ජනයා අසන ප්‍රශ්නවලට පිළිතුරු දිය හැකි අයුරු
• ‘ඇයි ඕගොල්ලන් ගෙවල් ගානේ ගිහිල්ලා මිනිසුන්ව ආගම්වලට හරවන්න හදන්නේ?’
මෙසේ පැවසිය හැකියි: ‘අපි ආවේ අපේ ආගමට සාමාජිකයන්ව බන්දගන්න නෙවෙයි, හොඳ ආරංචියක් දෙන්නයි. අපි මෙහෙම එන්නේ බයිබලේ තියෙන අණකට කීකරු වෙන හින්දයි.’ මතෙව් 24:14 කියවන්න.
ඉන්පසු මෙසේ පැවසිය හැකියි: ‘ආගම වෙනස් කරන්නයි කියලා බල කරන එක වැරදි බව අපිත් පිළිගන්නවා. යෙහෝවා දෙවිගේ සාක්ෂිකරුවන් එහෙම කරන්නේ නැහැ. අපි අන්‍ය ආගම්වලට හරවන අය නෙවෙයි. යේසුස්ගේ කාලේ හිටිය ක්‍රිස්තියානි අය කළා වගේ අපි කරන්නේ හැම කෙනාටම ශුභාරංචිය ප්‍රකාශ කරන එකයි. ඒකට සවන් දෙන කෙනාට අයිතියක් තියෙනවා අපි කියන දේ පිළිගන්නවද නැද්ද කියලා තීරණය කරන්න. අපි කියන ශුභාරංචිය ගැන මේ පොතේ තියෙනවා. [නිවැසියාගේ අතට බයිබලයේ ඉගැන්වීම් පොත දී 4-5 දක්වා පිටු පෙන්වන්න.] ඔබ වැඩියෙන්ම කැමති බයිබලයේ තියෙන මේ පොරොන්දුවලින් කොයි එකටද?’
නැත්නම් මෙසේත් පැවසිය හැකියි: ‘ආගමට හැරවීම ගැන කියද්දී මිනිසුන්ගේ හිතේ ඇඳිලා තියෙන්නේ එක ආගමකින් තවත් ආගමකට හැරෙනවා කියන එකයි. නමුත් හැරෙනවා කියන එක ගැන බයිබලයේ තියෙන අදහස ඊට වඩා වෙනස්. ඒකෙන් අදහස් කරන්නේ කෙනෙක් කැමැත්තෙන්ම තමන් හිතන විදිහ දෙවිගේ කැමැත්තට අනුව වෙනස් කරලා ජීවත් වෙන එකයි [රෝම 12:2 කියවන්න.] අපි මෙහෙම එන්නේ, බයිබලයේ උගන්වලා තියෙන්නේ මොනවාද කියලා මිනිසුන්ට දන්වන්නයි. නැණවත් තීරණ ගන්නත් ප්‍රීතිමත් ජීවිතයක් ගත කරන්නත් බයිබල් දැනුම අපට උපකාරවත් වෙනවා. උදාහරණයකට අනාගතය ගැන සැබෑ බලාපොරොත්තුවක් දෙන මේ බයිබල් අනාවැකි ගැන කල්පනා කරන්න.’ බයිබලයේ ඉගැන්වීම් පොතේ 4-5 දක්වා පිටු නිවැසියාට පෙන්වන්න.
• ‘ඕගොල්ලො සල්ලි, ගෙවල්, රස්සාවල් දීලා මිනිසුන්ව ආගමට බන්දගන්නවා!’
මෙසේ පැවසිය හැකියි: ‘නෑ ඒක අල්ලස් දීමක් හා සමානයි. සාක්ෂිකරුවන් කවදාවත් එහෙම කරන්නෑ.’ යෙසායා 33:15 කියවන්න.
ඉන්පසු මෙසේ පැවසිය හැකියි: ‘අපේ අසල්වැසියන්ට අපි දෙන්නේ සල්ලිවලට ගන්න බැරි දෙයක්.’ යොහන් 17:3 කියවන්න.
නැත්නම් මෙසේත් පැවසිය හැකියි: ‘සමහරවිට ඔබ එහෙම කිව්වේ 2004දී සුනාමිය ආපු වෙලාවේ වෙච්ච දේ ගැන හිතලා වෙන්න ඇති. විපත්තිය සිදු වුණ ගමන්ම සහන සේවාවන් සංවිධානය කළ මුල්ම අය අතර යෙහෝවා දෙවිගේ සාක්ෂිකරුවනුත් හිටියා. අපි ඉස්සෙල්ලාම අනිත් සාක්ෂිකරුවන්ට උදව් කළත් සාක්ෂිකරුවන් නොවන අයටත් අපි උදව් කළා. එහෙම කළේ යටි අරමුණක් ඇතුව නෙවෙයි. අපි මිනිසුන්ට උදව් කළේ යේසුස් අපිට කියලා තියෙන දෙයක් නිසයි.’ යොහන් 13:34, 35 කියවන්න.
ඉන්පසු මෙසේ පැවසිය හැකියි: ‘ඇත්තටම අද අපි ඔබේ ගෙදරට ආවේ අපි අසල්වැසියන්ට ප්‍රේම කරන නිසයි. අපි ආවේ බයිබලේ තියෙන සැනසිලිදායක දෙයක් ගැන කියන්නයි.’ ඉන්පසු ඔබේ ඉදිරිපත් කිරීම කරගෙන යන්න.
• ‘ඕක අලුත් ආගමක්! අලුත් ආගම් අපිට ඕනෙ නැහැ!’
මෙසේ පැවසිය හැකියි: ‘අපේ ආගම ලංකාවේ අද ඊයේ පටන්ගත්ත එකක් නෙවෙයි. මේ අවුරුද්ද 100වෙනි අවුරුද්දයි. දැනට රට පුරා අපේ සභා 80කට වඩා තියෙනවා.’
ඉන්පසු මෙසේ පැවසිය හැකියි: ‘සැබෑ දෙවි වන යෙහෝවාගේ සාක්ෂිකරුවෝ ඉතිහාසය පුරාම ඉඳලා තියෙනවා. බයිබලේ කියන විදිහට වසර දහස් ගණනකට කලින් හිටිය විශ්වාසවන්ත ආබෙල් පවා සාක්ෂිකරුවෙක්. [හෙබ්‍රෙව් 11:4, 12:1 කියවන්න.] දැන් ලොව පුරා යෙහෝවා දෙවිගේ සාක්ෂිකරුවන් මිලියන හතකට වඩා වැඩිදෙනෙක් රටවල් 236ක මේ විදිහට සේවය කරනවා. අපි ගෙයින් ගෙට ශුභාරංචිය ප්‍රකාශ කරන්නේ ඇයි කියලා කවුරු හරි ඔබට විස්තර කරලා තියෙනවද?’ මතෙව් 24:14 කියවා දේවරාජ්‍යය ගැන පැහැදිලි කරන්න.—බයිබල් විෂයන් 28අ යටතේ තිබෙන අමතර යෝජනා බලන්න.
• ‘ඕගොල්ලන්ගේ නායකයා කවුද?’
මෙසේ පැවසිය හැකියි: ‘අපේ නායකයා කවුද කියලා මේ බයිබල් පදයේ කියලා තියෙනවා.’ මතෙව් 23:10 කියවන්න.
ඉන්පසු මෙසේ පැවසිය හැකියි: ‘අපි ආවේ යේසුස් ඔහුගේ අනුගාමිකයන්ට දුන්න මේ උපදෙස නිසයි. [මතෙව් 24:14 කියවන්න.] දේවරාජ්‍යය ගැන ආරංචිය ‘ශුභාරංචියක්’ කියලා අපි කියන්නේ ඒ රාජ්‍යය නිසා මිනිසුන්ටත් මේ පොළොවටත් ලැබෙන ප්‍රයෝජන නිසයි.’ බයිබලයේ ඉගැන්වීම් පොතේ 4-5 දක්වා පිටු නිවැසියාට පෙන්වන්න.
• ‘ඔය ආගමේ ස්වාමිලා හරි පාස්ටර්ලා හරි ඉන්නවද?’
මෙසේ පැවසිය හැකියි: ‘සාක්ෂිකරුවන් අතරේ බයිබලයෙන් උපදෙස් හා මඟ පෙන්වීම් ලබා දෙන අය ඉන්නවා. ඔවුන්ගේ සේවයට ගෙවන්නෙවත් ඔවුන්ට විශේෂ පදවි නම් දීලවත් නැහැ. හැබැයි යෙහෝවා දෙවිගේ සාක්ෂිකරුවන් හැමෝම දේවගැතිවරුන්. ඒ නිසා ගෙයින් ගෙට ගිහින් බයිබලයේ තියෙන දේවල් ගැන අනිත් අයත් එක්ක කතා කරනවා.’
ඉන්පසු මෙසේ පැවසිය හැකියි: ‘අපි දේවසේවයේ යන්නේ යේසුස්ව ආදර්ශයට ගන්න හින්දයි.’ ලූක් 8:1 කියවා, දේවරාජ්‍යය කියන්නේ මොකක්ද කියලා පැහැදිලි කරන්න.
• ‘යෙහෝවා දෙවිගේ සාක්ෂිකරුවන් සහ වෙනත් ක්‍රිස්තියානි ආගම් අතර තියෙන වෙනස මොකක්ද?’
මෙසේ පැවසිය හැකියි: ‘යෙහෝවා දෙවිගේ සාක්ෂිකරුවන් කතෝලික පල්ලියටවත් කිසිම රෙපරමාදු ආගමකටවත් සම්බන්ධ නැහැ. අපේ විශ්වාසයන් ගොඩ නැඟිලා තියෙන්නේ මිනිසුන්ගේ සම්ප්‍රදායන් මත නෙවෙයි. අපේ හැම විශ්වාසයක්ම ගොඩ නැඟිලා තියෙන්නේ බයිබලය මතයි.’—බයිබලයේ ඉගැන්වීම් පොතේ 147වන පිටුවේ තිබෙන අමතර යෝජනා බලන්න.
ඉන්පසු මෙසේ පැවසිය හැකියි: ‘උදාහරණයකට හුඟක් පල්ලිවල උගන්වන්නේ පොළොව ගින්නෙන් විනාශ වෙනවා කියලයි. ඒත් බයිබලයේ කියන දේ බලන්න.’ බයිබලයේ ඉගැන්වීම් පොතේ 4-5 දක්වා පිටුවලට හරවන්න.
• ‘ඕගොල්ලෝ මේක කරන්නේ විදේශ ආධාර ලැබෙන නිසා!’
මෙසේ පැවසිය හැකියි: ‘ගෙයින් ගෙට යන්නවත් බයිබල් පොත් පත් බෙදන්නවත් යෙහෝවා දෙවිගේ සාක්ෂිකරුවන්ට ගෙවන්නේ නැහැ. අපේ සේවයට විදේශ ආණ්ඩුවලින් ආධාර ලැබෙන්නෙත් නැහැ. යේසුස්ගේ කාලේ හිටපු ක්‍රිස්තියානීන්ට වගේ අදත් අපට ආධාර ලැබෙන්නේ කැමැත්තෙන් දෙන සම්මාදම්වලිනුයි. අපේ ආගමික මධ්‍යස්ථානවල මුදල් එකතු කරන්නෙවත් මුදල් ඉල්ලා සිටින්නෙවත් නැහැ.’
ඉන්පසු මෙසේ පැවසිය හැකියි: ‘අපි මෙහෙම එන්නේ බයිබලයේ කියන දෙයක් නිසයි.’ මතෙව් 24:14 කියවා දේවරාජ්‍යය ගැන පැහැදිලි කරන්න.
• ‘සුරුවම්, පිළිම කඩලා දාන්න කියලා බයිබලේ උගන්වලා තියෙනවා නේද?’
මෙසේ පැවසිය හැකියි: ‘අනිත් අයගේ නමස්කාර පිළිවෙත්වලට බාධා කරන්න කියලා ක්‍රිස්තියානීන්ට අණ කරලා නැහැ. සුරුවම්වලට, පිළිමවලට අපි නමස්කාර කරන්නැති එක ඇත්තයි. හැබැයි අනිත් අයත් ඒ දේම කරන්න ඕනෙ කියලා අපි බල කරන්නෙ නැහැ. හැම කෙනෙකුටම තමන්ගේ ආගම තෝරගන්න තියෙන අයිතියට අපි ගරු කරනවා.’
නැත්නම් මෙසේත් පැවසිය හැකියි: ‘ඔබ එහෙම කියන්නේ මෝසෙස්ට දුන්නු මේ අණ නිසා වෙන්නැති. [ද්විතීය කතාව 7:5 කියවන්න.] ඒක යම් කාලෙකට විතරක් සීමා වුණු අණක්. මේ කාලෙදී එහෙම කරන්න කියලා අපිට අණ කරලා නැහැ.’
ඉන්පසු මෙසේ පැවසිය හැකියි: ‘අපිට වෙන වෙන ආගම් තිබුණත් අපි හැමෝම කැමතියි ප්‍රීතිමත් පවුල් ජීවිතයක් ගත කරන්න. (හෝ යුද්ධ හා දුක් වේදනා නැති වෙනවා දකින්න. හෝ හානිකර දේවලින් අපේ දරුවන්ව ආරක්ෂා කරගන්න.)’ ඉන්පසු දිගටම සාකච්ඡාව කරගෙන යන්න.