බයිබලයේ දෘෂ්ටි කෝණය
‘වඩා දුර්වලවූ භාජනය’ ස්ත්‍රීන්ට නින්දාවක්ද?
“ස්ත්‍රීන්ව ඔවුන්ගේ අද්දැකීමෙන්, දක්ෂතාවෙන් සහ බුද්ධියෙන් විනිශ්චය කරනවා වෙනුවට ඔවුන්ගේ ලිංගය අනුව ඔවුන්ව විනිශ්චය කරනු ලබන්නේ මන්ද?”—බෙටි ඒ.
“තමන් වඩාත් පහත් ජීවීන් යයි කල්පනා කිරීමට ස්ත්‍රීන්ව හැඩගස්වා තිබේ.”—ලින් එච්.
“වඩා දුර්වල භාජන[ය]” යන බයිබලයේ ප්‍රකාශය ස්ත්‍රීන්ව පහත් කරයිද? සාකච්ඡාවට ලක්වන බයිබල් පදය 1 පේතෘස් 3:7 වේ, එහි මෙසේ සඳහන් වෙයි: “පුරුෂයෙනි, නුඹලාගේ යාච්ඤාවලට බාධා නොපැමිණෙන පිණිස, වඩා දුර්වල භාජනවූ භාර්යාවන් සමඟ දැනගැන්මේ හැටියට වාසයකරමින්, ඔවුන් ජීවනයේ අනුග්‍රහයට හවුල් උරුමක්කාරියන්ද බැවින් ඔවුන්ට ගෞරව දීපල්ලා.”
හවුල් ක්‍රිස්තියානීන්ට ප්‍රේරිත පේතෘස් මෙම වදන් ලියූ අවස්ථාවේදී, ස්ත්‍රීන්ට තිබුණු අයිතිවාසිකම් ඉතා ස්වල්පයක් විය, එනම් පුරාණ මිථ්‍යා දෘෂ්ටික ලෝකයේ පමණක් නොව නමුත් ඇදහිල්ල අත්හැරියාවූ යුදෙව් සමාජය තුළද තත්ත්වය එසේ විය. ස්ත්‍රීන් සම්බන්ධයෙන් ඒ කාලයේදී පැතිර පැවතුණා වූ ආකල්පයට පේතෘස් සහ මුල් ක්‍රිස්තියානීන් අනුබල දෙමින් සිටියාද?
පහත් භාජනද?
පේතෘස්ගේ වදන් කියෙව්වා වූ මුල්-ශතවර්ෂයේ ක්‍රිස්තියානීන් “වඩා දුර්වල භාජන[ය]” යන යෙදුම තේරුම්ගනු ඇත්තේ කෙලෙසද? භාජනය සඳහා වූ ග්‍රීක් වදන (ස්කෙව්ඔස්) ග්‍රීක් ශුද්ධ ලියවිලිවල වාර ගණනාවක් භාවිත කරනු ලැබූ අතර, විවිධ භාජන මෙවලම් හා උපකරණවලට යොමු දක්වයි. ස්ත්‍රීන්ව “වඩා දුර්වල භාජන[ය]” යනුවෙන් හැඳින්වීමෙන්, පේතෘස් ස්ත්‍රීන්ව පහත් කරමින් සිටියේ නැත, මන්දයත් ස්වාමිපුරුෂයාත් බිඳෙනසුලු නැතහොත් දුර්වල භාජනයක් බව එම ප්‍රකාශයෙන් අදහස් කළ බැවිනි. ස්ත්‍රීන් සහ පුරුෂයන් යන දෙපක්ෂයටම යොමු දැක්වීමේදී වෙනත් බයිබල් ඡේදවල, “මැටි භාජන” (2 කොරින්ති 4:7) සහ “දයාවේ භාජන” (රෝම 9:23) වැනි ඊට සමාන සංකේතමය භාෂාව භාවිත කෙරේ. පක්ෂ දෙක අතර “වඩා දුර්වල” වූ අය වශයෙන් පේතෘස් ස්ත්‍රීන්ව විස්තර කරන බව සැබෑවකි. එහෙත් රෝම 5:6හි “දුර්වල” යන වදන භාවිත වෙන්නේ ස්ත්‍රී පුරුෂ යන සියලු මනුෂ්‍යයන්ට අදාළ කිරීමක් හැටියටය. එබැවින්, “වඩා දුර්වල භාජන[ය]” යන යෙදුම ස්ත්‍රීන්ව පහත් කිරීම සඳහා භාවිත කරනු ලැබුවා යයි මුල් ක්‍රිස්තියානීන් නොසලකනවා ඇත.
ඒ වෙනුවට, ස්ත්‍රීන්ගේ තත්ත්වය උසස් කිරීමක් වශයෙන් පේතෘස්ගේ වදන් සලකනු ලබනවා ඇත. පේතෘස්ගේ කාලයේදී ස්ත්‍රීන්ට ගරු කිරීම වනාහි නොපැවතුණ දෙයක් විය. දීර්ඝ කලකට පෙර දෙවියන්වහන්සේ පුරෝකථනය කළාක් මෙන්, ස්වාමිපුරුෂයෝ බොහෝ විට ඔවුන්ගේ භාර්යාවන් කෙරෙහි ශාරීරිකව, ලිංගිකව සහ චිත්තවේගීව අනිසි පීඩා ඇති කළහ. (උත්පත්ති 3:16) එබැවින්, ක්‍රිස්තියානි ස්වාමිපුරුෂයන් සඳහා වූ පේතෘස්ගේ වදන්වල අදහස මෙලෙස දැක්විය හැක: ලෞකික සමාජය මගින් පුරුෂයන්ට දී තිබෙන බලය, ආත්මාර්ථය උදෙසා උපයෝගි කරගන්න එපා.
“වඩා දුර්වල” යන යෙදුම වෙතට අපි වඩාත් කිට්ටු අවධානයක් යොමු කරමු. මේ ඡේදයේදී පේතෘස් යොමු දක්වමින් සිටියේ, චිත්තවේගීය නොව නමුත් ශාරීරික ගතිලක්ෂණවලටය. පුරුෂයෝ දුර්වල භාජන වෙති; සන්සන්දනාත්මක අර්ථයකින් ස්ත්‍රීහු වඩා දුර්වල භාජන වෙත්. ඒ කෙසේද? අස්ථි සහ පේශිවල සැකැස්ම නිසා බොහෝ විට පුරුෂයන්ට කායික ශක්තිය වැඩියෙන් තිබේ. කෙසේවෙතත්, පේතෘස් සදාචාරමය, ආත්මික හෝ මානසික ශක්තිය පිළිබඳව සන්සන්දනයක් කරමින් සිටි බවට මින් අඟවන්නේ නැත. සැබවින්ම, යම් යම් සිද්ධීන්වලට දක්වන චිත්තවේගීය ප්‍රතික්‍රියා සම්බන්ධයෙන් ගත් කල, ස්ත්‍රීන් පුරුෂයන්ට වඩා අනිවාර්යයෙන්ම දුර්වල හෝ ශක්තිමත් නොවන නමුත් වෙනස් යයි පැවසීම වඩා සුදුසු විස්තරයක් වේ. දෙවියන්වහන්සේගේ මාර්ගය අනුගමනය කළා වූ ස්ත්‍රීන්ගේ ශක්තිමත් සදාචාරාත්මක ස්වභාවය, ඔවුන්ගේ විඳදරාගැනීම සහ තීක්ෂ්ණ බුද්ධිය ගැන බයිබලය විස්තර කරයි—කිහිපදෙනෙකු නම් කරනවා නම්, සාරා, දෙබොරා, රූත් සහ එස්තර් ඔවුන් අතර වෙත්. ස්ත්‍රීන් තමුන්ට වඩා බුද්ධිමත් විය හැකි බව පිළිගැනීම නිහතමානී පුරුෂයන්ට දුෂ්කර දෙයක් නොවේ.
කෙසේවෙතත්, “වඩා දුර්වල” යයි ස්ත්‍රීන්ට යොමු දැක්වීම, ඔවුන් වඩා පහත් පුද්ගලයන් යයි අඟවන බව ඇතැමෙක් විශ්වාස කරති. එහෙත් මෙම උදාහරණය සලකා බලන්න. පුද්ගලයෙකු ළඟ ප්‍රයෝජනවත් භාජන දෙකක් තිබේ. එකක් ශක්තිමත්ය, අනික එතරම්ම ශක්තිමත් නැත. දෙවන භාජනය එතරම් ශක්තිමත් නොවන හෙයින් කෙසේ හෝ එය අඩුවෙන් අගය කරනු ලැබේද? ඇත්තවශයෙන්ම වඩා ශක්තිමත් නොවන භාජනය ශක්තිමත් භාජනයට වඩා සැලකිල්ලෙන් යුක්තව මෙන්ම ගෞරවනීය ලෙස භාවිත කරනු ලැබේ. එබැවින්, පුරුෂයෙකුට වඩා අඩු කායික ශක්තියක් තිබෙන හෙයින් ස්ත්‍රියක් අඩු වටිනාකමකින් යුත් තැනැත්තියක්ද? කිසිසේත් නැත! “වඩා දුර්වල භාජන[ය]” යන යෙදුම පේතෘස් භාවිත කරන්නේ, ස්ත්‍රීන්ව අවමන් කිරීමට නොව, නමුත් ඔවුන් වෙත ගෞරවය පිරිනැමීම දිරිගැන්වීමටය.
“එසේම . . . දැනගැන්මේ හැටියට”
පේතෘස් ස්වාමිපුරුෂයන්ට දිරිගැන්නුවේ “එසේම . . . [ඔවුන්ගේ භාර්යාවන්] සමඟ දැනගැන්මේ හැටියට වාසය” කිරීමටය. “එසේම,” එනම් කාට සමානවද? පෙර පදවල ක්‍රිස්තුස්වහන්සේ ස්වකීය අනුගාමිකයන් සඳහා දැක්වූ ප්‍රේමනීය සැකිල්ල ගැන පේතෘස් සාකච්ඡා කරමින් සිටි අතර, “එසේම” තම භාර්යාවන්ට සලකන මෙන් ඔහු පුරුෂයන්ට උපදෙස් දුන්නේය. (1 පේතෘස් 2:21-25; 3:7) ක්‍රිස්තුස්වහන්සේ සෑමවිටම තමාගේම පෞද්ගලික ආශාවන් සහ රුචිඅරුචිකම්වලට ඉදිරියෙන් සිය ගෝලයන්ගේ ශුභ සිද්ධිය හා ආශාවන් තැබූසේක. උන්වහන්සේ ඔවුන්ගේ ආත්මික හා ශාරීරික ශුභ සිද්ධිය ගැන උනන්දු වූ අතර, ඔවුන්ගේ සීමාවන් සැලකිල්ලට ගත්සේක. ස්වාමිපුරුෂයන් ක්‍රිස්තුස්වහන්සේගේ ප්‍රේමනීය ආදර්ශය අනුගමනය කළ යුතු වේ, එනම් ඔවුන්ගේ භාර්යාවන් සමඟ “එසේම” හැසිරීමෙනි.
කරදර නොමැති විවාහ ජීවිතයක් අහම්බෙන් ඇතිවන එකක් නොවෙයි. ස්වාමිපුරුෂයා සහ භාර්යාව යන දෙදෙනාම විවාහයේ සාර්ථකත්වයට දායක විය හැකි ආකාරය දැන සිටිය යුතු වේ. එබැවින් ස්වාමිපුරුෂයන් සඳහා වූ පේතෘස්ගේ අවවාදය වනුයේ තමන්ගේ භාර්යාවන් සමඟ “දැනගැන්මේ හැටියට” දිගටම වාසය කිරීමටය. යෙහෝවඃවහන්සේ සහ උන්වහන්සේගේ පුත්‍රයා වන යේසුස් ක්‍රිස්තුස්වහන්සේ ස්ත්‍රීන් සමඟ කටයුතු කළ ආකාරය ස්වාමිපුරුෂයන් විසින් අධ්‍යයනය කළ යුතු වේ. තම භාර්යාවන්ට සැලකීම පිළිබඳව දෙවියන්වහන්සේට ඕනෑ කරන ආකාරය ඔවුන් දැනගත යුතු වේ.
මීට අමතරව, ස්වාමිපුරුෂයන් ඔවුන්ගේ භාර්යාවන්ව හොඳින් දැන සිටිය යුතුය—ඔවුන්ගේ හැඟීම්, හැකියාවන්, සීමාවන්, ඔවුන් රුචිඅරුචි දේවල් ඊට ඇතුළත් වේ. තම භාර්යාවන්ගේ බුද්ධියට, අද්දැකීමට සහ ගෞරවයට සැලකිය යුත්තේ කෙසේද කියා ඔවුන් දැනගත යුතු වේ. බයිබලය මෙසේ පවසයි: “පුරුෂයෙනි, ක්‍රිස්තුස්වහන්සේ සභාවට ප්‍රේමකොට, ඈ උදෙසා තමන්ම පාවාදුන්නාක්මෙන්ම, නුඹලාත් නුඹලාගේ භාර්යාවන්ට ප්‍රේමකරපල්ලා. එසේම පුරුෂයන් විසින්ද තමුන්ගේ භාර්යාවන්ට තමුන්ගේම ශරීරවලට මෙන් ප්‍රේමකටයුතුය. තමාගේ භාර්යාවට ප්‍රේමකරන තැනැත්තේ තමාටම ප්‍රේමකරන්නේය. කිසිවෙක් කිසිකලක තමාගේම මාංසයට වෛරකළේ නැත. . . . එකිනෙකා තම තමාගේ මාංසය පෝෂණයකොට රක්ෂාකරගන්නේය.”—එපීස 5:25, 28, 29.
ඔවුන්ට ගෞරවය දෙන්න
“වඩා දුර්වල භාජන[ය]” හැටියට පේතෘස් ස්ත්‍රීන්ට යොමු දැක්වූ විට, ස්වාමිපුරුෂයන් “ඔවුන්ට ගෞරව” කළ යුතු බවත් ඔහු ප්‍රකාශ කළේය. ග්‍රීක් භාෂාවෙන් ටී·මෙ යන නාම පදය ගෞරවය, උතුම් කොට සැලකීම, වටිනාකම සහ අනර්ඝත්වය යන අර්ථ දෙයි. වෙනත් වචනවලින් කියනවා නම්, ගෞරව කිරීම නිකම්ම අනුග්‍රහය දැක්වීමේ ක්‍රියාවක් නොව නමුත් ඔවුන්ට යුතු දෙය පිළිගැනීමේ ප්‍රකාශයක් වේ. පාවුල් සියලුම ක්‍රිස්තියානීන්ට, ස්ත්‍රී පුරුෂ දෙපක්ෂයටම පහත සඳහන් පරිදි උපදෙස් දුන්නේය: “සහෝදර ප්‍රේමයෙන් එකිනෙකාට ස්නේහවෙයල්ලා; ගෞරවයෙන් තම තමාට වඩා අනික් අය උතුම්කොට සලකාපල්ලා.”—රෝම 12:10.
යෙහෝවඃ දෙවියන්වහන්සේ ස්ත්‍රීන්ව නිකම්ම ප්‍රදර්ශනයට පමණක් සුදුසු භාණ්ඩ වශයෙන් නොසලකන බවට සහතිකය. ඉශ්‍රායෙල්හිදී, කාමමිථ්‍යාචාරය, ව්‍යභිචාරය, මෘගයන් සමඟ ලිංගික සම්බන්ධකම් පැවැත්වීම සහ වෙනත් අපරාධ සම්බන්ධයෙන් වරද සහිතව සිටි පුරුෂයන්ටත් ස්ත්‍රීන්ටත් දෙවියන්වහන්සේගේ නීති සමාන බලයකින් අදාළ විය. (ලෙවී කථාව 18:6-17, 23, 29; 20:10-12) සබත් දවස්වල, නාසරියවරුන්ට අදාළ වූ නීතිවල, මංගල්‍යවල සහ ව්‍යවස්ථාවේ වෙනත් බොහෝ සැපයුම්වල ප්‍රයෝජන ස්ත්‍රීන්ට අද්දැකීමට හැකි විය. (නික්මයාම 20:10; ගණන් කථාව 6:2; ද්විතීය කථාව 12:18; 16:11, 14) මවට මෙන්ම පියාටද ගරුකර කීකරු විය යුතුව තිබුණි.—ලෙවී කථාව 19:3; 20:9; ද්විතීය කථාව 5:16; 27:16; හිතෝපදේශ 1:8.
“ගුණවත් [සමර්ථ, NW] ස්ත්‍රියක්” විශ්වාසවන්තකම, කඩිසරකම සහ ඇයට තිබෙන බොහෝ වගකීම් ඉසිලීමේදී ඇගේ ප්‍රඥාව ගැන හිතෝපදේශ 31වන පරිච්ඡේදයේ ඡේද 10-31 දක්වා ඇයව වර්ණනා කරයි. පවුලේ ව්‍යාපාර කටයුතු මෙන්ම වෙනත් මූල්‍යමය කාරණා හැසිරවීමෙහි ඇය දැරූ කොටස නිසා ඇයට නිසි සේ ගරු කරනු ලැබීය. ස්ත්‍රීන් නිකම්ම අලංකාර සැරසිලි මෙන් පමණක් සලකන ඇතැම් පුරුෂයන්ගේ ආකල්පයට වඩා මෙය කොපමණ වෙනස්ද! පසුව, මුල් ක්‍රිස්තියානි සභාව තුළ, ක්‍රිස්තුස්වහන්සේගේ සාක්ෂිකරුවන් වශයෙන් ස්ත්‍රීන් කෙරෙහි ශුද්ධාත්මය වගුරුවන ලදි. (සසඳන්න ක්‍රියා 1:14, 15; 2:3, 4; සසඳන්න යෝවෙල් 2:28, 29.) එබැවින්, පුරුෂයන්ගේ, ස්ත්‍රීන්ගේ සහ දේවදූතයන්ගේ පවා ස්වර්ගීය විනිශ්චයකරුවන් වශයෙන් ක්‍රියා කිරීමට ඇතැම් ස්ත්‍රීහු නියතව සිටිත්. (1 කොරින්ති 6:2, 3) සභා එක්රැස්වීම්වලදී ස්ත්‍රීන් විසින් ඉගැන්වීම අදහස් නොකළ බව සැබෑවකි; කෙසේවෙතත්, ක්‍රිස්තියානි ස්ත්‍රීන්ට යාච්ඤා කිරීමට හෝ අනාවැකි කීමට හෝ හැකිව තිබූ අවස්ථා තිබුණි. වයසින් අඩු ස්ත්‍රීන්ටත්, දරුවන්ටත් එමෙන්ම සභාවට පිටින් සිටි අයටත් ඉගැන්වීමට ඔවුන්ට පැවරී තිබුණි.—මතෙව් 24:14; 1 කොරින්ති 11:3-6; තීතස් 2:3-5; සසඳන්න ගීතාවලිය 68:11.
ඔවුන්ට ගෞරව කිරීමට පේතෘස් පැවසූ විට ඔහුගේ මනසේ තිබූ අදහස ඇඟවීමට තවත් හොඳ කරුණක් 2 පේතෘස් 1:17හි සඳහන් වේ. “මොහු මාගේ ප්‍රේමවන්ත පුත්‍රයාය,” යනුවෙන් අන් අය ඉදිරියේ යේසුස්වහන්සේව පිළිගත් බව ප්‍රකාශ කිරීම තුළින් යෙහෝවඃවහන්සේ උන්වහන්සේට ගෞරව කළ බව එහි අපට කියවන්ට තිබේ. එලෙසම, ස්වාමිපුරුෂයෙකු තම භාර්යාවට ගෞරව කරන බව තම ක්‍රියා මගින්, ප්‍රසිද්ධියේ මෙන්ම පෞද්ගලිකව පෙන්විය යුතුය.
ජීවනයේ උරුමක්කාරියන්
ඉතිහාසය පුරාම, පුරුෂයන් විසින් ස්ත්‍රීන්ව සලකා තිබෙන්නේ ගෞරව කරනු ලැබීමට නොවටිනා අය හැටියටයි—එනම් දාසියෙකු හෝ පුරුෂයන් පිනවීම සඳහා හුදු භාණ්ඩයක් වශයෙනි. ස්ත්‍රීන්ට ගෞරවය නියම කිරීමේ ක්‍රිස්තියානි සංකල්පය නිසැකවම ඔවුන්ව ගෞරවය ලැබීම සඳහා වඩා උසස් මට්ටමක තබයි. පේතෘස්ගේ අවවාදයෙහි “ස්ත්‍රී ලිංගයේ අය සම්බන්ධයෙන් ඉතා වැදගත් සත්‍යයක් අඩංගු” වන බව බාන්ස්’ නෝට්ස් ඔන් ද නිව් ටෙස්ටමන්ට් දක්වයි. “ක්‍රිස්තියානි පිළිවෙළ හැර අන් සෑම ආගම් පිළිවෙළකම ස්ත්‍රිය සෑම ආකාරයකින්ම පුරුෂයාට වඩා පහත් යයි සලකා තිබේ. ක්‍රිස්තියානි ආගමේ උගන්වනු ලබන්නේ . . . ආගම විසින් පිරිනමනු ලබන බලාපොරොත්තු සහ පොරොන්දු සියල්ලට ඇය සුදුසුකම ලබන බවයි. . . . මෙම තනි සත්‍යය, සෑම තැනකම සිටින ස්ත්‍රීන්ව පහත් කොට සලකනු ලැබීමෙන් නිදහස් කොට, මිනිස්වර්ගයාගේ සමාජ ගැටලු අඩක් පමණ වහාම නතර කරනු ඇත.”
ක්‍රිස්තුස්වහන්සේට පුරුෂයන් සහ ස්ත්‍රීන් යන දෙපක්ෂයේ අය අයිතිව සිටින නිසා, ක්‍රිස්තුස්වහන්සේගේ වස්තුවක් වශයෙන් තම භාර්යාවන්ව ආදරයෙන් රැකගැනීම ස්වාමිපුරුෂයන්ට බරපතළ හේතුවක් වෙයි. “වඩා දුර්වල භාජන[ය]” හැටියට ස්ත්‍රීන් කෙරෙහි යොමු දක්වන විට, පේතෘස්ගේ වදන් තවදුරටත් මෙසේ සඳහන් කරයි: “නුඹලාගේ යාච්ඤාවලට බාධා නොපැමිණෙන පිණිස, . . . ඔවුන් ජීවනයේ අනුග්‍රහයට හවුල් උරුමක්කාරියන්ද බැවින් ඔවුන්ට ගෞරව දීපල්ලා.” (1 පේතෘස් 3:7) ස්වාමිපුරුෂයෙකු තමාගේ භාර්යාවට අනිසි ලෙස සැලකීම දෙවියන්වහන්සේ සමඟ තිබෙන ඔහුගේ සම්බන්ධයට හානියක් සිදු කරනු ඇති බවත්, එමගින් ඔහුගේ යාච්ඤාවලට බාධාවක් වනු ඇති බවත් පේතෘස් ඇඟවූයේය.
“වඩා දුර්වල භාජන[ය]” යන යෙදුම කිසිම ආකාරයකින් ස්ත්‍රීන්ව අවමානයට ලක් කිරීමට අදහස් කරනු ලැබුවේ නැත. ගෘහයේ මූලිකයා වශයෙන් ස්වාමිපුරුෂයන්ව යෙහෝවඃවහන්සේ නියම කළ අතරේදී, පුරුෂයන් ස්ත්‍රීන්ව අනිසි ලෙස සැලකීම උන්වහන්සේ අනුමත නොකරනසේක. ඒ වෙනුවට, උන්වහන්සේ නියෝග කරන්නේ, ස්ත්‍රිය ගැන දැනගැන්මෙන් යුක්තව, පුරුෂයා ඇයට සැලකිල්ලත් ගෞරවයත් පිරිනැමිය යුතු බවයි.
විවාහ වූ මෙන්ම තනි පුරුෂයන් යන දෙපක්ෂයටම ස්ත්‍රීන් පහත් පුද්ගලයන් ලෙස සැලකීමට නොව, නමුත් ඔවුන්ට ගෞරව කිරීමට බයිබලය නියම කරයි. දෙවියන් වහන්සේට ඕනෑකමින් නමස්කාර කරන එමෙන්ම එකිනෙකාට ගරු කරන පුරුෂයන් හා ස්ත්‍රීන් දෙවියන්වහන්සේගේ හස්තයෙන් මහඟු ආශීර්වාද ලබනු නියතය.—සසඳන්න 1 කොරින්ති 7:16. g94 10/8
[19වන පිටුවේ පින්තූරයේ හිමිකම් විස්තර]
Miss G. E. K / Artist: Alice D. Kellogg 1862-1900
Courtesy of Joanne W. Bowie