සබත් දවසේ යහපත් වැඩක් කරන්න පුළුවන්ද?

යේසුස් ගලීලයේ ඉඳන් කරපු සේවයෙන් මේ වෙද්දී හුඟක් හොඳ ප්‍රතිඵල ලැබිලයි තියෙන්නේ. ඒත් “දෙවිගේ රාජ්‍යය ගැන ශුභාරංචිය වෙනත් නුවරවලත් දේශනා කළ යුතුයි” කියා ඔහු පවසනවා. යේසුස් එහෙම කියන්නේ ගලීලයට අමතරව වෙනත් නුවරවලත් දේශනා කරන්න ඕනෙ කියලා ඔහු තේරුම් අරන් ඉන්න නිසයි. දැන් ඔහු “යුදයේ නුවරවල සංචාරය කරමින් එහි සිනගෝගවල දේශනා” කරන්න පිටත් වෙනවා. (ලූක් 4:43, 44) යේසුස් යුදයට යන එක ගැන පුදුම වෙන්න ඕනෙ නැහැ. මොකද වසන්ත කාලය උදා වෙලා තියෙන නිසා යුදෙව්වරු යෙරුසලමේ පවත්වන උත්සවයත් ළඟ ළඟම එනවා.

ගලීලයේදී යේසුස් කරපු සේවය ගැන සුවිශේෂ පොත්වල හුඟක් තොරතුරු වාර්තා වෙලා තිබුණත් ඔහු යුදයේ ඉඳන් කරපු සේවය ගැන ඒ හැටි තොරතුරු වාර්තා වෙලා නැහැ. යුදයේදී යේසුස් කරන සේවයට හුඟදෙනෙක්ගෙන් හොඳ ප්‍රතිචාරයක් ලැබුණේ නැති වුණත් යන යන හැම තැනකම ශුභාරංචිය දේශනා කරන ඔහු දිගටම යහපත් ක්‍රියාවන් කරනවා.

වැඩි දවසක් යන්න කලින් යේසුස් යුදයේ ප්‍රධාන නගරය වන යෙරුසලම බලා පිටත් වෙනවා. ඒ ක්‍රි.ව. 31දී පවත්වන පාස්කුව සමරන්නයි. යෙරුසලමේ බැටළු දොරටුව අසල කුලුණු සහිත සක්මන් මළුවලින් වට වුණු පොකුණක් තියෙනවා. ඒ පොකුණ හඳුන්වන්නේ බෙත්සාතා නමින්. විවිධ අසනීපවලින් පෙළෙන, අන්ධ, අත පය පණ නැති අය තමයි මේ පොකුණට එන්නේ. ඒ වගේ අය මෙතැනට එන්නේ පොකුණේ වතුර කැලඹෙද්දී ඒකට බැස්සොත් අසනීප සුව වෙනවා කියලා මිනිසුන් අතරේ විශ්වාසයක් තියෙන නිසයි.

සබත් දවසේදී යේසුස් ඒ පොකුණ ළඟට ආවාම අවුරුදු 38ක් පුරා අසනීපයෙන් ඉන්න මිනිසෙක්ව ඔහු දකිනවා. “ඔබ කැමතිද සුව වෙන්න” කියලා යේසුස් ඔහුගෙන් ඇහුවාම ඒ මිනිසා පිළිතුරු දෙන්නේ මෙහෙමයි. “මහත්මයාණෙනි, වතුර කැලඹෙන විට පොකුණට බහින්න මට උදව් කරන්න කවුරුත් නැහැ. මම යන්න උත්සාහ කරන විට මට කලින් තවත් කෙනෙක් වතුරට බහිනවා.”—යොහන් 5:6, 7.

යේසුස් ඔහුට පවසන්නේ “නැඟිට, ඔබේ යහනත් රැගෙන ඇවිදින්න” කියායි. (යොහන් 5:8) අදහාගන්නවත් බැරි විදිහට ඒ මොහොතේම සුවය ලබන ඒ මිනිසා යහනත් අරන් ඇවිදින්න පටන්ගන්නවා.

ඒ පුදුමාකාර දේ ගැන සතුටු වෙනවා වෙනුවට යුදෙව්වන් ඒ මිනිසා පිට වරද පටවමින් මෙහෙම කියනවා. “අද සබත් දවස කියා ඔබ දන්නේ නැද්ද? මේ විදිහට ඔබේ යහන උසුලාගෙන යෑම නීති විරෝධීයි.” එතකොට ඒ මිනිසා “‘ඔබේ යහන රැගෙන ඇවිදින්න’ කියා මට කිව්වේ මාව සනීප කළ තැනැත්තායි” කියා පවසනවා. (යොහන් 5:10, 11) ඒක ඇහුවාම සබත් දවසේදී අසනීපයෙන් සිටි ඒ මිනිසාව සුව කරපු කෙනා එක්ක යුදෙව්වන්ට කේන්තියක් ඇති වෙනවා.

“ඔබට, ‘එය රැගෙන ඇවිදින්න’ කියා පැවසුවේ කවුද” කියා ඔවුන් ඒ මිනිසාගෙන් අහනවා. ඔවුන් එහෙම අහන්නේ ඒ වෙද්දිත් “යේසුස් එතැනින් ඉවත්ව” ගිහින් හිටිය නිසයි. තමන්ව සුව කරපු කෙනාගේ නම මොකක්ද කියලා ඒ මිනිසා දන්නෙත් නැහැ. (යොහන් 5:12, 13) ඒත් ටික වෙලාවකට පස්සේ ඔහුට දේවමාලිගාවේදී යේසුස්ව මුණගැහුණාම පොකුණ අසලදී තමන්ව සුව කළේ කවුද කියලා ඔහු දැනගන්නවා.

සුවය ලබපු ඒ මිනිසා තමන්ගෙන් ප්‍රශ්න කරපු යුදෙව්වන්ව මුණගැහිලා තමන්ව සනීප කළේ යේසුස් කියා ඔවුන්ට පවසනවා. ඒක අහලා ඔවුන් යේසුස්ව හමු වෙන්න යනවා. ඔවුන් යන්නේ යේසුස් එවැනි බලවත් ක්‍රියා කරන්නේ කොහොමද කියලා දැනගන්න නෙවෙයි. ඒ වෙනුවට සබත් දවසේදී යහපත් වැඩක් කරපු එක ගැන ඔහුට චෝදනා කරන්නයි. ඔවුන් යේසුස්ට පීඩා කරන්නත් පටන්ගන්නවා.