විනිශ්චයකරුවෝ
17 එෆ්‍රායිම් කඳුකර ප්‍රදේශයේ+ මීකා කියලා මනුස්සයෙක් හිටියා. 2 දවසක් මීකා එයාගේ අම්මාට මෙහෙම කිව්වා. “මතකද, අම්මාගේ රිදී ෂෙකෙල් 1,100ක් නැති වුණා? අම්මා මටත් ඇහෙන්න ඒ ෂෙකෙල් ගත්ත කෙනාට ශාප කළේ, මතකද? අම්මේ, ඒවා ගත්තේ මමයි. මං ළඟ ඒවා තියෙනවා.” එතකොට අම්මා කිව්වා “පුතේ, ඔයා මට ඇත්ත කියපු නිසා ඔයාට යෙහෝවාගේ ආශීර්වාද ලැබෙන්න ඕනෙ” කියලා. 3 එයා ඒ රිදී ෂෙකෙල් 1,100 ආපහු එයාගේ අම්මාට දුන්නා. එතකොට එයාගේ අම්මා එයාට මෙහෙම කිව්වා. “මම මේ රිදී ෂෙකෙල් ටික යෙහෝවාට කැප කරනවා. මම කැමතියි ඔයා ඒක පාවිච්චි කරලා රූප දෙකක් හදාගන්නවාට.+ එතකොට ඒ රිදී ආපහු ඔයාටම ලැබෙනවා.”
4 මීකා රිදී ෂෙකෙල් ටික අම්මාට දුන්නාට පස්සේ එයාගේ අම්මා රිදී ෂෙකෙල් 200ක් අරගෙන රිදී වැඩ කරන කෙනෙක්ව හම්බ වෙන්න ගියා. රිදී වැඩ කරන කෙනා රූප දෙකක් හැදුවා.* ඊටපස්සේ ඒවා මීකාගේ ගෙදරට ගෙනිහින් තිබ්බා. 5 මීකාට දේවාලයක් තිබුණා. එයා ඒෆොද් ඇඳුමක්+ සහ ටෙරෆිම් රූප*+ හදාගෙන එයා වෙනුවෙන් පූජකයෙක් විදිහට සේවය කරන්න එයාගේ එක පුතෙක්ව පත් කළා.+ 6 ඒ කාලේ ඊශ්‍රායෙල් දේශයේ රජ කෙනෙක් හිටියේ නැහැ.+ හැමෝම තම තමන්ට හරියි කියලා හිතුණ දේ කළා.+
7 ඔය අතරේ යූදා පවුලෙන් එන* තරුණයෙක් යූදා ගෝත්‍රයට අයිති බෙත්ලෙහෙම්වල+ කාලයක් තිස්සේ ජීවත් වුණා. එයා ලෙවීවරයෙක්.+ 8 එයා යූදා ගෝත්‍රයට අයිති බෙත්ලෙහෙම්වලින් පිටත් වෙලා පදිංචි වෙන්න වෙන තැනක් හොයාගෙන ගියා. ඔහොම යද්දී එයා එෆ්‍රායිම් කඳුකර ප්‍රදේශයේ තිබුණ මීකාගේ ගෙදරට ආවා.+ 9 මීකා එයාගෙන් මෙහෙම ඇහුවා. “ඔයා එන්නේ කොහේ ඉඳන්ද?” එතකොට එයා මෙහෙම කිව්වා. “මං හිටියේ යූදා ගෝත්‍රයට අයිති බෙත්ලෙහෙම්වල. මං මේ පදිංචියට අලුත් තැනක් හොයාගෙන යන ගමන්. මං ලෙවීවරයෙක්.” 10 එතකොට මීකා එයාට මෙහෙම කිව්වා. “ඔයා කැමතිද මෙහේ නතර වෙන්න? එතකොට ඔයාට පුළුවන් මගේ උපදේශකයා* වෙන්න. පූජකයෙක් විදිහට මං වෙනුවෙන් සේවය කරන්න. මං ඔයාට ඒකට ගැළපෙන ඇඳුම් දෙන්නම්. ඔයාට කෑම බීමයි, අවුරුද්දකට රිදී ෂෙකෙල් දහයකුයි දෙන්නම්.” ඉතින් ලෙවීවරයා ගෙදර ඇතුළට ගියා. 11 එයා මීකා එක්ක නතර වෙන්න එකඟ වුණා. මීකා ඒ තරුණයාට තමන්ගෙම දරුවෙක්ට වගේ සැලකුවා. 12 මීකා ඒ ලෙවීවරයාව එයා වෙනුවෙන් පූජකයෙක් විදිහට සේවය කරන්න පත් කළා.+ එයා දිගටම මීකාගේ ගෙදර ජීවත් වුණා. 13 ඉතින් මීකා මෙහෙම කියාගත්තා. “ලෙවීවරයෙක් දැන් මං වෙනුවෙන් පූජකයෙක් විදිහට සේවය කරනවා. ඒ නිසා මට යෙහෝවාගේ පිහිට ලැබෙයි.”