යේසුස්ගේ නියෝජිතයන්ගේ ක්‍රියා
24 දවස් පහකට පස්සේ උත්තම පූජක අනනියස්+ වැඩිමහල්ලෝ කීපදෙනෙකුයි, ටෙර්ටුලස් කියන නීතිඥයායි* එක්ක ඇවිත් පාවුල්ට විරුද්ධව ආණ්ඩුකාරයා ඉස්සරහා චෝදනා ඉදිරිපත් කළා.+ 2 ටෙර්ටුලස්ව කැඳෙව්වාම එයා පාවුල්ට මෙහෙම චෝදනා කරන්න පටන්ගත්තා.
“අතිගරු ෆීලික්ස් ආණ්ඩුකාරතුමනි, ඔබතුමාගේ පාලනය යටතේ අපි ලොකු සාමයක් අද්දකිනවා. ඒ වගේම ඔබේ දුර දක්නා නුවණ නිසා මේ දේශයේ හුඟක් ප්‍රතිසංස්කරණ වැඩ සිද්ධ වෙනවා කියලත් අපිට පේනවා. 3 අතිගරු ආණ්ඩුකාරතුමනි, අපි කොහේ හිටියත් හැමදාමත් හද පිරි අගයකින් ඒ දේ පිළිගන්නවා. 4 ඒත් ඔබේ වටිනා කාලය තවත් නාස්ති කරන්න මං කැමති නැහැ. ඒ නිසා මම බැගෑපත්ව ඔබෙන් ඉල්ලන්නේ ටික වෙලාවක් ඉවසිල්ලෙන් අපිට ඇහුම්කන් දෙන්න කියලයි. 5 මොකද මේ මිනිහා මහ කරදරකාරයෙක්!*+ එයා ලෝකේ පුරාම ඉන්න යුදෙව්වරුන්ව අවුස්සලා කැරලිගහන්න එයාලව පොලඹවනවා.+ එයා නාසරෙත්වලින් බිහි වුණ නිකායේ ප්‍රධාන නායකයෙක්.+ 6 එයා දේවමාලිගාව අපවිත්‍ර කරන්නත් හැදුවා. ඒකයි අපි එයාව අත්අඩංගුවට ගත්තේ.+ 7* —— 8 අපි එයාට විරුද්ධව එල්ල කරන චෝදනා ඇත්තයි කියලා එයාගෙන් ප්‍රශ්න කරද්දී ඔබතුමන්ටත් දැනගන්න පුළුවන් වෙයි.”
9 එයා එහෙම කිව්වාට පස්සේ එතන හිටපු අනිත් යුදෙව්වරුත් ඒ චෝදනා ඇත්තයි කියකිය පාවුල්ට විරුද්ධව කතා කරන්න පටන්ගත්තා. 10 ආණ්ඩුකාරයා පාවුල් දිහා බලලා එයාට කතා කරන්න කියලා ඔළුවෙන් සංඥා කළාම පාවුල් මෙහෙම උත්තර දුන්නා.
“ඔබතුමන් මේ දේශයේ අවුරුදු ගාණක් තිස්සේ විනිශ්චය කරලා තියෙනවා. ඒ නිසා ලොකු විශ්වාසයකින් මගේ පැත්තෙන් තොරතුරු ඉදිරිපත් කරන්න මට පුළුවන්.+ 11 මම නමස්කාර කරන්න යෙරුසලමට ආවේ දවස් 12කට කලින්. ඒක ඇත්ත කියලා ඔබතුමාටම තොරතුරු හොයලා දැනගන්න පුළුවන්.+ 12 මේ අය මාව දේවමාලිගාවේ දැක්ක වෙලාවේ මම කිසි කෙනෙක් එක්ක වාද කරකර හිටියේ නැහැ. මං නුවරේ හරි සිනගෝගවල හරි ඉන්න සෙනඟව උසිගැන්නුවෙත් නැහැ. 13 ඒ විතරක් නෙමෙයි එයාලා මට විරුද්ධව එල්ල කරන චෝදනා ඔප්පු කරන්නත් එයාලට බැහැ. 14 ඒත් මම එක දෙයක් පිළිගන්නවා. ඒ තමයි එයාලා ‘නිකායක්’ විදිහට හඳුන්වන කණ්ඩායමේ මම සාමාජිකයෙක් කියන එක. මං ඒකේ ඉගැන්වීම්වලට අනුව ජීවත් වෙලා මගේ මුතුන්මිත්තන්ගේ දෙවියන්ට පරිශුද්ධ සේවයක් කරනවා.+ අපේ නීතියේ තියෙන සහ අනාගතවක්තෘවරුන් ලියලා තියෙන හැම දෙයක්ම විශ්වාස කරන නිසයි මම එහෙම කරන්නේ.+ 15 ඒ වගේම මට බලාපොරොත්තුවක් තියෙනවා. ඒ තමයි දෙවියන් ධර්මිෂ්ඨ අයව වගේම අධර්මිෂ්ඨ අයවත්+ මරණයෙන් නැවත නැඟිට්ටවනවා+ කියන එක. මට විතරක් නෙමෙයි මෙතන ඉන්න අයටත් ඒ බලාපොරොත්තුවම තියෙනවා. 16 ඒ බලාපොරොත්තුව නිසා මං නිතරම උත්සාහ කරන්නේ කිසි වරදක් නොකර දෙවියන් ඉස්සරහත් මිනිස්සු ඉස්සරහත් නිදොස් හෘද සාක්ෂියක් ඇතුව ඉන්න.+ 17 අවුරුදු ගාණකට පස්සේ මගේ ජාතියේ අයට සහනාධාර+ දෙන්නත් දෙවියන්ට පූජා ඔප්පු කරන්නත් මම නුවරට ආවා. 18 දේවමාලිගාවේදී මං ඒ වගකීම් ඉටු කරන අතරේ තමයි මේ අය මාව හොයාගත්තේ. ඒ වෙලාවේ මම නීතියට අනුව පවිත්‍ර වෙලයි හිටියේ.+ අනික මම හිටියේ සෙනඟක් එක්ක නෙමෙයි. මම කලබලයක් ඇති කළෙත් නැහැ. හැබැයි එතන ආසියා පළාතෙන් ආපු යුදෙව්වන් පිරිසක් හිටියා. 19 ඇත්තටම එයාලත් ඔබතුමන් ඉස්සරහට ආවා නම් හොඳයි. එතකොට එයාලට පුළුවන් මට විරුද්ධව චෝදනාවක් තියෙනවා නම් ඒ ගැන ඔබට කියන්න.+ 20 එහෙම නැත්නම් මන්ත්‍රණ සභාව මාව විනිශ්චය කරපු වෙලාවේදී මාව වරදකරුවෙක් කියලා ඔප්පු වුණාද කියලා මෙතන ඉන්න අයගෙන්ම අහන්න පුළුවන්. 21 මම එයාලා අතරේ ඉද්දී ‘අද මාව විනිශ්චය කරන්නේ මං නැවත නැඟිටීම ගැන විශ්වාස කරන නිසයි’ කියලා කෑගහලා කිව්වා.+ එයාලට මට විරුද්ධව කියන්න පුළුවන් එකම දේ ඒක විතරයි”
22 ඒත් ‘ස්වාමීන්ගේ මාර්ගය’+ ගැන හොඳ අවබෝධයක් තිබුණ ෆීලික්ස් නඩුව කල් දාලා “හමුදාපති ලිසියස් ආවාම මේ කාරණය ගැන මම තීන්දුවක් දෙන්නම්” කියලා කිව්වා. 23 ඒ වගේම පාවුල්ව හිරේට දැම්මත් එයාට තරමක නිදහසක් දෙන්න කියලත් එයාගේ යාළුවන්ට ඇවිත් එයාට උදව් කරන්න ඉඩ දෙන්න කියලත් ෆීලික්ස් හමුදා නිලධාරියාට අණ කළා.
24 ටික දවසකට පස්සේ ෆීලික්ස් එයාගේ බිරිඳ වුණ දෘසිලා එක්ක ආවා. එයා යුදෙව් ජාතික කාන්තාවක්. ෆීලික්ස් පාවුල්ට එන්න කියලා ක්‍රිස්තුස් යේසුස් ගැන විශ්වාසයක් ඇති කරගන්න නම් කෙනෙක් කරන්න ඕනෙ මොනවාද කියන එක ගැන පාවුල් කියපු දේවල්වලට ඇහුම්කන් දුන්නා.+ 25 ඒත් පාවුල් එයාලා එක්ක ධර්මිෂ්ඨකම, තමන්ව පාලනය කරගන්න එක සහ ඉස්සරහට එන විනිශ්චය ගැන කතා කරද්දී+ ෆීලික්ස් බය වුණා. ඒ නිසා එයා පාවුල්ට මෙහෙම කිව්වා. “දැන් ඔයා යන්න. මට ආයෙත් අවස්ථාවක් හම්බ වුණාම ඔයාට එන්න කියලා මම දන්වන්නම්.” 26 පාවුල් එයාට යම් මුදලක් දෙයි කියලා ෆීලික්ස් බලාපොරොත්තු වුණා. ඒ නිසා එයා නිතර නිතර පාවුල්ව ගෙන්නගෙන එයා එක්ක කතා කරකර හිටියා. 27 අවුරුදු දෙකක් ගත වුණාට පස්සේ ෆීලික්ස්ගේ තනතුරට පෝර්ෂස් ෆෙස්ටස් පත් වුණා. ඒ වෙනකොටත් පාවුල් හිටියේ හිරේ. මොකද යුදෙව්වරුන්ව සතුටු කරන්න ඕනෙ නිසා+ ෆීලික්ස් පාවුල්ව හිරේම තියාගත්තා.