යෞවන අය අසති . .
මගේ බර වැඩි වෙනවට තියෙන බය කොහොමද මම ජයගන්නේ?
“මගේ ජීවිතයේ තියෙන ලොකුම ප්‍රශ්නය තමයි මගේ සැන්ඩ්විච් එකට මෙයනේස් දානවද නැද්ද කියන එක. මම මෙයනේස්වලට වහ වැටිලා ඉද්දී කොහොමද වෙන කිසිම දෙයකට අවධානයක් දෙන්නේ. අන්තිම තීරණය මොකක්ද? මෙයනේස් කන්නේ නැහැ. මොකද ඒකේ හුඟාක් කැලරි තියෙනවා. ආයෙත් සැරයක් ඇනරෙක්සියා දිනුවා. මම පැරදුනා.”—ජේමි.
මිලියන ගණනක් යෞවනයන් ආහාර ගැනීමේ අක්‍රමිකතාවලට ගොදුරු වෙනවා.a බොහෝදෙනෙක් හාමතේ සිටීමේ අරමුණෙන් (ඇනරෙක්සියා) හෝ අධික ලෙස ආහාර ගැනීමේ සහ බඩ විරේක කිරීමේ (බුලිමියා) පුරුද්දක් වර්ධනය කරගැනීමේ අරමුණෙන් හෝ මෙය ආරම්භ කළේ නැහැ. ඊට වෙනස්ව බොහෝදෙනෙක් මෙය පටන්ගත්තේ, කිලෝ කීපයක් අඩු කරගැනීමේ සරල ඉලක්කයක් ඇතුවයි. කොහොමවුණත්, ඔවුන්ට නොදැනුවත්වම හාමතේ සිටීමේ හෝ අධික ලෙස ආහාර ගැනීමේ අමුතු චක්‍රයකට ඔවුන් හසු වුණා. “මගේ බර පාලනය කරගන්න මම මේ ආහාර රටාව පටන්ගත්තා. ඒත් දැන් ඒක මාව පාලනය කරනවා” කියා ජේමි පවසනවා.
ආහාර ගැනත් එය ඔබේ බරට බලපාන අන්දම ගැනත් ඔබ අධික ලෙස කරදර වෙනවා නම් ඔබට කුමක් කළ හැකිද? තවත් යෞවනයන් බොහෝදෙනෙක් ආහාර ගැනීමේ අක්‍රමිකතාවන් සමඟ පොරබැද තිබෙන බවත් ඒවා ජයගෙන තිබෙන බවත් පළමුව මතක තබාගන්න. ඒත් එය කොහොමද කරන්නේ?
කැඩපතකින් බලන්න
ආහාර ගැනීමේ අක්‍රමිකතාවකට එරෙහිව කරන පොරබැදීම ජයගැනීමේදී ගත යුතු වැදගත් පියවරක් වන්නේ ඔබේ පෙනුම සම්බන්ධයෙන් යථාර්ථවාදී වීමයි. “ආහාර ගැනීමේ අක්‍රමිකතාවන් තිබෙන බොහෝදෙනෙකුට තිබෙන්නේ තමන් ගැනම විකෘති වූ පින්තූරයක්” කියා වෙනස් වන ශරීර, වෙනස් වන ජීවිත (ඉංග්‍රීසියෙන්) නමැති පොත පවසනවා. “ඔවුන් යථාර්ථවාදීව තමන් දෙස නොබලන අතර, තමන් ගැනම, විශේෂයෙන්ම තම පෙනුම සම්බන්ධයෙන් ඕනෑවට වඩා විවේචනාත්මක වෙනවා.”
ඇත්තවශයෙන්ම, ඇතැම් නහඹරයන් තමන් ගැන තිබෙන සංකල්පය සම්පූර්ණයෙන්ම පදනම් කරගන්නේ බාහිර පෙනුම මතයි. ඔවුන් ඕනෑම දෝෂයක් දකින්නේ මහා විපතක් ලෙසයි. දාහත් හැවිරිදි විකි මෙසේ පවසනවා: “මම කොච්චර මහතද කියනවා නම් මට ඒක පේන්න බැහැ. මගේ ඉණ කොච්චර මහතද කියනවා නම්, මට මගේ ඇඟටම හරියන කිසිම ඇඳුමක් කවදාවත් අඳින්න හම්බ වෙන්නේ නැහැ.” කිලෝග්‍රෑම් 10ක් අඩු වුණාට පස්සෙත් විකි සෑහීමට පත් වුණේ නැහැ. එක්කෝ ඇය ආහාර ගැනීම ප්‍රතික්ෂේප කළා, නැතිනම් ඇය අධික ලෙස ආහාර ගෙන, ඉන්පසුව කාපු ආහාර වමනය කළා.
ඔබ ඔබේ පෙනුම සම්බන්ධයෙන් යම් ප්‍රමාණයකට සැලකිලිමත් වීම ඇත්තෙන්ම වරදක් නොවේ. මේ සම්බන්ධයෙන්, සාරා, රාඛෙල්, යෝසෙප්, දාවිත් සහ අබීගායිල් ඇතුළු ස්ත්‍රී, පුරුෂ කීපදෙනෙකුගේම, ශරීර හැඩය සහ පෙනුම ගැන බයිබලය හොඳ හැඟීමකින් යුතුව සඳහන් කිරීම උනන්දුවට කාරණයක්.b දාවිත්ගේ සාත්තුකාරිය වූ අබිෂග් “ඉතා ශෝභනව සිටිය” බව පවා බයිබලය පවසනවා.—1 රාජාවලිය 1:4.
සැබෑ අලංකාරය අර්ථ දැක්වීම
එසේවුවත් බයිබලය කෙනෙකුගේ ශාරීරික පෙනුමට හෝ ශරීරයේ හැඩයට මූලික අවධානයක් දෙන්නේ නැහැ. ඒ වෙනුවට එය ප්‍රශංසා කරන්නේ “සිතේ ඇතුල් මනුෂ්‍යයා” සම්බන්ධවයි. (1 පේතෘස් 3:4) දෙවිගේ සහ මනුෂ්‍යයන්ගේ ඇස් ඉදිරියේ කෙනෙක්ව සැබවින්ම ආකර්ෂණීය හෝ පිළිකුල්සහගත කරන්නේ එම අභ්‍යන්තර පුද්ගලයා විසිනුයි.—හිතෝපදේශ 11:20, 22.
දාවිත් රජුගේ පුත් අබ්සලොම්ව සැලකිල්ලට ගන්න. බයිබලය මෙසේ පවසනවා: “අබ්සලොම් මෙන් රූප ශෝභාව ගැන ප්‍රශංසා කටයුතු කෙනෙක් මුළු ඉශ්‍රායෙල්හි සිටියේ නැත. පතුළ පටන් හිස්මුදුන දක්වා ඔහුට කිසි කැලලක් නොවීය.” (2 සාමුවෙල් 14:25) එහෙත් මේ තරුණ මනුෂ්‍යයා ද්‍රෝහියෙක්ව සිටියා. යෙහෝවාගේ ආලේප ලත් රජුගේ බල තල පැහැරගැනීමට උත්සාහ කිරීම සඳහා උඩඟුකම සහ අභිලාෂකාමිත්වය ඔහුව පෙලඹෙව්වා. එමනිසා බයිබලයේ අබ්සලොම් සම්බන්ධයෙන් හොඳ පින්තූරයක් ඉදිරිපත් කරනවා වෙනුවට ඔහුව විස්තර කරන්නේ ලැජ්ජාවක් නැති, ද්‍රෝහී, එමෙන්ම මිනීමරු වෛරක්කාරයෙක් ලෙසයි.
පුද්ගලයෙකුගේ සැබෑ ශෝභනකම හෝ කඩවසම්කම බාහිර පෙනුම මත රඳා පවතින්නේ නැහැ. හොඳ හේතු ඇතුව බයිබලය මෙලෙස පවසනවා: “ප්‍රඥාව ලබාගන්න. එසේය, නුඹ ලබාගන්න සියල්ල ඇතුළුව, නුවණ ලබාගන්න. . . . ඈ නුඹේ හිසට ශෝභන මාලාවක් දෙන්නීය; අලංකාර ඔටුන්නක්ද ඈ නුඹට පළඳවන්නීය.”—හිතෝපදේශ 4:7, 9.
එහෙත්, බොහෝවිට ආහාර ගැනීමේ අක්‍රමිකතාවලට, කෙනෙක් තම පෙනුම සම්බන්ධයෙන් සෑහීමට පත් නොවීමට වඩා වැඩි දෙයක් ඇතුළත් වන බව පිළිගත යුතුයි. එක් යොමු සටහනක මෙසේ සඳහන් වෙනවා: “ආහාර ගැන අනවශ්‍ය ලෙස කරදර වන පුද්ගලයන් ඇනරෙක්සියා න’වෝසා, බුලිමියා සහ අධික ලෙස ආහාර ගැනීම වැනි ආහාර ගැනීමේ අක්‍රමිකතාවලට ගොදුරු වන අතර, සාමාන්‍යයෙන් එවැනි පුද්ගලයන්ට තිබෙන්නේ අඩු ආත්ම-ගරුත්වයක්. එනිසා තමන්ගේ වටිනාකම ගැන ඔවුන්ට හොඳ ආකල්පයක් නැති අතර, අනිත් අයත් තමන්ව අගය කොට සලකන්නේ නැති බව ඔවුන්ට හැඟෙනවා.”
අඩු ආත්ම-ගරුත්වයක හැඟීමක් ඇතිවීමට දායක විය හැකි සාධක කීපයක්ම තිබෙනවා. උදාහරණයකට, යෞවනෝදයේ ආරම්භයත් සමඟ අවිනිශ්චිතභාවයේ හැඟීම්වලින් ඔබ යටපත් විය හැකියි. ඔබ ඔබේ තුල්‍යයන්ට කලින් තරුණ වියට පා තැබුවා නම් මෙය විශේෂයෙන්ම සිදු විය හැකියි. එමෙන්ම සමහර යෞවනයන්, නිතරම අඩ දබර සිදු වන, ඇතැම්විට ශාරීරික හෝ ලිංගික වශයෙන් අඩන්තේට්ටම් සිදු වන නිවෙස්වල ඇති දැඩි වෙනවා. හේතුව කුමක් වුවත්, නොවටිනාකමේ හැඟීම්වලට හේතුව පිළිගැනීමත්, නැවත යථා තත්වයට පත්වීමට ඇතුළත් වෙනවා. පුද්ගලයෙක් වශයෙන් තිබෙන ඔබේ නියම වටිනාකම අගය කොට සැලකීම මින් අදහස් වෙනවා. ස්ථිරවම සෑම කෙනෙකුටම අඩුම තරමින් ප්‍රශංසනීය ගුණාංග යම් ප්‍රමාණයක් තිබෙනවා. (1 කොරින්ති 12:14-18 සසඳන්න.) මේවා ඔබ තුළ තිබෙන බව ඔබට නොපෙනිය හැකි බව ඇත්තයි. නමුත් ඔබට මේවා පෙන්වා දීමට මේරූ මිත්‍රයෙකුට පුළුවන් විය හැකියි.
නමුත් සාධාරණ සෞඛ්‍ය හේතූන් නිසා ඇත්තටම ඔබට බර අඩු කරගැනීමට අවශ්‍ය නම් කුමක් කිව හැකිද? අප ‘පමණ දැන හැසිරිය’ යුතු බව බයිබලය නිර්දේශ කරනවා. (1 තිමෝති 3:11) එනිසා, වඩාත් හොඳම දේ වන්නේ ආහාර පාලනයේ අන්තයට යෑමෙන් හෝ ඉක්මන් බර අඩු කරගැනීමේ ක්‍රමවල ගොදුරක් වීමෙන් වැළකීමයි. අනවශ්‍ය බර, අඩු කරගැනීම සඳහා හොඳම ක්‍රමය වන්නේ සෞඛ්‍යයට හිත කර ලෙස හොඳ ආහාරයක් ගැනීම සහ යෝග්‍ය ප්‍රමාණයකට ව්‍යායාම්වල නියැලීමයි. FDA පාරිභෝගිකයා (ඉංග්‍රීසියෙන්) නමැති සඟරාව මෙසේ පවසනවා: “සෑම දෙයක් සම්බන්ධයෙන්ම සැබෑ වන්නා සේ, බර අඩු කරගැනීම සඳහාත් හරි ක්‍රමයක් සහ වැරදි ක්‍රමයක් තිබෙනවා. වැරදි ක්‍රමය වන්නේ, ආහාර වේලවල් අතපසු කිරීම, පෝෂ්‍ය පදාර්ථ අඩු පාන් සහ වතුර මිස වෙන කිසිවක් නොකෑමට තීරණය කිරීම, බර අඩු කරගැනීම සඳහා තිබෙන පෙති ගැනීම හෝ උවමනාවෙන්ම වමනය කිරීමයි.
කෙනෙකුට විශ්වාසයෙන් යුතුව පැවසීමේ ඇති වැදගත්කම
සමාජ සේවිකාවක් වන නැන්සි කොලොඩ්නි ආහාර ගැනීමේ අක්‍රමිකතාවක් තිබීම, “සිතියමක් හෝ මාලිමාවක් නොමැතිව, එමෙන්ම පිටවීමේ ස්ථානය හරියට දන්නේ නැතුව සහ ඔබ ඉවත් වන්නේ කවදාද කියා හෝ ඉවත් වන මාර්ගය සම්බ වේද කියා හෝ ස්ථිරභාවයක් නැතුව අවුල් ජාලයකට ඇතුළු වීමක්” සමඟ සන්සන්දනය කරනවා. “ඔබ එතුළ ඉන්න තාක්, ඔබව තව තවත් ව්‍යාකූල කරන අතර, ඔබ එයින් එළියට එන්න උත්සාහ කරන විට ඔබ කලකිරීමට පත් වෙනවා.” එමනිසා ඔබට ඇනරෙක්සියාවල හෝ බුලිමියාවල රෝග ලක්ෂණ තිබෙනවා නම් ඔබ උපකාර ලබාගැනීම අවශ්‍යයි. ඔබට ඔබේම හැකියාවෙන් ‘අවුල් ජාලයෙන්’ ගොඩ එන්න බැහැ. එහෙයින්, දෙමාපියෙකුට හෝ වෙනත් විශ්වාසකටයුතු වැඩිහිටියෙකුට විශ්වාසයෙන් යුතුව මේ ගැන පවසන්න. බයිබල් හිතෝපදේශයක් මෙසේ පවසනවා: “මිත්‍රයෙක් සෑම කල්ම ප්‍රේමවන්නේය, සහෝදරයෙක් ඉපද සිටින්නෙත් විපත්තියේදී පිහිටවීමටය.”—හිතෝපදේශ 17:17.
යෙහෝවාගේ සාක්ෂිකරුවන් බොහෝදෙනෙකුට, ක්‍රිස්තියානි සභාවේ සිටින වැඩිමහල්ලන් අතරේ එවැනි විශ්වාස කටයුතු මිත්‍රත්වයක් ලැබී තිබෙනවා. වැඩිමහල්ලන් කියන්නේ වෛද්‍යවරුන් නොවන බවත් ඔවුන්ගේ සහය හේතුවෙන් වෛද්‍ය උපකාර සඳහා තිබෙන අවශ්‍යතාව ඉවත් වන්නේ නැති බවත් ඇත්තයි. කොහොමවුණත් ක්‍රිස්තියානි අවේක්ෂකයන් “දුප්පතාගේ කන්නලව්වට” දෙසවන් ඉවත හරවාගන්නේ නැහැ. එමෙන්ම ඔවුන්ගේ උපදෙස් සහ යාච්ඤා ‘රෝගාතුරයාට [ආත්මිකව] සුවය ලැබීමට’ උදව් විය හැකියි.—හිතෝපදේශ 21:13; යාකොබ් 5:13-15.
ඔබට කෙනෙක් ඉදිරියේ මෙය විශ්වාසයෙන් යුතුව පැවසීමට අපහසු නම්, පිළිතුරක් ඉල්ලමින් ඔබේ සිතුවිලි ලිපියක් මාර්ගයෙන් දන්වන්න. වැදගත් දේ නම්, කාරණය කාට හරි අනාවරණය කිරීමයි. නැන්සි කොලොඩ්නි මෙසේ පවසනවා: “ඔබට තවදුරටත් එයට තනියෙන් මුහුණ දෙන්න බැරි බව පිළිගැනීමෙන්, දැන් ඉඳන් ඔබට උපකාර කිරීම සඳහා යම් කෙනෙකුට ඉඩහැරීමට ඔබ කැමති වෙනවා.” ඇය තවදුරටත් මෙසේ පවසනවා: “මේ පියවර ගැනීම, ඒ වගේම ඒ ගැන සිතීම ඔබට අපහසු විය හැකියි. නමුත් එහි ඒකාන්ත පැති තිබෙන අතර, එවැනි පියවරවල් අවුල් ජාලයෙන් ඉවත් වීම සඳහා ඔබව නිවැරදි මාර්ගයේ තබනවා.”
ක්‍රිස්තියානි යෞවනයන්ට තවත් ප්‍රබල උපකාරයක් තිබෙනවා. එය නම් යාච්ඤාවයි. දෙවිට යාච්ඤා කිරීම මනෝවිද්‍යාත්මක ආධාරකයක් නොවෙයි. එය, ඔබ ඔබ ගැන තේරුම්ගන්නවාටත් වඩා වැඩියෙන් හොඳට ඔබව තේරුම්ගන්නා මැවුම්කරු සමඟ කරන සැබෑ මෙන්ම අතිවැදගත් අදහස් හුවමාරුවක් වෙනවා! (1 යොහන් 3:19, 20) සියලු අසනීප ඉවත් කිරීමට මෙය යෙහෝවාගේ නියමිත කාලය නොවන නිසා, ඔබ අමාරුවේ නොවැටෙන පිණිස ඔබට මඟ පෙන්වන්න අපේ ප්‍රේමනීය දෙවිට හැකියි. (ගීතාවලිය 55:22) තමාගේම අද්දැකීමෙන් ගීතිකාකාර දාවිත් මෙසේ ලිව්වා: ‘යෙහෝවා සෙවීමි, ඔහු මට උත්තර දී, මාගේ සියලු භයින් මා මිදුවේය. මේ දුප්පතා මොරගැසුවේය, යෙහෝවා ඔහුගේ බස් අසා, ඔහුගේ සියලු දුක්වලින් ඔහු ගැළවුවේය.’—ගීතාවලිය 34:4, 6.
එසේ නම් ඔබේ බලවත් හැඟීම් යෙහෝවා දෙවිට ප්‍රකාශ කරන්න. ‘ඔහු නුඹලා ගැන සලකන බැවින් නුඹලාගේ හැම කරදරයක්ම [කාංසාවක්ම, NW] ඔහු පිට තබන්න’ කියා ප්‍රේරිත පේතෘස් ලිව්වා. (1 පේතෘස් 5:7) යෙහෝවාගේ ප්‍රේමනීය කරුණාව සඳහා අගය දැක්වීම වර්ධනය කරගැනීමට ගීතාවලිය 34, 77, 86, 103 සහ 139 පරෙස්සමින් කියවා නොබලන්නේ ඇයි? මෙම ගීතිකා මත මෙනෙහි කිරීමෙන්, යෙහෝවා පක්ෂපාත බවටත්, ඔබ සාර්ථක වෙනවා දකින්න ඔහුට අවශ්‍ය බවටත් තිබෙන ඔබේ ස්ථිර විශ්වාසය ශක්තිමත් වෙන්න යනවා. ඔහුගේ වචනය කියවීමෙන්, දාවිත්ට හැඟුණාක් මෙන් ඔබටත් හැඟෙන්න යනවා. ඒ ගැන ඔහු මෙසේ ලිව්වා: “මා තුළ කරදර [කාංසාවන්, NW] හා කනස්සල්ල බහුල වූ කල්හි ඔබ මාගේ සැනසිල්ල [වූයේය].”—ගීතාවලිය 94:19, නව අනුවාදය.
ඉවසිලිවන්ත වන්න—යථා තත්වයට පත්වීම සිදු වන්නේ ක්‍රමානුකූලවයි
ආහාර ගැනීමේ අක්‍රමිකතාවක් සඳහා උපකාර ලබාගන්න බොහෝදෙනෙක් එක් රැයකින් යථා තත්වයට පත් වන්නේ නැහැ. මුලින් සඳහන් කළ ජේමිව සැලකිල්ලට ගන්න. ඇය උපකාර ලබාගැනීමට පටන්ගත්තාටත් පසුව කැඳ කෝප්පයක් වගේ සරල දෙයක්වත් ආහාරයට ගැනීම අපහසු බව ඇයට වැටහුණා. ඇය මෙසේ පවසනවා: “මේක කන එක මට හොඳයි, මට ජීවත් වෙන්න ආහාර ඕනෙ කියා දිගින් දිගටම මටම කියාගන්න සිදු වුණා. මම කන සෑම හැන්දක්ම කිලෝග්‍රෑම් දහස් ගණනක් වගේ කියා මට හැඟුණා.”
එක් වතාවක් ජේමි මරණය අභියස සිටියත්, ආහාර සම්බන්ධයෙන් තිබෙන ඇගේ මානසික වදය ජයගැනීමට ඇය ධෛර්යය ලැබුවා. ඇය මෙසේ පැවසුවා: “මම කොහොම හරි ජීවත් වෙනවා. මම මේකට විරුද්ධව සටන් කරලා ජයගන්නයි යන්නේ. මම ඇනරෙක්සියාව ජයගන්නවා. ඒක ලේසි නැහැ. හැබැයි මම ඒක කරනවා.” ඔබටත් එසේ කළ හැකියි!
[පාදසටහන්වල]
a වර්ෂ 1999 මැයි 08 පිබිදෙව්! කලාපයේ පිටු 13-15 බලන්න.
b උත්පත්ති 12:11; 29:17; 39:6; 1 සාමුවෙල් 17:42; 25:3 බලන්න.
[26වන පිටුවේ පින්තූරය]
සමබර ආහාර වේලක් සහ යෝග්‍ය ප්‍රමාණයකට ව්‍යායාම් කිරීම ඔබේ බර පාලනය කරගැනීමට ඔබට උපකාරවත් විය හැකියි