි කළා.+ දානියෙල් ස්වර්ගය පාලනය කරන දෙවියන්ට ප්‍රශංසා කළා. 20 දානියෙල් මෙහෙම කිව්වා.
“දෙවියන්ගේ නාමයට සදාකාලයෙන් සදාකාලයටම ප්‍රශංසාව ලැබේවා!
ප්‍රඥාවත් බලයත් ලබා දෙන්නේ ඔහුයි.+
21 ඔහු කාලයන් සහ තත්වයන් වෙනස් කරනවා.+
රජවරුන් පත් කරන්නෙත් එයාලව රජකමෙන් අයින් කරන්නෙත් ඔහුයි.+
නුවණැති අයට නුවණත් තේරුම්ගැනීමේ හැකියාව ඇති අයට දැනුමත් ලබා දෙන්නේ ඔහුයි.+
22 ඔහු ගැඹුරු කාරණා සහ රහස් හෙළි කරනවා.+
අඳුරේ සැඟවුණු දේවල් පවා ඔහුට පැහැදිලිව පේනවා.+
ආලෝකය තියෙන්නේ ඔහු ළඟයි.+
23 මගේ මුතුන්මිත්තන්ගේ දෙවියනි, මම ස්තුති ප්‍රශංසා කරන්නේ ඔබටයි.
මොකද ඔබ මට ප්‍රඥාවත් බලයත් ලබා දුන්නා.
අපි ඔබෙන් ඉල්ලපු දේ ඔබ මට හෙළි කළා.
රජගේ හීනයත් ඒකේ තේරුමත් ඔබ අපිට හෙළි කළා.”+
24 ඊටපස්සේ දානියෙල් අරියොක්ව හම්බ වෙන්න ගියා. බැබිලෝනියේ හිටපු උගත් අයව මරලා දාන්න රජ පත් කරලා හිටියේ එයාවයි.+ දානියෙල් එයාට මෙහෙම කිව්වා. “බැබිලෝනියේ ඉන්න උගත් අයගෙන් කිසිම කෙනෙක්ව මරන්න එපා. මාව රජ ළඟට එක්කගෙන යන්න. මං රජ්ජුරුවන්ගේ හීනයේ තේරුම පැහැදිලි කරලා දෙන්නම්.”
25 අරියොක් ඒ වෙලාවෙම දානියෙල්ව රජ ළඟට එක්කගෙන ගිහින් මෙහෙම කිව්වා. “රජතුමනි, යූදා දේශයෙන් ගෙනාපු අය අතරේ+ ඔබේ හීනයේ තේරුම පැහැදිලි කරලා දෙන්න පුළුවන් කෙනෙක් මට හම්බ වුණා.” 26 එතකොට රජ බෙල්ටෂසර්+ කියලා හඳුන්වපු දානියෙල්ගෙන් මෙහෙම ඇහුවා. “මං දැක්ක හීනයයි, ඒකේ තේරුමයි කියන්න ඇත්තටම ඔයාට පුළුවන්ද?”+ 27 දානියෙල් රජට මෙහෙම කිව්වා. “රජතුමනි, උගත් අයටවත් පේන කියන අයටවත් මන්තර ගුරුකම් කරන පූජකයන්ටවත් ජ්‍යෝතිශ්ශාස්ත්‍රඥයන්ටවත් ඔබේ හීනය* පැහැදිලි කරන්න බැහැ.+ 28 ඒත් රහස් හෙළි කරන්න පුළුවන් දෙවි කෙනෙක් ස්වර්ගයේ ඉන්නවා.+ අවසාන කාලයේදී වෙන්න යන දේවල් ඒ දෙවියන් ඔබට දන්වලා තියෙනවා. නෙබුකද්නෙෂර් රජතුමනි, ඔබ නිදාගෙන ඉද්දී හීනෙන් දැක්කේ මෙන්න මේ දේවලුයි.*
29 “රජතුමනි, ඔබ ඇඳට වෙලා ඉස්සරහට වෙන්න යන දේවල් ගැන කල්පනා කරන්න පටන්ගත්තා. එතකොට රහස් හෙළි කරන දෙවියන් ඒ දේවල් ගැන ඔබට දැනුම් දුන්නා. 30 මේ හීනය ගැන ඔහු මට හෙළි කළේ අනිත් අයට වඩා මං ප්‍රඥාවන්ත නිසා නෙමෙයි. හීනයේ තේරුමයි, ඔබ කල්පනා කරපු දේවලුයි ඔබට පැහැදිලි කරලා දෙන්නයි ඒක මට හෙළි කළේ.+
31 “රජතුමනි, ඔබ ලොකු රූපයක් හීනෙන් දැක්කා. ඒක දීප්තියෙන් බැබළුණු හරිම විශාල රූපයක්. ඔබ ඉස්සරහා තිබුණ ඒ රූපයට තිබුණේ භයානක පෙනුමක්. 32 රූපයේ හිස පිරිසිදු රත්තරන්වලින් හදලා තිබුණා.+ පපුවයි, අත් දෙකයි රිදීවලිනුත්+ බඩයි, කළවා හරියයි තඹවලිනුත්+ 33 කෙණ්ඩා යකඩවලිනුත් හදලා තිබුණා.+ කකුල්වල යට කොටස හැදිලා තිබුණේ යකඩ සහ මැටි* කලවමේ.+ 34 ඔබ රූපය දිහා බලාගෙන ඉද්දීම මනුස්සයෙක්ගේ අතකින් කැපුවේ නැති ගලක් එනවා ඔබ දැක්කා. ඒ ගල ඇවිත් යකඩවලිනුයි, මැටිවලිනුයි හැදිලා තිබුණ රූපයේ කකුල්වල යට කොටසේ වැදිලා ඒ කොටස කුඩු කරලාම දැම්මා.+ 35 ඒ වෙලාවෙම රූපයේ යකඩ, මැටි, තඹ, රිදී සහ රත්තරන් කොටස් ඔක්කොම කුඩු වෙලා ගියා. කමතෙන් ගහගෙන යන දහයියා වගේ ඒවා හුළඟට ගහගෙන ගියා. එතන රූපයක් තිබුණාද කියලවත් හොයාගන්න බැරි වුණා. ඒත් රූපයේ වැදුණු ගල ලොකු කන්දක් වුණා. ඒකෙන් මුළු පොළොවම වැහුණා.
36 “ඔබ දැක්ක හීනය ඒකයි. අපි දැන් හීනයේ තේරුම රජතුමාට කියන්නම්. 37 රජතුමනි, රජවරුන්ගෙත් රජ ඔබයි. ඔබට රාජ්‍යයකුත්+ බලයත් ගෞරවයත් ශක්තියත් දීලා තියෙන්නේ ස්වර්ගයේ දෙවියන්. 38 හැම ප්‍රදේශයකම ඉන්න මිනිස්සු වගේම සත්තුන්වත් කුරුල්ලන්වත් දෙවියන් ඔබට යටත් කරලා දීලා තියෙනවා. ඒ හැම දේකම පාලකයා විදිහට පත් කරලා තියෙන්නේ ඔබවයි.+ ඔබ තමයි ඒ රූපයේ රන් හිස.+
39 “ඔබේ රාජ්‍යයෙන් පස්සේ තවත් රාජ්‍යයක් එනවා.+ ඒක ඔබේ රාජ්‍යය තරම් උසස් වෙන්නේ නැහැ. ඊටපස්සේ තුන්වෙනි රාජ්‍යයකුත් එනවා. ඒ රාජ්‍යය මුළු පොළොවම පාලනය කරනවා.+ ඒක තමයි රූපයේ තඹ කොටස.
40 “හතරවෙනි රාජ්‍යය යකඩ වගේ ශක්තිමත්.+ යකඩයකින් ඕනෙම දෙයක් කුඩු කරලා දාන්න පුළුවන් වගේ ඒ රාජ්‍යයත් අනිත් හැම රාජ්‍යයක්ම පොඩි කරලා නැත්තටම නැති කරලා දානවා.+
41 “ඔබට මතක ඇති කකුල්වල යට කොටසයි, ඇඟිලියි හැදිලා තිබුණේ යකඩ සහ මැටි* කලවම් වෙලා කියලා. මේ රාජ්‍යයෙත් ඒ වගේ බෙදීමක් දකින්න තියෙයි. ඒත් මොළොක් මැටි එක්ක යකඩ කලවමේ තිබුණ නිසා ඒ රාජ්‍යයේ කොටසක් යකඩ වගේ දැඩි ස්වභාවයක් පෙන්නයි. 42 කකුලේ ඇඟිලිවල යකඩ එක්ක මැටි කලවම් වෙලා තිබුණ නිසා ඒ රාජ්‍යය එක පැත්තකින් දුර්වලයි. තවත් පැත්තකින් ශක්තිමත්ව තියෙයි. 43 ඒ වගේම යකඩ එක්ක මැටි කලවම් වෙලා තියෙන නිසා ඒ රාජ්‍යයට සාමාන්‍ය මිනිස්සුත් සම්බන්ධයි. ඒත් යකඩ එක්ක මැටි මිශ්‍ර වෙන්නේ නැහැ වගේ ඒ රාජ්‍යයේ කිසි සමඟියක් නැහැ.
44 “ඒ රජවරු පාලනය කරන කාලේ ස්වර්ගයේ දෙවියන් කවදාවත් විනාශ වෙන්නේ නැති+ රාජ්‍යයක් පිහිටුවනවා.+ ඒ රාජ්‍යය වෙනත් සෙනඟකට අයිති වෙන්නේ නැහැ.+ ඒ රාජ්‍යය මේ හැම රාජ්‍යයක්ම පොඩි කරලා නැති කරලාම දානවා.+ සදහටම තියෙන්නේ ඒ රාජ්‍යය විතරයි.+ 45 ඔබ දැක්ක විදිහටම අතකින් කැපුවේ නැති ගලක් කන්දෙන් ගැලවිලා ඇවිත් රූපයේ තිබුණ යකඩ, තඹ, මැටි, රිදී සහ රත්තරන් පොඩි කරලා දැම්මා+ වගේ ඒ රාජ්‍යයනුත් විනාශ වෙනවා. ශ්‍රේෂ්ඨ දෙවියන් අනාගතයේදී වෙන්න තියෙන දේවල් රජ්ජුරුවන්ට දැනුම් දීලා තියෙනවා.+ හීනෙන් දැක්ක දේවල් අනිවාර්යයෙන්ම ඉටු වෙයි. ඒකේ තේරුමත් නිවැරදියි.”
46 එතකොට නෙබුකද්නෙෂර් රජ දණින් වැටිලා, නැමිලා දානියෙල්ට ගෞරව කළා. දානියෙල්ට තෑග්ගක් දෙන්න කියලත් එයා වෙනුවෙන් සුවඳ ද්‍රව්‍ය ඔප්පු කරන්න කියලත් රජ අණ කළා. 47 රජ දානියෙල්ට මෙහෙමත් කිව්වා. “ඇත්තටම ඔයාගේ දෙවියන් තමයි දෙවිවරුන්ගෙත් දෙවියන්! ඔහු රජවරුන්ගෙත් ස්වාමියා! රහස් හෙළි කරන තැනැත්තාණන් ඔහුයි. ඔයාට මේ හීනය හෙළි කරන්න පුළුවන් වුණේ ඔහු නිසයි.”+ 48 රජ දානියෙල්ට උසස් තනතුරක් වගේම වටිනා තෑගිබෝගත් දුන්නා. බැබිලෝනිය පළාතේ පාලකයා විදිහට එයාව පත් කළා.+ බැබිලෝනියේ හිටපු උගත් හැමෝගෙම ප්‍රධානියා විදිහටත් දානියෙල්ව පත් කළා. 49 දානියෙල්ගේ ඉල්ලීමට අනුව රජ බැබිලෝනිය පළාතේ පරිපාලන වැඩ බලාගන්න ෂද්‍රක්, මේෂක් සහ අබෙද්නෙගෝව+ පත් කළා. දානියෙල් දිගටම රජමාලිගාවේ සේවය කළා.