එක්ව යෙහෝවා දෙවියන්ට නමස්කාර කරන්න

ඔයාටත් ඔයාගේ පවුලේ අයටත් උදව් වෙන බයිබල් ප්‍රතිපත්ති කොච්චර තියෙනවද කියලා ඔයා මේ සඟරාව කියවද්දී දකින්න ඇති. ඔයා ඔයාගේ පවුලේ අයත් එක්ක සතුටින් ඉන්නවටයි යෙහෝවා දෙවියන් කැමති. දෙවිට නමස්කාර කරන්න ඔයාගේ ජීවිතේ පළවෙනි තැන දුන්නොත් ‘අවශ්‍ය ඒ සියලු දේම ඔයාට දෙනවා’ කියලා දෙවියන් පොරොන්දු වෙලා තියෙනවා. (මතෙව් 6:33) දෙවියන්ට ඕනෙ ඔයාව එයාගේ හොඳ යාළුවෙක් කරගන්නයි. ඒ අවස්ථාව නැති කරගන්න එපා. කෙනෙක්ට ලබන්න පුළුවන් වටිනාම දේ ඒකයි.—මතෙව් 22:37, 38.

1 යෙහෝවා දෙවිට තවත් කිට්ටු වෙන්න

බයිබලයේ මෙහෙම කියනවා: “‘මම ඔබට පියෙක් වන්නෙමි. ඔබ මට පුත්‍රයන්ද දූවරුන්ද වන්නහුය’ කියා සියලු බලැති යෙහෝවා දෙවි පවසන්නේය.” (2 කොරින්ති 6:18) හොඳ යාළුවෝ හැම තිස්සෙම කතාබහ කරනවා. දෙවිටත් ඕනෙ ඔයා ඔහු එක්ක යාළුවෙක් වගේ කතා කරනවටයි. ඒ නිසා “නොකඩවා යාච්ඤා කරන්න” කියලා ඔහු කියනවා. (1 තෙසලෝනික 5:17) ඔයාගේ හිතේ තියෙන හැම දේම අහන්න ඔහු කැමැත්තෙන් ඉන්නවා. (ෆිලිප්පි 4:6) පවුලේ අයවත් එකතු කරගෙන දෙවියන්ට යාච්ඤා කරද්දී ඔයාට දෙවියන් කොච්චර ඇත්ත කෙනෙක්ද කියලා ඒගොල්ලෝ තේරුම්ගනියි.

හිතේ තියෙන දේවල් කියනවා වගේම ඔයා දෙවියන් කියන දේවල්වලට ඇහුම්කන් දෙන්නත් ඕනේ. බයිබලය, ඒකේ තියෙන තොරතුරු ඇතුළත් පොත් පත් අධ්‍යයනය කළොත් ඒක කරන්න ඔයාට පුළුවන්. (ගීතාවලිය 1:1, 2) ඉගෙනගන්න දේවල් ගැන හොඳට හිතන්න. (ගීතාවලිය 77:11, 12) සාක්ෂිකරුවන්ගේ රැස්වීම්වලට වරද්දන්නේ නැතුව යන එකත් දෙවියන් කියන දේවල් අහන්න පුළුවන් එක විදිහක්.—ගීතාවලිය 122:1-4.

යෙහෝවා දෙවියන් ගැන අනිත් අයට කියන එකෙනුත් ඔහු එක්ක තියෙන බැඳීම වැඩි වෙනවා. දෙවියන් ගැන අනිත් අයට කතා කරන තරමට ඔයා තවත් දෙවිට කිට්ටු වෙනවා.—මතෙව් 28:19, 20.

මෙහෙම කරලා බලන්න:

• බයිබලය කියවන්නත් යාච්ඤා කරන්නත් හැමදාම වෙලාවක් වෙන් කරගන්න

• විනෝදයට, විවේක සුවයට මුල් තැන දෙනවට වඩා පවුලක් විදිහට දෙවිට නමස්කාර කරන්න මුල් තැන දෙන්න

2 පවුලේ නමස්කාරය රසවත්ම අද්දැකීමක් කරගන්නa

බයිබලයේ මෙහෙම කියනවා: “දෙවිට ළං වන්න. එවිට ඔහු ඔබට ළං වෙයි.” (යාකොබ් 4:8) පවුලේ නමස්කාරයට හොඳ කාලසටහනක් හදාගෙන වරද්දන්නේ නැතුව ඒක කරන්න. (උත්පත්ති 18:19) යෙහෝවා දෙවියන්ව ඔයාගේ පවුලේම කෙනෙක් කරගන්න. “නිවසේ සිටින විටත් ගමන්බිමන් යන විටත් විවේක සුවයෙන් සිටින විටත් අවදි වන විටත්” දෙවියන් එක්ක තියෙන බැඳීම වැඩි කරන දේවල් පවුලේ අය එක්ක කතා කරන්න. (ද්විතීය කතාව 6:6, 7) යොෂුවා වගේ වෙන්න. ඔහු කිව්වේ “මමත් මගේ පවුලේ අයත් යෙහෝවා දෙවිට මිස වෙන කිසිවෙකුට නමස්කාර කරන්නේ නැහැ” කියලයි.—යොෂුවා 24:15.

මෙහෙම කරලා බලන්න:

• පවුලේ එක් එක් කෙනා ගැන හිතලා ඒ අයට ගැළපෙන විදිහට පවුලේ නමස්කාරය සැලසුම් කරන්න