අතක් පයක් අහිමි වීම—ඔබට එහි අවදානම අඩු කරගත හැකි අයුරු
අත් පා අහිමි වීමේ අවස්ථාවන් බොහොමයක්ම වළක්වාගැනීමට හැකියි! එමෙන්ම පර්යන්ත වාහිනික රෝගයෙන් (PVD) පෙළෙන්නන් සම්බන්ධයෙනුත් මෙය සැබෑවක්. කලින් ලිපියේ සඳහන් වූ ආකාරයට, PVD බොහෝවිට දියවැඩියාවේ ප්‍රතිඵලයක් වෙනවා.a සතුටට කරුණක් වන්නේ දියවැඩියාව බොහෝවිට පාලනය කිරීමට හැකිවීමයි.
“ඉන්සියුලින් නියම කළත් නැතත් දියවැඩියා ප්‍රතිකාරයට මූලික වන්නේ ඔබගේ ආහාර රටාව” කියා බ්‍රිටැනිකා විශ්වකෝෂය (ඉංග්‍රීසියෙන්) පවසනවා. නියූ යෝක් නගරයේ ඇති කිංස් කෞවුන්ටි රෝහලේ වෛද්‍ය මසෙල් බයොල්, පිබිදෙව්! වාර්තාකරුට මෙසේ පැවසුවා: “දියවැඩියා රෝගීන් තමන්ගේ තත්වය ගැන බැරෑරුම් ලෙස සලකා ආහාර ගැන පරෙස්සම් වෙනවා නම්, එමෙන්ම වෛද්‍ය අධීක්ෂණයට භාජන වෙනවා නම්, තම අත් පාවල අග්‍ර කොටස් අහිමි වීමේ අන්තරාව ඔවුන් අඩු කරගන්න යනවා.” මෙම උපදෙස් පිළිපදින IIවන වර්ගයට අයත් දියවැඩියා රෝගීන්ට පවා කාලයාගේ ඇවෑමෙන් තම රෝග ලක්ෂණ හොඳ අතට හැරෙන බවක් දැකිය හැකියි.b
ව්‍යායාම් කිරීම අත්‍යවශ්‍යයි
ව්‍යායාම් කිරීමත් ඉතාමත් වැදගත්. ශරීරයේ ග්ලූකෝස් නැතහොත් සීනි ප්‍රමාණය සාමාන්‍ය මට්ටමක පවත්වාගෙන යෑමට එය උපකාරවත් වෙනවා. PVD තිබෙන බව නිර්ණය කරගත් විට, අවශ්‍ය කරන ශක්තිය සහ නම්‍යසුලුභාවය පවත්වාගෙන යෑමටත්, හානියට ලක් වූ තැන්වලට රුධිරය ගලා යෑම නිසියාකාරව සිදුවීමටත් ව්‍යායාම් උපකාරවත් වෙනවා. විටින් විට ඇති වන කොර ගැසීම එනම්, PVDවලින් පෙළෙන්නන්ට ඇවිදින විට හෝ ව්‍යායාම් කරන විට තමන්ගේ බත් කෙණ්ඩාවල දැනිය හැකි වේදනාව අවම කරගැනීමටත් ව්‍යායාම් උපකාරවත් වෙනවා. නමුත් එවැනි අය තමන්ගේ පාදයට අනවශ්‍ය පීඩනයක් හෝ අධික වේදනාවක් ගෙන දෙන ව්‍යායාම්වලින් වැළකී සිටිය යුතුයි. වඩාත් යෝග්‍ය ව්‍යායාම් අතරට ඇවිදීම, බයිසිකල් පැදීම, ඔරු පැදීම, පිහිනීම සහ වතුරේ කරන ව්‍යායාම් ඇතුළත් වෙනවා. කෙනෙක් ආහාර සීමා කිරීමට හෝ ව්‍යායාම් කිරීමේ විශේෂ වැඩසටහනක් ඇරඹීමට ප්‍රථමයෙන් සැමවිටම වෛද්‍යවරයෙකුගේ උපදෙස් පැතිය යුතුයි.
ඇත්තෙන්ම හොඳ සෞඛ්‍යයක් රැකගැනීමට අවශ්‍ය ඕනෑම කෙනෙකු දුම්පානයෙන් සම්පූර්ණයෙන්ම වැළකී සිටිය යුතු බව නොකිවමනායි. PVD කියන්නේ, දුම්පානය නිසා ඇති වන හෝ වඩා උග්‍ර අතට හැරෙන, දීර්ඝ වෛද්‍ය ගැටලු ලැයිස්තුවේ තිබෙන රෝගවලින් එකක් පමණයි. “විශේෂයෙන්ම දුම්පානය කරන්නාට දියවැඩියාව සහ PVD තිබෙනවා නම් දුම්පානය කිරීම, අත් පා ඉවත් කිරීමට ප්‍රධාන හේතුසාධකයක් විය හැකි” බව වෛද්‍ය බයොල් පැවසුවා. මෙය කොතරම් බලපෑමක් කළ හැකි සාධකයක්ද? “දුම්පානය නොකරන්නන්ට වඩා දුම්පානය කරන්නන් අතරේ අත් පා ඉවත් කිරීම 10 ගුණයකින් වැඩි බව” අත් පා අහිමි වූවන්ව පුනරුත්ථාපනය කිරීමේ උපදේශයක් පවසනවා.
රෝගී අත් පාවලට සත්කාරය
PVD හේතුවෙන් අත් පා අග්‍රයන්වලට රුධිරය ගමන් කිරීම අඩු විය හැකි අතර, එය නියුරෝපති ලෙස හඳුන්වන තත්වයකට මඟ පෑදිය හැකියි. එමගින් නහර හිරි වැටුණු තත්වයකට හෝ කිසිත් නොදැනෙන තත්වයකට පත් වෙනවා. එවිට පුද්ගලයෙක් ඇඳේ විවේක ගනිමින් සිටින විටදී පවා, පහසුවෙන් ඔහුගේ අත් පා හානිවීමකට ලක් විය හැකියි. උදාහරණයකට, විදුලි බ්ලැන්කට්ටුවක් අධික ලෙස රත් වුණොත්, රෝගියාට කිසිම වේදනාවක් නොදැනෙන නිසා ඔහුව බරපතළ ලෙස පිලිස්සීමට ඉඩ තිබෙනවා! නිෂ්පාදකයන් මේ හේතුව නිසා, මෙම භාණ්ඩ පාවිච්චි කිරීමේදී පරෙස්සම් වන ලෙස දියවැඩියා රෝගීන්ට අවවාද කරනවා.
රෝගී අත් පා තිබෙන අය ආසාදනයන්වලටත් පහසුවෙන්ම ගොදුරු වෙනවා. කුඩා සීරීමක්, වණයකට හෝ මස් කුණුවීමකට පවා මඟ පෑදිය හැකියි. එනිසා පාද ගැන සැලකිලිමත් වීම ඉතා වැදගත් වන අතර, මෙයට, පහසු එමෙන්ම හොඳින් ගැළපෙන සපත්තු පැළඳීමත්, පාද සහ යටිපතුල් පිරිසිදුව සහ වියළිව තබාගැනීමත් ඇතුළත් වෙනවා. පාද ගැන සැලකිලිමත් වීම සම්බන්ධයෙන් රෝගීන්ව දැනුවත් කරන පා සායනයන් බොහෝ රෝහල්වල තිබෙනවා.
ශල්‍යකර්මයක් අවශ්‍ය වන තරමට PVD දුරදිග ගිය විට, සාමාන්‍යයෙන් ශල්‍ය වෛද්‍යවරුන් උත්සාහ කරන්නේ අත් පා ඉවත් කිරීම වැළැක්වීමටයි. එක් විකල්ප ක්‍රියා මාර්ගයක් වන්නේ, බැලූන් ඇන්ජියෝප්ලාස්ටික් සැත්කමයි. වාහිනික ශල්‍ය වෛද්‍යවරයෙක් අග බැලුමක් සහිත කැතීටරයක් ඇතුල් කරනවා. බැලුම පුම්බන අතර එවිට, හැකිළී තිබෙන ධමනියේ ඇදීමක් සිදු වෙනවා. තවත් විකල්පයක් වන්නේ බයිපාස් සැත්කමයි. එනම් දරුණු විදියට හානි වී ඇති රුධිර වාහිනි ගළවා, ශරීරයේ වෙනත් ස්ථානයකින් ගත් වාහිනි එතනට සවි කිරීමයි.
අවුරුදු 54ක් වයසැති බාබ්රා, වයස අවුරුදු හතරේ සිට, Iවන වර්ගයේ දියවැඩියා රෝගයෙන් පෙළෙනවා. ඇය තම පළමු දරුවාව ප්‍රසූත කිරීමෙන් පසුව ඇගේ යටි පතුලේ PVD වර්ධනය වුණා. පාදය කපා ඉවත් කරන ලෙස සමහර වෛද්‍යවරු ඇයට උපදෙස් දුන්නත්, නම් දැරූ වෛද්‍යවරයෙක් ඇයට හමු වූ අතර ඔහු ඇගේ පදයට රුධිර ගමනාගමනය වැඩි කිරීම සඳහා ඇන්ජියෝප්ලාස්ටික් සැත්කම කළා. යම් කාලයකට ඇන්ජියෝප්ලාස්ටික් සැත්කම සාර්ථක වුණත්, අවසානයේදී බාබ්රාට බයිපාස් සැත්කම කිරීමට අවශ්‍ය වූ අතර එය සාර්ථක වුණා. බාබ්රා දැන් ඇගේ පාද පරෙස්සමින් රැකබලා ගන්නවා.
හදිසි අනතුරුවලින් වැළකීම
අත් පා අහිමි වීමට හේතු වන දෙවන ප්‍රධාන සාධකය වන්නේ හදිසි අනතුරුයි. ශරීරයේ නිශ්චිත අංගයන්වලට පමණක් සීමා නොවී, ශරීරයේ ඕනෑම කොටසක් විනාශ කිරීමට හදිසි අනතුරු හේතු විය හැකියි. කොහොමවුණත්, ජීවිතය පිළිබඳ දෙවිගේ දෘෂ්ටිය, කෙනෙකුගේ හදිසි අනතුරුවල අවදානම අඩු කිරීමට බොහෝ සෙයින් දායක වෙන්න පුළුවන්. වැඩක නිරත වී සිටියත්, රිය පැදෙව්වත්, විනෝද වුණත්, ක්‍රිස්තියානීන් තම ශරීර දෙවිගෙන් ලැබුණු ත්‍යාගයක් ලෙස සැලකිය යුතුයි. එමනිසා ඔවුන් සියලුම ආරක්ෂිත පියවරවලට ගරු කිරීමත්, අඥාන ලෙස අවදානමක් ගැනීමෙන් වැළකී සිටීමත් අවශ්‍ය වෙනවා.—රෝම 12:1; 2 කොරින්ති 7:1.
බිම් බෝම්බ වළලා තිබෙන රටවල හදිසි අනතුරු අවදානම අඩු කිරීම සඳහා ගෙන තිබෙන පියවර කවරේද? ආණ්ඩුව විසින් අනුග්‍රහය දක්වන බිම් බෝම්බ සම්බන්ධව දැනුවත් කිරීමේ වැඩසටහන් බොහෝ රටවල්වල දක්නට ලැබෙනවා. එක්සත් ජාතීන්ගේ මහා ලේකම්ගේ වාර්තාවකට අනුව, “අනතුරේ සිටින ජනයාට . . . බිම් බෝම්බ වළලා ඇති ප්‍රදේශවල ජීවත් වන විට හා වැඩ කරන විට, ඒවාට ගොදුරු වීමට ඇති හැකියාව අවම කරගන්නා ආකාරය” එම වැඩසටහන්වලින් උගන්වනවා.
කනගාටුවට කරුණක් නම්, “ජනයා බිම් බෝම්බ වළලා තිබෙන පරිසරයට පුරුදු වී නොසැලකිලිමත් ආකාරයකින් ක්‍රියා කිරීමයි” කියා එක්සත් ජාතීන්ගේ වාර්තාවක සඳහන් වෙනවා. “එවැනි අන්තරාවන් දෙස දෛවවාදී ආකල්පයකින් බලන ලෙස සමහර අවස්ථාවලදී ආගමික සාධකයන් ජනයාට උනන්දු කරනවා.” කොහොමවුණත්, දෛවවාදී ආකල්පයකින් බැලීමට ශුද්ධ ලියවිලි තුළ කිසිම පදනමක් නැහැ. ඊට වෙනස්ව පරෙස්සම් වීමට සහ ආරක්ෂා වීමට බයිබලය උනන්දු කරනවා.—ද්විතීය කථාව 22:8; දේශනාකාරයා 10:9.
එනිසා, පරෙස්සම් වීමෙන් සහ ඔබේ සෞඛ්‍යය ආරක්ෂා කරගැනීමට සාධාරණ පියවර ගැනීමෙන්, අත් පා අහිමි වීමේ අවදානම විශාල වශයෙන් ඔබට අඩු කරගත හැකියි. නමුත් දැනටමත් අත් පා අහිමි වූ අය සම්බන්ධයෙන් කුමක් කියන්න පුළුවන්ද? ඒ තත්වයේ සිටියදීත් ඔවුන්ට හොඳ අර්ථාන්විත ජීවිතයක් භුක්ති විඳින්න පුළුවන්ද?
[පාදසටහන්වල]
a ශරීර අග්‍රයන්හි ඇති වන වාහිනික රෝගවලට, පුද්ගලයෙක් යටි කයට හිර ඇඳුම් ඇඳීම, තද සපත්තු පැළඳීම එසේත් නැතිනම් දිගු වේලාවක් එක දිගට (විශේෂයෙන්ම කකුලක් පිට කකුලක් දමාගෙන) වාඩි වී සිටීම හෝ සිටගෙන සිටීම හේතු පාදක විය හැකියි, නැතිනම් මෙය උග්‍ර අතට හැරීමට හේතු විය හැකියි.
b පළමුවන වර්ගයේ දියවැඩියාව තිබෙන රෝගීන්ට දිනපතා ඉන්සියුලින් එන්නත නියම කරනවා. (ඉන්සියුලින් නියම නොකරන) IIවන වර්ගයේ දියවැඩියාව තිබෙන අයට තම තත්වය ආහාර ගැනීමේ රටාව මගින් සහ ව්‍යායාම් මගින් බොහෝවිට පාලනය කරගත හැකියි. එක්සත් ජනපදය තුළ දියවැඩියා රෝගීන්ගෙන් සියයට 95කටම තිබෙන්නේ IIවන වර්ගයේ දියවැඩියාවයි.
[4වන පිටුවේ පින්තූරය]
දුම්පානය කිරීම, විශේෂයෙන්ම වාහිනික රෝගය තිබෙන අයගේ අත් පා අහිමි වීමේ අන්තරාව බොහෝ සෙයින් වැඩි කිරීමට දායක වෙනවා
[5වන පිටුවේ පින්තූරය]
යෝග්‍ය ව්‍යායාම් සහ හොඳ ආහාර වේලක් නිරෝගි රුධිර වාහිනි පද්ධතියකට දායක වෙනවා