ආත්ම දමනය නමැති ඵලය වර්ධනය කර ගැනීම
“ආත්මයාණන්වහන්සේගේ [ආත්මයේ NW] ඵල නම්—ප්‍රේමය, ප්‍රීතිය, සමාදානය, [බොහෝ NW] ඉවසිලිවන්තකම, කරුණාවන්තකම, යහපත්කම, විශ්වාසකම [ඇදහිල්ල NW], මෘදුකම, පමණ දැන ක්‍රියා කිරීම [ආත්ම දමනය NW] යන මේවාය. මෙබඳු දේට විරුද්ධව ව්‍යවස්ථාවක් නැත.”—ගලාති 5:22, 23.
1. ආත්ම දමනය පිළිබඳ හොඳ ම ආදර්ශයන් අපට සපයා ඇත්තේ කවරෙක් ද, එය කිනම් ශුද්ධ ලියවිලි පදවලින් දැකිය හැකි ද?
යෙහෝවඃ දෙවියන් වහන්සේ හා යේසුස් ක්‍රිස්තුස් වහන්සේ ආත්ම දමනය පිළිබඳ හොඳ ම ආදර්ශයන් අපට ඉදිරිපත් කර ඇත. ඒදන් උයනේ මනුෂ්‍යයාගේ අකීකරුකම පටන්, යෙහෝවඃ වහන්සේ මෙම ගුණාංගය දිගට ම ක්‍රියාවෙහි යොදවා ඇත. (යෙසායා 42:14 සසඳන්න.) උන් වහන්සේ “උදහස් වීමට ප්‍රමාද” බව හෙබ්‍රෙව් ලියවිල්ලේ අපි නව වරක් කියවන්නෙමු. (නික්මයාම 34:6) ඒ සඳහා ආත්ම දමනය අවශ්‍ය කෙරේ. තව ද දේව පුත්‍රයා “නින්දාකරනු ලැබූ කල නින්දා නොකළ” බැවින්, උන් වහන්සේ මහත් ආත්ම දමනයක් ක්‍රියාවේ යෙදෙවූ සේක. (1 පේතෘස් 2:23) එහෙත්, සිය ස්වර්ගීය පියාණන්ගෙන් “දේවදූතයන් ලෙගියොන් දොළොසකට වඩා” වැඩි දෙනෙකුගේ ආධාරය ඉල්ලන්නට යේසුස් වහන්සේට හැකියාව තිබුණි.—මතෙව් 26:53.
2. අසම්පූර්ණ මනුෂ්‍යයන් විසින් ක්‍රියාවට නංවන ලද ආත්ම දමනය පිළිබඳ ව අපට ඇත්තේ කිනම් කදිම ශුද්ධ ලියවිලිමය ආදර්ශයන් ද?
2 අසම්පූර්ණ මනුෂ්‍යයන් විසින් ක්‍රියාවට නගන ලද ආත්ම දමනය පිළිබඳ සමහරක් කදිම ශුද්ධ ලියවිලිමය ආදර්ශයන් ද අපට ඇත. උදාහරණයක් හැටියට, කුලදෙටු යාකොබ්ගේ පුත්‍රයෙක් වන, යෝසෙප්ගේ ජීවිතයේ එක් කැපී පෙනෙන සිද්ධියක් තුළ මෙම ගුණාංගය විදහා පෙන්වනු ලැබී ය. පෝතිඵර්ගේ භාර්යාව ඔහු ව නපුරට කැමති කරවා ගැනීමට වෑයම් කළ විට යෝසෙප් කොතරම් ආත්ම දමනයක් ක්‍රියාවට නැඟුවා ද! (උත්පත්ති 39:7-9) මෝසෙස්ගේ ව්‍යවස්ථාවේ තහංචි නිසා බබිලෝනීය රජුගේ රසවත් ආහාර පාන අනුභව කිරීම ප්‍රතික්ෂේප කිරීමෙන් ආත්ම දමනය ක්‍රියාවට නැංවූ හෙබ්‍රෙව් යෞවනයින් හතර දෙනාගේ මාහැඟි ආදර්ශයන් ද ඇත.—දානියෙල් 1:8-17.
3. සිය කදිම හැසිරීම වෙනුවෙන් නම් දරා ඇත්තේ කවරෙක් ද, මෙය කිනම් සාක්ෂිවලින් දැක ගත හැකි ද?
3 ආත්ම දමනය පිළිබඳ නවීන ආදර්ශයන් සඳහා, යෙහෝවඃ වහන්සේගේ සාක්ෂිකරුවන් ව සමස්තයක් ලෙස හුවා දැක්විය හැකි ය. න කැතොලික් එන්සයික්ලෝපීඩියා මගින් ඔවුනට දෙන ලද ප්‍රශංසාව වන “ඔවුන් ලෝකයේ හොඳින් ම හැසිරෙන සමූහ අතුරින් එකකි” යන්න ලැබීමට තරම් ඔවුන් යෝග්‍ය ය. “සාක්ෂිකරුවන් ශුද්ධ ලියවිල්ලෙන් තමන් ඉගෙන ගන්නා දෙය මහත් ශ්‍රද්ධාවෙන් ක්‍රියාවට නංවන” බව එක් පිලිප්පීන විශ්ව විද්‍යාලයීය උපදේශකයෙක් සඳහන් කළේ ය. වර්ෂ 1989 වෝසෝ හි සාක්ෂිකරුවන්ගේ සමුළුව සම්බන්ධයෙන්, පෝලන්ත ජාතික වාර්තාකරුවෙක් මෙසේ ලීවේ ය: “55,000 දෙනෙක් දින තුනක් පුරා එක ම දුම්වැටියක්වත් පානය කළේ නැත! . . . මනුෂ්‍යත්වය ඉක්ම වූ හික්මවීමේ මෙම ආදර්ශනය මා තුළ ගරුබිය මිශ්‍රිත ප්‍රසාදය මගේ සිතට කාවැද්ද වූයේ ය.”
දෙවියන් වහන්සේට භය වීම සහ නපුරට ද්වේෂ කිරීම
4. ආත්ම දමනය පැවැත්වීමෙහි එක් ප්‍රභලතම ආධාරකයක් වනුයේ කුමක් ද?
4 ආත්ම දමනය වර්ධනය කිරීමේ ලා තිබෙන මහත් ම ආධාරකයන්ගෙන් එකක් නම්, දෙවියන් වහන්සේට භය වීමයි, එනම් අපගේ ප්‍රේමනීය ස්වර්ගික පියාණන් අප්‍රසන්න කිරීමට ඇති යහපත් බියයි. දෙවියන් වහන්සේ කෙරෙහි ගරුබිය අපට කොතරම් වැදගත් දැයි, ශුද්ධ ලියවිලි එය වාර ගණනාවක් සඳහන් කිරීමෙන් ම අපට දැකිය හැක. ආබ්‍රහම් සිය පුත් ඊසාක් ඔප්පු කිරීමට මොහොතකට පෙර, දෙවියන් වහන්සේ මෙසේ කී සේක: “නුඹේ අත තරුණයා පිට නොතබව, ඔහුට කිසිවක් නොකරව. මක්නිසාද නුඹේ පුත්‍රයා, නුඹේ එකම පුත්‍රයා මාගෙන් නොවැළැක්වූ බැවින් නුඹ දෙවියන්වහන්සේට භයවෙන බව දැන් දනිමි.” (උත්පත්ති 22:12) චිත්තවේගී දැඩි වෙහෙසක් අතිශයින් දැනුණු බවට කිසිදු සැකයක් නැත, එමනිසා, තම ප්‍රේමනීය පුත්‍ර ඊසාක් ව මරන්නට පිහිය ඔසවන තරමට දේව ආඥාවට එකඟ ව ක්‍රියා කිරීම සඳහා ආබ්‍රහම්ගේ පැත්තෙන් මහත් ආත්ම දමනයක් තිබුණා විය යුතුයි. එසේ ය, දෙවියන් වහන්සේ කෙරෙහි වූ භය, ආත්ම දමනය ක්‍රියාවේ යෙදවීමට අපට උපකාර සපයයි.
5. ආත්ම දමනය අප විසින් ක්‍රියාවට නැගීමෙහි ලා නපුරට ද්වේෂ කිරීම කිනම් කාර්ය භාරයක් ඉටු කරයි ද?
5 යෙහෝවඃ වහන්සේට භය වීමට සමීපයෙන් ම සම්බන්ධ ව ඇති දෙය නම් නපුරට ද්වේෂ කිරීමයි. “ස්වාමීන්වහන්සේ [යෙහෝවඃ වහන්සේ NW] කෙරෙහි භයවීම නම් නපුරට තේටව්ෂකිරීම” යයි හිතෝපදේශ 8:13 හි අපි කියවන්නෙමු. අනෙක් අතට, නපුරට ද්වේෂ කිරීම ද ආත්ම දමනය ක්‍රියාවට නැගීමට අපට උපකාර කරයි. නොයෙක් විට, ශුද්ධ ලියවිලි නපුර ද්වේෂ කරන ලෙස—එසේ ය, පිළිකුල් කරන ලෙස—අපට පවසයි. (ගීතාවලිය 97:10; ආමොස් 5:14, 15; රෝම 12:9) බොහෝ විට නපුරු ව ඇති දෙය එතරම් ම වින්දනයක් ගෙන දෙන නිසා, එතරම් ආකර්ෂණශීලී නිසා, එතරම් පොලඹවන සුලු නිසා, එයට විරුද්ධ ව අප ව ශක්තිමත් කර ගනු පිණිස අප එයට ද්වේෂ කළ යුතු ය. නපුරු වූ දේ කෙරෙහි දක්වන එවන් සියලු ආකාර ද්වේෂ කිරීම්, ආත්ම දමනය ක්‍රියාවට නැගීමට වූ අපගේ අධිෂ්ඨානය ශක්තිමත් කරවන බලපෑමක් ඇති කරන අතර එසේ අපට ආරක්ෂාවක් ලෙස ක්‍රියා කරයි.
ආත්ම දමනය, ප්‍රඥාවේ මාර්ගය
6. ආත්ම දමනය පැවැත්වීම මගින් අපගේ ආත්මාර්ථකාමී නැඹුරුවාවන් මර්දනය කර දැමීම ප්‍රඥාවේ ක්‍රියා මාර්ගයක් වනුයේ මන්ද?
6 ආත්ම දමනය පැවැත්වීමෙහි ලා තවත් මහත් ආධාරකයක් වනුයේ, මෙම ගුණාංගය විදහා පෙන්වීමේ ප්‍රඥාව අගය කිරීම ය. යෙහෝවඃ වහන්සේ ආත්ම දමනය ක්‍රියාවේ යොදවන මෙන් අපගෙන් ඉල්ලා සිටින්නේ අපගේ ම ප්‍රයෝජනයට ය. (යෙසායා 48:17, 18 සසඳන්න.) ආත්ම දමනය පැවැත්වීමෙන් අපගේ ආත්මාර්ථකාමී නැඹුරුවාවන් දමනය කිරීම කොතරම් ප්‍රඥාවන්ත වන්නේ දැයි පෙන්වන බොහෝ උපදේශයන් ස්වකීය වචනයෙහි අඩංගු ව තිබේ. දෙවියන් වහන්සේගේ වෙනස් කළ නොහැකි නීතිවලින් ගැලවීමට අපට කෙසේවෙතත් බැරි ය. “මනුෂ්‍යයෙක් තමා වපුරන දේම කපා ගන්නේ ය. ඒ හැටියට තමාගේ මාංසය සඳහා වපුරන්නා මාංසයෙන් කුණුවීම කපාගන්නේය; ආත්මයාණන්වහන්සේ [ආත්මය NW ] සඳහා වපුරන්නා ආත්මයාණන්වහන්සේගෙන් [ආත්මයෙන් NW ] සදාකාල ජීවනය කපාගන්නේය” යයි ස්වකීය වචනය අපට පවසයි. (ගලාති 6:7, 8) පැහැදිලි ව දැකිය හැකි උදාහරණයක් නම්, කෑම හා බීම පිළිබඳ උදාහරණයයි. පමණ ඉක්මවා කෑම හා බීම හේතුවෙන් ජනයා හට ආපදා බොහොමයක් සිදු වේ. මේ සියලු ආකාරයේ ආත්මාර්ථකාමීත්වයට නැඹුරු වීම පුද්ගලයෙකුගේ ආත්ම ගෞරවය නැති කරයි. එපමණක් නොව, යම් පුද්ගලයෙකු ආත්මාර්ථකාමීත්වයට නැඹුරු වන්නේ නම්, අනෙක් අය සමඟ ඇති ඔහුගේ සම්බන්ධයට හානි පැමිණ වීම වැළැක්විය නොහැක. මේ සියල්ලට ම වඩා බරපතළ දේ නම්, ආත්ම දමනය නොමැතිකම අපගේ ස්වර්ගික පියාණන් සමඟ ඇති අපගේ සම්බන්ධතාවයට හානි සිදු කිරීමයි.
7. හිතෝපදේශ පොතේ ප්‍රධාන තේමාවක් වනුයේ කුමක් ද, එය කිනම් බයිබල් වගන්තියෙන් පෙන්නුම් කර තිබේ ද?
7 එබැවින්, ආත්මාර්ථකාමීත්වය ආත්ම-පරාජිතකාරී බව අප අපට ම පුන පුනා කියා ගත යුතු ය. ආත්ම-හික්මවීම අවධාරණය කරන්නා වූ, හිතෝපදේශ පොතේ කැපී පෙනෙන තේමාවක් වනුයේ, ආත්මාර්ථකාමීත්වය විපාකදායී නොවන බවත්, ආත්ම දමනය පැවැත්වීමේ ප්‍රඥාව ඇති බවත් ය. (හිතෝපදේශ 14:29; 16:32) එමෙන් ම ආත්ම-හික්මවීමට හුදෙක් නපුර වැළැක්වීමට වඩා අතිශයින් වැඩි යමක් අදාළ වන බව සටහන් කර ගත යුතු ය. ආත්ම හික්මවීම, නොහොත් ආත්ම දමනය, හරි දෙය ක්‍රියාවට නැගීමට ද අවශ්‍ය වන අතර මෙය අපගේ පව්කාර නැඹුරුවාවන්ට විරුද්ධ ව යන්නක් බැවින්, එය අපහසු විය හැකි ය.
8. ආත්ම දමනය ක්‍රියාවට නැංවීමෙහි නැණවත්කම කැපී පෙනෙන්නට සලස්වනුයේ කිනම් අත් දැකීම ද?
8 එක්තරා යෙහෝවඃ වහන්සේගේ සාක්ෂිකරුවෙක් බැංකුවක පෝලිමේ සිටිය දී, තවත් මනුෂ්‍යයෙක් ඔහුට ඉදිරියෙන් පෝලිමට පැනීමේ සිද්ධියෙන් ආත්ම දමනය පැවැත්වීමේ නැණවත්කම පැහැදිලි වේ. එම සාක්ෂිකරුවා සුළු වශයෙන් කිපුන ද, ඔහු තමා ව ම දමනය කර ගත්තේ ය. එදින ම රාජ්‍යය ශාලා සැලසුම් සමහරකට අත්සන් ලබා ගැනීමට ඔහුට එක්තරා ඉංජිනේරුවෙක් හමු වීමට තිබිණ. මෙම ඉංජිනේරුවා කවරෙකු වී ද? බැංකුවේ දී ඔහු ඉදිරියෙන් පෝලිමට ඇතුල් වූ මනුෂ්‍යයා ය! එම ඉංජිනේරුවා ඉතා මිත්‍රශීලී වූවා පමණක් නොව, ඔහු සාක්ෂිකරුවාගෙන් අය කළේ සාමාන්‍ය අය කිරීමට වඩා සියයට දහයක අඩු ප්‍රමාණයක් ය. එදින සුළු වේලාවකට කලින් තමා ව ම කුපිත වීමට ඉඩ නෑර, ආත්ම දමනය පැවැත්වීම සම්බන්ධයෙන් එම සාක්ෂිකරුවා කොතරම් සතුටු වූවා ද!
9. සේවයේ දී අප අවමන් සහගත ප්‍රතික්‍රියාවන්ට මුහුණ දෙන විට ගත යුතු ප්‍රඥාවන්ත ක්‍රියා මාර්ගය කුමක් ද?
9 නොයෙක් අවස්ථාවන්හි අප දේව රාජ්‍යයේ ශුභාරංචිය දේශනා කරමින් ගෙයින් ගෙට යන විට, නැතහොත් අප පසුකර යන්නෙකුගේ උනන්දුව අපගේ පණිවුඩය වෙත යොමු කර ගැනීමට වීදියේ අයිනක සිට ගෙන සිටින විට, අපට අපවාදාත්මක වදන් අසන්නට සිදු වේ. ප්‍රඥාවන්ත ක්‍රියා මාර්ගය කුමක් ද? මෙම නැණවත් ප්‍රකාශය හිතෝපදේශ 15:1 හි දක්නට ලැබේ; “මෘදු උත්තරයකින් කෝපය පහවෙයි.” වෙනත් වචනවලින් කියතොත්, අප ආත්ම දමනය ක්‍රියාවෙහි යෙදවිය යුතු ය. තව ද යෙහෝවඃ වහන්සේගේ සාක්ෂිකරුවන් පමණක් නොව වෙනත් අය ද මෙය සැබෑවක් බව වටහා ගෙන ඇත. ආත්ම දමනයේ ඇති සුව කිරීමේ අගය වැඩි වැඩියෙන් වෛද්‍ය වෘත්තිකයින් විසින් අගය කෙරේ.
පරාර්ථකාමී ප්‍රේමය උපකාරයකි
10, 11. ආත්ම දමනය ක්‍රියාවට නැංවීමෙහි ලා ප්‍රේමය සැබෑ උපකාරකයක් වනුයේ මන්ද?
10 පළමු කොරින්ති 13:4-8 හි සඳහන් ප්‍රේමය පිළිබඳ පාවුල්ගේ විස්තරයෙන් පෙනෙනුයේ ආත්ම දමනය ක්‍රියාවෙහි යෙදවීමට ඇති බලයට අපට උපකාර කළ හැකි බවයි. “ප්‍රේමය බොහෝ ඉවසිලිවන්තය.” බොහෝ ඉවසිලිවන්ත වීමට ආත්ම දමනය අවශ්‍ය කෙරේ. “ප්‍රේමය ඊර්ෂ්‍යාවෙන්නේ නැත; ප්‍රේමය පාරට්ටුකරගන්නේ නැත, උඩඟුවෙන්නේ නැත.” ප්‍රේමයේ ගුණාංගය අපට අපගේ සිතුවිලි හා චිත්තවේගයන් පාලනය කර ගැනීමටත්, ඊර්ෂ්‍යා සහගත වීමට, පාරට්ටු කර ගැනීමට, හෝ උඩඟු වීමට ඇති ඕනෑ ම නැඹුරුවාවක් මර්දනය කිරීමටත් උපකාරවත් වේ. ප්‍රේමය අප ව පොලඹවන්නේ හාත්පසින් ම ඊට විරුද්ධ දේ කිරීමට ය, එනම් යේසුස් වහන්සේ වූවාක් මෙන් යටහත් පහත් වීමට, ය, මනසින් පහත් ව සිටීමට සලස්වයි.—මතෙව් 11:28-30.
11 ප්‍රේමය “අශෝභනලෙස හැසිරෙන්නේ නැත” යයි පාවුල් තවදුරටත් පවසයි. සියලු අවස්ථාවන්හි ශෝභන ලෙස හැසිරෙන්නට ආත්ම දමනය අවශ්‍ය වේ. ප්‍රේමයේ ගුණාංගය, ගිජුකමෙන්, ‘අපගේ කාරණා පමණක් සොයමින්’ සිටීමෙන් අප ව වළක්වයි. ප්‍රේමය “කෝපවෙන්නේ නැත.” අන්‍යයන් කියන්නා වූ හෝ කරන්නා වූ දේ හේතුවෙන් කෝප වීම කොතරම් පහසු ද! එහෙත් ප්‍රේමය අපට අප ව ම දමනය ක්‍රියාවෙහි යෙදවීමට උපකාර කරනු ඇති අතර, අප පසුවට කනගාටු වන දෑ කීමට හෝ කිරීමට සලස්වන්නේ නැත. ප්‍රේමය “නපුර ගණන්ගන්නේ නැත [ගණන් තබා ගන්නේ නැත NW].” මිනිස් ස්වභාවය සිතේ අමනාපයක් පැසවීමට සහ නුරුස්නා බව පෝෂණය කිරීමට නැඹුරු වී ඇත. එහෙත් එවන් සිතුවිලි අපගේ මනසෙන් ඉවත් කිරීමට ප්‍රේමය අපට උපකාර කරනු ඇත. ප්‍රේමය ‘අධර්මිෂ්ඨකම සම්බන්ධයෙන් ප්‍රීති නොවන්නේය.’ කාමෝද්දීපන කෘති නැතහොත් පහත් අවමන් සහගත ටෙලිවෘතාන්ත වැනි අධර්මිෂ්ඨ දෙයින් ආස්වාදයක් නොවිඳින්නට ආත්ම දමනය අවශ්‍ය වේ. ප්‍රේමය “සියල්ල දරාගන්නේය,” එසේ ම “සියල්ල ඉවසන්නේය.” දේවල් දරා ගෙන සිටීමටත්, පරීක්ෂාකාරී හෝ ඉසිලීමට දුෂ්කර දෑ විඳදරා ගැනීමටත්, එසේ ම ඒවා අප අධෛර්යවත් කිරීමට, ක්‍රියාවෙන් එකට එක කිරීමට සැලැස්වීමට, හෝ යෙහෝවඃ වහන්සේට සේවය කිරීමෙන් ඉවත්වීමට අප නැඹුරු කිරීම යනාදියට ඉඩ නොදීමටත්, ආත්ම දමනය අවශ්‍ය කරවයි.
12. යෙහෝවඃ දෙවියන් වහන්සේ හා යේසුස් ක්‍රිස්තුස් වහන්සේ අප වෙනුවෙන් කර ඇති සියලු දේවලට අපගේ අගැයීම පෙන්විය හැකි එක් ක්‍රමයක් කුමක් ද?
12 අප සැබවින් ම අපගේ ස්වර්ගික පියාණන් වහන්සේට ප්‍රේම කර උන් වහන්සේගේ ආශ්චර්යවත් ගුණාංග මෙන් ම උන් වහන්සේ අපට කර ඇති දෑ අගය කරන්නේ නම්, ආත්ම දමනය සෑම අවස්ථාවක දී ම ක්‍රියාවට නැගීමෙන් උන් වහන්සේ ප්‍රසන්න කරන්නට අපට ඕනෑ වනු ඇත. තව ද, අප අපගේ ස්වාමියා හා ගුරුවරයා වන, යේසුස් ක්‍රිස්තුස් වහන්සේට සැබවින් ම ප්‍රේම කොට, උන් වහන්සේ අපට කර ඇති සියලු දේවල් අගය කරන්නේ නම්, ‘අපගේ වධකණුව රැගෙන නොකඩවා උන් වහන්සේ අනුගමනය කිරීමට’ වූ සිය ආඥාවට අප අවනත වනු ඇත. ‘අප ආත්ම දමනය ක්‍රියාවේ යෙදවීම ඒ සඳහා සැබවින් ම අවශ්‍ය ය.’ (මාර්ක් 8:34) අපගේ ක්‍රිස්තියානි සහෝදර සහෝදරියන්ට ඇති ප්‍රේමය යම් ආත්මාර්ථකාමී ක්‍රියා මාර්ගයක යෙදීමෙන් ඔවුන්ට හානි සිදු කිරීමෙන් අප ව වළක්වනු ඇත.
ඇදහිල්ල හා යටහත් පහත්කම උපකාරකයන් ලෙස
13. ආත්ම දමනය ක්‍රියාවෙහි යෙදවීමට අපට උපකාර කිරීමට ඇදහිල්ලට හැක්කේ කෙසේ ද?
13 ආත්ම දමනය ක්‍රියාවෙහි යෙදවීමේ තවත් මහඟු උපකාරකයක් නම්, දෙවියන් වහන්සේ හා උන් වහන්සේගේ පොරොන්දු කෙරෙහි ඇදහිල්ල ය. යෙහෝවඃ වහන්සේ කෙරෙහි දැඩි සේ විශ්වාස කරමින් කාරණා නිවැරදි කිරීමට උන් වහන්සේගේ නියමිත වේලාව දක්වා බලා සිටින්නට ඇදහිල්ල අපට හැකියාව ලබා දෙයි. රෝම 12:19 හි: ‘ප්‍රේමවන්තයෙනි, පළි නොගනිල්ලා . . . මක්නිසාද: පළිගැනීම මාගේය; මම විපාක දෙමියි යෙහෝවඃ වහන්සේ කියනසේකැයි ලියා තිබේ’ යයි ප්‍රේරිත පාවුල් පවසන විට, එම කාරණය ම ගෙන හැර දක්වමින් සිටියේ ය. මේ සම්බන්ධයෙන් යටහත් පහත්කම ද අපට උපකාර කළ හැකි ය. අප යටහත් පහත් නම්, අප විසින් සිතා සිටින හෝ සැබෑ හානියක් හේතුවෙන් විරෝධය පෑමට ඉක්මන් නොවනු ඇත. වෙනත් විධියකින් කියතොත්, අප ඉක්මන් වී නීතිය අපේ අතට නොගනු ඇති අතර, ආත්ම දමනය ක්‍රියාවේ යොදවමින් යෙහෝවඃ වහන්සේ කෙරෙහි බලා සිටින්නට කැමති වනු ඇත.—ගීතාවලිය 37:1, 8 සසඳන්න.
14. ආත්ම දමනය බොහෝ සෙයින් ඌන අයට පවා එය ලබා ගත හැකි බව කිනම් අත් දැකීමක් පෙන්වයි ද?
14 ආත්ම දමනය ක්‍රියාවේ යෙදවීම අපට උගත හැකි බව සැහැසික චිත්ත ස්වභාවයක් තිබූ මනුෂ්‍යයෙක් සම්බන්ධ අත් දැකීමකින් බලගතු ලෙස තහවුරු වේ. ඔහුට කොතරම් දුරට එවන් චිත්ත ස්වභාවයක් තිබුනේදයත්, ඔහු හා ඔහුගේ පියා අතර තිබූ ආරවුල නිසා පොලීසිය කැඳවනු ලැබූ කල, අන්‍යයන් ඔහු මර්දනය කිරීමට පෙර ඔහු පොලිස් භටයන් තිදෙනෙකුට වැටෙන තුරු පහර දුන්නේ ය! කෙසේ හෝ, කල්යාමේ දී, ඔහු යෙහෝවඃ වහන්සේගේ සාක්ෂිකරුවන් හා සම්බන්ධ වී, දෙවියන් වහන්සේගේ ආත්මයේ ගුණාංගයක් වන, ආත්ම දමනය ක්‍රියාවට නැගීමට ඉගෙන ගත්තේ ය. (ගලාති 5:22, 23) අද දින, වසර 30කට පසුවත්, මෙම මනුෂ්‍යයා තවමත් යෙහෝවඃ වහන්සේට ඇදහිලිවන්ත ව සේවය කරමින් සිටී.
පවුල් කවය තුළ ආත්ම දමනය
15, 16. (අ) ආත්ම දමනය ක්‍රියාවෙහි යෙදවීමට ස්වාමිපුරුෂයෙකු හට උපකාර කරනු ඇත්තේ කුමක් ද? (ආ) ආත්ම දමනය විශේෂයෙන් අවශ්‍ය වනුයේ කිනම් තත්ත්වයක දී ද, මෙය කිනම් අත් දැකීමකින් දැක ගත හැකි ද? (ඇ) භාර්යාවකගෙන් ආත්ම දමනය අවශ්‍ය කරවනුයේ මන්ද?
15 නිසැක ව ම පවුල් කවය තුළ ආත්ම දමනය අවශ්‍ය කරවයි. ස්වාමිපුරුෂයෙක් තමාට ප්‍රේම කරන්නා සේ, සිය භාර්යාවට ප්‍රේම කරන්නට නම්, ඔහු තමාගේ සිතුවිලි, වචන, හා ක්‍රියාවන් සම්බන්ධයෙන් මහත් පාලනයක් ක්‍රියාවට නැගීමට අවශ්‍ය කරවයි. (එපීස 5:28, 29) ඇත්තෙන් ම, 1 පේතෘස් 3:7 හි: “පුරුෂයෙනි, නුඹලාගේ . . . භාර්ය්‍යාවන් සමඟ දැනගැන්මේ හැටියට වාසයකරමින්” සිටින්න යන ප්‍රේරිත පේතෘස්ගේ මෙම වදන්වලට ස්වාමිපුරුෂයින් අවනත වීම සඳහා ආත්ම දමනය අවශ්‍ය වේ. විශේෂයෙන් තමාගේ භාර්යාව ඇදහිල්ලේ නොසිටින විට ඇදහිල්ලේ සිටින ස්වාමිපුරුෂයා ආත්ම දමනය ක්‍රියාවට නැගීම අවශ්‍ය වේ.
16 මෙය විස්තර කරන්නට: නොඇදහිලිකාර වහා කිපෙන සුලු භාර්යාවක් සිටි වැඩිමහල්ලෙක් සිටියේ ය. එහෙත්, ඔහු ආත්ම දමනය ක්‍රියාවෙහි යෙදෙවූ අතර එය ඔහුට කොතරම් ප්‍රයෝජනවත් වූයේදයත්, ඔහුගේ වෛද්‍යවරයා ඔහුට මෙසේ පැවසී ය: “ජෝන්, එක්කෝ ඔබ ස්වභාවයෙන් ම ඉතා ඉවසිලිවන්ත මනුෂ්‍යයෙක්, එසේත් නැත්නම් ඔබට බලගතු ආගමක් තිබිය යුතුයි.” ඇත්තෙන් ම අපට බලගතු ආගමක් ඇත, මන්දයත් ආත්ම දමනය ක්‍රියාවෙහි යෙදවීමට අපට හැකියාව ලබා දෙමින්, “දෙවියන්වහන්සේ අපට දුන්නේ බයාදුකමේ ආත්මයක් නොව බලයෙත් ප්‍රේමයෙත් හික්මවීමෙත් ආත්මයක්” ය. (2 තිමෝති 1:7) මීට අමතර ව, විශේෂයෙන් තම ස්වාමිපුරුෂයා නොඇදහිලිවන්තයෙක් ව සිටින විට, යටහත් පහත් වීමට භාර්යාවගේ පැත්තෙන් ද ආත්ම දමනය අවශ්‍ය වේ.—1 පේතෘස් 3:1-4.
17. මව්පිය-දරු සම්බන්ධතාවයට ආත්ම දමනය වැදගත් වනුයේ මක්නිසා ද?
17 මවිපිය-දරු සම්බන්ධතාවය තුළ ද ආත්ම දමනය අවශ්‍ය කෙරේ. ආත්ම දමනයෙන් යුත් දරුවන් සිටින්නට නම්, මව්පියන් පළමුකොට හොඳ ආදර්ශයක් තැබිය යුතු ය. තව ද දරුවන්ට යම් ආකාරයක හික්මවීමක් අවශ්‍ය කරවන විට, එය නිතර සන්සුන් ව හා ප්‍රේමයෙන් යුක්ත ව ලබා දිය යුතු ය. මේ සඳහා සැබෑ ආත්ම දමනයක් අවශ්‍ය කෙරේ. (එපීස 6:4; කොලොස්සි 3:21) එසේ ම, දරුවන් ද තමන් සැබෑ ලෙස සිය මව්පියන්ට ප්‍රේම කරන බව පෙන්වීමට ඔවුන්ට කීකරු වීම අවශ්‍ය කරවන අතර කීකරු වීම සඳහා සැබවින් ම ආත්ම දමනය අවශ්‍ය කෙරේ.—එපීස 6:1-3; 1 යොහන් 5:3 සසඳන්න.
දෙවියන් වහන්සේ සපයන උපකාරය උපයෝගි කර ගැනීම
18-20. ආත්ම දමනය ක්‍රියාවෙහි යෙදවීමට අපට උපකාර කරන්නා වූ ගුණාංග වර්ධනය කරනු පිණිස, අප ප්‍රයෝජන ගත යුතු ශුද්ධ ලියවිලිමය සැපයුම් තුන කුමක් ද?
18 දේව භයෙන්, පරාර්ථකාමී ප්‍රේමයෙන්, ඇදහිල්ලෙන්, නපුරු වූ දෙයට ද්වේෂ කිරීමෙන්, හා ආත්ම දමනයෙන් යුක්ත ව වර්ධනය වීමට, අප යෙහෝවඃ දෙවියන් වහන්සේ සපයා ඇති සියලු උපකාරයන්ගෙන් ප්‍රයෝජන ගත යුතු ය. ආත්ම දමනය ක්‍රියාවෙහි යෙදවීමට අපට උපකාර කළ හැකි ආත්මික සැපයුම් තුනක් අපි සලකා බලමු. පළමුකොට, යාච්ඤාවේ අනර්ඝ වරප්‍රසාදය ඇත. යාච්ඤා කරන්නට අපහසු තරමට ම කාර්ය බහුල ව සිටින්නට කිසිවිටෙකත් අපට ඕනෑ නැත. එසේ ය, අප “නොකඩව යාච්ඤා කරන්නටත්,” “යාච්ඤාවෙහි නොකඩාව පවතින්නටත්” ආශා කළ යුතු ය. (1 තෙසලෝනික 5:17; රෝම 12:12) ආත්ම දමනය වර්ධනය කර ගැනීම අපි යාච්ඤාවේ විෂයක් කර ගනිමු. එහෙත් ආත්ම දමනය ක්‍රියාවෙහි යෙදවීමට අප අසමත් වන විට, අපි බොහෝ සෙයින් ශෝක වී පසුතැවිලි ව අපගේ ස්වර්ගික පියාණන්ගෙන් සමාව අයැදිමු.
19 ආත්ම දමනය විදහා පෑමෙහි ලා උපකාරය ලැබෙන දෙවන ක්ෂේත්‍රය වනුයේ, දේව වචනය සහ ශුද්ධ ලියවිලි තේරුම් ගැනීමටත්, අදාළ කර ගැනීමටත් අපට හැකියාව ලබා දෙන ප්‍රකාශනවලින් පැමිණෙන පෝෂණය ලබා ගැනීම ය. අපගේ පරිශුද්ධ සේවයේ ඇති මෙම කොටස නොසලකා හැරීම ඉතා පහසු ය! අප ආත්ම දමනය ක්‍රියාවට නංවමින්, බයිබලය මෙන් ම “විශ්වාසවූ නුවණ ඇති දාසයා” විසින් සපයනු ලබන ප්‍රකාශනයන් කියවීමට වඩා වැදගත් වූ වෙනත් කිසි ම දෙයක් කියවීමට නැති බව අප අපට ම කියා ගත යුතු අතර, එසේ ඒවාට ප්‍රමුඛත්වය දිය යුතු ය. (මතෙව් 24:45-47) ජීවිතය කිසිවිටෙකත් එය හා මෙය නොව නමුත් එය හෝ මෙය බව හොඳින් පවසා තිබේ. අප සැබවින් ම ආත්මික පුරුෂයන් හා ස්ත්‍රීන් ද? අප අපගේ ආත්මික අවශ්‍යතා ගැන සිහි ඇති ව සිටින්නේ නම්, අපගේ රැස්වීම්වලට සූදානම් වීම හෝ මොහොතකට කලින් තැපෑලෙන් ලැබුණු මුරටැඹ සඟරාව කියවීම සඳහා රූපවාහිනිය නවතා දැමීමට අවශ්‍ය තරම් ආත්ම දමනය අප ක්‍රියාත්මක කරනු ඇත.
20 තුන්වෙනුව, අපගේ සභා රැස්වීම්වලට හා විශාල සමුළුවලට යුක්තිය ඉටු කිරීම පිළිබඳ කාරණය තිබේ. එවන් සියලු රැස්වීම් අනිවාර්යයෙන් ම අප සඳහා ද? හවුල්වීමට සූදානම් ව පැමිණ, ප්‍රස්තාව ලැබෙන හැටියට අප එසේ හවුල් වෙනවා ද? අපගේ රැස්වීම්වලට අප යුක්තිය ඉෂ්ට කරන පමණට, සියලු තත්ත්වයන් යටතේ ආත්ම දමනය පවත්වන්නට වූ අපගේ අධිෂ්ඨානයේ අප ශක්තිමත් කරනු ලබනවා ඇත.
21. ශුද්ධාත්මයේ ඵලය වන ආත්ම දමනය වර්ධනය කර ගැනීමෙන් අපට භුක්ති විඳිය හැකි සමහරක් විපාක මොනවා ද?
21 සෑම අවස්ථාවක දී ම ආත්ම දමනය ක්‍රියාවෙහි යෙදවීමට වෑයම් කිරීම වෙනුවෙන් අපට බලාපොරොත්තු විය හැකි විපාක මොනවා ද? එක් දෙයක් නම්, අප කිසිවිටෙකත් ආත්මාර්ථකාමීත්වයේ තිත්ත ඵල නෙලා නොගැනීම ය. අපට ආත්ම ගෞරවය හා පිරිසිදු හෘදය සාක්ෂියක් තිබෙනු ඇත. ගැටලු බොහොමයකින් අපට අප ව ගලවා ගත හැකි අතර, ජීවනයට යන ගමන් මඟේ ම සිටින්නට හැකි වනු ඇත. මීට අමතර ව, අන්‍යයන්ට හැකි උපරිම යහපත කරන්නට අපට හැකියාව ලැබෙනු ඇත. ඒ සියල්ල අභිබවා, අප හිතෝපදේශ 27:11ට අනුකූල වනු ඇත: “මාගේ පුත්‍රය, මට නින්දා කරන්නාට උත්තරදෙන පිණිස නුඹ ප්‍රඥාවත්ව සිට මාගේ සිත [හෘදය NW] ප්‍රීති කරපන්න.” තව ද අපට ලැබිය හැකි උපරිම විපාකය නම්, අපගේ ප්‍රේමනීය ස්වර්ගික පියාණන් වන, යෙහෝවඃ වහන්සේගේ හෘදය සතුටු කිරීමේ වරප්‍රසාදයයි! w91 11/15
ඔබට මතක ද?
◻ ආත්ම දමනය ක්‍රියාවෙහි යෙදවීමට දේව භය අපට උපකාර කරනුයේ කෙසේ ද?
◻ ආත්ම දමනය ක්‍රියාවෙහි යෙදවීමට ප්‍රේමය අපට උපකාර කරනුයේ මන්ද?
◻ ආත්ම දමනය පවුල් සම්බන්ධතාවයන් තුළ උපකාරවත් වන්නේ කෙසේ ද?
◻ ආත්ම දමනය වර්ධනය කිරීමට නම් අප හොඳින් ප්‍රයෝජනයට ගත යුත්තේ කිනම් සැපයුම්වලින් ද?
[15වන පිටුවේ පින්තූරය]
නපුරට පොලඹවනු ලැබූ කල, යෝසෙප් ආත්ම දමනය ක්‍රියාවට නැංවූයේ ය
[17වන පිටුවේ පින්තූරය]
සන්සුන් ව හා ප්‍රේමයෙන් දරුවන් හික්මවීම සඳහා සැබෑ ආත්ම දමනය අවශ්‍ය කෙරේ