දෙවි අප ගැන සැලකිලිමත්ද?

බොහෝදෙනා පවසන්නේ . . .

▪ “දෙවි උසස් කෙනෙක් නිසා ඔහු මගේ ප්‍රශ්න ගැන හිතන එකක් නැහැ.”

▪ “දෙවි මං ගැන සැලකිලිමත් කියලා මට නම් හිතෙන්නේ නැහැ.”

යේසුස් පැවසුවේ . . .

▪ “ගේ කුරුල්ලන් පස්දෙනෙකු සුළු වටිනාකමක් ඇති කාසි දෙකකට විකුණනවා නොවේද? එහෙත් උන්ගෙන් එකෙකුවත් දෙවි අමතක කරන්නේ නැත. මන්ද ඔබේ සියලු හිසකේ පවා ගණන් කර තිබේ. බිය නොවන්න. ගේ කුරුල්ලන් බොහෝදෙනෙකුට වඩා ඔබ වටින්නහුය.” (ලූක් 12:6, 7) යේසුස් එසේ පැවසුවේ දෙවි අපි ගැන සැලකිලිමත් වන බව ඔහු දන්නා නිසයි.

▪ “‘කුමක් කමුද?’ කියාවත් ‘කුමක් බොමුද?’ කියාවත් ‘කුමක් අඳිමුද?’ කියාවත් කිසිවිටක කනස්සලු නොවන්න. මන්ද අන්‍යජාතීන් මහත් උනන්දුවකින් හඹා යන්නේ මේ සියල්ල පසුපසය. නමුත් මේ සියල්ල ඔබට අවශ්‍ය බව ස්වර්ගයේ සිටින ඔබේ පියාණන් දන්නේය.” (මතෙව් 6:31, 32) යේසුස්ට එසේ පැවසීමට හැකි වුණේ දෙවි අපේ අවශ්‍යතාවන් ගැන සැලකිලිමත් වන බව ඔහු වටහාගෙන තිබුණු නිසයි.

දෙවි අප ගැන සැලකිලිමත් බව බයිබලයේ පැහැදිලිව සඳහන් කර තිබෙනවා. (ගීතාවලිය 55:22; 1 පේතෘස් 5:7) එසේනම් අද අපි මෙතරම් දුක් වේදනාවන්ට මුහුණ දෙන්නේ ඇයි? සියලු බලැති දෙවි ප්‍රේමණීය කෙනෙක් නම් ඔහු දුක් වේදනාවන් නැති කරදැමීමට පියවර නොගන්නේ ඇයි?

අද පොළොවේ මෙතරම් දුක් වේදනා පවතින්නේ යක්ෂයා මේ පොළොව පාලනය කරන නිසයි. අප එය දන්නේ කෙසේද? එක් අවස්ථාවකදී යක්ෂයා යේසුස්ව වරදකට හසු කරගැනීමට උත්සාහ දරමින් ලොව පුරා ඇති රාජ්‍යයන් පෙන්වා ඔහුට මෙසේ පැවසුවා. “මම ඔබට මේවා කෙරෙහි සම්පූර්ණ අධිකාරියද ඒවායේ තේජසද දෙන්නෙමි. මන්ද ඒවා මට දී ඇති හෙයින් මා කැමති කෙනෙකුට ඒවා දෙන්නෙමි.” ඉන් පැහැදිලි වන්නේ යක්ෂයා අද මේ පොළොව පාලනය කරන බවයි.—ලූක් 4:5-7.

මේ ලෝකයේ පාලකයා ලෙස යක්ෂයාව පත් කළේ කවුද? මුල් මිනිස් යුවළ වූ ආදම් සහ ඒව දෙවිට අකීකරු වූ අවස්ථාවේදී ඔවුන් තමන්ගේ පාලකයා ලෙස යක්ෂයාව තෝරාගත්තා. එතැන් පටන් යක්ෂයාට සාර්ථකව පාලනය කළ හැකිද කියා පෙන්වීමට දෙවි ඔහුට යම් කාලයක් පොළොව පාලනය කිරීමට ඉඩ දී තිබෙනවා. ඒ කාලය තුළ දෙවිට සේවය කිරීමට කැමති අය සඳහා දෙවි අවස්ථාව ලබා දී තිබෙනවා. (රෝම 5:10) නමුත් තමන්ට සේවය කරන්න කියා දෙවි කිසිම කෙනෙකුට බල කරන්නේ නැහැ.

යෙහෝවා දෙවි අපි ගැන සැලකිලිමත් වන නිසා යක්ෂයාගේ පාලනයෙන් අපිව මුදවාගැනීමට ඔහු යේසුස් මාර්ගයෙන් පියවර ගෙන තිබෙනවා. බයිබලයේ මෙවැනි පොරොන්දුවක් දී තිබෙන්නේ ඒ නිසයි. යේසුස් ‘මරණය ගෙන ඒමට බලය ඇති තැනැත්තාව එනම්, යක්ෂයාව නැති කර දමන්නේය.’ (හෙබ්‍රෙව් 2:14) ඔහු එසේ කරන්නේ ‘යක්ෂයාගේ ක්‍රියා විනාශ කිරීම සඳහායි.’—1 යොහන් 3:8.

අනාගතයේදී මුළු පොළොවම පාරාදීසයක් වීමට නියමිතයි. ඒ කාලයේදී දෙවි මිනිසුන්ට ලබා දෙන ආශීර්වාද ගැන බයිබලයේ මෙසේ සඳහන් වී තිබෙනවා. දෙවි ‘මිනිසුන්ගේ ඇස්වලින් සෑම කඳුළක්ම පිස දමන්නේය. මරණයද තවත් නොවන්නේය. වැලපීමද හැඬීමද වේදනාවද තවත් නොවන්නේය. පළමු දේවල් පහව ගියේය.’—එළිදරව් 21:4, 5.a

[පාදසටහන]

[8වන පිටුවේ වාක්‍ය කණ්ඩය]

අනාගතයේදී මුළු පොළොවම පාරාදීසයක් වීමට නියමිතයි