සතුට දනවන අවස්ථාවක් 104වන ගිලියද් පංතියේ උපාධි ප්‍රදානය
“මේක සතුටු දවසක්; අපි සියලුදෙනාම ප්‍රීතියෙනුයි ඉන්නේ.” යෙහෝවාගේ සාක්ෂිකරුවන්ගේ පාලක මණ්ඩලයේ සාමාජිකයෙකු වන කේරි බාබ’ 1998 මාර්තු 14වනදා ගිලියද් මුරටැඹ බයිබල් පාසැලේ 104වන පංතියේ උපාධි ප්‍රදානෝත්සවය ආරම්භ කළේ එම වදන් සමඟිනුයි. “සතුටු ගීයක්” යන මැයින් යුත් රාජ්‍ය ගීතිකා අංක 208 ගායනා කිරීමෙන් එම අවස්ථාව ආරම්භ කිරීමට 4,945දෙනාගෙන් යුත් ශ්‍රාවක පිරිසට ආරාධනා කරනු ලැබුවා.
සතුටින් සිටීමට ප්‍රායෝගික උපදෙස්
උපාධි ප්‍රදාන දිනය පුරා පැවති ප්‍රීතිමත් ස්වභාවය දිගටම පවත්වාගන්න ආකාරය පිළිබඳව ප්‍රායෝගික උපදෙස්, වැඩසටහනේ ප්‍රාරම්භක කොටසින්, එනම් කෙටි මෙන්ම බයිබලය මත පදනම් කතා පහකින් යුත් කතාමාලාවකින් සැපයෙව්වා.
මුල්ම කතාව ඉදිරිපත් කළේ ලේඛක අංශයේ ජෝසෆ් ඊම්ස්. ඔහුගේ තේමාව “පක්ෂපාත අයගේ ස්වභාවය අනුකරණය කරන්න” යන්නයි. එය පදනම් වී තිබුණේ දාවිත්ගේ පුත්‍ර අබ්සලොම් කැරැල්ලක් දියත් කිරීමෙන්, තම පියාට දෙවි දුන් රාජ්‍යය උදුරාගැනීමට කුමන්ත්‍රණය කළ ආකාරය විස්තර කරන 2 සාමුවෙල් 15 සහ 17වන පරිච්ඡේදවල සඳහන් බයිබල් වාර්තාව මතයි. කෙසේවෙතත්, යෙහෝවාගේ අභිෂේක ලත් තැනැත්තා වූ දාවිත් රජට පක්ෂපාතව සිටි පිරිසකුත් සිටියා. මෙයින් අලුත් මිෂනාරිවරුන්ට උගත හැකි පාඩම කුමක්ද? සහෝදර ඊම්ස් මෙසේ කියමින් නිහඬ වුණා: “ඔබේ මිෂනාරි පැවරුමේදී ඔබ කොහේ ගියත්, සහයෝගය දැක්වීමේ ස්වභාවයකුයි දිව්‍යාණ්ඩු අධිකාරය සඳහා ගෞරවයකුයි පක්ෂපාතව වර්ධනය කරන්න බලන්න. වෙනත් අයටත් එසේ කරන්න උපකාර කරන්න.”
වැඩසටහනේ ඊළඟට සිටියේ ඩේවිඩ් සින්ක්ලැයා. ගීතාවලිය 15හි සඳහන් ‘යෙහෝවාගේ මණ්ඩපයේ’ අමුත්තන් වීම සඳහා තිබෙන අවශ්‍යතා දහය ඔහු විස්තර කළා. “ඔබේ මිෂනාරි මණ්ඩපයෙහි අමුත්තන් හැටියට දිගටම සිටින්න” යන මැයින් යුත් ඔහුගේ කතාව, උපාධි ලැබූ ශිෂ්‍යයන්ට දිරිගැන්වූයේ ඔවුන් අමුත්තන් වශයෙන් පෙනී සිටින ඔවුන්ගේ මිෂනාරි පැවරුම්වලදී මෙම ගීතිකාව ඔවුන්ගේ පැවරුමට අදාළ කරගන්න කියායි. හැම අවස්ථාවකදීම දේව ප්‍රමිතිවලට අනුව ජීවත් වීමේ වැදගත්කම සහෝදර සින්ක්ලැයා කැපීපෙනෙන්න සැලැස්සුවා. ප්‍රතිඵලය කුමක්ද? “මෙසේ කරන තැනැත්තේ කිසි කලෙකත් නොසෙල්වන්නේය” කියා ගීතාවලිය 15:5 කියයි.
ඉන්පසුව, පාලක මණ්ඩලයේ සාමාජික ජොන් බා, ක්‍රිස්තියානි රැස්වීම්වලදී ගීතිකා ගැයීමෙන් අත් වන ප්‍රාණවත් කරවන බලපෑමට අවධානය දුන්නා. එනමුත් අදදින ලෝ වටා ගායනා කෙරෙන ප්‍රීතිමත්ම ගීතිකාව කුමක්ද? ඒ තමයි දෙවිගේ මෙසියානු රාජ්‍යය පිළිබඳ ශුභාරංචිය. රාජ්‍යය පිළිබඳ මෙම ගීතිකා ගැයීමෙන් හෝ දේශනා කිරීමෙන් අත් වන ප්‍රතිඵල මොනවාද? ගීතිකා අංක 208හි දෙවන පදය සංක්ෂිප්තව එය මෙසේ පැහැදිලි කරයි: “දේශනයෙන් හා උගැනුමෙන්ද බොහෝ දනා හැරේ යෙහෝවාට. ලොව වටේට යති මොවුන්ද සතුටු ගීතය ගයන්නට.” ඔව්, දිනපතා අලුත් ගෝලයන් 1,000ක් පමණ බව්තීස්ම කරනු ලබනවා. සහෝදර බා අන්තිමට මෙසේ පැවසුවා: “සහෝදරයෙනි, ඔබව යවන්නේ ඔබේ ප්‍රශංසාවේ ගීතිකාව අහන්න ඉතා ඕනෑකමින් බලා සිටින පුද්ගලයන් ඉන්න බලප්‍රදේශවලට කියලා හිතන කොට, ඔයගොල්ලන්ට සන්තෝෂයක් ඇති වන්නේ නැද්ද?”
ලේඛක අංශයේ ජේම්ස් මැන්ට්ස් ඊළඟට ඉදිරිපත් කළ කතාවේ මාතෘකාව “අද්දැකීම්ලද්දවුන්ගේ හඬට සවන් දෙන්න” යන්නයි. ඇතැම් දේවල් පෞද්ගලික අද්දැකීමෙන්ම පමණක් ඉගෙනගත හැකි බව ඔහු පෙන්නුම් කළා. (හෙබ්‍රෙව් 5:8) කෙසේවෙතත්, ‘අපේ කන නමා ප්‍රඥාවන්තයන්ගේ’ නොහොත් අද්දැකීම් ලබා ඇති අයගේ ‘බස් අසන්න’ කියා හිතෝපදේශ 22:17 අපට දිරිගන්වයි. උපාධි ලබන ශිෂ්‍යයන්ට, තමන්ට කලින් ගොස් ඇති මිෂනාරිවරුන්ගෙන් බොහෝ දේ ඉගෙනගත හැකියි. “දේශීය කඩ සාප්පු වෙළෙන්දන්ගෙන් කේවල් කරන විදිහත්, ජීවිතයට හෝ සදාචාරයට අනතුරක් වන නිසා නගරයේ මඟහැරිය යුතු ප්‍රදේශ මොනවාද කියාත්, දේශීය ජනයාගේ සිත් රිදෙන්නේ මොන මොන දේවලින්ද කියාත් ඔවුන් දන්නවා. ඔබේ මිෂනාරි පැවරුම තුළ සතුටින් සිටින්න සහ සාර්ථකව කටයුතු කරන්න මොනවාද අවශ්‍ය වන්නේ කියන එක දිගු කාලයක් මිෂනාරි සේවයෙහි ඉඳ ඇති අය හොඳින් දන්නවා” කියා සහෝදර මැන්ට්ස් පැවසුවා.
ගිලියද් පාසැලේ රෙජිස්ට්‍රාර් ලේකම් වන වොලස් ලිවරන්ස්, “ඔබේ දිව්‍යාණ්ඩු පැවරුම අගය කරන්න” යන තේමාවට අනුව කතා කළා. ප්‍රේරිත පාවුල්, තිමෝති සහ බාර්ණබස් වැනි ඇතැම් මිෂනාරිවරුන් ශුද්ධාත්මයෙන් නැතහොත් වෙනයම් ආශ්චර්යවත් විදහාපෙන්වීමක් තුළින් දෙවිගෙන් තම පැවරුම් ලැබුවත්, ගිලියද් මිෂනාරිවරුන්ට ලෝක ක්ෂේත්‍රයෙහි ස්ථානයක් පවරා ඇත්තේ “විශ්වාසවූ නුවණ ඇති දාසයා” මාර්ගයෙනි. (මතෙව් 24:45-47) ඔහු මිෂනාරිවරුන්ගේ පැවරුම්, මිදියන්වරුන් සමඟ සටන් කිරීමට සිටි තම සෙබළුන් සඳහා ගිඩියොන් පැවරූ ස්ථාන හා සැසඳුවා. (විනිශ්චයකාරයන් 7:16-21) සහෝදර ලිවරන්ස් මෙසේ උනන්දු කළා: “ඔබේ දිව්‍යාණ්ඩු මිෂනාරි පැවරුම අගය කරන්න. ගිඩියොන්ගේ සෙබළුන් ‘එකිනෙකා තම තමාගේ ස්ථානයෙහි සිටියාක්’ මෙන්, ඔබේ පැවරුම ඔබ සිටිය යුතු ස්ථානය හැටියට සලකන්න. යෙහෝවා ගිඩියොන්ගේ තුන්සියදෙනාව පාවිච්චි කළා වගේ, ඔබවත් පාවිච්චි කරන්න පුළුවන් කියන විශ්වාසය ඇති කරගන්න.”
පුද්ගලයන් ගැන සැලකිලිමත් වීමේ ප්‍රතිඵලය සතුට
මුරටැඹෙහි (ඉංග්‍රීසියෙන්) වරක් මෙම අදහස් පළ වුණා: “කිසිම කල්පවතින ස්වභාවයක් නැති, මෙම වර්තමාන පිළිවෙළේ නිෂ්පාදන සහ අලුත් ආම්පන්න වටා අපේ මනාපයන් සහ ජීවිත ගොඩනංවන්නේ නැතුව, අපි පුද්ගලයන් කෙරෙහි සැබෑ උනන්දුවක් දක්වා, අනුන් සඳහා දේවල් කිරීමෙන් සැබෑ ප්‍රීතියක් ලබාගැනීමට ඉගෙනගැනීම වඩාත් හොඳ මෙන්ම ප්‍රඥාවන්ත දෙයක්.” මෙම කාරණයට එකඟව, ගිලියද් පාසැල් උපදේශකයෙකු වන සහෝදර මාක් නූමැර් ශිෂ්‍යයන් කණ්ඩායමක් සමඟ ක්ෂේත්‍රයේදී ඔවුන් ලැබූ අද්දැකීම් සාකච්ඡා කරමින් මෙම අදහස දැක්වූවා: “ඔබ හොඳ මිෂනාරිවරයෙක් වෙන්නේ අනුන් කෙරෙහි පෞද්ගලික උනන්දුවක් දැක්වූවොත් විතරයි.”
විදේශීය ක්ෂේත්‍රයෙහි සතුටට යතුරු
මිෂනාරි වැඩයෙහි සාර්ථකත්වයට සහ සතුටට දොර විවෘත කරන ඇතැම් යතුරු මොනවාද? සේවා අංශයේ සහෝදර චාල්ස් වූඩි සහ ඉගැන්වීමේ කමිටුවට සහාය වන කලින් ලතින් අමෙරිකාවේ මිෂනාරිවරයෙකුව සිටි හැරල්ඩ් ජැක්සන්, ශාඛා කාර්යාලවල සහෝදරයන් සඳහා පැවති පාසැලේ නවවන පංතියට පැමිණි විවිධ ශාඛා කමිටුවල සාමාජිකයන්ව සම්මුඛ සාකච්ඡාවකට කැඳෙව්වා. ඔවුන් දුන් උපදෙස් සමහරක් මෙන්න:
සැම්බියාවේ ඇල්බට් මූසෝන්ඩාගේ නිරීක්ෂණය: “සහෝදරයන් ළඟට ගොස් ආයුබෝවන් කියා අමතන්න මිෂනාරිවරුන් මුල් පියවර ගන්නා විට, සහෝදරයන් සහ මිෂනාරිවරුන් අතර සම්බන්ධය කිට්ටු වන නිසා, ඔවුන් අතර වර්ධනය ගෙන දෙන හැඟීමක් ජනිත වෙනවා.”
මිත්‍රශීලී මිනිසුන් අලුත් මිෂනාරිවරුන්ට බොන්න යමක් පිළිගැන්වූ විට, කාරුණික සහ උපායශීලී ආකාරයකින් මෙසේ පිළිතුරු දෙන්න කියා ග්වාටමාලාහි රෝලාන්ඩෝ මෝරාලෙස් යෝජනා කළා: “මං මේ රටට අලුතෙනුයි ඇවිල්ලා ඉන්නේ. මට ආසයි බොන්න, නමුත් ඔයගොල්ලන්ගේ ශරීරවලට තියෙන ඔරොත්තු දීමේ ශක්තිය මට නැහැ. කවදාහරි ඒක පිළිගන්න පුළුවන් වෙයි කියලා මං බලාපොරොත්තු වෙනවා. එතකොට මං සතුටෙන් ඒක පිළිගන්නං.” එවැනි පිළිතුරක ප්‍රයෝජන මොනවාද? “එතකොට මිනිසුන් තුළ අමනාපයක් ඇති වෙන්නෙත් නැහැ, ඒවගේම මිෂනාරිවරුන් ඔවුන් එක්ක කටයුතු කරලා තියෙන්නෙත් කාරුණිකවයි.”
තම පැවරුම්වලදී විඳදරාගැනීමට මිෂනාරිවරුන්ට උපකාර කළ හැක්කේ කුමක්ද? පසුගිය අවුරුදු 12 පුරා ලයිබීරියාවේ සේවය කර ඇති, ගිලියද්හි 79වන පංතියේ උපාධිලාභියෙකු වන සහෝදර පෝල් කෲඩස් මෙම නිරීක්ෂණය දුන්නා: “දෙමාපියන්ට තම දරුවන් නැති පාළුව දැනෙන එක ඇත්තයි කියලා මම දන්නවා. ඒත්, රටට, පරිසරයට, සංස්කෘතියට වගේම මිනිසුන්ට හුරු වෙන්න මිෂනාරිවරයෙක් උත්සාහ කරමින් ඉන්න කාලපරිච්ඡේදයක් තියෙනවා. ආපහු ගෙදර යන්න ඔහුට හිතෙන්න පුළුවන්. ‘ඔයා නැතුව ගොඩාක් පාළුයි; ඔයා නැතුව ඉන්නේ කොහොමද කියන එක හිතාගන්නවත් බැහැ’ කියලා ලිපියක් ඔහුට ලැබුණොත්, ගමන් මළු අරගෙන ගෙදර යන්න එකම හේතුව ඒක වෙන්න පුළුවන්. අද මෙහාට ඇවිත් ඉන්න නෑදෑයන් මේ කාරණය මතක තියාගන්න එක වැදගත් වෙනවා.”
සම්මුඛ සාකච්ඡාවලින් පසුව, පාලක මණ්ඩලයේ සාමාජිකයෙකු වන තියඩෝ ජැරැස් විසින් වැඩසටහනේ අවසාන කතාව ඉදිරිපත් කරනු ලැබුවා. ඔහුගේ තේමාව: “ඔබේ ජීවිතයේදී දිගටම රාජ්‍යයට මුල් තැන දෙන්න.” අවධානය නොබිඳ තම කාර්යයෙන් වෙනතකට යොමු නොවී සිටින්න මිෂනාරිවරුන්ට හැක්කේ කෙසේද? රාජ්‍ය කටයුතුවලට දිගටම මුල් තැන දෙන්න ඔවුන්ට උපකාරවත් වන පෞද්ගලික බයිබල් පාඩම සඳහා කාලසටහනක් තබාගන්න කියා ඔහු ඔවුන්ට දිරිගැන්නුවා. ඉන්පසුව ඔහු මෙම කාලෝචිත සිහිගැන්වීම දුන්නා: “සමහර මිෂනාරිවරුන් ඉලෙක්ට්‍රොනික ආම්පන්න, ඊ-මේල් සහ පරිගණක කටයුතුවලට ඇදී ගිහිල්ලා තියෙන නිසා, ඔවුන් පෞද්ගලික පාඩම අතපසු කර තිබෙනවා. ඕනෑම උපකරණයක් පාවිච්චි කරද්දී සමබරව සිටින්නත්, දෙවිගේ වචනය පෞද්ගලිකව අධ්‍යයනය කිරීමට බාධා පැමිණවිය හැකි යමක් වෙනුවෙන් අනවශ්‍ය කාලයක් ගත නොකර ඉන්නත් අප හොඳ සිහියෙන් කටයුතු කළ යුතුයි.”
සහෝදර ජැරැස්ගේ කතාවෙන් පසු, උපාධි ප්‍රදානය කිරීමත්, පංතියෙන් අගය ප්‍රකාශ කිරීමේ ලිපියක් කියවීමත් සිදු කෙරුණා. පංතිය නියෝජනය කළ සහෝදරයා සියලුදෙනාගේ හැඟීම් මෙලෙස ප්‍රකාශ කළා: “තම ගෝලයන්ට නිතැතින්ම තිබෙන්න යන චරිතාංගයක් හැටියට යේසු පෙන්නූ ප්‍රේමයට සාක්ෂියක් අපි අපේ ඇස් පනාපිටම දැක්කා. අපි කොහේ හිටියත්, අපව උසුලන උණුසුම්, ප්‍රේමනීය, මවක් බඳු සංවිධානයක් තිබෙන බව අපට මෙයින් සහතික වුණා. මෙවැනි අනුබලයක් ඇතුව, පොළොවේ සීමාවන් දක්වා යන්න අප ලෑස්තියි.” ගිලියද්හි 104වන පංතියේ සතුටු දනවන උපාධි ප්‍රදාන දවසේ නිමාවට තිබුණේ එවන් හැඟීම් දනවන ස්වභාවයක්.
[24වන පිටුවේ කොටුව]
පංතියේ දත්ත
නියෝජිත රටවල් සංඛ්‍යාව: 9
පැවරුම් ලැබූ රටවල් සංඛ්‍යාව: 16
ශිෂ්‍ය සංඛ්‍යාව: 48
විවාහක යුවළයන්: 24
වයස් සාමාන්‍යය: 33
සත්‍යයෙහි අවුරුදු සාමාන්‍යය: 16
පූර්ණ-කාලීන සේවයෙහි අවුරුදු සාමාන්‍යය: 12
[25වන පිටුවේ පින්තූරය]
ගිලියද් මුරටැඹ බයිබල් පාසැලේ උපාධි ලැබූ 104වන පංතිය
පහත සඳහන් ලැයිස්තුවේ පේළි, ඉදිරියේ සිට පසුපසට අංකනය කර ඇති අතර, එක් එක් පේළියේ වමේ සිට දකුණට නම් ලැයිස්තුගත කර ඇත.
(1) රෝමේරෝ, එම්.; හවත්, ජේ.; බ්ලැක්බ’න්-කේන්, ඩී.; හෝඅ’න්ගාස’, ඊ.; වෙස්ට්, එස්.; ටෝම්, එස්. (2) කෝලෝන්, ඩබ්.; ග්ලැන්සි, ජේ.; කෝනෝ, වයි.; ඩෲස්, පී.; ටාම්, එස්.; කෝනෝ, ටී. (3) ටාම්, ඩී.; සෙෂ්මයිස්ට’, එස්.; ග’ඩෙල්, එස්.; එල්වෙල්, ජේ.; ඩ’නෙක්, පී.; ටිබ’ඩෝ, එච්. (4) ටේල’, ඊ.; හිල්ඩ්‍රඩ්, එල්.; සන්චෙස්, එම්.; ඇන්ඩ’සන්, සී.; බක්න’, ටී.; හෝඅ’න්ගාස’, ඊ. (5) හවත්, ඩී.; වෝඩ්, සී.; හින්ච්, පී.; ම’ක්ඩොනල්ඩ්, වයි.; සන්චෙස්, ටී.; ටෝම්, ඕ. (6) ඩෲස්, ටී.; ටිබ’ඩෝ, ඊ.; එල්වෙල්, ඩී.; ඩ’නෙක්, ඩබ්.; බ්ලැක්බ’න්-කේන්, ඩී.; වෝඩ්, ඩබ්. (7) ඇන්ඩ’සන්, එම්.; සෙෂ්මයිස්ට’, ආර්.; ම’ක්ඩොනල්ඩ්, ආර්.; බක්න’, ආර්.; ග්ලැන්සි, එස්.; ග’ඩෙල්, ජී. (8) රෝමේරෝ, ඩී.; හින්ච්, ආර්.; හිල්ඩ්‍රඩ්, එස්.; ටේල’, ජේ.; කෝලෝන්, ඒ.; වෙස්ට්, ඩබ්.
[26වන පිටුවේ පින්තූරය]
104වන පංතියේදී ඉගැන්වීමට හවුල් වූ සහෝදරයෝ. (වමේ සිට) ඩබ්. ලිවරන්ස්, යූ. ග්ලාස්, කේ. ඇඩම්ස්, එම්. නූමැර්