ස්තුතිවන්ත වන්න—යෙහෝවඃ වහන්සේගේ මෙසියානු රාජ්‍යය පාලනය කරයි

“සර්වපරාක්‍රමවූ, ස්වාමිවූ [යෙහෝවඃ NW] දෙවියන් වහන්ස, ඔබගේ මහත් බලය රැගෙන ඔබ රජකම්කළ බැවින් අපි ඔබට ස්තුතිකරමු”—එළිදරව් 11:17.

එක් දහස් නවසිය එකළොස් වන වසරේ මුල් භාගයේ දී, වොච්ටවර් සමිතියේ සභාපති, සී. ටි. රසල්, යුරෝපයේ ප්‍රධාන නගරවල බයිබල් දේශන මාලාවක් දුන්නේ ය. එම සංචාරය ගැන විස්තර කරමින් 1911 මැයි 15 වන ද වොච්ටවර් හි පහත සඳහන් දෙය රසල් ලීවේ ය: “සෑම තැනක ම සමෘද්ධියේ බොහෝ සාක්ෂි දැකීමෙන් අපි මවිතයට පත්වීමු . . . භයානක කරදර කාලයකින් මෙම යුගය අවසාන වීමට වසර කිහිපයක් තිස්සේ අපි අපේක්ෂා කරමින් සිටින බව අපගේ පාඨකයන් දැන සිටිති, තවද 1914 ඔක්තෝබර් මාසය වැඩි කලක් යාමට පෙර එය හදිසියේ ම හා බලගතුකමකින් යුක්ත ව සිදුවීම අපි අපේක්ෂා කරමු, දැනට අපට ශුද්ධලියවිලි අවබෝධකර ගැනීමට හැකි වී තිබෙන පරිදි, අන්‍ය ජාතීන්ගේ කාලවල්—විජාතීන්ට පොළොව පාලනය කිරීමේ බද්ද—අවසාන වන දිනය එය වේ; එමනිසා, මෙසියස් වහන්සේගේ රාජ්‍යයේ පාලනය පටන් ගැනීමට කාලය එය වනු ඇත.” මෙම අපේක්ෂාව ඉටු වී ද?

² එක් දහස් නවසිය දාහතරේ මුල් භාගය තුළ දී, ලෝකය යුද්ධයෙන් ආරක්ෂා වී හා සුරක්ෂිත වී තිබෙන බවක් පෙනෙන්ට තිබිණ. එහෙත් 1914 ජූනි 28වන දා සර්බියාවේ වැසියකු විසින් ඔස්ට්‍රියාවේ සිංහාසනය හිමි කුමරු ඝාතනය කිරීම නිසා සාමය හදිසියේ ම බිඳ වැටිණ. ඔස්ට්‍රියාව-හන්ගේරියාව ඉක්මනින් ම සර්බියාවට එරෙහි ව යුද්ධ ප්‍රකාශ කළහ. රුසියාව සර්බියාවේ පැත්ත ගත්තේ ය, එබැවින් අගෝස්තු පළමුවන දා රුසියාවට එරෙහි ව ජර්මනිය යුද්ධ ප්‍රකාශ කළේ ය. ඊළඟට අගෝස්තු 3වන දා ජර්මනිය ප්‍රංශයට එරෙහි ව යුද්ධ ප්‍රකාශ කළේ ය; අගෝස්තු 4වන දා මහා බ්‍රිතාන්‍ය ජර්මනියට එරෙහි ව ද; අගෝස්තු 7වන දා මොන්ටෙනිග්‍රෝව, ඔස්ට්‍රියාව-හන්ගේරියාවට එරෙහි ව ද; අගෝස්තු 23වන දා ජපානය ජර්මනියට එරෙහි ව ද; අගෝස්තු 28වන දා ඔස්ට්‍රියාව-හන්ගේරියාව බෙල්ජියමට එරෙහි ව ද යුද්ධ ප්‍රකාශ කළහ. යුද්ධය ඉක්මනින් අවසාන වනු ඇතැයි බොහෝ අය විශ්වාස කළහ. ඒ වෙනුවට, එය ඒ දක්වා සිදු වූ දරුණු ම යුද්ධය බවට පත් විය, තවත් රටවල් 19ක් පැති ගනිමින් ජාත්‍යන්තර ලේ වැගිරීමක යෙදුන අතර, හමුදා භටයන් සහ පුරවැසියන් 1,30,00,000 ක් මරුමුවට පත් වූ අතර, 2,10,00,000 කට වැඩි පිරිසක් තුවාල ලැබූවන් හා අංග විකල වූවන් බවට පත් විය.

³ එක් දහස් නවසිය දාහතරේ ඔක්තෝබර් 2 වෙනි සිකුරාදා උදෑසන දී, න්‍යූ යොර්ක්, බෘක්ලින් හි වොච්ටවර් සමිතියේ මූලස්ථාන කාර්යය මණ්ඩලයට රසල් මෙසේ ප්‍රකාශ කළේ ය: “අන්‍ය ජාතීන්ගේ කාලවල් අවසාන වී තිබේ; ඔවුන්ගේ රජවරුන්ගේ දවස අවසාන වී තිබේ.” “දෙවියන් වහන්සේගේ ගෘහය” වන බෙතල් පවුලෙහි අය උද්‍යෝගිමත් අත් පොළසන් නාදයකින් මෙයට සතුට පළ කළහ.

⁴ එම ඔක්තෝබර් උදෑසන දී, සී. ටී. රසල්ට හා ඔහුගේ සමාගම්කරුවන්ට එතරම් සතුටුවීමට තිබූ හේතුව කුමක් ද? “අන්‍යජාතීන්ගේ කාලවල්” යන කියමනෙහි මූලාරම්භය කොතැනින් ද? 1914 ඔක්තෝබර් හි දී අන්‍ය ජාතීන්ගේ කාලවල් අවසාන වූ බවට තිබෙන සාක්ෂි කවරේ ද? තවද එය ඔබට බලපෑ යුත්තේ කෙසේ ද?

යෙරුසලම හා අන්‍ය ජාතීන්ගේ කාලවල්

⁵ “අන්‍ය ජාතීන්ගේ කාලවල්,” හෝ “ජාතීන්ගේ නියම කරන ලද කාලවල්,” යන ප්‍රකාශය පැමිණෙන්නේ යෙරුසලමේ විනාශය පිළිබඳ යේසුස් වහන්සේගේ සුප්‍රකට අනාවැකියෙන් ය. (ලූක් 21:​5-36) එය දීමට දින දෙකකට පෙර, ඔවුන්ගේ මෙසියස් වහන්සේ වශයෙන් යෙරුසලමේ වැසියන්ට යේසුස් වහන්සේ තමන් ව ම ඉදිරිපත් කළ සේක. නගරය දෙසට කොටළුවකුගේ පිටෙහි උන් වහන්සේ යටහත් ලෙස ගමන් කරද්දී, සෙකරියා 9:9හි පුරෝකථනය කර තිබූ පරිදි යුදෙව් සමූහයෝ ජයග්‍රාහි ලෙස මොරගැසූහ. “ස්වාමීන්වහන්සේගේ [යෙහෝවඃ NW] නාමයෙන් එන්නාවූ රජ ආශීර්වාදලත්තෙක්ය.” යැයි ඔව්හු මොරගැසූහ.—ලූක් 19:​28-40.

⁶ නුමුත් ඔවුන්ගේ පියා වූ, යක්ෂයාගේ බලපෑම යටතේ යෙරුසලමේ ආගමික නායකයන් විසින් මිනීමරු වෛරයක් දැක්වීම නිසා මහජන මතය ඉක්මනින් ම තමන්ට එරෙහි ව නැඹුරු වන බව යේසුස් වහන්සේ දැන සිටි සේක. (උත්පත්ති 3:15; යොහන් 8:44) ඉන් ටික කලකට පසු, නීසාන් 14වන දා, යේසුස් වහන්සේ ව මරණයට පත් කරන ලෙස යුදෙව්වරු පිරිසක් උද්ඝෝෂණය කළහ. “ඔහුගේ ලේ අප පිටද අපගේ දරුවන් පිටද වේවා” කියා අකමැති වූ රෝම ආණ්ඩුකාරයාට ඔව්හු කෑගැසූහ. (මතෙව් 27:​24, 25) මෙසියානු රජ වශයෙන් යේසුස් වහන්සේ ව පිළිගන්නවා වෙනුවට, නායක පූජකයෝ මෙසේ ප්‍රකාශ කළහ: “කායිසර් මිස අපට රජෙක් නැත.” (යොහන් 19:15) රෝමයට එරෙහි ව කැරලිගසන්නකු හා යුදෙව්වරුන්ගේ දෙවියන් වහන්සේට එරෙහි ව අපහස කරන්නකු හැටියට බොරු චෝදනාවක් කර, ඉන්පසු මියයාම සඳහා සැබෑ මෙසියස් වහන්සේ ව වධ කණුවකට ඇනගසන ලදි.—මාර්ක් 14:​61-64; ලූක් 23:2; යොහන් 18:36; 19:7.

⁷ ඔවුන්ගේ දැඩි ලේ වරද නිසා යුදයේ වැසියන් පිට දිව්‍ය උදහස පැමිණීම නියත ව තිබුණි. එහි විශිෂ්ට දේවමාලිගාව සහිත ව, යෙරුසලම යෙහෝවඃ වහන්සේ වන “මහ රජුගේ නුවර” යයි තවදුරටත් පැවසිය නොහැක. (මතෙව් 5:35; ලූක් 13:​33-35) යේසුස් වහන්සේගේ මරණයට දින කිහිපයකට පෙර, නුවර දේවමාලිගාවේ ගොඩනැගිලි ගැන උන් වහන්සේගේ ගෝලයෝ ආඩම්බරයෙන් කථා කළහ. ඊට පිළිතුරු වශයෙන්, යේසුස් වහන්සේ මෙසේ පුරෝකථනය කළ සේක: “නුඹලා බලන මේ දේවල් වනාහි ගලක් පිට ගලක් ඉතුරු නොවන හැටියට කඩා දමනු ලබන දවස් පැමිණෙන්නේය.”—ලූක් 21:​5, 6.

⁸ යේසුස් වහන්වසේගේ ගෝලයෝ පුදුම වී මෙසේ ඇසූහ: “ආචාරිනි, ඒ දේ කොයි කලෙක වන්නේද? ඒවා සිදුවෙන්ට එන කල ලකුණ කිමෙක්ද?” (ලූක් 21:7) පිළිතුරු වශයෙන් යේසුස් වහන්සේ යෙරුසලමේ විනාශය දක්වා සිදුවන සිද්ධීන් නිවැරදි ව පුරෝකථනය කර, ඉන්පසු මෙම වැදගත් ප්‍රකාශය එකතු කළ සේක: “අන්‍යජාතීන්ගේ කාලවල් සම්පූර්ණ වන තෙක් යෙරුසලම අන්‍යජාතීන් විසින් මඬිනු ලබන්නීය.” (ලූක් 21:​8-24) මෙසේ යෙරුසලමේ විනාශය ඉක්මවූ යම්කිසිවකට—“අන්‍යජාතීන්ගේ කාලවල් සම්පූර්ණ වන තෙක්” බලා සිටීමට සිදු වූ යම්කිසිවකට—යේසුස් වහන්සේ අවධානය යොමු කළ සේක. “ලකුණ,” ගැන සඳහන් කරමින් යේසුස් වහන්සේ මෙසේ පැවසූ සේක: “මේ දේ සිදුවෙනවා නුඹලා දකින කල, දෙවියන්වහන්සේගේ රාජ්‍යය ළඟ බවත් දැනගනිල්ලා.” (ලූක් 21:31) එමනිසා, ලකුණට දෙයාකාර ඉටුවීමක් තිබිණ. පළමුවැන්න හෝ සුළු පරිමාණ ඉටුවීමෙන් අඟවනු ඇත්තේ ‘යෙරූසලමෙහි විනාශය ආසන්න’ බව ය. (ලූක් 21:20) දෙවැන්න සහ වඩාත් විශාල ඉටුවීම පැමිණෙනු ඇත්තේ අන්‍ය ජාතීන්ගේ කාලවල් අවසාන වූ විට ය, තවද “දෙවියන්වහන්සේගේ රාජ්‍යය ළඟ බව” ඉන් අඟවනු ඇත.—මතෙව් 24:3 සසඳන්න.

ශ්‍රේෂ්ඨ නුවරක් භූමික යෙරුසලමෙහි ස්ථානය ගනී

⁹ “අන්‍යජාතීන්ගේ කාලවල් සම්පූර්ණ වන තෙක් යෙරුසලම අන්‍යජාතීන් විසින් මඬිනු ලබන්නීය” යයි පැවසීමෙන් අන්තිමේ දී භූමික නුවර දිව්‍ය අනුග්‍රහයට නැවත පිහිටුවන බවක් යේසුස් වහන්සේ යෝජනා කළ සේක් ද? නැත. දෙවියන් වහන්සේගේ ප්‍රේමනීය පුත්‍රයාණන් මරුමුවට පත් කිරීමෙන් පසු, භූමික යෙරුසලමට එහි විශේෂ තත්ත්වය සදහට ම නැති වූ අතර, වඩා ශ්‍රේෂ්ඨ නගරයක් වූ “ජීවමාන දෙවියන්වහන්සේගේ නුවරවූ ස්වර්ගීක යෙරුසලම” එහි තැන ගත්තේ ය.—හෙබ්‍රෙව් 12:22; මතෙව් 23:​37, 38; 27:​50, 51.

¹⁰ “ස්වර්ගීක යෙරුසලම” යන ප්‍රකාශය බයිබලයෙහි පාවිච්චි කර ඇත්තේ විනාශ කළ නොහැකි ස්වර්ගීක රාජ්‍යය විස්තර කිරීමට ය, ඊට අභිෂේකලත් ක්‍රිස්තියානීන් කැඳවා ඇත.a (හෙබ්‍රෙව් 11:10; 12:​22, 28) ප්‍රේරිත පාවුල් මෙය ලියනු ලැබූ විට, දේවමාලිගාව හා භූමික නගරය ගැන යුදෙව්වරු තවමත් ආඩම්බර වූහ. එබැවින්, “පවතින නුවරක් අපට මෙහි නැත, අප විසින් සොයන්නේ මතු පැමිණෙන නුවර” යයි පාවුල් හෙබ්‍රෙව් ක්‍රිස්තියානීන්ට මතක් කළේ ය.—හෙබ්‍රෙව් 13:14.

ස්වර්ගීක යෙරුසලම ලෙස හැඳින්වීමට හේතුව

¹¹ යෙරුසලම වනාහි ඊශ්‍රායෙල් ජාතියේ අගනුවර ලෙස බොහෝ කලක් පැවතුන අතර, එහි රජවරු ‘යෙහෝවඃ වහන්සේගේ සිංහාසනයෙහි හිඳගත්’ බව පවසා තිබේ. (1 ලේකම් 29:23) එමෙන් ම, රජකම සදහට ම දාවිත්ගේ පවුල තුළ පවතින බවට යෙහෝවඃ වහන්සේ ඔහු සමඟ ගිවිසුමක් කළ සේක. වොෂිංටන්, මොස්කව්, කැන්බරා, සහ ප්‍රෙටෝරියා වැනි නවීන-දින අගනුවරවල් ඒවායෙහි ම ආණ්ඩු හඳුන්වා දීමට පාවිච්චි කරන්නාක් මෙන් ම, දාවිත්ගේ රාජ්‍යය නියෝජනය කිරීමට බයිබලයෙහි යෙරුසලම යොදා තිබේ.—2 සාමුවෙල් 7:16; ලූක් 1:32.

¹² දාවිත්ගේ රාජ්‍යයට සීමිත බල ප්‍රදේශයක් තිබිණ, පුරාණ ඊශ්‍රායලයේ දෙවියන් වහන්සේ විග්‍රහ කරන ලද දේශ සීමාවලට පමණක් ව්‍යාප්ත ව තිබිණ. එමනිසා, භූමික යෙරුසලම වනාහි ස්වකීය බල ප්‍රදේශය වශයෙන් මුළු පොළොව ම ඇතු ව ස්වර්ගයෙන් පාලනය කරනු ලබන සැබෑ මෙසියානු රාජ්‍යයේ ආදර්ශයක් පමණක් විය. (ගීතාවලිය 2:​2, 7, 8; දානියෙල් 7:​13, 14; 2 තිමෝති 4:18) එබැවින්, 1889හි වොච්ටවර් සමිතිය විසින් ප්‍රකාශයට පත් කරන ලද ද ටයිම් ඉස් ඇට් හෑන්ඩ් යන පොත පැහැදිලි ව ම මෙසේ සඳහන් කළේ ය: “අන්‍ය ජාතීන්ගේ කාලවල්” යන යෙදුම අපගේ ස්වාමීන් වහන්සේ විසින් අදාළ කළේ දෙවියන් වහන්සේගේ ආදර්ශ රාජ්‍යය වන, ඊශ්‍රායෙල් රාජ්‍යයේ ඉවත් කිරීම, (එසකියෙල් 21:​25-27) සහ එහි ප්‍රතිමූර්තිය වන, දෙවියන් වහන්සේගේ සැබෑ රාජ්‍යයේ හඳුන්වා දීම හා නැවත පිහිටුවීම අතරෙහි ඇති පෘතුවි ඉතිහාසයේ කාලපරිච්ඡේදයට ය.”

අන්‍ය ජාතීන්ගේ කාලවල්—කොපමණ දීර්ඝ ද?

¹³ පොදු යුගයට පෙර 607හි බබිලෝනීය රජ වන නෙබුකද්නෙශර් විසින් දෙවියන් වහන්සේගේ ආදර්ශ රාජ්‍යය පෙරළා දමන ලදි. හත්වන යුදෙව් මාසයේ ඔක්තෝබර් මැද හරියේ දී පමණ දේශය පාළු වී තිබිණ.b (2 රාජාවලිය 25:​8, 9, 22, 25, 26) මෙය සිදු වූයේ දිව්‍ය අවසරයකින් බව ඔප්පු කිරීමට යෙහෝවඃ දෙවියන් වහන්සේ නෙබුකද්නෙශර්ට ස්වප්නයක් දුන් සේක. කපා දමනු ලැබ “කාලවල් හතක” කාලපරිච්ඡේදයකින් පසු එය නැවත වැඩීමට අවසර දුන් ගසක් ඊට ඇතුළත් විය. තාවකාලික සිහිවිකලත්වයකින් පසු නෙබුකද්නෙශර් තමාගේ සිංහාසනයට නැවත පිහිටවනු ලැබූ විට, ස්වප්නයට මුල් ඉටුවීමක් තිබිණ.—දානියෙල් 4:​10-17, 28-36.

¹⁴ කෙසේවුවද, නෙබුකද්නෙශර්ගේ ස්වප්නයේ තේමාවෙන් පෙන්නුම් කළේ එහි ප්‍රධාන ඉටුවීමට දෙවියන් වහන්සේගේ ආදර්ශ රාජ්‍යය ඇතුළත් බව ය, එය ‘කපා දැමීමට’ එම අන්‍ය ජාතික රජට අවසර දී තිබිණ. මෙම අරමුණ සහිත ප්‍රකාශය ඇතු ව ස්වප්නය නිමා කෙරිණ: “මනුෂ්‍යයන්ගේ රාජ්‍යය කෙරෙහි මහෝත්තමයාණන්වහන්සේ බලය පවත්වා, තමන් කැමති කෙනෙකුට ඒක දී, මනුෂ්‍යයන්ගෙන් නීචයෙකු [ඉතා පහත් කෙනෙකුට පො. න. අ.] නුමුත් එය කෙරෙහි පත්කරන බව ජීවත්ව සිටින අය දැනගන්න පිණිස” ය.—දානියෙල් 4:17.

¹⁵ “මනුෂ්‍යයන්ගෙන් ඉතා පහත් කෙනෙකු” වශයෙන් හඳුන්වනු ලැබීමට සුදුසුකම් ලැබුවේ එක තැනැත්තෙක් පමණකි. දෙවියන් වහන්සේගේ ඒක-ජාතක පුත්‍රයාණන් එබන්දෙක් බව ඔප්පු විය. මනුෂ්‍යයකු වශයෙන්, යේසුස් වශයෙන් ඉපදීමට උන් වහන්සේ කැමැත්තෙන් තමන්ගේ ස්වර්ගීක තේජස අත්හැරිය සේක, තවද සාතන්ගේ අතින් උන් වහන්සේ ඉතා ම නින්දිත හා කුරීරු මරණය වින්ද සේක. (පිලිප්පි 2:​3, 5-11) ස්වර්ගීක තේජසට උන් වහන්සේගේ නැවත නැගිටීමෙන් පසු, මනුෂ්‍යවර්ගයා කෙරෙහි මෙසියානු රජ වශයෙන් සිංහාසනාරූඪ වීමට පෙර අන්‍ය ජාතීන්ගේ පාලනයේ කාලවල් සතේ කාලපරිච්ඡේදය අවසාන වන තෙක් බලා සිටීමට යේසුස් වහන්සේට සිදු වූ සේක.—හෙබ්‍රෙව් 10:​12, 13.

¹⁶ නුමුත් කාලවල් සතේ දිග යෙහෝවඃ වහන්සේගේ සාක්ෂිකරුවන් තේරුම් ගැනීමට පැමිණියේ කෙසේ ද? ‘කාලයක් කාලවල් හා කාල භාගයක්’ හෝ කාලවල් තුනහාමාරක් දින 1260කට සමාන බව බයිබලය හෙළි කරයි. (එළිදරව් 12:​6, 14) එමනිසා, එහි දෙගුණයක් හෝ කාලවල් සතක් දින 2520කට සමාන වනු ඇත. “අවුරුද්දකට දවසක්” යන අනාගතය හෙළි කරන ප්‍රතිපත්තියේ පදනම මත, කාලවල් සත අවුරුදු 2520 කට සමාන වනු ඇත. (ගණන් කථාව 14:34; එසකියෙල් 4:6) මෙම ගණන් කිරීම අනුව, අන්‍ය ජාතීන්ගේ කාලවල් පො.යු.පෙ. 607හි ආරම්භ වී, වසර 2520කට පසු 1914හි ඔක්තෝබර් හි අවසාන විය.

¹⁷ එක් දහස් නවසිය දාහතරේ ඔක්තෝබර් හි, යෙහෝවඃ දෙවියන් වහන්සේ ස්වකීය ප්‍රේමනීය පුත්‍රයාණන් වන, ස්වාමී වූ යේසුස් ක්‍රිස්තුස් වහන්සේ ව ස්වර්ගීක සිංහාසනයෙහි පිහිටෙවූ සේක. අන්තිමේ දී, ක්‍රිස්තියානි ප්‍රේරිත යොහන්ගේ එළිදරව් දර්ශනය සැබෑවක් වීමට පටන් ගත්තේ ය, තවද මෙම ප්‍රකාශය කළ හැකි විය: “ලෝකයේ අධිපතිකම අපගේ ස්වාමීන්වහන්සේටද [යෙහෝවඃ වහන්සේ] තමන් ක්‍රිස්තුස් වහන්සේටද වූයේය. උන්වහන්සේ [යෙහෝවඃ වහන්සේ] සදාකාලේටම රජකම්කරනසේක.” (එළිදරව් 1:10; 4:1; 11:15) මෙය මොනතරම් තේජාන්විත ශුභාරංචියක් ද, එමෙන් ම එම රාජ්‍යයේ සියලු ම හවුල් උරුමක්කරුවන් හා එහි යටත් වැසියන් උදෙසා උපරීම සතුටට එය මොනතරම් හේතුවක් ද!—එළිදරව් 11:17.

¹⁸ එක් දහස් නවසිය දාහතරේ සිට මනුෂ්‍යවර්ගයාගෙන් වැඩි දෙනකුට පොළොව මත වැඩි සතුටක් තිබී නැති බව සැබෑ ය. නුමුත් පොළොවේ දුඃඛිත තත්ත්වයන්ගෙන් ඔප්පු වන්නේ සාතන්ගේ පාලනය අවසාන වීමට ළඟ බව ය. මෙය අප දන්නේ කෙසේ ද? දෙවියන් වහන්සේගේ රාජ්‍යය පිහිටුවීමේ දී ස්වර්ගයේ යුද්ධයක් සිදු වනු ඇතැයි එළිදරව් පොත ඇඟවූයේ ය. සාතන් හා ඔහුගේ භූතයන් ස්වර්ගයෙන් නෙරපාදමා, අපගේ පෘතුවිය අවට ප්‍රදේශයට සීමා කිරීමට නියම වී තිබිණ. මෙම ජයග්‍රහණය අනාගතය හෙළි කරන දර්ශනයකින් දැකීමෙන් පසු, මෙසේ ශබ්දනගා පවසන හඬක් යොහන්ට ඇසිණ: “ස්වර්ගයෙනි, එහි වසන්නෙනි, ප්‍රීතිවෙයල්ලා. ගොඩටත් මුහුදටත් දුක්වේ! මක්නිසාද යක්ෂයා තමාට ඇත්තේ ස්වල්ප කාලයක් බව දන්නා බැවින්, මහත් උදහසින් යුක්තව නුඹලා වෙතට බැස ගියේය.”—එළිදරව් 12:​1-12.

¹⁹ එක්දාස් නවසිය දාහතරේ සිට නරක්වෙමින් පවතින තත්ත්වයන්ගෙන් ඔප්පු වන්නේ යොහන්ගේ දර්ශනය සැබෑවක් වී තිබෙන බව හා දෙවියන් වහන්සේගේ පරමාධිපත්‍යයට යටත්වීම ප්‍රතික්ෂේප කරන සියලු මනුෂ්‍යයන්ගේ අවසානය අවදානම් ලෙස කිට්ටු වී තිබෙන බව ය. (ලූක් 21:​10, 11, 25-32) සර්වපරාක්‍රමයාණන් වන යෙහෝවඃ දෙවියන් වහන්සේ පොළොව කෙරෙහි ස්වකීය පරමාධිපත්‍යය පිළිබඳ මහත් ප්‍රශ්නය විසඳන විට, මෙම පුදුමාකාර කාලයෙහි ජීවත්වීම මොනතරම් ප්‍රබෝධදායක ද! එවිට, පෘතුවිය අලංකාර පාරාදීසයකට පරිවර්තනය කරනු ලබන අතර, ධර්මිෂ්ඨ මනුෂ්‍ය බේරී ජීවත්වන්නන් පරිපූර්ණභාවයට ගෙනෙනු ලබනවා ඇත. මළවුන් පවා නැවත නැගිටවනු ලැබ, සදාකාල ජීවනය සඳහා සුදුසුකම් ලැබීමට ප්‍රස්තාවක් ලබා දෙනු ඇත.—එළිදරව් 20:​1-3, 12, 13; 21:​3-5.

සකස්වීම සඳහා නූතන අවශ්‍යතාවක්

²⁰ එක් දහස් නවසිය දාහතරට පෙර වසර 38ක් සඳහා, එවකට බයිබල් ශිෂ්‍යයන් වශයෙන් හඳුන්වනු ලැබූ යෙහෝවඃ වහන්සේගේ සාක්ෂිකරුවෝ එම දිනය අන්‍ය ජාතීන්ගේ කාලවල් අවසාන වන වසර වශයෙන් පෙන්වා දෙන ලදහ.c ඔවුන් යෙහෝවඃ වහන්සේගේ සැබෑ සේවකයන් බවට එය මොනතරම් කැපීපෙනෙන සාක්ෂියක් ද! නුමුත්, දෙවියන් වහන්සේගේ පළමු සියවසේ සේවකයන් මෙන්, ඔවුන්ට ද යම් වැරදි අපේක්ෂා තිබිණ. උදාහරණයක් වශයෙන්, 1914 ඔක්තෝබර් වන විට අභිෂේකලත් ක්‍රිස්තියානීන්ගේ සම්පූර්ණ සංඛ්‍යාව ස්වර්ගයට ඔසවා ගනු ඇතැයි ඔව්හු අපේක්ෂා කළහ. 1914හි පටන් ගත් යුද්ධය සාතන්ගේ ලෝකයේ අවසානයට කෙලින් ම මගපෙන්වනු ඇතැයි ඔව්හු සිතූහ.

²¹ කෙසේ වුවද, කල්යාමේ දී, පොළොවෙහි තමන්ට වැඩ බොහෝමයක් කරන්ට තිබෙන බව අභිෂේකලත් ක්‍රිස්තියානීහු වටහා ගත්හ. පළමු ලෝක යුද්ධය තුළ දී ප්‍රසිද්ධ සාක්ෂිදැරීමේ වැඩයෙහි ඔවුන් නොකඩවා යෙදී සිටි නිසා, ක්‍රිස්තියානි ලෝකයේ පූජකයන් විසින් පොලඹවනු ලැබ, දේශපාලන අධිකාරීන්ගේ කුරීරු පීඩා ඔවුන් අත්දිටී ය. (ගීතාවලිය 2:​1-6) එක්සත් ජනපදයේ සිටි වොච්ටවර් සමිතියේ ප්‍රමුඛ නිලධාරීන් බොරු චෝදනා මත වසර 20කට බන්ධනාගාරයට යවනු ලැබූ විට, 1918හි ජූනි 21වන දා සැබෑ ක්‍රිස්තියානීන්ගේ කටයුතුවලට දැඩි පහරක් වැදිණ.

²² එක් දහස් නවසිය දහඅටේ නොවැම්බර් හි දී පළමු ලෝක යුද්ධය හදිසියේ ම අවසාන විය. ඊළඟට, 1919 මාර්තු 25වන දා, වොච්ටවර් සමිතියේ නිලධාරීන් බන්ධනාගාරයෙන් නිදහස් කෙරිණ. පසු ව ඔවුන් සියලු චෝදනාවලින් නිදහස් කෙරිණ. එම විශ්වාසවන්ත අභිෂේකලත් ක්‍රිස්තියානීන්ට අනපේක්ෂිත සාමයේ කාලයක් විවෘත විය, පො.යු. 33හි ක්‍රිස්තුස් වහන්සේගේ මුල් ගෝලයන් ශුද්ධාත්මයෙන් බලවත් කරනු ලැබූ විට ඔවුන්ට ලැබුණු ප්‍රස්තාවලට සමාන ඒවා විය.—ක්‍රියා 2:​17-21, 41.

²³ එක් දහස් නවසිය දහනමවන දා සිට, විශ්වාසවන්ත අභිෂේකලත් ක්‍රිස්තියානීන් කණ්ඩායමක් හැටියට මතෙව් 24:14හි යේසුස් වහන්සේගේ වචනවලට ඇතුළත් ආඥාවට ජ්වලිත ලෙස කීකරු වී තිබේ: “රාජ්‍යයේ මේ ශුභාරංචිය සියලු ජාතීන්ට සාක්ෂියක් පිණිස ලොව මුළුල්ලේ ප්‍රකාශ කරනු ලබන්නේය; එවිට අන්තිමය පැමිණෙන්නේය.” මෙහි ප්‍රතිඵලයක් වශයෙන්, අභිෂේකලත් ඉතිරි අය සමඟ එකමුතු ව ක්‍රිස්තුස් වහන්සේගේ “වෙනත් බැටළුවන්” මිලියන සතරක් පමණ යෙහෝවඃ වහන්සේට සේවය කිරීමට තමන්ගේ ජීවිත යොදවා තිබේ. (යොහන් 10:16) ක්‍රිස්තියානි ලෝකය, සිය පූජකයන්ගේ බලපෑම යටතේ, රාජ්‍යය පණිවුඩය නොකඩවා ප්‍රතික්ෂේප කරමින් සිටින්නී ය. මනුෂ්‍ය දේශපාලන ව්‍යාපාරවලට එහි ඇති කැමැත්ත සහ යෙහෝවඃ වහන්සේගේ සාක්ෂිකරුවන්ට එය පීඩා කිරීම සමාන වනුයේ යුදයේ සිටි පළමු සියවසේ වැසියන් විසින් ක්‍රිස්තුස් වහන්සේට සිදු කරනු ලැබූ දරුණු සැලකිල්ලට ය. යෙහෝවඃ වහන්සේ ස්වකීය විනිශ්චය යෙරුසලම කෙරෙහි ඉටු කළාක්මෙන් ම, අභක්තික යෙරුසලමේ ප්‍රතිමූර්තිය වන, ක්‍රිස්තියානි ලෝකයට ද උන් වහන්සේ එසේ කරනවා ඇත. එමෙන් ම ක්‍රිස්තුස් වහන්සේගේ විනිශ්චය ඇසූ පරම්පරාව උන් වහන්සේ පුරෝකථනය කළ විනාශය අත්දැකීමට ජීවත්වූවාක්මෙන් ම, 1914 සිට පවතින වර්තමාන පරම්පරාව ද පුරෝකථනය කරන ලද “මහත් පීඩාව” පැමිණීමට කලින් ‘පහව යන්නේ නැත.’—මතෙව් 24:​21, 22, 34.

²⁴ මහත් පීඩාවෙන් බේරී, දෙවියන් වහන්සේගේ අලුත් ලෝකය තුළට ඇතුල්වීමට අප කළ යුත්තේ කුමක් ද? අපගෙන් ඕනෑ ම කෙනකුට සමහර විට තිබුණා වූ වැරදි අපේක්ෂා කුමක් වූවත්, අපගේ ක්‍රිස්තියානි යුතුකම් සම්බන්ධයෙන් නිදා ගැනීමට එරෙහි ව අප ප්‍රවේසම් විය යුතු ය. (හබක්කුක් 2:3; 1 තෙසලෝනික 5:​1-6) 1914 සිට සිද්ධීන් සිහිපත් කළ හැකි අයගේ සංඛ්‍යාව වඩාත් අඩුවෙමින් පවති. එබැවින්, අප අවදි ව සිටීම අවශ්‍යය ය; නාස්ති කිරීමට කාලයක් නැත. (මතෙව් 24:42) සාතන්ගේ දුෂ්ට ලෝකයෙන් බේරී ජීවත්වීමට කැමති සියල්ලන් පහත සඳහන් දේවානුභාවයලත් වචනවලට එකඟත්වය දක්වන ආකාරයකින් දැන් ක්‍රියා කළ යුතු ය: “සර්වපරාක්‍රමවූ, ස්වාමීවූ [යෙහෝවඃ NW] දෙවියන් වහන්ස, ඔබගේ මහත් බලය රැගෙන ඔබ රජකම් කළ බැවින් අපි ඔබට ස්තුතිකරමු.”—එළිදරව් 11:17. w90 10⁄15

[පාදසටහන්වල]

ඔබ පිළිතුරු දෙනු ඇත්තේ කෙසේ ද?

◻ පුරාණ යෙරුසලම නියෝජනය කළේ කුමක් ද, නුමුත් එහි ගෞරවනීය තත්ත්වය නැති වූයේ කෙසේ ද?

◻ අන්‍ය ජාතීන්ගේ කාලවල් ආරම්භ වූයේ හා අවසාන වූයේ කවදා ද, කුමන පුරෝකථනය කරන ලද ප්‍රතිඵලයක් ඇතු ව ද?

◻අභක්තික යෙරුසලමේ විනාශයෙන් පූර්ව ආදර්ශයක් කොට දැක්වූයේ කුමක් ද?

◻ මහත් පීඩාව ළඟ බව අප දන්නේ කෙසේ ද, එයින් බේරීමට අප කළ යුත්තේ කුමක් ද?

[පාඩම සඳහා ප්‍රශ්න]

1. එක් දහස් නවසිය එකළොස් වන වසරෙහි තමාගේ යුරෝපීය සංචාරයෙන් පසු වොච්ටවර් සමිතියේ සභාපති සඳහන් කළේ කුමක් ද?

2. එක් දහස් නවසිය දාහතරෙහි සාමය බිඳ වැටුණේ කෙසේ ද, කිනම් කණගාටුදායක ප්‍රතිඵල ඇතු ව ද?

3, 4. එක් දහස් නවසිය දාහතරේ ඔක්තෝබර් 2 වෙනි සිකුරාදා උදෑසන සමිතියේ මූලස්ථානයෙහි සිදු වූයේ කුමක් ද?

5. “අන්‍ය ජාතීන්ගේ කාලවල්” යන ප්‍රකාශයෙහි මූලාරම්භය කොතැනින් ද?

6, 7. පළමු සිය වසේ යුදයේ වැසියන් තමන් පිටට පමුණුවා ගත්තේ කිනම් දරුණු ලේ වරදක් ද, කුමන ප්‍රතිඵලයක් ඇතු ව ද?

8. යෙරුසලමේ විනාශයට මගපෙන්වන සිද්ධීන්වල “ලකුණ” යේසුස් වහන්සේ දුන් විට, ඊට තවත් කුමක් ඇතුළත් වී ද?

9. භූමික යෙරුසලම එහි අනුග්‍රහයලත් තත්ත්වය නැතිකර ගත්තේ කවදා ද, ඒ ස්ථානය අනුයුක්ත කර තිබෙන්නේ කුමක් ද?

10. “ස්වර්ගීක යෙරුසලම” යන ප්‍රකාශයෙන් අදහස් කරන්නේ කුමක් ද?

11. භූමික යෙරුසලම යෙහෝවඃ වහන්සේගේ අනුග්‍රහය නැතිකර ගන්නා තුරු, එය නියෝජනය කළේ කුමක් ද?

12. “අන්‍ය ජාතීන්ගේ කාලවල්” යන යෙදුම අදාළ කිරීමට තිබෙන්නේ කෙසේ ද?

13. අන්‍ය ජාතීන්ගේ කාලවල් අරම්භ වූයේ කවදා ද, ඔබ එසේ පිළිතුරු දෙන්නේ මන්ද?

15. “මනුෂ්‍යවර්ගයාගේ ඉතා පහත් කෙනෙකු” හැටියට යේසුස් ක්‍රිස්තුස් වහන්සේ සුදුසුකම් ලැබුවේ කෙසේ ද? (මතෙව් 11:29)

16. කාලවල් සත අවසාන වූයේ කවදාදැයි ගණන් බැලීමට එළිදරව් පොත ක්‍රිස්තියානීන්ට උපකාර කරන්නේ කෙසේ ද?

17. එක් දහස් නවසිය දාහතරෙහි ප්‍රසිද්ධ කිරීමට නියම ව තිබූ සන්තෝෂමත් ප්‍රකාශය කුමක් ද?

18. එක් දහස් නවසිය දාහතරේ සිට මනුෂ්‍යවර්ගයාට කණගාටුදායක තත්ත්වයන් බලපා තිබෙන්නේ මන්ද?

19. මේ කාලයේ දී ජීවත් ව සිටීමට සැබෑ ක්‍රිස්තියානීන් එතරම් ම කෘතඥ වන්නේ මන්ද?

20. (අ) පොළොවෙහි, 1914 ට පෙර යෙහෝවඃ වහන්සේගේ සැබෑ සේවකයන් බවට ඔප්පු වූයේ කවරෙක් ද? (ආ) විශ්වාසවන්ත අභිෂේකලත් ක්‍රිස්තියානීහු කුමන සකස්වීම් සිදු කිරීමට කැමැත්තෙන් සිටියහු ද?

21. පළමු ලෝක යුද්ධය තුළ දී සැබෑ ක්‍රිස්තියානීන් අත්දුටු හික්මවීම කුමක් ද?

22, 23. (අ) එක් දහස් නවසිය දහනවයේ සිට විශ්වාසවන්ත අභිෂේකලත් ක්‍රිස්තියානීන් කර තිබෙන්නේ කුමක් ද, කුමන දෙවදෑරුම් ප්‍රතිචාරය ඇතු ව ද? (ආ) අභක්තික යෙරුසලමේ ප්‍රතිමූර්තිය කුමක් ද?

24. දෙවියන් වහන්වසේගේ අලුත් ලෝකය තුළට බේරී ජීවත්වීමට අප කළ යුත්තේ කුමක් ද?

යෙරුසලමට හා එහි දේවමාලිගාවට ඒවායේ ගෞරවනීය තත්ත්වය නැති විය, නුමුත් දෙවියන් වහන්සේ මෙසියස් වන ස්වකීය පුත්‍රයාණන්ට නොකඩවා ආශිර්වාද කරමින්, ස්වර්ගයේ සිට උන් වහන්සේට කෙළින් ම පවා කථා කළ සේක