දමස්කයට යන ගමන්

මේ බිම වැටිලා ඉන්නේ කවුද කියලා දන්නවාද? ඒ සාවුල්. මතකද, එයා තමයි ස්තේපන්ට ගල් ගහපු මිනිස්සුන්ගේ සළු බාරව හිටියේ. දැන් බලන්න අර තද එළිය දිහා! මොනවාද මේ වෙන්නේ?

ස්තේපන්ගේ මරණයෙන් පස්සේ, යේසුස්ගේ ගෝලයන්ව හොයාගෙන ඒගොල්ලන්ට කරදර කරන්න සාවුල් මුල් තැන ගන්නවා. එයා ගෙයක් ගෙයක් ගානේ ගිහින්, ගෙවල්වලින් ඒගොල්ලන්ව එළියට ඇදලා අරගෙන හිරේ දානවා. ඉතින් ගෝලයන්ගෙන් ගොඩක්දෙනෙක් වෙන නගරවලට ගිහින්, ඒ තැන්වල “ශුභාරංචිය” දේශනා කරන්න පටන්ගන්නවා. හැබැයි සාවුල් ඒ නගරවලටත් ගිහින් ඒගොල්ලන්ව හොයාගන්නවානේ. දැන් එයා මේ දමස්කයට යන ගමන්. නමුත් මඟදී මෙන්න මේ වාගේ පුදුම දෙයක් වෙනවා:

එකපාරටම සාවුල් වටේට අහසෙන් එළියක් එනවා. දැන් මේ පින්තූරයේ පේන විදියට සාවුල් බිම වැටෙනවා. එතකොට ‘සාවුල්, සාවුල්! ඇයි ඔයා මට හිරිහැර කරන්නේ’ කියලා කියන කටහඬක් ඇහෙනවා. සාවුල් එක්ක ඉන්න මිනිස්සුන්ට මේ එළිය පෙනුණත්, ඒ කටහඬ ඇහුණත්, කියන්නේ මොනවාද කියලා තේරුම්ගන්න බැහැ.

‘ඔබ කවුද ස්වාමිනී’ කියලා සාවුල් අහනවා.

‘මම යේසුස්. ඔයා මට තමයි හිරිහැර කරන්නේ’ කියලා ඒ හඬ කියනවා. යේසුස් මෙහෙම කියන්නේ සාවුල් ඔහුගේ ගෝලයන්ට හිරිහැර කරනකොට ඒක යේසුස්ට දැනෙන නිසයි.

‘අනේ ස්වාමිනි, මම මොනවාද කරන්න ඕනේ’ කියලා සාවුල් දැන් අහනවා.

ඉතින් යේසුස් කියනවා ‘නැඟිටිලා දමස්කයට යන්න. ඔයා කරන්න ඕන දේ ඔයාට එහෙදී දැනගන්න ලැබෙයි’ කියලා. සාවුල් නැඟිටලා ඇස් ඇරියාම, එයාට මුකුත්ම පේන්නේ නැහැ. මෙන්න එයා අන්ධ වෙලා! ඉතින් එයාත් එක්ක හිටිය මිනිස්සුන්ට එයාව එයාගේ අතින් අල්ලාගෙන දමස්කයට ගෙනියන්න වෙනවා.

දමස්කයේ ඉන්න ගෝලයෙක්ට යේසුස් දැන් කතා කරලා මෙහෙම කියනවා: ‘අනනියස්, නැඟිටින්න. කෙළින් වීදිය කියන පාරේ ගිහිල්ලා, යූදස්ගේ ගෙදර නැවතිලා ඉන්න සාවුල් කියන කෙනා එක්ක කතා කරන්න අවසර ඉල්ලගන්න. මගේ විශේෂ සේවකයෙක් වෙන්න මම එයාව තෝරගෙන තියෙනවා.’

අනනියස් මේකට කීකරු වෙනවා. එයාට සාවුල්ව හමු වුණාම, එයා මත අත් තියලා මෙහෙම කියනවා: ‘ඔයාගේ ඇස් ආයෙමත් ඇරෙන්නත් ඔයාට ශුද්ධාත්මය ලැබෙන්නත් පුළුවන් වෙන්න මාව එවලා තියෙන්නේ ස්වාමින්.’ එතකොටම සාවුල්ගේ ඇස්වලින් කොරපොතු වගේ දෙයක් වැටිලා එයාගේ ඇස් දෙක ආයෙත් ඇරෙනවා.

රටවල් ගොඩකට ගිහින් මිනිස්සුන්ට දේශනා කරන්න දෙවි සාවුල්ව හුඟක් පාවිච්චි කරනවා. දැන් මිනිස්සු එයාව දන්නේ ප්‍රේරිත පාවුල් කියලයි. අපි එයා ගැන තවත් ගොඩක් දේවල් ඉගෙනගන්න යනවා. හැබැයි ඊට කලින් අපි බලමුද දෙවි පේතෘස්ව යවන්නේ මොනවා කරන්නද කියලා?