දෙවෙනි සාමුවෙල්

1 දාවිත් අමලෙක්වරුන්ව පරද්දලා ආපහු ෂික්ලග්වලට ආවා. ඒ වෙද්දී සාවුල් ජීවතුන් අතර හිටියේ නැහැ. දාවිත් දවස් දෙකක් ෂික්ලග්වල+ නැවතිලා හිටියා. 2 තුන්වෙනි දවසේදී සාවුල්ගේ කඳවුරේ ඉඳන් මිනිසෙක් ඇඳුම් ඉරාගෙන, ඔළුවට දූවිලි දාගෙන දාවිත් ළඟට දුවගෙන ආවා. එයා දාවිත් ඉස්සරහා දණින් වැටිලා ඔළුව බිමටම පහත් කළා.

3 දාවිත් ඒ මිනිසාගෙන් ඇහුවා “ඔයා කොහේ ඉඳන්ද ආවේ” කියලා. “මං ඊශ්‍රායෙල්වරුන්ගේ කඳවුරෙන් බේරිලයි මෙතනට ආවේ” කියලා ඒ කෙනා කිව්වා. 4 එතකොට දාවිත් ඇහුවා “ඇයි, එහේ මොනවාද වුණේ” කියලා. ඒ මිනිසා මෙහෙම කිව්වා. “ඊශ්‍රායෙල් හමුදාව යුද පිටියෙන් පලා ගියා. හුඟදෙනෙක් මැරුණා. සාවුල් රජත් ඔහුගේ පුතා යොනාතානුත් මැරුණා.”+ 5 දාවිත් ඒ තරුණයාගෙන් මෙහෙම ඇහුවා. “සාවුල් රජයි, යොනාතානුයි මැරුණා කියලා ඔයා කොහොමද දන්නේ?” 6 තරුණයා මෙහෙම කිව්වා. “මං අහම්බෙන් වගේ ගිල්බෝවා කන්දට+ ආවා. එතකොට මං දැක්කා සාවුල් රජ හෙල්ලයත් අල්ලගෙන අමාරුවෙන් ඉන්නවා. ඔහුව අල්ලගන්න ආපු අශ්ව රථයි, අසරුවනුයි ඒ කිට්ටුවටම ඇවිත් හිටියා.+ 7 සාවුල් රජ පිටිපස්ස හැරිලා බලද්දී මාව දැකලා මට අඬගැහුවා. මං ‘ඇයි මගේ ස්වාමීනි’ කියලා කිව්වාම 8 ඔහු මගෙන් ඇහුවා ‘ඔයා කවුද’ කියලා. මම ඔහුට කිව්වා ‘මං අමලෙක් ජාතිකයෙක්’+ කියලා. 9 ඒ වෙලාවේ ඔහු මට මෙහෙම කිව්වා. ‘මගේ ළඟට ඇවිත් මාව මරලා දාන්න. මට තාම පණ තිබුණත් මට කිසිම දෙයක් කරගන්න බැහැ. මං ඉන්නේ ලොකු වේදනාවකින්.’ 10 ඔහු දරුණු විදිහට තුවාල වෙලයි හිටියේ. ඉතින් මට තේරුණා ඔහු ජීවත් වෙන එකක් නැහැ කියලා. ඒ නිසා මං ගිහින් ඔහුව මරලා දැම්මා.+ ඊටපස්සේ රජගේ ඔටුන්නයි, අතේ තිබුණ වළල්ලයි ගලවගෙන ඔබට දෙන්න ඒවා අරන් ආවා.”

11 ඒක ඇහුවාම දාවිත් සහ එයාත් එක්ක හිටපු හැමෝම එයාලාගේ ඇඳුම් ඉරාගත්තා. 12 එයාලට ලොකු දුකක් දැනුණා. ඒ නිසා හවස් වෙන කල්ම එයාලා කන්නේ බොන්නේ නැතුව හොඳටම ඇඬුවා.+ මොකද එදා සාවුල් සහ එයාගේ පුතා යොනාතාන් වගේම යෙහෝවාගේ සෙනඟ අතරෙනුත් ඊශ්‍රායෙල්වරු අතරෙනුත්+ හුඟදෙනෙක් කඩුවෙන් මැරුම් කාලා තිබුණා.

13 ඒ ආරංචිය ගෙනාපු තරුණයාගෙන් දාවිත් මෙහෙම ඇහුවා. “ඔයා කාගේ කවුද?” තරුණයා කිව්වා “මගේ තාත්තා විදේශිකයෙක්. එයා අමලෙක් ජාතිකයෙක්” කියලා. 14 ඒ වෙලාවේ දාවිත් “යෙහෝවා දෙවියන්ගේ අභිෂේක ලත් රජව ඔයා මරලා දැම්මේ ඇයි? කිසිම බයක් නැතුව ඒ වගේ දෙයක් කරන්න ඔයාට හයියක් ආවේ කොහෙන්ද”+ කියලා එයාගෙන් ඇහුවා. 15 ඊටපස්සේ දාවිත් ඒ ළඟ හිටපු තරුණයෙක්ට කිව්වා “මේ මිනිහාව මරලා දාන්න” කියලා. ඒ තරුණයා ඒ කෙනාව මරලා දැම්මා.+ 16 දාවිත් ඒ වෙලාවේ මෙහෙම කිව්වා. “ඔයාගේ මරණයට වග කියන්න ඕනෙ ඔයාමයි. මොකද ‘යෙහෝවාගේ අභිෂේක ලත් රජව මැරුවේ මමයි’+ කියලා ඔයා ඔයාටම විරුද්ධව සාක්ෂි දුන්නා.”

17 පස්සේ, සාවුල් සහ එයාගේ පුතා යොනාතාන් වෙනුවෙන්+ දාවිත් ශෝක ගීයක් ගායනා කළා. 18 “දුන්න” විදිහට හඳුන්වපු ඒ ගීය යූදා සෙනඟට උගන්වන්න කියලා දාවිත් නියම කළා. ඒ ගීය යාෂාර් කියන ලියවිල්ලේ+ සටහන් කරලා තියෙනවා.

19 “අනේ ඊශ්‍රායෙල්, ඔබේ තේජස කඳු මුදුනේදී පහ වෙලා ගියා.+

ඔබේ බලවතුන් වැටී ගිය හැටි බලන්න!

රාජාලීන්ටත් වඩා වේගයෙන්+ ගමන් කරපු ඒ දෙන්නා සිංහයන්ටත් වඩා බලවත් වුණා.+

25 අනේ, බලවන්තයන් යුද පිටියේ වැටිලා ගිය හැටි බලන්න!

යොනාතාන් කඳු මුදුනේ මැරුම් කෑවා.+

ඔබ මට පෙන්නපු ආදරේ මොන තරම්ද! ඒක ස්ත්‍රීන්ගෙන් ලැබුණ ආදරේටත් වඩා හුඟක් වටිනවා!+

2 දාවිත් යෙහෝවාගෙන් ඇහුවා+ “දැන් මම යූදා ගෝත්‍රයේ නගරෙකට යන්නද” කියලා. යෙහෝවා, “යන්න” කියලා එයාට කිව්වා. එතකොට දාවිත් ඇහුවා “මං යන්න ඕනෙ කොයි නගරෙටද” කියලා. දෙවියන්, “හෙබ්‍රොන්වලට+ යන්න” කියලා කිව්වා. 2 දාවිත් එයාගේ භාර්යාවන් දෙන්නා වන යෙෂ්‍රෙයෙල්වල අහිනොවම්වත්+ කර්මෙල්වල නාබල්ගේ භාර්යාව වෙලා හිටපු අබිගායිල්වත්+ හෙබ්‍රොන්වලට එක්කගෙන ගියා. 3 දාවිත් එක්ක හිටපු පුරුෂයොත්+ එයාලාගේ පවුල්වල අය එක්ක හෙබ්‍රොන්වල සහ ඒ අවට තිබුණ නගරවල පදිංචි වුණා. 4 යූදා ගෝත්‍රයේ පුරුෂයන් එහෙට ඇවිත් දාවිත්ව යූදාවල+ රජ විදිහට අභිෂේක කළා.

එයාලා දාවිත්ට කිව්වා “සාවුල්ව තැන්පත් කළේ යාබෙෂ්ගිලියද්වල අය” කියලා. 5 ඉතින් දාවිත් යාබෙෂ්ගිලියද්වලට පණිවිඩකරුවන් යවලා එයාලට මෙහෙම දැන්නුවා. “ඔයාලා ඔයාලාගේ ස්වාමියා වුණ සාවුල්ව තැන්පත් කළා කියලා මට ආරංචි වුණා.+ ඔයාලා සාවුල්ට පෙන්නපු ආදරේ* නිසා යෙහෝවා දෙවියන්ගෙන් ඔයාලට ආශීර්වාද ලැබෙන්න ඕනේ! 6 ඔයාලා කරපු ඒ යහපත් ක්‍රියාව නිසා යෙහෝවාත් ඔයාලව අත්හරින්නේ නැතුව හැමදාමත් ඔයාලට ආදරෙන්* සලකන්න ඕනේ! මමත් ඔයාලට ඒ විදිහටම සලකනවා.+ 7 ඔයාලාගේ ස්වාමියා වන සාවුල් දැන් ජීවතුන් අතර නැහැ තමයි. ඒත් යූදා ගෝත්‍රයේ අය මාව එයාලාගේ රජ විදිහට අභිෂේක කරලයි තියෙන්නේ. ඒ නිසා දැන් හිතට ධෛර්යය අරන් ශක්තිමත්ව ඉන්න.”

8 ඒත් සාවුල්ගේ හමුදාපති වෙලා හිටිය නේර්ගේ පුතා අබ්නේර්,+ සාවුල්ගේ පුතා වුණ ඉෂ්බෝෂෙත්ව+ මහනායිම්+ නුවරට එක්කන් ආවා. 9 එහෙදී එයා ඉෂ්බෝෂෙත්ව මුළු ඊශ්‍රායෙල් දේශයේම රජ විදිහට පත් කරලා එයාට ගිලියද්+ දේශය, යෙෂ්‍රෙයෙල්,+ එෆ්‍රායිම්+ වගේම බෙන්ජමින් ගෝත්‍රයට අයිති ප්‍රදේශයත් අෂූර්වරුන්වත් යටත් කරලා දුන්නා. 10 සාවුල්ගේ පුතා වුණ ඉෂ්බෝෂෙත්ට ඊශ්‍රායෙල් දේශයේ රජකම භාර දෙද්දී එයාට වයස අවුරුදු 40යි. එයා අවුරුදු දෙකක් රජකම් කළා. ඒත් යූදා ගෝත්‍රයේ අය යටත් වෙලා හිටියේ දාවිත්ට.+ 11 දාවිත් යූදා ගෝත්‍රයේ රජ විදිහට අවුරුදු හතහමාරක් රජකම් කළා.+ එයා පාලනය කළේ හෙබ්‍රොන්වල ඉඳන්.

12 ටික කාලෙකට පස්සේ නේර්ගේ පුතා වුණ අබ්නේර් සහ සාවුල්ගේ පුතා වුණ ඉෂ්බෝෂෙත්ගේ සේවකයන් මහනායිම්+ ඉඳන් ගිබියොන්+ නගරයට ගියා. 13 ෂෙරුයියාගේ+ පුතා වුණ යෝවාබ්+ සහ දාවිත්ගේ සේවකයනුත් එහෙට ගියා. ගිබියොන්වල තිබුණ පොකුණ ළඟදී එයාලට අබ්නේර්ගේ කණ්ඩායමේ අයව හම්බ වුණා. කණ්ඩායම් දෙක වෙන වෙනම පොකුණ දෙපැත්තේ ඉඳගත්තා. 14 ටික වෙලාවකට පස්සේ අබ්නේර් යෝවාබ්ට මෙහෙම කිව්වා. “අපි තරුණයන්ට කියමු අපි ඉස්සරහා සටන් කරන්න කියලා.” එතකොට යෝවාබ් තරුණයන්ට කිව්වා “නැඟිටලා සටන් කරන්න” කියලා. 15 සාවුල්ගේ පුතා වුණ ඉෂ්බෝෂෙත් වෙනුවෙන් සහ බෙන්ජමින්වරු වෙනුවෙන් 12දෙනෙකුයි, දාවිත් වෙනුවෙන් එයාගේ සේවකයෝ 12දෙනෙකුයි නැඟිටලා සටන් කරන්න ලෑස්ති වුණා. 16 එයාලා එක් එක් කෙනා තම තමන්ගේ සතුරන්ගේ කොණ්ඩෙන් ඇදලා එයාලට කඩුවෙන් ඇන්නා. ඒ හැමෝම මැරුණා. ගිබියොන්වල තියෙන ඒ තැනට හෙල්කත්හෂ්ෂූරිම් කියන නම තිබ්බේ ඒ නිසයි.

17 එදා ඒ දෙපිරිස අතරේ හුඟක් දරුණු සටනක් ඇති වුණා. අන්තිමේදී දාවිත්ගේ සේවකයෝ අබ්නේර්වයි, ඊශ්‍රායෙල් පුරුෂයන්වයි පරාජය කළා. 18 ෂෙරුයියාගේ+ පුතාලා වුණ යෝවාබ්,+ අබිෂයි+ සහ අසහෙල්+ එතන හිටියා. අසහෙල්ට මුවෙක්* වගේ වේගයෙන් දුවන්න පුළුවන්කම තිබුණා. 19 එදා එයා අබ්නේර් පස්සේ පන්නගෙන ගියා. එයා දකුණටවත් වමටවත් හැරෙන්නේ නැතුව දිගටම අබ්නේර් පස්සේ එළවගෙන ගියා. 20 ටික වෙලාවකට පස්සේ අබ්නේර් පිටිපස්ස හැරිලා මෙහෙම ඇහුවා. “ඔයා කවුද? අසහෙල්ද?” “ඔව්, මං අසහෙල්” කියලා එයා කිව්වා. 21 අබ්නේර් එයාට මෙහෙම කිව්වා. “ඔයාගේ දෙපැත්තේ ඉන්න කාව හරි අල්ලගන්න. එයා ළඟ තියෙන ඕනෙම දෙයක් අරගන්න.” ඒත් අසහෙල් එයා කියපු දේ ඇහුවේ නැහැ. 22 ඉතින් අබ්නේර් අසහෙල්ට ආයෙත් මෙහෙම කිව්වා. “මගේ පස්සේ එළවගෙන එන්න එපා. ඔයා දැන් මෙහෙන් යන්න. නැත්නම් මට සිද්ධ වෙනවා ඔයාව මරන්න. එහෙම වුණොත් මං කොහොමද ඔයාගේ සහෝදරයා වන යෝවාබ්ගේ මූණ බලන්නේ?” 23 ඒත් අසහෙල් අබ්නේර් කියපු දේ ඇහුවේ නැහැ. ඒ නිසා අබ්නේර් හෙල්ලයේ මිටෙන් එයාගේ බඩට ඇන්නා.+ හෙල්ලය එයාගේ බඩ පසාරු කරගෙන ගිහින් පිටෙන් එළියට ආවා. එයා එතනම මැරිලා වැටුණා. එතනින් ගිය හැමෝම අසහෙල්ගේ මළ සිරුර දැක්කාම එතන නතර වෙලා ඒ දිහා බලන් හිටියා.

24 ඊටපස්සේ යෝවාබ් සහ අබිෂයි, අබ්නේර් පස්සේ පන්නගෙන ගියා. ඉර බැහැගෙන යද්දී එයාලා ගිබියොන් පාළුකරයට යන පාරේ, ගීයා කියන තැනට ඉස්සරහින් තියෙන අම්මාහ් කියන කන්දට ආවා. 25 බෙන්ජමින්වරු අබ්නේර් වටේ එකතු වෙලා කණ්ඩායමක් විදිහට ඒ ළඟ තිබුණ වෙන කන්දකට නැග්ගා. 26 අබ්නේර් එතන ඉඳන් යෝවාබ්ට කතා කරලා මෙහෙම කිව්වා. “ඔයා තව කොච්චර වෙලාවක් මේ සටන ගෙනියන්නද හිතාගෙන ඉන්නේ? මේක නතර කළේ නැත්නම් අපි දෙගොල්ලෝ අතරේ ලොකු වෛරයක් ඇති වෙයි. තමන්ගෙම සහෝදරයන්ට විරුද්ධව සටන් කරන්න එපා කියලා ඔයා මේ සෙනඟට කියන්න.” 27 එතකොට යෝවාබ් මෙහෙම කිව්වා. “ජීවමාන සැබෑ දෙවියන් ඉස්සරහා මං මේ දේ දිවුරලා කියනවා. ඔයා එහෙම කිව්වේ නැත්නම් හැමෝම හෙට උදේ වෙන කල්ම එයාලාගේ සහෝදරයන්ට විරුද්ධව සටන් කරකර ඉඳියි.” 28 ඊටපස්සේ යෝවාබ් හොරණෑව පිම්බා. ඒක අහපු ගමන් සෙනඟ ඊශ්‍රායෙල්වරු පස්සේ පන්නගෙන යන එක නැවැත්තුවා. එතනින් සටන නතර වුණා.

29 අබ්නේර් සහ එයාත් එක්ක හිටිය අය රෑ පුරාම අරබා+ නිම්නයේ ගමන් කරලා යොර්දාන් ගඟෙන් එගොඩ වුණා. ඊටපස්සේ එයාලා නිම්නය* මැදින් ගිහින් මහනායිම්වලට+ නැඟගෙන ගියා. 30 අබ්නේර්ව පන්නගෙන යන එක නැවැත්තුවාට පස්සේ යෝවාබ් පුරුෂයන් හැමෝවම එකතු කරගත්තා. එතකොට එයාලා දැනගත්තා දාවිත්ගේ සේවකයන් අතරින් අසහෙල්ට අමතරව තවත් 19දෙනෙක් මිය ගිහින් කියලා. 31 ඒත් දාවිත්ගේ සේවකයන් අබ්නේර්ගේ සෙනඟවයි, බෙන්ජමින් ගෝත්‍රයේ අයවයි පරද්දලා එයාලාගෙන් 360දෙනෙක්ව මරලා දාලා තිබුණා. 32 දාවිත්ගේ සේවකයන් අසහෙල්ගේ+ මළ සිරුර බෙත්ලෙහෙම්+ නගරයේ තිබුණ එයාගේ තාත්තාගේ සොහොන් ගෙට අරන් ගිහින් තැන්පත් කළා. ඊටපස්සේ එයාලා යෝවාබ් එක්ක රෑ පුරාම ගමන් කරලා එළිය වැටීගෙන එනකොට හෙබ්‍රොන්+ නගරයට ආවා.

3 සාවුල්ගේ පිරිසත් දාවිත්ගේ පිරිසත් අතරේ තිබුණ ගැටුම සෑහෙන කාලයක් තිබුණා. දාවිත් එන්න එන්නම බලවත් වුණා.+ ඒත් සාවුල්ගේ පවුලේ අයට තිබුණ බලය ටිකෙන් ටික අඩු වෙලා ගියා.+

2 හෙබ්‍රොන් නගරයේ ජීවත් වුණ කාලයේදී දාවිත්ට පුතාලා කීපදෙනෙක්ම ඉපදුණා.+ එයාගේ වැඩිමල් පුතාගේ නම අම්නොන්.+ යෙෂ්‍රෙයෙල්වල අහිනොවම්+ තමයි අම්නොන්ගේ අම්මා. 3 දාවිත්ගේ දෙවෙනි පුතාගේ නම කිලෙයාබ්. එයාගේ අම්මා කර්මෙල්වල නාබල්ගේ බිරිඳ වෙලා හිටපු අබිගායිල්.+ එයාගේ තුන්වෙනි පුතාගේ නම අබ්සලොම්.+ එයාගේ අම්මා තමයි ගෙෂූර්වල රජ වුණ තල්මයිගේ+ දුව වන මයකා. 4 හග්ගිත්ගෙන් බිහි වුණ අදොනියා+ එයාගේ හතරවෙනි පුතා. ෂෙපටියා එයාගේ පස්වෙනි පුතා. ෂෙපටියාගේ අම්මා අබිටල්. 5 දාවිත්ගේ තවත් බිරිඳක් වුණ එග්ලා බිහි කරපු ඉත්රෙයාම් එයාගේ හයවෙනි පුතා. දාවිත්ගේ ඒ හැම පුතෙක්ම ඉපදුණේ හෙබ්‍රොන්වලදියි.

6 සාවුල්ගේ පවුලේ අය සහ දාවිත්ගේ සෙනඟ අතරේ දිගටම ගැටුම් තිබුණා. ඒ කාලයේදී අබ්නේර්,+ සාවුල්ගේ පවුලේ අය අතරේ එයාට තිබුණ බලය ටිකෙන් ටික වැඩි කරගනිමිනුයි හිටියේ. 7 සාවුල්ට රිෂ්පා+ කියලා උපභාර්යාවක් හිටියා. එයා ආයාගේ දුව. දවසක් ඉෂ්බෝෂෙත්,+ අබ්නේර්ගෙන් මෙහෙම ඇහුවා. “ඇයි ඔයා මගේ තාත්තාගේ බිරිඳ එක්ක එකට හිටියේ?”+ 8 ඒක අහලා අබ්නේර්ට හොඳටම කේන්ති ගිහින් මෙහෙම කිව්වා. “මං යූදා දේශයේ ඉඳන් ආපු බල්ලෙක් කියලා හිතුවාද? මං අද වෙනකම්ම ඔයාගේ තාත්තාගේ පවුලේ අයටයි, එයාගේ සහෝදරයන්ටයි, කිට්ටු යාළුවන්ටයි ආදරෙන් සැලකුවා. මම කවදාවත් ඔයාව දාවිත්ට පාවලා දුන්නේ නැහැ. මං එච්චර දේවල් කරලත් ගෑනු කෙනෙක් නිසා ඔයා මට දොස් කියනවාද? 9 ඔයා මට කරපු මේ අපහාසය නිසා යෙහෝවා දාවිත්ට පොරොන්දු වුණ විදිහටම+ එයාට රජකම ලැබෙන්න ඕනේ. මං අනිවාර්යයෙන්ම එයාට රජකම ලබාගන්න උදව් කරනවා. මං එහෙම කළේ නැත්නම් දෙවියන් මට දරුණු විදිහට දඬුවම් කරන්න ඕනේ! 10 දෙවියන් දිවුරලා දාවිත්ට මෙහෙම පොරොන්දු වුණා. ‘මම සාවුල්ගේ පෙළපතින් රාජ්‍යය අරන් ඒක දාවිත්ට දෙනවා. දාන් ඉඳන් බෙයර්ෂෙබා+ වෙන කල් තියෙන හැම පළාතක්ම මම දාවිත්ට යටත් කරලා දීලා ඊශ්‍රායෙල්වලත් යූදාවලත් එයාගේ රජකම ස්ථිර කරනවා.’” 11 ඉෂ්බෝෂෙත් අබ්නේර්ට බය වුණ නිසා එයා ඒ වෙලාවේ අබ්නේර්ට මුකුත්ම කියන්න ගියේ නැහැ.+

12 ඒ වෙලාවෙම අබ්නේර් දාවිත් ළඟට පණිවිඩකරුවන්ව යවලා මෙහෙම දැන්නුවා. “මේ දේශය තියෙන්නේ කාගේ යටතේද? මාත් එක්ක ගිවිසුමක් ඇති කරගන්න. එතකොට මං කොහොමහරි මුළු ඊශ්‍රායෙල් සෙනඟම ඔයාගේ පැත්තට හරවන්නම්.”+ 13 දාවිත් එයාට මෙහෙම දන්වලා යැව්වා. “මම ඒ යෝජනාවට කැමතියි. ඒත් අපි දෙන්නා ගිවිසුමක් ඇති කරගන්න කලින් ඔයා සාවුල්ගේ දුව වන මීකල්ව+ මගේ ළඟට එක්කගෙන එන්න ඕනේ. එයා නැතුව නම් මං ළඟට එන්න එපා.” 14 දාවිත් සාවුල්ගේ පුතා වුණ ඉෂ්බෝෂෙත්+ ළඟට පණිවිඩකරුවන්ව යවලා මෙහෙම දැන්නුවා. “මගේ බිරිඳ මීකල්ව ආයෙත් මට ගෙනත් දෙන්න. පිලිස්තිවරු 100දෙනෙක්ගේ චර්මාග්‍ර දීලයි මං එයාව මගේ බිරිඳ කරගත්තේ.”+ 15 ඉතින් ඉෂ්බෝෂෙත්, මීකල්ව ගෙන්නගන්න එයාගේ සැමියා වුණ පල්තියෙල් ළඟට මිනිසුන්ව යැව්වා. පල්තියෙල්+ ලායිෂ්ගේ පුතා. 16 ඒත් පල්තියෙල් අඬඅඬ බහුරීම්වලට+ යන කල්ම මීකල් පස්සේ ඇවිදගෙන ආවා. එතකොට අබ්නේර් “දැන් ඔයා ගෙදර යන්න” කියලා පල්තියෙල්ට කිව්වා. ඉතින් එයා ආපහු හැරිලා ගෙදර ගියා.

17 අබ්නේර් ඊශ්‍රායෙල් වැඩිමහල්ලන්ට පණිවිඩයක් යවලා මෙහෙම දැන්නුවා. “ඔයාලා දැන් කාලයක් තිස්සේ දාවිත්ව ඔයාලාගේ රජ විදිහට පත් කරගන්න හැදුවානේ. 18 දැන් ඒක කරන්න ඔයාලට අවස්ථාව ලැබිලා තියෙනවා. මොකද යෙහෝවාම දාවිත්ට මෙහෙම කිව්වා. ‘මගේ සෙනඟ වන ඊශ්‍රායෙල්වරුන්ව පිලිස්තිවරුන්ගේ අතින් සහ අනිත් හැම සතුරෙක්ගෙම අතින් මම බේරගන්නේ මගේ සේවකයා වන දාවිත් මාර්ගයෙන්.’”+ 19 ඊටපස්සේ අබ්නේර් බෙන්ජමින්වරුන්+ එක්කත් ඒ ගැන කතා කළා. පස්සේ ඒ කාරණාවට ඊශ්‍රායෙල්වරුනුයි, බෙන්ජමින්වරුනුයි කැමති වුණා කියලා දාවිත්ට දන්වන්න එයා හෙබ්‍රොන්වලට ගියා.

20 අබ්නේර් දාවිත්ව හම්බ වෙන්න හෙබ්‍රොන්වලට ගියේ පුරුෂයන් 20දෙනෙක් එක්කයි. දාවිත් ඒ හැමෝටම භෝජන සංග්‍රහයක් ලෑස්ති කළා. 21 ඒ වෙලාවේ අබ්නේර් දාවිත්ට මෙහෙම කිව්වා. “මගේ ස්වාමීනි, රජතුමනි, මට දැන් යන්න අවසර දෙන්න. මම ගිහින් මුළු ඊශ්‍රායෙල් සෙනඟවම රැස් කරලා ඔයා එක්ක ගිවිසුමක් ඇති කරගන්න කියලා එයාලට කියන්නම්. මුළු දේශයම ඔයාට යටත් වෙයි. ඔයාගේ හිතේ ආසාව ඉටු කරගන්න මං ඔයාට උදව් කරන්නම්.” ඊටපස්සේ දාවිත්, අබ්නේර්ව සමාදානයෙන් පිටත් කරලා යැව්වා.

22 අබ්නේර් යනවාත් එක්කම දාවිත්ගේ සේවකයන් සහ යෝවාබ් ආයෙත් හෙබ්‍රොන්වලට ආවා. එයාලා සතුරන් එක්ක සටන් කරලා ඒ අය ළඟ තිබුණ ගොඩක් දේවල් පැහැරගෙනයි එහෙට ආවේ. ඒ වෙද්දී අබ්නේර් හිටියේ නැහැ. මොකද දාවිත් එයාට හොඳින් සලකලා එයාව පිටත් කරලයි තිබුණේ. 23 යෝවාබ්+ එයාගේ හමුදාවත් එක්ක හෙබ්‍රොන්වලට ආයෙත් ආවාම එයාට මෙහෙම ආරංචි වුණා. “නේර්ගේ+ පුතා අබ්නේර්,+ රජව හම්බ වෙන්න ආවා. දැන් ටිකකට කලින් රජ එයාව සමාදානයෙන් පිටත් කරලා යැව්වා.” 24 එතකොට යෝවාබ්, දාවිත් රජ ළඟට ගිහින් මෙහෙම ඇහුවා. “ඔයා මොනවාද මේ කළේ? අබ්නේර් ඔයා ළඟට ආවාම ඇයි ඔයා එයාට යන්න දුන්නේ? එයාව අල්ලගන්න තිබ්බානේ! 25 නේර්ගේ පුතා අබ්නේර් මොන වගේ කෙනෙක්ද කියලා ඔයා හොඳටම දන්නවානේ. එයා ආවේ ඔයාව රවට්ටන්න. එයාට ඕනෙ ඔයා යන එන තැන් ගැනයි, ඔයා කරන දේවල් ගැනයි දැනගන්න.”

26 ඊටපස්සේ යෝවාබ් දාවිත් හිටපු තැනින් පිට වෙලා ගිහින් අබ්නේර්ව ආයෙත් ගෙන්නගන්න පණිවිඩකරුවන්ව යැව්වා. ඒ වෙද්දී අබ්නේර් හිටියේ සිරාවල පොකුණ ළඟ. ඒත් යෝවාබ් කරපු දේ ගැන දාවිත් කිසිම දෙයක් දැනන් හිටියේ නැහැ. 27 ඉතින් අබ්නේර් ආයෙත් හෙබ්‍රොන්වලට+ ආවා. අබ්නේර් එක්ක රහසින් දෙයක් කතා කරන්න තියෙනවා වගේ පෙන්නලා යෝවාබ් එයාව නගරයේ දොරටුව ළඟට* එක්කගෙන ගියා. එතනදී යෝවාබ් අබ්නේර්ගේ බඩට කඩුවෙන් ඇනලා එයාව මරලා දැම්මා.+ යෝවාබ් එහෙම කළේ එයාගේ සහෝදරයා වන අසහෙල්+ වෙනුවෙන් පළිගන්න. 28 දාවිත්ට ඒ ගැන ආරංචි වුණාම එයා මෙහෙම කිව්වා. “නේර්ගේ පුතා වන අබ්නේර්ගේ මරණයට මමවත් මගේ රාජ්‍යයවත් සම්බන්ධ නැහැ.+ ඒ කාරණයේදී යෙහෝවා දෙවියන් ඉස්සරහා අපි හැමදාටම නිර්දෝෂයි. 29 අබ්නේර්ගේ ලේවලට වන්දි ගෙවන්න ඕනෙ යෝවාබ්+ සහ එයාගේ පවුලේ අය. යෝවාබ් කරපු ඒ දේ නිසා එයාට ශාප වෙන්න ඕනේ. ලිංගේන්ද්‍රියේ රෝගයකින්+ හරි ලාදුරු රෝගයෙන්+ හරි බඩගින්නෙන් හරි ඉන්න පුරුෂයෙක් එයාගේ පවුලේ හැමදාමත් ඉන්න ඕනේ! එහෙමත් නැත්නම් කඩුවෙන් මැරුම් කන,+ නූල් කටින තත්වයට* පත් වෙන පුරුෂයෙක් හැමදාමත් එයාගේ පවුලේ ඉන්න ඕනේ!” 30 යෝවාබ් එයාගේ සහෝදරයා වුණ අබිෂයි+ එක්ක එකතු වෙලා අබ්නේර්ව+ මරලා දැම්මේ අබ්නේර් එයාලාගේ සහෝදරයා වුණ අසහෙල්ව ගිබියොන්වල කරපු සටනේදී මරලා දාපු නිසයි.+

31 පස්සේ දාවිත් යෝවාබ්ටයි, එයාත් එක්ක හිටපු හැමෝටමයි මෙහෙම කිව්වා. “ඔයාලා ඇඳුම් ඉරාගෙන ගෝණි රෙදි ඇඳගන්න. අබ්නේර් වෙනුවෙන් වැලපෙන්න.” අබ්නේර්ගේ මළ සිරුර අරන් යද්දී දාවිත් රජත් ඒ පිටිපස්සෙන් ගියා. 32 එයාලා හෙබ්‍රොන්වලදී අබ්නේර්ව තැන්පත් කළා. ඒ වෙලාවේ රජත් මුළු සෙනඟත් හොඳටම ඇඬුවා. 33 රජ, අබ්නේර් ගැන මේ ශෝක ගීය ගායනා කළා.

“අනේ අබ්නේර්, කිසි වැඩකට නැති කෙනෙක් වගේ ඔයාට මැරෙන්න වුණේ ඇයි?

ඒත් ඔයා මැරිලා ගියේ මැරයන්* අතින් මැරුම් කාපු කෙනෙක් වගෙයි.”+

ඒ ගීය ඇහුවාම සෙනඟ ආයෙත් අඬන්න පටන්ගත්තා.

35 දවල් වෙද්දී සෙනඟ දාවිත් ළඟට ඇවිල්ලා කෑම ටිකක් දීලා එයාව සනසන්න හැදුවා. ඒත් දාවිත් එයාලට මෙහෙම කිව්වා. “ඉර බහින්න කලින් මං කිසිම දෙයක් කටේ තියන්නේ නැහැ. එහෙම කළොත් දෙවියන් මට දරුණු විදිහට දඬුවම් කරන්න ඕනේ!”+ 36 රජ ඉන්නේ හුඟක් දුකෙන් කියලා සෙනඟට තේරුණා. ඒ නිසා එයාලා දාවිත් කියපු දේට එකඟ වුණා. රජ කරපු කියපු හැම දේටම එයාලා එකඟ වුණා වගේ මේ කාරණයේදීත් එයාලා එකඟ වුණා. 37 නේර්ගේ පුතා වුණ අබ්නේර්ව මරලා දාන්න සැලසුම් කළේ දාවිත් නෙමෙයි කියලා දාවිත්ට සහයෝගය දුන්න සෙනඟයි, ඊශ්‍රායෙල්වරු හැමෝමයි තේරුම්ගත්තා.+ 38 රජ එයාගේ සේවකයන්ට මෙහෙම කිව්වා. “අද ඊශ්‍රායෙල්වල මිය ගියේ අධිපතියෙක්. හුඟක් ශ්‍රේෂ්ඨ කෙනෙක්.+ 39 මාව රජ හැටියට පත් කරලා තිබුණත්+ මට ෂෙරුයියාගේ පුතාලට+ විරුද්ධ වෙන්න තරම් ශක්තියක් නැහැ. එයාලා හරිම දරුණුයි.+ එයාලා කරපු දුෂ්ටකම්වලට යෙහෝවාම එයාලට සුදුසු දඬුවමක් දෙයි.”+

4 හෙබ්‍රොන්වලදී+ අබ්නේර් මැරුණා කියලා සාවුල්ගේ පුතා ඉෂ්බෝෂෙත්+ දැනගත්තාම එයා හොඳටම බය වුණා. මුළු ඊශ්‍රායෙල් සෙනඟත් ඒ ආරංචිය අහලා කලබල වුණා. 2 බානාහ් සහ රේකාබ් කියන්නේ සාවුල්ගේ පුතාට අයිති කොල්ලකරුවන්ගේ කණ්ඩායම් භාරව හිටපු දෙන්නෙක්. එයාලා බෙන්ජමින් ගෝත්‍රයට අයිති, බෙයේරොත්වල පදිංචි වෙලා හිටපු රිම්මොන්ගේ පුතාලා. (ඒ කාලේ බෙයේරොත්+ නගරය තිබුණේ බෙන්ජමින් ගෝත්‍රයට අයිති ප්‍රදේශයක. 3 බෙයේරොත්වල ජීවත් වුණ අය ගිත්තායිම්+ කියන තැනට පලා ගියා. එයාලා අද වෙන කල්ම විදේශිකයන් විදිහට එහේ ජීවත් වෙනවා.)

4 සාවුල්ගේ පුතා වුණ යොනාතාන්ට+ මෙෆිබොෂෙත්+ කියලා පුතෙක් හිටියා. එයාගේ කකුල් දෙකම කොර වෙලයි තිබුණේ.+ සාවුල් සහ යොනාතාන් මිය ගිහින් කියලා යෙෂ්‍රෙයෙල්+ ඉඳන් පණිවිඩය ලැබෙද්දී එයා අවුරුදු පහක දරුවෙක්. ඒ වෙලාවේ මෙෆිබොෂෙත්ව බලාගත්ත සේවිකාව කලබල වෙලා එයාව උස්සගෙන දුවද්දී මෙෆිබොෂෙත් වැටිලා එයාගේ කකුල් දෙක කොර වුණා.

5 දවසක් බෙයේරොත්වල රිම්මොන්ගේ පුතාලා වුණ රේකාබ් සහ බානාහ් ඉෂ්බෝෂෙත්ගේ ගෙදරට ගියා. එයාලා එහෙට ගියේ දවල් කාලේ හුඟක් රස්නේ වෙලාවක. ඒ වෙලාවේ ඉෂ්බෝෂෙත් පොඩි විවේකයක් ගන්න ගිහින් තිබුණා. 6 රේකාබ් සහ බානාහ්+ තිරිඟු ගන්න ආපු මිනිස්සු වගේ රඟපාලා ගේ ඇතුළටම ගියා. ඊටපස්සේ එයාලා කඩුවෙන් ඉෂ්බෝෂෙත්ගේ බඩට ඇනලා එයාව මරලා එතනින් පැනලා ගියා. 7 ඒ දෙන්නා ගේ ඇතුළට යද්දී ඉෂ්බෝෂෙත් එයාගේ කාමරයේ ඇඳ උඩ නිදාගෙනයි හිටියේ. ඒ දෙන්නා එයාව මරලා එයාගේ බෙල්ල කපලා දැම්මා. ඊටපස්සේ එයාගේ ඔළුව අරගෙන අරබා නිම්නයට යන පාරේ මුළු රෑම ඇවිදගෙන ගියා. 8 එයාලා ඉෂ්බෝෂෙත්ගේ+ ඔළුවත් අරන් හෙබ්‍රොන්වල හිටිය දාවිත් ළඟට ගිහින් මෙහෙම කිව්වා. “අපේ ස්වාමීනි, මේ බලන්න! ඔබව මරන්න හොයපු+ ඔබේ සතුරාගේ+ පුතාගේ ඔළුව අපි ගෙනාවා. අද යෙහෝවා දෙවියන් සාවුල්ගෙනුයි, එයාගේ පෙළපතේ අයගෙනුයි පළිගත්තා.”

9 දාවිත් බෙයේරොත්වල රිම්මොන්ගේ පුතාලා වුණ රේකාබ්ට සහ බානාහ්ට මෙහෙම කිව්වා. “මගේ හැම දුකකින්ම මාව බේරගත්ත ජීවමාන දෙවි යෙහෝවා+ ඉස්සරහා මේ දේ මං දිවුරලා කියනවා. 10 ‘සාවුල් මැරුණා’+ කියලා මං ළඟට ඇවිල්ලා කියපු කෙනාත් හිතුවේ එයා මට හොඳ ආරංචියක් ගෙනාවා කියලයි. ඒත් ෂික්ලග්වලදී මං ඒ කෙනාව මරලා දැම්මා.+ එයා ගෙනාපු පණිවිඩයට මගෙන් ලැබුණ තෑග්ග ඒකයි. 11 එහෙමනම් තමන්ගෙම ගෙදර නිදාගෙන හිටිය ධර්මිෂ්ඨ කෙනෙක්ව මරලා දාපු දුෂ්ටයන්ට මං දඬුවම් නොකර ඉඳියිද? ඉෂ්බෝෂෙත්ගේ ලේ හලපු නිසා මං උඹලව මරලා+ එයා වෙනුවෙන් යුක්තිය ඉටු කරනවා.” 12 ඊටපස්සේ දාවිත් ඒ දෙන්නාව මරලා දාන්න කියලා සේවකයන්ට අණ කළා.+ එයාලා ඒ දෙන්නාව මරලා එයාලාගේ අත පය කපලා, මළ සිරුරු හෙබ්‍රොන්වල තිබුණ පොකුණ ළඟ එල්ලුවා.+ ඊටපස්සේ එයාලා ඉෂ්බෝෂෙත්ගේ ඔළුව හෙබ්‍රොන්වල තිබුණ අබ්නේර්ගේ සොහොන් ගෙට අරන් ගිහින් එතන තැන්පත් කළා.

5 ටික කාලෙකට පස්සේ ඊශ්‍රායෙල්වරුන්ගේ හැම ගෝත්‍රයක්ම නියෝජනය කරන කණ්ඩායමක් හෙබ්‍රොන්වල+ හිටිය දාවිත්ව හම්බ වෙන්න ඇවිත් මෙහෙම කිව්වා. “අපි හැමෝම ඔයාගේ සහෝදරයන්.*+ 2 සාවුල් අපේ රජ වෙලා හිටපු කාලේදීත් ඊශ්‍රායෙල් හමුදාව යුද්දෙට යද්දී පෙරමුණ අරන් වැඩ කළේ ඔයායි.+ ඒ වගේම යෙහෝවාත් ඔයාට මෙහෙම කිව්වා. ‘මගේ සෙනඟ වන ඊශ්‍රායෙල් ජාතියව රැකබලා ගන්න මම පත් කරන්නේ ඔයාවයි. මං ඔයාව එයාලාගේ නායකයා විදිහට පත් කරනවා.’”+ 3 ඊශ්‍රායෙල් වැඩිමහල්ලෝ හැමෝමත් දාවිත්ව හම්බ වෙන්න හෙබ්‍රොන්වලට ඇවිත් හිටියා. යෙහෝවා දෙවියන් ඉස්සරහා දාවිත් එයාලා එක්ක ගිවිසුමක් ඇති කරගත්තා.+ ඊටපස්සේ එයාලා මුළු ඊශ්‍රායෙල් දේශයේම රජ විදිහට දාවිත්ව අභිෂේක කළා.+

4 දාවිත්ව රජ විදිහට පත් කරද්දී එයාගේ වයස අවුරුදු 30යි. එයා අවුරුදු 40ක් රජකම් කළා.+ 5 එයා හෙබ්‍රොන්වල ඉඳන් අවුරුදු 7යි, මාස 6ක් යූදා ගෝත්‍රයේ රජ විදිහට පාලනය කළා. එයා යෙරුසලමේ+ ඉඳන් අවුරුදු 33ක් යූදා ඇතුළු මුළු ඊශ්‍රායෙල් දේශයම පාලනය කළා. 6 රජ එයාගේ හමුදාවත් එක්ක යෙරුසලමේ හිටිය යෙබූසිවරුන්ට+ විරුද්ධව සටන් කරන්න ගියා. ඒත් යෙබූසිවරු හිතුවේ දාවිත්ට කවදාවත් නුවරට ඇතුල් වෙන්න බැහැ කියලයි. ඒ නිසා එයාලා දාවිත්ට අපහාසෙට මෙහෙම කිව්වා. “ඔයාට නම් කවදාවත් අපේ නුවරට ඇතුල් වෙන්න ලැබෙන්නේ නැහැ.+ මෙහේ ඉන්න අන්ධයන්ටයි, කොරුන්ටයි වුණත් පුළුවන් ඔයාව පන්නලා දාන්න.” 7 ඒත් දාවිත් සියොන් බලකොටුව අල්ලගත්තා. පස්සේ ඒක දාවිත්ගේ නුවර විදිහට හැඳින්නුවා.+ 8 එදා දාවිත් එයාගේ සෙබළුන්ට මෙහෙම කිව්වා. “යෙබූසිවරුන්ට විරුද්ධව සටන් කරන හැමෝම ජල මාර්ගය දිගේ ගිහින් එයාලා අතරේ ඉන්න අන්ධයන්ටයි, කොරුන්ටයි පහර දෙන්න. එයාලා මට පිළිකුලක්!” පස්සේ කාලෙක “අන්ධයන්ට සහ කොරුන්ට ගෙට එන්න අවසර නැහැ” කියන කියමන ඇති වුණේ ඒ නිසයි. 9 සියොන් බලකොටුව අල්ලගත්තාට පස්සේ දාවිත් ඒකේ පදිංචි වුණා. ඒක හැඳින්නුවේ* දාවිත්ගේ නුවර විදිහට. දාවිත් මිල්ලෝ ගොඩැල්ල* වටේ+ සහ නුවර ඇතුළේ+ ඉදි කිරීම් වැඩ පටන්ගත්තා. 10 දාවිත්ගේ බලය එන්න එන්නම වැඩි වුණා.+ ස්වර්ගයේ සේනාවල දෙවියන් වන යෙහෝවාත් දාවිත් එක්කම ඉඳලා එයාට උදව් කළා.+

11 තීර්වල රජ වන හීරාම්+ එයාව නියෝජනය කරන පිරිසක්ව දාවිත් ගාවට යැව්වා. ඒ වගේම බිත්ති බඳින අයවත් වඩු වැඩ කරන අයවත් ඉදි කිරීම් වැඩවලට ඕනෙ කරන දේවදාර ලීත්+ එයා දාවිත්ට යැව්වා. ඊටපස්සේ ඒ අය දාවිත්ට මාලිගාවක් ඉදි කරන්න පටන්ගත්තා.+ 12 ඊශ්‍රායෙල් දේශය පුරාම එයාගේ බලය තහවුරු කරගන්න යෙහෝවා දෙවියන් එයාට උදව් කළා කියලා දාවිත් තේරුම්ගත්තා.+ ඒ වගේම දෙවියන් දාවිත්ගේ රාජ්‍යය උසස් කළේ+ ඔහුගේ සෙනඟ වන ඊශ්‍රායෙල්වරු+ වෙනුවෙන් කියලත් දාවිත්ට තේරුණා.

13 හෙබ්‍රොන්වල ඉඳන් යෙරුසලමට ආවාට පස්සේ දාවිත් තවත් භාර්යාවන්ව විවාහ කරගත්තා. උපභාර්යාවන්වත් වැඩි කරගත්තා.+ එහෙදී දාවිත්ට තවත් දුවලා පුතාලා ඉපදුණා.+ 14 යෙරුසලමේදී දාවිත්ට ඉපදුණ දරුවන්ගේ නම් මේවායි. ෂම්මුවා, ෂෝබාබ්, නාතන්,+ සලමොන්,+ 15 ඉබ්හාර්, එලිෂුවා, නෙෆෙග්, යාෆියා, 16 එලිෂාමා, එලියාදා සහ එලිෆෙලෙත්.

17 දාවිත්ව ඊශ්‍රායෙල්වල රජ විදිහට අභිෂේක කරලා කියලා ආරංචි වුණාම+ පිලිස්තිවරු එයාලාගේ මුළු හමුදාවම එකතු කරගෙන දාවිත් එක්ක සටන් කරන්න ආවා.+ ඒක දැනගත්තාම දාවිත් ආරක්ෂිත තැනකට ගියා.+ 18 පිලිස්තිවරු රෙෆායිම්+ නිම්නයට ඇවිත් නිම්නය පුරා එක එක තැන්වලට ගිහින් හිටියා. 19 ඒ වෙලාවේ දාවිත් යෙහෝවා දෙවියන්ගෙන් මෙහෙම ඇහුවා.+ “මම පිලිස්තිවරු එක්ක සටන් කරන්නද? එයාලව යටත් කරගන්න ඔයා මට උදව් කරනවාද?” යෙහෝවා දාවිත්ට කිව්වා “ගිහින් එයාලත් එක්ක සටන් කරන්න. එයාලව යටත් කරගන්න මම අනිවාර්යයෙන්ම ඔයාට උදව් කරනවා”+ කියලා. 20 ඉතින් දාවිත් රජ බාල්පෙරාෂිම් කියන තැනට ගිහින් පිලිස්තිවරු එක්ක සටන් කරලා එයාලව පරාජය කළා. ඒ වෙලාවේ දාවිත් මෙහෙම කිව්වා. “වේගයෙන් ගලාගෙන යන ජල පහරක් වගේ යෙහෝවා මට ඉස්සරහින් ගිහින් මගේ සතුරන්ව විනාශ කළා.”+ දාවිත් ඒ තැනට බාල්පෙරාෂිම්*+ කියන නම දුන්නේ ඒ නිසයි. 21 පිලිස්තිවරු එයාලාගේ දෙවිවරුන්ගේ රූප එතනම දාලා පලා ගිහින් තිබුණා. දාවිත් සහ එයාගේ සෙබළු ඒ රූප ටික අරන් ගිහින් ඒවා විනාශ කළා.

22 පිලිස්තිවරු ආයෙත් ඇවිත් රෙෆායිම්+ නිම්නයේ තැනින් තැනට ගිහින් සටන් කරන්න ලෑස්ති වුණා. 23 ඒ වෙලාවෙත් දාවිත් යෙහෝවාගෙන් ඇහුවා එයාලා එක්ක සටන් කරන්න යන්නද කියලා. එතකොට ඔහු දාවිත්ට මෙහෙම කිව්වා. “මේ පාර නම් එයාලා ඉස්සරහට ගිහින් සටන් කරන්න එපා. වටෙන් ගිහින් බේකා පඳුරු පිටිපස්සේ හැංගිලා ඉන්න. එයාලට පහර දෙන්න වෙලාව ආවාම පඳුරු ඉස්සරහට යන්න. 24 බේකා පඳුරු අතරින් පිරිසක් ඇවිදිනවා වගේ සද්දයක් ඔයාට ඇහෙයි. ඒක ඇහුණ ගමන්ම ගිහින් පිලිස්තිවරුන්ට පහර දෙන්න. යෙහෝවා වන මං ඔයාලට ඉස්සරහින් ගිහින් සටන් කරනවා කියලා කියන්න ඒක ලකුණක්.” 25 දාවිත් යෙහෝවා දෙවියන් කියපු විදිහටම කළා. එයා ගෙබා+ නගරයේ ඉඳන් ගෙෂෙර්+ නගරය වෙන කල් ගිහින් පිලිස්තිවරුන්ට+ පහර දුන්නා.

6 දාවිත් ආයෙත් ඊශ්‍රායෙල් පුරුෂයන් අතරින් හොඳම සෙබළු 30,000ක් තෝරගත්තා. 2 ඊටපස්සේ දාවිත් ඒ සෙබළුන් එක්ක බායලෙයූදා නගරයට ගියා. එයාලා එහෙට ගියේ කෙරුබ්වරුන්ට+ ඉහළින්* සිංහාසනයේ ඉඳගෙන ඉන්න සැබෑ දෙවියන්ට අයිති ගිවිසුම් පෙට්ටිය එතනින් අරන් එන්නයි.+ සාමාන්‍යයෙන් මිනිස්සු ගිවිසුම් පෙට්ටිය ඉස්සරහට ගිහිල්ලයි ස්වර්ගයේ සේනාවල අධිපති වන යෙහෝවාගේ+ නම කියලා කන්නලව් කරන්නේ. 3 ඒ වෙනකොට සැබෑ දෙවියන්ට අයිති ගිවිසුම් පෙට්ටිය තිබුණේ කන්දක් උඩ තිබුණ අබිනාදාබ්ගේ ගෙදර.+ ඒත් එතන ඉඳන් එයාලා ගිවිසුම් පෙට්ටිය අරන් ආවේ අලුත් කරත්තයක තියාගෙනයි.+ කරත්තය දක්කගෙන ආවේ අබිනාදාබ්ගේ පුතාලා දෙන්නා වුණ උස්සාහ් සහ අහියෝ.

4 ඔය විදිහට එයාලා අබිනාදාබ්ගේ ගෙදර ඉඳන් සැබෑ දෙවියන්ට අයිති ගිවිසුම් පෙට්ටිය අරගෙන ආවා. ගිවිසුම් පෙට්ටියට ඉස්සරහින් ඇවිදගෙන ගියේ අහියෝ. 5 දාවිත් රජයි, මුළු ඊශ්‍රායෙල් සෙනඟයි ජුනිපර් ලීයෙන් හදපු සංගීත භාණ්ඩ, වීණා, කුඩා වීණා, රබන්,+ අත්තාළම්+ සහ වෙනත් සංගීත භාණ්ඩ+ වාදනය කරකර යෙහෝවා දෙවියන් ඉස්සරහා සතුට සැමරුවා. 6 එයාලා නාකොන් කියන කමත ළඟට ආවාම කරත්තය ඇදගෙන ආපු හරක් කුලප්පු වුණා. උස්සාහ් ඒක දැක්ක ගමන්ම සැබෑ දෙවියන්ට අයිති ගිවිසුම් පෙට්ටිය කරත්තයෙන් වැටෙයි කියලා හිතාගෙන ඒක අල්ලගත්තා.+ 7 ඒ වෙලාවේ යෙහෝවාට උස්සාහ් එක්ක හුඟක් කේන්ති ගියා. උස්සාහ් කරපු ඒ අගෞරවනීය දේ+ නිසා සැබෑ දෙවියන් එයාට පහර දුන්නා.+ සැබෑ දෙවියන්ට අයිති ගිවිසුම් පෙට්ටිය ළඟම එයා මැරිලා වැටුණා. 8 යෙහෝවාට කේන්ති ගිහින් උස්සාහ්ට ඒ වෙලාවෙම පහර දුන්න නිසා දාවිත්ට හුඟක් කේන්ති ගියා. ඒ තැනට පෙරෙෂ්උස්සාහ්* කියන නම තිබ්බේ ඒ සිද්ධියෙන් පස්සෙයි. අද වෙන කල්ම ඒ තැන හඳුන්වන්නේ ඒ නමින්. 9 එදා දාවිත්ට යෙහෝවා ගැන ලොකු බයක් ඇති වුණා.+ “යෙහෝවාට අයිති ගිවිසුම් පෙට්ටිය මං ළඟට කොහොමටවත් ගෙන්නගන්න බැරි වෙයිද”+ කියලා එයා හිතුවා. 10 යෙහෝවා දෙවියන්ට අයිති ගිවිසුම් පෙට්ටිය දාවිත්ගේ නුවරට+ අරන් යන්න එයා කැමති වුණේ නැහැ. ඒ වෙනුවට එයා ඒක ගාත්වල* පදිංචි වෙලා හිටපු ඕබෙද්ඒදොම්ගේ+ ගෙදරට අරන් යන්න කියලා අණ කළා.

11 යෙහෝවාට අයිති ගිවිසුම් පෙට්ටිය ගාත්වල හිටපු ඕබෙද්ඒදොම්ගේ ගෙදර මාස තුනක් තිබුණා. යෙහෝවා ඕබෙද්ඒදොම්ටත් එයාගේ ගෙදර හිටපු හැමෝටමත් ආශීර්වාද කළා.+ 12 පස්සේ දාවිත් රජට ආරංචි වුණා “සැබෑ දෙවියන්ට අයිති ගිවිසුම් පෙට්ටිය ඕබෙද්ඒදොම්ගේ ගෙදර තියෙන නිසා එයාටත් එයාට අයිති හැම දේකටමත් යෙහෝවා ආශීර්වාද කරලා” කියලා. ඒක ඇහුවාම දාවිත් හරිම සතුටින් සැබෑ දෙවියන්ට අයිති ගිවිසුම් පෙට්ටිය දාවිත්ගේ නුවරට අරන් එන්න ඕබෙද්ඒදොම්ගේ ගෙදරට ගියා.+ 13 යෙහෝවා දෙවියන්ට අයිති ගිවිසුම් පෙට්ටිය උස්සගෙන ගිය අය+ පියවර හයක් ඉස්සරහට ගියාට පස්සේ දාවිත් රජ ගවයෙක්ව සහ හොඳ මහත වස්සෙක්ව පූජා කළා.

14 ඊටපස්සේ දාවිත් යෙහෝවා ඉස්සරහා හුඟක් සතුටින් නටන්න පටන්ගත්තා. ඒ වෙලාවේ එයා ඇඳන් හිටියේ ලිනන් රෙදිවලින් මහලා තිබුණ ඒෆොද් ඇඳුමක්.+ 15 දාවිත් ඊශ්‍රායෙල් සෙනඟත් එක්ක හරිම සතුටින් කෑගගහා+ හොරණෑ හඬ මැද්දේ+ යෙහෝවා දෙවියන්ට අයිති ගිවිසුම් පෙට්ටිය අරන් ආවා.+ 16 යෙහෝවාට අයිති ගිවිසුම් පෙට්ටිය දාවිත්ගේ නුවරට අරන් එද්දී සාවුල්ගේ දුව වුණ මීකල්+ ජනේලයෙන් ඒ දිහා බලන් හිටියා. දාවිත් රජ යෙහෝවාට ගෞරවයක් ගේන්න උඩ පැනපැන නටන විදිහ දැක්කාම මීකල් හිතින් දාවිත්ව පිළිකුල් කරන්න පටන්ගත්තා.+ 17 යෙහෝවාට අයිති ගිවිසුම් පෙට්ටිය එයාලා අරන් ඇවිත් දාවිත් ඒක තියන්න ලෑස්ති කරපු කූඩාරමේ තිබ්බා.+ ගිවිසුම් පෙට්ටිය නියමිත තැන තිබ්බාට පස්සේ දාවිත් යෙහෝවාට+ දවන පූජා+ සහ හවුල් පූජා+ ඔප්පු කළා. 18 පූජා ඔප්පු කරලා ඉවර වෙලා දාවිත් ස්වර්ගයේ සේනාවල අධිපති වන යෙහෝවාගේ නමින් සෙනඟට ආශීර්වාද කළා. 19 එයා මුළු ඊශ්‍රායෙල් සෙනඟටම ඒ කියන්නේ එතන හිටපු ස්ත්‍රීන් සහ පුරුෂයන් හැමෝටම මුද්දක හැඩේට හදපු රොටියක්, රටඉඳි කුට්ටියක්* සහ වියළි මිදි කුට්ටියක් ගාණේ දුන්නා. ඊටපස්සේ හැමෝම තම තමන්ගේ ගෙවල්වලට ගියා.

20 දාවිත් එයාගේ ගෙදර ඉන්න අයට ආශීර්වාද කරන්න ආවාම සාවුල්ගේ දුව වුණ මීකල්+ එයා ළඟට ඇවිත් මෙහෙම කිව්වා. “අද ඊශ්‍රායෙල්වරුන්ගේ රජ හැසිරුණු විදිහ නම් හරිම අපූරුයි! ඔයා ඔයාගේ සේවකයන්ගේ දාසියන් ඉස්සරහා ඇඳුම් ගලවලා හැසිරුණේ හරියට මෝඩයෙක් වගෙයි. ඔයාට කිසිම ලැජ්ජාවක් නැද්ද?”+ 21 ඒ වෙලාවේ දාවිත් මීකල්ට මෙහෙම කිව්වා. “මං ඒ විදිහට සතුටු වුණේ යෙහෝවාට ගෞරවය දෙන්න ඕනෙ නිසයි. ඔයාගේ තාත්තායි, එයාගේ පවුලේ අයයි වෙනුවට යෙහෝවා ඔහුගේ සෙනඟ වන ඊශ්‍රායෙල්වරුන්ව පාලනය කරන්න තෝරගත්තේ මාවයි.+ ඒ නිසා මං දිගටම යෙහෝවා ඉස්සරහා සතුටු වෙනවා. 22 මං මීටත් වඩා මාවම පහත් කරගෙන අපහාස විඳින්න වුණත් ලෑස්තියි. ඒත් ඔයා කියපු ඒ දාසීන් අනිවාර්යයෙන්ම මාව ගෞරවයට පත් කරනවා කියලා මං දන්නවා.” 23 ඉතින් සාවුල්ගේ දුව වුණ මීකල්ට+ මැරෙන කල් දරුවෝ ලැබුණේ නැහැ.

7 දාවිත් එයාටම කියලා හදපු මාලිගාවේ පදිංචි වුණා.+ යෙහෝවා දෙවියන්ගේ ආශීර්වාදය නිසා ඒ වෙද්දී දාවිත් රජ ගත කළේ සතුරන්ගෙන් කිසිම කරදරයක් නැති සාමකාමී ජීවිතයක්. 2 දවසක් අනාගතවක්තෘ නාතන්ට+ රජ මෙහෙම කිව්වා. “මම දේවදාර ලීවලින් හදපු මාලිගාවක ජීවත් වෙද්දී+ සැබෑ දෙවියන්ට අයිති ගිවිසුම් පෙට්ටිය තියෙන්නේ කූඩාරමක.”+ 3 ඒ වෙලාවේ නාතන්, රජට කිව්වා “යෙහෝවාගේ ආශීර්වාදය ඔයාට තියෙනවා. ඉතින් ඔයාගේ හිතේ තියෙන ආසාව ඉටු කරගන්න”+ කියලා.

4 එදා රෑ යෙහෝවා නාතන්ට මෙහෙම කිව්වා. 5 “ඔයා මගේ සේවකයා වන දාවිත්ට මේ දේ කියන්න. ‘යෙහෝවා දෙවියන් ඔයාට මෙහෙම කියනවා. “ඔයා ඇයි මට ගෘහයක් හදන්නේ?+ 6 මම ඊශ්‍රායෙල්වරුන්ව ඊජිප්තුවෙන් අරන් ආපු දවසේ ඉඳන් අද වෙන කල් මට ගෘහයක් තිබුණේ නැහැ.+ එදා ඉඳන් මම හිටියේ තැනින් තැනට අරන් යන කූඩාරමක.+ 7 ඊශ්‍රායෙල්වරු එක්ක තැනින් තැනට ගිය ඒ කාලයේදී ‘මට දේවදාර ලීවලින් නිවසක් හැදුවේ නැත්තේ ඇයි’ කියලා මං කවදාවත් අහලා තියෙනවාද? මගේ සෙනඟ වන ඊශ්‍රායෙල්වරුන්ව රැකබලා ගන්න පත් කරපු ගෝත්‍රවල අධිපතීන්ගෙන් මං ඒ වගේ දෙයක් අහලා තියෙනවාද?”’ 8 මගේ සේවකයා වන දාවිත්ට මේ දේත් කියන්න. ‘ස්වර්ගයේ සේනාවල අධිපති වන යෙහෝවා ඔයාට මෙහෙම කියනවා. “ඔයා තණබිම්වල බැටළුවන්ව බලාගත්ත කාලයේදී+ මගේ සෙනඟ වන ඊශ්‍රායෙල්වරුන්ගේ පාලකයා වෙන්න මම ඔයාව තෝරගත්තා.+ 9 ඔයා යන ඕනෙම තැනකට මමත් ඔයා එක්ක එනවා.+ ඔයාගේ හැම සතුරෙක්වම මම විනාශ කරනවා.+ මේ ලෝකේ ඉන්න ශ්‍රේෂ්ඨ මිනිස්සු වගේ මම ඔයාවත් ශ්‍රේෂ්ඨ කෙනෙක් කරලා ඔයාගේ නම ගෞරවයට පත් කරනවා.+ 10 මම මගේ සෙනඟ වන ඊශ්‍රායෙල්වරුන්ට ජීවත් වෙන්න තැනක් වෙන් කරලා එයාලව එහේ පදිංචි කරවනවා. කාගෙන්වත් හිරිහැරයක් නැතුව එයාලා එහේ ජීවත් වෙයි. ආයේ කවදාවත් දුෂ්ටයන් එයාලට හිරිහැර කරන්නේ නැහැ.+ 11 මගේ සෙනඟ වන ඊශ්‍රායෙල්වරුන්ව බලාගන්න මම විනිශ්චයකරුවන්ව+ පත් කරපු කාලයේ ඉඳන් මේ වෙන කල් එයාලා සතුරන්ගෙන් පීඩා වින්දා. ඒත් ඒ කිසිම සතුරෙක්ගෙන් ආයෙත් ඔයාලට කරදරයක් වෙන්නේ නැහැ.+

“‘“යෙහෝවා වන මම ඔයාගෙන් රාජකීය පෙළපතක් බිහි කරනවා. යෙහෝවා වන මමයි ඔයාට ඒ පොරොන්දුව දුන්නේ.+ 12 ඔයාගේ මුතුන්මිත්තන් වගේ ඔයාත් මැරුණාට පස්සේ+ ඔයාගේ පෙළපතින් එන ඔයාගෙම පුතෙක්ට මම ඔයාගේ රාජ්‍යය භාර දෙනවා. මම එයාගේ රාජ්‍යය ස්ථිරව පිහිටුවනවා.+ 13 මගේ නමට ගෞරවයක් ගේන්න ගෘහයක් ගොඩනඟන්න මම තෝරගන්නේ එයාවයි.+ මම එයාගේ සිංහාසනය සදහටම ස්ථිර කරනවා.+ 14 මම එයාට තාත්තා කෙනෙක් වෙනවා. එයා මගේම පුතෙක් වෙනවා.+ එයාගේ අතින් වරදක් වුණොත් මම එයාට අවවාද කරනවා. මිනිස්සු* වේවැලකින් කෙනෙක්ට දඬුවම් කරනවා වගේ එයාට දඬුවම් කරනවා.+ 15 සාවුල් මගේ ආදරේ නැති කරගත්ත නිසා මම එයාව රජකමෙන් අයින් කළා.+ ඒත් ඔයාගේ පුතාට මම කවදාවත් එහෙම කරන්නේ නැහැ. මම හැමදාමත් එයාට නොසැලෙන ආදරයක් පෙන්නනවා. 16 ඔයාගේ රාජ්‍යයත් ඔයාගෙන් පැවතෙන රාජකීය පෙළපතත් කවදාවත් නැති වෙන්නේ නැහැ. ඔයාගේ සිංහාසනය හැමදාටම පවතිනවා.”’”+

17 දෙවියන් දර්ශනයකින් හෙළි කරපු ඒ හැම දේම නාතන් දාවිත්ට දැනුම් දුන්නා.+

18 ඒක ඇහුවාට පස්සේ දාවිත් රජ, යෙහෝවා ඉස්සරහට ගිහින් මෙහෙම යාච්ඤා කළා. “ශ්‍රේෂ්ඨතම පාලකයාණන් වන යෙහෝවා, ඔබ මං වෙනුවෙන් මෙච්චර දේවල් කරන්න මම කවුද? මම උසස් පවුලකින් ආපු කෙනෙක්ද?+ ඔබෙන් මෙච්චර ආශීර්වාද ලබන්න තරම් මම වටින කෙනෙක් නෙමෙයි. 19 ශ්‍රේෂ්ඨතම පාලකයාණන් වන යෙහෝවා, ඔබේ සේවකයා වන මං වෙනුවෙන් ඔබ මෙච්චර දේවල් කරලත් මගේ පෙළපත සෑහෙන කාලයක් පුරා පවතිනවා කියලත් ඔබ මට කිව්වා. ශ්‍රේෂ්ඨතම පාලකයාණන් වන යෙහෝවා දෙවියනි, ඔබ ඒ වගේ නියෝගයක්* දුන්නේ පොළොවේ ඉන්න හැම කෙනෙක්ම වෙනුවෙන්. 20 ශ්‍රේෂ්ඨතම පාලකයාණන් වන යෙහෝවා, ඔබේ සේවකයා වන මාව ඔබ හොඳින් හඳුනනවා.+ ඉතින් මම තව මොනවා කියන්නද? 21 ඔබ මේ හැම පුදුම දෙයක්ම කරලා ඔබේ සේවකයා වන මටත් ඒ ගැන දැන්නුවා.+ ඔබ ඒ දේවල් කළේ ඔබේම හදවතින් පෙලඹිලයි.* ඔබේ පොරොන්දු ඉටු කරන්නයි. 22 ශ්‍රේෂ්ඨතම පාලකයාණන් වන යෙහෝවා, ඔබ ඇත්තටම ශ්‍රේෂ්ඨ දෙවි කෙනෙක්.+ ඔබට සමාන වෙන කිසි කෙනෙක් නැහැ.+ ඔබ හැර වෙන කිසිම දෙවි කෙනෙකුත් නැහැ.+ අපි අහලා තියෙන හැම දේකින්ම ඒක ඔප්පු වෙනවා. 23 ඔබේ සෙනඟ වන ඊශ්‍රායෙල්වරුන්ට සමාන තවත් ජාතියක් ඉන්නවාද?+ එයාලව ඔබේ සෙනඟ කරගන්න ඕනෙ නිසා ඔබ එයාලව බේරගෙන+ එයාලා වෙනුවෙන් හිතාගන්නවත් බැරි, පුදුම දේවල් කරලා+ ඔබටම ශ්‍රේෂ්ඨ නමක් ඇති කරගත්තා.+ ඔබ ඊජිප්තුවෙන් බේරගත්ත ඔබේ සෙනඟ වෙනුවෙන් වෙනත් ජාතීන්වත් එයාලාගේ දෙවිවරුන්වත් දේශයෙන් පන්නලා දැම්මා. 24 ඔබ ඊශ්‍රායෙල්වරුන්ව හැමදාටම ඔබේම සෙනඟ විදිහට භාරගත්තා.+ යෙහෝවා, දැන් අපේ දෙවියන් ඔබයි.+

25 “යෙහෝවා දෙවියනි, ඔබේ සේවකයා ගැනත් එයාගෙන් පැවතෙන පෙළපත ගැනත් ඔබ කියපු දේ හැමදාටම ඒ විදිහටම ඉටු කරන්න කියලා මම ඔබෙන් ඉල්ලනවා. ඔබ පොරොන්දු වුණ හැම දෙයක්ම ඒ විදිහටම ඉටු වෙන්න ඕනේ!+ 26 ඔබේ නම හැමෝම ඉස්සරහා සදහටම ගෞරවයට පත් වෙන්න ඕනේ!+ එතකොට හැමෝම කියයි ‘ස්වර්ගයේ සේනාවල අධිපති වන යෙහෝවා තමයි ඊශ්‍රායෙල්වරුන්ගේ දෙවියන්’ කියලා. ඔබේ සේවකයා වන මගේ පෙළපත හැමදාටම ඔබ ඉස්සරහා පවතින්න ඕනේ!+ 27 ස්වර්ගයේ සේනාවල අධිපති වන යෙහෝවා, ඊශ්‍රායෙල්වරුන්ගේ දෙවියනි, ඔබ මට කිව්වා ‘මම ඔයාගෙන් රාජකීය පෙළපතක් බිහි කරනවා’+ කියලා. ඔබේ සේවකයා වන මට මෙහෙම යාච්ඤා කරන්න තරම් ධෛර්යයක් ලැබුණේ ඔබ ඒ ගැන මට දන්වපු නිසයි. 28 ශ්‍රේෂ්ඨතම පාලකයාණන් වන යෙහෝවා, සැබෑ දෙවියන් ඔබයි. ඔබේ සේවකයා වෙනුවෙන් මේ හැම යහපත් දෙයක්ම කරනවා කියලා ඔබ පොරොන්දු වුණා. මං දන්නවා ඔබ කියන හැම දෙයක්ම සත්‍යයයි කියලා.+ 29 ඒ නිසා ඔබේ සේවකයාගේ පෙළපතට දිගටම ආශීර්වාද කරන්න. ඒ පෙළපත හැමදාටම ඔබ ඉස්සරහා පවතින්න කියලා මං පතනවා!+ ශ්‍රේෂ්ඨතම පාලකයාණෙනි, යෙහෝවා දෙවියනි, ඔබ පොරොන්දු වුණ විදිහටම ඔබේ සේවකයාගේ පෙළපතට හැමදාටම ආශීර්වාද කරන්න.”+

8 ටික කාලෙකට පස්සේ දාවිත් පිලිස්තිවරු එක්ක සටන් කරලා+ එයාලව පැරැද්දුවා.+ ඒ වගේම පිලිස්තිවරුන්ට අයිති මෙතෙග්අම්මාහ් කියන ප්‍රදේශය දාවිත් යටත් කරගත්තා.

2 දාවිත් මෝවබ්වරුන්ටත් පහර දුන්නා.+ අල්ලගත්ත මෝවබ්වරුන්ට පේළියට බිම දිගා වෙන්න කියලා දාවිත් අණ කළා. ඊටපස්සේ ඒ මුළු පේළියම ලණුවකින් මැනලා ඒ පේළියේ හිටපු අයගෙන් තුනෙන් දෙකක් එයා මරලා දැම්මා.+ පස්සේ මෝවබ්වරු දාවිත්ට යටත් වෙලා එයාට කප්පම් ගෙවන්න පටන්ගත්තා.+

3 ෂොබාවල+ රජ වෙලා හිටිය රෙහොබ්ගේ පුතා වුණ හදද්එෂෙර් යුප්‍රටීස් ගඟ ළඟ තියෙන ප්‍රදේශය+ ආයෙත් එයාගේ යටතට ගන්න පිටත් වුණා. එයා එතනට යන අතරේදී දාවිත් එයාත් එක්ක සටන් කරලා එයාව පරාජය කළා. 4 හදද්එෂෙර්ට අයිති අසරුවන් 1,700කුත් පාබළ හමුදාවෙන් මිනිස්සු 20,000කුත් දාවිත් අල්ලගත්තා. අශ්ව රථ ඇදගෙන ගිය අශ්වයන් 100දෙනෙක්ගේ ඇරෙන්න එයා අනිත් හැම අශ්වයෙක්ගෙම කකුල් තුවාල කළා.+

5 දමස්කයේ හිටිය සිරියානුවන්+ ෂොබාවල රජ වන හදද්එෂෙර්ගේ උදව්වට ආවා. දාවිත් එයාලාගෙන් 22,000ක් මරලා දැම්මා.+ 6 දාවිත් සිරියාවේ දමස්කය කියන නගරයේ මුර කඳවුරු පිහිටෙව්වා. සිරියානුවනුත් දාවිත්ගේ දාසයෝ වෙලා එයාට කප්පම් ගෙව්වා. යෙහෝවා උදව් කරපු නිසා දාවිත් ගියගිය හැම තැනකදීම එයාට පුළුවන් වුණා සතුරන්ව පරද්දන්න.+ 7 දාවිත් හදද්එෂෙර්ගේ සේවකයන් ගාව තිබුණ රන් පලිස් යෙරුසලමට අරන් ගියා.+ 8 බෙටා සහ බෙරොතයි කියන නගරවල තිබුණ විශාල තඹ ප්‍රමාණයකුත් එයා අරන් ගියා. ඒ නගර අයිති වෙලා තිබුණේ හදද්එෂෙර් රජට.

9 දාවිත් හදද්එෂෙර් රජගේ මුළු හමුදාවම පරාජයට පත් කළා+ කියලා හමාත්වල+ රජ වුණ තොයිට ආරංචි වුණා. 10 ඉතින් එයා දාවිත්ගේ සැප දුක් අහන්නත් හදද්එෂෙර්ව පරද්දපු එකට සුබ පතන්නත් එයාගේ පුතා වන යෝරාම්ව දාවිත් ළඟට යැව්වා. (මොකද හදද්එෂෙර් රජ නිතරම වගේ තොයි රජත් එක්ක සටනට ඇවිත් තිබුණා.) යෝරාම් එහෙට ගියේ රන්, රිදී සහ තඹවලින් හදපු භාණ්ඩත් අරගෙනයි. 11 දාවිත් රජ ඒ භාණ්ඩයි, එයා පරාජය කරපු ජාතීන්ගෙන් ගත්ත රන් සහ රිදියි යෙහෝවා දෙවියන්ට කැප කළා.+ 12 ඒ විදිහට දාවිත් සිරියානුවන්ගෙන්, මෝවබ්වරුන්ගෙන්,+ අම්මොන්වරුන්ගෙන්, පිලිස්තිවරුන්ගෙන්,+ අමලෙක්වරුන්ගෙන්+ සහ ෂොබාවල රජ වෙලා හිටිය රෙහොබ්ගේ පුතා වන හදද්එෂෙර්ගෙන්+ කොල්ල කාපු හැම වස්තුවක්ම දෙවියන්ට කැප කළා. 13 ලුණු නිම්නයේදී ඒදොම්වරු 18,000ක්ව මරලා දාපු නිසාත්+ දාවිත්ගේ නම හුඟක් ප්‍රසිද්ධ වුණා. 14 ඒදොම් දේශයේ හැම තැනකමත් දාවිත් මුර කඳවුරු පිහිටෙව්වා. ඒදොම්වරු හැමෝම දාවිත්ගේ සේවකයන් වුණා.+ දාවිත් ගියගිය හැම තැනකදීම එයාගේ සතුරන්ව පරාජය කරන්න යෙහෝවා දාවිත්ට උදව් කළා.+

15 දාවිත් දිගටම මුළු ඊශ්‍රායෙල් දේශයම පාලනය කළා.+ එයා හැමෝටම+ යුක්තිය ඉටු කරපු, ධර්මිෂ්ඨ පාලකයෙක් වුණා.+ 16 එයාගේ හමුදාපති වෙලා හිටියේ ෂෙරුයියාගේ පුතා වුණ යෝවාබ්.+ රජගේ වාර්තාකරු විදිහට සේවය කළේ අහිලුද්ගේ පුතා වුණ යෙහෝෂපාට්.+ 17 අහිතුබ්ගේ පුතා වුණ සාදොක්+ සහ අබියාතර්ගේ පුතා වුණ අහිමෙලෙක් පූජකයන් විදිහට සේවය කළා. ලේකම් විදිහට වැඩ කළේ සෙරායා. 18 යෙහෝයාදාගේ පුතා වුණ බෙනායා+ කෙරෙතිවරුන්ගේ සහ පෙලෙතිවරුන්ගේ+ අධිපතියා විදිහට වැඩ කළා. දාවිත්ගේ පුතාලත් උසස් නිලධාරීන්* විදිහට සේවය කළා.

9 දවසක් දාවිත් එයාගේ සේවකයන්ගෙන් මෙහෙම ඇහුවා. “සාවුල්ගේ පවුලේ කවුරු හරි තාමත් ජීවත් වෙනවාද? ඉන්නවා නම් මට කියන්න. යොනාතාන්ට පොරොන්දු වුණ විදිහට මට ඕනෙ ඒ කෙනාට ආදරෙන් සලකන්න.”+ 2 සාවුල්ගේ ගෙදර සේවය කරපු ෂීබා+ කියලා කෙනෙක් හිටියා. දාවිත්ගේ සේවකයන් එයාව දාවිත් ළඟට ගෙන්නගත්තා. දාවිත් රජ එයාගෙන් මෙහෙම ඇහුවා. “ෂීබා කියන්නේ ඔයාටද?” එතකොට ෂීබා “ඔව් ස්වාමීනි, මං ඔබේ සේවකයා වන ෂීබා” කියලා රජට කිව්වා. 3 ඊටපස්සේ රජ එයාගෙන් මෙහෙම ඇහුවා. “සාවුල්ගේ පවුලේ එක් කෙනෙක් හරි තාම ජීවතුන් අතරේ ඉන්නවාද? එහෙම කෙනෙක් ඉන්නවා නම් මට ඕනෙ දෙවියන් පෙන්නනවා වගේ නොසැලෙන ආදරයක් එයාට පෙන්නන්න.” එතකොට ෂීබා කිව්වා “යොනාතාන්ගේ පුතෙක් තාම ජීවතුන් අතරේ ඉන්නවා. එයාගේ කකුල් දෙකම කොරයි”+ කියලා. 4 රජ එයාගෙන් ඇහුවා “එයා කොහෙද ඉන්නේ” කියලා. ෂීබා මෙහෙම කිව්වා. “එයා ඉන්නේ ලොදේබාර්වල තියෙන අමියෙල්ගේ පුතා වන මාකීර්ගේ+ ගෙදර.”

5 දාවිත් ඒ වෙලාවෙම ලොදේබාර්වල තිබුණ අමියෙල්ගේ පුතා වන මාකීර්ගේ ගෙදරට සේවකයන්ව යවලා යොනාතාන්ගේ පුතාව ගෙන්නගත්තා. 6 සාවුල්ගේ මුනුපුරා ඒ කියන්නේ යොනාතාන්ගේ පුතා වන මෙෆිබොෂෙත් දාවිත් ඉස්සරහට ඇවිත් බිම දණගහගෙන බිමටම ඔළුව පහත් කළා. දාවිත් “මෙෆිබොෂෙත්” කියලා එයාට කතා කරද්දී මෙෆිබොෂෙත් “කියන්න මගේ ස්වාමීනි” කියලා දාවිත්ට කිව්වා. 7 දාවිත් එයාට මෙහෙම කිව්වා. “බය වෙන්න එපා. ඔයාගේ තාත්තා යොනාතාන්ට මං පොරොන්දුවක් වුණා. ඒ නිසා මම ඔයාට ආදරෙන්*+ සලකලා ඔයාව හොඳින් බලාගන්නවා. ඔයාගේ සීයා සාවුල්ට අයිති ඉඩම් ඔක්කොම මං ආයෙත් ඔයාට පවරනවා. ඔයාට පුළුවන් හැමදාම මාත් එක්ක එකට වාඩි වෙලා කෑම කන්න.”+

8 ඒක ඇහුවාම මෙෆිබොෂෙත් එයාගේ ඔළුව බිමටම පහත් කරලා දාවිත්ට මෙහෙම කිව්වා. “මං හරියට මැරුණු බල්ලෙක්+ වගේ. මං වගේ කෙනෙක්ට ඇයි ඔබ මෙච්චර ආදරෙන් සලකන්නේ?” 9 ඊටපස්සේ රජ සාවුල්ගේ සේවකයෙක් වුණ ෂීබාට එන්න කියලා මෙහෙම කිව්වා. “සාවුල්ටයි, එයාගේ පවුලේ අයටයි අයිති වෙලා තිබුණ හැම දෙයක්ම මං ඔයාගේ ස්වාමියාගේ මුනුපුරාට භාර දෙනවා.+ 10 ඔයායි, ඔයාගේ පුතාලයි, ඔයාගේ සේවකයනුයි එයා වෙනුවෙන් ගොවිතැන් කරන්න. ඒ අස්වැන්නෙන් ඔයාගේ ස්වාමියාගේ මුනුපුරාගේ පවුලේ අයට කන්න දෙන්න. ඒත් ඔයාගේ ස්වාමියාගේ මුනුපුරා වන මෙෆිබොෂෙත් හැමදාම කෑම කන්නේ මං එක්කයි.”+

ෂීබාට පුතාලා 15දෙනෙකුත් සේවකයෝ 20දෙනෙකුත් හිටියා.+ 11 ෂීබා, රජට මෙහෙම කිව්වා. “මගේ ස්වාමීනි, ඔබේ සේවකයා වන මම ඔබ අණ කරපු විදිහටම කරන්නම්.” ඉතින් මෙෆිබොෂෙත් රජගේ පුතෙක් වගේ දාවිත් එක්ක* එකට වාඩි වෙලා කෑම කෑවා. 12 මෙෆිබොෂෙත්ට මිකා+ කියලා පොඩි පුතෙක් හිටියා. ෂීබාගේ ගෙදර හිටපු හැමෝම මෙෆිබොෂෙත්ට සේවය කළා. 13 මෙෆිබොෂෙත් ජීවත් වුණේ යෙරුසලමේ. එයා හැම දවසකම රජත් එක්ක එකට වාඩි වෙලා කෑම කෑවා.+ එයාගේ කකුල් දෙකම කොර වෙලයි තිබුණේ.+

10 පස්සේ කාලෙක අම්මොන්වරුන්ගේ+ රජ මැරුණා. ඊටපස්සේ රජ වුණේ එයාගේ පුතා වුණ හානුන්.+ 2 ඒ ගැන දාවිත්ට ආරංචි වුණාම එයා මෙහෙම කිව්වා. “නාහාෂ් රජ ජීවතුන් අතරේ ඉද්දී එයා මට ගොඩක් ආදරෙන්, කරුණාවෙන්* සැලකුවා. මාත් එයාගේ පුතා හානුන්ට ඒ විදිහටම සලකන්න ඕනේ.” තාත්තාගේ මරණය නිසා දුකෙන් ඉන්න හානුන්ව සනසන්න දාවිත් එයාගේ සේවකයන් කීපදෙනෙක්ව යැව්වා. හැබැයි දාවිත්ගේ සේවකයන් අම්මොන්වරුන්ගේ දේශයට ආවාම 3 ඒ දේශයේ අධිපතීන් එයාලාගේ ස්වාමියා වුණ හානුන්ට මෙහෙම කිව්වා. “ඔබ හිතනවාද දාවිත් ඔබව සනසන්න මිනිස්සුන්ව එවලා තියෙන්නේ ඔබේ තාත්තාට ගෞරවයක් විදිහටයි කියලා? අපේ නගරේ ගැන ඔත්තු බලලා ඒක අල්ලගන්නයි එයාලව මෙහෙට එවලා තියෙන්නේ.” 4 ඒක ඇහුවාම හානුන් රජ, දාවිත්ගේ සේවකයන්ගේ රැවුලෙන් එක පැත්තක් සම්පූර්ණයෙන්ම කපලා,+ තට්ටම් පේන විදිහට එයාලාගේ ඇඳුම් කොටටම කැපුවා. ඊටපස්සේ එයාලව එහෙන් පිටත් කරලා යැව්වා. 5 සිද්ධ වුණ දේ ආරංචි වුණාම දාවිත් ඉක්මනින්ම එයාලව හම්බ වෙන්න පිරිසක්ව යැව්වා. මොකද වෙච්ච දේ නිසා ඒ අය හිටියේ හුඟක් ලැජ්ජාවෙන්. ඉතින් දාවිත් එයාලට මෙහෙම දන්වලා යැව්වා. “ඔයාලාගේ රැවුල් ආයෙත් වැවෙන කල් යෙරිකෝවට වෙලා ඉන්න.+ ඊටපස්සේ ආයෙත් එන්න.”

6 අම්මොන්වරු දැනගත්තා දාවිත් එයාලත් එක්ක ඉන්නේ කේන්තියෙන් කියලා. ඒ නිසා එයාලා බෙත්රෙහොබ්වලයි,+ ෂොබාවලයි+ ජීවත් වුණ සිරියානුවන්ගේ පාබළ හමුදාවෙන් 20,000කුත් මයකාවල+ රජ සහ එයාගේ සෙබළු 1,000කුත් ඉෂ්ටොබ්වල* සෙබළු 12,000කුත් කුලියට ගත්තා.+ 7 ඒ ගැන දැනගත්තාම දාවිත් යෝවාබ්වයි, එයාගේ මුළු හමුදාවයි සටනට පිටත් කරලා යැව්වා. එයාගේ හොඳම සෙබළුත් ඒ අතරේ හිටියා.+ 8 අම්මොන්වරු එයාලාගේ නගරේ දොරටුව ඉස්සරහට ගිහින් සටන් කරන්න පෙළ ගැහුණා. රෙහොබ් සහ ෂොබාවලින් ආපු සිරියානුවනුයි, ඉෂ්ටොබ්වලින්* සහ මයකාවලින් ආපු සෙබළුයි රැස් වෙලා හිටියේ එළිමහනේ.

9 සතුරු හමුදාව ඉස්සරහිනුයි, පිටිපස්සෙනුයි පහර දෙන්න බලාගෙන ඉන්නවා කියලා දැක්කාම යෝවාබ්, ඊශ්‍රායෙල් හමුදාවේ හිටපු දක්ෂම සෙබළුන් කණ්ඩායමක් තෝරගෙන සිරියානුවන්ට පහර දෙන්න එයාලව පෙළ ගැස්සුවා.+ 10 එයා ඉතුරු සෙබළුන්ව එයාගේ සහෝදරයා වුණ අබිෂයිට+ භාර දීලා එයාලට කිව්වා අම්මොන්වරුන්ට+ පහර දෙන්න පෙළ ගැහෙන්න කියලා. 11 ඊටපස්සේ එයා අබිෂයිට මෙහෙම කිව්වා. “සිරියානුවන් අපිව පරද්දනවා කියලා ඔයාලා දැක්කොත් ඔයාලා අපේ උදව්වට එන්න. අම්මොන්වරු එක්ක සටන් කරන්න ඔයාලට අමාරු වුණොත් අපි ඔයාලාගේ උදව්වට එන්නම්. 12 අපි හිතට ධෛර්යය අරන් සටන් කරමු!+ අපේ සෙනඟ වෙනුවෙනුත් අපේ දෙවියන්ගේ නුවරවල් වෙනුවෙනුත් අපි එඩිතරව සටන් කරන්න ඕනේ. යෙහෝවාට හොඳයි කියලා හිතෙන දේ ඔහු අනිවාර්යයෙන්ම කරයි.”+

13 යෝවාබ් සහ එයාගේ හමුදාව සිරියානුවන්ට පහර දුන්නා. සිරියානුවන් පලා ගියා.+ 14 සිරියානුවන් පලා යනවා දැක්කාම අබිෂයි එක්ක සටන් කරකර හිටපු අම්මොන්වරුත් පලා ගිහින් නගරයට ඇතුල් වුණා. ඊටපස්සේ යෝවාබ් ආපහු යෙරුසලමට ගියා.

15 ඊශ්‍රායෙල්වරු අතින් පරාජයට පත් වුණ සිරියානුවන් ආයෙත් එයාලාගේ සේනාව රැස් කරගෙන සටන් කරන්න ලෑස්ති වුණා.+ 16 හදද්එෂෙර්+ රජ පණිවිඩකරුවන් යවලා මහ ගඟ*+ අවට ප්‍රදේශයේ හිටපු සිරියානුවන්ට එන්න කිව්වා. ඊටපස්සේ එයාලා හදද්එෂෙර්ගේ හමුදාපති වුණ ෂෝබාක් එක්ක හෙලාම්වලට ආවා.

17 ඒ ගැන දාවිත්ට ආරංචි වුණ ගමන්ම එයා මුළු හමුදාවම රැස් කරගෙන යොර්දාන් ගඟෙන් එගොඩ වෙලා හෙලාම්වලට ගියා. සිරියානුවන්ගේ හමුදාව පෙළ ගැහිලා දාවිත්ට විරුද්ධව සටන් කරන්න පටන්ගත්තා.+ 18 ඒත් දාවිත් සිරියානුවන්ගේ අශ්ව රථ පදවන අය 700කුත් අසරුවන් 40,000කුත් එයාලාගේ හමුදාපති වුණ ෂෝබාක්වත් මරලා එයාලව පැරැද්දුවා.+ ඒ නිසා සිරියානුවන් ඊශ්‍රායෙල්වරුන්ගෙන් පලා ගියා. 19 හදද්එෂෙර් රජ යටතේ හිටපු හැම රජෙක්වම ඊශ්‍රායෙල්වරු පරද්දපු නිසා එයාලා ඉක්මනටම ගිහින් ඊශ්‍රායෙල්වරු එක්ක සමාදාන වුණා. එයාලා ඊශ්‍රායෙල්වරුන්ට සේවය කරන්නත් පටන්ගත්තා.+ එදායින් පස්සේ අම්මොන්වරුන්ට උදව් කරන්න සිරියානුවන් බය වුණා.

11 අලුත් අවුරුද්දක් පටන්ගන්නවත් එක්කම* දාවිත්, යෝවාබ්වයි, එයාගේ සේවකයන්වයි, මුළු ඊශ්‍රායෙල් හමුදාවයි අම්මොන්වරුන්ට පහර දෙන්න පිටත් කරලා යැව්වා. එයාලා ගිහින් රබ්බා+ නගරය වැටලුවා. (සාමාන්‍යයෙන් රජවරු යුද්දෙට ගියේ අවුරුද්දේ මුල් කාලයේදී.) ඒත් දාවිත් යෙරුසලමේ නැවතුණා.+

2 දවසක් හැන්දෑ වරුවක දාවිත් එයාගේ ඇඳෙන් නැඟිටලා රජමාලිගාවේ උඩුමහලට* ගිහින් ඒ මේ අත ඇවිද ඇවිද හිටියා. ඒ වෙලාවේ එයා දැක්කා කාන්තාවක් නානවා. ඒ කාන්තාව හුඟක් ලස්සනයි. 3 දාවිත් එයා ගැන තොරතුරු හොයලා බලද්දී එයාට මෙහෙම දැනගන්න ලැබුණා. “එයාගේ නම බැත්ෂෙබා.+ එයා එලියාම්ගේ+ දුව. එයා හිත්තී ජාතික+ උරියාගේ+ බිරිඳ.” 4 ඒ කාලයේදී බැත්ෂෙබා පවිත්‍ර වීමේ පිළිවෙතක් අනුගමනය කරමිනුයි හිටියේ.*+ දාවිත් මිනිස්සුන්ව යවලා බැත්ෂෙබාව මාලිගාවට ගෙන්නගෙන+ එයා එක්ක ලිංගික සම්බන්ධකම් පැවැත්තුවා.+ ඊටපස්සේ බැත්ෂෙබා ගෙදර ගියා.

5 බැත්ෂෙබා දැනගත්තාම එයා ගැබ් අරන් කියලා “මට දරුවෙක් ලැබෙන්න ඉන්නවා” කියලා එයා දාවිත්ට දන්වලා යැව්වා. 6 ඒක දැනගත්තාම දාවිත් යෝවාබ්ට පණිවිඩයක් යවලා මෙහෙම කිව්වා. “හිත්තී ජාතික උරියාව මං ළඟට එවන්න.” ඉතින් යෝවාබ් උරියාව දාවිත් ළඟට යැව්වා. 7 උරියා ආවාම යෝවාබ්ගේ සහ සෙබළුන්ගේ සැප දුක් ගැනයි, යුද්ධයේ තොරතුරු ගැනයි දාවිත් එයාගෙන් ඇහුවා. 8 ඊටපස්සේ දාවිත් උරියාට කිව්වා “ඔයා දැන් ගෙදර ගිහින් ටිකක් විවේක ගන්න”* කියලා. උරියා මාලිගාවෙන් පිටත් වුණාට පස්සේ දාවිත් එයාගේ සේවකයන් අතේ උරියාට තෑග්ගක්* යැව්වා. 9 ඒත් උරියා ගෙදර ගියේ නැහැ. එයාගේ ස්වාමියාගේ අනිත් සේවකයන් එක්ක එයා රජමාලිගාවේ දොරකඩ ළඟ නිදාගත්තා. 10 “උරියා ගෙදර ගියේ නැහැ” කියලා රජට දැනගන්න ලැබුණාම එයා උරියාගෙන් මෙහෙම ඇහුවා. “ඔයා හුඟක් දුර ඉඳන් නේද ආවේ? ඉතින් ඇයි ඔයා ගෙදර යන්නේ නැත්තේ?” 11 එතකොට උරියා දාවිත්ට මෙහෙම කිව්වා. “ගිවිසුම් පෙට්ටිය+ තියෙන්නේ කූඩාරමක. ඊශ්‍රායෙල් පුරුෂයන් සහ යූදා පුරුෂයන් ඉන්නෙත් කූඩාරම්වල. මගේ ස්වාමියා වන යෝවාබ් සහ එයාගේ සේවකයන් එළිමහනේ කඳවුරු බැඳගෙන ඉන්නවා. මේ වගේ වෙලාවක මම කොහොමද ගෙදර ගිහින් කාලා බීලා මගේ බිරිඳත් එක්ක සතුටු වෙන්නේ?+ මං ඔබ ඉස්සරහා දිවුරලා කියන්නම් මට නම් කවදාවත් ඒ වගේ දෙයක් කරන්න බැහැ!”

12 ඉතින් දාවිත් උරියාට කිව්වා “එහෙනම් අදත් ඔයා මෙහේ ඉන්න. හෙට මම ඔයාව ආපහු යවන්නම්” කියලා. ඒ නිසා උරියා එදාත් ඊට පහුවෙනිදාත් යෙරුසලමේ නැවතිලා හිටියා. 13 දාවිත් උරියාට කිව්වා එයාත් එක්ක කෑම කන්න එන්න කියලා. එයා ආවාම දාවිත් උරියාට වෙරි වෙන කල්ම බොන්න දුන්නා. ඒත් උරියා එදා රෑත් ගෙදර ගියේ නැහැ. එයා එයාගේ ස්වාමියාගේ සේවකයන් නිදාගත්ත තැනම නිදාගත්තා. 14 පහුවෙනිදා උදේ දාවිත් යෝවාබ්ට ලිපියක් ලියලා ඒක උරියාගේ අතේ යැව්වා. 15 එයා ඒ ලිපියේ මෙහෙම ලියලා තිබුණා. “හුඟක් දරුණු විදිහට සටන් කරන තැනක් බලලා උරියාව සතුරන් ඉස්සරහටම යවන්න. ඊටපස්සේ ඔයාලා හැමෝම එතනින් අයින් වෙලා සතුරන් අතින් එයාට මැරුම් කන්න දෙන්න.”+

16 යෝවාබ් නගරය ගැන හොඳ අවධානයකින් හිටපු නිසා එයා දැනගෙන හිටියා දක්ෂතම සටන්කරුවන් ඉන්නේ කොහෙද කියලා. ඉතින් එයා ඒ වගේ තැනක් බලලා එතනට උරියාව යැව්වා. 17 ඒ නගරයේ හිටපු මිනිස්සු එළියට ඇවිත් යෝවාබ්ට විරුද්ධව සටන් කරන්න පටන්ගත්තා. ඒ වෙලාවේ දාවිත්ගේ සේවකයන් කීපදෙනෙක්ම මැරුණා. හිත්තී ජාතික උරියාත් මැරුම් කෑවා.+ 18 යෝවාබ් යුද්ධය ගැන හැම තොරතුරක්ම දාවිත්ට දන්වලා යැව්වා. 19 ඒ පණිවිඩය අරන් යන කෙනාට එයා මෙහෙම කිව්වා. “යුද්දේදී වුණ හැම දෙයක්ම රජට කිව්වාම 20 රජට කේන්ති ගිහින් මෙහෙම කියන්න ඉඩ තියෙනවා. ‘ඇයි නගරේ ළඟටම ගිහින් සටන් කෙරුවේ? එයාලා පවුර උඩ ඉඳන් පහර දෙයි කියලා ඔයාලා දැනන් හිටියේ නැද්ද? 21 ඇයි මතක නැද්ද තේබේෂ්වලදී යෙරුබ්බෙෂෙත්ගේ+ පුතා අබිමෙලෙක්ට+ වුණ දේ? ගෑනු කෙනෙක් පවුර උඩ ඉඳන් එයාගේ ඔළුවට ඇඹරුම් ගලක්* අතඇරලයි එයාව මැරුවේ. ඒක දැන දැනත් ඔයාලා පවුර ළඟටම ගියේ ඇයි?’ එතකොට ඔයා රජට මෙහෙම කියන්න. ‘ඔබේ සේවකයා වුණ උරියාත් මැරුණා.’”

22 ඉතින් පණිවිඩකරු යෝවාබ් කියපු හැම දෙයක්ම දාවිත්ට කිව්වා. 23 එයා දාවිත්ට කිව්වේ මෙහෙමයි. “ඒ මිනිස්සු අපිට වඩා බලවත්. එයාලා නගරෙන් එළියට ඇවිත් අපිත් එක්ක සටන් කළා. අපිත් නගරේ දොරටුව වෙන කල්ම එයාලව පන්නගෙන ගිහින් සටන් කළා. 24 ඒත් පවුර උඩ හිටපු දුනුවායෝ ඔබේ සේවකයන්ට පහර දුන්නා. ඒ වෙලාවේ රජගේ සේවකයන් කීපදෙනෙක්ම මැරුණා. ඔබේ සේවකයා වුණ හිත්තී ජාතික උරියාත් මැරුණා.”+ 25 ඒක ඇහුවාම දාවිත් පණිවිඩකරුට මෙහෙම කිව්වා. “ඔයා යෝවාබ්ට මෙහෙම කියන්න. ‘සිද්ධ වුණ දේ ගැන දුක් වෙන්න එපා. යුද්දෙකදී අනිවාර්යයෙන්ම ටිකදෙනෙක් හරි මැරෙනවා. ඒ නගරෙට ඊට වඩා දරුණු විදිහට පහර දීලා ඒක යටත් කරගන්න.’+ එහෙම කියලා යෝවාබ්ව දිරිගන්වන්න.”

26 තමන්ගේ සැමියා මැරුණා කියලා උරියාගේ බිරිඳට ආරංචි වුණාම එයා අඬඅඬ ඒ ගැන ගොඩක් දුක් වුණා. 27 වැලපෙන කාලය ඉවර වුණ ගමන්ම දාවිත් මිනිස්සුන්ව යවලා බැත්ෂෙබාව මාලිගාවට ගෙන්නගත්තා. පස්සේ දාවිත් එයාව විවාහ කරගත්තා.+ ටික කාලෙකින් බැත්ෂෙබාට පුතෙක් ලැබුණා. ඒත් යෙහෝවා දෙවියන් දාවිත් කරපු දේ සැලකුවේ හරිම දුෂ්ට දෙයක් විදිහටයි.+

12 යෙහෝවා දෙවියන් දාවිත් ළඟට නාතන්ව+ යැව්වා. නාතන් ගිහින් දාවිත්ට+ මෙහෙම කිව්වා. “එක නගරෙක මිනිස්සු දෙන්නෙක් හිටියා. එක් කෙනෙක් පොහොසත්. අනිත් කෙනා දුප්පත්. 2 පොහොසත් කෙනා ළඟ හුඟක් ගවයෝයි, බැටළුවෝයි හිටියා.+ 3 ඒත් දුප්පත් කෙනා ගාව හිටියේ එකම එක බැටළු පැටියෙක් විතරයි. ඌ ගෑනු සතෙක්.+ එයා සල්ලි දීලයි ඌව අරන් තිබ්බේ. ඒ මිනිසා හුඟක් ආදරෙන් ඒ බැටළු පැටියාව රැකබලා ගත්තා. එයාගේ දරුවන් එක්කමයි ඌ හැදුණේ වැඩුණේ. එයා කන බොන දෙයින්මයි ඌටත් කන්න බොන්න දුන්නේ. පැටියා නිදාගත්තෙත් එයා එක්කමයි. එයා ඌට සැලකුවේ එයාගෙම දුවෙක්ට වගෙයි. 4 දවසක් පොහොසත් කෙනාගේ ගෙදරට අමුත්තෙක් ආවා. එයාට ඕනෙ වුණා ඒ අමුත්තාට කෑම වේලක් දෙන්න. ඒත් එයා එයාගේ බැටළුවෙක්වවත් ගවයෙක්වවත් ගන්නේ නැතුව දුප්පත් කෙනාගේ බැටළු පැටියාව ගත්තා. එයා ඌව මරලා කෑමක් ලෑස්ති කරලා අමුත්තාට කන්න දුන්නා.”+

5 ඒක අහපු ගමන් දාවිත්ට හුඟක් කේන්ති ගිහින් නාතන්ට මෙහෙම කිව්වා. “ජීවමාන දෙවි යෙහෝවා ඉස්සරහා+ මං දිවුරලා කියනවා ඒ දේ කරපු මිනිහාව මරලා දාන්න ඕනේ! 6 ඒ මිනිහා වැඩ කළේ කිසිම හිතක් පපුවක් නැති විදිහටයි. එයා මරපු බැටළු පැටියා වෙනුවට ඒ දුප්පත් කෙනාට තව බැටළු පැටව් හතරදෙනෙක්ම දෙන්න ඕනේ.”+

7 එතකොට නාතන් දාවිත්ට මෙහෙම කිව්වා. “ඔයා තමයි ඒ මිනිහා! ඊශ්‍රායෙල්වරුන්ගේ දෙවි යෙහෝවා ඔයාට කියන්නේ මෙහෙමයි. ‘ඊශ්‍රායෙල් දේශයේ රජ හැටියට ඔයාව අභිෂේක කළේ මමයි.+ සාවුල්ගෙන් ඔයාව බේරගත්තෙත් මමයි.+ 8 මම ඔයාගේ ස්වාමියාගේ රාජ්‍යයත්+ එයාට අයිති හැම දේමත් ඔයාට දුන්නා. එයාගේ භාර්යාවනුත්+ ඔයාට ගන්න ඉඩ දුන්නා. මං යූදා ගෝත්‍රයේ විතරක් නෙමෙයි ඊශ්‍රායෙල්වරුන්ගේ අනිත් හැම ගෝත්‍රයකමත් රජ+ විදිහට ඔයාව පත් කළා. ඔයා මගෙන් තවත් දේවල් ඉල්ලුවා නම් මං ඒවාත් ඔයාට දෙන්න කැමැත්තෙන් හිටියා.+ 9 මං ඔයා වෙනුවෙන් ඒ හැම දේම කරලත් ඇයි ඔයා යෙහෝවා වන මගේ වචනය සැහැල්ලුවට අරන් මේ වගේ දුෂ්ට දෙයක් කළේ? ඔයා හිත්තී ජාතික උරියාව අම්මොන්වරුන් ලවා මරලා දැම්මා!+ ඊටපස්සේ එයාගේ බිරිඳව ඔයාගේ බිරිඳ විදිහට ගත්තා.+ 10 හිත්තී ජාතික උරියාගේ බිරිඳව විවාහ කරගෙන ඔයා මට කළේ ලොකු නින්දාවක්. ඒ නිසා ඔයාගේ පවුලේ අයට හැමදාමත් විපත්ති අද්දකින්න* සිද්ධ වෙයි.’+ 11 යෙහෝවා ඔයාට මෙහෙමත් කියනවා. ‘ඔයාගෙම පවුලේ අය නිසා ඔයාට හුඟක් පීඩා විඳින්න වෙනවා.+ ඔයාගේ ඇස් පනාපිටම මං ඔයාගේ භාර්යාවන්ව අරගෙන වෙන කෙනෙක්ට* දෙනවා.+ එයා හැමෝම ඉස්සරහා ඔයාගේ භාර්යාවන් එක්ක ලිංගික සම්බන්ධකම් පවත්වයි.+ 12 ඔයා මේ දේ කළේ රහසින්.+ ඒත් මම මුළු ඊශ්‍රායෙල් සෙනඟ ඉස්සරහා, හැමෝටම පේන්න ඒ දේ වෙන්න සලස්සනවා.’”

13 ඒක ඇහුවාම දාවිත් “මම යෙහෝවා දෙවියන්ට විරුද්ධව පව් කළා”+ කියලා නාතන්ට කිව්වා. එතකොට නාතන් දාවිත්ට මෙහෙම කිව්වා. “යෙහෝවා ඔයාගේ වරදට සමාව දෙනවා.+ ඒ නිසා ඔයා දැන් මැරෙන්නේ නැහැ.+ 14 ඒත් ඔයා යෙහෝවාට කළේ ලොකු නින්දාවක්. ඒ නිසා අලුත ඉපදුණ ඔයාගේ දරුවා මැරෙනවා.”

15 ඊටපස්සේ නාතන් ගෙදර ගියා.

උරියාගේ බිරිඳට ඉපදුණ දරුවාට යෙහෝවා පහර දුන්න නිසා දරුවා ලෙඩ වුණා. 16 දාවිත් දරුවාව බේරලා දෙන්න කියලා දිගටම සැබෑ දෙවියන්ට කන්නලව් කළා. එයා හැමදාම කාමරේට ගිහින් මුළු රෑම බිම වැතිරිලා හිටියා. එයා කිසිම දෙයක් කෑවෙත් නැහැ.+ 17 මාලිගාවේ හිටිය නිලධාරීන් එයාව නැඟිට්ටවන්න හැදුවත් එයා නැඟිට්ටේ නැහැ. එයාලා එක්ක කෑම කන්න ආවෙත් නැහැ. 18 හත්වෙනි දවසේදී දරුවා මැරුණා. ඒත් දරුවා මැරුණා කියලා දාවිත්ට කියන්න එයාගේ සේවකයන් බය වුණා. එයාලා ඒ වෙලාවේ මෙහෙම කතා වුණා. “දරුවා ජීවතුන් අතරේ ඉද්දී අපි එයාට කතා කළාම එයා අපි කියපු දේ අහන්නවත් කැමති වුණේ නැහැ. ඉතින් දැන් අපි කොහොමද එයාට ‘දරුවා මැරුණා’ කියලා කියන්නේ? එහෙම කිව්වොත් එයා මොනවා කරගනීද දන්නේ නැහැ!”

19 සේවකයන් රහසින් කතා කරනවා දැක්කාම දාවිත්ට තේරුණා දරුවා මැරිලා කියලා. ඒ නිසා එයා සේවකයන්ගෙන් ඇහුවා “දරුවා මැරුණාද” කියලා. එතකොට එයාලා “ඔව්, දරුවා මැරුණා” කියලා කිව්වා. 20 ඒක ඇහුවාම දාවිත් නැඟිටලා ඇඟපත හෝදගෙන ඇඟේ තෙල් ගාගෙන+ අලුත් ඇඳුම් ඇඳගත්තා. ඊටපස්සේ එයා යෙහෝවාගේ ගෘහයට+ ගිහින් දෙවියන්ට නමස්කාර කළා. ටික වෙලාවකට පස්සේ එයා මාලිගාවට ගිහින් කන්න මොනවා හරි දෙන්න කියලා සේවකයන්ට කිව්වා. සේවකයන් ගෙනාපු කෑම ටික එයා කෑවා. 21 ඒ වෙලාවේ එයාගේ සේවකයන් එයාගෙන් මෙහෙම ඇහුවා. “දරුවා ජීවත් වෙලා ඉද්දී ඔබ කිසිම දෙයක් කන්නේ නැතුව අඬඅඬ හිටියා. ඒත් දරුවා මැරුණා කියලා දැනගත්ත ගමන් ඔබ නැඟිටලා කෑම කෑවා. ඇයි ඔබ එහෙම කළේ?” 22 එතකොට එයා සේවකයන්ට මෙහෙම කිව්වා. “දරුවා ජීවත් වෙලා ඉද්දී මං කන්නේ නැතුව+ දුකින් හිටියා තමයි. මං හිතුවා ‘සමහරවිට යෙහෝවා මට කරුණාව පෙන්නලා දරුවාට ජීවත් වෙන්න ඉඩ දෙයි’+ කියලා. 23 ඒත් දරුවා මැරුණාට පස්සේ කන්නේ නැතුව ඉන්න එකෙන් වැඩක් තියෙනවාද? එහෙම කළා කියලා මට ආයෙත් දරුවාව ජීවත් කරවන්න පුළුවන්ද?+ දරුවාට දැන් මං ළඟට එන්න බැහැ.+ කවදා හරි දවසක මාත් එයා වගේ මැරෙනවා.”+

24 දාවිත් එයාගේ බිරිඳ වන බැත්ෂෙබාව සැනසුවා.+ පස්සේ දාවිත් එයාත් එක්ක ලිංගික සම්බන්ධකම් පැවැත්තුවා. කාලයක් යද්දී බැත්ෂෙබාට පුතෙක් ලැබුණා. එයාලා ඒ පුතාට නම තිබ්බේ සලමොන්* කියලා.+ යෙහෝවා ඒ දරුවාට හුඟක් ආදරේ කළා.+ 25 ඔහු අනාගතවක්තෘ නාතන් මාර්ගයෙන් කිව්වා+ දරුවාට යෙදිදීයා* කියන නම තියන්න කියලා. මොකද යෙහෝවාට දරුවා ගැන තිබුණේ ලොකු ආදරයක්.

26 ඔය අතරේ යෝවාබ් රබ්බා+ නගරයේ හිටපු අම්මොන්වරුන්ට+ විරුද්ධව දිගටම සටන් කරලා එයාලාගේ අගනුවර අල්ලගත්තා.+ 27 ඊටපස්සේ යෝවාබ් පණිවිඩකරුවන් අතේ දාවිත්ට මෙහෙම දැන්නුවා. “මම රබ්බා නගරෙට විරුද්ධව සටන් කරලා+ එහේ ජලය තියෙන ප්‍රදේශය* යටත් කරගත්තා. 28 මම නගරේ අල්ලගත්තොත් ඒකේ ගෞරවය ලැබෙන්නේ මටයි. ඒ නිසා ඔයා දැන් අනිත් සටන්කරුවන් එක්ක ඇවිත් නගරේ වටේ කඳවුරු බැඳගෙන ඒක අල්ලගන්න.”

29 ඉතින් දාවිත් මුළු හමුදාවම රැස් කරගෙන රබ්බාවලට ගිහින් සටන් කරලා ඒක අල්ලගත්තා. 30 දාවිත් මල්කාම් දෙවියන්ගේ රූපයේ තිබුණ ඔටුන්න ගලවගත්තා. ඒ ඔටුන්නේ බර රත්තරන් තලෙන්තයක්.* ඒකේ වටිනා මැණික් අල්ලලත් තිබුණා. ඒ ඔටුන්න දාවිත්ට පැලඳෙව්වා. දාවිත් ඒ නගරයේ+ තිබුණ වටිනා දේවල් හුඟක්+ අරගත්තා. 31 දාවිත් ඒ නගරයේ හිටපු සෙනඟට යකඩවලින් හදපු තියුණු උපකරණ සහ යකඩ පොරෝ දීලා එයාලාගෙන් වැඩ ගත්තා. දාවිත් එයාලා ලවා ගල් කප්පවගෙන ගඩොලුත් හදාගත්තා. ඒ විදිහට අම්මොන්වරුන්ට අයිති හැම නගරයකම හිටිය සෙනඟගෙන් එයා වැඩ ගත්තා. ඊටපස්සේ දාවිත් රජ සහ එයා එක්ක හිටිය හැමෝම ආයෙත් යෙරුසලමට ගියා.

13 දාවිත්ගේ පුතා වුණ අබ්සලොම්ට තාමර්+ කියලා සහෝදරියක් හිටියා. එයා හරිම ලස්සන තරුණියක්. දාවිත්ගේ පුතෙක් වුණ අම්නොන්ට+ තාමර් ගැන ආදරයක් ඇති වුණා. 2 අම්නොන් එයාගේ සහෝදරිය වුණ තාමර් ගැන හිතලාම ලෙඩ වුණා. මොකද තාමර් කන්‍යාවක් නිසා අම්නොන්ට එයාගේ ආසාව ඉටු කරගන්න අවස්ථාවක් ලැබුණේ නැහැ. 3 අම්නොන්ට යෙහොනාදාබ්+ කියලා යාළුවෙක් හිටියා. යෙහොනාදාබ් දාවිත්ගේ සහෝදරයා වුණ ෂිමෙයාහ්ගේ+ පුතා. එයා හරිම කපටි කෙනෙක්. 4 එක දවසක් යෙහොනාදාබ් අම්නොන්ගෙන් මෙහෙම ඇහුවා. “රජ්ජුරුවන්ගේ පුතා වෙලත් ඇයි ඔයා හැම තිස්සේම දුකෙන් ඉන්නේ?” එතකොට අම්නොන් කිව්වා “මං අබ්සලොම්ගේ සහෝදරිය තාමර්ට ගොඩක් ආදරෙයි”+ කියලා. 5 ඒක ඇහුවාම යෙහොනාදාබ් එයාට මෙහෙම කිව්වා. “ඔයා ලෙඩින් වගේ ඇඳට වෙලා ඉන්න. එතකොට ඔයාගේ තාත්තා ඔයාව බලන්න එයි. එයා ආවාම ඔයා එයාට මෙහෙම කියන්න. ‘මගේ සහෝදරිය තාමර්ට කියන්න මං ළඟට එන්න කියලා. මං ලෙඩින් ඉන්න නිසා එයාට කියන්න මට කෑම* ටිකක් හදලා දෙන්න කියලා. එයාට කියන්න මං ඉස්සරහම ඒවා හදලා එයාගේ අතින්ම මට කන්න දෙන්න කියලා.’”

6 ඉතින් අම්නොන් යෙහොනාදාබ් කියපු දේ අහලා අසනීපයෙන් ඉන්න කෙනෙක් වගේ ඇඳට වෙලා හිටියා. රජ එයාව බලන්න ආවාම අම්නොන්, රජට මෙහෙම කිව්වා. “මං ළඟට ඇවිත් මට කෑම ටිකක් හදලා දෙන්න කියලා මගේ සහෝදරිය තාමර්ට කියන්න. මං ඉස්සරහම රොටි දෙකක් හදලා එයාගේ අතින්ම මට කන්න දෙන්න කියලත් එයාට කියන්න.” 7 එතකොට දාවිත් තාමර්ට පණිවිඩයක් යවලා මෙහෙම දැන්නුවා. “ඔයාගේ සහෝදරයා අම්නොන්ට සනීප නැහැ. එයාගේ ගෙදරට ගිහින් එයාට කෑම ටිකක් හදලා දෙන්න පුළුවන්ද?” 8 ඊටපස්සේ තාමර් එයාගේ සහෝදරයා වන අම්නොන්ගේ ගෙදරට ගියා. එයා එහෙට යද්දී අම්නොන් හිටියේ ඇඳේ හාන්සි වෙලා. තාමර් එයා ඉස්සරහම පිටි අනලා රොටි හැදුවා. 9 ඊටපස්සේ එයා තැටියෙන් රොටි ටික අරගෙන එයා ඉස්සරහා තිබ්බා. ඒත් අම්නොන් රොටි කෑවේ නැහැ. එයා කෑගහලා කිව්වා “හැමෝම මෙතනින් යන්න” කියලා. එතකොට හැමෝම එතනින් ගියා.

10 අම්නොන් තාමර්ට මෙහෙම කිව්වා. “කෑම ටික ඇඳ ළඟට අරන් ඇවිත් ඔයාගෙම අතින් මට කවන්න.” ඉතින් තාමර් එයා හදපු රොටි එයාගේ සහෝදරයා වන අම්නොන්ගේ ඇඳ ළඟට අරන් ගියා. 11 තාමර් එයා ළඟට ගියාම අම්නොන් එයාව බදාගෙන කිව්වා “මගේ සහෝදරිය, මාත් එක්ක එකට ඉන්න” කියලා. 12 ඒත් තාමර් මෙහෙම කිව්වා. “අනේ අයියේ, එහෙම කරන්න එපා. මට ලැජ්ජා කරන්න එපා. මේක හරිම පහත් වැඩක්.+ ඊශ්‍රායෙල් දේශයේ ඒ වගේ දෙයක් වෙන්න හොඳ නැහැ.+ 13 ඔයා මට ලැජ්ජා කළොත් මං කොහොමද මිනිස්සුන්ට මූණ දෙන්නේ? ඊශ්‍රායෙල් දේශයේ හැමෝම ඔයාව කිසි කමකට නැති කෙනෙක් විදිහට සලකයි. ඉතින් ඔයාගේ හිතේ තියෙන ආසාව ගැන රජට කියන්න. එයා ඔයාට මාව නොදී ඉන්න එකක් නැහැ.” 14 ඒත් අම්නොන් තාමර් කියපු දේ ගාණකටවත් ගත්තේ නැහැ. එයා තාමර්ව දූෂණය කරලා එයාට නින්දා කළා. 15 ඊටපස්සේ අම්නොන් එයාට වෛර කරන්න පටන්ගත්තා. එයා තාමර්ට ආදරේ කළාටත් වඩා වැඩියෙන් එයාට වෛර කරන්න පටන්ගත්තා. ඒ නිසා අම්නොන් තාමර්ට මෙහෙම කිව්වා. “තවත් මෙතනට වෙලා ඉඳන් ඉන්නේ නැතුව යනවා යන්න!” 16 එතකොට තාමර් මෙහෙම කිව්වා. “අනේ අයියේ, මට මෙහෙන් යන්න කියන්න එපා. ඒක ඔයා මට කරපු දේට වඩා දුෂ්ට දෙයක්!” ඒත් අම්නොන් එයා කියපු දේ ගාණකටවත් ගත්තේ නැහැ.

17 ඊටපස්සේ අම්නොන් එයාගේ සේවකයාට එන්න කියලා “මෙයාව එළියට දාලා දොර වහලා දාන්න” කියලා කිව්වා. 18 ඉතින් සේවකයා තාමර්ව කාමරයෙන් එළියට අරන් ගිහින් දොර වහලා දැම්මා. (සාමාන්‍යයෙන් රජගේ දුවලා කන්‍යාවන් වෙලා ඉද්දී විශේෂ ඇඳුමක්* ඇන්දා. ඒ වෙලාවේ තාමර් ඇඳගෙන හිටියෙත් ඒ වගේ ඇඳුමක්.) 19 තාමර් එයාගේ ඔළුවට අළු දාගෙන+ එයා ඇඳන් හිටපු විශේෂ ඇඳුම ඉරාගත්තා. ඊටපස්සේ එයා අත් දෙක ඔළුව උඩ තියාගෙන හයියෙන් අඬඅඬ එතනින් ගියා.

20 තාමර්ගේ සහෝදරයා වන අබ්සලොම්+ එයාව දැක්කාම මෙහෙම ඇහුවා. “ඔයාට මෙහෙම කළේ ඔයාගේ සහෝදරයා අම්නොන්ද? එයා ඔයාගේ සහෝදරයානේ.+ ඉතින් මේ ගැන කිසිම දෙයක් කතා කරන්න යන්න එපා. වෙච්ච දේ ගැන දුක් වෙවී ඉන්නත් එපා.” ඊටපස්සේ තාමර් එයාගේ සහෝදරයා වන අබ්සලොම්ගේ ගෙදර නැවතුණා. ඒ සිද්ධියෙන් පස්සේ තාමර් කාවවත් ආශ්‍රය කළේ නැහැ. 21 තාමර්ට සිද්ධ වුණ දේ ගැන දාවිත් රජට ආරංචි වුණාම එයාට හුඟක් කේන්ති ගියා.+ ඒත් අම්නොන් එයාගේ වැඩිමල් පුතා නිසා දාවිත් එයාට ගොඩක් ආදරේ කළා. ඉතින් එයාගේ හිත රිද්දන්න දාවිත් කැමති වුණේ නැහැ. 22 අම්නොන් එයාගේ සහෝදරිය වන තාමර්ට ඒ වගේ පහත් දෙයක් කරපු නිසා+ අබ්සලොම් අම්නොන්ට වෛර කළා.+ ඒත් එයා අම්නොන්ට කිසිම දෙයක් කියන්න ගියේ නැහැ.

23 ඒ සිද්ධිය වෙලා අවුරුදු දෙකක් ගත වුණා. ඒ කාලේ අබ්සලොම්ගේ සේවකයන් එයාට අයිති බැටළුවන්ගේ ලොම් කපකපයි හිටියේ. ඒ, එෆ්‍රායිම්+ ළඟ තියෙන බාල්හාෂොර් කියන තැන. අබ්සලොම් එයාත් එක්ක බාල්හාෂොර්වලට යන්න එන්න කියලා රජගේ පුතාලා හැමෝටම ආරාධනා කළා.+ 24 අබ්සලොම් දාවිත්ට මෙහෙම කිව්වා. “මගේ ස්වාමීනි, මේ දවස්වල මගේ බැටළුවන්ගේ ලොම් කපනවා. රජතුමනි, ඔයාත් මාත් එක්ක එහෙට යන්න එන්න. ඔයාගේ සේවකයන්වත් එක්කන් එන්න.” 25 ඒත් රජ එයාට මෙහෙම කිව්වා. “අපි හැමෝම එහෙට ආවොත් ඔයාට ඒක කරදරයක් වෙයි. ඒ නිසා පුතේ, මං නෑවිත් ඉන්නම්.” අබ්සලොම් කීප සැරයක්ම රජට එන්න කිව්වත් රජ එන්න කැමති වුණේ නැහැ. ඒත් රජ අබ්සලොම්ට ආශීර්වාද කළා. 26 එතකොට අබ්සලොම් “ඔයා එන්නේ නැත්නම් මගේ සහෝදරයා වන අම්නොන්ට අපිත් එක්ක එන්න අවසර දෙන්න”+ කියලා රජගෙන් ඉල්ලුවා. එතකොට රජ ඇහුවා “එයාව මොකටද එක්කගෙන යන්නේ” කියලා. 27 අම්නොන්ටයි, රජගේ අනිත් පුතාලටයි යන්න රජ අවසර දෙන කල් අබ්සලොම් එයාට කරදර කළා.

28 පස්සේ අබ්සලොම් එයාගේ සේවකයන්ට මෙහෙම කිව්වා. “අම්නොන් වයින් බීලා සතුටින් ඉන්න වෙලාවක ‘අම්නොන්ව මරලා දාන්න’ කියලා මං ඔයාලට කියන්නම්. එතකොට ඔයාලා එයාව මරලා දාන්න. කිසි දේකට බය වෙන්න එපා. මමනේ ඔයාලට ඒක කරන්න කියන්නේ. ඒ නිසා ඔයාලා හිතට ධෛර්යය අරන් ඒක කරන්න.” 29 අබ්සලොම්ගේ සේවකයෝ එයා අණ කරපු විදිහටම අම්නොන්ව මරලා දැම්මා. රජගේ අනිත් පුතාලා ඒක දැක්කාම බය වෙලා කොටළුවන් පිට නැඟලා එතනින් පැනලා ගියා. 30 එයාලා පැනලා යන අතරතුරේ දාවිත්ට මෙහෙම ආරංචි වුණා. “රජගේ පුතාලා හැමෝවම අබ්සලොම් මරලා දාලා! එක් කෙනෙක්ටවත් බේරෙන්න ලැබුණේ නැහැ.” 31 ඒක ඇහුවාම රජ එයාගේ ඇඳුම් ඉරාගෙන බිම වැතිරුණා. එයාගේ සේවකයන් හැමෝමත් එයාලාගේ ඇඳුම් ඉරාගෙන දාවිත් ළඟට වෙලා හිටියා.

32 ඒත් දාවිත්ගේ සහෝදරයා වුණ ෂිමෙයාහ්ගේ+ පුතා වන යෙහොනාදාබ්+ දාවිත්ට මෙහෙම කිව්වා. “මගේ ස්වාමීනි, බය වෙන්න එපා. ඔබේ හැම පුතෙක්වම මරලා නැහැ. මරලා තියෙන්නේ අම්නොන්ව විතරයි.+ අබ්සලොම් තමයි එයාව මරන්න අණ කරලා තියෙන්නේ.+ අම්නොන් එයාගේ සහෝදරිය වන තාමර්ව+ දූෂණය කරපු දවසේ ඉඳන්+ එයා අම්නොන්ව මරන්න බලාගෙනයි හිටියේ. 33 මගේ ස්වාමීනි, රජතුමනි, කලබල වෙන්න එපා. ‘ඔබේ පුතාලා හැමෝම මැරුණා’ කියලා ඔබට ආරංචි වුණත් මරලා තියෙන්නේ අම්නොන්ව විතරයි.”

34 අම්නොන්ව මරලා දැම්මාට පස්සේ අබ්සලොම් ඒ දේශයෙන් පලා ගියා.+ නුවරේ මුරකරු හැරිලා බලද්දී එයා දැක්කා කඳුකරයේ ඉඳන් ලොකු සෙනඟක් නුවර පැත්තට එනවා. 35 එතකොට යෙහොනාදාබ්+ “අර බලන්න, ඔබේ පුතාලා දැන් එනවා. ඔබේ සේවකයා වන මම කිව්වේ ඇත්ත” කියලා රජට කිව්වා. 36 එයා ඒක කියලා ඉවර වෙනවාත් එක්කම රජගේ පුතාලා හොඳටම අඬඅඬ එතනට ආවා. රජ සහ එයාගේ සේවකයොත් එයාලා එක්ක එකතු වෙලා හුඟක් ඇඬුවා. 37 දාවිත් රජ දවස් ගාණක්ම අම්නොන් ගැන දුක් වෙවී හුඟක් ඇඬුවා. ඔය අතරේ අබ්සලොම් අමිහුද්ගේ පුතා වන තල්මයි ළඟට පලා ගියා. තල්මයි+ ගෙෂූර් දේශයේ රජ. 38 අබ්සලොම් ගෙෂූර්වල+ අවුරුදු තුනක් ජීවත් වුණා.

39 අම්නොන් නැති දුක තුනී වෙලා ගියාට පස්සේ දාවිත් රජට අබ්සලොම්ව බලන්න ලොකු ආසාවක් ඇති වුණා.

14 අබ්සලොම්ව+ ආයෙත් දැකගන්න රජ හුඟක් ආසාවෙන් ඉන්නවා කියලා ෂෙරුයියාගේ+ පුතා වුණ යෝවාබ් දැනගත්තා. 2 ඉතින් එයා තෙකෝවා+ නගරයේ හිටිය බුද්ධිමත් කාන්තාවක්ව ගෙන්නගෙන එයාට මෙහෙම කිව්වා. “ඔයා ඇඟේ තෙල් ගාගන්නේ නැතුව+ වියෝදුකෙන් ඉන්න කෙනෙක් වගේ ඇඳගන්න. ඔයා දවස් ගාණක් වියෝදුකෙන් ඉන්න කෙනෙක් වගේ රඟපාලා 3 රජ ඉස්සරහට යන්න. රජට කියන්න ඕනෙ මොනවාද කියලා මම දැන් ඔයාට කියලා දෙන්නම්.” ඊටපස්සේ, රජට කියන්න ඕනෙ දේ යෝවාබ් ඒ කාන්තාවට කියලා දුන්නා.

4 තෙකෝවා ඉඳන් ආපු ඒ කාන්තාව රජ ඉස්සරහට ගිහින් දණින් වැටිලා ඔළුව බිමටම පහත් කරලා මෙහෙම කිව්වා. “අනේ රජතුමනි, මට උදව් කරන්න!” 5 එතකොට රජ ඇහුවා “ඇයි ඔයාට මොනවාද වුණේ” කියලා. ඒ කාන්තාව කිව්වා “අනේ මගේ ස්වාමීනි, මගේ මහත්තයා මැරිලා. 6 ඔබේ දාසිය වන මට පුතාලා දෙන්නෙක් හිටියා. දවසක් කෙතේදී ඒ දෙන්නා රණ්ඩු වුණා. රණ්ඩුව බේරන්න කවුරුත්ම හිටියේ නැහැ. ටික වෙලාවකට පස්සේ එක පුතෙක් අනිත් පුතාව මරලා දැම්මා. 7 ඊටපස්සේ මගේ පවුලේ හැමෝම මට බැන්නා. එයාලා මට මෙහෙම කිව්වා. ‘ඔයාගේ පුතා එයාගෙම සහෝදරයාව මරලා දැම්මා. ඒ නිසා දැන් එයාව අපිට භාර දෙන්න. එයාගේ සහෝදරයාගේ ජීවිතේ වෙනුවෙන් එයා වන්දි ගෙවන්න ඕනේ.+ පවුලේ නම ගෙනියන්න ඉන්නේ එයා වුණත් අපිට සිද්ධ වෙනවා එයාව මරලා දාන්න.’ අනේ රජතුමනි, අපේ පවුලේ නම ගෙනියන්න ඉන්න මගේ එකම පුතාවත් එයාලා මරලා දාන්න හදනවා. එහෙම වුණොත් මගේ සැමියාගේ නම ගෙනියන්නේ කවුද?”

8 එතකොට රජ කාන්තාවට කිව්වා “ඔයා දැන් ගෙදර යන්න. මං ඔයාගේ ප්‍රශ්නේ විසඳලා දෙන්නම්” කියලා. 9 ඒ කාන්තාව රජට මෙහෙම කිව්වා. “අනේ මගේ ස්වාමීනි, මගේ පුතාගේ වරදට මමයි, මගේ තාත්තාගේ පවුලේ අයයි වන්දි ගෙවන්නම්. එතකොට ඔබත් ඔබේ රාජ්‍යයත් ඒ වරදින් නිදහස් වෙයි.” 10 ඊටපස්සේ රජ “මේ ගැන කියලා ආයෙත් කවුරු හරි ඔයාට කරදර කළොත් එයාව මං ළඟට අරන් එන්න. ඔයාට ආයෙත් කරදර කරන්න මං එයාට ඉඩ දෙන්නේ නැහැ” කියලා ඒ කාන්තාවට කිව්වා. 11 ඒත් එයා රජට මෙහෙම කිව්වා. “අනේ රජතුමනි, ඔබේ දෙවි වන යෙහෝවාව සිහි කරන්න. මගේ පුතාව මරලා දාන්න අයිතිය තියෙන කෙනාට+ මගේ පවුලට කරදර කරන්න ඉඩ දෙන්න එපා. මගේ පුතාව මරලා දාන්න එයාට ඉඩ දෙන්නත් එපා.” එතකොට රජ කාන්තාවට මෙහෙම කිව්වා. “ඔයාගේ පුතාගේ එක කෙස්ගහක්වත් බිමට වැටෙන්න මම ඉඩ දෙන්නේ නැහැ. ඒ දේ මං ජීවමාන දෙවි+ යෙහෝවා ඉස්සරහා ඔයාට දිවුරලා කියනවා.” 12 පස්සේ ඒ කාන්තාව “රජතුමනි, ඔබේ දාසිය වන මට තව එක දෙයක් කියන්න අවසර දෙන්න” කියලා කිව්වා. රජත් “කියන්න” කියලා කිව්වා.

13 එතකොට කාන්තාව දාවිත්ට මෙහෙම කිව්වා. “රජතුමනි, ඔබ දෙවියන්ගේ සෙනඟට හානියක් වෙන විදිහට වැඩ කරන්නේ ඇයි?+ ඔබ මට කියපු දෙයින් පැහැදිලි වෙනවා ඔබත් වරදකරුවෙක් කියලා. මොකද මෙහෙන් පලා ගිය ඔබේම පුතාව ඔබ ආයෙත් ගෙන්නගත්තේ නැහැ.+ 14 බිමට වක් කරපු වතුර ආයෙත් කවදාවත් එකතු කරගන්න බැහැ. ඒ වගේ තමයි අපේ ජීවිතත්. අපි හැමෝම කවදා හරි දවසක මැරෙනවා. ඒක වෙනස් කරන්න කාටවත් බැහැ. ඒත් දෙවියන් කවුරුත් මැරෙනවාට කැමති නැහැ. පන්නලා දාපු කෙනෙක්ව වුණත් කොහොමහරි ඔහු ළඟට ආයෙත් ගෙන්නගන්නයි ඔහු බලන්නේ. 15 මගේ ස්වාමීනි, මිනිස්සු කියපු කතා නිසා මට ලොකු බයක් දැනුණා. ඒ නිසයි මං ඔබ ළඟට ඇවිත් මේ ගැන කතා කරන්න තීරණය කළේ. මං හිතුවේ මෙහෙමයි. ‘රජට මේ ගැන කතා කරන්න ඕනේ. සමහරවිට රජ ඔහුගේ දාසියගේ ඉල්ලීම ඉටු කරලා දෙයි. 16 ඔහු මට ඇහුම්කන් දෙයි. මාවයි, මගේ එකම පුතාවයි විනාශ කරලා, දෙවියන්ගෙන් අපිට ලැබුණ උරුමය ගන්න හදන කෙනාගෙන් ඔහු අපිව බේරගනී.’+ 17 මගේ ස්වාමීනි, සැබෑ දෙවියන්ගේ දූතයෙක් වගේ හොඳ නරක විනිශ්චය කරන්න ඔබට පුළුවන් කියලා මං දන්නවා. ඒ නිසා ‘හිත සැනසෙන දෙයක් ඔබ මට කියයි’ කියලත් මං හිතුවා. රජතුමනි, ඔබට ඔබේ දෙවි වන යෙහෝවාගේ උදව් ලැබෙන්න කියලා මම ප්‍රාර්ථනා කරනවා!”

18 එතකොට රජ “කිසිම දෙයක් හංගන්නේ නැතුව මං අහන දේට උත්තර දෙන්න” කියලා එයාට කිව්වා. කාන්තාව “හරි මගේ ස්වාමීනි” කියලා කිව්වා. 19 ඊටපස්සේ රජ “ඔයාට මේ දේ කරන්න කිව්වේ යෝවාබ් නේද”+ කියලා එයාගෙන් ඇහුවා. එතකොට කාන්තාව මෙහෙම කිව්වා. “අනේ මගේ ස්වාමීනි, රජ්ජුරුවෙනි, ඔබ හිතපු දේ හරි. මං මේ කියන්නේ ඇත්ත කියලා මං ඔබ ඉස්සරහා දිවුරලා කියන්නම්. ඔබේ සේවකයා වන යෝවාබ් තමයි මට මෙහෙම කරන්න කිව්වේ. ඔබට කියන්න ඕනෙ මොනවාද කියලත් ඔහු මට කියලා දුන්නා. 20 ඔබේ සේවකයා වන යෝවාබ් මේ දේ කළේ ඔබේ හිත වෙනස් කරන්න. ඒත් මගේ ස්වාමීනි, ඔබ සැබෑ දෙවියන්ගේ දූතයෙක් වගේ හරිම ප්‍රඥාවන්තයි. ඒ නිසා දේශයේ සිද්ධ වෙන කිසිම දෙයක් ඔබෙන් හංගන්න බැහැ.”

21 ඊටපස්සේ රජ යෝවාබ්ට මෙහෙම කිව්වා. “හරි, ඔයා කියන දේ මං කරන්නම්.+ දැන් ගිහින් අබ්සලොම්ව එක්කගෙන එන්න.”+ 22 ඒක ඇහුවාම යෝවාබ්, රජ ඉස්සරහා දණින් වැටිලා ඔළුව බිමටම පහත් කරලා රජට ප්‍රශංසා කළා. එයා රජට මෙහෙමත් කිව්වා. “මගේ ස්වාමීනි, රජ්ජුරුවෙනි, ඔයා අද මගේ ඉල්ලීම ඉටු කළා. ඒකෙන් මං දැනගත්තා ඔයාගේ සේවකයා වන මං ගැන ඔයා සතුටු වෙනවා කියලා.” 23 ඉතින් යෝවාබ් ගෙෂූර්වලට+ ගිහින් ආයෙත් අබ්සලොම්ව යෙරුසලමට එක්කගෙන ආවා. 24 ඒ වුණත් රජ යෝවාබ්ට මෙහෙම කිව්වා. “අබ්සලොම්ට කියන්න මාව බලන්න එන්න එපා කියලා. එයාට එයාගෙම ගෙදරට යන්න කියන්න.” ඉතින් අබ්සලොම්, රජව හම්බ වෙන්න යන්නේ නැතුව එයාගේ ගෙදරට ගියා.

25 ඊශ්‍රායෙල් දේශයේ කොහෙවත් අබ්සලොම් තරම් කඩවසම් කෙනෙක් හිටියේ නැහැ. එයාගේ පෙනුමේ කිසිම අඩුවක් තිබුණේ නැහැ. එයාගේ පෙනුම නිසා හැමෝම වගේ එයාව හුඟක් වර්ණනා කළා. 26 හැම අවුරුද්දකම අවසානයේදී අබ්සලොම්ට එයාගේ කොණ්ඩේ කපන්න වුණා. මොකද ඒක එච්චරටම බරයි. එයාගේ කපපු කොණ්ඩේ බර මැනලා බලද්දී ඒක රජමාලිගාවේ තිබුණ ෂෙකෙලයට* අනුව ෂෙකෙල් 200ක්* බරයි. 27 අබ්සලොම්ට පුතාලා තුන්දෙනෙකුයි,+ එක දුවෙකුයි හිටියා. එයාගේ දුවගේ නම තාමර්. එයා හරිම ලස්සන තරුණියක්.

28 අබ්සලොම් අවුරුදු දෙකක්ම යෙරුසලමේ ජීවත් වුණත් ඒ කාලේ පුරාම එයා රජව දැක්කේ නැහැ.+ 29 ඉතින් අබ්සලොම් යෝවාබ්ට පණිවිඩයක් යැව්වා එයාව හම්බ වෙන්න එන්න කියලා. එයාට යෝවාබ්ට කියන්න ඕනෙ වුණේ රජ ළඟට ගිහින් එයා වෙනුවෙන් කතා කරන්න කියලයි. ඒත් යෝවාබ් ආවේ නැහැ. අබ්සලොම් දෙවෙනි වතාවටත් එයාව ගෙන්නගන්න හැදුවත් යෝවාබ් ආවේ නැහැ. 30 ඉතින් අබ්සලොම් එයාගේ සේවකයන්ට කිව්වා “මගේ ඉඩම ළඟ තියෙන යෝවාබ්ගේ බාර්ලි කෙතට ගිනි තියන්න” කියලා. ඒ සේවකයන් එයා කියපු විදිහටම කෙතට ගිනි තිබ්බා. 31 ඊටපස්සේ යෝවාබ් අබ්සලොම්ගේ ගෙදරට ඇවිත් එයාගෙන් මෙහෙම ඇහුවා. “ඔයාගේ සේවකයන් මගේ බාර්ලි කෙතට ගිනි තියලා! ඇයි එහෙම දෙයක් කළේ?” 32 එතකොට අබ්සලොම් මෙහෙම කිව්වා. “මං ඔයාට එන්න කියලා පණිවිඩයක් යැව්වා. මං පණිවිඩකරුවන් අතේ ඔයාට කිව්වා රජ ළඟට ගිහින් මේ පණිවිඩය එයාට කියන්න කියලා. ‘මාව ගෙෂූර් ඉඳන් ගෙන්නගත්තේ ඇයි?+ මං එහෙටම වෙලා හිටියා නම් මීට වඩා හොඳයිනේ. ඔයාව බලන්න එන්න මට අවසර දෙන්න. මං වරදක් කරලා තියෙනවා නම් ඔයාම මාව මරලා දාන්න.’”

33 ඊටපස්සේ යෝවාබ්, රජ ඉස්සරහට ගිහින් අබ්සලොම් කියපු දේ රජට කිව්වා. රජ අබ්සලොම්ට පණිවිඩයක් යවලා කිව්වා එයා ළඟට එන්න කියලා. අබ්සලොම් ඇවිත් රජ ඉස්සරහා දණින් වැටිලා ඔළුව බිමටම නමලා රජට ආචාර කළා. ඊටපස්සේ රජ අබ්සලොම්ව සිපගත්තා.+

15 ටික කාලයකට පස්සේ අබ්සලොම් එයාටම කියලා අශ්ව රථයක් හදාගත්තා. ඒ රථයට ඉස්සරහින් දුවන්න මිනිස්සු 50දෙනෙක්වත් අශ්වයන්වත් එයා ලෑස්ති කරගත්තා.+ 2 අබ්සලොම් පුරුද්දක් විදිහට පාන්දරින්ම නැඟිටලා නුවරේ දොරටුව ළඟට ගිහින්+ රජ ළඟට නඩු විසඳගන්න එන මිනිස්සුන්ව කතාවට අල්ලගත්තා.+ එහෙම යන කෙනෙක්ගෙන් එයා මුලින්ම ඇහුවා “ඔයා කොයි නුවරේ ඉඳන්ද ආවේ” කියලා. එතකොට ඒ කෙනා මෙහෙම කිව්වා “ඔබේ සේවකයා වන මම ඊශ්‍රායෙල්වල අහවල් ගෝත්‍රයට අයිති කෙනෙක්.” 3 අබ්සලොම් ඒ කෙනාගෙන් විස්තර දැනගත්තාට පස්සේ මෙහෙම කිව්වා. “ඔයා කියන දේ සාධාරණයි. හැබැයි ඔයාගේ පැමිණිල්ලට ඇහුම්කන් දෙන්න රජ කිසිම කෙනෙක්ව පත් කරලා නැහැනේ.” 4 එයා මෙහෙමත් කිව්වා. “මාව මේ දේශයේ විනිශ්චයකාරයා විදිහට පත් කළා නම් නඩු විසඳගන්න මං ළඟට එන හැමෝටම මම සාධාරණය ඉටු කරලා දෙනවා.”

5 ඒ වගේම කෙනෙක් අබ්සලොම් ළඟට ගිහින් ඔළුව නමලා එයාට ආචාර කරන්න හදද්දී අබ්සලොම් ඉක්මනටම ඒ කෙනාව ළඟට අරන් සිපගත්තා.+ 6 නඩු විසඳගන්න රජ ළඟට ගිය හැම කෙනෙක්ටම එයා සැලකුවේ ඒ විදිහටයි. එහෙම කරලා අබ්සලොම් හරිම කපටි විදිහට ඊශ්‍රායෙල් සෙනඟගේ හිත් දිනාගත්තා.+

7 අවුරුදු හතරක්* ගත වුණාට පස්සේ අබ්සලොම්, රජට මෙහෙම කිව්වා. “මම යෙහෝවාට භාරයක් වුණා. ඒක ඔප්පු කරන්න මට හෙබ්‍රොන්වලට+ යන්න අවසර දෙන්න පුළුවන්ද? 8 ඔබේ සේවකයා වන මම සිරියාවේ ගෙෂූර්වල+ ජීවත් වුණ කාලේදී ‘යෙහෝවා මට ආපහු යෙරුසලමට යන්න අවස්ථාව දුන්නොත් මම යෙහෝවාට පූජාවක් ඔප්පු කරනවා’* කියලා පොරොන්දු වුණා.”+ 9 එතකොට රජ “පරෙස්සමින් ගිහින් එන්න” කියලා එයාට කිව්වා. ඊටපස්සේ අබ්සලොම් හෙබ්‍රොන් නගරයට ගියා.

10 එහෙට ගියාට පස්සේ අබ්සලොම්, ඊශ්‍රායෙල්වල හැම පළාතකටම* ඔත්තුකරුවන්ව යැව්වා. අබ්සලොම් එයාලට මෙහෙම කියලා තිබුණා. “හොරණෑවේ සද්දේ ඇහුණ ගමන්ම ‘දැන් හෙබ්‍රොන්වල රජ අබ්සලොම්’+ කියලා හැමෝටම දන්වන්න.” 11 යෙරුසලමේ ඉඳන් හෙබ්‍රොන්වලට එයාත් එක්ක යන්න එන්න කියලා අබ්සලොම් මිනිස්සු 200කට කියලා තිබ්බා. එයාලා අබ්සලොම් එක්ක ගියත් එයා කරන්න හිතන් හිටපු දේ ගැන එයාලා කිසිම දෙයක් දැනන් හිටියේ නැහැ. 12 අබ්සලොම් පූජා ඔප්පු කළාට පස්සේ එයා දාවිත්ගේ උපදේශකයා+ වුණ අහිතොෆෙල්වත්+ එහෙට ගෙන්නගත්තා. ඒ වෙනකොට අහිතොෆෙල් හිටියේ එයාගේ ගම වුණ ගීලොවල.+ රජට විරුද්ධව අබ්සලොම් කරපු කුමන්ත්‍රණයට එකතු වුණ පිරිස එන්න එන්නම වැඩි වුණා.+

13 ටික දවසකට පස්සේ පණිවිඩකරුවෙක් ඇවිත් දාවිත්ට මෙහෙම දැන්නුවා. “ඊශ්‍රායෙල්වරු අබ්සලොම්ගේ පැත්තට ගිහින්!” 14 ඒක අහපු ගමන්ම දාවිත් යෙරුසලමේ එයා එක්ක හිටපු සේවකයන් හැමෝටම මෙහෙම කිව්වා. “අපි ඉක්මනටම මෙහෙන් යමු.+ අබ්සලොම් මෙහෙට ආවොත් අපිට බේරෙන්න හම්බ වෙන එකක් නැහැ. එයා අපි හැමෝවම මරලා දායි. නුවරේ ඉන්න හැමෝවමත් කඩුවෙන් මරලා දායි.”+ 15 එතකොට රජගේ සේවකයෝ “ස්වාමීනි, ඔබ කියන ඕනෙම දෙයක් කරන්න අපි ලෑස්තියි”+ කියලා දාවිත්ට කිව්වා. 16 මාලිගාවේ හිටපු හැමෝම එක්ක රජ පිට වෙලා ගියා. එයා ගියේ මාලිගාව බලාගන්න උපභාර්යාවන් දහදෙනෙක්ව නතර කරලයි.+ 17 දාවිත් සහ එයා එක්ක හිටපු හැමෝම බෙත්මෙර්හාක් වෙන කල් ගිහින් නතර වුණා.

18 ඊටපස්සේ රජගේ සේවකයෝ හැමෝමයි, කෙරෙතිවරුයි, පෙලෙතිවරුයි,+ දාවිත් එක්ක ආපු ගාත්වල+ වැසියන් 600දෙනායි රජව පහු කරගෙන ගියා. එයාලා යද්දී එයාගේ සෙනඟ හැමෝම එතන ඉන්නවාද කියලා දාවිත් හොයලා බැලුවා. 19 එතකොට දාවිත් ගාත් ඉඳන් ආපු ඉත්තයිට+ මෙහෙම කිව්වා. “ඔයා ආපහු හැරිලා යන්න. අපිත් එක්ක එන්න ඕනෙ නැහැ. ඔයා විදේශිකයෙක් නිසා ඔයාට පුළුවන් අලුත් රජත් එක්ක ජීවත් වෙන්න. අනික ඔයා ඔයාගේ රටෙන් පැනලා ආපු නිසා ආයෙත් ඔයාට එහෙට යන්නත් බැහැ. 20 ඔයා මේ දේශයට ආවේ ළඟදී. ඒ නිසා මම යනයන තැනට ඔයාව එක්කන් යන එක හොඳ නැහැ. ඔයාගේ සහෝදරයන්වත් එක්කගෙන ඔයා ආපහු නුවරට යන්න. යෙහෝවා දෙවියන් ඔයාව අත්හරින්නේ නැතුව දිගටම ඔයාට ආදරෙන් සලකයි කියලා මට විශ්වාසයි.”+ 21 ඒත් ඉත්තයි, රජට මෙහෙම කිව්වා. “මගේ ස්වාමීනි, ඔබ යන ඕනෙම තැනකට මාත් එනවා. මම ජීවමාන දෙවි යෙහෝවා ඉස්සරහත් ඔබ ඉස්සරහත් ඒ දේ දිවුරලා පොරොන්දු වෙනවා. ඔබ එක්ක මැරෙන්න වුණත් මම ලෑස්තියි!”+ 22 ඒක අහලා දාවිත් රජ “එහෙමනම් ඔයාත් නිම්නයෙන් එහා පැත්තට යන්න” කියලා ඉත්තයිට කිව්වා.+ ඉතින් ගාත්වල ඉඳන් ආපු ඉත්තයි නිම්නයෙන් අනිත් පැත්තට ගියා. එයාත් එක්ක හිටපු පුරුෂයන් සහ එයාලාගේ පවුල්වල අයත් එයාත් එක්ක ගියා.

23 රජ කිද්‍රොන් නිම්නය ළඟට වෙලා බලාගෙන ඉද්දී සෙනඟ නිම්නය+ හරහා ගිහින් පාළුකරය පැත්තට ගියා. ඒ වෙලාවේ ඒ අවට ජීවත් වුණ හැම කෙනෙක්ම කෑගහලා ඇඬුවා. 24 සාදොක්+ සහ සැබෑ දෙවියන්ට අයිති ගිවිසුම් පෙට්ටිය+ උස්සගෙන ආපු ලෙවීවරු හැමෝමත්+ සෙනඟ අතරේ හිටියා. ලෙවීවරු සැබෑ දෙවියන්ට අයිති ගිවිසුම් පෙට්ටිය+ එතන තිබ්බා. මුළු සෙනඟම නිම්නයෙන් අනිත් පැත්තට යද්දී අබියාතර්+ එතනට වෙලා හිටියා. 25 ඒත් රජ සාදොක්ට මෙහෙම කිව්වා. “සැබෑ දෙවියන්ට අයිති ගිවිසුම් පෙට්ටිය ආපහු නුවරට අරන් යන්න.+ යෙහෝවා මං ගැන සතුටු වුණොත් ඔහු මට ආපහු එහෙට යන්න අවස්ථාව දෙයි. එතකොට ගිවිසුම් පෙට්ටියයි, ශුද්ධස්ථානයයි මට ආපහු දකින්න පුළුවන් වෙයි.+ 26 ඒත් දෙවියන් මං ගැන සතුටු වෙන්නේ නැත්නම් ඔහු ඉඩහරින ඕනෙම දේකට මූණ දෙන්න මං ලෑස්තියි.” 27 පූජක සාදොක්ට රජ මෙහෙමත් කිව්වා. “ඔයා දිවැසිවරයෙක්නේ.+ ඉතින් ඔයා අබියාතර් එක්ක ආයෙත් නුවරට යන්න. යද්දී ඔයාගේ පුතා අහිමයාෂ්වත් අබියාතර්ගේ පුතා යොනාතාන්වත්+ එක්කගෙන යන්න. ඔයාලට කිසි කරදරයක් නැතුව නුවරට යන්න ලැබෙන්න කියලා මං පතනවා! 28 ඔයාගෙන් පණිවිඩයක් එන කල් මං පාළුකරයේ ගඟෙන් එගොඩ වෙන්න පුළුවන් තැනකට වෙලා බලාගෙන ඉන්නම්.”+ 29 ඉතින් සාදොක් සහ අබියාතර් සැබෑ දෙවියන්ට අයිති ගිවිසුම් පෙට්ටිය ආයෙත් යෙරුසලමට අරන් ගිහින් එහෙට වෙලා හිටියා.

30 දාවිත් ඔළුව වහගෙන, අඬඅඬ ඔලීව කන්දට+ නැග්ගා. එයා ඇවිදගෙන ගියේ පාවහන් නැතුවයි. දාවිත් එක්ක ගිය සෙනඟත් ඔළු වහගෙන, අඬඅඬයි ගියේ. 31 දාවිත්ට පස්සේ ආරංචි වුණා “අබ්සලොම්ගේ+ කුමන්ත්‍රණයට අහිතොෆෙලුත් එකතු වෙලා”+ කියලා. ඒක ඇහුවාම දාවිත් දෙවියන්ට මෙහෙම කිව්වා. “අනේ යෙහෝවා,+ අහිතොෆෙල් දෙන උපදෙස් මෝඩයෙක් දෙන උපදෙස්+ වගේ වෙන්න සලස්වන්න!”

32 ඊටපස්සේ දාවිත් කන්ද මුදුනට ආවා. සාමාන්‍යයෙන් දෙවියන්ට නමස්කාර කරන්න මිනිස්සු එන්නේ එතනට. දාවිත් එතන ඉද්දී අර්කීවරයෙක්+ වන හූෂයි+ එයාගේ ඇඳුමත් ඉරාගෙන, ඔළුවට දූවිලි දාගෙන දාවිත්ව හම්බ වෙන්න එතනට ආවා. 33 එතකොට දාවිත් එයාට කිව්වා “ඔයා මාත් එක්ක ආවොත් ඒක මට බරක් වෙයි. 34 හැබැයි මං වෙනුවෙන් ඔයාට එක දෙයක් කරන්න පුළුවන්. ආයෙත් නුවරට ගිහින් අබ්සලොම්ට මෙහෙම කියන්න. ‘රජ්ජුරුවනි, මම ඔබට සේවය කරන්න කැමතියි. මම ඔබේ තාත්තාටත් සේවය කළා. ඒත් දැන් මට ඕනෙ ඔබට සේවය කරන්න.’+ ඊටපස්සේ ඔයා එයා ළඟට වෙලා අහිතොෆෙල් දෙන උපදෙස් අසාර්ථක වෙන විදිහට වැඩ කරන්න.+ 35 පූජක සාදොක් සහ අබියාතරුත් නුවරේ ඉන්නවා. රජමාලිගාවේ ඉද්දී ඔයාට දැනගන්න ලැබෙන හැම තොරතුරක්ම ඒ දෙන්නාට කියන්න.+ 36 සාදොක්ගේ පුතා අහිමයාෂුයි,+ අබියාතර්ගේ පුතා යොනාතානුයි+ එහේ ඉන්නවා. දැනගන්න ලැබෙන හැම තොරතුරක්ම ඒ දෙන්නාගේ අතේ මට දන්වලා එවන්න.” 37 ඉතින් දාවිත්ගේ යාළුවා වුණ හූෂයි+ ආපහු නුවරට ගියා. ඒ වෙලාවේ අබ්සලොමුත් යෙරුසලමට ආවා.

16 දාවිත් කඳු මුදුනේ ඉඳන් ටික දුරක් බැහැගෙන+ යද්දී මෙෆිබොෂෙත්ගේ+ සේවකයා වන ෂීබා+ එයාව හම්බ වෙන්න එතනට ආවා. ෂීබා ආවේ ගමනට සූදානම් කරපු බූරුවන් දෙන්නෙක් එක්කයි. රොටි 200කුත් වියළි මිදි කුට්ටි 100කුත් වෙනත් වියළි පලතුරු* කුට්ටි 100කුත් විශාල වයින් භාජනයකුත් ඒ බූරුවන් පිටේ පටවලා තිබුණා.+ 2 රජ ෂීබාගෙන් ඇහුවා “ඔයා මේවා ගෙනාවේ ඇයි” කියලා. එතකොට ෂීබා මෙහෙම කිව්වා. “මේ බූරුවන්ව අරගෙන ආවේ ඔබේ පවුලේ අයට. එයාලට පුළුවන් උන් පිට නැඟලා යන්න. මේ රොටියි, පලතුරු කුට්ටියි අරන් ආවේ ඔබත් එක්ක ආපු තරුණයන්ට කන්න දෙන්න. පාළුකරයේදී හොඳටම මහන්සි වෙලා ඉන්න වෙලාවට හැමෝටම බොන්න වයිනුත් මම ගෙනාවා.”+ 3 එතකොට රජ ෂීබාගෙන් ඇහුවා “ඔයාගේ ස්වාමියාගේ පුතා මෙෆිබොෂෙත් කොහෙද”+ කියලා. ෂීබා, රජට මෙහෙම කිව්වා. “‘අද ඊශ්‍රායෙල්වරු මගේ තාත්තාගේ රාජ්‍යය ආයෙත් මට භාර දෙයි’ කියලා එයා යෙරුසලමේම නතර වුණා.”+ 4 ඒක අහලා රජ, ෂීබාට කිව්වා “මෙෆිබොෂෙත්ට අයිති හැම දෙයක්ම අද මම ඔයාට දෙනවා”+ කියලා. එතකොට ෂීබා, රජට මෙහෙම කිව්වා. “මගේ ස්වාමීනි, රජ්ජුරුවනි, මං හැමදාටම ඔබට ණයගැතියි. මට හැමදාමත් මේ විදිහට කරුණාවෙන් සලකන්න කියලා මම ඔබෙන් බැගෑපත්ව ඉල්ලනවා.”+

5 දාවිත් රජ බහුරීම් කියන ගමට ආවාම ගෙරාගේ පුතා වන ෂිමෙයි+ දාවිත් ළඟට ආවා. එයා සාවුල්ගේ පවුලට අයිති කෙනෙක්. ෂිමෙයි එතනට ඇවිත් කෑගගහා දාවිත්ට අපහාස කරන්න පටන්ගත්තා.+ 6 එයා දාවිත්ටයි, දාවිත්ගේ සේවකයන්ටයි, රජගේ දෙපැත්තේ හිටපු ශක්තිමත් පුරුෂයන්ටයි, අනිත් හැමෝටමයි ගල් ගැහුවා. 7 ෂිමෙයි, දාවිත්ට අපහාස කරකර මෙහෙම කිව්වා. “මිනීමරුවා! මෙහෙන් පලයං. උඹ කිසි කමකට නැති මිනිහෙක්! 8 උඹ සාවුල්වයි, එයාගේ පවුලේ අයවයි විනාශ කරලා දැම්මා. ඒ මදිවට රජකමත් පැහැරගත්තා. අද යෙහෝවා උඹට මෙහෙම දඬුවම් කරන්නේ ඒ නිසයි. උඹ මිනීමරුවෙක්!+ යෙහෝවා රජකම උඹේ පුතා අබ්සලොම්ට දීලා මේ හැම විපතක්ම උඹට ගෙනාවේ ඒ නිසයි.”

9 එතකොට ෂෙරුයියාගේ+ පුතා වන අබිෂයි රජට මෙහෙම කිව්වා. “රජ්ජුරුවනි, මගේ ස්වාමීනි, ඔබට අපහාස කරන්න මේ බල්ලාට*+ ඉඩ දෙන්නේ මොකටද?+ මම දැන්මම ගිහින් මේකාගේ බෙල්ල කපලා දාන්නම්!”+ 10 ඒත් රජ මෙහෙම කිව්වා. “ෂෙරුයියාගේ+ පුත්‍රයෙනි, මේ මනුස්සයා මොනවා කිව්වත් ඔයාලා කලබල වෙන්න ඕනෙ නැහැ. එයා ඕනෙ දෙයක් කියපුදෙන්. මට අපහාස කරන්න+ කියලා එයාට කියලා තියෙන්නේ යෙහෝවා දෙවියන්.+ ඉතින් ‘ඇයි ඔයා මෙහෙම කරන්නේ’ කියලා එයාගෙන් අහන්න අපිට අයිතියක් තියෙනවාද?” 11 දාවිත් අබිෂයිටයි, එයාගේ සේවකයන්ටයි මෙහෙමත් කිව්වා. “මගේම පුතා මාව මරන්න හදද්දී+ බෙන්ජමින් ගෝත්‍රයේ+ කෙනෙක් මට මේ විදිහට කතා කරන එක පුදුමයක්ද? එයාට මුකුත් කරන්න යන්න එපා. එයා මට අපහාස කරපුදෙන්. මොකද යෙහෝවායි එයාට එහෙම කරන්න කියලා තියෙන්නේ. 12 ෂිමෙයි මට ශාප කළත් සමහරවිට යෙහෝවා මගේ දුක දකියි.+ එතකොට මට හානියක් වෙන්න නොදී යෙහෝවා මට ආශීර්වාද කරයි.”+ 13 ඊටපස්සේ දාවිත් සහ එයාගේ සෙනඟ දිගටම ඇවිදගෙන ගියා. ෂිමෙයි ඒ ළඟ තිබුණ කන්දක් දිගේ එයාලා එක්කම ඇවිදගෙන ආවා. එයා කෑගගහා දාවිත්ට ශාප කරකර+ ගල් ගැහුවා. වැලිත් වීසි කළා.

14 හුඟ වෙලාවකට පස්සේ දාවිත් සහ එයාගේ සෙනඟ යන්න ඕනෙ තැනට ආවා. හුඟක් මහන්සියෙන් හිටපු නිසා එයාලා එතන නතර වෙලා ටිකක් විවේක ගත්තා.

15 ඒ අතරේ අබ්සලොම් සහ ඊශ්‍රායෙල් පුරුෂයන් යෙරුසලමට ආවා. අහිතොෆෙලුත්+ එයාලා එක්ක හිටියා. 16 එයාලා ආවාම දාවිත්ගේ යාළුවෙක් වුණ, අර්කීවරයෙක්+ වන හූෂයි+ අබ්සලොම් ළඟට ඇවිත් මෙහෙම කිව්වා. “රජ දිගු කල් ජීවත් වේවා!+ රජ දිගු කල් ජීවත් වේවා!” 17 එතකොට අබ්සලොම් හූෂයිගෙන් මෙහෙම ඇහුවා. “ඔයා මෙහෙමද ඔයාගේ යාළුවාට ආදරේ පෙන්නන්නේ? ඇයි ඔයාගේ යාළුවා එක්ක ගියේ නැත්තේ?” 18 එතකොට හූෂයි අබ්සලොම්ට මෙහෙම කිව්වා. “මම ඇයි එයාත් එක්ක යන්නේ? මම සේවය කරන්න ඕනෙ යෙහෝවා දෙවියන් තෝරගත්ත කෙනාටයි. මේ සෙනඟයි, ඊශ්‍රායෙල්වරු හැමෝමයි තෝරගත්තේ ඔබවයි. මම සේවය කරන්නෙත් ඔබටයි. 19 මම ආයෙත් ඔබට මේ දේ කියනවා. මම සේවය කරන්නේ ඔබටයි. ඔබේ තාත්තාට සේවය කළා වගේම මම දැන් ඔබටත් සේවය කරනවා.”+

20 ඊටපස්සේ අබ්සලොම් අහිතොෆෙල්ට මෙහෙම කිව්වා. “මම දැන් මොනවාද කරන්න ඕනෙ කියලා මට කියන්න.”+ 21 එතකොට අහිතොෆෙල් එයාට මෙහෙම කිව්වා. “ඔයාගේ තාත්තා මාලිගාව බලාගන්න එයාගේ උපභාර්යාවන්ව+ තියලා ගියානේ.+ දැන් ඔයා එයාලා එක්ක ලිංගික සම්බන්ධකම් පවත්වන්න. ඔයා තාත්තාට ඒ විදිහට නින්දා කළා කියලා ඊශ්‍රායෙල් සෙනඟ දැනගත්තාම ඔයාගේ පැත්තේ ඉන්න අය තව වැඩියෙන් ඔයාට සහය දෙයි.” 22 අහිතොෆෙල්ගේ උපදෙස්වලට අනුව අබ්සලොම්ගේ සේවකයෝ රජමාලිගාවේ උඩුමහලේ*+ කූඩාරමක් ගැහුවා. ඊටපස්සේ අබ්සලොම් එළිපිටම එයාගේ තාත්තාගේ උපභාර්යාවන්+ එක්ක ලිංගික සම්බන්ධකම් පැවැත්තුවා. ඒ ගැන මුළු ඊශ්‍රායෙල් සෙනඟම දැනගත්තා.+

23 ඒ කාලයේදී මිනිස්සු අහිතොෆෙල්ගේ+ උපදෙස් කොච්චර ඉහළින් සැලකුවාද කියනවා නම් එයාලා ඒවා සැලකුවේ සැබෑ දෙවියන්ගෙන්ම ලැබුණ උපදෙස් විදිහටයි. දාවිත් වගේම අබ්සලොමුත් එයාගේ උපදෙස් සැලකුවේ ඒ විදිහටයි.

17 අහිතොෆෙල්, අබ්සලොම්ට මෙහෙම කිව්වා. “සෙබළු 12,000ක් තෝරගන්න මට අවසර දෙන්න. අපි අද රෑම දාවිත් පස්සෙන් පන්නගෙන යන්නම්. 2 රජ හොඳටම මහන්සි වෙලා ඉද්දී මං එයා ඉන්න තැනට කඩා පනින්නම්.+ එතකොට එයා හොඳටම කලබල වෙයි. රජ එක්ක ඉන්න හැමෝමත් එයාව දාලා පැනලා යයි. රජ තනි වුණාම මම එයාව විතරක් මරලා දාන්නම්.+ 3 ඊටපස්සේ මං මුළු සෙනඟවම ඔබ ළඟට එක්කගෙන එන්නම්. ඔබ අල්ලගන්න හදන කෙනාව මරලා දැම්මාම සෙනඟ නිකම්ම ඔබේ පැත්තට එයි. එතකොට හැමෝම සාමයෙන් ජීවත් වෙයි.” 4 අබ්සලොම් සහ ඊශ්‍රායෙල් වැඩිමහල්ලෝ හැමෝම අහිතොෆෙල් දුන්න උපදෙස හුඟක් හොඳයි කියලා පිළිගත්තා.

5 ඒත් අබ්සලොම් මෙහෙම කිව්වා. “අර්කීවරයෙක් වන හූෂයිටත්+ එන්න කියන්න. මේ ගැන එයා මොනවාද කියන්නේ කියලා බලමු.” 6 හූෂයි අබ්සලොම් ළඟට ආවාම අබ්සලොම් එයාට මෙහෙම කිව්වා. “අහිතොෆෙල් අපිට දුන්න උපදෙස හොඳයිද? එයා කියපු විදිහට අපි කරන්නද නැත්නම් ඔයාට ඊට වඩා හොඳ අදහසක් තියෙනවාද?” 7 එතකොට හූෂයි අබ්සලොම්ට මෙහෙම කිව්වා. “මේ පාර නම් අහිතොෆෙල් දුන්න උපදෙස හොඳ නැහැ.”+

8 හූෂයි මෙහෙමත් කිව්වා. “ඔබ හොඳින්ම දන්නවා ඔබේ තාත්තායි, එයාත් එක්ක ඉන්න අයයි කොච්චර බලවත්ද කියලා.+ අනික එයාලා ඉන්නේ හරියට පැටව් නැති වුණ වැලහින්නක් වගෙයි.+ ඔබේ තාත්තා ගොඩක් දක්ෂ සටන්කරුවෙක්+ කියලත් අමතක කරන්න එපා. එයා අද රෑ සෙනඟ එක්ක ඉන්න එකක් නැහැ. 9 මේ වෙනකොට එයා ගල් ගුහාවක* හරි වෙන කොහේ හරි හැංගිලා ඉන්නවා ඇති.+ ඔයාලා පහර දෙන්න කලින් එයා හැංගිලා ඉන්න තැනකින් ඇවිල්ලා ඔයාලට පහර දුන්නොත් ‘අබ්සලොම්ගේ සෙනඟ පැරදිලා’ කියලා කතාවක් පැතිරෙයි. 10 එහෙම වුණොත් සිංහයෝ වගේ+ එඩිතරව ඉන්න පුරුෂයනුත් හොඳටම බය වෙයි. මොකද ඊශ්‍රායෙල්වල ඉන්න හැමෝම දන්නවා ඔබේ තාත්තා කොච්චර දක්ෂ සටන්කරුවෙක්ද+ කියලා. එයා එක්ක ඉන්නේ සටනට දක්ෂ, එඩිතර මිනිස්සු කියලත් හැමෝම දන්නවා. 11 දාන් ඉඳන් බෙයර්ෂෙබා+ වෙන කල් මුහුදු වෙරළේ වැලි වගේ+ ඉන්න මුළු ඊශ්‍රායෙල් සෙනඟවම ඔබ ළඟට රැස් කරගන්න. ඊටපස්සේ එයාලත් එක්ක සටනට යන්න. 12 අපි එයා හැංගිලා ඉන්න තැන හොයාගෙන යමු. ඊටපස්සේ පොළොවට පිනි වැටෙනවා වගේ අපි හෙමින් සැරේ ගිහින් එයාට පහර දෙමු. එයාලාගෙන් එක් කෙනෙක්වත් ඉතුරු කරන්නේ නැතුව මරලා දාමු. 13 එයා නගරෙකට ගිහින් හැංගිලා හිටියොත් අපි මුළු ඊශ්‍රායෙල් සෙනඟ එක්ක එතනට ගිහින් ගල් කැටයක්වත් ඉතුරු නොවෙන්න ඒ නගරේ විනාශ කරලා දාමු. නගරේ තියෙන හැම දෙයක්ම කඹවලින් ඇදලා ගඟට දාමු.”

14 ඒක ඇහුවාම අබ්සලොම් සහ ඊශ්‍රායෙල් පුරුෂයෝ හැමෝම “අහිතොෆෙල්ගේ උපදෙස්වලට වඩා අර්කීවරයෙක් වන හූෂයි දුන්න උපදෙස් හොඳයි”+ කියලා කිව්වා. අහිතොෆෙල්ගේ උපදෙස හුඟක් බුද්ධිමත් එකක් වුණත් එයාලා ඒ උපදෙස පිළිගත්තේ නැහැ. එහෙම වුණේ යෙහෝවා ඒ විදිහට වෙන්න සලස්වපු නිසයි.+ මොකද යෙහෝවා, අබ්සලොම්ව විනාශ කරන්න තීරණය කරලයි තිබුණේ.+

15 ඊටපස්සේ හූෂයි, පූජකයන් වන සාදොක්ට සහ අබියාතර්ට+ මෙහෙම කිව්වා. “අබ්සලොම්ටයි, ඊශ්‍රායෙල් වැඩිමහල්ලන්ටයි අහිතොෆෙල් උපදෙස් දුන්නේ මේ විදිහට. ඒත් මම අබ්සලොම්ට මේ විදිහට උපදෙස් දුන්නා. 16 දැන් ඉක්මනට දාවිත් රජට මෙහෙම දන්වලා යවන්න. ‘අද රෑ පාළුකරයට වෙලා ඉන්නේ නැතුව ගඟෙන් එගොඩ වෙන්න. නැත්නම් මේ අය ඇවිත් ඔබවයි, ඔබ එක්ක ඉන්න හැමෝවමයි මරලා දායි.’”+

17 යොනාතාන්+ සහ අහිමයාෂ්+ නුවර ඇතුළට යන්නේ නැතුව ඒන්රොගෙල්වල+ නැවතිලා හිටියා. මොකද නුවර ඇතුළට ගියොත් අහු වෙයි කියලා එයාලා බයෙන් හිටියේ. සේවිකාවක් එයාලා හිටපු තැනට ඇවිත් හූෂයි කියපු පණිවිඩය එයාලට දැනුම් දුන්නා. ඊටපස්සේ ඒ දෙන්නා දාවිත් රජට ඒ ගැන දන්වන්න එතනින් පිටත් වුණා. 18 ඒත් තරුණයෙක් ඒ දෙන්නාව දැකලා ඒ ගැන අබ්සලොම්ට කිව්වා. ඉතින් ඒ දෙන්නා ඉක්මනටම බහුරීම්වල+ හිටිය මිනිසෙක්ගේ ගෙදරට ආවා. ඒ ගෙදර මිදුලේ ළිඳක් තිබුණා. ඒ දෙන්නා ළිඳට බැහැලා හැංගුණා. 19 ඒ මිනිසාගේ බිරිඳ ළිං කට වහලා ඒකට උඩින් කොටපු ධාන්‍ය ඇතිරුවා. කිසි කෙනෙක් ඒ ගැන දැනගෙන හිටියේ නැහැ. 20 අබ්සලොම්ගේ සේවකයන් ඒ ගෙදරට ඇවිත් ඒ කාන්තාවගෙන් ඇහුවා “අහිමයාෂ් සහ යොනාතාන් කොහෙද” කියලා. එතකොට එයා කිව්වා “එයාලා ගඟ පැත්තට ගියා”+ කියලා. අබ්සලොම්ගේ සේවකයන් ඒ දෙන්නාව හෙව්වත් හම්බ වුණේ නැහැ. ඒ නිසා එයාලා ආයෙත් යෙරුසලමට ගියා.

21 ඊටපස්සේ යොනාතාන් සහ අහිමයාෂ් ළිඳෙන් එළියට ඇවිත් දාවිත් හිටපු තැනට ගිහින් එයාට මෙහෙම කිව්වා. “ඔබ ඉක්මන් කරලා ගඟෙන් එහා පැත්තට යන්න. මොකද ඔබව මේ විදිහට අල්ලගන්න කියලා අහිතොෆෙල් උපදෙස් දීලා තියෙනවා.”+ 22 ඉතින් දාවිත් සහ එයා එක්ක හිටිය සෙනඟ ඉක්මනින්ම යොර්දාන් ගඟෙන් එගොඩ වෙන්න පටන්ගත්තා. පාන්දර වෙද්දී හැම කෙනෙක්ම ගඟෙන් එහා පැත්තට ගිහින් තිබුණා.

23 තමන් දුන්න උපදෙස පිළිගත්තේ නැහැ කියලා දැනගත්තාම අහිතොෆෙල් බූරුවෙක්ව ගමනට ලෑස්ති කරගෙන එයාගේ ගමට ගියා.+ එයා ගෙදර ගියාට පස්සේ පවුලේ දේවල් සැලසුම් කළා.+ ඊටපස්සේ එයා එල්ලිලා මැරුණා.+ එයාගේ මුතුන්මිත්තන්ගේ සොහොනේ එයාව තැන්පත් කළා.

24 ඔය අතරේ දාවිත් මහනායිම්වලට+ ආවා. අබ්සලොම් ඊශ්‍රායෙල් පුරුෂයෝ හැමෝම එක්ක යොර්දාන් ගඟෙන් එගොඩ වුණා. 25 අබ්සලොම් යෝවාබ් වෙනුවට හමුදාපති විදිහට පත් කළේ+ අමාසාව.+ අමාසාගේ තාත්තා ඊශ්‍රායෙල් ජාතිකයෙක් වුණ ඉත්රා. අමාසාගේ අම්මා නාහාෂ්ගේ දුව වුණ අබිගායිල්.+ අබිගායිල්ට ෂෙරුයියා කියලා සහෝදරියක් හිටියා. ෂෙරුයියා යෝවාබ්ගේ අම්මා. 26 අබ්සලොම් ඊශ්‍රායෙල් සෙනඟ එක්ක ගිලියද්වලට ඇවිත් කඳවුරු බැඳගත්තා.+

27 දාවිත් රජ මහනායිම්වලට ආවාම අම්මොන්වරුන්ට අයිති රබ්බා+ කියන නගරයේ ඉඳන් ආපු නාහාෂ්ගේ පුතා වන ෂෝබි, ලොදේබාර් ඉඳන් ආපු අමියෙල්ගේ පුතා වන මාකීර්+ සහ රොගේලීම් නගරයේ හිටිය ගිලියද්වරයෙක් වන බාසිල්ලයි+ දාවිත්ව හම්බ වෙන්න ආවා. 28 එයාලා ඇඳන්, බේසම්, මැටි භාජන අරගෙන ආවා. ඒ වගේම එයාලා තිරිඟු, බාර්ලි, පිටි, බැදපු ධාන්‍ය, වියළි ධාන්‍ය, බෝංචි, පරිප්පු, 29 මීපැණි, බටර්,* මුදවපු කිරි* සහ බැටළුවොත් අරන් ආවා. “පාළුකරයේ ඉන්න නිසා සෙනඟට හුඟක් මහන්සි ඇති. ඒ අයට බඩගිනි ඇති. තිබහත් ඇති”+ කියලා එයාලා දාවිත්ටයි, එයා එක්ක හිටපු සෙනඟටයි ඒවා දුන්නා.+

18 දාවිත් එයාත් එක්ක හිටපු පුරුෂයන්ව ගණන් කළා. ඊටපස්සේ එයා ඒ අයව සීයේ සහ දාහේ කණ්ඩායම්වලට බෙදලා ඒ එක් එක් කණ්ඩායම් බලාගන්න අධිපතීන්ව පත් කළා.+ 2 දාවිත් ඒ අයගෙන් තුනෙන් එකක් යෝවාබ්+ යටතේ තිබ්බා. ෂෙරුයියාගේ+ පුතා සහ යෝවාබ්ගේ සහෝදරයා වන අබිෂයි+ යටතේ තවත් තුනෙන් එකක් තිබ්බා. අනිත් තුනෙන් එක ගාත්වලින් ආපු ඉත්තයිට+ භාර දුන්නා. ඊටපස්සේ රජ එයාලට කිව්වා “මාත් ඔයාලා එක්ක එනවා” කියලා. 3 ඒත් එයාලා දාවිත්ට මෙහෙම කිව්වා. “ඔයා අපිත් එක්ක එන්න එපා.+ මිනිස්සු 10,000කටත් වඩා ඔයාව වටිනවා.+ අපි පලා ගියත් සතුරන්ට ඒකෙන් වැඩක් නැහැ. අපෙන් භාගයක්ම මැරුණත් එයාලට කිසි ගාණක් නැහැ. ඒ නිසා ඔයා නුවරටම වෙලා ඉන්න. නුවරේ ඉඳන් අපිට උදව් කරන්න.” 4 එතකොට රජ එයාලට මෙහෙම කිව්වා. “ඔයාලා කියන දෙයක් මම කරන්නම්.” රජ නුවර දොරටුව ළඟට වෙලා බලන් ඉද්දී සෙනඟ සීයේ සහ දාහේ කණ්ඩායම් විදිහට එතනින් පිටත් වෙලා ගියා. 5 ඒ වෙලාවේ රජ යෝවාබ්ටයි, අබිෂයිටයි, ඉත්තයිටයි මෙහෙම අණ කළා. “අබ්සලොම්ට දරුණු විදිහට සලකන්න එපා. එයා මගේ පුතා.”+ රජ හමුදාපතීන්ට එහෙම කියද්දී මුළු සෙනඟම ඒක අහගෙනයි හිටියේ.

6 සෙනඟ ඊශ්‍රායෙල්වරු එක්ක සටන් කරන්න පිටත් වුණා. එයාලා සටන් කළේ එෆ්‍රායිම්වල තිබුණ කැලෑවක.+ 7 දාවිත්ගේ සේවකයෝ ඊශ්‍රායෙල්වරුන්ව+ පැරැද්දුවා.+ එදා පුරුෂයන් 20,000ක්ම මැරුම් කෑවා. 8 බලන බලන හැම තැනකම සෙබළු සටන් කරකර හිටියා. එදා කඩුවෙන් මැරුම් කාපු අයට වඩා ලොකු පිරිසක් කැලේ තිබුණ උවදුරුවලට අහු වෙලා මැරුණා.

9 ඔය අතරේ අබ්සලොම් සහ දාවිත්ගේ සේවකයෝ මූණට මූණ හම්බ වුණා. ඒ වෙලාවේ අබ්සලොම් කොටළුවෙක් පිටේ ගමන් කරකරයි හිටියේ. කොටළුවා ලොකු ගහක් යටින් යද්දී අබ්සලොම්ගේ කොණ්ඩේ ඒ ගහේ අතු අතරේ පැටලුණා. කොටළුවා නතර වෙන්නේ නැතුව දිගටම ගියත් අබ්සලොම් ගහේ හිර වෙලා හිටියා. 10 ඒක දැකපු කෙනෙක් යෝවාබ්ට+ කිව්වා “අබ්සලොම් ලොකු ගහක අතු අස්සේ හිර වෙලා ඉන්නවා මං දැක්කා” කියලා. 11 ඒක ඇහුවාම යෝවාබ් එයාට මෙහෙම කිව්වා. “ඇයි ඔයා එයාව මරලා දැම්මේ නැත්තේ? ඔයා එහෙම කළා නම් මං ඔයාට රිදී ෂෙකෙල් දහයකුයි, ඉණපටියකුයි දෙනවානේ.” 12 ඒත් එයා යෝවාබ්ට මෙහෙම කිව්වා. “‘අබ්සලොම්ට කිසිම අනතුරක් කරන්න එපා’+ කියලා රජ ඔබටයි, අබිෂයිටයි, ඉත්තයිටයි කියනවා අපිටත් ඇහුණා. ඒ නිසා මට රිදී ෂෙකෙල් 1,000ක් දුන්නත් රජගේ පුතාට විරුද්ධව මං අතක්වත් උස්සන්නේ නැහැ. 13 අනික මං රජ කියන දේ අහන්නේ නැතුව* අබ්සලොම්ව මරලා දැම්මා නම් ඒක මට රජගෙන් හංගන්න පුළුවන්ද? මම එහෙම වැඩක් කළා නම් ඔබ කවදාවත් රජගෙන් මාව බේරගන්නේ නැහැ කියලත් මම දන්නවා.” 14 එතකොට යෝවාබ් “මට ඔයාත් එක්ක මෙතනට වෙලා කාලේ නාස්ති කරකර ඉන්න බැහැ” කියලා අතු අස්සේ හිර වෙලා හිටිය අබ්සලොම් ළඟට ගියා. ඒ වෙද්දී අබ්සලොම් මැරිලා හිටියේ නැහැ. යෝවාබ් ඊගස්* තුනක් අරගෙන අබ්සලොම්ගේ පපුවට ඇන්නා. 15 යෝවාබ්ගේ ආයුධ අරන් ගිය සේවකයෝ දහදෙනෙකුත් එතනට ඇවිත් අබ්සලොම්ට ආයුධවලින් පහර දීලා එයාව මරලා දැම්මා.+ 16 ඊටපස්සේ යෝවාබ් හොරණෑව පිඹලා සටන නතර කළා. සෙබළුත් ඊශ්‍රායෙල්වරුන්ව පන්නගෙන යන එක නැවැත්තුවා. 17 එයාලා අබ්සලොම්ගේ මළ සිරුර කැලෑවේ තිබුණ ලොකු වළකට දාලා ඒකට උඩින් ලොකු ගල් ගොඩක් ගැහුවා.+ ඊශ්‍රායෙල්වරු හැමෝම තම තමන්ගේ ගෙවල්වලට පලා ගියා.

18 අබ්සලොම් ජීවත් වෙලා ඉද්දී එයා රජගේ නිම්නයේ*+ ස්මාරකයක් හැදුවා. “මගේ නම ගෙනියන්න මට පුතෙක් නැහැ”+ කියලා අබ්සලොම් තමන්ව මතක් වෙන්න ඒ ස්මාරකයට එයාගේ නම තිබ්බා. අද වෙන කල්ම ඒක හඳුන්වන්නේ අබ්සලොම්ගේ ස්මාරකය කියලයි.

19 සාදොක්ගේ පුතා වන අහිමයාෂ්+ “අද යෙහෝවා සතුරන්ගේ අතින් රජව බේරගෙන ඔහුට යුක්තිය ඉටු කරලා දුන්නා!+ මම දුවලා ගිහින් රජට ඒ ගැන කියන්නද” කියලා යෝවාබ්ගෙන් ඇහුවා. 20 ඒත් යෝවාබ් එයාට මෙහෙම කිව්වා. “රජගේ පුතා මැරුණ නිසා+ අද ඔයා ආරංචිය අරන් යන්න එපා. වෙන දවසක ආරංචියක් අරන් යන්න ඔයාට පුළුවන්.” 21 ඊටපස්සේ යෝවාබ් එතන හිටිය කූෂ් ජාතිකයෙක්ට+ මෙහෙම කිව්වා. “දැන් ගිහින් ඔයා දැක්ක දේ රජට කියන්න.” ඒ කෙනා යෝවාබ්ට ආචාර කළාට පස්සේ එතනින් දුවලා ගියා. 22 ඒත් සාදොක්ගේ පුතා වන අහිමයාෂ් යෝවාබ්ට ආයෙත් මෙහෙම කිව්වා. “කූෂ් ජාතිකයා ගියාට කමක් නැහැ. මටත් එයාගේ පස්සෙන් දුවගෙන යන්න අවසර දෙන්න.” ඒත් යෝවාබ් “ඔයා ගිහින් වැඩක් තියෙනවාද මගේ පුතේ? ඔයාට ගිහින් කියන්න දෙයක් නැහැනේ” කියලා එයාට කිව්වා. 23 ඒත් එයා යෝවාබ්ට කිව්වා “ඒකට කමක් නැහැ. මටත් යන්න දෙන්න” කියලා. ඉතින් යෝවාබ් “එහෙනම් යන්න” කියලා කිව්වා. අහිමයාෂ් යොර්දාන් පළාත හරහා දුවගෙන ගිහින් කූෂ් ජාතිකයාව පහු කරගෙන ගියා.

24 දාවිත් නුවර දොරටු දෙක අතරේ ඉඳගෙන හිටියා.+ ඒ අතරේ මුරකරු+ පවුරට නැඟලා දොරටුව උඩටම* ගිහින් බැලුවා. එතකොට එයා දැක්කා නුවර දිහාවට මිනිසෙක් තනියෙන් දුවගෙන එනවා. 25 මුරකරු රජට ඒ ගැන දැන්නුවාම රජ මෙහෙම කිව්වා. “එයා තනියම එනවා නම් එයාට කියන්න ආරංචියක් ඇති.” ඒ මිනිසා ටිකෙන් ටික නුවරට ළං වෙද්දී 26 මුරකරු තවත් කෙනෙක් දුවගෙන එනවා දැක්කා. එතකොට එයා දොරටු පාලකයාට “අර බලන්න, තවත් කෙනෙක් මේ පැත්තට දුවගෙන එනවා! එයා එන්නෙත් තනියෙන්” කියලා කිව්වා. එතකොට රජ “එයා එනවා ඇත්තෙත් ආරංචියක් අරගෙන” කියලා කිව්වා. 27 මුරකරු මෙහෙමත් කිව්වා. “පළවෙනි කෙනා සාදොක්ගේ පුතා වන අහිමයාෂ්+ වෙන්න ඇති. එයා දුවගෙන එන විදිහෙන් ඒක කියන්න පුළුවන්.” රජ “එයා හොඳ කෙනෙක්. එයා අරන් එන්නේ හොඳ ආරංචියක් වෙන්න ඇති” කියලා කිව්වා. 28 අහිමයාෂ්, රජ ළඟට දුවගෙන ඇවිත් “හැම දෙයක්ම හොඳට සිද්ධ වුණා” කියලා කිව්වා. එයා රජ ඉස්සරහා දණින් වැටිලා බිමටම ඔළුව පහත් කරලා මෙහෙමත් කිව්වා. “ඔබේ දෙවි වන යෙහෝවාට ප්‍රශංසා වේවා! මගේ ස්වාමීන් වන රජ්ජුරුවන්ට විරුද්ධව කැරලිගහපු මිනිස්සුන්ව දෙවියන් අපිට යටත් කරලා දුන්නා.”+

29 ඒත් රජ “අබ්සලොම් හොඳින් ඉන්නවාද” කියලා එයාගෙන් ඇහුවා. එතකොට අහිමයාෂ් මෙහෙම කිව්වා. “යෝවාබ් ඔබේ සේවකයාවයි, මාවයි පිටත් කරලා එවපු වෙලාවේ ලොකු කලබලයක් තිබුණා. ඒත් ඒ මොකක් ගැනද කියලා නම් මම දන්නේ නැහැ.”+ 30 එතකොට රජ “ඔයා දැන් මෙතනට වෙලා ඉන්න” කියලා එයාට කිව්වා. ඉතින් එයා පැත්තකට වෙලා බලාගෙන හිටියා.

31 ඊටපස්සේ කූෂ් ජාතිකයාත් රජ ළඟට ඇවිත්+ මෙහෙම කිව්වා. “මගේ ස්වාමීනි, රජ්ජුරුවනි, ඔබට කියන්න ආරංචියක් තියෙනවා. ඔබට විරුද්ධව කැරලිගහපු මිනිස්සුන්ගේ අතින් යෙහෝවා අද ඔබව බේරලා ඔබට යුක්තිය ඉටු කරලා දුන්නා!”+ 32 එතකොට රජ “අබ්සලොම් හොඳින් ඉන්නවාද” කියලා කූෂ් ජාතිකයාගෙන් ඇහුවා. කූෂ් ජාතිකයා දාවිත්ට මෙහෙම කිව්වා. “මගේ ස්වාමීන් වන රජ්ජුරුවනි, ඔබේ සතුරන්ටත් ඔබට විරුද්ධව කැරලිගහන හැම කෙනෙක්ටමත් වෙන්න ඕනෙ ඔහුට සිද්ධ වුණ දේමයි!”+

33 ඒක අහලා රජට දරාගන්න බැරි දුකක් දැනුණා. එයා දොරටුවට උඩින් තිබුණ කුටියට ගිහින් එහෙට මෙහෙට ඇවිද ඇවිද “අනේ අබ්සලොම්, අනේ මගේ පුතේ අබ්සලොම්. ඔයා වෙනුවට මම මැරුණා නම් හොඳයි. අනේ මගේ පුතේ අබ්සලොම්”+ කියකිය හොඳටම ඇඬුවා.

19 ඊටපස්සේ යෝවාබ්ට මෙහෙම ආරංචි වුණා. “රජ තාමත් අබ්සලොම් ගැන දුක් වෙවී අඬනවා.”+ 2 රජ එයාගේ පුතාගේ මරණය නිසා ගොඩක් දුකෙන් ඉන්නවා කියලා සෙනඟටත් ආරංචි වුණා. ඉතින් එදා ලොකු ජයග්‍රහණයක් ලබාගෙන තිබුණත් සෙනඟට ඒක ශෝක දිනයක් වගේ වුණා. 3 සෙනඟ හොරෙන්ම වගේ නුවරට ඇතුල් වුණා.+ එයාලා ආවේ හරියට යුද පිටියෙන් පලා යන්න වුණ නිසා ලැජ්ජාවෙන් හිටිය සෙනඟක් වගේ. 4 රජ එයාගේ මූණ වහගෙන “අනේ මගේ පුතා අබ්සලොම්, අනේ මගේ පුතා”+ කියකිය හයියෙන් ඇඬුවා.

5 අන්තිමට යෝවාබ්, රජ හිටපු ගෙදරට ගිහින් එයාට මෙහෙම කිව්වා. “ඔයාවයි, ඔයාගේ දුවලා+ පුතාලවයි,+ ඔයාගේ භාර්යාවන්වයි, උපභාර්යාවන්වයි+ බේරගත්ත ඔයාගේ සේවකයන්ව අද ඔයා ලැජ්ජාවට පත් කළා. 6 ඔයාට ආදරේ කරන අයට ඔයා වෛර කරනවා. ඔයාට වෛර කරන අයට ඔයා ආදරේ කරනවා. ඔයාගේ නිලධාරීන්ගෙන්වත් සේවකයන්ගෙන්වත් ඔයාට කිසිම වැඩක් නැහැ කියලා ඔයා අද පෙන්නුවා. මං දන්නවා අපි හැමෝම මැරිලා අබ්සලොම් විතරක් ඉතුරු වුණා නම් අද ඔයා සතුටින් ඉඳියි. 7 දැන් ඔයාගේ සේවකයන් ළඟට ගිහින් එයාලාගේ හිත් සැනසෙන විදිහට කතා කරන්න. මම යෙහෝවා ඉස්සරහා දිවුරලා කියන්නේ, ඔයා එයාලා එක්ක කතා කළේ නැත්නම් අද රෑ වෙද්දී ඔයාගේ එක සේවකයෙක්වත් මෙහේ ඉන්න එකක් නැහැ. එයාලා හැමෝම ඔයාව අත්හැරලා යයි. ඔයාගේ තරුණ වයසේ ඉඳන් මේ වෙන කල් ඔයාට වුණ හැම විපතකටම වඩා ඒක දරුණු වෙයි.” 8 ඉතින් රජ නුවරේ දොරටුව ළඟට ගිහින් ඉඳගත්තා. ඊටපස්සේ සෙනඟට දැනුම් දුන්නා “නුවරේ දොරටුව ළඟ රජ ඉන්නවා” කියලා. ඒක අහලා සෙනඟ රජ ළඟට එන්න පටන්ගත්තා.

ඒත් ඊශ්‍රායෙල්වරු* එයාලාගේ ගෙවල්වලට පලා ගිහිල්ලයි තිබුණේ.+ 9 පස්සේ ඊශ්‍රායෙල් ගෝත්‍රවලට අයිති අය අතරේ විවාදයක් ඇති වුණා. එයාලා මෙහෙම කතා වුණා. “රජ්ජුරුවෝ තමයි අපේ සතුරන්ගෙන් අපිව බේරගත්තේ.+ ඔහු අපිව පිලිස්තිවරුන්ගෙනුත් බේරගත්තා. ඒත් අබ්සලොම් නිසා ඔහු මෙහෙන් පලා ගියා.+ 10 පස්සේ, අපි රජ විදිහට අබ්සලොම්ව තෝරගත්තත්+ ඔහු යුද්ධයේදී මැරුණා.+ ඉතින් ඇයි අපි රජ්ජුරුවන්ව ආපහු මෙහෙට එක්කගෙන එන්නේ නැත්තේ?”

11 දාවිත් රජ පූජකයන් වන සාදොක්ට+ සහ අබියාතර්ට+ මෙහෙම දන්වලා යැව්වා. “යූදා ගෝත්‍රයේ වැඩිමහල්ලන්ට මෙහෙම කියන්න.+ ‘ඊශ්‍රායෙල් සෙනඟ මාව රජමාලිගාවට ගෙන්නගන්න කතා වෙනවා කියලා මේ ගෙදර ඉද්දී මට දැනගන්න ලැබුණා. ඒත් මගේම ගෝත්‍රයේ අය මාව මාලිගාවට ගෙන්නගන්න මුකුත් කරන්නේ නැත්තේ ඇයි? 12 ඔයාලා මගේ සහෝදරයන්, මගේම පවුලේ අය.* ඇයි ඔයාලා මාව ආපහු ගෙන්නගන්න කිසි දෙයක් කරන්නේ නැත්තේ?’ 13 ඔයාලා අමාසාට+ මෙහෙම කියන්න. ‘ඔයා මගේම සහෝදරයෙක්. ඒ නිසා මම යෝවාබ් වෙනුවට ඔයාව හමුදාපති හැටියට පත් කරනවා. මම එහෙම කළේ නැත්නම් දෙවියන් මට දරුණු විදිහට දඬුවම් කරන්න ඕනේ.’”+

14 එහෙම කියලා දාවිත් යූදාවල පුරුෂයන් හැමෝගෙම හිත් දිනාගත්තා. ඒ නිසා එයාලා හැමෝම එකඟතාවකට ඇවිත් රජට මෙහෙම දන්වලා යැව්වා. “රජ්ජුරුවනි, ඔබේ සේවකයන් එක්ක ආපහු මෙහෙට එන්න.”

15 ඉතින් රජ ආයෙත් යන්න තීරණය කළා. එයා යොර්දාන් ගඟ ළඟට ඇවිත් නතර වුණා. රජව යොර්දාන් ගඟෙන් මෙගොඩට එක්කගෙන එන්න යූදා ගෝත්‍රයේ අය ගිල්ගාල්+ නගරයට ගියා. 16 ඒ වෙලාවේ බහුරීම්වල ජීවත් වුණ බෙන්ජමින් ගෝත්‍රයට අයිති ගෙරාගේ පුතා වන ෂිමෙයි+ යූදා ගෝත්‍රයේ අයත් එක්ක දාවිත් රජව හම්බ වෙන්න ඉක්මනට ඉක්මනට ඇවිදන් ගියා. 17 ෂිමෙයි එක්ක බෙන්ජමින් ගෝත්‍රයට අයිති මිනිස්සු 1,000කුත් හිටියා. සාවුල්ගේ ගෙදර සේවය කරපු ෂීබාත්+ එයාගේ පුතාලා 15දෙනාත් සේවකයන් 20දෙනාත් එතනට ආවා. රජ යොර්දාන් ගඟ ළඟට එන්නත් කලින් එයාලා හැමෝම එතනට ඇවිත් හිටියා. 18 රජවයි, එයාගේ ගෙදර හිටපු අයවයි මෙගොඩට එක්කන් එන්න එයා* ගඟෙන් එගොඩට ගියා. රජ ඉල්ලන ඕනෙම දෙයක් කරලා දෙන්නත් එයා ලෑස්ති වෙලයි හිටියේ. රජ ගඟෙන් එගොඩ වෙන්න යද්දීම ගෙරාගේ පුතා වන ෂිමෙයි රජ ඉස්සරහා දණින් වැටිලා 19 මෙහෙම කිව්වා. “අනේ මගේ ස්වාමීනි, ඔබ යෙරුසලම අත්හැරලා ගිය දවසේදී මම ඔබට කරපු වරදට මට සමාවෙන්න. අනේ, ඒක මතක තියාගන්න එපා.+ ඒක ඔබේ හිතෙන් අයින් කරලා දාන්න. 20 මම කළේ වරදක් කියලා මම දන්නවා. මගේ ස්වාමීන් වන රජ්ජුරුවනි, යෝසෙප්ගේ පෙළපතේ අනිත් හැමෝටම ඉස්සෙල්ලා මං ඔබව හම්බ වෙන්න ආවේ ඒ නිසයි.”

21 ඒක ඇහුණ ගමන්ම ෂෙරුයියාගේ+ පුතා වන අබිෂයි,+ රජට මෙහෙම කිව්වා. “ෂිමෙයිව මරලා දාන්න ඕනේ. එයා යෙහෝවා අභිෂේක කරපු රජට අපහාස කළා.”+ 22 ඒත් දාවිත් මෙහෙම කිව්වා. “ෂෙරුයියාගේ+ පුත්‍රයෙනි, මේක ඔයාලට අදාළ දෙයක් නෙමෙයි. මේක මගේ ප්‍රශ්නයක්. ඇයි ඔයාලා මං කියන දේට විරුද්ධව යන්න හදන්නේ? අද ඊශ්‍රායෙල්වල මගේ රජකම ස්ථිර වුණා. ඒ නිසා අද ඊශ්‍රායෙල් දේශයේ කිසිම කෙනෙක්ව මරන්න අවසර නැහැ.” 23 ඊටපස්සේ රජ ෂිමෙයිට මෙහෙම කිව්වා. “ඔයාව මරන්නේ නැහැ.” රජ ඒ දේ ෂිමෙයිට දිවුරලා පොරොන්දු වුණා.+

24 සාවුල්ගේ මුනුපුරා වන මෙෆිබොෂෙත්ටත්+ ඕනෙ වුණා රජව පිළිගන්න යන්න. රජ ගිය දවසේ ඉඳන් කිසිම කරදරයක් නැතුව ආයෙත් ආපු දවස වෙන කල්ම එයා කකුල් හෝදගෙන තිබුණෙවත් රැවුල කපලා තිබුණෙවත් ඇඳුම් හෝදගෙන තිබුණෙවත් නැහැ. 25 එයා රජව හම්බ වෙන්න යෙරුසලමට* ආවාම රජ එයාගෙන් මෙහෙම ඇහුවා. “මෙෆිබොෂෙත්, ඇයි ඔයා මාත් එක්ක යන්න ආවේ නැත්තේ?” 26 එතකොට එයා මෙහෙම කිව්වා. “මගේ ස්වාමීනි, රජ්ජුරුවනි, ඔබේ සේවකයා වන මට ඇවිදින්න අමාරු නිසා+ මගේ සේවකයාට+ මං කිව්වා ‘මට රජ එක්ක යන්න ඕනේ. ඉතින් මට බූරුවෙක්ව ගමනට ලෑස්ති කරලා දෙන්න’ කියලා. හැබැයි එයා මාව රැවැට්ටුවා. 27 එයා මගේ ස්වාමීන් වන රජ්ජුරුවන්ට මං ගැන බොරු කිව්වා.+ මගේ ස්වාමීනි, රජ්ජුරුවනි, ඔබ සැබෑ දෙවියන්ගේ දූතයෙක් වගේ. ඒ නිසා ඔබට හොඳයි කියලා හිතෙන දෙයක් කරන්න. 28 මගේ තාත්තාගේ පවුලම නැත්තටම නැති කරලා දාන්න මගේ ස්වාමීන් වන රජ්ජුරුවන්ට තිබුණා. ඒත් ඔබ එහෙම කරන්නේ නැතුව ඔබ එක්ක එකට වාඩි වෙලා කෑම කන්න ඔබේ සේවකයාට ඉඩ දුන්නා.+ ඉතින් තවත් දේවල් ඔබෙන් ඉල්ලන්න මට අයිතියක් තියෙනවාද?”

29 ඒත් රජ මෙෆිබොෂෙත්ට මෙහෙම කිව්වා. “ඔයා මේ ගැන තවත් කතා කරන්නේ ඇයි? මම තීරණයක් ගත්තා ඔය දෙන්නාටම කෙත බෙදලා දෙන්න.”+ 30 එතකොට මෙෆිබොෂෙත් මෙහෙම කිව්වා. “එයාට මුළු කෙතම වුණත් දෙන්න. මගේ ස්වාමීන් වන රජ්ජුරුවන් කිසිම කරදරයක් නැතුව මාලිගාවට ආවානේ. මට ඒ ඇති.”

31 රජව යොර්දාන් ගඟ ළඟට එක්කගෙන යන්න ගිලියද්වල ජීවත් වුණ බාසිල්ලයි,+ රොගේලීම් ඉඳන් ආවා. 32 බාසිල්ලයි හුඟක් වයසක කෙනෙක්. එයාට වයස අවුරුදු 80ක්. එයා හුඟක් පොහොසත් කෙනෙක්. රජ මහනායිම්වල+ හිටපු කාලේදී එයාට ඕනෙ කරන කෑම බීම දුන්නේ බාසිල්ලයි. 33 රජ බාසිල්ලයිට කිව්වා “ඔයාත් මාත් එක්ක ගඟෙන් එගොඩ වෙලා යෙරුසලමට යන්න එන්න. එහෙදී මං ඔයාට කන්න බොන්න දීලා ඔයාව බලාගන්නම්”+ කියලා. 34 ඒත් බාසිල්ලයි රජට මෙහෙම කිව්වා. “මම තව වැඩි කාලයක් ජීවත් වෙන්නේ නැහැ. ඒ නිසා රජ්ජුරුවන් එක්ක යෙරුසලමට යන එකේ ප්‍රයෝජනයක් තියෙනවාද? 35 මට දැන් වයස අවුරුදු 80ක් වෙනවා.+ ඔබේ සේවකයා වන මට දැන් හොඳ නරක තෝරන්න බැහැ. මට කන බොන දේවල රසවත් හරියට දැනෙන්නේ නැහැ. ගායක ගායිකාවන්ගේ සින්දු අහලා සතුටු වෙන්නත් බැහැ.+ මම කොහොමද මගේ ස්වාමීන් වන රජ්ජුරුවන්ට බරක් වෙන්නේ? 36 ඔබ මට මෙච්චර හොඳින් සලකන්න ඕනෙ නැහැ මගේ ස්වාමීනි. යොර්දාන් ගඟ ළඟට ඔබත් එක්ක එන්න ලැබුණ එකම ලොකු දෙයක්. 37 ඔබේ සේවකයා වන මට ආපහු යන්න අවසර දෙන්න. මට ඕනෙ මගේම ගමේ මැරෙන්නයි. මාව මගේ තාත්තායි, අම්මායි ළඟ තැන්පත් කරනවාට මං කැමතියි.+ හැබැයි ඔබේ සේවකයා වන කිම්හාම්+ මෙතන ඉන්නවා. මගේ ස්වාමීනි, රජ්ජුරුවනි, ඔබ කැමති නම් ගඟෙන් එගොඩට යද්දී එයාව අරගෙන යන්න. ඔබට හොඳයි කියලා හිතෙන දෙයක් එයා වෙනුවෙන් කරන්න.”

38 එතකොට රජ එයාට මෙහෙම කිව්වා. “ගඟෙන් එගොඩට යද්දී මම කිම්හාම්වත් එක්කගෙන යන්නම්. මං එයා වෙනුවෙන් කරන්න ඕනෙ මොනවාද කියලා ඔයා කියන්න. ඔයා කියන ඕනෙම දෙයක් කරන්න මං ලෑස්තියි.” 39 ඊටපස්සේ මුළු සෙනඟම යොර්දාන් ගඟෙන් එගොඩ වුණා. ගඟෙන් එගොඩ වෙන්න කලින් රජ බාසිල්ලයිව+ සිපගෙන එයාට ආශීර්වාද කළා. රජගෙන් සමුගත්තාට පස්සේ බාසිල්ලයි එයාගේ ගෙදරට ගියා. 40 රජ ගඟෙන් එගොඩ වෙලා ගිල්ගාල්වලට+ යද්දී කිම්හාම් එයාත් එක්ක ගියා. යූදා ගෝත්‍රයේ මුළු සෙනඟත් ඊශ්‍රායෙල් සෙනඟගෙන් භාගයකුත් රජ එක්ක ගියා.+

41 පස්සේ ඊශ්‍රායෙල් ගෝත්‍රවලට අයිති පුරුෂයන් හැමෝම රජ ළඟට ඇවිත් මෙහෙම කිව්වා. “යූදා ගෝත්‍රයේ අපේ සහෝදරයන් ඔබවයි, ඔබේ ගෙදර ඉන්න අයවයි, ඔබේ සේවකයන්වයි යොර්දාන් ගඟෙන් මෙගොඩට අරන් ආවේ හොර රහසින්. ඇයි එයාලා අපිට නොකියා එහෙම දෙයක් කළේ?”+ 42 යූදා ගෝත්‍රයේ පුරුෂයෝ ඊශ්‍රායෙල් පුරුෂයන්ට මෙහෙම කිව්වා. “අපි එහෙම කළේ අපි රජගේ කිට්ටුම නෑයෝ නිසා.+ අපි රජගේ වියදමින් කිසිම දෙයක් කෑවාද? ඔහුව අරන් ආවා කියලා අපිට තෑග්ගක් ලැබුණාද? ඉතින් ඇයි ඔයාලා කේන්ති ගන්නේ?”

43 ඒත් ඊශ්‍රායෙල් පුරුෂයෝ යූදා ගෝත්‍රයේ පුරුෂයන්ට මෙහෙම කිව්වා. “රාජ්‍යයෙන් කොටස් දහයක්ම අයිති අපිට. ඒ නිසා දාවිත් රජට සම්බන්ධ කාරණාවලදී ඔයාලට වඩා අයිතියක් තියෙන්නේ අපිටයි. ඇයි ඔයාලා අපිට මෙච්චර පහත් විදිහට සැලකුවේ? අපේ රජව ආපහු අරගෙන එන්න වැඩි අයිතියක් තියෙන්නේ අපිට නෙමෙයිද?” ඒත් ඊශ්‍රායෙල් පුරුෂයන්ට යූදා ගෝත්‍රයේ පුරුෂයන් එක්ක වාද කරලා දිනන්න බැරි වුණා.*

20 බෙන්ජමින් ගෝත්‍රයේ ෂෙබා කියලා කෙනෙක් හිටියා. එයාගේ තාත්තාගේ නම බික්‍රි. ෂෙබා+ කියන්නේ යනයන තැන ප්‍රශ්න ඇති කරපු කෙනෙක්. එයා හොරණෑව පිඹලා+ මෙහෙම කිව්වා. “ඊශ්‍රායෙල් ජනයෙනි,+ දාවිත්ගේ රාජ්‍යයත් එක්ක අපිට කිසිම සම්බන්ධයක් නැහැ. යෙස්සේගේ පුතාගෙන් අපිට උරුමයක් ලැබෙයි කියලා හිතන්නත් බැහැ.+ ඉතින් දැන් ඔයාලා ගිහින් ඔයාලාගේ දෙවිවරුන්ට නමස්කාර කරන්න.”* 2 එතකොට ඊශ්‍රායෙල් සෙනඟ දාවිත් රජව අත්හැරලා බික්‍රිගේ+ පුතා වුණ ෂෙබාගේ පැත්තට ගියා. ඒත් යොර්දාන් ඉඳන් යෙරුසලම වෙන කල් ජීවත් වුණ යූදාවල සෙනඟ හැමෝම එයාලාගේ රජට පක්ෂව හිටියා.+

3 දාවිත් යෙරුසලමේ තිබුණ එයාගේ මාලිගාවට ගියා.+ එයා මාලිගාව බලාගන්න තියලා ගිය උපභාර්යාවන් දහදෙනාව වෙනම ගෙදරකට යවලා+ ඒක මුර කරන්න සෙබළුන්ව පත් කළා. ඒ දහදෙනාට ඕන කරන කෑම බීම දුන්නත් දාවිත් එයාලා එක්ක ලිංගික සම්බන්ධකම් පැවැත්තුවේ නැහැ.+ ස්වාමිපුරුෂයෙක් හිටියත් එයාලා මැරෙන කල්ම වැන්දඹුවන් වගේ අනිත් අයගෙන් වෙන් වෙලා ජීවත් වුණා.

4 රජ අමාසාට+ කතා කරලා මෙහෙම කිව්වා. “දවස් තුනක් ඇතුළත යූදා පුරුෂයන්ව රැස් කරගෙන එයාලා එක්ක මං ළඟට එන්න.” 5 ඉතින් අමාසා යූදා පුරුෂයන්ව රැස් කරගන්න ගියා. ඒත් රජ එයාට එන්න කියපු දවස පහු වෙලයි එයා ආවේ. 6 ඒ නිසා දාවිත් අබිෂයිට+ මෙහෙම කිව්වා. “අබ්සලොම්ට වඩා බික්‍රිගේ පුතා වන ෂෙබා+ අපිට තර්ජනයක්.+ අපි තවත් බලාගෙන හිටියොත් එයා මෙහෙන් පැනලා ගිහින් ආරක්ෂිත නුවරක හැංගෙයි. ඒ නිසා ඔයාගේ ස්වාමියාගේ සේවකයන් එක්ක ගිහින් ෂෙබාව අල්ලගන්න.” 7 ඉතින් අබිෂයි යෝවාබ්ගේ+ සේවකයෝ, කෙරෙතිවරු, පෙලෙතිවරු+ සහ සටනට දක්ෂ පුරුෂයෝ හැමෝම එක්ක යෙරුසලමෙන් පිටත් වෙලා බික්‍රිගේ පුතා වන ෂෙබාව හොයාගෙන ගියා. 8 එයාලා ගිබියොන්වල+ තියෙන ලොකු ගල ළඟට ආවාම අමාසාත්+ එයාලව හම්බ වෙන්න එතනට ආවා. ඒ වෙලාවේ යුද ඇඳුමක් ඇඳගෙන හිටිය යෝවාබ් එයාගේ කඩුව කොපුවේ දාගෙනයි හිටියේ. එයා අමාසා ළඟට ඇවිදගෙන යද්දී කඩුව බිමට වැටුණා.

9 යෝවාබ් අමාසාගෙන් මෙහෙම ඇහුවා. “මගේ සහෝදරයා, ඔයා හොඳින් ඉන්නවාද?” ඊටපස්සේ එයා අමාසාව සිපගන්න යනවා වගේ එයාගේ දකුණු අතින් අමාසාගේ මූණ ඇල්ලුවා. 10 යෝවාබ්ගේ අනිත් අතේ කඩුව තිබුණත් අමාසා ඒ ගැන එච්චර හිතුවේ නැහැ. යෝවාබ් එකපාරටම කඩුවෙන් අමාසාගේ බඩට ඇන්නා.+ අමාසාගේ බඩවැලුත් එළියට ආවා. එයා පණ ඇදඇද හිටපු නිසා එයාට ආයෙත් අනින්න ඕනෙ වුණේ නැහැ. ඊටපස්සේ යෝවාබ් එයාගේ සහෝදරයා වන අබිෂයි එක්ක බික්‍රිගේ පුතා වන ෂෙබාව හොයාගෙන ගියා.

11 යෝවාබ්ගේ සේවකයන්ගෙන් එක් කෙනෙක් අමාසා ළඟ හිටගෙන මෙහෙම කිව්වා. “දාවිත්ගෙයි, යෝවාබ්ගෙයි පැත්තේ ඉන්න හැමෝම දැන් යෝවාබ් එක්ක යන්න.” 12 ඒ වෙලාවේ අමාසා පාර මැද පණ ඇදඇද හිටියා. ලේ විලක් මැද දඟල දඟල හිටිය අමාසාව දැක්ක හැමෝම එතන නතර වෙලා ඒ දිහා බලන් හිටියා. ඒ නිසා යෝවාබ්ගේ සේවකයා අමාසාව පාරෙන් උස්සගෙන ගිහින් කෙතක තියලා අමාසාව රෙද්දකින් වැහුවා. 13 එයා අමාසාව පාරෙන් අයින් කළාට පස්සේ සෙනඟ බික්‍රිගේ පුතා වන ෂෙබාව+ හොයන්න යෝවාබ් එක්ක ගියා.

14 ෂෙබා, ඊශ්‍රායෙල් ගෝත්‍රවලට අයිති හැම පළාතක්ම පහු කරගෙන ගිහින් ආබෙල් බෙත්මයකා+ කියන නුවරට ආවා. බික්‍රිවරුත් එතනට ඇවිත් එයාත් එක්ක නුවරට ඇතුල් වුණා.

15 යෝවාබ් සහ එයාගේ සේවකයන් ආබෙල් බෙත්මයකාවලට ඇවිත් නුවර වැටලුවා. ඒ නුවරේ බලකොටුව වටේ පවුරක් තිබුණා. ඉතින් එයාලා ඒ පවුර වටේ පස් ගොඩගහලා බැම්මක් වගේ එකක් ඉදි කරලා නුවරට පහර දෙන්න ලෑස්ති වුණා. ඊටපස්සේ යෝවාබ්ගේ සේවකයන් පවුර බිඳලා දාන්න හිතාගෙන ඒක වටේ හාරන්න පටන්ගත්තා. 16 ඒ වෙලාවේ නුවරේ හිටිය බුද්ධිමත් කාන්තාවක් එයාලට කතා කරලා මෙහෙම කිව්වා. “පුරුෂයෙනි, මේ අහන්න. යෝවාබ්ට කියන්න මෙතනට එන්න කියලා. මට එයාත් එක්ක ටිකක් කතා කරන්න ඕනේ.” 17 යෝවාබ් එතනට ගියාම ඒ කාන්තාව ඇහුවා “ඔයා යෝවාබ්ද” කියලා. යෝවාබ් කිව්වා “ඔව්, මම තමයි යෝවාබ්” කියලා. එතකොට එයා යෝවාබ්ට මෙහෙම කිව්වා. “ඔයාගේ දාසිය කියන දේ අහන්න.” යෝවාබ් කිව්වා “කියන්න. මම අහගෙනයි ඉන්නේ” කියලා. 18 කාන්තාව මෙහෙම කිව්වා. “ඒ කාලේ ඉඳන් කියමනක් තියෙනවා ‘ප්‍රශ්නයක් විසඳගන්න හොඳ උපදෙසක් ගන්න ඕනෙ නම් ආබෙල් නුවරට යන්න’ කියලා. 19 මම කතා කරන්නේ ඊශ්‍රායෙල් දේශයේ ඉන්න විශ්වාසවන්ත, සාමකාමී ජනතාව වෙනුවෙන්. ඔයා හදන්නේ ඊශ්‍රායෙල්වල තියෙන ප්‍රධාන නුවරක් විනාශ කරන්න. ඔයා යෙහෝවා දෙවියන්ගේ උරුමය නැති කරන්න හදන්නේ ඇයි?”+ 20 එතකොට යෝවාබ් එයාට මෙහෙම කිව්වා. “මේ නුවර විනාශ කරන්න මට කිසිම අදහසක් නැහැ. 21 අපි මෙහෙට ආවේ දාවිත් රජට විරුද්ධ වුණ කෙනෙක්ව අල්ලගන්න. එයා එෆ්‍රායිම්+ කඳුකර පළාතේ කෙනෙක්. එයාගේ නම ෂෙබා.+ එයා බික්‍රිගේ පුතා. එයාව අපිට භාර දුන්නොත් අපි මේ නුවර අත්හැරලා යන්නම්.” ඒක ඇහුවාම ඒ කාන්තාව කිව්වා “අපි එයාගේ බෙල්ල කපලා ඔළුව තාප්පෙන් එහා පැත්තට දාන්නම්” කියලා.

22 ඒ බුද්ධිමත් කාන්තාව ගිහින් සෙනඟ එක්ක කතා කළා. එයාලා බික්‍රිගේ පුතා වන ෂෙබාගේ බෙල්ල කපලා එයාගේ ඔළුව යෝවාබ්ගේ පැත්තට වීසි කළා. ඊටපස්සේ යෝවාබ් හොරණෑව පිඹලා එයාගේ සේවකයන්ව එතනින් පිටත් කරලා යැව්වා. ඒ හැමෝම එයාලාගේ ගෙවල්වලට ගියා.+ යෝවාබ් යෙරුසලමේ හිටිය රජ ළඟට ආවා.

23 ඒ කාලේ ඊශ්‍රායෙල්වල හමුදාපති වෙලා හිටියේ යෝවාබ්.+ කෙරෙතිවරුන්ගේ සහ පෙලෙතිවරුන්ගේ+ අධිපතියා වෙලා හිටියේ යෙහෝයාදාගේ+ පුතා වුණ බෙනායා.+ 24 වහලුන්ගේ අධිපතියා වුණේ අදොරාම්.+ අහිලුද්ගේ පුතා වුණ යෙහෝෂපාට්+ වාර්තාකරු විදිහට සේවය කළා. 25 ෂෙවා ලේකම් විදිහටත් සාදොක්+ සහ අබියාතර්+ පූජකයන් විදිහටත් වැඩ කළා. 26 ඊරා දාවිත් යටතේ වැඩ කරපු ප්‍රධාන අධිපතියෙක්.* එයා යායිර්ගෙන් පැවතෙන කෙනෙක්.

21 දාවිත් පාලනය කරපු කාලයේදී සාගතයක්+ ඇති වුණා. ඒ සාගතය අවුරුදු තුනක් එක දිගටම තිබුණා. දාවිත් යෙහෝවා දෙවියන්ගෙන් ඒ ගැන ඇහුවාම යෙහෝවා එයාට මෙහෙම කිව්වා. “මේ විපත වෙලා තියෙන්නේ සාවුල් නිසයි. සාවුල් ගිබියොන්වරුන්ව මරලා දැම්ම නිසා+ ඒ අයගේ ලේවලට වග කියන්න ඕනෙ එයායි, එයාගේ පවුලේ අයයි.” 2 ඊටපස්සේ රජ ගිබියොන්වරුන්ට+ එන්න කියලා එයාලා එක්ක ඒ ගැන කතා කළා. (ගිබියොන්වරු ඊශ්‍රායෙල් ජාතිකයන් නෙමෙයි. එයාලා දේශයේ ඉතුරු වෙලා හිටපු අමෝරිවරුන්ගෙන් කොටසක්.+ එයාලව විනාශ කරන්නේ නැහැ කියලා ඊශ්‍රායෙල්වරු එයාලට දිවුරලා පොරොන්දු වෙලයි තිබුණේ.+ ඒත් සාවුල්ට ඕනෙ වුණේ මොන දේ කරලා හරි ඊශ්‍රායෙල් සහ යූදා සෙනඟව ආරක්ෂා කරන්න. ඒ නිසා සාවුල් ගිබියොන්වරුන්ව නැති කරලා දාන්න හැදුවා.) 3 ගිබියොන්වරුන්ගෙන් දාවිත් මෙහෙම ඇහුවා. “මම කොහොමද මේ වරදට වන්දි ගෙවන්නේ? මම ඔයාලා වෙනුවෙන් මොනවා කළොත්ද ඔයාලා යෙහෝවා දෙවියන්ගේ සෙනඟට ආශීර්වාද කරන්නේ?” 4 එතකොට ගිබියොන්වරු දාවිත්ට මෙහෙම කිව්වා. “සාවුල් එක්කයි, එයාගේ පවුලේ අය එක්කයි අපිට තියෙන මේ ප්‍රශ්නේ රන් රිදී දීලා විසඳගන්න පුළුවන් එකක් නෙමෙයි.+ අනික ඊශ්‍රායෙල් දේශයේ ඉන්න කාවවත් මරන්න අපිට අයිතියක් නැහැ.” ඒක අහලා දාවිත් එයාලට කිව්වා “ඔයාලා කියන ඕනෙම දෙයක් මම කරන්නම්” කියලා. 5 එතකොට එයාලා රජට මෙහෙම කිව්වා. “අපිව ඊශ්‍රායෙල් දේශයෙන් නැත්තටම නැති කරලා දාන්න කුමන්ත්‍රණය කරපු කෙනාගේ+ 6 පුතාලා හත්දෙනෙක්ව අපිට භාර දෙන්න. අපි එයාලව මරලා යෙහෝවා ඉස්සරහා එයාලාගේ මළ සිරුරු එල්ලනවා.+ යෙහෝවා කලින් රජ විදිහට තෝරගෙන තිබුණ+ සාවුල්ගේ නගරය වන ගිබෙයාවල+ අපි එයාලාගේ මළ සිරුරු එල්ලනවා.” එතකොට රජ “මම එයාලව භාර දෙන්නම්” කියලා ඒ අයට කිව්වා.

7 ඒත් දාවිත් රජ, යොනාතාන්ගේ පුතා වුණ මෙෆිබොෂෙත්ට+ අනුකම්පා කළා. ඒ, දාවිත් සාවුල්ගේ පුතා වුණ යොනාතාන්+ එක්ක යෙහෝවා ඉස්සරහා ගිවිසුමක් ඇති කරගෙන තිබුණ නිසයි. 8 ඉතින් රජ, සාවුල්ගේ පුතාලා දෙන්නෙක් වන ආර්මෝනිව සහ මෙෆිබොෂෙත්ව එයාලට භාර දුන්නා. එයාලාගේ අම්මා ආයාගේ දුව වුණ රිෂ්පා.+ ඒ වගේම මෙහෝලාවල* ජීවත් වුණ බාසිල්ලයිගේ පුතා වන අද්‍රියෙල්ගේ+ සහ සාවුල්ගේ දුව වන මීකල්ගේ*+ පුතාලා පස්දෙනාවත් 9 එයාලට භාර දුන්නා. ගිබියොන්වරු එයාලව මරලා ඒ මළ සිරුරු කන්ද උඩදී යෙහෝවා දෙවියන් ඉස්සරහා එල්ලුවා.+ එයාලා ඒ හත්දෙනාවම එකම දවසේ මැරුවා. එයාලව මැරුවේ අස්වැන්න නෙළන්න පටන්ගත්ත කාලයෙදියි. ඒ වෙද්දී බාර්ලි අස්වැන්න නෙළන්න පටන් අරගෙනයි තිබුණේ. 10 ආයාගේ දුව වුණ රිෂ්පා+ කන්ද උඩ ගෝණි රෙදි එළලා එතනට වෙලා හිටියා. එයා අස්වැන්න නෙළන්න පටන්ගත්ත දවසේ ඉඳන් වැහි කාලය වෙන කල්ම එතනට වෙලා හිටියා. එයා දවල්ට කුරුල්ලන්ටවත් රෑට වනසත්තුන්ටවත් එයාලාගේ මළ සිරුරු ළඟට එන්න දුන්නේ නැහැ.

11 සාවුල්ගේ උපභාර්යාව වුණ ආයාගේ දුව වන රිෂ්පා කරපු දේ දාවිත්ට ආරංචි වුණා. 12 පස්සේ දාවිත් සාවුල්ගේ සහ එයාගේ පුතා වුණ යොනාතාන්ගේ ඇටකටු යාබෙෂ්ගිලියද්වල+ අධිපතීන්ගෙන් ඉල්ලගත්තා. පිලිස්තිවරු ගිල්බෝවාවලදී+ සාවුල්ට පහර දුන්න දවසේ සාවුල්ගේ සහ යොනාතාන්ගේ මළ සිරුරු බෙත්ෂාන්වල ප්‍රසිද්ධියේ එල්ලලා තිබුණා. යාබෙෂ්ගිලියද්වල අධිපතීන් බෙත්ෂාන්වලට ගිහින් එයාලාගේ මළ සිරුරු හොර රහසේ එයාලාගේ නගරයට ගෙනල්ලා තිබුණා. 13 දාවිත් එහේ තිබුණ සාවුල්ගේ සහ යොනාතාන්ගේ ඇටකටු අරන් ආවා. ඒ වගේම ගිබියොන්වරු මරලා එල්ලපු මිනිසුන්ගේ+ ඇටකටුත් දාවිත්ගේ සේවකයන් එකතු කරගත්තා. 14 ඊටපස්සේ එයාලා සාවුල්ගේ සහ යොනාතාන්ගේ ඇටකටු සාවුල්ගේ තාත්තා වුණ කිෂ්ගේ+ සොහොනේ තැන්පත් කළා. ඒ සොහොන තිබුණේ බෙන්ජමින්වරුන්ගේ පළාතට අයිති ෂේලා+ කියන නගරයේ. රජ අණ කරපු හැම දෙයක්ම කළාට පස්සේ සෙනඟ දේශය වෙනුවෙන් කරපු කන්නලව්වලට දෙවියන් ඇහුම්කන් දුන්නා.+

15 පිලිස්තිවරු ආයෙත් වතාවක් ඊශ්‍රායෙල්වරුන්ට විරුද්ධව යුද්ධ කරන්න ආවා.+ දාවිත් රජයි, එයාගේ සේවකයෝයි පිලිස්තිවරු ඉස්සරහට ගිහින් සටන් කළා. සටන අතරතුරේ දාවිත්ට ලොකු මහන්සියක් දැනුණා. 16 ඒ වෙලාවේ රෙෆායිවරුන්ගෙන්+ පැවතෙන කෙනෙක් වුණ ඉෂ්බිබෙනොබ් දාවිත්ව මරන්න හැදුවා. තඹවලින් හදපු එයාගේ හෙල්ලය ෂෙකෙල් 300ක්*+ බරයි. එයා ළඟ අලුත් කඩුවකුත් තිබුණා. 17 ෂෙරුයියාගේ පුතා වුණ අබිෂයි+ එවෙලේම දාවිත්ගේ උදව්වට ඇවිත්+ ඒ පිලිස්තියාව මරලා දැම්මා. එතකොට දාවිත්ගේ සේවකයෝ දාවිත්ට මෙහෙම කිව්වා.* “ඔබ අපි එක්ක ආයෙත් යුද්ධවලට එන්න එපා.+ මොකද ඊශ්‍රායෙල්වල පහන නිවෙන්න ඉඩ දෙන්න බැහැ!”+

18 ගොබ්වලදී පිලිස්තිවරුන්+ එක්ක ආයෙත් වතාවක් යුද්ධයක් ඇති වුණා. හූෂා කියන නගරයෙන් ආපු* සිබ්බෙකයි,+ රෙෆායිවරුන්ගෙන්+ පැවතෙන කෙනෙක් වුණ සාෆ්ව මරලා දැම්මේ ඒ යුද්ධයෙදියි.

19 ගොබ්වලදී පිලිස්තිවරුන්ට විරුද්ධව තවත් යුද්ධයක් ඇති වුණා.+ ඒ යුද්ධයේදී බෙත්ලෙහෙම්වල ජීවත් වුණ යයරේඔරෙගීම්ගේ පුතා වන එල්හානාන්, ගාත්වල ඉඳලා ආපු ගොලියත්ව මරලා දැම්මා. ගොලියත්ගේ හෙල්ලයේ මිට හරියට රෙදි වියන්න පාවිච්චි කරන පොල්ලක් වගෙයි.+

20 ඊටපස්සේ ගාත්වලත් යුද්ධයක් ඇති වුණා. අත්වල සහ කකුල්වල ඇඟිලි 6 ගාණේ ඒ කියන්නේ ඇඟිලි 24ක් තිබුණ යෝධයෙක් එහේ හිටියා. එයාත් රෙෆායිවරුන්ගෙන් පැවතෙන කෙනෙක්.+ 21 එයා ඊශ්‍රායෙල්වරුන්ට හුඟක් නින්දා අපහාස කළා.+ අන්තිමේදී දාවිත්ගේ සහෝදරයා වුණ ෂිමෙයිගේ+ පුතා වන යොනාතාන් එයාව මරලා දැම්මා.

22 ඒ හතරදෙනා ගාත්වල හිටපු රෙෆායිවරුන්ගෙන් පැවතෙන අය. එයාලා දාවිත් සහ එයාගේ සේවකයන්ගේ අතින් මැරුම් කෑවා.+

22 යෙහෝවා දෙවියන් දාවිත්ව සතුරන්ගෙනුත්+ සාවුල්ගෙනුත්+ බේරගත්තාට පස්සේ දාවිත් යෙහෝවාට මේ ගීය ගායනා කළා.+

2 “මගේ පර්වතයත් මගේ බලකොටුවත් යෙහෝවායි.+ මට ගැලවීම දෙන්නෙත් ඔහුයි.+

11 ඔහු කෙරුබ්වරයෙක් පිට+ පියාසර කරමින් ආවා.

ඔහු හැමෝටම පේන්න දේවදූතයෙක්ගේ පියාපත් පිට* නැඟ ආවා.+

13 ඔහුගෙන් නික්මුණු දීප්තිය නිසා ගිනි අඟුරු ඇවිළුණා.

ඔහුගේ රැකවරණය සොයන හැමෝටම ඔහු පලිහක්.+

32 යෙහෝවා හැර වෙන දෙවි කෙනෙක් ඉන්නවාද?+

අපේ දෙවියන් පර්වතයක්. ඔහුට සමාන තවත් කෙනෙක් ඉන්නවාද?+

44 මගේම සෙනඟ මට විරුද්ධව කරන චෝදනාවලින් ඔබ මාව නිදහස් කරනවා.+

47 යෙහෝවා ජීවමානයි. මගේ පර්වතය වන ඔහුට ප්‍රශංසා වේවා!+

මගේ පර්වතය, ගැලවීම දෙන මගේ දෙවියනි, ඔබ හැම කෙනෙක්ගෙම පැසසුමට ලක් වේවා!+

23 දාවිත් කියපු අන්තිම වචන මේවායි.+

ධර්මිෂ්ඨයාගේ පාලනයත් ඒ වගේමයි.’

 5 දෙවියන් මගේ පවුල දිහා බලන්නෙත් ඒ විදිහටයි.

8 දාවිත් රජ යටතේ සේවය කරපු යුද්දෙට දක්ෂ පුරුෂයන්ගේ+ විස්තර මේවායි. දාවිත්ගේ එඩිතරම පුරුෂයන් තුන්දෙනාගේ ප්‍රධානියා+ වුණේ තාකෙමෝනිගෙන් පැවතෙන යොෂෙබ්බෂ්ෂෙබෙත්. දවසක් එයා 800දෙනෙක්ව හෙල්ලයෙන් මරලා දැම්මා. 9 එයාට පස්සේ දක්ෂම කෙනා වුණේ එලියාසර්.+ එලියාසර්ගේ තාත්තා අහෝහිගේ පුතා වුණ දෝදෝ.+ දවසක් පිලිස්තිවරු ඊශ්‍රායෙල් හමුදාව එක්ක යුද්ධ කරන්න ලෑස්ති වෙලා හිටියා. ඒ වෙලාවේ දාවිත් එක්ක හිටපු යුද්දෙට දක්ෂම තුන්දෙනෙක් පිලිස්තිවරුන්ට අපහාස කළා. එලියාසර් එයාලාගෙන් කෙනෙක්. එදා ඊශ්‍රායෙල් හමුදාව පිලිස්තිවරුන්ගෙන් පලා ගියා. 10 ඒත් එලියාසර් එයාගේ අත හිරි වැටෙන කල්ම පිලිස්තිවරුන්ට කඩුවෙන් පහර දුන්නා.+ එදා යෙහෝවා දෙවියන් ඊශ්‍රායෙල්වරුන්ට ලබා දුන්නේ විශිෂ්ට ජයග්‍රහණයක්.+ ඊටපස්සේ පැනලා ගිය සෙනඟ ආයෙත් ඇවිත් මැරුම් කාපු අයගේ වස්තුව පැහැරගත්තා.

11 එලියාසර්ට පස්සේ යුද්දෙට දක්ෂම කෙනා වුණේ ෂම්මාහ්. එයා හරාරි ඉඳන් ආපු අගීගේ පුතා. පිලිස්තිවරු ලේහී කියන ප්‍රදේශයේ තිබුණ ධාන්‍ය කෙතකදී යුද්ධ කරන්න ලෑස්ති වුණා. ඊශ්‍රායෙල්වරු එයාලට බය වෙලා එතනින් පැනලා ගියා. 12 ඒත් ෂම්මාහ් කෙත මැදට ගිහින් පිලිස්තිවරුන්ට දිගටම පහර දීලා කෙත බේරගත්තා. එදා යෙහෝවා ඊශ්‍රායෙල්වරුන්ට ලොකු ජයග්‍රහණයක් අත් කරලා දුන්නා.+

13 ප්‍රධානීන් විදිහට හිටපු පුරුෂයන් 30දෙනාගෙන් තුන්දෙනෙක් අස්වැන්න කපන කාලේදී අදුල්ලාම්වල+ තියෙන ගුහාවේ හිටිය දාවිත් ළඟට ගියා. ඒ වෙනකොට පිලිස්තිවරු කණ්ඩායමක් රෙෆායිම්+ නිම්නයේ* කඳවුරු බැඳගෙනයි හිටියේ. 14 එයාලාගේ මුරපොළක් බෙත්ලෙහෙම්වලත් තිබුණා. දාවිත් හැංගිලා හිටියේ ආරක්ෂිත තැනක.+ 15 ඒ වෙලාවේ දාවිත් මෙහෙම කිව්වා. “බෙත්ලෙහෙමේ දොරටුව ළඟ තියෙන පොකුණෙන් මට වතුර ටිකක් බොන්න තිබුණා නම්!” 16 එතකොට දාවිත්ට සේවය කරපු යුද්දෙට දක්ෂ පුරුෂයෝ තුන්දෙනා පිලිස්තිවරුන්ගේ මුරපොළට කඩාවැදිලා බෙත්ලෙහෙමේ දොරටුව ළඟ තිබුණ පොකුණෙන් වතුර ඇදලා දාවිත්ට ගිහින් දුන්නා. ඒත් දාවිත් ඒ වතුර බොන්නේ නැතුව යෙහෝවා ඉස්සරහා බිමට වක් කළා.+ 17 එයා ඒ වෙලාවේ මෙහෙම කිව්වා. “අනේ යෙහෝවා, මම කොහොමද මේ වතුර බොන්නේ? මේ මිනිස්සු එයාලාගේ ජීවිත පරදුවට තියලයි මේ වතුර ටික ගෙනාවේ. මම මේ වතුර බිව්වොත් ඒක හරියට එයාලාගේ ලේ බොනවා වගේ.”+ ඒ නිසා දාවිත් ඒ වතුර බිව්වේ නැහැ. දක්ෂ පුරුෂයන් තුන්දෙනා කරපු වීර ක්‍රියා ඒවායි.

18 තවත් දක්ෂ සටන්කරුවෝ තුන්දෙනෙක් හිටියා. එයාලාගේ ප්‍රධානියා වෙලා හිටියේ ෂෙරුයියාගේ+ පුතා සහ යෝවාබ්ගේ සහෝදරයා වුණ අබිෂයි.+ එයා 300දෙනෙක්ව හෙල්ලයෙන් මරලා දැම්මා. එඩිතර පුරුෂයන් තුන්දෙනා වගේම එයාත් හුඟක් ප්‍රසිද්ධ වෙලයි හිටියේ.+ 19 දක්ෂ සටන්කරුවෝ තුන්දෙනා අතරින් කැපිලා පෙනුණේ අබිෂයි. ඒ නිසා එයාව එයාලාගේ නායකයා විදිහට පත් කළා. ඒත් එයාට කවදාවත් එඩිතර පුරුෂයන් තුන්දෙනාගේ තත්වයට එන්න බැරි වුණා.

20 යෙහෝයාදාගේ පුතා වන බෙනායාත්+ නිර්භීත සටන්කරුවෙක්. එයා කබ්ෂෙයෙල්+ නගරයේ හුඟක් වීර ක්‍රියා කරලා තිබුණා. එයා මෝවබ්වලින් ආපු අරියෙල්ගේ පුතාලා දෙන්නාව මරලා දැම්මා. හිම වැටෙන දවසක එයා වළකට බැහැලා ඒක ඇතුළේ හිටපු සිංහයෙක්වත් මැරුවා.+ 21 බෙනායා ඊජිප්තු ජාතික යෝධයෙක්වත් මරලා දැම්මා. ඒ යෝධයාගේ අතේ හෙල්ලයක් තිබුණත් බෙනායාගේ අතේ තිබුණේ පොල්ලක් විතරයි. ඒත් එයා නිර්භීතව යෝධයා ළඟට ගිහින් යෝධයාගේ අතින් හෙල්ලය උදුරගෙන ඒ හෙල්ලයෙන්ම එයාට ඇනලා මැරුවා. 22 යෙහෝයාදාගේ පුතා වුණ බෙනායා කරපු වීර ක්‍රියා ඒවායි. දක්ෂ පුරුෂයන් තුන්දෙනා වගේම එයාත් හුඟක් ප්‍රසිද්ධ වෙලයි හිටියේ. 23 ප්‍රධානීන් තිස්දෙනා අතරින් වැඩියෙන්ම කැපී පෙනුණේ බෙනායා වුණත් එයාට කවදාවත් එඩිතර පුරුෂයන් තුන්දෙනා වගේ වෙන්න බැරි වුණා. දාවිත් බෙනායාව තමන්ගේ ආරක්ෂක නිලධාරීන්ගේ ප්‍රධානියා විදිහට පත් කළා.

24 ප්‍රධානීන් තිස්දෙනා අතරේ හිටපු සමහර අයගේ නම් මේවායි. යෝවාබ්ගේ සහෝදරයා වුණ අසහෙල්,+ බෙත්ලෙහෙමේ+ ජීවත් වුණ දෝදෝගේ පුතා වන එල්හානාන්, 25 හාරොද්වල වැසියන් වුණ ෂම්මාහ් සහ එලිකා, 26 පල්තියේ වැසියෙක් වුණ හෙලෙෂ්,+ තෙකෝවාවල වැසියෙක් වුණ ඉක්කෙෂ්ගේ පුතා වන ඊරා,+ 27 අනාතොත්වල+ වැසියෙක් වුණ අබිඑෂෙර්,+ හූෂාවල වැසියෙක්* වුණ මෙබුන්නයි, 28 අහෝවාගෙන් පැවතෙන ෂල්මොන්, නෙටොෆා කියන ගමේ වැසියෙක් වුණ මහරයි,+ 29 නෙටොෆාවල වැසියෙක් වුණ බානාහ්ගේ පුතා වන හෙලෙබ්, බෙන්ජමින් ගෝත්‍රයට අයිති නගරයක් වන ගිබෙයාවල වැසියෙක් වුණ රීබයිගේ පුතා වන ඉත්තයි, 30 පිරතොන් නගරයේ වැසියෙක් වුණ බෙනායා,+ ගයෂ්වල+ තියෙන නිම්න* අවට ජීවත් වුණ හිද්දයි, 31 බෙත්අරබා නගරයේ වැසියෙක් වුණ අබිඅල්බොන්, බහුරීම්වල වැසියෙක් වුණ අෂ්මාවෙත්, 32 ෂායල්බිම් නගරයේ වැසියෙක් වුණ එලියාබා, යාෂෙන්ගේ පුතාලා, යොනාතාන්, 33 හරාරි ඉඳන් ආපු ෂම්මාහ්, හරාරි ඉඳන් ආපු ෂාරාර්ගේ පුතා වුණ අහියාම්, 34 මයකාත්වල වැසියෙක් වුණ අහස්බයිගේ පුතා වන එලිෆෙලෙත්, ගීලොවල වැසියෙක් වුණ අහිතොෆෙල්ගේ+ පුතා වන එලියාම්, 35 කර්මෙල්වල වැසියෙක් වුණ හෙෂ්රො, අරාබ් නගරයේ වැසියෙක් වුණ පයරයි, 36 ෂොබාවල වැසියෙක් වුණ නාතන්ගේ පුතා වන ඉගාල්, ගාද් ගෝත්‍රයට අයිති බානි, 37 අම්මොන් ජාතිකයෙක් වුණ ෂෙලෙක්, බෙයේරොත්වල වැසියෙක් වුණ නහරයි (එයා ෂෙරුයියාගේ පුතා වුණ යෝවාබ්ගේ ආයුධ අරන් ගිය අයගෙන් කෙනෙක්), 38 ඉත්රිය ඊරා, ඉත්රිය+ ගාරෙබ් සහ 39 හිත්තී ජාතික උරියා.+ එයාලාගේ මුළු ගාණ 37යි.

24 යෙහෝවා දෙවියන්ට ඊශ්‍රායෙල් සෙනඟත් එක්ක ආයෙත් ලොකු කේන්තියක් ඇති වුණා.+ මොකද කෙනෙක් ඊශ්‍රායෙල්වරුන්ට හානියක් වෙන විදිහට වැඩ කරන්න දාවිත්ව පොලඹවලා එයාට කිව්වා “ඊශ්‍රායෙල් සහ යූදා සෙනඟව+ ගණන් කරන්න”+ කියලා. 2 ඒ නිසා රජ එයාත් එක්ක හිටපු යුද හමුදාවේ ප්‍රධානියා වන යෝවාබ්ට+ මෙහෙම කිව්වා. “දාන් ඉඳන් බෙයර්ෂෙබා+ වෙන කල් ගිහින් ඊශ්‍රායෙල් දේශයේ හැම ගෝත්‍රයකම ඉන්න මිනිස්සුන්ව ලියාපදිංචි කරන්න. ඊටපස්සේ එයාලාගේ මුළු ගාණ මට දන්වන්න.” 3 ඒත් යෝවාබ්, රජට මෙහෙම කිව්වා. “මගේ ස්වාමීනි, රජ්ජුරුවනි, ඔයාගේ ඇස් පනාපිටම සෙනඟව 100 ගුණයකින් වැඩි කරන්න ඔයාගේ දෙවි වන යෙහෝවාට පුළුවන්. ඉතින් ඇයි ඔයා මේ වගේ දෙයක් කරන්න හිතුවේ?”

4 ඒත් යෝවාබ් සහ යුද හමුදාවේ අනිත් ප්‍රධානීන් කියපු දේ රජ ඇහුවේ නැහැ. ඒ නිසා එයාලා රජගේ අණට යටත් වෙලා ඊශ්‍රායෙල් සෙනඟව ලියාපදිංචි කරන්න පිටත් වෙලා ගියා.+ 5 එයාලා යොර්දාන් ගඟෙන් එගොඩ වෙලා නිම්නය මැද තිබුණ අරෝයේර්+ කියන නගරයට දකුණින්* කඳවුරු බැඳගත්තා. එයාලා ගාද් ගෝත්‍රයට අයිති පළාත දක්වාත් යාසෙර්+ නගරය දක්වාත් ගමන් කළා. 6 ඊටපස්සේ එයාලා ගිලියද්+ දේශයටත් තාතිම්හොද්ෂි දේශයටත් දාන්යායන් සහ සීදොන්+ කියන නගරවලටත් ගියා. 7 එතනින් එයාලා තීර් බලකොටුවටත්+ හිවීයවරුන්ගේ+ හැම නගරයකටමත් කානානිවරුන්ගේ හැම නගරයකටමත් ගියා. අන්තිමට එයාලා යූදා දේශයේ නෙගෙබ්+ පළාතේ තිබුණ බෙයර්ෂෙබා+ වෙන කල් ගියා. 8 ඔය විදිහට එයාලා දේශය පුරාම ගමන් කරලා ආයෙත් යෙරුසලමට ආවා. මුළු ගමනට මාස නවයකුත් දවස් 20ක් ගත වුණා. 9 ලියාපදිංචි කරපු අයගේ ගාණ යෝවාබ්, රජට දැන්නුවා. ඊශ්‍රායෙල් ගෝත්‍රවල යුද්ධයට දක්ෂ පුරුෂයෝ ලක්ෂ අටකුත් යූදා ගෝත්‍රයේ පුරුෂයෝ ලක්ෂ පහකුත් හිටියා.+

10 ඒත් සෙනඟව ගණන් කරපු නිසා දාවිත්ගේ හිත ගොඩක් වධ දෙන්න පටන්ගත්තා.+ ඒ නිසා එයා යෙහෝවාට මෙහෙම කිව්වා. “මං කළේ ලොකු වරදක්.+ අනේ යෙහෝවා, ඔබේ සේවකයාගේ වරදට සමාව දෙන්න.+ මම වැඩ කළේ මෝඩයෙක් වගෙයි.”+ 11 දාවිත් පහුවෙනිදා උදේ ඇහැරුණාට පස්සේ අනාගතවක්තෘ ගාද්ට යෙහෝවාගෙන් පණිවිඩයක් ලැබුණා. සාමාන්‍යයෙන් දෙවියන්ගෙන් ලැබුණ දර්ශන දාවිත්ට දැනුම් දුන්නේ ගාද්.+ එදා දෙවියන් එයාට මෙහෙම කිව්වා. 12 “ඔයා දාවිත් ළඟට ගිහින් මෙහෙම කියන්න. ‘යෙහෝවා ඔයාට මේ දේ කියනවා. “මම ඔයාට කියන මේ දඬුවම් තුනෙන් එකක් තෝරගන්න. ඔයාට විඳින්න වෙන්නේ ඔයා තෝරගන්න එකයි.”’”+ 13 ඉතින් ගාද් දාවිත් ළඟට ගිහින් මෙහෙම කිව්වා. “ඔයා කැමති අවුරුදු හතක් තිස්සේ දේශයේ සාගතයක් තියෙනවාටද?+ නැත්නම් මාස තුනක් තිස්සේ ඔයාගේ සතුරන් ඔයා පස්සේ පන්නගෙන එනවාටද?+ එහෙමත් නැත්නම් ඔයාගේ දේශයේ දවස් තුනක් පුරා වසංගතයක් තියෙනවාටද?+ හොඳට හිතලා බලලා මේ තුනෙන් එකක් තෝරගන්න. එතකොට මං ගිහින් මාව එවපු දෙවියන්ට ඒ ගැන කියන්නම්.” 14 දාවිත් ගාද්ට මෙහෙම කිව්වා. “මේක මට දරාගන්න බැරි දුකක්. ඒත් යෙහෝවා හරිම දයාන්විත දෙවි කෙනෙක්.+ ඒ නිසා මිනිස්සුන්ගේ අතින් දඬුවම් විඳිනවාට වඩා+ හොඳයි දෙවියන්ගේ අතින් දඬුවම් විඳින එක.”+

15 ඉතින් යෙහෝවා ඊශ්‍රායෙල් දේශය පිටට වසංගතයක් ගෙනාවා.+ එදා උදේ ඉඳන් දෙවියන් නියම කරපු කාලය ඉවර වෙන කල් ඒ වසංගතය තිබුණා. දාන් ඉඳන් බෙයර්ෂෙබා+ වෙන කල් ජීවත් වුණ මිනිස්සු 70,000ක් වසංගතය නිසා මැරුණා.+ 16 දේවදූතයා යෙරුසලම දිහාවට අත දික් කරලා ඒක විනාශ කරන්න ලෑස්ති වුණා. ඒත් සිද්ධ වෙලා තිබුණ විනාශය දැක්කාම යෙහෝවාට ලොකු දුකක් දැනුණා.+ ඒ නිසා සෙනඟට පහර දීපු දේවදූතයාට දෙවියන් මෙහෙම කිව්වා. “දැන් ඇති. ඔයාගේ අත පල්ලෙහට දාන්න.” ඒ වෙලාවේ යෙහෝවාගේ දූතයා හිටියේ යෙබූසිවරයෙක්+ වුණ අරව්නාගේ+ කමත ළඟ.

17 සෙනඟට දඬුවම් කරපු දේවදූතයාව දැක්කාම දාවිත් යෙහෝවාට මෙහෙම කිව්වා. “පව් කළේ මමයි. වැරැද්ද තියෙන්නේ මගේ අතේ. බැටළුවන් වගේ ඉන්න මේ සෙනඟ+ කරපු වරද මොකක්ද? අනේ, එයාලට නැතුව මටයි, මගේ තාත්තාගේ පවුලේ අයටයි දඬුවම් කරන්න.”+

18 පස්සේ ගාද් ආයෙත් දාවිත් ළඟට ගිහින් මෙහෙම කිව්වා. “දැන් ගිහින් යෙබූසිවරයෙක් වන අරව්නාගේ කමතේ යෙහෝවා දෙවියන්ට පූජාසනයක් හදන්න.”+ 19 ඊටපස්සේ යෙහෝවා ගාද් මාර්ගයෙන් කියපු දේ කරන්න දාවිත් පිට වෙලා ගියා. 20 රජයි, එයාගේ සේවකයනුයි එනවා දැක්කාම අරව්නා එයාලා ඉස්සරහට දුවගෙන ගිහින් දණින් වැටිලා ඔළුව බිමටම පහත් කරලා ආචාර කළා. 21 අරව්නා දාවිත්ගෙන් ඇහුවා “මගේ ස්වාමීනි, රජ්ජුරුවනි, ඔබේ සේවකයා වන මං ළඟට ඔබ ආවේ ඇයි” කියලා. එතකොට දාවිත් මෙහෙම කිව්වා. “මං ආවේ ඔයාගේ කමත මිල දීලා ගන්න. මට ඕනෙ මෙතන යෙහෝවාට පූජාසනයක් හදන්න. එහෙම කළොත් මේ වසංගතේ නවතියි.”+ 22 අරව්නා දාවිත්ට මෙහෙම කිව්වා. “මගේ ස්වාමීනි, රජ්ජුරුවනි, ඔබ මේ කමත ගන්න. පූජාවට ඕනෙ කරන හැම දෙයක්මත් මෙතනින් ගන්න. මට මුකුත් ගෙවන්න ඕනෙ නැහැ. දවන පූජාවට ගවයෝ ඉන්නවා. මෙතන ධාන්‍ය මඩින්න පාවිච්චි කරන ලෑලියි, වියගසුයි තියෙනවා. ඒවා දර විදිහට පාවිච්චි කරන්න. 23 රජ්ජුරුවනි, මම මේ හැම දෙයක්ම ඔබට දෙනවා.” අරව්නා මෙහෙමත් කිව්වා. “ඔබේ දෙවි යෙහෝවා ඔබට ආශීර්වාද කරන්න ඕනේ!”

24 ඒත් රජ අරව්නාට මෙහෙම කිව්වා. “නෑ. මට ඕනෙ මේ කමත මුදල් ගෙවලා ගන්න. කිසිම වියදමක් දරන්නේ නැතුව මම කොහොමද මගේ දෙවි යෙහෝවාට දවන පූජාවක් ඔප්පු කරන්නේ!” ඉතින් දාවිත් රිදී ෂෙකෙල්* 50ක් ගෙවලා ඒ කමතයි, ගවයන්වයි මිල දීලා ගත්තා.+ 25 දාවිත් එතන යෙහෝවාට පූජාසනයක් හදලා+ දවන පූජායි, හවුල් පූජායි ඔප්පු කළා. ඊටපස්සේ දේශය වෙනුවෙන් කරපු කන්නලව්වලට යෙහෝවා දෙවියන් ඇහුම්කන් දුන්නා.+ ඒ නිසා ඊශ්‍රායෙල් සෙනඟ අතරේ පැතිරුණ වසංගතය නතර වුණා.