ස්ත්‍රීන්ව පූජක ධුරයට පත් කිරීම එංගලන්ත සභා පූජකයන්ව කුපිත කරවයි
බ්‍රිතාන්‍ය පිබිදෙව්! වාර්තාකරු විසිනි
වර්ෂ 1992 නොවැම්බර්හි, එංගලන්ත සභාවේ පොදු ධර්මාධිකාරි සභාව ස්ත්‍රීන්ව පූජකවරියන් ලෙස පත් කිරීම සඳහා යෝජනාවක් ස්ථිර කරගත්තේය. මෙහි ප්‍රතිඵලයක් වශයෙන්, කුපිත වූ එංගලන්ත සභා පූජකයන් 150දෙනෙකු පමණ 1995වන විට ඉල්ලා අස්වන බවට ඔවුන්ගේ අදහස ප්‍රකාශයට පත් කර තිබේ. ඔවුන්ගෙන් බොහෝදෙනෙක් රෝමානු කතෝලික සභාවට බැඳීමට සැලසුම් කරති. එක් ජ්‍යෙෂ්ඨ පූජකවරයෙකුට දේවස්ථාන ගොඩනැඟිල්ල ඇතුළත් තම මුළු මීසම් සභාවම ගෙන යෑමට වුවමනා විය. පළමු කණ්ඩායම පූජාත්වරය ලැබීම (මෙය අවසානයේදී 1994 මාර්තු මස පවත්වනු ලැබීය) එංගලන්ත සභාවේ වසර 450ක ඉතිහාසයේ, වඩාත් මතභේදයට තුඩු දෙන උත්සවය වන බවට එංගලන්තයේ ද සන්ඩේ ටයිම්ස් පත්‍රය අපේක්ෂා කළේය.
බොහෝ පූජකයන් කුපිත වී සිටින්නේ මන්ද? සමහරු සාමාන්‍යයෙන් සිතන්නේ ස්ත්‍රීන් පූජකවරියන් ලෙස එම තනතුරෙහි කටයුතු කිරීම සුදුසු නැති බවයි. ධර්මාධිකාරි සභාවේ එම තීරණයෙන්, මෑතකදී එංගලන්ත සභාව, කතෝලික හා ඔර්තඩොක්ස් ආගම් සමඟ එක්සත් කිරීමට ගත් ප්‍රයත්නයන් පලුදු වේයයි වෙනත් අය බියවෙති. ඇත්තෙන්ම, එංගලන්ත සභාවේ තීරණය පාප් විසින්ම සලකනු ලබන්නේ “නැවත එක්සත් වීමේ සෑම බලාපොරොත්තුවකටම විශාල අවහිරයක්” වශයෙන් බව එක් වතිකානු නියෝජිතයෙක් ප්‍රකාශ කළේය.
කෙසේවෙතත්, එංගලන්ත සභාවේ පෞද්ගලික මීසම්වලින්, ස්ත්‍රීන් පූජකවරියන් කිරීම වැළැක්වීමට තවමත් ඡන්දය දමනු ලැබේ. සංචාරය කරන්නාවූ පූජකවරයෙකුට අනුග්‍රහය දැක්වීමෙන්, ඔවුන්ට තමුන්ගේ බිෂොප්ව පවා ප්‍රතික්ෂේප කිරීමට තීරණය කළ හැකි අතර, නිව් යෝර්ක් ටයිම්ස් අනුව “ස්ත්‍රී පූජකවරියන්ගෙන් එඬේර සැලකිල්ල භාරගැනීමට ප්‍රතික්ෂේප කරන්නාවූ අයහට ඔහු එය දෙනවා ඇත.”
“නුඹලා සියල්ලන් විසින් එකම දේ කථාකරන හැටියටද, නුඹලා අතරෙහි භේද නැතුව එක සිතින් හා එක කල්පනාවෙන් එකඟව සම්පූර්ණව සිටින හැටියටද” යන පාවුල් පළමු ශතවර්ෂයේ දුන් අවවාදයට මෙය කොතරම් වෙනස්ද. (1 කොරින්ති 1:10) වාදය වේගයෙන් පැතිරෙනවාත් සමඟම, බොහෝ මීසම්වාසීහු ඔවුන්ගේම තීරණගනිති. “මෙහි එංගලන්ත සභාවේ තවත් විශ්වාස කිරීමට යම් දෙයක් ඉතිරි වී තිබේයයි අපට පෙනෙන්ට නැහැ,” යනුවෙන් එක් කාන්තාවක් පැවසුවාය. “මට තිබෙන්නේ අත්හැරීමේ ප්‍රීතියේ හා සහනයේ හැඟීම පමණයි.”