ඔබව දැනුවත් කරමින් ක්‍රියාවට පොලඹවන වීඩියෝ පටයක්
මෙය සිදු වූයේ 1951 අප්‍රියෙල් මාසයේදීයි. කලින් සෝවියට් සමූහාණ්ඩුව කියා හැඳින්වූ දේශයේ විසූ යෙහෝවාගේ සාක්ෂිකරුවන්ව පවුල් පිටින් එකතු කරගෙන භාණ්ඩ ප්‍රවාහනය කරන කෝච්චි පෙට්ටිවල පටවා සයිබීරියාවට පිටුවහල් කරන ලදි. බලවත් වූ සෝවියට් ආණ්ඩුව සාක්ෂිකරුවන්ව තම දේශයෙන් නැති කර දැමීමට අධිෂ්ඨාන කරගෙන සිටියේ මන්ද? දශක ගණනාවක් පුරා නොනැවතී පැවතුණු පීඩා රැල්ල හමුවෙහි අපේ සහෝදරයන් විඳදරාගත්තේ කෙසේද? ඔවුන් පීඩා ජයගෙන සමෘද්ධිමත් තත්වයට පැමිණියේ කෙසේද? මේ ප්‍රශ්නවලට උත්තර සෝවියට් දේශයෙහි යෙහෝවාගේ සාක්ෂිකරුවෝ පීඩා මැද විශ්වාසවන්තව නමැති විඩීයෝ පටයෙන් සොයාගත හැකියි. එය නරඹන්න. මුහුණ දීමට සිදු විය හැකි දෙය කුමක් වුවත් යෙහෝවා කෙරෙහි තබා තිබෙන විශ්වාසය රැකගැනීමට ඔබව පෙලඹවීමට එයින් ඉදිරිපත් කෙරෙන දැනුවත් කරවනසුලු තොරතුරුවලට ඉඩහරින්න.
පහත සඳහන් ප්‍රශ්නවලට උත්තර දෙන්න ඔබට පුළුවන්ද? (1) යෙහෝවාගේ සාක්ෂිකරුවන්ව රුසියාවේ මුලින්ම නිල වශයෙන් පිළිගනු ලැබුවේ කවදාද? (2) දෙවන ලෝක මහා යුද්ධයට පෙර හා පසුව සෝවියට් දේශය තුළ පවුල් වශයෙන් සාක්ෂිකරුවන් වැඩි වූයේ කෙසේද? (3) ලෙනින්ගේ දර්ශනය සමඟ සාක්ෂිකරුවන්ගේ විශ්වාසයන් ඍජු ලෙස ගැටුණේ කෙසේද? (4) උතුරු මෙහෙයුම යනු කුමක්ද? එමගින් ස්ටාලින් ඉටු කරගැනීමට බලපාරොත්තු වූයේ කුමක්ද? (5) තමන්ව රටින් පිටුවහල් කිරීම සාක්ෂිකරුවන් සැලකුවේ කෙසේද? පිටුවහල් නොකර සිටීම සඳහා ඔවුන්ට පැවසුවේ කුමක් කරන්න කියාද? (6) සයිබීරියාවට දුම්රියෙන් ගිය දිගු ගමනේදී අපේ සහෝදර සහෝදරියන් එකිනෙකාව දිරිමත් කළේ කෙසේද? ඔවුන්ව අල්ලාගත් අය පුදුමයට පත් වුණේ කෙසේද? (7) සයිබීරියාවේදී සාක්ෂිකරුවන් විඳදරාගත්තේ මොන වගේ දුක්ඛිත තත්වයන්ද? (8) යෙහෝවාගේ සෙනඟ ඉතා අනර්ඝ ලෙස සැලකූ ආත්මික සැපයුම් මොනවාද? එසේ සැලකුවේ මන්ද? (9) තමන්ගේ පොත් පත් වෙනුවෙන් ජීවිත පවා පරදුවට තබන්න අපේ සහෝදරයන් කැමැත්තෙන් සිටියේ මන්ද? ඔවුන්ට පොත් පත් ලැබීම වැළැක්වීම සඳහා බලධාරීන් දැරූ හැම උත්සාහයක්ම ඔවුන් පරාජය කළේ කෙසේද? (10) කෲෂෙව් දෙවිගේ සෙනඟට දිගටම ප්‍රහාර එල්ල කළේ කෙසේද? (11) සාක්ෂිකරුවන්ගේ දරුවන්ගේ ඇදහිල්ල බිඳ දැමීමට බලධාරීන් වෑයම් කළේ කෙසේද? (12) තමන්ට හිංසා පීඩා කිරීමට හේතුව පිළිබඳව අපේ සහෝදරයන්ට තිබුණු පැහැදිලි අවබෝධය කුමක්ද? (2002, වාර්ෂික පොත, (සිංහලෙන් නැත) පිටු 203-4) (13) යොදාගත හැකි සෑම උපක්‍රමයක්ම යොදාගනිමින් දෙවිගේ සංවිධානයට එල්ල කළ ප්‍රහාරවලින් අපේක්ෂා කළ ප්‍රතිපලවලට සම්පූර්ණයෙන්ම වෙනස් ප්‍රතිපලයක් ලැබුණේ කෙසේද? (2002, වාර්ෂික පොත, පිටු 220-1) (14) කලින් සෝවියට් සමූහාණ්ඩුවේ විසූ සාක්ෂිකරුවන්ට කලක් සිහිනයක් මෙන් වූ කුමන දේවල්ද යථාර්ථයක් බවට පත් වූයේ? (15) හිංසා පීඩා විඳදරාගැනීමට අපේ සහෝදරයන්ට උපකාරවත් වූ දේවල් මොනවාද? යෙරමියා 1:19හි සඳහන් වදන්වල සත්‍යතාව වීඩියෝ පටයේ අවසන් දර්ශනය මගින් පැහැදිලි වන්නේ කෙසේද? (16) හිංසා පීඩා යටතේ විශ්වාසවන්තකම රැකගැනීම සම්බන්ධයෙන් තිරගත වූ විශේෂයෙන් ඔබේ සිත්ගත් සැබෑ ජීවිත අද්දැකීමක් ඉදිරිපත් කරන්න.