41වෙනි පරිච්ඡේදය
මතභේදයට තුඩු දුන් විෂයක්
සීමොන්ගේ නිවසේ කල් ගෙවීමෙන් කෙටි කලකට පසුව, යේසුස් දැන් දෙවෙනි වතාවටත් ගලීලයේ දේශනා කිරීමේ සංචාරයක් අරඹනවා. කලින් එම ප්‍රදේශයේ කළ සංචාරයේදී ඔහු සමඟ ගියේ ඔහුගේ මුල් ගෝලයන් වන පේතෘස්, අන්දෘ, යාකොබ් සහ යොහන්. නමුත් දැන් ප්‍රේරිතයන් 12දෙනාම සහ සමහර ස්ත්‍රීන්ද ඔහු සමඟ හවුල් වෙනවා. මොවුන් අතරේ මරියා මග්දලේනා, සුසෑනා සහ යොවානා සිටිනවා. යොවානාගේ ස්වාමිපුරුෂයා හෙරොද් රජුගේ නිලධාරියෙක්.
යේසුස්ගේ සේවය වඩ වඩා පුළුල් ලෙස කරගෙන යද්දී ඔහුගේ ක්‍රියාකාරකම් පිළිබඳව පැන නැඟ තිබෙන මතභේදයත් වඩ වඩා උත්සන්න වෙනවා. අන්ධ මෙන්ම ගොළු, භූතාවේශ වූ මනුෂ්‍යයෙක් යේසුස් වෙතට ගේනවා. ඔහුට නැවත කතා කිරීමටත් දැකීමටත් පුළුවන් වන සේ යේසුස් ඔහුව භූත බලපෑමෙන් නිදහස් කරනවා. සමූහයන් මෙය දැක පුදුමයෙන් පුදුමයට පත් වී මෙසේ අසයි. “මොහු දාවිත්ගේ පුත්‍රයා විය නොහැකිද?”
යේසුස් නැවතී සිටින නිවස වටා එතරම් විශාල ජන සංඛ්‍යාවක් එක් රොක් වී සිටින නිසා, ඔහුටත් ඔහුගේ ගෝලයන්ටත් ආහාර ගැනීමට පවා ඉඩක් ලැබෙන්නේ නැහැ. ඔහු පොරොන්දු වූ “දාවිත්ගේ පුත්‍රයා” විය හැකියයි සිතන අයට අමතරව, යෙරුසලමේ සිට ඔහුට අවමන් කිරීමට ඇවිත් සිටින ලියන්නෝ සහ පරිසිවරුද එතැන සිටිනවා. යේසුස් නිසා ඇති වී තිබෙන මේ කැලඹීම ගැන ඔහුගේ නෑදෑයන්ට අසන්න ලැබෙන විට ඔවුන් එතැනට පැමිණෙනවා ඔහුව අල්ලාගෙන යෑමට. ඒ ඇයි?
යේසුස් දෙවිගේ පුත්‍රයා බව ඔහුගේම සහෝදරයන් පවා තවමත් විශ්වාස කරන්නේ නැහැ. ඒ වගේම, යේසුස් නාසරෙත්හි ඇති දැඩි වෙද්දී ජනයා අතර මේ විදිහේ කැලඹීමක් හා ආරවුලක් ඇති වන ආකාරයෙන් ඔහු හැසිරෙනවා ඔවුන් කිසිවිටෙක දැක තිබුණේ නැහැ. ඒ නිසා, ඔවුන් විශ්වාස කරන්නේ යේසුස්ට බරපතළ මානසික ආබාධයක් තිබෙනවා කියායි. ‘ඔහු සිහිවිකල් වී සිටිනවා’ කියා නිගමනය කරමින් ඔවුන් දැන් ඔහුව අල්ලාගෙන යෑමට උත්සාහ කරනවා.
එහෙත් යේසුස් භූතාවේශ වූ මිනිසාව සුව කළ බවට පැහැදිලි සාක්ෂි තිබෙනවා. ලියන්නන් සහ පරිසිවරුන් දන්නවා මෙහි සත්‍යතාව නිෂ්ප්‍රභ කිරීමට තමන්ට නොහැකි බව. එබැවින් යේසුස්ට අවමන් කිරීමේ අරමුණින් ඔවුන් මිනිසුන්ට මෙසේ පවසනවා. “මේ මිනිසා භූතයන්ගේ පාලකයා වන බෙල්සෙබුබ් මාර්ගයෙන් මිස වෙන විධියකින් භූතයන් දුරු නොකරන්නේය.”
ලියන්නන්ගේ හා පරිසිවරුන්ගේ සිතිවිලි දන්නා යේසුස් ඔවුන්ව තමන් වෙතට කැඳවා මෙසේ පවසනවා. “යම් රාජ්‍යයක් භේදව තිබෙන්නේද ඒ රාජ්‍යය පාළු වන්නේය. යම් නුවරක් හෝ ගෙයක් හෝ භේදව තිබෙන්නේද ඒ නුවර හෝ ගෙය නොපවතී. ඒ ආකාරයෙන්ම, සාතන් විසින්ම සාතන්ව දුරු කරනු ලැබේ නම්, ඔහු තමන්ටම විරුද්ධව භේද වී සිටියි. එසේ නම් ඔහුගේ රාජ්‍යය පවතින්නේ කෙසේද?”
ඔහු ඔවුන්ගේ චෝදනා නිෂ්ප්‍රභ කිරීමට බිඳ හෙළිය නොහැකි තර්ක යොදාගන්නේ මොන තරම් දක්ෂ ලෙසද! තමන්ගේම පක්ෂයට අයත් අය භූතයන් දුරු කර තිබෙනවා කියා පරිසිවරුන් පවසන නිසා යේසුස් මෙසේත් ප්‍රශ්න කරනවා. “මා භූතයන් දුරු කරන්නේ බෙල්සෙබුබ් මාර්ගයෙන් නම්, ඔබේ පුත්‍රයන් භූතයන්ව දුරු කරන්නේ කවරෙකු මාර්ගයෙන්ද?” වෙනත් වචනවලින් පවසනවා නම්, ඔවුන් යේසුස්ට එරෙහිව නඟන චෝදනාව එක සේ ඔවුන්ටත් අදාළ කරගත යුතුයි. යේසුස් ඊළඟට මෙලෙස අනතුරු අඟවනවා. “මා දෙවිගේ ආත්මය මගින් භූතයන් දුරු කරනවා නම්, සැබවින්ම දෙවිගේ රාජ්‍යය ඔබ කරා පැමිණ තිබේ.”
තමා විසින් භූතයන්ව දුරු කරනු ලැබීම සාතන් කෙරෙහි ඇති තමාගේ බලය නිරූපණය කිරීමක් කියා පහදා දීමට යේසුස් උදාහරණයක් දෙමින් මෙසේ පවසනවා. “ශක්තිමත් මිනිසෙකුගේ ගෙට කඩා වැද ඔහුගේ බඩු බාහිරාදිය ගැනීමට නම් පළමුව ඔහුව බැඳ දැමීමට අවශ්‍ය නොවේද? ඔහුව බැඳ දැමූ පසු, ඔහුගේ ගෙය කොල්ල කන්නේය. මට පක්ෂව නොසිටින්නා මට විරුද්ධය. මා සමඟ රැස් නොකරන්නා විසුරුවාහරියි.” තමුන් සාතන්ගේ නියෝජිතයන් බව නිරූපණය කරමින් පරිසිවරුන් ස්ථිරසාර ලෙස යේසුස්ට විරුද්ධව සිටිනවා. ඊශ්‍රායෙලිතයන්ව යේසුස් වෙතින් විසුරුවාහරින්නයි ඔවුන් වෑයම් කරන්නේ.
ඒ නිසා, ‘ශුද්ධාත්මයට විරුද්ධව කරන අපහාසයට සමාව නොලැබෙන’ බව පවසමින් සාතන්ගේ දූතයන් වන මෙම විරුද්ධවාදීන්ට යේසුස් අනතුරු අඟවනවා. ඔහු එය පැහැදිලි කරන්නේ මෙසේයි. “කවුරු නමුත් මනුෂ්‍ය පුත්‍රයාට විරුද්ධව වචනයක් කියන්නේද, ඒ සඳහා ඔහුට සමාව ලැබේ. එහෙත් කවුරු නමුත් ශුද්ධාත්මයට විරුද්ධව කතා කළොත්, දැන් පවතින ක්‍රමයේවත් පැමිණෙන්න තිබෙන ක්‍රමයේවත්, ඔහුට සමාව නොලැබේ.” දෙවිගේ ශුද්ධාත්මය මගින් සිදු කෙරුණු ආශ්චර්යයක් බවට පැහැදිලිව පෙනෙන්න තිබෙන මෙම ක්‍රියාව සාතන්ගේ ක්‍රියාවක් බව ද්වේෂසහගත ලෙස පැවසීමෙන්, ලියන්නන් හා පරිසිවරුන් සමාව දීමට බැරි පාපයක් සිදු කොට තිබෙනවා. මතෙව් 12:22-32; මාක් 3:19-30; ලූක් 8:1-3; යොහන් 7:5; NW.
▪ යේසුස් ගලීල ප්‍රදේශයේ කළ දෙවන සංචාරය පළමුවැනි එකට වඩා වෙනස් වන්නේ කෙසේද?
▪ යේසුස්ගේ නෑදෑයන් ඔහුව අල්ලාගැනීමට තැත් කරන්නේ ඇයි?
▪ යේසුස්ගේ ප්‍රාතිහාර්යයන් සම්බන්ධයෙන් ඔහුට අවමන් කිරීමට පරිසිවරුන් උත්සාහ කරන්නේ කෙසේද? යේසුස් ඔවුන්ගේ චෝදනා නිෂ්ප්‍රභ කරන්නේ කෙසේද?
▪ එම පරිසිවරුන් කුමක් සම්බන්ධයෙන් වරදකරුවන් වී සිටිනවාද? ඒ ඇයි?