රාජ්‍යය ප්‍රකාශකයන්ගේ වාර්තාව
යෙහෝවඃ වහන්සේගේ සාක්ෂිකරුවෝ හොඳ ප්‍රතිඵල සමඟින් අනියම් ලෙස දේශනා කරත්
බොහෝ දෙනෙක් හට බයිබල් සත්‍යය හඳුන්වා දෙනු ලැබුයේ යෙහෝවඃ වහන්සේගේ සාක්ෂිකරුවන්ගෙන් කෙනෙක් ඔවුන්ට අනියම් ලෙස දේශනා කළ විට ය. සමාරිය ස්ත්‍රියක් වතුර ගැනීමට පැමිණි විට ළිඳ අසල දී අනියම් ලෙස දේශනා කළ යේසුස් ක්‍රිස්තුස් වහන්සේගේ ආදර්ශය මෙහි ලා යෙහෝවඃ වහන්සේගේ සාක්ෂිකරුවෝ අනුගමනය කරති. (යොහන් 4වන පරිච්ඡේදය) නැගෙනහිර අප්‍රිකාවේ, යෙහෝවඃ වහන්සේගේ සාක්ෂිකරුවන්ගෙන් කෙනෙක් කතෝලික කන්‍යා සොහොයුරියකට අනියම් ලෙස දේශනා කළේ ය. වොච් ටවර් සමිතියේ ශාඛා කාර්යාලය මෙහි ප්‍රතිඵලය මෙසේ වාර්තා කරයි:
◻ එක් හිමිදිරි උදෑසනක සාක්ෂිකාරියක් නගරයට යමින් සිටිය දී, ඇයට කතෝලික කන්‍යා සොහොයුරියක් මුණ ගැසුණි. “මේ වේලාවේ ඔබ කොහේ යනවා ද?” යයි අසන්නට ඇය එය ප්‍රස්තාවක් කර ගත්තා ය. “මං මාගේ දෙවියන් වහන්සේට යාච්ඤා කරන්නට යනවා” යන්න පිළිතුර විය. “ඔබගේ දෙවියන් වහන්සේගේ නාමය ඔබ දන්නවා ද?” යයි අනතුරුව ඇය එම කන්‍යා සොහොයුරියගෙන් ඇසුවා ය. “උන් වහන්සේගේ නාමය දෙවියන් වහන්සේ නොවේ ද?” යයි එම කන්‍යා සොහොයුරිය පිළිතුරු දුන්නා ය. එම දිවා භාගයේ දෙවියන් වහන්සේගේ නාමය සාකච්ඡා කිරීමට ඇයගේ නිවසට පැමිණෙන මෙන් එම සාක්ෂිකාරිය ඇගෙන් ඉල්ලා සිටියා ය. එම සාකච්ඡාවෙන් පසු එම කන්‍යා සොහොයුරිය සිය පල්ලියට ගොස් පූජකයන්ගෙන් කෙනෙකුගෙන් “යෙහෝවඃ” යන්නෙන් අදහස් වන දෙය ඔහු දන්නේ දැයි ඇසුවා ය. පිළිතුර වූයේ, “එය දෙවියන් වහන්සේගේ නාමය” යන්න ය. එම පූජකයා එය දැන සිටිය ද, එය තමාට උගන්වා නොතිබීම ගැන එම කන්‍යා සොහොයුරිය ඉතා පුදුම වූවා ය.
එම සාක්ෂිකාරිය නොකඩවා දින නවයක් තුළ එම කාන්තාව බැහැදැක ත්‍රිත්වය, ආත්මය [ප්‍රාණය], නිරා ගින්න, මෙන් ම මළවුන්ට ඇති බලාපොරොත්තුව පිළිබඳ සත්‍යයන් ඇයට ඉගැන්නුවා ය. එම කාන්තාව ඒ සියල්ල හොඳින් මනසට ඇතුල් කරගෙන එම අලුත් ඉගැන්වීම් සියල්ල ගැන මෙනෙහි කිරීමට යම් කාලයක් දෙන ලෙස එම සාක්ෂිකාරියගෙන් ඉල්ලා සිටියා ය. සති දෙකකට පසු ඇය නැවතත් එම සාක්ෂිකාරිය හමු වී වැඩිදුර සාකච්ඡා පවත්වන ලෙස ඉල්ලා සිටියා ය. මේ වන විට එම කන්‍යා සොහොයුරිය පල්ලියෙන් ඉවත්වීමට තීරණය කර තිබූ අතර සිය රූප, කොන්ත, හා කුරුසය විනාශ කර තිබුණි. එම පූජකයා හැරී ඒමට ඇය ව කැමති කරවා ගැනීමට උත්සාහ කළ ද සත්‍යය ලුහු බැඳීමට ඇය අධිෂ්ඨාන කර තිබුණි. පසු ව ඈ බව්තීස්ම වූ අතර, ඇයගේ දුර්වල සෞඛ්‍ය හා මහලු වයස මධ්‍යයෙහි පවා මාස ගණනාවකට නොකඩවා උපකාරික පුරෝගාමියෙකු ලෙස සේවය කළා ය.
තමාගේ නිවස විශාල වූ එකක් බැවින්, ඇය එය රාජ්‍යය ශාලාවක් ලෙස පාවිච්චි කරන ලෙස සභාවෙන් ඉල්ලා සිටියා ය. සහෝදරයෝ පැරණි වහල නැවත සකසා, ඇතුළු බිත්ති ඉවත් කර, එම ගොඩනැගිල්ලේ විශාල කොටසක් ආකර්ෂණීය රැස්වීම් ශාලාවක් බවට පත් කළහ. කලින් කන්‍යා සොහොයුරියක් ව සිටි ඒ තැනැත්තිය ශාලාවේ පසු පස කාමරයක ජීවත් වන්නී ය. යෙහෝවඃ වහන්සේගේ නමස්කාරයට මෙම පරිත්‍යාගය කිරීමට හැකි වීම ගැන ඇය අතිශයින් සතුටු වන්නී ය.
◻ අනියම් ලෙස සාක්ෂි දැරීමේ ඥානවන්තකම පෙන්වන තවත් අත් දැකීමක් උගන්ඩාවේ, කම්පාලා නුවරින් පැමිණේ. රජයේ කාර්යාලයකට යන අතර, සාක්ෂිකාර මිෂනාරිවරයෙක් තමන් සමඟ උත්තෝලකයේ සිටි අයට අනියම් ලෙස කථා කළේ ය. එල්—,මහතා නම් මනුෂ්‍යයෙක්, ඉදිරිපත් කළ ප්‍රකාශනය ලබා ගැනීමට ආශාවක් දැක්වුව ද, ඒ අවස්ථාවෙහි එය ලබා ගැනීමට නොහැකි ව සිටියේ ය. එබැවින් ඔහු එම මිෂනාරිවරයාට ඔහුගේ නමත්, ඔහුගේ කාර්යාලයේ ලිපිනයත් දුන්නේ ය. අනතුරුව එම මිෂනාරිවරයා එම කාර්යාලයට ගොස් එල්—,මහතා ව හමු වීමට ඉල්ලා සිටියේ ය. ඒ තැනැත්තා ව හඬ ගසන ලදමුත් මිෂනාරිවරයා පුදුමයට පත් කරමින්, එහි ඔහු ඉදිරියේ සිටියේ වෙනත් මනුෂ්‍යයෙකි. එක ම නාමය දරන මනුෂ්‍යයන් දෙදෙනෙක් එම කාර්යාලයේ සේවය කළහ. එම දෙවන එල්—,මහතාට කෙටි සාක්ෂියක් දරන ලද අතර හෙතෙම අසාමාන්‍ය උනන්දුවක් පෙන්වී ය. එහෙත් පළමු එල්—,මහතා තුළ තිබූ උනන්දුව නැති වී ගිය නමුත් දෙවන එල්—,මහතා සමඟ බයිබල් පාඩමක් පටන් ගන්නා ලදි. ඔහු දැන් බව්තීස්ම ලැබූ සාක්ෂිකරුවෙක් වන අතර, ඔහුගේ භාර්යාව හා පුත්‍රයා බව්තීස්මය කරා හොඳ වර්ධනයක් ලබමින් සිටිති.
මාහැඟි එඬේරාණන් වන යේසුස් ක්‍රිස්තුස් වහන්සේ, ධර්මිෂ්ඨකමට නැඹුරු වූ හෘදයන් ඇති බැටළුවන් වැනි අය දන්නා සේක. උන් වහන්සේ එවන් අය වෙතට සිය අනුගාමිකයන් යොමු කරන බව මෙම අත් දැකීම්වලින් පැහැදිලි වෙයි. අනියම් සාක්ෂිදැරීම ඵලදායී විය හැක!—යොහන් 10:14. w92 1/1