පරිච්ඡේද 26
ස්වයංවින්දනය—බලවත් ආශාවට එරෙහි ව සටන් කිරීමට මට හැක්කේ කෙසේ ද?
“එය ඉතා බලවත් ඇබ්බැහි වීමකි,” යයි වසර 15කට වඩා ස්වයංවින්දනය සමඟ සටන් කළ එක් යෞවන මනුෂ්‍යයෙක් පැවසී ය. “එය හුදෙක් ඕනෑ ම මත් ද්‍රව්‍යයකට හෝ මත්පැන් පානයකට පුරුදු වීම හා සමාන ය.”
කෙසේ වුවද, ප්‍රේරිත පාවුල්, රළු ස්වාමියෙකු මෙන් වීමට තම ආශාවන්ට ඉඩ හැරියේ නැත. ඊට පටහැනි ව, ඔහු මෙසේ ලීවේ ය: “මම මාගේ ශරීරය [මාංශික ආශාවන්] දැඩි ලෙස දමනය කර එය වහල් කරගනිමි.” (1 කොරින්ති 9:27, නව අනුවාදය) ඔහු තමා සමඟ ම දැඩි ව සිටියේ ය! එවැනි ම වෑයමක් ඕනෑ ම කෙනෙකුට ස්වයංවින්දනයෙන් ඉවත්වීමට හැකි කරවනු ඇත.
“ක්‍රියාත්මක වීම සඳහා ඔබේ මනස් සූදානම් කරන්න”
බොහෝ අය ස්වයංවින්දනයේ යෙදෙන්නේ සිතේ ආතතියෙන් (දැඩි පීඩනයෙන්) හා කාන්සාවෙන් සහනයක් ලැබීමට ය. එහෙත්, ස්වයංවින්දනය, ගැටලුවලට ප්‍රතිචාරය දැක්වීමට ළාමක ක්‍රමයකි. (1 කොරින්ති 13:11 සසඳන්න.) “සිතීමේ හැකියාව” පෙන්වා ගැටලුවට ම පහර දීම වඩා හොඳ දෙයකි. (හිතෝපදේශ 1:4) ගැටලු හා කලකිරීම් අභිබවා යන බව පෙනෙන්නට තිබෙන විට, “ඔබගේ හැම කරදරයක් ම [දෙවියන් වහන්සේට] භාර දෙන්න.”—1 පේතෘස් 5:6, 7, නව අනුවාදය.
ලිංගික ව අවුස්සන යම් දෙයක් ඔබ අහම්බෙන් දුටුවොත් හෝ සවන් දුන්නොත් කුමක් ද? බයිබලය මෙසේ නිර්දේශ කරයි: “ක්‍රියා කිරීමට ඔබේ මනස් සූදානම් කරන්න; ආත්ම-දමනයෙන් යුක්ත ව සිටින්න.” (1 පේතෘස් 1:13, න ඉන්ටනැෂනල් වර්ෂන්) ඔබේ මනස වෙහෙසවා දුරාචාර සිතුවිල්ල ප්‍රතික්ෂේප කරන්න. ඇවිස්සීම විගස පහ වී යනු ඇත.
එහෙත්, රාත්‍රියේ යමෙකු තනි ව සිටින විට, නරක සිතුවිලි ප්‍රතික්ෂේප කිරීම විශේෂයෙන් ම දුෂ්කර ය. එක් යෞවන ස්ත්‍රියක් මෙසේ අවවාද කරන්නී ය: “කිරීමට හොඳ ම දෙය වන්නේ එකෙණෙහි ම ඇඳෙන් බැස යම් ආකාරයේ වැඩක නිරත වීම, නැතහොත් සමහර විට සුළු ආහාරයක් ගැනීම ය, එවිට ඔබේ මනස වෙනත් දේවලට යොමු වෙනවා.” එසේ ය, ‘යම් පමණ දේ ගරුකටයුතු ද, ධර්මිෂ්ඨ ද, පිරිසිදු ද, ආදරණීය ද, ප්‍රශංසනීය ද, ඒ දේවල් මෙනෙහි කිරීමට’ ඔබට ම බල කරන්න.—පිලිප්පි 4:8.
ඔබට නිදා ගැනීමේ දුෂ්කරතාවයක් තිබෙන විට, ඇදහිලිවන්ත දාවිත් රජු ව අනුගමනය කිරීමට වෙර දරන්න, ඔහු මෙසේ ලීවේ ය: “යහනේදීත් මම ඔබ [දෙවියන් වහන්සේ] ගැන සිතන්නෙමි; රෑ යාමවල දී ඔබ ගැන මෙනෙහි කරන්නෙමි.” (ගීතාවලිය 63:6, නව අනුවාදය) දෙවියන් වහන්සේ සහ උන් වහන්සේගේ ගුණාංග ගැන සිතීමට ඔබේ මනසට බල කිරීමෙන් බොහෝ විට වශී වීමෙන් ඉවත් කරනු ඇත. මෙම අපවිත්‍ර පුරුද්ද දෙවියන් වහන්සේ සලකන ආකාරය ගැන ඔබ සිතමින් සිටිනවා නම් එය ද උපකාරවත් වේ.—ගීතාවලිය 97:10.
වැළැක්වීමේ පියවර ගන්න
“නුවණ ඇත්තා විපත්තිය දැක සැඟවෙයි; එහෙත් අනුවණයෝ නොනැවතී ගොස් අච්චු ලබති,” යයි ආනුභාවය ලත් ප්‍රඥාවන්ත මනුෂ්‍යයා පැවසී ය. (හිතෝපදේශ 22:3) දූරදර්ශී ව ක්‍රියා කිරීමෙන් ඔබ ගැන ම ඔබට නුවණැති භාවයක් දැක්විය හැක. උදාහරණයක් ලෙස, යම් ක්‍රියාකාරකම්වල යෙදීම, ඉතා හිර වූ ඇඳුම් ඇඳීම හෝ යම් ආහාර ගැනීම, ඔබ ව ලිංගික ව ඇවිස්සීමකට පත්කර තිබේ යයි ඔබට දැනේ නම්, සැබවින් ම එවන් දේවලින් වළකින්න. උදාහරණයක් ලෙස, මත්පැන් පානයන්, කෙනෙකුගේ වැළැක්වීමේ ශක්තිය හීන කළ හැකි අතර, ආත්ම-දමනය වඩා දුෂ්කර කර විය හැක. තව ද, වසංගතයක් ඇති ස්ථානයකින් ඈත් වී සිටිනවා මාගේ ම අනුරාගී මාතෘකාවන් සහිත ඕනෑ ම කියවීමේ මාධ්‍යයකින්, රූපවාහිනි වැඩසටහන්වලින් හෝ චිත්‍රපටිවලින් වැළකී සිටින්න. “නිෂ්ඵල දේ බැලීමෙන් මාගේ ඇස් හැරෙව්ව මැනව,” යයි ගීතිකාකරු යාච්ඤා කළේ ය.—ගීතාවලිය 119:37.
ඔබ විශේෂයෙන් ම එවන් දෙයකින් පහර ලබන අවස්ථාවන්වල දී ද පියවර ගත හැක. මාසයේ ඇතැම් කාලවල දී තම ලිංගික ආශාවන් වැඩි වන බව යෞවන ස්ත්‍රියකට දැනිය හැක. නැතහොත් කෙනෙකු චිත්ත වේගීය ව වේදනාවට හෝ අසහනයට පත්විය හැක. “නුඹ විපත්ති දවසේදී කලකිරෙන්නෙහි නම් නුඹේ ශක්තිය අල්පය,” යයි හිතෝපදේශ 24:10 හි අනතුරු අඟවයි. එබැවින් දිගු කාල පරිච්ඡේදයන්හි තනි ව සිටීමෙන් වළකින්න. දුරාචාර සිතුවිලි කෙරෙහි ආකර්ෂණය වීමට අඩු ප්‍රස්තාවක් දෙන, අභියෝගාත්මක කටයුතුවල ඔබේ මනස සම්බන්ධ කර තබන වැඩි වර්ධනාත්මක ක්‍රියාවලියන් සැලසුම් කරන්න.
ආත්මික ආක්‍රමණයක්
තමාට වයස අවුරුදු 11හේ සිට මෙම පුරුද්ද සමඟ සටන් කළ 27-හැවිරිදි මනුෂ්‍යයෙකුට අවසානයේ දී ජය ගත හැකි විය. “එය ආක්‍රමණශීලී වීම හා සම්බන්ධ කරුණක් විය,” යයි ඔහු පැහැදිලි කළේ ය. “මම සෑම දිනක ම අත් නෑර අඩු තරමින් බයිබලයෙන් පරිච්ඡේද දෙකක් කියවනවා.” වසර තුනක් පුරා අමතක නොකර ඔහු මෙය කර තිබේ. තවත් ක්‍රිස්තියානියෙක් මෙසේ අවවාද කරයි: “ඇඳට යාමට පෙර, ආත්මික දේවලට සම්බන්ධ යමක් කියවන්න. දවසේ අවසාන සිතුවිල්ල ආත්මික එකක්වීම ඉතා වැදගත් ය. මෙම වේලාවේ දී යාච්ඤා කිරීම ද අතිශයින් උපකාරවත් වේ.”
අන්‍යයන්ට බයිබලය ඉගැන්වීම වැනි, “ස්වාමීන්වහන්සේගේ මෙහෙයෙහි වඩ වඩා පැවතීම,” ද උපකාරවත් වේ. (1 කොරින්ති 15:58) ස්වයංවින්දනයෙන් ජය ගත් එක් ස්ත්‍රියක් මෙසේ සඳහන් කළා ය: “මෙම පුරුද්දෙන් වැළකීමට මට දැන් සැබවින් ම උපකාරවත් වන දෙයක් වන්නේ පූර්ණ-කාලීන දේව සේවකයෙකු වශයෙන් දෙවියන් වහන්සේ සමඟ අනුමැතිය ලත් සබඳතාවයක් ලබා ගැනීමට අන්‍යයන්ට උපකාර කිරීම සඳහා මගේ මනස හා ශක්තීන් සියල්ල හරවා තිබීම ය.”
හෘදයාංගම යාච්ඤාව මගින්, “සාමාන්‍ය බලය ඉක්ම වූ බලය,” සඳහා ඔබට දෙවියන් වහන්සේගෙන් අයැදීමට ද හැක. (2 කොරින්ති 4:7, NW ) “උන්වහන්සේ [දෙවියන්වහන්සේ] ඉදිරියේ නුඹලාගේ සිත් [හෘදය NW ] වගුරුවව්.” (ගීතාවලිය 62:8) එක් යෞවන ස්ත්‍රියක් මෙසේ පවසන්නී ය: “යාච්ඤාව ශක්තියේ ක්ෂණික බලකොටුවකි. ආශාව ඇතිවන අවස්ථාවේ දී යාච්ඤා කිරීම ස්ථිරයෙන් ම උපකාරවත් වේ.” තව ද, හිරු උදාවීමේ සිට මුළු දවස පුරා ම, දෙවියන් වහන්සේට ඔබේ අධිෂ්ඨානයන් දන්වා, ශක්තිය ලබා දෙන උන් වහන්සේගේ ශුද්ධාත්මය ඉල්ලා කන්නලව් කරන්න.—ලූක් 11:13.
අන්‍යයන්ගෙන් උපකාරය
ඔබේ පුද්ගලික වෑයම් සාර්ථක නොවුවහොත්, දෙමව්පියෙකු හෝ ක්‍රිස්තියානි වැඩිමහල්ලෙකු වැනි, උපකාර කළ හැකි කෙනෙකු සමඟ කථා කරන්න. මේරූ ක්‍රිස්තියානි ස්ත්‍රියක තුළ විශ්වාසය තැබීම උපකාරවත් බව යෞවන ස්ත්‍රීන්ට දැනිය හැක. (තීතස් 2:3-5) බලාපොරොත්තු නැති කර ගැනීමේ තත්ත්වයට ම වාගේ පත් ව සිටි එක් යෞවන මනුෂ්‍යයෙක් මෙසේ පැවසුවේ ය: “එක් සවසක ඒ ගැන මගේ පියා සමඟ මම පුද්ගලික ව කථා කළා.” ඔහු මෙසේ හෙළි කළේ ය: “සියල්ලක් ම ඔහුට කීමට මට අතිශය පරිශ්‍රමයක් දරන්ට සිදු වුණා. මා ඔහුට පැවසූ විට මං හැඬුවා, මට මහත් ලජ්ජාවක් ඇති වෙලා තිබුණා. ඒත් ඔහු පැවසූ දෙය මම කිසිදාක අමතක කරන්නෙ නෑ. ඔහුගේ මුහුණේ ධෛර්යවත් කරන සිනහවක් ඇතුව, ඔහු මෙසේ පැවසී ය: ‘ඔබ ගැන මහත් ආඩම්බරයක් ඔබ මා තුළ ඇති කරනවා.’ එම කාරණයට පැමිණීමට මට විඳින්නට වූ දේ ගැන ඔහු දැන සිටියේ ය. මගේ ස්වභාවය හා අධිෂ්ඨානය වඩා උසස් කිරීමට වෙන කිසි වචනයකට නොහැකි වන්නට ඉඩ තිබුණි.
“මා ‘වැඩි දුරකට ගොස්’ නැති බව දැනගැනීමට මට උපකාර කිරීමට මගේ පියා මට ශුද්ධලියවිලි පද කිහිපයක් එවිට පෙන්වූවා,” යයි යෞවනයා තවදුරටත් පැවසී ය, “තව ද එවිට මගේ වැරදි ක්‍රියා මාර්ගයේ බරපතළකම මා තේරුම් ගත්තා දැයි සහතික වීමට තව ශුද්ධලියවිලි පද කිහිපයක් පෙන්නුවා. යම් කාලයක් යන තුරු ‘කිසි දෝෂාරෝපණයක් නැතුව සිටින්න,’ පසු ව නැවතත් අපි එය සාකච්ඡා කරමු, කියා ඔහු කිව්වා. මා නැවතත් එයට වැටුණොත් ඉන් මාව යටපත් කිරීමට ඉඩ නෑර, වඩා දිගු කාල පරිච්ඡේදයකට නැවත වරක් ඊට ඉඩ නොදී සිටින්න යයි ඔහු මට පැවසුවා.” ගැටලුව සම්පූර්ණයෙන් ම ජය ගැනීමෙන් පසු ව, යෞවනයා මෙසේ පැවසුවේ ය: “මගේ ගැටලුව ගැන වෙනත් කෙනෙකු දැන සිටීම හා මට උපකාර කිරීම උතුම් ම ප්‍රයෝජනය විය.”
නැවත එයට වැටී යාම සමඟ ක්‍රියා කිරීම
පුරුද්ද ජය ගැනීමට මහන්සි වී වැඩ කිරීමෙන් පසු ව, එක් යෞවනයෙක් නැවත එයට වැටීමෙන් දුක් වින්දේ ය. ඔහු මෙසේ පිළිගත්තේ ය: “තෙරපීමේ බරක් මා මත තිබුණාක් මෙන් විය. මට බෙහෙවින් නොවටිනා භාවයක් දැනුණා. මං එවිට මෙසේ හේතු මවා ගත්තා: ‘මා බොහෝ දුර ගිහින්. දැන් නම් මට යෙහෝවඃ වහන්සේගේ අනුග්‍රහය කොහොමවත් ලැබෙන්නේ නෑ. එනිසා මා ගැන ම දැඩි ව සිටින්නේ ඇයි?’ ” කෙසේ වුවද, නැවත එයට වැටීමෙන් කෙනෙක් සටනින් පරාජය වී ඇතැයි අදහස් නොකරයි. එක් 19-හැවිරිදි ගැහැණු ළමයෙක් මෙසේ සිහිපත් කරන්නී ය: “ප්‍රථමයෙන් සෑම රාත්‍රියක ම වාගේ එය සිදු වුණා, නමුත් පසු ව යෙහෝවඃ වහන්සේ කෙරෙහි වැඩි විශ්වාසයක් තැබීමට මා පටන් ගත්තා, උන් වහන්සේගේ ආත්මයේ උපකාරය ඇතුව මා දැන් එයින් අහක්වීමට සමත් නොවන්නේ වසරකට හය වරක් පමණක් වෙන්න පුළුවන්. ඊට පස්සේ මහත් වරදක් කළ බව මට හැඟෙන නමුත් මා අසමත් වන සෑම අවස්ථාවක ම, ඊළඟ පරීක්ෂාව පැමිණෙන විට, මම වඩා ශක්තිමත් ව සිටිනවා.” එබැවින් ක්‍රමක්‍රමයෙන් ඇය ඇගේ සටනින් ජය ගනිමින් සිටින්නී ය.
එයට නැවත වැටීම සිදු වන විට, ඒ කරා මඟ පෙන්වූයේ කුමක් දැයි විභාග කරන්න. එක් යෞවනයෙක් මෙසේ පවසයි: “මා කියවමින් සිටි හෝ සිතමින් සිටි දේ මම නැවත මතක් කරගන්නවා. මා වරදට වැටීමට හේතුව සැමවිට ම වාගේ මට හරියට ම දක්වන්න පුළුවන්. මෙයාකාරයෙන් එය කිරීම නැවැත්වීමට හා නිවැරදි කිරීමට මට පුළුවන.”
යහපත් සටනක විපාක
ස්වයංවින්දනයෙන් ජය ගත් එක් යෞවනයෙක් මෙසේ පැවසී ය: “ගැටලුව ජය ගැනීමට පටන් ගත් දා සිට, යෙහෝවඃ වහන්සේ ඉදිරියේ පිරිසිදු හෘදය සාක්ෂියක් තබා ගැනීමට මට හැකි අතර, එය, වෙන කිසි දෙයක් උදෙසා මා අලෙවි නොකරන දෙයකි!”
එසේ ය, යහපත් හෘදය සාක්ෂියක්, ආත්ම-වටිනාකමේ දියුණු හැඟීමක්, වඩා උසස් සදාචාර ශක්තියක් සහ දෙවියන් වහන්සේ සමඟ කිට්ටු සබඳතාවයක්, යන සියල්ල ම ස්වයංවින්දනයට එරෙහි ව යහපත් සටනක විපාක වේ. අවසානයේ දී ස්වයංවින්දනයෙන් ජය ගත් එක් යෞවන ස්ත්‍රියක් මෙසේ පවසන්නී ය: “මාව විශ්වාස කරන්න, මෙම පුරුද්දෙන් ජය ගැනීමට දරන වෑයම ඉතා වටනේ ය.”
සාකච්ඡා කිරීම සඳහා ප්‍රශ්න
◻ කාමුක සිතුවිලි පිළිබඳ ව සිතීම අනතුරුදායක වන්නේ මන්ද? යෞවනයෙකුට ඔහුගේ හෝ ඇගේ මනස වෙනත් දෙයක් කරා යොමු කිරීමට කළ හැක්කේ කුමක් ද?
◻ ස්වයංවින්දනයේ ආශාවට ඉඩ දීමේ පරීක්ෂාව අඩු කිරීමට යෞවනයෙකුට ගත හැක්කේ කිනම් වැළැක්වීමේ පියවර ද?
◻ ආත්මික ආක්‍රමණශීලී භාවයක් උපකාරවත් වන්නේ මන්ද?
◻ මෙම පුරුද්ද ජය ගැනීමේ දී යාච්ඤාව ඉටු කරන්නේ කුමන කාර්ය භාරයක් ද?
◻ මේ සම්බන්ධයෙන් ගැටලුවක් තිබෙනවා නම් යම් කෙනෙකු තුළ විශ්වාසය තැබීම උපකාරවත් වන්නේ මන්ද?
[208 සහ 209 පිටුවල ඇති කොටුව]
කාමුක කෘති—පුරුද්දකට හැරිය හැකි අතර අනතුරුදායක ය!
“ කාමුක කෘති හැමතැන ම තිබෙනවා: ඔබ වීථියේ ඇවිදින විට—එහි පත්‍ර විකුණන තැන ඒවා පැහැදිලි ව විදහා තිබෙනවා,” යයි 19-හැවිරිදි රොනල්ඩ් සිහිපත් කළේ ය. “ අපගේ ගුරුවරුන්ගෙන් සමහරෙක් ඒවා පාසලට ගෙනවිත්, ඔවුන්ගේ ලියන මේස ළඟ තබා ගෙන ඊළඟ පංතිය පැමිණෙන තෙක් කියවනවා.” එසේ ය, විවිධ වයස්වල, පසුතලයන්වල සහ අධ්‍යාපනික මට්ටම්වල, සිටින බොහෝ ජනයා කාමුක කෘති කියවීමට ලොල් ව සිටිති. මාර්ක් නමැති යෞවනයෙක් පැවසුවේ මෙසේ ය: “ මා පහත් කාන්තා සඟරා කියවූ විට සහ බැලූ විට එහි වූ ඡායාරූප ප්‍රමෝදය ඇති කළා! . . . මෙම සඟරාවල නව කලාපයන් පැමිණෙන තුරු මං ඕනෑකමින් බලා සිටිනවා, මන්ද වරක් මා බැලූ ඒවා නැවත බැලීමෙන් එම ප්‍රමෝදය ඇවිස්සීමේ හැඟීම ම මට ලබා දුන්නේ නෑ. එය පුරුද්දකට හැරෙන එකක්.” එහෙත් එය හොඳ පුරුද්දක් ද?
කාමුක කෘති තුළ ප්‍රබල පණිවිඩයක් තිබේ: ‘ලිංගික දේ හුදු ස්වයං-පිනවීම සඳහා ය.’ ඉන් වැඩි හරියක් ස්ත්‍රී දූෂණය හා කාමාතුර සාහසිකකමින් පිරී පවතියි. එතරම් නීච නොවන දේවල් (දැඩි නොවන මාධ්‍යයන්) තවදුරටත් ඇවිස්සීමක් ඇති නොකරන ඒවා බවට විගස බොහෝ ප්‍රේක්ෂකයන්ට දැනෙන අතර එබැවින් ඔවුහු ඊටත් වඩා නීච පින්තූර හෝ චිත්‍රපටි සොයති! න්‍යූ යෝර්ක් විශ්ව විද්‍යාලයේ සහකාර මහාචාර්යවරයෙකු වූ අර්නස්ට් වැන් ඩෙන් හාග් පැවසූ ආකාරයට: “ අපේ ම වින්දනයේ බලවත් හැඟීම් සඳහා ආත්මාර්ථකාමී ලෙස යොදා ගන්නා වූ වස්තුන් හා මස් කැබලි වශයෙන් පමණක් අන්‍යයන් ව සැලකීමට කාමුක කෘති අපට ආරාධනා කරයි.”
කාමුක කෘති බොහෝ විට විවාහ ගැටලුවලට මඟ පාදන ලිංගික දේට අතිශයින් ඇලුම් කරන ආකල්පයක්, පූජනීයත්වයේ ලා ගැනෙන දෙයක් ලෙස, තවදුරටත් ඉදිරිපත් කරයි. එක් යෞවන භාර්යාවක් පවසන්නේ මෙසේ ය: “ කාමුක කෘති කියවීමෙන් පොත්වල විස්තර කර ඇති අසාමාන්‍ය දේවල් මගේ පුරුෂයාගෙන් බලාපොරොත්තු වීමට මා තුළ ආශාවක් ඇති කළා. මෙය නොකඩවා කලකිරීමකට පත්වීමට හා ලිංගික අධෛර්යයකට පත්වීමට මඟ පෑදුවා.” කාමුක කෘති කියෙවු පුරුෂයන් ඇති ව සිටි ස්ත්‍රීන්ට එමඟින් ඔවුන්ගේ සබැඳියාව කෙරෙහි ඇති කළ බලපෑම් සම්බන්ධයෙන් ස්ත්‍රීන් සිය ගණනක් අතරෙහි 1981 දී සමීක්ෂණයක් පවත්වන ලදි. ඉන් අඩක් පමණ වාර්තා කළේ එය බරපතළ ගැටලු ඇති කළ බවයි. ඇත්තෙන් ම එය ඇතැම් විවාහයන් හෝ විවාහ ගිවිසුම් විනාශ කර දැමී ය. එක් භාර්යාවක් මෙසේ ශෝක වූවා ය: “ මට සිතා ගත හැක්කේ කාමුක කෘති මගින් ලිංගික තෘප්තිය සඳහා [මගේ පුරුෂයාගේ] ආශාව සහ අවශ්‍යතාවයනට, මා නොසෑහෙන බව පමණයි. . . . මා ඔහු ව සතුටු කළ හැකි ස්ත්‍රියක වුණා නම් යයි මම දෙවියන් වහන්සේට පවසන, නමුත් ඔහු කැමති වන්නේ, ප්ලාස්ටික් සහ කොලවලට වන අතර ඔහුගේ අවශ්‍යතාවය, මගේ කොටසක් විනාශ කරලා තිබෙනවා . . . කාමුක කෘති . . . ප්‍රේමයේ විරුද්ධ දෙයයි . . . එය අශෝභන, කෲර මෙන් ම විනාශදායක ය.”
කෙසේ වුවද, ක්‍රිස්තියානි යෞවනයන්ට මහත් සැලකිල්ලක් දැක්විය හැකි දෙයක් වන්නේ, කාමුක කෘති, දෙවියන් වහන්සේ ඉදිරියේ පිරිසිදු ව සිටීමට කෙනෙකු ගන්නා උත්සාහයන්වලට කෙළින් ම විරුද්ධ ව ක්‍රියා කරනවා ය යන කාරණය ය. (2 කොරින්ති 6:17–7:1) “ තමුන්ගේ සිත් දැඩිවීම නිසා” පැරණි කාලයේ සිටි සමහරෙකු “ හැඟීමක් නැතුව සියලු අපවිත්‍රකම් ගිජු ලෙස කරන පිණිස සල්ලාලකමට භාර වුණෝය,” කියා බයිබලය පෙන්නුම් කරයි. (එපීස 4:18, 19) එවන් දූෂණයක් අත්දැකීමට ඔබට වුවමනා ද? මතක තබාගන්න, කාමුක කෘතිවලට කලාතුරකින් හෝ ආශාවක් දැක්වීමෙන් කෙනෙකුගේ හෘදය සාක්ෂියට වද නොදෙන බලපෑමක් ඇති විය හැක. එය ඇතැම් යෞවන ක්‍රිස්තියානින්ට ස්වයංවින්දනයේ යෙදීමට, ඊටත් නරක ලෙස, ලිංගික දුරාචාරයේ යෙදීමට, මඟ පාදා ඇත. එසේ නම්, ඥානවන්ත දෙය වන්නේ, කාමුක කෘතිවලින් නිදහස් ව සිටීමට ප්‍රයත්නයක් දැරීම ය.
“ බොහෝ අවස්ථාවල කාමුක කෘති කෙළින් ම මගේ නෙතට ගැටෙනවා,” යයි යෞවන ඩැරිල් පවසයි. “ එබැවින් දුටු වහා ම මට එය බලන්නට ම සිදු වෙනවා; නමුත් දෙවෙනි වර බැලීමට මට අවශ්‍යතාවයක් නෑ.” එසේ ය, ඒවා පැහැදිලි ව විදහා තිබෙන තැන් දෙස බැලීම ප්‍රතික්ෂේප කරන්න, එමෙන් ම ඒ දෙස බැලීමට පංතියේ මිතුරන් ඔබ ව උනන්දු කිරීමට ඉඩ හැරීම ප්‍රතික්ෂේප කරන්න. 18-හැවිරිදි කැරන් හේතු දැක් වූයේ මේ ආකාරයට ය: “ අසම්පූර්ණ මනුෂ්‍යයෙකු වශයෙන් නිර්මල හා ප්‍රශංසා කටයුතු දේවල් කෙරෙහි මගේ මනස යොමු කර තබා ගැනීම දුෂ්කර දෙයකි. මා වුවමනාවෙන් ම කාමුක කෘති කියවනවා නම් ඊටත් වඩා එය දුෂ්කර දෙයක් වෙන්නේ නැද්ද?”
[206 පිටුවෙහි ඇති පින්තූර]
“යාච්ඤාව ශක්තියේ ක්ෂණික බලකොටුවකි. ආශාව ඇතිවන අවස්ථාවේ දී යාච්ඤා කිරීම ස්ථිරයෙන් ම උපකාරවත් වේ”