බයිබලයේ දෘෂ්ටිකෝණය
ප්‍රේමනීය දෙවිකෙනෙකුට බියවීමට ඔබට හැක්කේ කෙසේද?
“යෙහෝවා කෙරෙහි බිය වන මිනිසා සන්තෝෂවත්ය.”—ගීතාවලිය 112:1, NW.
බයිබලය විස්තර කරන ලෙස ‘දෙවි ප්‍රේමය’ නම්, ඔහුට බිය විය යුත්තේ ඇයි? (1 යොහන් 4:16) සාමාන්‍යයෙන් ප්‍රේමය සහ බිය සලකන්නේ එකිනෙකට නොගැළපෙන දේවල් ලෙසයි. එහෙමනම්, දෙවි සමඟ තිබෙන අපේ සබඳතාවේදී බිය මගින් කුමන කාර්යයක් ඉටු විය යුතුද? ප්‍රේමනීය දෙවිකෙනෙකුට බිය වෙන්නේ ඇයි? “බිය” යන වචනය බයිබලයෙහි යොදා තිබෙන ආකාරය දෙස සමීප බැල්මක් හෙළීමෙන්, මේ කාරණය පිළිබඳ වඩා හොඳ අවබෝධයක් අපට ලබාගත හැකියි.
භාෂා බොහොමයක, එක වචනයකට පාඨ සම්බන්ධය මත තීරණය වන විවිධාකාර අර්ථ තිබිය හැකියි. උදාහරණයක් හැටියට, සමහර භාෂාවලින් යමෙක් මෙසේ පැවසිය හැකියි: “මම මගේ පාසැලට ප්‍රේම කරනවා,” ඒ වගේම “මම මගේ දරුවන්ට ප්‍රේම කරනවා.” මෙහි පැවසෙන ප්‍රේමයෙහි ප්‍රබලත්වයේ හා ස්වරූපයන්වල විශාල වෙනසක් තිබෙනවා. ඒ හා සමානව, බයිබලය බිය හා සම්බන්ධ විවිධ ස්වරූප ගැන කතා කරනවා. දෙවිට නමස්කාර කිරීම සම්බන්ධයෙන් මෙම වචනය භාවිත වන අවස්ථාවලදී, එය ත්‍රාසය, තැතිගැන්ම හෝ වහා දඬුවම් ලැබීමට යෑම පිළිබඳ හැඟීමකට යොමු දක්වන්නේ නැහැ. ඒ වෙනුවට, දෙවි කෙරෙහි බියවීම මගින් ඇති කරනුයේ සුවදායී හැඟීම් වන ගරුබිය, ප්‍රණාමය හා ගැඹුරු ගෞරවයයි. මෙම උසස් හැඟීම් දෙවි වෙතින් පලායෑමට හෝ සැඟවීමට ඇති වන සහජ හැඟීමක් සමඟ නොව, නමුත් දෙවි කෙරෙහි ඇති වන ප්‍රේමය හා ඔහු වෙත සිත ඇදීයෑම සමඟ සම්බන්ධ කර තිබෙනවා.
දෙවි කෙරෙහි බිය, ත්‍රාසය දනවන, බියෙන් හැකිළෙන ආකාරයේ බිය දුරු කරනවා. දෙවි කෙරෙහි බිය වන මිනිසා ගැන ගීතිකාකරු මෙසේ ලිව්වා: “ඔහු නරක ආරංචිවලට භය නොවන්නේය. ඔහුගේ සිත [යෙහෝවා] කෙරෙහි විශ්වාසය තබමින් ස්ථිරව තිබේ.” (ගීතාවලිය 112:7) යෙහෝවා කෙරෙහි අප දක්වන ගැඹුරු ගෞරවය හා ප්‍රණාමය යටපත් කර දමන්න, නපුරු මිනිසුන්ගෙන් හෝ සාතන්ගෙන් එල්ල වන තර්ජනවලට නොහැකියි. (ලූක් 12:4, 5) එමෙන්ම යාච්ඤාවෙන් දෙවි වෙතට එළඹීමටද අපි බිය විය යුතු නැහැ. ඒ වෙනුවට මෙම පාඨ සම්බන්ධයට අනුව “ප්‍රේමය භය දුරුකරයි.”—1 යොහන් 4:18.
අවකාශය සහ දෙවිගේ ශ්‍රේෂ්ඨත්වය
පුරාණයේ විසූ දාවිත් රජ දේවබියැති මිනිසෙක්. මැවිල්ලේ සුන්දරත්වය හා සංකීර්ණත්වය මෙනෙහි කරද්දී, ඔහු තුළ ගරු-බිය දනවන හැඟීම් ඇති වුණා. ඔහු පුදුම වී හඬනඟා මෙසේ පැවසුවා: “මම ඔබට ස්තුතිකරන්නෙමි; මක්නිසාද මම භයානකලෙසත් පුදුම ලෙසත් සාදනලද්දෙමි. ඔබගේ කර්මාන්ත ආශ්චර්යමත්ය; මාගේ ආත්මයද ඒ බව මනාකොට දනියි.” (ගීතාවලිය 139:14) රාත්‍රි අහස දෙස ඕනෑකමින් නෙත් හෙළමින් ඔහු හැඟීම්බරව මෙසේ හඬනඟා පැවසුවා: “අහස [දෙවිගේ] මහිමය ප්‍රකාශකරයි.” (ගීතාවලිය 19:1) මෙම අද්දැකීමෙන් දාවිත් බියට පත් වුණා කියා ඔබ සිතනවාද? ඊට වෙනස්ව, යෙහෝවාට ප්‍රශංසා ගී ගැයීමට එය ඔහුව පෙලඹුවා.
ආකාශ වස්තු පිළිබඳව අද රැස් කරගෙන තිබෙන පුළුල් දැනුම් සම්භාරය, ගරුබිය දනවන හැඟීම් ඇතිවීම සඳහා වඩා ප්‍රබල හේතු අපට සපයනවා. මෑතකදී තාරකා විද්‍යාඥයන් හබල් අභ්‍යවකාශ දූරේක්ෂය යොදාගනිමින්, ඔවුන්ට කලින් සිටි කිසිම මිනිසෙකුට වඩා අහසේ දුර ඈතට එබිකම් කර තිබෙනවා. ඔවුන් පොළොව මත පිහිටි දූරේක්ෂයකට කිසිවක් නොපෙනෙන අහසේ කොටසක් තෝරාගෙන, අතේ දුරින් සිට වැලි කැටයක් බැලූ විට දකින ප්‍රමාණය තරම් කුඩා ප්‍රදේශයකට හබල් දූරේක්ෂය නාභිගත කළා. මෙහිදී දුටු චිත්‍රය තනි තාරකාවලින් නොව, නමුත් මන්දාකිණිවලින්—තාරකා බිලියන ගණනින් යුත් විශාල මණ්ඩලවලින්—පිරී තිබුණා; මින් පෙර කවදාවත් මිනිසා ඒවා දැක නැහැ!
විශ්වයේ විශාලත්වය, ගුප්තභාවය හා අරුමය යනාදිය මගින්, දැඩි උනන්දුවකින් දේවල් නිරීක්ෂණය කරන්නෙකු තුළ ගරුබිය දනවන හැඟීම් කාවද්දවනවා. කෙසේවෙතත්, එවැනි අරුමයන් හුදෙක් මැවුම්කරුගේ මහිමයේ හා බලයේ පිළිබිඹු කිරීමක් පමණයි. බයිබලය දෙවිව “ආලෝකවල [පියා]” ලෙස හඳුන්වන අතර, ඔහු “තාරකාවන් ගණන් කොට, ඒ සියල්ලට [ඒවායේ නම්වලින් හඬගසනවා, NW]” කියා එය අපට පවසනවා.—යාකොබ් 1:17; ගීතාවලිය 147:4.
ආකාශයේ සිදු වන දේවල් ඇසුරෙන් මනිනු ලබන කාලය මගින්ද විශ්වයේ අතිවිශාලත්වය දැකගත හැකියි. හබල් අභ්‍යවකාශ දූරේක්ෂය මගින් ඡායාරූපගත කර තිබෙන මන්දාකිණිවලින් නිකුත් වන ආලෝකය, අභ්‍යවකාශය හරහා අවුරුදු බිලියන ගණනක් තිස්සේ ගමන් කරමින් තිබුණා! ආකාශ වස්තුවල ස්ථිරත්වය සමඟ අපේ ජීවිතයේ කෙටිකාලීන බව හා සුළු බව සසඳන විට, තාරකා සෑදූ තැනැත්තා කෙරෙහි ගරුබිය හා ගැඹුරු ප්‍රණාමයක් දැනීමට අප පෙලඹෙන්නේ නැද්ද? (යෙසායා 40:22, 26) මේ සියලුම දේවල් මැවූ දෙවි ‘මනුෂ්‍යයාව සිහි කරන බවත් සලකන බවත්’ දැනගැනීම, අපේ මැවුම්කරු කෙරෙහි අපේ ගෞරවය තව තවත් වැඩි කරන අතර, ඔහුව දැනගෙන සතුටු කරන්න අප තුළ ආශාවක් ඇති කරවනවා. (ගීතාවලිය 8:3, 4) දෙවිට බියවීම කියා බයිබලය හඳුන්වන්නේ, එවන් උදාර ගෞරවයක් හා අගය කිරීමක්.
සමාව දෙන දෙවිකෙනෙක්
අපි සියලුදෙනාම අසම්පූර්ණයි. හරි දෙය කරන්න උත්සාහ කරන විට පවා බලාපොරොත්තු නොවූ විදිහට අප පව් කරනවා. මෙය සිදු වන විට, දෙවිගේ අනුමැතිය අහිමි වීම ගැන අපි භය විය යුතුද? ගීතිකාකරු මෙසේ ලිව්වා: “[යෙහෝවා] ඔබ අයුතුකම් ගණනට [ගන්නේ] නම්, ස්වාමිනි, කාට සිටින්ට හැක්කේද? නුමුත් ඔබ කෙරෙහි භය ඇතුව සිටින පිණිස ඔබ වෙත කමාව ඇත්තේය.” (ගීතාවලිය 130:3, 4) “ශ්‍රේෂ්ඨ සැදුම්කරු” ඉතාමත් කරුණාවන්ත මෙන්ම සමාව දෙන තැනැත්තෙකු වීම, ඔහුට නමස්කාර කරන අය තුළ ගැඹුරු අගය කිරීමක හා ප්‍රණාමයක හැඟීම් ඇති කරවනවා.—යෙසායා 54:5-8, NW.
යහපත කිරීමටත් දෙවි නරකයයි පවසන දේවල් කිරීමෙන් වැළකීමටත් දෙවි කෙරෙහි බිය අපව පොලඹවනවා. අපේ ස්වර්ගික පියා සමඟ තිබෙන අපේ සබඳතාව, යහපත් මිනිස් පියෙක් හා ඔහුගේ දරුවන් අතර තිබෙන සබඳතාව හා සැසඳිය හැකියි. ඔවුන් පාරේ සෙල්ලම් කිරීම පියා තහනම් කිරීමට හේතු, සමහර අවස්ථාවලදී දරුවන්ට අමතක වෙන්න පුළුවන්. ඒත්, රථ වාහන ගමන් කරන පාර දිගේ ඇදී යන පන්දුවක් පසුපස ලුහුබඳින්න ඔවුන් තුළ හදිසි පෙලඹීමක් ඇති වෙද්දී, තම පියා කර තිබෙන තහනම පිළිබඳ කල්පනාව ඔවුන්ව—ඇතැම්විට මරණයෙන් ඔවුන්ව බේරාගනිමින්—වළක්වන්න යනවා. ඒ හා සමානව, යෙහෝවා කෙරෙහි වැඩිහිටියෙකු දක්වන බිය, ඔහුගේ ජීවිතයත් අනිත් අයගේ ජීවිතත් විනාශ කර දමන දෙයක් කිරීමෙන් ඔහුව වළක්වන්න පුළුවන්.—හිතෝපදේශ 14:27.
දෙවිගේ විනිශ්චයට බියවීම
මීට වෙනස්ව, දෙවිව අසතුටට පත් කිරීමෙන් තමාව නොවළක්වන හෘදය සාක්ෂියක් ඇති පුද්ගලයාට, බෙහෙවින් වෙනස් ආකාරයක බියක් ඇති කරගැනීමට හේතු තිබෙනවා. මිනිස් ආණ්ඩු අපරාධකරුවන්ට දඬුවම් කරන්නාක් මෙන්, හිතාමතාම, පසුතැවිලි නොවී වැරදි කරන අයට එරෙහිව ක්‍රියා කිරීමට දෙවිට අයිතියක් තිබෙනවා. දෙවි දුෂ්ටකමට තාවකාලිකව අවසර දී තිබීමෙන්, සමහර අයට වැරදි ක්‍රියාමාර්ගවල දැඩිවීමට ඉඩ ලැබී තිබෙනවා. නමුත් දවසක ඔහු ඉක්මනින්ම පොළොවෙන් නපුරු දේවල් සෑම එකක්ම ඉවත් කර දමන්න යනවා කියා බයිබලය පෙන්වා දෙනවා. (ගීතාවලිය 37:9, 10; දේශනාකාරයා 8:11; 1 තිමෝති 5:24) පසුතැවිලි නොවන දුෂ්ටයන්ට, දෙවිගෙන් ලැබෙන දඬුවම්වලට බියවීමට හේතු තිබෙනවා. ඒත්, බයිබලය නිර්දේශ කරන බිය මේ ආකාරයේ බියක් නොවෙයි.
ඒ වෙනුවට, බයිබලය යෙහෝවා කෙරෙහි දක්වන බිය ජීවිතයේ රමණීය දේවල් වන ගායනය, ප්‍රීතිය, විශ්වාසය, ප්‍රඥාව, දීර්ඝායුෂ, නිසැකකම, සමෘද්ධිය, බලාපොරොත්තුව සහ සමාදානය යනාදිය සමඟ සම්බන්ධ කර දක්වනවා; මෙහි දැක්වෙන්නේ ඒ හා සම්බන්ධ දේවලින් ස්වල්පයක් පමණයි.a යෙහෝවා කෙරෙහි බියෙන් යුක්තව අපි දිගටම හැසිරෙනවා නම්, අපි එවන් ආශීර්වාද සදාකාලයටම භුක්ති විඳින්න යනවා.—ද්විතීය කථාව 10:12-14.
[පාදසටහන]
a නික්මයාම 15:11; ගීතාවලිය 34:11, 12; 40:3; 111:10; හිතෝපදේශ 10:27; 14:26; 22:4; 23:17, 18; ක්‍රියා 9:31 බලන්න.
[28වන පිටුවේ පින්තූරය]
Anglo-Australian Observatory අනුග්‍රහයෙනි, ඡායාරූපය David Malin විසිනි