යෞවනයන් අසති . . .
අපට පදිංචිය වෙනස් කිරීමට සිදුවන්නේ මන්ද?
ඔබ පාසලෙන් නිවස කරා පැමිණෙන්නේ සති අන්තය සඳහා සැලසුම් බොහොමයක් ඇතිවය—එනම් මුහුදු වෙරළේ දවස ගත කිරීමට, පන්දු ක්‍රීඩාවක යෙදීමට, අතපසු වූ යම් කිසිවක් කියවීමට නිසංසල සැඳෑවක් ගත කිරීමට සිතාගෙනය. එහෙත් අම්මා වැඩ ඇරී ගෙදර පැමිණෙන විට, කුමක් හෝ අශුභ දෙයක් සිදුව ඇතැයි ඇගේ මුහුණෙන් කියාපායි. ‘රැකියා ස්ථාන මාරුවක් ලබාගන්නවාද නැත්නම් අස්වෙනවාද කියා තෝරගන්න යයි ඔවුන් අද මට කිව්වා,’ යයි ඇය පවසන්නීය. ‘අපට පදිංචිය වෙනස් කරන්න සිදුවන බවයි පෙනෙන්නට තිබෙන්නේ.’ හදිසියේම ඔබව අධෛර්යට පත්වේ.
ඔබේ පවුල පදිංචිය වෙනස් කිරීමට ආසන්නව සිටී නම්, ඔබ තනි වී නැත. ඇතැම් කාර්මික රටවල, බොහෝ පවුල් සඳහා පදිංචිය වෙනස් කිරීම ජීවිතයේ සාමාන්‍ය දෙයක් බවට පත්ව ඇත. උදාහරණයක් වශයෙන්, එක්සත් ජනපදයේ, සාමාන්‍ය අමෙරිකානුවෙකු සිය ජීවිත කාලයේදී 12ස් වතාවක් පදිංචි ස්ථාන මාරුකරන බවට ගණන් බලා ඇත. ඇයි, සෑම වර්ෂයකම අමෙරිකානු යෞවනයන් මිලියන 12ක් පමණ පදිංචිය වෙනස් කිරීමේ බලපෑම්වලට යටත් වෙනවනේ! එහෙත්, ඔබේ පවුලට පදිංචිය වෙනස් කිරීමට සිදුවන විට, එවන් සංඛ්‍යා ලේඛනයන්ගෙන් ලැබෙනවා විය හැක්කේ සුළු සහනයකි. මෙම අපේක්ෂාව මගින් ඇත්තෙන්ම ඔබව සිත්තැවුලකට පත් විය හැක. ‘අපට පදිංචිය වෙනස් කිරීමට සිදුවන්නේ මන්ද’ යයි ඔබ මහත් ශෝකයෙන් ඇසිය හැක.
පදිංචිය වෙනස් කරමින් සිටින පවුල්
බොහෝවිට මෙම කාරණය සම්බන්ධයෙන් පවුලකට තේරීමක් කරන්නට නොහැකි තරම්ය. බයිබල් කාලවලදී සාගතයක් මගින් ඉශ්‍රායලය පාළු තත්ත්වයකට පත්වූ විට එලීමෙලෙක්ගේ හා නායොමිගේ පවුලට, අසල රටක් වන මෝවබ්ට පළා යෑමට අනිවාර්යයෙන්ම සිදුවිය. (රූත් 1:1, 2) අදදින බොහෝ දෙමව්පියන්ට එවැනිම අසීරුතාවන්ට මුහුණ දීමට සිදුවේ. සංවර්ධනය වෙමින් පවතින රටවල, මිලියන සංඛ්‍යාතයකට නියඟය හා පරිසරය නොසලකා හැරීම නිසා ජනාකීර්ණ නගරවලට හා සහනදායි මධ්‍යස්ථානවලට—නැතහොත් වෙනත් රටවලට පදිංචිය සඳහා යෑමට අනිවාර්යයෙන්ම සිදුව ඇත. බටහිර රටවල, ආර්ථික පසුබෑම හේතුවෙන් අසංඛ්‍යාත කර්මාන්ත ශාලා හා ව්‍යාපාරයන් වසා දැමීමට සලස්වා ඇත. කලක සශ්‍රීකව තිබූ ගොවිබිම් ලාභ ලැබිය නොහැකි තත්ත්වයකට පත්ව තිබේ. රැකියා සොයාගැනීම දුර්ලභ වී තිබේ. එබැවින් ඔබේ දෙමව්පියන්ට වඩාත් සමෘද්ධිමත් ප්‍රදේශයකට යනවා හැරෙන්න, වෙනත් තේරීමක් කළ නොහැකිවා විය හැක.
කෙසේවුවද, සියලු පවුල් පදිංචිය වෙනස් කරන්නේ දුගීබවෙන් පලා යෑමට නොවේ. රැකියා උසස්වීම්, දෙමව්පියෙකුගේ රැකියා ස්ථානය වෙනස්වීම, විවාහය බිඳවැටීම, දුර්වල සෞඛ්‍යය තත්ත්වයක්, දරුණු දේශගුණය—යනාදි මේ සියල්ල ඇතැම් පවුල්වලට පදිංචිය වෙනස් කිරීමට පොදු හේතූන් වේ. සමාජ විද්‍යාඥ ජෝන් ඩී. කසාර්ඩ වෙනත් ජනප්‍රිය හේතුවක් සඳහන් කරයි: “අදදින නගර වඩාත් අනතුරුදායක බවට වැටහීමක් තිබේ. විශේෂයෙන්ම, මත්ද්‍රව්‍ය, පුද්ගලයන්ට හා දේපොළවලට අපරාධ සිදු කිරීමේ ශීඝ්‍ර වැඩි වීමකට තුඩු දී ඇත.” නගරාසන්න ප්‍රදේශයක හෝ කුඩා නගරයක ජීවත්වීම වඩාත් ආරක්ෂා සහිත යයි ඇතැමෙකුට හැඟෙන්නට පුළුවන.
බයිබල් කාලවලදී, දෙවියන්වහන්සේගේ කටයුතුවල නියැලෙනු වස් ආබ්‍රහම් ඌර්හි පිහිටි සිය සැපපහසු නිවසේ සිට වෙනත් තැනකට සිය පදිංචිය වෙනස් කළේය. (උත්පත්ති 12:1; හෙබ්‍රෙව් 11:8) එලෙසම අදදින, යෙහෝවඃවහන්සේගේ සාක්ෂිකරුවන් අතරින් ඇතැම් පවුල්, රාජ්‍යය පණිවුඩය පිළිබඳ තව බොහෝ දේශනාකරුවන් සඳහා අවශ්‍යතාව ඇති ප්‍රදේශ කරා පදිංචියට ගොස් ඇත. (මතෙව් 24:14) වෙනත් අය, අවේක්ෂකයන් හෝ උපස්ථායක සේවකයන් සඳහා අවශ්‍යතාවක් ඇති යාබද සභාවකට යෑමට පටන්ගෙන ඇත. එවැනි වෙනස් කිරීමකට පදිංචිය වෙනස් කිරීම ඇතුළත්ව නොතිබිය හැකි අතර, ඉන් අදහස් කරන්නේ අලුත් සෙනඟ කාණ්ඩයකට අනුව හා තත්ත්වයන්ට අනුව හැඩගැසීමට සිදුවන බවයි.
පදිංචිය වෙනස් කිරීමට ඔබේ පවුලට සිදුවීමේ හේතුව කුමක් වුවත්, සමහර විට එය ඔබේ අදහසව නොතිබුණා විය හැක. ඔබ ඒ ගැන මුළුමනින්ම සතුටු නොවන්නටද පුළුවන් බව තේරුම්ගත හැකියි.
අස්ථිර හැඟීම්
සෑම පදිංචිය වෙනස් කිරීමක්ම අමිහිරියි කියනවා නොවේ. දොළොස් හැවිරිදි ජස්ටින්, මහා නගරයේ තිබූ සිය පෙර නිවස ගැන මතකයට නගන විට මුහුණ පුලුටු කරගනියි. “ඒ ගැන කියන කොටත් භය හිතෙනවා,” යයි ඔහු පවසයි. “අපගේ අවට ප්‍රදේශයෙහි ගොඩක් ප්‍රචණ්ඩ ක්‍රියා සිදුවුණා. ගැවසෙන කල්ලි ගැන කරදර නොවී නිවසෙන් යාර 50ක්වත් යන්න හැකිව තිබුණේ නෑ. මිනිසුන්ට ඉන්න වුණේ ඔවුන්ගේ ගෙවල්වල අගුලුලාගෙනයි. මට එය එපාවෙලා තිබුණේ. අප ගම් පළාතකට යන බව මට දැනගන්නට ලැබුණු විට, මට කියා නිම කළ නොහැකි සතුටක් ඇති වුණා.”
කෙසේනමුත්, ඔබේ මිතුරන්ව හා හුරුපුරුදු වටාපිටාවන් අත්හැර යෑමට සිදුවනවා යන සිතුවිල්ල ඔබ තුළ අස්ථිර හැඟීම් ඇති කළ හැක. තම පවුලේ පදිංචිය වෙනස් කිරීමට යන බව යෞවන ඇනීටා දැනගත් විට ඇයට එවැනි හැඟීම් ඇති විය. “මම මගේ ජීවිතයෙන් වැඩි කලක් ජීවත් වී තිබුණේ එංගලන්තයේ පිහිටි එ.ජ. යුද හමුදා කඳවුරක,” යයි ඇය සිහියට නඟන්නීය. “මට ඇත්තෙන්ම හැඟුණේ මා අමෙරිකානුවෙකුට වඩා බ්‍රිතාන්‍යයෙකු කියායි. මට වයස දහය වූ විට, මගේ තාත්තාව නැවත එක්සත් ජනපදයට, එනම් නව මෙක්සිකෝවට මාරුකර තිබෙන බව මට දැනගන්නට ලැබුණා—එය කාන්තාරයකි! මුලින් මට කිසිවක් සිතා ගන්නට බැරි වුණා. මා උනන්දුවෙන් කැළඹී සිටි නමුත් සැකද පහළ වී තිබුණා. මගේ මිතුරන්ව දමා යෑමට මා තුළ කැමැත්තක් තිබුණේ නෑ. එය පදිංචිය මාරු කිරීමේ අමාරුම දෙය වුණා.”
පදිංචිය වෙනස් කිරීම වෙහෙසකාරී වීමට හේතුව
අදදින, පදිංචිය වෙනස් කිරීමේ වෙහෙසකාරී තත්ත්වයන්ට විශේෂයෙන්ම යෞවනයන් ගොදුරුවන බව පෙනෙන්නට තිබේ. රීඩර්’ස් ඩයිජෙස්ට් මෙසේ සඳහන් කරයි: “පදිංචිය වෙනස් කිරීමෙහි හොඳ පැත්තක් පෙනෙන්නට තිබියදී පවා, එය වෙන්වී යෑමේ පීඩාකාරී වූ චිත්ත වේගීය සන්තාපය ඇති කරන අද්දැකීමක් බව මානසික-සෞඛ්‍යය පිළිබඳ ප්‍රවීණයෝ අපට පවසති.”
එක් දෙයක් නම්, පදිංචිය වෙනස් කිරීම නිසා උනන්දුවෙන් කැළඹී සිටීම හා අපේක්ෂා සහිත හැඟීම්ම වෙහෙසකාරී දෙයකි. වැළැක්විය නොහැකි ප්‍රමාදයන් හා පසුබැසීම්, ආතතිය තවත් වැඩි කරන ඉන්ධන විය හැක. බයිබලය මෙසේ පවසයි: “පැතූ දේ ප්‍රමාදවීමෙන් සිත [හෘදය, NW ] කලකිරෙන්නේය;” (හිතෝපදේශ 13:12) සෑම දෙනෙකුම ආශාවෙන් ඒ ගැන බලා සිටින විට පවා, “පදිංචිය වෙනස් කිරීම සම්බන්ධයෙන් පවුලේ සාමාජිකයන් තුළ සැලකිය යුතු කනගාටුවක් හා කාන්සාවක් ඉපදිය හැකියි,” යනුවෙන් පේරන්ට්ස් සඟරාව පවසයි. “මෙසේ වන්නේ මන්දයත් සමුගැනීමේ ක්‍රියාව, යමක් අහිමි වීම නිසාත් නොදන්නා දෙය ගැන අස්ථිර හැඟීම් පුබුදුවන නිසාත්ය.” එමනිසා කම්පනය, කෝපය, අපේක්ෂාභංගත්වය මෙන්ම විෂාදය යන දුෂ්කර හැඟීම් අද්දැකීමට සිදුවීම අසාමාන්‍ය නොවේ.
ද ටීන්ඒජර්’ස් සර්වයිවල් ගයිඩ් ටු මූවිං [පදිංචිය වෙනස් කිරීමේදී යෞවනයෙකුට ඔරොත්තු දීමට මඟ පෙන්වීම] නමැති සඟරාව මෙසේ නිරීක්ෂණය කරයි: “පදිංචිය වෙනස් කිරීමෙන් අදහස් කරන්නේ හුදෙක් ඔබේ ලිපිනය වෙනස් කිරීමට වඩා වැඩි යමකි. ඉන් අදහස් කරන්නේ ඔබේ ජීවිතයේ ප්‍රධාන පාර්ශ්වයන්—එනම් ඔබේ පාසල, ඔබේ ගුරුවරුන්, ඔබේ ක්‍රියාකාරකම්, ඔබේ මිතුරන් යනාදි බොහෝ දෑ වෙනස් කිරීමට සිදුවීමයි. තවද වෙනස් කිරීම වැඩි යහපත සඳහා වුවත් සැමවිටම එය අසීරු දෙයකි.” සමාජ සේවක මයිරා හර්බර්ට් පවසන්නේ නිතර පදිංචිය වෙනස් කිරීමට සිදුවීමෙන් “අසමර්ථවීම හා දුක්ඛිතකම” ඇතිවිය හැකි බවය. එක් දෙයක් නම්, පදිංචිය බෙහෙවින් වෙනස් කරන ළමයින් “නිරතුරුවම පාසල් වැඩසටහන් වෙනස් කරන අතර විශේෂයෙන්ම ඉගෙනගැනීම පහසු නොවේ නම්, ඔවුහු අතර මඟදී ඉගෙනීම කඩාකප්පල් කරගනිති.” ඇය සඳහන් කරන්නේ යෞවනයන්ට “විශේෂයෙන්ම අසීරු දෙය” මිතුරන් හැර දමා යෑම බවයි.
පදිංචිය වෙනස් කිරීමට සාර්ථකව මුහුණ දීම
එසේනම්, පදිංචිය වෙනස් කිරීමේ අපේක්ෂාව ඔබව වෙහෙස කිරීමට, අමනාපයට හෝ කෝපයට පත් කිරීමට සැලැස්විය හැක්කේ මන්දැයි සිතාගැනීමට පහසුය. එසේවුවත්, නිෂේධාත්මක හැඟීම්වල ගිලී සිටීමෙන් දේවල් තවත් අසීරු කරනවා පමණකි. ඒකාන්ත දෘෂ්ටි කෝණයක් වර්ධනය කරගැනීමට වෑයම් කිරීමෙන් ඔබට වැඩි යහපතක් වේ. මෙම තත්ත්වයන් යටතේ කාන්සාව හෝ ශෝකය වැනි නිෂේධාත්මක හැඟීම් තිබීම මුළුමනින්ම සාමාන්‍ය වේ. බොහෝ විට නිසි කාලයේදී මෙම හැඟීම් පහ වී යයි. මේ කාලය අතරතුරේදී, පදිංචිය වෙනස් කිරීමෙන් සිදුවන ප්‍රයෝජන ගැන සිත යොමු කිරීමට වෑයම් කරන්න.
කලින් සඳහන් කළ ඇනීටාට දැන් වයස 15ක් වන අතර, නැවත පදිංචිය වෙනස් කර ඇත. “පදිංචිය වෙනස් කළ විට, මට කනගාටුවක් ඇති වුණා,” යයි ඇය සිහියට නගන්නීය. “එහෙත් මා එහි හොඳ පැත්ත දෙස බැලුවා—එනම් මට අලුත් අයව මුණ ගැසෙයි, සිත්ගන්නා තැන්වලට යන්න පුළුවන් වෙයි කියා කල්පනා කළා.” ඇය ඇගේ නව නිවසේ සතුටෙන් හා හොඳින් ඊට සකස්වී සිටින්නීය.
ඔබ උපරිමයෙන් වෑයම් කළත්, සමහරවිට, නිෂේධාත්මක හැඟීම් දිගටම පවතියි. එය එසේනම්, ඒවා නොසලකා නොහරින්න. හේතුව නම්, “බිඳුණු ආත්මයක්” මගින් ඔබට ශාරීරිකව හානි සිදුවිය හැකි නිසාය. (හිතෝපදේශ 17:22) විවේකය, ව්‍යායාමය හෝ නිසි පෝෂණය සඳහා ඇති ඔබේ අවශ්‍යතාව වෙනුවෙන් වැඩි අවධානයක් දීමට සමහර විට ඔබට අවශ්‍යය. ඒ අතරේම, ඔබේ හැඟීම් ගැන කථා කිරීමට, විශේෂයෙන්ම ඔබේ දෙමව්පියන් සමඟ ඒවා ගැන කථා කිරීමට අවශ්‍ය විය හැකිය. (හිතෝපදේශ 23:26) ඔබේ සැකයන් හා ඔබේ සැලකිල්ලට භාජනවන දෑ ගැන ඔවුනට දැනගැනීමට ඉඩහරින්න.
උදාහරණයක් වශයෙන්, ‘ප්‍රමාණවත් ඉඩකඩ නොමැති’ බැවින් ආදරයෙන් තබාගත් දේවල් ඉවත ලෑමට සිදුවීම ගැන ඔබ සිත්තැවුලෙන් සිටින්නෙහිද? නැතහොත් පදිංචිය වෙනස් කිරීමට තිබෙන්නේ ඔබේ පාසල් විභාග ආසන්නයේ බැවින් ඔබව වුවමනාවට වඩා පීඩනයකට යටවී සිටින බවක් ඔබට හැඟේද? ඔබේ පැමිණිල්ල කුමක් වුවත්, හිතෝපදේශ 13:10 අපට මෙසේ සිහිගන්වයි: “උඩඟුකමෙන් තරඟය අටගන්නවා පමණක්ය; එහෙත් දැනමුතුකම පිළිගන්නන් වෙත ප්‍රඥාව තිබේ.” ඔබේ දෙමව්පියන් සමහර දේවලට අවසර දීමට එකඟ විය හැක. එසේ නැතහොත්, අඩුම තරමින්, ඔබ වෙත ඔවුන්ගේ අනුකම්පාව, පිහිටෝපකාර හා විශ්වාසය තහවුරු කිරීමට ඔවුනට හැක.
ඒකාන්ත ආකල්පයක් පවත්වාගැනීමට ඔබ දරන වෑයමට අනතුරු කිරීමට ඔබේ නව නිවස ගැන පවසන දූසමාන ආරංචිවලට හා බියගන්වන කතන්දරවලට ඉඩ නොදෙන්න. හිතෝපදේශ 14:15 මෙසේ පවසයි: “නුවණ නැත්තා හැම වචනම විශ්වාස කරයි; එහෙත් බුද්ධිමත් මනුෂ්‍යයා තමාගේ පියවර හොඳට බලාගනියි.” ඔබ විසින්ම සැබෑ කතන්දරය සොයාගන්න. ඇනීටා මෙසේ පවසන්නීය: “මා පුස්තකාලයට ගොස් අප පදිංචිය වෙනස් කළ ස්ථානවල වටාපිටාව හා සංස්කෘතිය ගැන පර්යේෂණය කළා.” ඔබ පදිංචිය සඳහා වැඩි ඈතකට නොයනවා නම්, ඔබේ නව නිවස බැලීම සඳහා කලින් යෑමට සමහරවිට ඔබට හැක. මෙමගින් ඔබේ සැක දුරු කිරීමටත්, පදිංචිය වෙනස් කිරීම සම්බන්ධයෙන් ඔබේ මනස පණගැන්වීමටත් මහත් දෙයක් කළ හැකියි.
අත්හැර යෑම පහසු නොවන බව ඒත්තු ගත්තකි. ද ටීන්ඒජර්’ස් සර්වයිවල් ගයිඩ් ටු මූවිං සඟරාවේ යෝජනා කරන්නේ “ඔබ පදිංචිය වෙනස් කිරීමට ප්‍රථමයෙන්,” අන්තිම වතාවටත් ඔබේ ප්‍රියතම ස්ථාන බැලීමට යන්න . . . , ඉන්පසු ඒවායින් සමුගන්න,” කියාය. ඔබේ මතකයන් නොමැකී තබාගැනීමට ඡායාරූප ඇල්බමයක් හෝ රූප අලවන පොතක් සාදාගැනීමට ඔබට වුවමනා විය හැක. ඔබේ මිතුරන්ගෙන් සමුගැනීමට කාලය ගැනීම ඊටත් වඩා වැදගත්ය. ඔබේ සබඳතාව අවසන් නොවන බව ඔවුනට සහතික වන්න. ප්‍රේරිත යොහන් තමා ප්‍රිය කළ අය සමඟ සබඳතාව තබාගැනීමට “කඩදාසියෙන් සහ තීන්තෙන්” ප්‍රයෝජන ගත්තා වාගේම ඔබටත් එසේ කළ හැක! (2 යොහන් 12) අධිෂ්ඨානය හා වෑයම මගින්, බොහෝ-දුර සිටින මිත්‍රයන් සමඟ පවා මිත්‍රත්වයන් මල්පල ගැන්විය හැක.
කල්යත්ම ඔබේ සමුගැනීමේ කඳුළු වියළී යයි, එමෙන්ම ඔබේ නව නිවසට අනුව හැඩගැසීමේ අභියෝගයට ඔබ මුහුණ දෙනු ඇත—මෙය අපගේ ඊළඟ කලාපයේ ලිපියක සාකච්ඡා කෙරෙන විෂය වේ. g94 2/22
[20 පිටුවෙහි ඇති පින්තූරය]
ඔබේ නව නිවස ගැන කලින් පර්යේෂණය කර යමක් දැනනොගන්නේ මන්ද?