බයිබලයේ දෘෂ්ටිකෝණය
බ්‍රහ්මචර්යාව ක්‍රිස්තියානි දේවසේවකයන් සඳහා අවශ්‍යතාවක්ද?
කෙටියෙන් කිවහොත් බ්‍රහ්මචර්යාව කියන්නේ විවාහ නොවී සිටීමයි. කෙසේවෙතත්, ද නියූ එන්සයික්ලොපීඩියා බ්‍රිටැනිකා සඳහන් කරන අන්දමට එම යෙදුම “සාමාන්‍යයෙන් භාවිත කරන්නේ ආගමික නිලධාරියෙක්, විශේෂඥවරයෙක් හෝ බැතිමතෙක් වශයෙන් බ්‍රහ්මචාරි ජීවිතයක් ගත කරන පුද්ගලයෙකුගේ කාර්යභාර්ය හා සම්බන්ධවයි.” “බ්‍රහ්මචාරියා” යන යෙදුම මගින්, “පරිශුද්ධ ප්‍රතිඥාවක් හෝ අත්හැරීමේ ක්‍රියාවක් හෝ පුද්ගලයෙකුගේ ආගමික ස්ථාවරය නැතහොත් ආගම කෙරෙහි තිබෙන ඔහුගේ බලවත් උනන්දුව හේතුවෙන් එය ඔහුට වඩාත් යෝග්‍යයි යන විශ්වාසය යනාදි දේවල ප්‍රතිඵලයක් හැටියට විවාහ නොවී සිටින අයව” විශේෂකොට දක්වනවා.
අතීතයේ යම් කලක ප්‍රධාන පෙළේ ඇතැම් ආගම් තම දේවසේවකයන් සඳහා අවශ්‍යතාවක් හැටියට බ්‍රහ්මචර්යාව යොදාගෙන තිබෙනවා. එසේ වුණත්, ක්‍රිස්තියානි ලෝකයේ වෙනත් කිසිම ආගමකට වඩා කතෝලික ආගම තුළ බ්‍රහ්මචර්යාව විශේෂ ලක්ෂණයක් බවට පත් වී තිබෙනවා. අදදින කතෝලික ආගමේ ක්‍රියාත්මක වන බ්‍රහ්මචර්යාව ගැන මතභේද බොහොමයක් තිබෙනවා. “මෑත දශකවලදී කරන ලද අධ්‍යයන රාශියක නිගමනය වී තිබෙන්නේ, 12වන සියවසේ සිට කතෝලික පූජකයන් සඳහා අවශ්‍යතාවක්, එනම් නියමයක් හැටියට ක්‍රියාත්මක වන බ්‍රහ්මචර්යාව, පූජකයන් බඳවාගැනීම හා රඳවාගැනීම සම්බන්ධයෙන් පල්ලිය මුහුණපාන ගැටලුවල ප්‍රධාන හේතුකාරකය වන බවයි” කියා ද විල්සන් ක්වෝට’ලි සඳහන් කළා. සමාජ විද්‍යාඥයෙකු වන රිචඩ් ඒ. ෂොන්හ’ පවසන ආකාරයට “ඉතිහාසයේ දැක්වෙන සියලුම ප්‍රබල සාක්ෂි හා සමාජීය වෙනස්කම් කතෝලික පූජකතන්ත්‍රය තුළට බ්‍රහ්මචාරි පුරුෂයන් පමණක් ඇතුල් වීමේ මතයට විරුද්ධ වෙනවා.” බ්‍රහ්මචර්යාව පිළිබඳ බයිබලයේ දෘෂ්ටිකෝණය කුමක්ද?
විවාහයද නැත්නම් තනිකඩභාවයද?
ඉතිහාසය පුරා විවිධ ආගම් බොහොමයකට අයත් භක්තිමත් පුරුෂයන් හා ස්ත්‍රීන් විශාල ගණනක් බ්‍රහ්මචාරි ජීවිතයක් ගත කිරීමට තෝරාගෙන තිබෙනවා. එයට හේතුව? බොහෝ අවස්ථාවලදී එයට හේතුව වූයේ මාංසික හා ද්‍රව්‍යමය දේවල් “නපුරේ වාසස්ථානය” ලෙස ඔවුන් විශ්වාස කිරීමයි. ආධ්‍යාත්මික නිර්මලත්වය අත් කරගත හැක්කේ සියලුම ලිංගික ක්‍රියාවලින් වැළකී සිටීමෙන් පමණයි යන දර්ශනය එමගින් බිහි වුණා. කෙසේවෙතත්, එය බයිබලයේ දෘෂ්ටිකෝණය නොවෙයි. බයිබලයට අනුව විවාහය දෙවිගෙන් ලද පවිත්‍ර මෙන්ම ශුද්ධ ත්‍යාගයක්. විවාහය දෙවිගේ ඇස් ඉදිරියෙහි “යහපත්” දෙයක් ලෙස මෙන්ම දෙවි සමඟ ආධ්‍යාත්මික නිර්මල සබඳතාවකට කිසි විටකත් බාධාවක් නොවන දෙයක් ලෙස මැවීම පිළිබඳ උත්පත්ති වාර්තාව පැහැදිලිව විස්තර කරනවා.—උත්පත්ති 1:26-28, 31; 2:18, 22-24; හිතෝපදේශ 5:15-19 දක්වාත් බලන්න.
මුල් ක්‍රිස්තියානි සභාවේ අධිකාරිමය නිලයන් දැරූ ප්‍රේරිත පේතෘස් හා දෙවිගේ වෙනත් අනුමැතිය ලත් සේවකයන් විවාහක පුරුෂයන්ව සිටියා. (මතෙව් 8:14; ක්‍රියා 18:2; 21:8, 9; 1 කොරින්ති 9:5) සභාවේ අවේක්ෂකයන් නැතහොත් “රාජගුරු ප්‍රසාදීන්” පත් කිරීම ගැන ප්‍රේරිත පාවුල් තිමෝතිට දුන් මඟ පෙන්වීම්වල මෙය පැහැදිලි කරනවා. ඔහු මෙසේ ලියනවා: “රාජගුරු ප්‍රසාදිවරයෙකු දෝෂාරෝපණයට ලක් නොවූ එක භාර්යාවකට ස්වාමිපුරුෂයාව සිටිය යුතුය.” (ඇල අකුරු අපගේය; 1 තිමෝති 3:2, රිවයිස්ඩ් ස්ටෑන්ඩඩ් ව’ෂන්, කතෝලික සංස්කරණය) ‘රාජගුරු ප්‍රසාදිවරයෙකු’ විවාහ වීම නුසුදුසු යමක් හැටියට කරන කිසිම යෝජනාවක් කොහෙත්ම සඳහන් වී නැති බව සැලකිල්ලට ගන්න. පාවුල් පෙන්වා දුන්නේ ‘රාජගුරු ප්‍රසාදිවරයෙක්’ බහුභාර්ය සේවනයේ යෙදෙන්නෙක් නොවිය යුතු බවයි; විවාහකයෙක් නම් ඔහුට සිටිය යුත්තේ එක භාර්යාවක් පමණයි. ඇත්තෙන්ම, මැක්ලින්ටොක් සහ ස්ට්‍රෝං විසින් සම්පාදනය කළ සයික්ලොපීඩියා ඔෆ් බිබ්ලිකල්, තියෝලොජිකල් ඇන්ඩ් එක්ලිසියැක්ස්ටිකල් ලිට’රේච’ මෙසේ නිගමනය කරනවා: “සුවිශේෂයේ සඳහන් නියමයන්ට අනුව පූජකයන් විවාහ වීම තහනම් කිරීමක් අ[ලුත්] තෙ[ස්තමේන්තුවේ] කිසිම ඡේදයකින් අර්ථකථනය කළ නොහැකියි.”
ඇත්තෙන්ම බයිබලය විවාහය ඉතා උසස් කොට සැලකුවත්, තනිකඩභාවය සිය කැමැත්තෙන්ම තෝරාගන්නේ නම්, එය හෙළා දකින්නේ නැහැ. සමහරුන් සඳහා යෝග්‍ය ක්‍රියාමාර්ගයක් හැටියට බයිබලය එය නිර්දේශ කරනවා. (1 කොරින්ති 7:7, 8) සමහර පුරුෂයන් සහ ස්ත්‍රීන් තනිකඩව සිටීමට ඕනෑකමින්ම තෝරාගන්නවා කියා යේසුස් ක්‍රිස්තුස් පැවසුවා. (මතෙව් 19:12) ඒ ඇයි? එයට හේතුව තමන්ගේ ආධ්‍යාත්මික වර්ධනයට බාධා කරන, විවාහය සමඟ සහජයෙන්ම බැඳී පවතින අපවිත්‍ර කරන යමක් තිබීම නොවෙයි. ඔවුන් හුදෙක් මේ ක්‍රියාමාර්ගය තෝරාගන්නේ හදිසිතාවක් තිබෙන බවට ඔවුන් අවබෝධ කරගෙන සිටින දෙවිගේ කැමැත්ත කිරීමේදී තමන්ගේ වෑයම් ඒ මතම යොමු කර තබාගැනීම සඳහායි.
බලාත්මක බ්‍රහ්මචර්යාවේ ප්‍රතිඵල
කෙසේවෙතත් ක්‍රිස්තුස් ජීවත් වූ කාලයෙන් පසු ගත වූ සියවස් ගණනාව පුරා දේවල් වෙනස් වුණා. අපේ පොදු යුගයේ මුල් සියවස් තුනක කාල සීමාවේදී, “විවාහක මෙන්ම අවිවාහක දේවසේවකයන් සිටියා” කියා විවාහ වීම සඳහා පූජක පදවිය අත්හැර දැමූ ඩොමිනිකන් නිකායේ ඩේවිඩ් රයිස් පැහැදිලි කරනවා. ඒ කාලයේදී, ලිංගිකත්වය හා විවාහය පිළිබඳ විකෘති දෘෂ්ටියක් බිහි කළ, “ග්‍රීක හා බයිබලයේ අදහස්වල සම්මිශ්‍රණයක්” ලෙස ආගමික ලේඛකයෙක් විස්තර කළ දෙය ක්‍රිස්තියානීන්යයි කියා සිටි අයට බලපාන්න පටන්ගත්තා.
ඇත්තෙන්ම සමහරු හුදෙක් “දේවරාජ්‍යය හා බැඳි වැඩවල [තමන්වම] යෙදවීම සඳහා සම්පූර්ණ නිදහසක් අත් කරගැනීමට” දිගටම තනිකඩභාවය ලුහුබැන්දා. කෙසේවෙතත් තමන්ගේ සිත්වලට කාවැදුණු මිථ්‍යාදෘෂ්ටික දර්ශනයන් මගින් තවත් අයව වැඩියෙන් පොලඹවනු ලැබුවා. ද නියූ එන්සයික්ලොපීඩියා බ්‍රිටැනිකා මෙසේ පවසනවා: “බ්‍රහ්මචර්යාව නමැති ව්‍යවහාරය කෙරෙහි බලපවත්වන පෙලඹවීම ලෙස ලිංගික සංසර්ගය අපවිත්‍ර කරවන යමක් මෙන්ම ශුද්ධකම හා එකඟ නොවන යමක් ලෙස සලකන විශ්වාසයක් ඉස්මතු වුණා.”
සිව්වන සියවසේදී පල්ලිය, “සත්ප්‍රසාද පූජාව පවත්වන්න කලින් රාත්‍රියේ ලිංගික සංසර්ගයේ යෙදීම විවාහක පූජකයෙකුට තහනම් කළා” කියා රයිස් පවසනවා. දිනපතාම සත්ප්‍රසාද පූජාව පැවැත්වීම පල්ලිය හඳුන්වා දුන් විට, එයින් අදහස් කළේ ලිංගික සංසර්ගයේ යෙදීමෙන් සදහටම වැළකීමට පූජකයන්ට සිදු වූ බවයි. කාලයාගේ ඇවෑමෙන් පූජකයන්ගේ විවාහ වීම සම්පූර්ණයෙන්ම තහනම් කළා. මේ අනුව පල්ලියේ දේවසේවකයෙක් වන ඕනෑම කෙනෙකුට බ්‍රහ්මචර්යාව අනිවාර්ය දෙයක් වුණා.
එවැනි වර්ධනයක් ගැන ප්‍රේරිත පාවුල් අනතුරු ඇඟෙව්වා. ඔහු මෙසේ ලිව්වා: “ඇදහිල්ල අත්හැර දමා ගොස් යක්ෂයන්ගෙන් පැමිණෙන රැවටිලිකාර ආත්මයන්ට හා ඉගැන්වීම්වලට සවන් දීම තෝරාගන්න අය අන්තිම කාලයේදී සිටින්න යන බව ආත්මය පැහැදිලි ලෙස පවසා තිබේ . . . විවාහ වීම තහනම් කර තිබේ කියා ඔවුන් පවසනු ඇත.”—1 තිමෝති 4:1, 2, ජෙරූසලම් බයිබල්.
“ප්‍රඥාව නිදොස් බව ඇගේ ක්‍රියා වලින් ඔප්පු [වේ]” කියා යේසුස් ක්‍රිස්තුස් පැවසුවා. (මතෙව් 11:19) දෙවිගේ ප්‍රමිති බැහැර කිරීමේ අනුවණකම එහි ක්‍රියාවලින් නැතහොත් ප්‍රතිවිපාකවලින් ඔප්පු වී තිබෙනවා. බලාත්මක බ්‍රහ්මචර්යාව හා සම්බන්ධ විෂය ගැන ලේඛක ඩේවිඩ් රයිස් ලොව පුරා සිටින පූජකයන් බොහෝදෙනෙකු සමඟ සම්මුඛ සාකච්ඡා පැවැත්වූවා. ඔහු කතා කළ කිහිපදෙනෙක් මෙසේ පැවසුවා: “පූජක පදවියේ සිටින ඔබ මිනිසුන්ගේ ශුභසිද්ධිය වෙනුවෙන් ඕනෑම දෙයක් කරන්න ඕනෙ; ඒ වගේම භක්තිමත් හා ඔබව අගයකොට සලකන ස්ත්‍රීන් ලිංගික සබඳතා පවත්වන්න කැමැත්තෙන්ම ඉදිරිපත් වෙද්දී ඥානවන්තව ඔබ ඒකෙන් ප්‍රයෝජන ගන්න.”
මතෙව් 7:20 උපුටා දක්වමින් රයිස් මෙසේ සඳහන් කරනවා: “‘ඔවුන්ගේ ඵලවලින් නුඹලා ඔවුන් ඇඳිනගන්නහුය’ කියා යේසුස් පැවසුවා.” අනතුරුව, නියමයක් ලෙස ක්‍රියාත්මක වන බ්‍රහ්මචර්යාව නිසා ඇති වී තිබෙන දුක්දායක ප්‍රතිඵල ගැන ඔහු මෙසේ අදහස් දක්වනවා: “දෙයාකාර ජීවිත ගත කරන පුරුෂයන් දහස් ගණනක්, ජීවිත විනාශ කරගෙන කල්ගෙවන ස්ත්‍රීන් දහස් ගණනක්, තම පියවරුන් වන පූජකයන් විසින් අත්හැර දැමූ දරුවන් දහස් ගණනක් හා ඊට අමතරව චිත්තවේගීයව පීඩා විඳින පූජකයන් දහස් ගණනක් බලාත්මක බ්‍රහ්මචර්යාවේ ඵල වෙනවා.”
ගෞරවනීය විවාහය දෙවිගෙන් ලැබෙන ආශීර්වාදයක්. ආධ්‍යාත්මික ලෙස හානි සිදුවීම නියමක් ලෙස පනවා තිබෙන බ්‍රහ්මචර්යාවේ ප්‍රතිඵලය වී තිබෙනවා. අනිත් අතට, සිය කැමැත්තෙන්ම තෝරාගන්නා ලද තනිකඩභාවය ශුද්ධකම හෝ ගැළවීම සඳහා අත්‍යවශ්‍ය නොවූවත්, සමහර අය සඳහා එය විපාකදායී මෙන්ම තෘප්තිමත් ජීවන මාර්ගයක් වන බව සනාථ වී තිබෙනවා.—මතෙව් 19:12.
[12වන පිටුවේ පින්තූරයේ හිමිකම් විස්තර]
Life