විනිශ්චයකරුවෝ

4 ඒහුද් මැරුණාට පස්සේ ඊශ්‍රායෙල්වරු ආයෙත් යෙහෝවා දෙවියන් වැරදියි කියලා සලකන දේවල් කරන්න පටන්ගත්තා.+ 2 ඉතින් යෙහෝවා එයාලව හාෂොර්වල ඉඳන් පාලනය කරපු කානාන් දේශයේ රජ වුණ යාබින්ගේ අතට භාර දුන්නා.+ යාබින්ගේ හමුදාවේ ප්‍රධානියා හැටියට හිටියේ හාරොෂෙත්වල*+ ජීවත් වුණ සිසෙරා. 3 රෝදවලට යකඩ උල් හයි කරපු* යුධ රථ 900ක් යාබින්ගේ හමුදාවට තිබුණා.+ යාබින් අවුරුදු 20ක් ඊශ්‍රායෙල්වරුන්ට දරුණු විදිහට පීඩා කළා.+ ඉතින් ඊශ්‍රායෙල්වරු උදව් ඉල්ලලා යෙහෝවාට කන්නලව් කළා.+

4 ඒ කාලේදී ලප්පිදොත්ගේ බිරිඳ වුණ දෙබොරා තමයි ඊශ්‍රායෙල් දේශය විනිශ්චය කළේ. එයා අනාගතවක්තෘවරියක්.+ 5 එයා සාමාන්‍යයෙන් විනිශ්චය කළේ දෙබොරාගේ ගහ කියලා හඳුන්වපු තාල වර්ගයේ ගහක් යට ඉඳගෙන. ඒක තිබුණේ එෆ්‍රායිම් කඳුකරයේ රාමා+ සහ බෙතෙල්+ අතර. දෙවියන් ලබා දෙන තීන්දුවක් ගැන දැනගන්න ඕනෙ වුණාම ඊශ්‍රායෙල්වරු එයා ළඟට ගියා. 6 දෙබොරා කෙදෙෂ්නෆ්තලීවල+ හිටපු අබිනොවම්ගේ පුතා වුණ බාරාක්ට+ එන්න කියලා එයාට මෙහෙම කිව්වා. “ඊශ්‍රායෙල්වරුන්ගේ දෙවි වන යෙහෝවා ඔයාට මෙහෙම අණ කරලා තියෙනවා. ‘දැන් සටන් කරන්න ලෑස්ති වෙන්න. නෆ්තලී සහ සෙබ්‍යූලන් ගෝත්‍රවලින් මිනිස්සු 10,000කුත් එක්කගෙන තාබෝර් කන්දට යන්න. 7 මම යාබින්ගේ හමුදාවේ ප්‍රධානියා වන සිසෙරාවයි, එයාගේ යුධ රථයි, එයාගේ මුළු හමුදාවයි කීෂොන් දිය පාර+ ළඟට ගේනවා. එතනදී මම එයාව ඔයාගේ අතට අල්ලලා දෙනවා.’”+

8 එතකොට බාරාක් දෙබොරාට මෙහෙම කිව්වා. “ඔයාත් මං එක්ක එනවා නම් මං යනවා. ඒත් ඔයා එන්නේ නැත්නම් මං යන්නේ නැහැ.” 9 එතකොට දෙබොරා මෙහෙම කිව්වා. “මම අනිවාර්යයෙන්ම ඔයාත් එක්ක එනවා. හැබැයි ඔයා යන මේ සටනෙන් ඔයාට ගෞරවයක් ලැබෙන්නේ නැහැ. මොකද යෙහෝවා සිසෙරාව අහු කරලා දෙන්නේ ගෑනු කෙනෙක්ගේ අතට.”+ ඊටපස්සේ දෙබොරා බාරාක් එක්ක කෙදෙෂ්වලට+ ගියා. 10 කෙදෙෂ්වලට එන්න කියලා සෙබ්‍යූලන් සහ නෆ්තලී+ ගෝත්‍රවල පුරුෂයන්ට බාරාක් කිව්වා. එයා කියපු දේ අහලා මිනිස්සු 10,000ක් එතනට ආවා. දෙබොරාත් එයාත් එක්ක ගියා.

11 කේනිවරයෙක්+ වුණ හෙබෙර් කෙදෙෂ් කිට්ටුව තිබුණ ෂයනන්නිම්වල ලොකු ගහක් ළඟ එයාගේ කූඩාරම ගහගෙන හිටියා. එයා ජීවත් වුණේ අනිත් කේනිවරුන්ගෙන් වෙන් වෙලයි. කේනිවරු පැවතෙන්නේ මෝසෙස්ගේ මාමණ්ඩි+ වුණ හොබාබ්ගෙන්.

12 අබිනොවම්ගේ පුතා බාරාක්, තාබෝර්+ කන්දට ගිහින් කියලා සිසෙරාට ආරංචි වුණා. 13 සිසෙරාට ඒක ආරංචි වුණ ගමන්ම එයා රෝදවලට යකඩ උල් හයි කරපු යුධ රථ 900යි, එයාගේ මුළු හමුදාවයි රැස් කරගත්තා. ඊටපස්සේ එයා හාරොෂෙත්වලින් පිටත් වෙලා කීෂොන් දිය පාර+ ළඟට යන්න ලෑස්ති වුණා. 14 දෙබොරා බාරාක්ට මෙහෙම කිව්වා. “දැන් ලෑස්ති වෙන්න! යෙහෝවා අද සිසෙරාව ඔයාගේ අතටම අල්ලලා දෙනවා. ඔයාට ඉස්සරහින් යෙහෝවා අනිවාර්යයෙන්ම යනවා.” ඊටපස්සේ බාරාක් තාබෝර් කන්දෙන් බැහැලා ආවා. එයාත් එක්ක හිටපු මිනිස්සු 10,000ත් එයාගේ පස්සෙන් ආවා. 15 ඒ වෙලාවේ යෙහෝවා සිසෙරාවයි, එයාගේ යුධ රථවල හිටපු අයවයි, එයාගේ මුළු හමුදාවයි වියවුල් කළා.+ ඉතින් බාරාක් එයාගේ හමුදාවත් එක්ක එයාලට කඩුවෙන් පහර දුන්නා. අන්තිමේදී සිසෙරා එයාගේ යුධ රථයෙන් බැහැලා පයින් දුවගෙන ගියා. 16 බාරාක් යුධ රථ සහ හමුදාව පස්සේ හාරොෂෙත් වෙන කල් එළවගෙන ගියා. සිසෙරාගේ මුළු හමුදාවම කඩුවෙන් මැරුම් කෑවා. එයාලාගෙන් එක් කෙනෙක්වත් ඉතුරු වුණේ නැහැ.+

17 පලා ගිය සිසෙරා කේනිවරයෙක් වුණ හෙබෙර්ගේ+ බිරිඳ යායෙල්ගේ+ කූඩාරම තිබුණ තැනට ආවා. මොකද හාෂොර්වල රජ වුණ යාබින්+ සහ කේනිවරයෙක් වුණ හෙබෙර්ගේ පවුලේ අය අතරේ හතුරුකමක් තිබුණේ නැහැ. 18 යායෙල් කූඩාරමෙන් එළියට ඇවිල්ලා සිසෙරාට මෙහෙම කිව්වා. “මගේ ස්වාමීනි, එන්න ඇතුළට. බය වෙන්න එපා.” ඉතින් සිසෙරා කූඩාරම ඇතුළට ගියා. ඊටපස්සේ යායෙල් ගන රෙද්දක් අරගෙන එයාව පෙරෙව්වා. 19 එතකොට සිසෙරා මෙහෙම කිව්වා. “මට හරි තිබහයි. වතුර ටිකක් දෙන්න පුළුවන්ද?” ඉතින් යායෙල් කිරි පුරවලා තිබුණ හම් භාජනයකින් එයාට කිරි ටිකක් දුන්නා.+ ඊටපස්සේ එයාව ආයෙත් රෙද්දෙන් පෙරෙව්වා. 20 සිසෙරා එයාට මෙහෙමත් කිව්වා. “කූඩාරමට ඇතුල් වෙන තැනට වෙලා ඉන්න. කවුරු හරි ඇවිත් ඇහුවොත්, ‘මෙහෙට කවුරු හරි ආවාද’ කියලා ‘නෑ’ කියලා කියන්න.”

21 ඊටපස්සේ හෙබෙර්ගේ බිරිඳ වුණ යායෙල් කූඩාරමට ගහන කූඤ්ඤයක් සහ මිටියක් අරගෙන සිසෙරා ළඟට හෙමිහිට ගියා. හොඳටම හෙම්බත් වෙලා නිදාගෙන හිටපු සිසෙරාගේ නළලට එයා කූඤ්ඤය තියලා පොළොව හිල් කරගෙන යන්න ඒකට මිටියෙන් ගැහුවා. ඉතින් සිසෙරා මැරුණා.+

22 සිසෙරා පස්සේ එළවගෙන ආපු බාරාක් එතනට ආවා. එතකොට යායෙල් කූඩාරමෙන් එළියට ඇවිත් මෙහෙම කිව්වා. “ඔයා හොයන කෙනා මෙහේ ඉන්නවා. ඇවිල්ලා බලන්න.” එයාත් එක්ක ඇතුළට ගියාම බාරාක් දැක්කා ඔළුවට කූඤ්ඤයක් ගහලා මරලා දාලා හිටිය සිසෙරාව.

23 දෙවියන් ඒ දවසේදී කානාන් දේශයේ රජ වුණ යාබින්ව ඊශ්‍රායෙල්වරුන්ට යටත් කරලා දුන්නා.+ 24 ඊශ්‍රායෙල්වරු කානාන්+ දේශයේ රජ වුණ යාබින්ට+ තව තවත් පහර දුන්නා. අන්තිමේදී එයාලා යාබින්ව මරලා දැම්මා.