ඔබගේ ප්‍රයෝජනවත් ගති පැවතුම් නරක් කිරීමට කිසිවෙකුට ඉඩ නොදෙන්න

“නොරැවටෙන්න. නරක ඇසුර ප්‍රයෝජනවත් ගති පැවතුම් නරක් කරයි.”—1 කොරින්ති 15:33, NW.

1, 2. (අ) කොරින්තියේ ක්‍රිස්තියානින් ගැන ප්‍රේරිත පාවුල්ට හැඟුණේ කෙසේ ද, තව ද ඒ මන්ද? (ආ) අප සලකා බලනු ඇත්තේ කිනම් විශේෂ උපදේශය ද?

දෙමාපිය ප්‍රේමය වනාහි මොනතරම් ප්‍රබල චිත්ත වේගයක් ද! තමන්ගේ දරුවන් සඳහා පරිත්‍යාග කිරීමටත් ඔවුන්ට උගන්වා අවවාද දීමටත් එය දෙමාපියන් ව පොලඹවයි. ප්‍රේරිත පාවුල් මාංසික පියෙකු නොවූවා විය හැකි නමුත් කොරින්තියේ සිටි ක්‍රිස්තියානින් හට ඔහු මෙසේ ලීවේ ය: “ක්‍රිස්තුස්වහන්සේ තුළ නුඹලාට දසදහසක් ගුරුවරු ඇතත් නුඹලාට බොහෝ පියවරු නැත. මක්නිසාද ශුභාරංචිය කරණකොටගෙන ක්‍රිස්තුස් යේසුස්වහන්සේ තුළ මම නුඹලා ජනිතකෙළෙමි [ඔබගේ පියා බවට පත් වුණෙමි NW].”—1 කොරින්ති 4:15.

² මීට පෙර, පාවුල් යුදෙව්වන්ට හා ග්‍රීක්වරුන්ට දේශනා කර තිබූ කොරින්තියට ගමන් කොට තිබුණේ ය. කොරින්තියේ සභාවක් පිහිටුවීමට හේ උපකාර කළේ ය. තවත් ලිපියක, පාවුල් තමා දැක්වූ සැලකිල්ල කිරි මවකගේ සැලකිල්ලට සමාන කළමුත්, ඔහු කොරින්තිවරුනට පියෙකු හා සමාන ව සිටියේ ය. (1 තෙසලෝනික 2:7) ප්‍රේමනීය මාංසික පියෙක් කරන්නාක් මෙන්, පාවුල් තම ආත්මික දරුවන්ට අවවාද කළේ ය. කොරින්තියේ සිටි ක්‍රිස්තියානින් හට පාවුල් දුන් පියෙකු බඳු උපදෙස්වලින් ඔබට ප්‍රයෝජන ගත හැකි ය: “නොරැවටෙන්න, නරක ඇසුර ප්‍රයෝජනවත් ගති පැවතුම් නරක් කරයි.” (1 කොරින්ති 15:33, NW) පාවුල් කොරින්තිවරුන් හට එය ලීවේ මන්ද? එම අවවාදය අදාළ කර ගැනීමට අපට හැක්කේ කෙසේ ද?

ඔවුන්ටත් අපටත් උපදෙස්

3, 4. පළමු සියවසේ කොරින්ති නගරය සහ එහි ජනගහණය ගැන අප දන්නේ මොනවා ද?

³ පළමු සියවසේ දී, ග්‍රීක් භූගෝල විද්‍යාඥ ස්ට්‍රාබෝ මෙසේ ලීවේ ය: “කොරින්තියේ වූ වාණිජ ව්‍යාපාර නිසාත්, එය දේශ සන්ධියක් මත පිහිටා තිබීම නිසාත්, එය එකක් ආසියාවට හා අනෙක ඉතාලියට වශයෙන් මාවත් දෙකක් පිහිටි වරායන් දෙකක ප්‍රධාන නගරයක් ව තිබූ නිසාත්, එය ‘ධනවත්’ නගරයක් වශයෙන් හැඳින්වේ; තව ද එය රටවල් දෙක අතර වෙළෙඳ ගනුදෙනු පහසු කරයි.” සෑම වසර දෙකකට වතාවක්, කොරින්තියේ පැවති සුප්‍රසිද්ධ ඉස්ත්මීය තරඟාවලිය නිසා විශාල පිරිස් එහි ඇදී ආහ.

⁴ ආණ්ඩුමය බලය හා ඇෆ්‍රෝඩයිටිට පිදූ කාමුක නමස්කාරය යන දෙකේ ම මධ්‍යස්ථානයක් වූ මෙම නගරයේ මිනිසුන් ගැන කුමක් කිව හැකි ද? මහාචාර්ය ටී. එස්. එවන්ස් මෙසේ පැහැදිලි කළේ ය: “මෙහි ජනගහණය 4,00,000ක් පමණ [වූයේ] ය. මෙය උසස් සංස්කෘතියකින් යුත් නමුත්, අනාචාරයට නැමුණු, සමහර විට අන්ත අශික්ෂිත සදාචාරයන් පවා තිබූ සමාජයක් [වූයේ] ය. . . . අකායේ විසූ ග්‍රීක වැසියන්ගේ ප්‍රධාන ලක්ෂණයක් වූයේ බුද්ධිය සෙවීම සම්බන්ධයෙන් නොසන්සුන් ස්වභාවයක් හා නවීන මතිමතාන්තර පස්සේ උමතු ආකාරයෙන් ලුහුබැඳයාමේ ස්වභාවයක් පෙන්වීම ය. . . . ඔවුන්ගේ ආත්මාභිමානය නිකාය වාදය නමැති ගිනිදැල්ල සඳහා ඉන්ධනයක් විය.”

5. කොරින්තිය සහෝදරයන් මුහුණ පෑවේ කිනම් අන්තරායට ද?

⁵ කලක් ගත වන විට, අහංකාර අනුමානයන් දෙසට තවමත් නැඹුරු වී සිටි අය මගින් සභාව පවා බෙදී යන්නට විය. (1 කොරින්ති 1:10-31; 3:2-9) ප්‍රධාන ගැටලුවක් වූයේ, සමහරු “මළවුන්ගේ නැගිටීමක් නැතැයි” කීමයි. (1 කොරින්ති 15:12; 2 තිමෝති 2:16-18) ඔවුන්ගේ විශ්වාසය (හෝ අවිශ්වාසය) කුමක් වුවත්, “ක්‍රිස්තුස්වහන්සේ මළවුන්ගෙන් නැගිට සිටින” බවට පැහැදිලි සාක්ෂි සමඟින් ඔවුන් ව නිවැරදි කිරීමට පාවුල්ට සිදු විණි. මෙසේ, දෙවියන් වහන්සේ විසින් ඔවුන් හට “අපගේ ස්වාමිවූ යේසුස් ක්‍රිස්තුස්වහන්සේ කරණකොටගෙන අපට ජය [දෙන]” බවට විශ්වාස කිරීමට ක්‍රිස්තියානින්ට හැකි විය. (1 කොරින්ති 15:20, 51-57) ඔබ එහි සිටියා නම්, ඔබ අන්තරායක සිටිනු ඇත් ද?

6. පළමු වෙනි කොරින්ති 15:33 හි සඳහන් පාවුල්ගේ උපදෙස විශේෂයෙන් අදාළ වූයේ කවුරුන්ට ද?

⁶ මළවුන් නැවත නැගිටීමට යන බවට ස්ථිර සාක්ෂි ඉදිරිපත් කරන අතරේ දී, පාවුල් ඔවුනට මෙසේ කීවේ ය: “නොරැවටෙන්න. නපුරු ඇසුර ප්‍රයෝජනවත් ගති පැවතුම් නරක් කරයි.” මෙම උපදෙසේ මූලික කරුණ අදාළ වූයේ නැවත නැගිටීම පිළිබඳ මූලධර්මය සම්බන්ධ ව එකඟ නොවුණා වූ සභාව සමඟ ඇසුරු කළ අය වෙතට ය. ඔවුන්ට නොවැටහුණා වූ කරුණක් ගැන ඔවුහු නිකම් ම අස්ථිර ව සිටියෝ ද? (ලූක් 24:38 සසඳන්න.) නැත. පාවුල් ලීවේ, “මළවුන්ගේ නැගිටීමක් නැතැයි නුඹලා අතරෙන් සමහරුන් කියන” බව ය. එසේ නම්, ඊට සම්බන්ධ අය එකඟ නොවීම් පළකරමින්, ඇදහිල්ල අත්හැරයාම දෙසට නැඹුරු වෙමින් සිටියහ. අන්‍යයන්ගේ හොඳ ගති පැවතුම් හා සිතුවිලි නරක් කිරීමට ඔවුන්ට හැකි බවට පාවුල් හොඳින් සාවධාන ව සිටියේ ය.—ක්‍රියා 20:30; 2 පේතෘස් 2:1.

7. අපට 1 කොරින්ති 15:33 අදාළ කර ගත හැකි එක් තත්ත්වයක් කුමක් ද?

⁷ ආශ්‍රය සම්බන්ධ ව පාවුල්ගේ අනතුරු ඇඟවීම අදාළ කර ගැනීමට අපට හැක්කේ කෙසේ ද? ඔහු අදහස් කළේ, බයිබල් පාඨයක් හෝ ඉගැන්වීමක් වටහා ගැනීමට අසීරු වී ඇති සභාවේ සිටින යමෙකුට උදව් කිරීමට අප පසුබට විය යුතු බවක් නොවේ. ඇත්තෙන් ම, එවන් සැකයන් ඇති අවංක අයට දයානුකම්පිත ලෙස උදව් කරන ලෙස යූද් 22, 23 අපෙන් උදක් ම ඉල්ලා සිටියි. (යාකොබ් 5:19, 20) කෙසේ වෙතත්, බයිබල් සත්‍යය ලෙස අප දන්නා දෙයට පටහැනි ව අදහස් පළ කරන විට, අනුමාන හෝ නිෂේධාත්මක ස්වරූපයකින් හෙබි දේවල් පවසමින් සිටින විට, පියෙකු මෙන් පාවුල් දෙන උපදෙස අදාළ විය යුතු ය. අප ඒ ආකාරයේ පුද්ගලයෙකු සමඟ ඇසුරු කිරීමට එරෙහි ව ප්‍රවේසම් විය යුතු ය. ඇත්ත වශයෙන් ම, යමෙක් ස්ථිර ලෙස ඇදහිල්ල අතහැර යන කෙනෙකු බවට පත් වේ නම්, රැළ ආරක්ෂා කර ගැනීම සඳහා ක්‍රියාත්මක වීමට ආත්මික එඬේරුන් හට සිදුවෙයි.—2 තිමෝති 2:16-18; තීතස් 3:10, 11.

8. යමෙක් බයිබල් ඉගැන්වීමක් ගැන එකඟ නොවන විට, අපට විචාර බුද්ධියෙන් යුතු ව කටයුතු කිරීමට හැක්කේ කෙසේ ද?

⁸ පළමු වෙනි කොරින්ති 15:33 හි සඳහන් පාවුල්ගේ පියෙකු බඳු උපදෙස, බොරු ඉගැන්වීම්වලට අනුබල දෙන සභාවෙන් පිටත සිටින අය සමඟ කටයුතු කරන විට දී ද අදාළ කළ හැකි ය. අප ඔවුන් සමඟ ඇසුරට කෙසේ ඇදී යා හැකි ද? සත්‍යය ඉගෙන ගැනීමට උපකාර කරනු ලැබිය හැකි අය සහ බොරු ඉගැන්වීම්වලට අනුබල දීමේ අටියෙන් මත භේදවලට තුඩු දෙන අභියෝග එල්ල කරන අය අතර වෙනස අප විසින් පැහැදිලි ව හඳුනා නොගත්තොත් එය සිදු විය හැකි ය. නිදසුනක් වශයෙන්, අපගේ සාක්ෂිදැරීමේ සේවයේ දී, යම් කරුණක් ගැන එකඟ නොවන නමුත් තවදුරටත් සාකච්ඡා කිරීමට කැමැත්ත දක්වන පුද්ගලයෙකු ව අපට මුණ ගැසෙනවා විය හැකි ය. (ක්‍රියා 17:32-34) එය ම ගැටලුවක් වීමට අවශ්‍ය නැත, මන්දයත්, බයිබල් සත්‍යය දැනගැනීමට අව්‍යාජ ලෙස කැමැත්ත දක්වන අයට එවැනි දෑ පහදා දීමට ද, නැවත ගොස් පවා ඒත්තු ගත හැකි සාක්ෂි ඉදිරිපත් කිරීමට ද අප සතුටින් සිටින නිසා ය. (1 පේතෘස් 3:15) එහෙත්, ඇතැම් අය බයිබල් සත්‍යය සොයා බැලීමට සැබෑ උනන්දුවක් නොදක්වනවා විය හැක.

9. අපගේ විශ්වාසයන්ට ඇති වන අභියෝගයන් හට අප ප්‍රතික්‍රියා කළ යුත්තේ කෙසේ ද?

⁹ බොහෝ අය පැය ගණන් සති ගණන් විවාද කරන නමුත් එසේ කරන්නේ ඔවුන්ට සත්‍යය සෙවීමට වුවමනා නිසා නොවේ. ඔවුන්ට වුවමනා කරන්නේ, හෙබ්‍රෙව්, ග්‍රීක්, හෝ පරිණාමවාදී විද්‍යාව ගැන තමන් සිතා සිටින අධ්‍යාපනය ගැන පුරසාරම් දොඩන අතරේ දී, තවත් අයෙකුගේ ඇදහිල්ල දුර්වල කිරීමට ය. ඔවුන් ව මුණ ගැසුණු අවස්ථාවල දී, ඇතැම් සාක්ෂිකරුවන්ට එය අභියෝගයක් යයි හැඟී ගොස් ඇති අතර, බොරු ආගමික විශ්වාසයන්, දර්ශනවාදයන් හෝ විද්‍යාවේ වැරදි මත කේන්ද්‍රගත වූ සාකච්ඡාවල දීර්ඝ වේලාවක් ඇලී ගැලී සිට ඇත. හෙබ්‍රෙව් හෝ ග්‍රීක පාසල්වල උගත් ආගමික නායකයන් සමඟ වාද කර ජය ගැනීමට යේසුස් වහන්සේට හැකියාව තිබූ නමුත් උන් වහන්සේ එසේ කරන්නට නොගිය බව සැලකිල්ලට ගැනීම වටී. අභියෝග කරනු ලැබූ විට, කෙටියෙන් පිළිතුරු දුන් යේසුස් වහන්සේ, ඊට පසු යළිත් තම අවධානය යටහත් පහත්, සැබෑ බැටළුවන් වෙතට යොමු කළ සේක.—මතෙව් 22:41-46; 1 කොරින්ති 1:23–2:2.

10. පරිගණක සතු ව තිබෙන හා විද්‍යුත් තොරතුරු පුවරු සමඟ සම්බන්ධයක් ඇති ක්‍රිස්තියානින් සුපරීක්ෂාකාරී වීම යෝග්‍ය වන්නේ මන්ද?

¹⁰ නූතන පරිගණක ද නපුරු ආශ්‍රයට වෙනත් මාර්ගයන් විවෘත කර තිබේ. ඇතැම් වෙළෙඳ සමාගම් තම දායකයන් හට විද්‍යුත් තොරතුරු පුවරුවලට පණිවුඩ යැවීම සඳහා පරිගණකයක් හා දුරකථනයක් භාවිතා කිරීමට හැකියාව සලස්වා ඇත; මේ අයුරින් පුද්ගලයෙකුට, සියලු දායකයන්ට විවෘත වූ පණිවුඩයක් තොරතුරු පුවරුවේ දැමිය හැක. මෙය, ආගමික කාරණා සම්බන්ධ ව විද්‍යුත් විවාද යනුවෙන් කියනු ලබන දේට මඟ පෙන්වා ඇත. ක්‍රිස්තියානියෙක් එවන් විවාදවලට ඇදී යා හැකි අතර, සමහර විට සභා ඇසුරෙන් කපා දමනු ලැබූ ඇදහිල්ල අත්හල චින්තනයන් ඇති අයෙකු සමඟ පැය ගණනාවක් ගත කරනවා විය හැක. දෙවෙනි යොහන් 9-11 හි දී ඇති මඟ පෙන්වීම, නපුරු ආශ්‍රයන්ගෙන් වැළකීම පිළිබඳ පාවුල්ගේ පියෙකු බඳු උපදෙස කැපී පෙනෙන්ට සලස්වයි.a

මුළාවීමෙන් වළකින්න

11. කොරින්තියේ තිබූ වාණිජමය තත්ත්වය කිනම් ප්‍රස්තාවක් ඉදිරිපත් කළේ ද?

¹¹ කලින් සලකා බැලුවාක් මෙන්, කොරින්තිය යනු කඩ සාප්පු ගණනාවකින් හා ව්‍යාපාරවලින් සමන්විත වාණිජ්‍ය මධ්‍යස්ථානයක් වූයේ ය. (1 කොරින්ති 10:25) ඉස්ත්මීය ක්‍රීඩා සඳහා පැමිණි බොහෝ දෙනෙක්, කූඩාරම්වල වාසය කරනු ඇති අතර, එවන් කාලය අතරේ දී, වෙළෙන්දෝ එහා මෙහා ගෙන යා හැකි කූඩාරම් හෝ ආවරණය කරන ලද වෙළෙඳ කුටිවලින් බඩු බාහිරාදිය විකුණූහ. (ක්‍රියා 18:1-3 සසඳන්න.) කූඩාරම් සෑදීමේ වැඩ එහි දී සොයා ගැනීමට පාවුල්ට හැකි වූයේ මේ මගිනි. තව ද තමා වැඩ කරන ස්ථානය ශුභාරංචිය ව්‍යාප්ත කිරීමට යොදා ගැනීමට ඔහුට හැකි විණි. මහාචාර්ය ජේ. මර්ෆි-ඔ’කොනර් මෙසේ ලියයි: “බහුල ලෙස වෙළෙඳ කටයුතු සිදු වූ වෙළෙඳ පොළක සාප්පුවක සිට, . . . ජනාකීර්ණ පාරක් දක්වා, තමන් සමඟ වැඩ කරන අය සහ ගනුදෙනුකරුවන් සමඟ පමණක් නොව, නමුත් පිටත සිටි සමූහයා සමඟ පවා කථා බස් කරන්නට පාවුල්ට හැකි විණි. ව්‍යාපාර කටයුතු අඩුවෙන් සිදුවන වේලාවල දී දොර ළඟ සිට ගෙන තමාට සවන් දිය හැකි අයට ඔහු කථා කළේ ය. . . . ඔහුගේ ක්‍රියාශීලී පෞරුෂත්වය හා දැඩි විශ්වාසය, ඔහු අවට සිටින්නන් අතර ඔහු ව සැනෙකින් ‘කැපී පෙනෙන චරිතයක්’ නොකිරීම විශ්වාස කිරීමට අසීරු දෙයක් වන අතර, මේ මගින්, කුතුහලය ඇති අය, එනම් නිකම් සිටින්නන් ව පමණක් නොව, අව්‍යාජ ලෙස තොරතුරු සොයන අය ව ද ඔහු වෙතට ඇද ගත්තා විය යුතු ය. . . . ඔහු ගැන අසා සිටි විවාහක ස්ත්‍රීන් තමන්ගේ පරිචාරිකාවන් සමඟ යමක් මිලදී ගැනීමේ මුවාවෙන් ඔහු ව බැහැදැකීමට හැකියාව තිබුණි. අසීරු කාලවල දී, පීඩාවන් හෝ සුළු වශයෙන් හිරිහැර තර්ජන පවතින අවස්ථාවල දී, ඇදහිලිවන්තයන්ට පැමිණ ඔහු ව හමුවිය හැකි වූයේ ඔහුගේ ගනුදෙනුකරුවන් ලෙසිනි. මෙම වැඩපොළ ඔහුට නාගරික නිලධාරීන් ව මුණ ගැසෙන්නටත් අවස්ථාවක් ලබා දුන්නේ ය.”

12, 13. පළමු වෙනි කොරින්ති 15:33, රැකියා ස්ථානයට සුදුසු සේ අදාළ විය හැක්කේ කෙසේ ද?

¹² එසේ වුවත්, රැකියා ස්ථානයේ දී ඇති වන ‘නරක ඇසුරේ’ බලපෑම පාවුල් විසින් හඳුනා ගන්නට ඇත. අපත් එසේ කළ යුතු ය. මෙහිලා සුවිශේෂී දෙයක් නම්, සමහරුන් අතර ජනප්‍රිය ව තිබූ ආකල්පයක් පාවුල් විසින් උපුටා දැක්වීමයි: එනම්, “හෙට මැරෙන බැවින් කමු, බොමු” යන්න ය. (1 කොරින්ති 15:32) ඔහු ඒ සමඟ ම වාගේ පියෙකු බඳු තම උපදෙස ඊළඟට දුණි: “නොරැවටෙන්න. නරක ඇසුර ප්‍රයෝජනවත් ගති පැවතුම් නරක් කරයි.” රැකියා කරන ස්ථානය හා විනෝදය සෙවීම ප්‍රබල අන්තරායක් ඇති කිරීමෙහිලා සම්බන්ධ විය හැක්කේ කෙසේ ද?

¹³ තමන් සමඟ එකට වැඩ කරන අය සමඟ මිත්‍රශීලී වීමට ක්‍රිස්තියානින් හට වුවමනා වන අතර, සාක්ෂියක් දීම සඳහා මාර්ගයක් විවෘත කිරීමෙහිලා මෙය කොතරම් බලපෑමෙන් යුතු ද කියා බොහෝ අත්දැකීම්වලින් නිරූපනය වෙයි. කෙසේ වෙතත්, වැඩපොළේ සහායක වැඩකරුවෙකුගේ මිත්‍රශීලීකම එකිනෙකා එක් ව විනෝද වීම සඳහා අසුරු කිරීමට කරන ඇරයුමක් සේ වරදවා තේරුම් ගත හැක. ඔහු හෝ ඈ, දිවා ආහාරයක් ගැනීම සඳහා, වැඩ අවසන් වීමෙන් පසු මදු පානයක් සඳහා මඳකට නවතින ලෙස, නැතහොත් සති අන්තයේ යම් විනෝද ඇසුරක් සඳහා සුහද ආරාධනයක් දෙන්නට පුළුවන. මෙම පුද්ගලයා කරුණාවන්ත හා හොඳ ගති පැවතුම් සතු කෙනෙකු සේ පෙනෙන්නට පුළුවන, තව ද ආරාධනය වරදක් නැති අහිංසක එකක් ලෙස පෙනෙන්ට පුළුවන. එහෙත්, පාවුල් අවවාද කරන්නේ මෙසේයි: “නොරැවටෙන්න.”

14. ඇතැම් ක්‍රිස්තියානින් ආශ්‍රය තුළින් රැවටී ඇත්තේ කෙසේ ද?

¹⁴ ඇතැම් ක්‍රිස්තියානිහු රැවටී සිටිති. ඔවුහු කෙමෙන් කෙමෙන් තමන් සමඟ එකට වැඩ කරන අය කෙරෙහි සැහැල්ලු ආකල්පයක් වර්ධනය කර ඇත්තාහ. ඇතැම් විට එය ක්‍රීඩාවක් හෝ යම් විනෝදාංශයක් නිසා ඇති වූ පොදු උනන්දුවකින් වර්ධනය වූවා විය හැකි ය. එසේ නැතහොත්, රැකියා ස්ථානයේ සිටින ක්‍රිස්තියානි නොවන එම තැනැත්තා විශේෂයෙන් කාරුණික හා සැලකිලිමත් කෙනෙක් වන අතර, එම තැනැත්තා සමඟ වැඩි වේලාවක් ගත කිරීමට මඟ පෑදී, ඇතැම්විට සභාවේ සිටින සමහරකගේ ඇසුරට වඩා එම තැනැත්තාගේ ඇසුරට වඩාත් ප්‍රිය කරන තත්ත්වයකට පත්වූවා වන්නට පුළුවන. ඉන් පසු එම ඇසුර එක රැස්වීමක් පමණක් අතපසු කරන තැනට මං සැලසිය හැක. එය එක් සැන්දෑවක් ප්‍රමාද වී පැමිණීමට සහ උදෑසන ක්ෂේත්‍ර සේවයට හවුල්වීමේ කාල සටහන කැඩීමකට තුඩු දිය හැකි ය. එය ක්‍රිස්තියානියෙක් විසින් සාමාන්‍යයෙන් ප්‍රතික්ෂේප කරන චිත්‍රපටයක් හෝ වීඩියෝ පටයක් නැරඹීමට මඟ පෑදිය හැකි ය. ‘අපෝ, මට නම් කවදාවක්වත් එහෙම වෙන එකක් නැහැ’ යයි අපට සිතෙන්නට පුළුවන. එහෙත් රැවටී සිටින අයගෙන් බොහෝ දෙනෙක් ප්‍රථමයෙන් එසේ ප්‍රතිචාරය දක්වන්නට ඇත. අපට අපගෙන් ම මෙසේ ඇසීමට අවශ්‍ය ය, ‘පාවුල්ගේ අවවාදය අදාළ කර ගැනීමට මම කොතරම් අධිෂ්ඨාන කර ගෙන සිටින්නෙමි ද?’

15. අසල් වැසියන් සම්බන්ධයෙන් අපට තිබිය යුතු සමබර ආකල්පය කුමක් ද?

¹⁵ රැකියා ස්ථානය සම්බන්ධයෙන් අප දැන් සලකා බැලූ දෙය අසල් වාසීන් සමඟ අපගේ ඇසුරට ද අදාළ වෙයි. පුරාණ කොරින්තියේ විසූ ක්‍රිස්තියානින් හට අසල් වාසීන් සිටි බවට නිසැක ය. ඇතැම් ජන සමූහයන් අතර, අසල් වාසීන් සමඟ සෑහෙන තරම් මිත්‍රශීලී වීම හෝ සහයෝගය දක්වන සුලු වීම සාමාන්‍ය දෙයකි. පිටිසර බද ප්‍රදේශවල වෙසෙන අය හුදෙකලාවේ සිටින නිසා, අසල් වාසීන් එකිනෙකා කෙරෙහි රඳා සිටිනවා විය හැක. ඇතැම් සංස්කෘතීන් අතරෙහි පවුල් සබඳතා විශේෂයෙන් ම ශක්තිමත් වී ඇත්තේ ආහාර ගැනීම සඳහා ඇරයුම් බොහොමයකට මං උදා කරවමින් ය. යේසුස් වහන්සේ විදහා පෙන්වූ පරිදි, සමබර දෘෂ්ටියක් අවශ්‍ය බවට නොකිව මනා ය. (ලූක් 8:20, 21; යොහන් 2:21) අපගේ අසල් වාසීන් හා නෑදෑයන් සමඟ කටයුතු කරන විට, අප ක්‍රිස්තියානින් බවට පත්වීමට පෙර කළාක් මෙන්, ඔවුන් සමඟ කටයුතු කිරීමට අපි නැඹුරු වී සිටින්නෙමු ද? ඒ වෙනුවට, අප එවැනි කටයුතු කිරීම් ගැන යළි සලකා බලා, කිනම් සීමාවන් තබා ගැනීම සුදුසු ද කියා සාවධාන ව තීරණය කළ යුතු නොවේ ද?

16. මතෙව් 13:3, 4 හි සඳහන් යේසුස් වහන්සේගේ වචන වටහා ගත යුතු ව තිබෙන්නේ කෙසේ ද?

¹⁶ වරෙක යේසුස් වහන්සේ, රාජ්‍යයේ වචනය, ‘මග අසල වැටුණා වූ, පක්ෂීන් පැමිණ අහුලා ගෙන කෑවා වූ’ බීජවලට සමාන කළ සේක. (මතෙව් 13:3, 4, 19) ඒ කාලයේ, බොහෝ දෙනා පාරක එහාට මෙහාට ගමන් කළ නිසා ඒ දෙපස තිබූ පස දැඩි ව තිබිණි. බොහෝ මිනිසුන් සම්බන්ධයෙන් ම කාරණය ඒ හා සමාන ය. ඔවුන්ගේ ජීවිත, තම අසල් වාසීන්ගෙන්, නෑදෑයන්ගෙන් සහ යන එන වෙනත් අයගෙන් පිරී, ඔවුන් ව කාර්ය බහුල කරවා තිබේ. මෙය හරියට, ඔවුන්ගේ හදවත් නමැති පස් මඩිනු ලැබ තිබෙනවාක් මෙන් නිසා, සත්‍යයේ බීජවලට එම හදවත් තුළ මුල් ඇද ගැනීමට අසීරු ය. ඒ හා සමාන ප්‍රතිචාරය නොදක්වන සුලු භාවයක්, දැනටමත් ක්‍රිස්තියානියෙකු බවට පත් වී සිටින අයෙකු තුළ වර්ධනය විය හැකි ය.

17. අසල් වැසියන් හා වෙනත් අය සමඟ ආශ්‍රය අපට බලපෑ හැක්කේ කෙසේ ද?

¹⁷ ඇතැම් ලෞකික අසල් වාසීන් හා නෑදෑයන් මිත්‍රශීලී හා උදව් කරන සුලු අය විය හැකි ය, නමුත් ඔවුන් නිරන්තරයෙන් ම ආත්මික දේවල් සඳහා උනන්දුවක්වත් ධර්මිෂ්ඨකම සඳහා ප්‍රේමයක්වත් පෙන්වා නැත. (මාර්ක් 10:21, 22; 2 කොරින්ති 6:14) අප ක්‍රිස්තියානින් බවට පත්වීමෙන් අදහස් කරන්නේ, අප මිත්‍රශීලී නොවන අසල් වාසීන් ගැන තැකීමක් නොකරන අය වෙනවා යන්න නොවේ. වෙනත් අය කෙරෙහි අව්‍යාජ සැලකිල්ලක් දක්වන ලෙස යේසුස් වහන්සේ අපට උපදෙස් දුන් සේක. (ලූක් 10:29-37) එහෙත්, අපගේ ආශ්‍රිතයන් ගැන ප්‍රවේසම් වන ලෙසට ඒ හා සමාන ව දේවානුභාවයෙන් දී තිබෙන පාවුල්ගේ අවවාදය ද අනිවාර්යයෙන් පිළිපැදිය යුතු ය. අප පෙර සඳහන් කළ උපදෙස පිළිපදින අතරේ දී, පසු ව සඳහන් වූ උපදෙස අමතක නොකළ යුතු ය. අප මෙම ප්‍රතිපත්ති දෙක ම මනසේ තබා නොගතහොත්, අපගේ ගති පැවතුම් බලපෑමට ලක් විය හැක. අවංකකම හා කායිසර්ගේ නීතියට කීකරු වීම සම්බන්ධ ව ඔබගේ අසල් වාසීන්ගේ හෝ නෑදෑයන්ගේ පුරුදු ඒ සම්බන්ධ ව ඔබගේ පුරුදු සමඟින් සැසඳෙන්නේ කෙසේ ද? නිදසුනක් වශයෙන්, බදු ගෙවන කාලයේ දී, ආදායම හෝ ව්‍යාපාර ලාභ අඩුවෙන් වාර්තා කිරීම යුක්ති සහගත යයි ද, ජීවත්වීමට නම් ඒවා අනිවාර්යයෙන් ම කළ යුතු යයි ද ඔවුන්ට හැඟෙනවා විය හැක. ඔවුන් දරන මත ගැන, තේ පානයක දී හෝ මඳකට ඔබ ව හමුවන අවස්ථාවක දී ඔබ හට ඒත්තු යන අන්දමින් කථා කරන්නට පුළුවන. ඔබගේ සිතුවිලිවලට හා අවංක ගති පැවතුම්වලට එය කෙසේ බලපාවි ද? (මාර්ක් 12:17; රෝම 12:2) “නොරැවටෙන්න, නරක ඇසුර ප්‍රයෝජනවත් ගති පැවතුම් නරක් කරයි.”

යෞවන ගති පැවතුම් ද ඇතුළත් ය

18. පළමු වෙනි කොරින්ති 15:33 යෞවනයන්ට ද අදාළ වන්නේ මන්ද?

¹⁸ යෞවන අය විශේෂයෙන් ම, තමන් දකින හා අසන දෙයින් බලපෑමට හසුවෙති. දරුවන්ගේ හැසිරීම් විලාශයන් හා ගති පැවතුම් ඔවුන්ගේ දෙමාපියන්ගේ හා සහෝදර සහෝදරියන්ගේ හැසිරීම් විලාශයන් හා ගති පැවතුම්වලට බොහෝ දුරට සමාන බව ඔබ දැක නැත් ද? එසේ නම්, දරුවන් තමන් සමඟ සෙල්ලම් කරන අය හෝ පාසලේ ළමුන් මගින් බොහෝ සේ බලපෑමට හසු වන බවට අප පුදුම නොවිය යුතු ය. (මතෙව් 11:16, 17 සසඳන්න.) ඔබගේ පුතා හෝ දුව, තම දෙමාපියන් ගැන අගෞරවනීය ලෙස කථා කරන යෞවනයන්ගෙන් වට වී සිටින්නේ නම්, මෙය ඔබගේ දරුවන්ට බලපාන්නේ නැතැයි කියා සිතන්නේ ඇයි? වෙනත් යෞවනයන් නරක භාෂාව භාවිතා කරනවා ඔවුනට නිතර ම පාහේ ඇසෙනවා නම් තත්ත්වය කුමක් ද? පාසලේ සිටින ඔවුන්ගේ තුල්‍යයන් හෝ අසල් වාසීන් නව මෝස්තරයක පාවහන් හෝ නව රටාවක ස්වර්ණාභරණ මගින් කුල්මත් වී යනවා නම් තත්ත්වය කුමක් ද? ක්‍රිස්තියානි යෞවනයන් එවැනි බලපෑම්වලට හසුවන්නේ නැත කියා අප සිතිය යුතු ද? පළමු වෙනි කොරින්ති 15:33 ආදළ වන්නේ එක්තරා අවම වයස් මට්ටමක සිටින අයට කියා පාවුල් පැවසුවේ ද?

19. දෙමාපියන් තම දරුවන් තුළ පැළ පදියම් කිරීමට උත්සාහ කළ යුත්තේ කිනම් දෘෂ්ටිය ද?

¹⁹ ඔබ දෙමාපියෙකු නම්, ඔබගේ දරුවන් සමඟ කාරණා විමර්ශනය කරන විටත් ඔවුන් සම්බන්ධයෙන් තීරණ ගන්නා විටත් ඔබ එම උපදෙස ගැන සාවධානයෙන් සිටින්නෙහි ද? ඔබගේ දරුවන් වටා සිටින අසල් වාසී හෝ පාසලේ සිටින වෙනත් සියලු යෞවනයන් හොඳ අය නොවේ කියා මින් අදහස් නොකරන බව ඔබ පිළිගන්නේ නම් මෙය ඔබ හට ප්‍රයෝජනවත් විය හැකි ය. ඔබගේ අසල් වාසීන්, නෑදෑයන් හා රැකියා ස්ථානයේ සිටින ඇතමුන් ප්‍රසන්න, ශිෂ්ඨ සම්පන්න අය වන්නාක් මෙන්, මේ අයගෙන් සමහරෙක් ද එසේ විය හැක. මෙය දැක ගැනීමටත්, කොරින්තිවරුන්ට පාවුල් විසින් දුන්නා වූ ප්‍රඥාවන්ත, පියෙකුගේ බඳු උපදෙස ඔබ විසින් අදාළ කිරීමේ දී, ඔබ සමබර වී සිටින බවටත් වටහා ගැනීමට ඔබගේ ජනිතයන්ට උපකාර කිරීමට වෑයම් කරන්න. ඔබ දේවල් සමබර කරන ආකාරය ඔවුන් විසින් වටහා ගන්නවාත් සමඟ ම, ඔබ ව අනුකරණය කිරීමට ඔවුනට උපකාර කිරීමට ඊට හැක.—ලූක් 6:40; 2 තිමෝති 2:22.

20. යෞවනයෙනි, ඔබ මුහුණ දෙන්නේ කිනම් අභියෝගයකට ද?

²⁰ යෞවනයෙනි, තවමත් යොවුන් වියේ පසුවන ඔබ, පාවුල්ගේ උපදෙස බාල මහලු සෑම ක්‍රිස්තියානි කෙනෙකුට ම වැදගත් වන බව දැන ගෙන එය අදාළ කර ගන්නා ආකාරය වටහා ගැනීමට උත්සාහ කරන්න. මෙය අභියෝගයක් වනු ඇත, නමුත් අභියෝගයට සාර්ථක ව මුහුණ දීමට කැමති නොවන්නේ ඇයි? වෙනත් යෞවනයන්ගෙන් ඇතැම් උදවිය ව ඔබ බාල අවදියේ පටන් දැන ගෙන සිටින නිසා ම, ඔබගේ පුරුදුවලට බලපෑම් කිරීමට, ක්‍රිස්තියානි යෞවනයෙකු වශයෙන් ඔබ විසින් සකස් කර ගනිමින් සිටින්නා වූ ගති පැවතුම් නරක් කිරීමට ඔවුන්ට නොහැක කියා මින් අදහස් කරන්නේ නැති බව වටහා ගන්න.—හිතෝපදේශ 2:1, 10-15.

අපගේ ගති පැවතුම් ආරක්ෂා කර ගැනීමට ඒකාන්ත පියවර

21. (අ) ආශ්‍රය සම්බන්ධයෙන් අපට ඇත්තේ කුමන අවශ්‍යතාවය ද? (ආ) ඇතැම් ආශ්‍රයන් අන්තරාදායක විය හැකි බව අපට ස්ථිර විය හැක්කේ මන්ද?

²¹ අප සියලු දෙනාට ම ඇසුර අවශ්‍ය ය. එනමුත්, අපගේ ආශ්‍රිතයන් හොඳට හෝ නරකට අප කෙරෙහි බලපාන්නේ ය යන සැබෑවට අප සාවධාන ව සිටිය යුතු ය. ආදම් සහ ඒව සම්බන්ධ ව ද, එතැන් පටන් සියවස් ගණනාවක් පුරා සෑම කෙනෙකු සම්බන්ධයෙන් ද එය සත්‍යක් බවට ඔප්පු වී තිබේ. නිදසුනක් වශයෙන්, යුදාවේ යහපත් රජෙක් වූ යෙහෝෂාපාට්, යෙහෝවඃ වහන්සේගේ අනුමැතිය හා ආශීර්වාද භුක්ති වින්දේ ය. එහෙත්, ඊශ්‍රායෙලයේ ආහබ් රජුගේ දියණිය ද විවාහ කර ගැනීමට ඔහු තම පුත්‍රයාට අවසර දුන් පසු, යෙහෝෂාපාට් ආහබ් සමඟ ඇසුරු කරන්නට පටන් ගත්තේ ය. එම නරක ආශ්‍රය නිසා යෙහෝෂාපාට්ට තව පොඩ්ඩෙන් තමාගේ ජීවිතයෙන් වන්දි ගෙවීමට තිබුණි. (2 රාජාවලිය 8:16-18; 2 ලේකම් 18:1-3, 29-31) අපත් අපගේ ආශ්‍රිතයන් සම්බන්ධයෙන් අඥාන තේරීම් කළහොත්, එය ඒ හා සමාන ව අන්තරාදායක දෙයක් වන්නට පුළුවන.

22. අපගේ හෘදයට ගත යුත්තේ කුමක් ද, තව ද ඒ මන්ද?

²² එසේ නම්, 1 කොරින්ති 15:33 හි පාවුල් අපට ඉදිරිපත් කරන ප්‍රේමනීය උපදෙස අපි අපගේ හෘදවලට ගනිමු. ඒවා වනාහි අප බොහෝ විට නිතර ම අසා තිබෙන කට පාඩමෙන් යළි යළිත් කියන්නට හැකි නිකම් ම වචන නොවේ. තම කොරින්තිය සහෝදර සහෝදරියන් හට සහ පුළුල් ලෙස අපට ද වූ පියෙකුගේ බඳු පාවුල්ගේ ස්නේහය එයින් පිළිබිඹු වෙයි. තව ද, අපගේ වෑයම් සාර්ථක වීමට අපගේ ස්වර්ගික පියාණන්ට වුවමනා වන නිසා උන් වහන්සේ සපයන උපදෙස් එහි අඩංගු වී තිබෙනවා නොඅනුමාන ය.—1 කොරින්ති 15:58.

[පාදසටහන්වල]

ඔබට මතක ද?

◻ පළමු වෙනි කොරින්ති 15:33 පාවුල් විසින් ලියන ලද්දේ කිනම් විශේෂ හේතුව උදෙසා ද?

◻ රැකියා ස්ථානයේ දී පාවුල්ගේ උපදෙස අපට අදාළ කළ හැක්කේ කෙසේ ද?

◻ අපගේ අසල් වැසියන් සම්බන්ධයෙන් අපට කිනම් සමබර දෘෂ්ටිය තිබිය යුතු ද?

◻ පළමු වෙනි කොරින්ති 15:33 හි උපදෙස විශේෂයෙන් යෞවනයන් හට යෝග්‍ය වන්නේ මන්ද?

[17වන පිටුවේ පින්තූරය]

ශුභාරංචිය ව්‍යාප්ත කිරීම සඳහා පාවුල් තම රැකියා ස්ථානය යොදා ගත්තේ ය

[18වන පිටුවේ පින්තූරය]

ඔබගේ ක්‍රිස්තියානි ගති පැවතුම් නරක් කිරීමට අනෙක් යෞවනයන්ට හැක