එසකියෙල්
30 යෙහෝවා දෙවියන් ආයෙත් සැරයක් මට කතා කරලා මෙහෙම කිව්වා. 2 “මනුෂ්‍ය පුත්‍රය, මේ අනාවැකිය කියන්න. ‘ශ්‍රේෂ්ඨතම පාලකයාණන් වන යෙහෝවා කියන්නේ මෙහෙමයි.
“කෑගහලා අඬඅඬ ‘අනේ, ඒ දවස එනවා’ කියලා කියන්න.
3 මොකද ඒ දවස ළඟයි. යෙහෝවා නියම කරපු දවස අත ළඟයි.+
ඒක වලාකුළුවලින් බර වුණ දවසක්.+ ජාතීන්ට විනිශ්චය ලැබෙන දවසක්.+
4 ඊජිප්තුවට පහර දෙන්න කඩුවක් එනවා. ඊජිප්තුවේ සෙනඟ මැරිලා වැටෙද්දී ඉතියෝපියාව පුරාම භීතිය පැතිරෙයි.
ඊජිප්තුවේ වස්තුව පැහැරගනියි. අත්තිවාරමත් එක්කම ඒක විනාශ කරලා දායි.+
5 ඉතියෝපියාව,+ පූට්,+ ලුද් සහ විවිධ ජාතීනුත්
කුබ් සහ ගිවිසුමකින් බැඳිලා ඉන්න දේශයේ සෙනඟත්*
කඩුවෙන් මැරුම් කනවා.”’
6 යෙහෝවා කියන්නේ මෙහෙමයි.
‘ඊජිප්තුවට අතහිත දෙන හැමෝමත් වැටිලා යනවා.
ඊජිප්තුව ආඩම්බර විදිහට පතුරුවපු බලය බිඳලා දානවා.’+
“‘කඩුවෙන් පහර කන අය මිග්දෝල්+ ඉඳන් සෙයේනේ+ වෙන කල් වැටිලා ඉඳියි’ කියලා ශ්‍රේෂ්ඨතම පාලකයාණන් වන යෙහෝවා කියනවා. 7 ‘ඔවුන්ගේ දේශය, දේශයන් අතරින් පාළුවටම ගිය දේශය වෙනවා. ඒකේ නගර දරුණුම විදිහට විනාශ වුණ නගර වෙනවා.+ 8 මම ඊජිප්තුවට ගිනි තියලා ඊජිප්තුවත් එක්ක ගිවිසුම් ගහගත්ත හැමෝවමත් විනාශ කරනවා. එතකොට මම යෙහෝවා කියලා පිළිගන්න ඔවුන්ට සිද්ධ වෙනවා. 9 ඒ දවසේදී තමන් ගැනම ලොකු විශ්වාසයකින් ඉන්න ඉතියෝපියාවට මම පණිවිඩකරුවන්ව නැව්වලින් යවලා ඔවුන්ව බයෙන් වෙවුලන්න සලස්වනවා. ඊජිප්තුව පිටට විනාශය එන දවසේදී ඉතියෝපියාව හොඳටම කලබල වෙයි. මොකද ඒ දවස අනිවාර්යයෙන්ම එනවා.’
10 “ශ්‍රේෂ්ඨතම පාලකයාණන් වන යෙහෝවා මෙහෙම කියනවා. ‘මම බැබිලෝනියේ රජ වන නෙබුකද්නෙෂර්* අතින් ඊජිප්තුවේ ඉන්න සෙනඟව නැති කරලා දානවා.+ 11 ඔහුයි, ඔහුගේ හමුදාවයි ඇවිත් දේශය විනාශ කරලා දායි. ජාතීන් අතරේ ඉන්න දරුණුම සෙනඟක්+ වන ඔවුන් ඊජිප්තුවට කඩුවෙන් පහර දීලා දේශය මළ මිනීවලින් පුරවයි.+ 12 මම නයිල් ගඟේ ඇළ මාර්ග+ වේළිලා යන්න සලස්වනවා. ඊජිප්තු දේශය දුෂ්ට සෙනඟකට විකුණනවා. විදේශිකයන් ලවා දේශයයි, ඒකේ තියෙන හැම දේමයි විනාශ කරලා දානවා.+ ඒ දේ කිව්වේ යෙහෝවා වන මමයි.’
13 “ශ්‍රේෂ්ඨතම පාලකයාණන් වන යෙහෝවා කියන්නේ මෙහෙමයි. ‘මම නොෆ්වල* තියෙන පිළිකුල්සහගත රූප* විනාශ කරලා කිසි වැඩකට නැති දෙවිවරුන්ව නැත්තටම නැති කරලා දානවා.+ ඊජිප්තු දේශයෙන් ආයේ අධිපතියෙක් එන්නේ නැහැ. මම ඊජිප්තු දේශය පුරාම බය පතුරුවනවා.+ 14 මම පත්‍රොස් පාළු තැනක් කරනවා.+ ෂොවන් ගිනිබත් කරනවා. නෝවලට* විරුද්ධව දීපු තීන්දුව මං ඉටු කරනවා.+ 15 ඊජිප්තුවේ බලකොටුව වන සින්වලට විරුද්ධව ඇවිළිලා තියෙන මගේ කේන්තිය මං පිට කරනවා. නෝවල ඉන්න සෙනඟව විනාශ කරලා දානවා. 16 මම ඊජිප්තු දේශයේ ගින්නක් අවුළුවනවා. සින්වල ඉන්න අය බයෙන් වෙවුලයි. හමුදාවක් නෝවලට කඩා පනියි. මහ දවාලේ නොෆ්වලට* සතුරෝ පහර දෙයි. 17 ඕන්* සහ පිබෙසෙත්වල ඉන්න තරුණයන් කඩුවෙන් මැරුම් කයි. ඒ නගරවල ඉන්න සෙනඟව වහලුන් විදිහට අරන් යයි. 18 ඊජිප්තුවේ වියගහ මම තාහ්පනේස්වලදී කඩලා දාද්දී එහේ දවල් කාලය අඳුරු වෙලා යයි.+ ඇය* ආඩම්බර විදිහට පතුරුවපු බලය අවසන් වෙයි.+ ගන වලාකුළුවලින් ඇය වැහිලා යයි. ඇයට අයිති කුඩා නගරවල ඉන්න අයව වහලුන් විදිහට අරන් යයි.+ 19 මම ඊජිප්තුවට විරුද්ධව දුන්න තීන්දුව ඉටු කරනවා. මම යෙහෝවා කියලා පිළිගන්න ඔවුන්ට සිද්ධ වෙනවා.’”
20 11වෙනි අවුරුද්දේ පළවෙනි මාසයේ හත්වෙනිදා යෙහෝවාගෙන් මට මේ පණිවිඩය ලැබුණා. 21 “මනුෂ්‍ය පුත්‍රය, ඊජිප්තුවේ රජ වන පාරාවෝගේ අත මම කඩලා දැම්මා. වෙළුම් පටි ඔතලා ඒ අත සුව කරන්නේ නැහැ. කඩුවක් උස්සන්න පුළුවන් වෙන්න ඒ අත පටිවලින් බඳින්නෙත් නැහැ.”
22 “ශ්‍රේෂ්ඨතම පාලකයාණන් වන යෙහෝවා මෙහෙම කියනවා. ‘මම ඊජිප්තුවේ රජ වන පාරාවෝට විරුද්ධව ඉන්නවා.+ මම ඔහුගේ අත් කඩලා දානවා. ශක්තිමත් අත වගේම කැඩුණ අතත් මම කඩලා දානවා.+ ඔහුගේ අතේ තියෙන කඩුව මම වට්ටලා දානවා.+ 23 ඊටපස්සේ මම ඊජිප්තුවරුන්ව ජාතීන් අතරෙත් දේශයන් පුරාමත් විසුරුවාහරිනවා.+ 24 මම බැබිලෝනියේ රජගේ අත් ශක්තිමත් කරලා*+ මගේ කඩුව ඔහුගේ අතට දෙනවා.+ ඒත් මම පාරාවෝගේ අත් දෙකම කඩලා දානවා. එතකොට පාරාවෝ පණ අදින කෙනෙක් වගේ ඔහු ඉස්සරහා* වේදනාවෙන් කෑගහයි. 25 මම බැබිලෝනියේ රජගේ අත් ශක්තිමත් කරනවා. ඒත් පාරාවෝගේ අත් දෙක පණ නැතුව යනවා. මම මගේ කඩුව බැබිලෝනියේ රජගේ අතට දුන්නාම ඔහු ඊජිප්තු දේශයට ඒකෙන් පහර දෙයි.+ එතකොට මම යෙහෝවා කියලා පිළිගන්න ඔවුන්ට සිද්ධ වෙනවා. 26 මම ඊජිප්තුවරුන්ව ජාතීන් අතරෙත් දේශයන් පුරාමත් විසුරුවාහරිනවා.+ එතකොට මම යෙහෝවා කියලා පිළිගන්න ඔවුන්ට සිද්ධ වෙනවා.’”