සැබෑ දෙවියන් කවුද?

මිනිස්සු, හුඟාක් දෙවිවරුන්ට නමස්කාර කරනවා. හැබැයි ඉන්නේ එකම සැබෑ දෙවි කෙනෙක් විතරයි කියලා බයිබලයේ සඳහන් වෙනවා. ඔහු අතිශ්‍රේෂ්ඨයි, සදාකාලිකයි, ඔහුට සමාන වෙන කිසිම කෙනෙක් නැහැ. ස්වර්ගයේ වගේම පොළොවේ තියෙන හැම දෙයක්ම හැදුවෙත් අපිට ජීවිතය දුන්නෙත් ඔහුයි. ඒ නිසා අපේ නමස්කාරය ලබන්න වටින්නේ ඔහු පමණයි.

දෙවියන්ට නමක් තියෙනවා. ඔහුගේ නම යෙහෝවා. ඔහු මෝසෙස්ට මෙහෙම කිව්වේ ඒ නිසයි. “ඔබ ඊශ්‍රායෙල් පුත්‍රයන්ට මෙසේ කියන්න. ‘ඔබේ මුතුන්මිත්තන්ගේ දෙවි වන යෙහෝවා, එසේය ආබ්‍රහම්ගේ, ඊසාක්ගේ සහ යාකොබ්ගේ දෙවි ඔබ වෙතට මාව එව්වේය.’ සදහටම මගේ නාමය එයයි. පරම්පරාවෙන් පරම්පරාවට මා සිහි කරනු ලබන්නේ ඒ නාමයෙන්ය.” (නික්මයාම 3:15) “යෙහෝවා නම් වූ ඔබ පමණක් මුළු පොළොවටම මහෝත්තම දෙවි බව සියල්ලන්ට දැනගැනීමට සලස්වන්න” කියාත් බයිබලයේ සඳහන් වෙනවා. එහි යෙහෝවා යන නම 7,000 වතාවක් විතර සඳහන් වෙනවා.—ගීතාවලිය 83:18.

දෙවියන් ඉන්නේ ස්වර්ගයේ. ඔහු මෝසෙස්ට මෙහෙම කිව්වා. “මාගේ මුහුණ දකින්න ඔබට නුපුළුවන. මන්ද මනුෂ්‍යයෙකුට මා දැක ජීවත් විය නොහැක.” (නික්මයාම 33:20) දෙවියන්ට සමාන රූප සාදාගෙන ඒවාට නමස්කාර කිරීම වැරදියි. දෙවියන්, මෝසෙස් මාර්ගයෙන් මෙහෙම අණ කළා. “රූප සාදා නොගන්න. අහසේ හෝ පොළොවේ හෝ ජලයේ හෝ තිබෙන කිසිම දෙයක හැඩයකට සමාන රූප සාදා නොගන්න. ඔබ ඒවා ඉදිරියේ වැඳ නොවැටෙන්න. නමස්කාර නොකරන්න. මන්ද යෙහෝවා නම් වූ ඔබේ දෙවි වන මම වෙනත් දෙවිවරුන්ට කරන නමස්කාරය දැඩි ලෙස හෙළාදකින්නෙමි.” දෙවියන් මෙහෙමත් කිව්වා. “මාගේ නාමය යෙහෝවාය. මට හිමි ගෞරවය වෙන කිසිවෙකු සමඟ මම බෙදා නොගන්නෙමි. මට ලැබිය යුතු ප්‍රශංසාව දේවතා රූපයකට දීමට ඉඩ නොදෙන්නෙමි.”—නික්මයාම 20:2-5; යෙසායා 42:8.

සමහර මිනිස්සු දෙවියන්ව විශ්වාස කළත් මිත්‍රයෙක් වගේ කිට්ටු බැඳීමක් ඔහු එක්ක ඇති කරගන්න පුළුවන් කියලා හිතන්නේ නැහැ. ඔබ හිතන්නේ මොකක්ද? දෙවියන් ඔබ ගැන සැලකිලිමත් කියලා ඔබ හිතනවාද? ඔහුව හොඳින් හඳුනාගෙන මිත්‍රයෙක් වගේ කිට්ටු බැඳීමක් ඇති කරගන්න පුළුවන් වෙයිද? දෙවියන් ගැන බයිබලයේ සඳහන් වෙන්නේ මොනවාද කියලා අපි බලමු.